لافي يفتح الدرج: خذ
ناصر يشوف الشيكات الي بيد ابوه: ايش ذول!!
لافي بنظرة حب: هذا لنوف وهذا للعنود.. انا احب عيالي وعمري ما تمنيت لهم الضر.. انا عايش عشان عيالي.. لا تترك عيال ابليس يلعبو عليك.. لافي ذبح عمره عشان عياله انت طول عمرك تشوفني كذا
ناصر يوقف وياخذ الشيكات منه: ما قصرت هذا دليل على انك طيب وقلبك كبير.. وبوصل الشيكات للبنات واقول لهم ابوكم يبي يعوض خسارتكم.. بس ما تلاحظ يابوناصر ان المبالغ قليله بالنسب للي فقدوه البنات!!
لافي بابتسامه: انا ومالي وحلالي ملك لعيالي.. الي يطلبوه ما بغليه عليهم حتى لو طلبو عمري
ناصر يمد يده: لو سمحت الاوراق
لافي مستغرب: ليه!!
ناصر: صار لي نص ساعه وانا جالس معاك.. وشكلك منت موافق على الشروط الي بالقعد.. خلني امشي عشان عندي شغل
لافي يبتسم: شغل مع مين؟
ناصر ومركز عينه بعيون ابوه: مع جراح طبعا.. ما سمعت عن المشروع الجديد الي بيطرحه اليوم!!
لافي كشر: أي مشروع!!.. ماوصلني علم عنه
ناصر يبتسم: وهذا العلم وصلك.. الاوراق لو سمحت عشان اجهز اموري لاني ناوي ادخل شريك مع جراح في ذا المشروع
لافي من غير تفكير وقع على الاوراق: دوامك يبتدي الان
ناصر بأبتسامة نصر: جهزلي كشوفات الشركه في الفتره الي غبت فيها لحد الان
لافي: الكشوفات بتكون على مكتبك بعد شويه.. ابي اسم المحامي الي كتب لك هالعقد
ناصر: ليه!!
لافي: ابيه يشتغل معاي.. محتاجه في الفتره الجايه
ناصر يضحك: المحامي ذا تبعي انا.. تقدر تقول ملكي انا.. ماحد بيشغل معاه غيري انا.. شوف لك محامي تبعك.. عشان أي غلط بيصير من المحامي تبعي بتقول اني لاعب عليك.. وهالشي ما ابيه يصير ابد

&&&&&&&&&&&&&&&&&&&&&&

9:30 الصباح
شقة خالد ..غرفته..
البحرين

لبست ووقفت عند المرايه اشوف حالي.. احس بثقه في داخلي من بعد الي صار.. ثقه تخليني ادخل مع ليال الشركه وانا بكل قوتي.. ثقه تخليني متأكده اني اقدر اعتني ببنتي واربيها واحميها من اي أذيه ممكن تتعرض لها في ايامها الجايه.. من صار الي صار وانا ساكته وما فتحت هالسيره ابد مع خالد.. بس مع نفسي غير.. ماكنت اسرح الا بهالموضوع وماكنت افكر الا بهالموضوع.. لمى مره قالت لي انها توقعت مني ردة فعل تزلزل الكل.. بس سبحان الله انا حاسه بهدوء.. حاسه براحه كبيره.. يمكن عشاني ارتحت من ام خالد نهائي.. يمكن عشان عمي جلس معاي وقال لي كل شي صار بينه وبين العقربه ام خالد.. يمكن لانه حلفني ما اجيب سيرة الي قاله لي لخالد ولحنان حسسني اني مهمه عنده وان الي صار عشان خاطري.. وانه قدر يرمي هالعقربه في مستشفى للمجانين حتى يدافع عني ويجيب حقي لي منها
خالد حاول كثير انه يبتدي في حوار معاي على الي صار.. بس انا ما كنت حابه ابين له فرحتي وسعادتي بالي صار لامه حتى ماياخذ مني موقف.. عارفه انه يحب امه كثير وعارفه اذا استحمل فرحتي فيها اليوم بيجي اليوم الي يلومني على هالشي عشان جذي ما كنت حابه افتح معاه الموضوع ابد.. تركت سعادتي بقلبي وبس.. فرحتي تملي عيوني وبس.. واكتفيت معاه بسكوتي.. ماهو شماته فيها بالعكس احساس بان حقي الي انتظره جاني.. حياتي تبدلت بين يوم ليله.. عشت الفرح الي كنت اسمع عنه.. نسيت بدر وحياتي معاه.. نسيت عذابي ومعاناتي.. بديت اعيش الحياه صح.. بديت اضحك صح وانام صح.. بديت احب كل شي حولي اكثر من اول.. صرت احب خالد اكثر واكثر صرت احب اجلس مع البنات وامزح معاهم اكثر من أي وقت مر علي معاهم.. كانو لي الاهل والعون.. كانو لي الخوات الي ماجابتهم امي.. صرت في الفتره الاخيره او من بعد الي صار بالتحديد احب جلسة السجود.. احب اتكلم مع ربي في كل شي.. اكتشفت ان كل السعاده الي انا فيها لان نفسي راضيه لاني اعايشه بشكل حلو وراقي مع ربي.. التعويض الي ربي عوضني ياه مستحيل احد يقدر يعوضه لي.. بنتي الي ربي حفظها لي هي روحي وحياتي.. هي ضحكتي وراحتي.. كلها اسبوعين وتكون بحضني.. كلها كم يوم وتعيش معاي اشوفها قدام عيني تلعب وتتعب.. تضحك وتصيح.. تقوم وتطيح.. ياربي تحفظ حياتي وزوجي وبنتي وخواتي واخواني.. وابوي الغالي منصور
خالد يدخل ويشوفها سرحانه: حبيبي يفكر في من
لبنى واحلى ابتسامه: اقولك وماتزعل
خالد يبتسم: طبعا لا
لبنى باحراج: خالد ودي اعترف لك بشي بس اخاف تزعل علي
خالد خاف من الي ممكن تقوله: خير ياقلبي
لبنى تشوف عيونه: انا احب
خالد منع روحه عن الضحك: ما شا الله تحبيييييين؟!!
لبنى وماخذه راحتها: خالد ما اقدر امنع رحي عنه.. احبه من قلبي.. ماكنت اتوقع اني احب احد مثله.. تصدق راحتي وسعادتي مرتبطين بوجوده
خالد: يا بخته.. صدق محظوظ
لبنى تضربه على كتفه: لا تحسده.. ما ارضى عليه
خالد يبتسم: طيب اسمه الي حبيتيه عشان اروح اترجاه يتركك لي
لبنى: اش تبي بأسمه.. اسمه محفور بقلبي
خالد يحضنها: وانا!!!!!
لبنى تبتسم: انا آسفه راحت عليك
خالد يضحك: افا راحت علي مره وحده.. زعلت يالبنى وبشوف اشلون تراضيني.. ولا اقول لك روحي لحبيبك خليه يدلعك
لبنى بهمس: ما تقدر تزعل علي اتحداااااااااااااااااااااااااك
ما اقدر ما احبه.. ما اقدر اعيش بدونه.. صحيح بين كل فتره اتذكر الي صار.. من فرقتني امه عنه لحد اليوم بس بسرعه الغي هالفكره عن راسي وافكر فيه وفي حبه وحياتي معاه.. التفكير في الي راح ماراح يزيد قلبي غير حسره ووجع.. وانا ما ابي الوجع يسكني من جديد.. كفايه علي.. من حق قلبي يرتاح الحين.. من حق قلبي ما اتعبه اكثر.. طلعت معاه ورحت المستشفى لحنان بنتي.. جلست معاها لحد ما قال لي خالد بنمشي.. كل مره اطلع عنها وانا ما ودي افارقها.. احس اني اترك قلبي معاها وامشي.. معلش صبرت ياقلبي كثير.. ما بقى الا كم يوم وتفرح ان شا الله.. طلعنا لمحل اثاث.. خالد قال ضروري ننتقل للبنايه الجديده.. وضروري نختار الي نبيه بسرعه حتى الوقت يكون في صالحنا.. اول شي اخترت احلى اثاث يناسب بنتي.. الحين هي اهم مني.. وفرحتي بها اهم من راحتي.. خالد ياقلبي اخذ كل شي شافته عينه وقال بنتي وابيها اميره على عرش الدلع.. ضحكت له وقلت ما ابيها تتربى على الدلع بس.. بيها تتربى على السنع

&&&&&&&&&&&&&&&&&

10:45 الظهر
محل منصور الشيخ
البحرين

منصور طاير من الفرحه: اش قلتي ياخوله
خوله تفكر: والله ياعمي كلهم عاجبيني.. بس محتاره
عبدالرزاق: اذا عاجبينك خذيهم كلهم
خوله تفكر: لالا هذول بس. ليال اش رايك
ليال: خوله تعرفيني ما احب الذهب.. انا احب الالماس
منصور: مزيان يبا اصبري شوي الاطقم هذول ماراح يعجبونك.. فيه اقم خاصه عندي داخل الخزنه شوي ويجيبوها العمال
مزيان براحه: زين الي قلت لي
ليال تضحك عليها: وليه ما قلتي انهم ماعاجبينك
مزيان تضحك: استحيت وبعدين عيبه في حق عمي اقول له هالكلام
منصور بحنان: لا يبا عادي.. وبعدين كل شخص وله ذوقه.. الاطقم هذي لها ناسها.. ومافيها شي لو سألتيني عن الاشكال الي تبينها اذا عندي بوريكي ماعندي بقول لك اعذريني
العامل وصل: عمي 20 طقم من الي آمرت عليهم.. وهذول اطقم المدام الي موجودين بالخزنه
منصور ياخذ علب ليال: ليال يبا تفضلي
ليال تفتح العلب بفرح: تسلم لي يابعد حيي.. ما قصرت معاي
منصور يفتح العلب الثانيه وهو يشوف ليال بحنيه: انتي بنتي.. والي تبينه انا حاضر له.. شوفي هذول يبا مزيان
مزيان فتحت عينها: واااااااااااااااااااااااااااااو خياااااااااااااااااااااااااااال
خوله: ياخبله وش تشوفين
مزيان: شوفي الاطقم الي عند ليال.. عمي انا ابي زي هذول
منصور يضحك على ردة فعلها: الاطقم هذي ماهي من عندي.. وبعدين هي ملك ليال من زمان
جراح ساكت ويشوف الاطقم ووده بسألها بس منع نفسه: بوخالد طيب اشكال مقاربه لهالاطقم
منصور: شوفو الاطقم هذي.. هي مشابهه للي عند ليال بس التصميم غير
ليال تركت علبها مفتوحه وراحت تشوف الاطقم الي جابها منصور: واااااااي حلوين ياعمي.. شوف ابي واحد.. اثنين.. ثلاثه.. امممممممممممم اربعه.. امممممم وهذا الخامس.. انا ابي هذول
منصور فتح عينه عليها: يابنت
ليال رفعت عينها عليه: خير!!.. ابي هذول
جراح يضحك: لا تردها يابوخالد تاخذ الي تبيه
مزيان معترضه: وانا مصره على علب ليال.. ليال بيعيني وحده منهم
ليال تضحك: انا آسفه هذول ملك الغلا والحلا.. اعذريني والله يا مزيان.. حتى انا بحياتي ما لبستهم
جراح فهم ان الاطقم من ناصر: مزيان حبيبتي.. شوفي الاطقم هذي بالاول واوعدك يكون عندك زي الي تبين
مزيان ابتسمت لجراح: انا آسفه نسيت حالي.. بس من جد اخذو عقلي
ليال تحظنها: والله ما يغلو عليكي.. وان في نفسك تلبسيهم عادي عندي.. بس ابيعهم اعذريني
خوله واقفه تشوفهم وساكته: خلصنا عبدالرزاق؟
عبدالرزاق حس يضيقها: أي حبيبتي
خوله: عمي شوف لي اسعار هالطقمين.. الله يخليك باقي علي مشوار طويل.. والعيال تاركتهم مع الشغالات
ليال فهمت: خوله ماله داعي.. حتى جراح ما يعرف عن الموضوع
خوله ما عطتها وجه: عبدالرزاق اقدر انتظرك بالسياره؟
عبدالرزاق: جراح حاسب انت وبعدين نتفاهم
جراح: ماشي
ليال مسكت خوله: كنت محتاجه للفلوس.. ماهو معقوله امد يدي لكم واقول لكم سلفوني.. ما دخلت عليكم عشان تصرفو علي او تسلفوني وانا ماني عارفه اذا برجع هالفلوس ولا لا.. ماهو من العقل اتسلف منكم واخسر الفلوس واقول لكم اعذروني.. ما تعودت اعتمد على غيري وانا معاي ياخوله
خوله بحده: على الاقل نعرف.. تصرفتي من غير ما احد يعرف.. كأنها حياتك بروحك.. واحنا شنو
ليال: انتو كل حياتي.. بس الفلوس لا ياخوله.. السلف تلف.. والدين ما يترك صاحبه مرتاح
خوله بحزن: ومن متى رهنتي الاطقم
ليال: من اول ماتعرفت على حنان.. في اليوم الي توفى فيه عمي ناصر الله يرحمه
عبدالرزاق: كان عندي الي بيكفيك يا ليال.. كان ممكن توفري على نفسك كل هالعنا الي انتي فيه.. انا اخوكي الكبير.. مافي اخو بيفرح بالي سويتيه
ليال: عبدالرزاق انت اخوي ويشهد الله علي انك مقام الاخ الي اعتز به.. بس شغلي انا مسؤوله عنه.. لو اني واثقه من الربح كنت اخذت منك.. بس نفسي ما قبلت امد يدي لاي احد
عبدالرزاق بزعل: ماني أي احد ياليال.. من شوي قلتي اني اخوك الكبير
جراح: ليه ما دفعتي دينك من فلوس المهر الي عطيتك ياها.. ليه صبرتي كل هالمده
ليال تبتسم: مهري هذي فلوس زوجي الي عطاني ياها ما ابي اخسرها.. جراح الاطقم هذي ناصر الي شراها لي يعني لو راحت ماراح تهمني.. اسمي اني رهنتها عشان أأمن حياة بنات ناصر.. اما فلوس جراح فهي لي انا.. ما ابي اضيعها عشان اطقم ناصر.. الموضوع بالنسبه لي حسي ماهو مادي
عبدالرزاق: بس اسمه رهن
ليال معترضه: لالالالا ماهو رهن الي متعارف عليه هالايام.. عمي منصور ما يرهن.. وقال لي انه ما مايتعامل بالرهن.. اعطيته الاطقم وعطاني المبلغ الي طلبته.. قلت له ان وفيت دينك يرجعو لي وان ما وفيته فهم حلال عليك.. الرجال شريف معاي
منصور بعتب: تشوفني ادل طريق الحرام؟!!
عبدالرزاق بضيق: لا ياعمي.. حاشاك الحرام.. بس تصرفها غلط.. معاك او مع غيرك.. هي تصرفت من نفسها وفي رجال حولها.. لو ماعندنا ممكن اعذر.. بس الحمدلله الخير كثير
ليال تبتسم: والنعم بالكل ورجولة الكل.. انا ما تصرفت من نفسي.. انا متشاوره مع صلاح وهو وافق على فكرتي.. ماهو عشان مستقله بكم او ما اشوفكم اهل لثقتي.. بالعكس.. كل الي كنت افكر فيه اني ما ابي امد يدي لاي احد
مزيان تبلع ريقها: يعني بتقلبوها محزنه والليله ملكتي
خوله وتحس النار شابه فيها: لا ياقلبي.. فرحتك اهم من كل شي
كنت متأكد ان ليال متفقه مع منصور على هالحركه.. لاني من كم يوم بس سألتها منين لها كل هالفلوس الي شرت بها العماره.. والي ابتدت فيها الشراكه مع المجموعه ابتسمت لي وقالت ان خوله بعد تلح عليها بهالسؤال.. انا واثق ان منصور مستحيل يغلط بكذا تصرف ويجيب الاطقم قدامنا كذا.. واثق بعقله وحكمته.. عارف طبعه وتصرفاته.. اكيد ليال متفقه معاه.. خوله كانت واقفه وتبي الموضوع يخلص باي طريقه.. الغريب اني كنت ساكت.. ماغير نظراتي الي اتبادلها مع عبدالرزاق.. هو متضايق لان ليال ابعدت الكل وما لجأت لاحد وقت الي كانت محتاجه للفلوس.. وانا محتار افرح عشانها تبي تحتفظ بفلوسي وماهو هامها لو تخسر اطقم ناصر ولا اعصب لاني كل يوم اكتشف انها تعتمد على نفسها وتنسى وجود الرجال الي ممكن يساندونها في موضوع زي ذا.. واحد غير منصور كان سرق الاطقم من زمان
طلعنا من منصور بعد ما استقر راي مزيان على طقمين حلوين من اختيار ليال.. خوله كانت بعيده شوي وليال احترمت قهر خوله وما حاولت تستفزها ابدا.. اقدر اقول اني حسيت انهم ممكن يدخلو جو الزعل مع بعض

&&&&&&&&&&&&&&&&&&&

1:20 الظهر
فيلا العايله ..الصاله..
البحرين

ام سلطان حاضنه نوف: جعل الفرح ما يفارق عيونك يما
نوف بتعب: اخير وصلت يما.. مقدر انام والخوف بيقتلني على سلطان
ام سلطان تبوس راسها: بعيد الشر عنك وعنه.. الحمدلله على سلامتكم يما
نوف مغمضه عيونها: يما ما شفت جدتي
ام سلطان: جايه بالطريق يما
نوف دايخه: وين الكل مافي غيري معاكي
ام سلطان: العنود اخذت سلطان لانه نام.. وعمتك بالمطبخ تقول للشغالات يجيبو لك اكل
نوف بتعب: يما ما اشتهي ابي انام بس
ام غسان تقرب منها: نوف يما.. اجلسي اكلي شي وبعدين نامي
نوف: عمتي ابي انام بس
ام غسان: لا يما ما يصير كذا انتي والد.. اكلي شي بسيط وبعدين نامي.. ولدك محتاج قوه ورضاعه


في الملحق
ناصر برا الملحق: يام شهد.. ام شهد
غسان: البنت البارح جات منهاره.. المسعف يقول انه وقت الي نثر الدم الي بالكيس على سريرها ثارت اعصابها.. اظطريت اعطيها مهدأ
الجده: خير ما فعلت يما.. الان نشوف ايش الموضوع.. ناصر دق على مسعود
ام شهد تطلع: حيا الله عمتي ام فهد.. هلا عمتي
الجده تبعدها عنها وبحده: ناصر اعطيها التلفون.. كلمي زوجك.. يبي يتطمن عليكي
ام شهد اخذت التلفون: الو
مسعود: هلا حبيبتي
ام شهد: هلا هلا.. بشر ايش صار معاك
مسعود يضحك: كل الخير حبيبتي لا تخافي علي.. طمنيني على العيال
ام شهد: طيبين شهد نايمه.. وسعد جالس يشوف التلفزيون
مسعود: تمام.. بكلمك بين كل فتره.. الان التلفون الي معاكي سلميه لناصر حتى يوثقو فيكي.. قولي له الوقت الي تبين تكلميني فيه راح تطلبي منه.. وضروري تكلميني قدام أي احد.. حتى ما يشكو ان بيننا لعبه او شي شين ناوين عليه
ام شهد: حاضر.. طيب انادي سعد تكلمه.. تراه من صحا وهو يسأل عنك
مسعود: لا حبيبتي.. ماهو الان.. اسمعيني زين.. ابيكي تتقربي منهم بصفا نيه وطيبه حتى نظمن حياة العيال.. واذا حسيتي انهم متضايقين منك الزمي مكانك وخلي عيالك جنبك
ام شهد: ماراح تجي
مسعود يتنهد: ارتاح من لافي وارجع اخذكم
ام شهد تبكي: الله ياخذه ونرتاح منه.. الله ياخذه
مسعود: يلا ما اوصيكي على العيال.. مع السلامه
ام شهد تبكي: العيال بعيوني.. مع السلامه
الجده: تطمنتي عليه وتطمن عليكي
ام شهد تمسح دموعها: ايوا عمتي الحمدلله
الجده: ناصر صلاح يما اتركوني معاها شوي



يتبع

في الصاله
العنود بفرح: ياربي ودي اناقز
فتحيه بخبال: يلا يابنت قومي نناقز مع بعض
ام عبدالله: اجسي انتي وياها فضحتونا الله يفضح العدو
العنود تضحك: خالتي.. مالك معصبه.. افرحي
ام نوره: افرحي يام عبدالله.. الحمدلله الكل بخير
سوسن: الشور يقول لي.. نعمل حفله
نوف بتعب: الاول اناااااااااااااام.. لا تعملو حفله من غيري الله يخليكم ابي انبسط
فتحي: يالخبله كيف بنعمل حفله وانتي نايمه.. لا تنسي انك العروس
صلاح يدخل: هلا والله وغلا
فتحيه هبت فيه: اسكت انت.. لا تتكلم ولا تهلي وترحب.. عارفين انه من ورا قلبك
ام عبدالله حطت يدها على راسها: يا فشيلتنا في الرجال.. الله يغربل بليسك يا فتوح انتي ليه لسانك فالت كذا
صلاح يضحك: اتركيها ياخالتي.. تقول الي تبيه هي عارفه غلاوتهاعند الكل
ناصر: لا تكبر راسها تراها تطيح فيك
فتحيه: غصب عليه يكبر راسي.. انا اخر من يعلم
ام سلطان تضحك: شفت ابوك يما
صلاح: ايوا يما شفته واخذت له سلطان يلعب معاه.. قبل لا تاخذه العنود تنيمه
نوف تبتسم يتعب: قال يشبه مين
صلاح يضحك: ابوي الله يخليه يشوف العيال كلهم يشبهو ليال
سوسن: وهو الصادق.. تراه يشبهها
فتحيه: شوفي ياخوفي تجيبي بنت وتطلع تشبهها وتمسيها ليال مره ثانيه
سوسن تضحك: شوفي ان طلعت بنت بسميها ليال.. وان طلع ولد بسميه ليال
ام غسان تضحك: الله يقومك بالسلامه يما
صلاح يدني من نوف ويحملها: لازم تنامين الان
نوف بهمس: عيبه اتركهم
صلاح يبتعد عنهم: الكل عارف بتعبك.. وعاذرينك
نوف بفرح: ابي اشوف ولدي قبل ما انام
صلاح يبتسم: بينام بوسطنا
نوف تحضنه اكثر: الحمدلله.. الحمدلله انه بخير وانت معاه.. الحمدلله الي جا بالسلامه وعيوني شافته


عند الملحق
الجده جالسه على كرسي بالحديقه: ماني مصدقه!!
ام شهد: هذا الي خلاني اترك الخدمه هناك
الجده فاتحه عيونها: ولطيفه وينها عن البنات!!
ام شهد بضيق: مهمله البنات.. ويومها كله عزايم وحريم اما يكونو عندها او تروح لهم
الجده مسكت راسها: يناته!! الله اكبر الله اكبر
ام شهد: عمتي ما اظن.. اكيد اني كنت غلطانه.. انا من جيت هنا وعرفت انهم تزوجو وجابو عيال حمد الله ان حياتهم من احسن ما يكون.. لو انه اعتدى على بناته كان بين
الجده تشوفها بحزن: حسبي الله ونعم الوكيل
ام شهد: عمتي صدقيني انا خفت الله في البنات وكنت ادير بالي عليهم.. بس انتي عارفه قوته وسلطته.. وعمتي لطيفه كانت تموت على ترابه فكرت اقول لها بس قلت اكيد ماراح تصدقني.. الي علي سويته
الجده بحده: كنتي تقولي لي
ام شهد بحزن: فكرت بس بالنهايه حتى انتي ما بتقدري تعملي شي.. هذا ابوهم ومن بيشك بهالشي.. بس شوفي لو اني متكلمه من قبل كنت عملت مشكله مالها اساس.. وظنوني طلعت غلط فيه
الجده سرحت بعيد:...........................
ام شهد: عمتي الحمدلله ربك موجود هو يحفظ البشر والعباد.. والحمدلله ربي حفظ بنتي منه وماطل منها شعره
الجده: هو الي ذبح ولدي فهد؟
ام شهد جمدت: عمي فهد!!
الجده مسكت يدها: ايوا فهد ولدي.. هو الي ذبحه؟
ام شهد: لما عمي فهد رفضه.. كنت كثير اسمعه يهدد بذبحه.. كانت سيرة الموت على طول بلسانه.. بعدها بفتره توفى عمي فهد.. بس ما عمري سمعت انه له يد بوفاته.. صحيح شفت فرحته بموت عمي فهد بس بحياتي ما سمعت ان له يد بموته.. انا سألت مسعود مره اذا لافي ذبحه.. حتى مسعود ماعنده خبر
الجده: وانتي ايش تشوفي
ام شهد: اذا تبين احساسي.. فاحساسي يقول ان لافي ذبحه.. بس ماعندي دليل ولا عندي شي يأكد كلامي
الجده تبتسم: كفايه عندي انه اعتدى على بناته.. هذا اكبر دليل
ام شهد بغباء: كيف طيب وهم متزوجات!!
الجده تتنهد: حسبي الله ونعم الوكيل.. وعبير ما شفتيه معاها
ام شهد نزلت راسها: هالبنت من يوم يومها وهي نسخه من ابوها.. اذا كنا بالسعوديه ولا برا السعوديه عادي تتصاحب على الاولاد تقابلهم بأي مكان يخطر على بالك.. انا مره شفتها دخلت مع ولد بملحق الفيلا ولافي كان مسافر.. وماحد انتبه عليها
الجده بحده: وليه ما قلتي للطيفه
ام شهد تشوفها بعتب: ايش تبيني اقول لها.. الحقي بنتك تقابل اولاد بالفيلا.. ياعمتي عبير خبيثه زي ابوها في لحظه تشوفي الولد وفي لحظه يختفي.. هذي تبلت على اكثر من شغاله عشانهم هددوها يبلغون عمتي لطيفه عنها.. وما اقول لك عن المصايب الي ختلقتها للشغالات.. ياعمتي انا معاي القلب.. وصحتي على قدي.. ماني حمل بهدله.. بس وقت الي فاض فيني وماقدرت استحمل تركت كل شي وجلست في بيتي

&&&&&&&&&&&&&&&&&&&&&

7:00 المغرب
شقة عبدالرزاق ..الصاله..
البحرين
عبدالعزيز: خوله ليش مهمومه اليوم!!
عبدالرزاق: متزاعله مع ليال
عبدالعزيز يضحك: قول غيرها.. خوله وليال!! هذي عاد يبي لها حفله خاصه
عبدالرزاق بضيق: اذا تقدر تسوي شي ما بمنعك.. اكره اشوف زوجتي زعلانه.. ينقلب يومي وحالي.. خوله ساكته وليال ساكته.. وانا وجراح واقفين متفرجين
سألته شالي صار وقال لي.. كنت اسمعه واشوف ضيقه على موضوع تافه.. احس ان ليال معاها حق بالي سوته.. كيفها اطقمها وهي حره فيهم تبيعهم تحرقهم كيفها.. هي تبي تأمن حياتها وحياة بناتها شنو يعني تمد يدها وتقول لهم ساعدوني!! قلت له ينادي خوله كنت اتكلم معاها وهي ضايقه بها الدنيا.. قلت لها اني بحياتي معاهم ما تسلفت منهم مع اني جاتني ايام ما كنت اذوق طعم الاكل.. كنت اخاف ادفع فلوس اكل فيها واصحى ثاني يوم ما القى مكان انام فيه.. صارت تشوفني هي وعبدالرزاق.. وابتدت رحلة العتب واللوم.. المسأله ماهو اخوي وانا محتاج وابيه يساعدني المسأله ان نفسي عزيزه تترفع عن اني اذلها حتى لو كنت جايع.. طلع جراح من مجلس الرجال وترك الشباب
جراح: ها وصلت لحل سلمي يرضي الطرفين
عبدالعزيز: انا اشوف الموضوع في صالحنا انا وانت وعبدالرزاق
عبدالرزاق: اشلون يعني!!
عبدالعزيز يشوف خوله: بالنسبه لي هذا هي الشيخه خوله جالسه في شقتها وتاركه زوجتي.. يعني عشان ما تعطيها كم درس يقلبو علي ليلتي معاها
خوله بحده: جذي يا عبدالعزيز!!!!!!!
عبدالعزيز كتم ضحكته: وبالنسبه لجراح.. بتعتقه كم يوم وبتصير ليال فاضيه له
جراح يضحك من قلب: هذا الي ما فكرت فيه.. يسلم لي عقلك
عبدالعزيز: وبالنسبه لعبدالرزاق بينرحم من سيرة ليال وتصير زوجته قدام عيونه اكثر من قبل.. بدل ماهي مزروعه بشقة ليال على طول.. خوله انصحك تطول فترة الزعل بينكم
عبدالرزاق كتم ضحكته بس وجهه صار احمر: لالا ما ارضى على زوجتي
خوله فتحت باب شقتها وبحده: ماشي ياعبدالعزيز ماشي.. الحين رايحه لمزيان عشان اقلب الليله عليك.. وانت ياجراح بطلع وناستك من عيونك.. وانت يارزاق ماسك نفسك عن الضحك ماااااااااااشي.. الحين بسوي حزب عليكم انتو الثلاثه ووروني الليله اشلون تضحكون
عبدالعزيز بعد ما مشت خوله فقع ضحك: الحريم عقولهم اصغر منها مافي
عبدالرزاق بفرح: ماقصرت.. المهم انها ترجع تكلم ليال.. حتى لو بيقلبون الليله علينا بس المهم عندي خوله ما تخسراختها وتبات وهي زعلانه منها
جراح يضحك: يارجال ما يقدرون.. هذول مالهم غير بعض
عبدالعزيز: اقول اش رايك تعطيني رقم زوجتي وتاخذ هالفتى اللطيف وتدخلون المجلس وتتركوني اتكلم معاها براحتي
جراح يضحك: ماشي خذ عندك
عبدالرزاق: الله يبارك لك فيها.. تعوضك وتعوضها الخير
عبدالعزيز: ماترد اكيد خوله جنبها.. افاااااااااااااااا ما حسبت هالشي
عبدالرزاق يضحك: اقلبتها خوله
عبدالعزيز يضحك: افا عليك وانا عبدالعزيز.. جراح اتصل من تلفونك
جراح يدق: الو
خوله: خير بغيت شي
جراح يشوف عبدالرزاق وعبدالعزيز ويضحك: هلا بام سالم.. وين اختي ابي ابارك لها
خوله: عزيز وينه
جراح ومسك نفسه عن الضحك: مع زوجك ادخلو المجلس
خوله تعطي التلفون مزيان: مزيان كلمي جراح يبيكي.. جراح بس وغيره لا ساااااااامعه
ليال تضحك: راحت عليك ياعزيز اليله
خوله بقهر: عشان يحرم يستغل زعلنا لصالحه
جراح بهمس: رجعو كلمو بعض
عبدالرزاق بهمس: الله يطمن قلبك
مزيان اخذت التلفون من خوله وبفرح كبير: هلا جراح
عبدالعزيز سمع صوتها وابتسم: ..............................
مزيان علت صوتها لان عندها ازعاج: الو جراااااااااااااااح تسمعني
عبدالعزيز: خذي التلفون وابتعدي عن الكل
مزيان انربط لسانها: .......................
عبدالعزيز حس بحركتها وهي تبتعد: وين وصلتي
مزيان بحيا: لغرفتي
عبدالعزيز: قفلي الباب لان خوله متحلفه فيني
مزيان ضحكت: ..................
عبدالعزيز جلس على الكرسي براحه: مبروك علي انتي
مزيان ضحكت: ..................
عبدالعزيز: شنو بكلم روحي!!
مزيان بحيا: ماني عارفه ايش اقول
عبدالعزيز: قولي لي من احلى انتي ولا خوله
مزيان ضحكت: وانا ايش عرفتي
عبدالعزيز: لااااااااااا ضروري تعرفين
مزيان: وكيف!!!!!!
عبدالعزيز: ابسط شي تقدرين تقولين لانك زوجة عبدالعزيز فاكيد انتي احلى
جراح يطلع: يلا خلاص
عبدالعزيز تلخبط: شنو الي خلاص!!!! انا ما سمعت صوتها ليلحين
جراح يضحك: نلفوني يا اخي
عبدالعزيز براحه: ها أي كنت احسب بعد
جراح يضحك: اقول ايش رايك تروح تاخذها وتطلعو تتعشو برا.. حتى خوله ما تقلبها علينا جد الليله
عبدالعزيز: اش رايك حبيبتي
مزيان داخت من سمعت حبيبتي: ..................
عبدالعزيز ابتسم: اوكي جراح بس انت ادخل جيب زوجتي
جراح يضحك: كل هذا خوف من خوله
عبدالعزيز: وما ادراك ما خوله.. حبيبتي اجهزي جراح جايك
مزيان ماغير لافه بها الدنيا وناسيه الكلام: ..............................

&&&&&&&&&&&&&&&&&&




يتبع

8:30 الليل
فيلا لافي ..غرفته..
السعوديه

لافي بجديه: يا بوبشار الدعوه محتاجه شرح.. انت سمعت منهم ضروري تسمع مني
بوبشار بحده: ايش الي تبيني اسمع يكفيني اشوف الخساره.. ماهو ذا العشم يالافي.. حنا اصحاب من زمان ما ضنيت انك تغدر بي بهالطريقه.. يا اخي حس على دمك.. فيه شي اسمه عيييييييييييييب.. والتجاره تبي الرجال المحترم حتى الواحد يتشجع ويشاركه.. بس انت وين والاحترام وين
لافي بحده: انا محترم غصب عليك
بوبشار بحده اكبر: شوف تصرفاتك مع الخلق وانت تشوف نفسك محترم او لا.. محنا عارفين نشتغل من ورا خبثك وغدرك بالناس.. ليه كل هالشي ليه.. لو محتاج فلوس بعذرك.. الكل عارف ان لافي بن فهد تملك وعسى ما يبقى عندك ريال على هالي تسويه بالناس.. جايني الان بعد ما خسرتي 18 مليون تبين احط يدي بيدك ضد بونايف!! وترشيني بالفلوس الي اخذتها من غصب!! حقيقه انك ما تستحي على وجهك
لافي يوقف عند الشباك بعد ما سكر بوبشار التلفون بوجهه: غبي طول عمرك غبي.. اعرض عليك 18 مليون بمنتهى السهوله وانت ترفضها عشان ايش!! عشان العيب.. خلي العيب ينفعك.. وقريب بتخسر اكثر من هالمبلغ وبعلمك كيف تقول للافي عيب وتسكره التلفون بوجهه
عبير تدخل عليه الغرفه بهمجيه: بوناصر
لافي من غير ما يلف عليها: ووجع ان شا الله
عبير تضحك: اعصابك.. ليه كل هالعصبيه علي.. انا عبورتك حبيبتك
لافي التفت بابتسامه: عبورتي رضت علي باين
عبير بدلع: ابي فلوس
لافي: مالي وحلالي تحت تصرف عبورتي
عبير بدلع اكبر: وااااااااااااي كل ذا لي!!
لافي: واكثر من كذا كمان.. المهم انك ترضي علي
عبير: ارضى بشرط
لافي يبتسم: ايش هو
عبير تفكر: ابي اشتري شقه واكتبها باسمي.. وابي سياره باسمي.. وسايق خاص بي.. ابي تفتح لي رصيد بملايين الريالات.. والان
لافي يقترب منها: بس كذا
عبير بدلع: لا بعد بقى.. باقي اشيا كثيره بخاطري.. بس قلت بجربك بذا الاول
لافي يحضنها: ايش تبين بالشقه وانتي عندك فيلا تسرحي وتمرحي فيها لحالك.. ايش تبين بالسياره وفيه سياره وفيه سايق عندك
عبير تبتعد عنه بدلع: لاااااااااا الفيلا والسياره لك انت وزوجتك وعيالك تشاركوني فيهم.. ابي شي لي.. ملكي
لافي يضحك: عيالي!! كثري منها.. انا كل الي عندي عبورتي حبيبتي
عبير تشوفه بثقه: بكره تجيك العنود مطلقه اوعدك.. وبتتبعها نوف بعد.. اما ناصر الغالي اذا شاف حبيباته رجعو لك بيرجع هو بعد
لافي يتنهد: تصدقي عاد عطيتيني فكره مافي احلى منها
عبير تجلس على السرير: ابي الي قلت عليه يتنفذ
لافي يضحك: ومصدقه اني بتركك تعيشي بشقه بعيد عني
عبير بدلع: طبعا بتوافق لاني بتزوج
لافي يجلس جنبها: لااااااا من جد عاد ليه خبيتي عني كنت بفرح لك
عبير: ياحبيبي حنا بعصر السرعه.. كل شي صار بسرعه معلش زواجتي الي بتجي بعديها بحاول اتذكر اني اقول لك
لافي يحاول يبوسها: ومين هذا الي بيفكر ياخذك مني
عبير تبتعد بسرعه وتضحك: مسعود السايق
لافي يضحك من قلبه: مسعود!! مالقيتي تتزوجي الا مسعود.. ما يناسبك ياروحي.. الي يناسبك لازم يكون له قوه وهيبه ومركز بين الناس
عبير تضحك: لا يا حبيبي محسب اني بتزوجه عشق فيه
لافي يبتسم: اجل ايش
عبير بهمس: عشان اراقب غراميتك مع شهد بنته
لافي اختفت ابتسامته: ........................
عبير تحضنه وبمهس اكبر: انا كنت في المجلس وانت داخل معصب.. اليوم الي انتحرت فيه شهد بنت مسعود.. امس على ما اذكر!!

&&&&&&&&&&&&&&&&&&&&

9:00 الليل
في الفندق ..جناح عبدالعزيز..
البحرين

عبدالعزيز يشوفها بفرح: ليلحين ما جعتي!!
مزيان تهز راسها يعني لا: ........................
عبدالعزيز بجرائه: تعرفين اني ما قد شفت بجمالك احد
مزيان توردت خدودها: .........................
عبدالعزيز يمسك يدها: مبروك علي وجودك بحياتي مزيان
مزيان بشبه همس: الله يبارك فيك
عبدالعزيز يبوس يدها: ويبارك لي فيكي.. ما قلتي لي
مزيان بحيا: خير
عبدالعزيز: ودك بكره نروح نشوف الاثاث لشقتنا في البنايه الجديده
مزيان تبتسم: عادي
عبدالعزيز يقرب منها: مافي شي اسمه عادي.. حياتي معاكي ما ابيها عاديه ابد.. ابيها سعيده حلوه تجنن.. ما احب كلمة عادي
مزيان تبتسم: تلاقي الي يسرك
عبدالعزيز بفرح: تسرني الراحه الي بعيونك
مزيان تشوفه بحب: وكيف تشوفها
عبدالعزيز بخبث: يعني اقارن بينها وبين عيونك الباكيه وقت الي كنا على المركب
مزيان توترت: انا.. انا كنت تعبانه
عبدالعزيز يضحك: قصدك غيرانه
مزيان نزلت عينها: لا
عبدالعزيز يرفع راسها: لا تقولين انك ما تغيرين علي
مزيان تحاول تضبط نفسها: الان بس.. اكيد بغار عليك الان عشانك زوجي.. اما..............
عبدالعزيز يبتسم: وحتى قبل لا اكون زوجك كنتي غيرانه.. مزيان ماني عارف من متى وانتي مياله لي.. بس انا كنت وقتها ضايع.. وضعي يمنعني اتخذ أي خطوه.. يمكن حاسس بالذنب لاني سبب في حزنك هذاك اليوم.. بس صدقيني كنت مكتف.. انا بحياتي ما فكرت اتزوج وارتبط.. الحياه الي عشتها كانت............................
مزيان سكته بيدها: حياتك تبتدي الان.. ما احبك تذكر ذيك الايام
عبدالعزيز يبوس يدها: بشرط
مزيان تبتسم: ايش هو
عبدالعزيز يبتسم: تقولي لي.. كنتي غيرانه علي هذاك اليوم
مزيان سكتت شوي: تبي تسمع ردي
عبدالعزيز: اكيد ابي اسمعه
مزيان: ضروري اجيب سيرة احد احتمال تضايقك سيرته والليله بالذات
عبدالعزيز بكل اهتمام: احب اسمع كل شي تبين تقولينه.. احب اعرف كل شي يدور براس زوجتي.. حتى لو كان بيضايقني
مزيان: انا كنت مقرره اني ما اتزوج بعد زوجي.. حزن ورهبه من موته.. بس من شفتك وانا احاول ابعد أي احساس ممكن يخليني افكر فيك.. انت عارف ان جراح كان يغير منك كثير
عبدالعزيز يبتسم: طبعا.. يغير من انسان محطم.. محسب اني ممكن اوصل لقلب ليال المحطمه هي بعد.. معادله صعبه انها تنحل.. الي بيني وبين ليال هو شعور متبادل بالظلم.. ابدا ماهو حب.. ابدا.. ليال محتاجه الي يدافع عنها ويوقف معاها في وجه عدو صعب.. وانا محتاج الي يثبت برائتي في كل مصيبه ابوي يرميني فيها.. انا بعد كنت اواجه عدو صعب.. تظنين ممكن اعيش انا وليال براحه مع المصايب الي كنا فيها
مزيان تشوف عيونه: لا
عبدالعزيز يلعب باصابعها: ليال انسانه دفاعيه.. مهاجمه طول الوقت.. عنيفه بكل تصرفاتها طبعا من خوفها.. الخوف من المجهول شي ما حد يعرفه غيري وغيرها.. انا ماني محتاج لزوجه مثلها.. كل الي ابيه وحده تحبني حنونه علي.. تعيش لي.. جراح اذا كان يشوف علاقتي بليال على انها حب بكيفه.. ظنه غلط.. انا من حقي اشوف الي ابيه في زوجتي صح.. ما احب حياتي تمشي على ظنون الناس.. من حقي اختار الي تناسبني انا بعد.. وليال بحياتها ما ناسبتني.. اعزها واغليها لانها اختي وبس
مزيان بأحراج: انا بحياتي ما قلت لاي من الي حولي اني معجبه فيك او اني افكر فيك.. كنت اتعمد ابتعد عن احتماعاتكم.. حتى حتى ما اتعلق فيك بس لقيت نفسي تتبعك مكان ما تروح.. عارفه انه غلط.. بس ما قدرت اتحكم بقلبي.. كنت اموت من القهر اذا شفتك تتكلم مع ليال او خوله او حتى لمى
عبدالعزيز بحب: يعني تغيرين
مزيان نغرق بعيونه: لا ماهو غيره
عبدالعزيز يقرب اكثر: شنو
مزيان تشوف عيونه: تملك.. كنت احس انك ملكي وما ابي احد يقرب منك ابد
عبدالعزيز يحضنها: مزيان ما ابي اكثر من جذي.. الي قلتيه الحين يخليني ملك على هالعالم كله.. ماكنت عارف اني بلاقي الي تحبني جذي.. مزيان
مزيان غمضت عيونها على كتفه: ياعيون مزيان
عبدالعزيز براحه: احبك

&&&&&&&&&&&&&&&&&&&&&&&&&

2:20 الصباح
فيلا لافي ..عند البوابه..
السعوديه

ماجد بخوف: ايش يعني!!
عبير بلا مبالاه: تعال زين لاتخاف
ماجد بخوف: عبير جيبي الفلوس وخليني امشي.. ايش ناويه عليه انتي
عبر تشوفه مستغربه: ايش بكون ناويه عليه.. تعال زين ليه خايف كذا.. من بيحس فيك لا تخاف
ماجد متردد: الحرس الشغالات اكيد احد فيهم بيشوفني داخل معاكي
عبير بملل: ماجد تراك جبان من جد.. اذا انك خايف كذا.. ليه عامل نفسك بطل الابطال ومافي منك
ماجد وبدا يعصب: رجال غصب عنك.. شوفي دخله معاكي ماراح ادخل.. تبين الحشيش جيبي الفلوس وانا اجيبه لك بكره.. غير كذا انا ماشي.. لا تدخليني بمشاكل تطير رقبتي من وراها
عبير تضحك: خذ هذي الفلوس.. بس اسمع ابي شي ثاني
ماجد اخذ الفلوس: ايش هو خلصيني
عبير: ابي سم سريع المفعول.. ابي سم اذا ذبحت فيه احد ماحد يكتشف انه مات من تأثير سم
ماجد فتح عيونه: منتي صاحيه ومين ناويه تذبحي
عبير تضحك: اخوي الحقير جايب لي كلب ويخوفني فيه.. عاد قررت اتخلص من هالكلب واذبحه.. بس خايفه يشك اني ذبحته ويكتشف اني سممته.. عشان كذا ابي سم ماحد يكتشفه
ماجد: انتو كذا يالاغنيا فلوسكم زايده ومالكم حاجه بها.. يشتري كلب عشان يضايق اخته به.. ناس فاضيه
عبير تضحك: ماجد تركت لك فلوس زياده هذي لك.. جيب لي الحشيش الي طلبته والسم.. واذا احتجت لفلوس غير لا تتردد
ماجد يشوفها ببتسامه: يمكن تكوني حبيتيني عبير.. بس انا ما اصلح اتزوج
عبير ضحكت عليه: ماجد متى بتفهم انك منت الانسان الي ممكن احبه.. انا حبيبي غير
الحارس يصرخ بكل قوته: مين الي هناااااااااااااااا

&&&&&&&&&&&&&&&&&&&

- انفضحت عبير؟!!
- معقوله تعملها عبير وتذبح امها وابوها؟!!
- كيف بيبتدي ناصر اللعب مع لافي
- لافي كيف بكتشف مكان ليال
- عبير ياترا قربت نهايتها؟!!!!!!!!!

السلام عليكم ورحمة الله وبركاته

اعزائي القراء ... والمتابعات بصمت الى هذا الحد الرواية رائعة وجميلة لدرجة ان القلم ... والكي بورد يعجزان عن خط كلمات قليلة تعبر عن الاعجاب ... تفي حق الكاتبة وابداعها ...... ام ماذا ؟


فلا املك سوى قول استمتعوا بقراءة الجزء ... وانتظروا قريبا الجزء الرابع والثلاثون .....