اخرتها معاك؟!! انا غلطان الي ما تزوجت عليك وحرقت قلبك.. ناصر وهاجر اقتعوني ان عيالي بيضيعون.. وانا خفت على العيال منك ومن عقلك هالمريض.. خفت اتزوج واتركهم معاك.. ليتني تزوجت وجبت لهم زوجة اب ولا هالعذاب الي عاشو فيه سنين عمرهم.. انا متأكد ان زوجة الاب بتكون ارحم منك عليهم
ام خالد بصراخ: تكذب.. تكذب.. الحين جاي تبي تبين اني غلطانه.. اكيد لان هاجر وناصر ماتو وماعندي احد اسأله.. محسبني غبيه وبصدق كلامك!! انت تحلم.. وطول منا عايشه بعيش لبنوه بعذاب وبمر.. بذوقها المر الي عشت فيه سنين طويله من امها.. ومن دلعك وحبك لها
بوخالد وهو يضربها من غير رحمه: تغيرين من بنت اخوي بعد.. حتى هذي تغيرين منها؟!! قولي اني احبها وابي اتزوجها
ام خالد تحاول تفك روحها منه: لو ماهي بنت اخوك كنت تزوجتها.. وش بيمنعك.. عيونك دايم على الحريم.. من اخذتك ما تهنيت معاك.. من عرفتك وانت مع غيري.. هاملني وما تدري عني
بوخالد وما خفت قوته وهو يضربها: صحيح ماكنت معاكي.. بس عمري ما كنت مع غيرك.. لو اخلاقك تتحسن شوي كنتي شفتي اهتمامي زايد بك.. بس انتي وحده ما تخاف من الله.. اش تبين اكثر من الي سويته لك.. عيشتك بقصر.. اصرف عليكي بالهبل شريت لك الدنيا وخليتها تحت رجولك.. من تقولي يا بوخالد اقولك حاضر وتم.. الحين جايه تقولين لي اهملتك؟!! اهملتك من لسانك الطويل وعقلك الي عمره ما كبر.. ظنك السو بي على طول.. كرهك للعالم.. وين انتي ووين عايشه ومريم عنك.. خساره الي ما اخذت وحده منهم.. خساره ليتني طلقتك وتزوجت وحده منهم.. ما كنت عايش بهالمصيبه الي عيشتيني فيها
ام خالد بوجع وصراخ: مااااااااااااهو مني من النار الي داخلي.. ما كنت لي.. ما كنت لي
بوخالد يمسك رقبتها ويخنقها: تقومين تدمرين حياة ولدك بالسحر.. ما قدرتي تفرقين بينهم بخبثك قمتي رحتي سويتي سحر لهم؟!!
كنت اضرب واضرب من قهري.. من الي اسمعه منها.. ياليت ماراح تنفع الحين.. هاجر ماتت وناصر مات.. الحق على لبنى هذا اذا باقي فيه لبنى بعد الي صار.. طاحت على الارض من كثر ضربي لها.. حاولت تمثل انها ماتتنفس بعد ما خنقتها.. وقتها كنت ماني مصدق أي حركه ممكن تسويها.. قلت جعلها تموت بيدي.. رحت ارفس فيها وارفس هه عشان تقدر تتنفس.. خلاص شبعت تمثيل شبعت.. تركتها بالصاله مرميه.. وركبت للغرفه وسحبت شنطه وجمعت خلاقين تسترها.. سكرت الشنطه ورجعت للصاله.. كانت مرميه على الارض تتوجع.. جلست على الكرسي وانا ميت قهر اناظرها.. انتظر الصباح بس.. وكل ما حسيت انها قادره تقوم.. رحت ارفس فيها لحد ما ينهد حيلها حتى النوم ما تركتها تنام.. من تغمض عيونها رجعت ارفس فيها بقهر.. بكل قوه تجمعت فيني.. طلع الصبح وسحبتها على السياره.. رميت شنطتها بصندوق السياره وتحركت.. اتصلت على واحد من معارفي في السعوديه.. وسألته عن مستشفى للامراض النفسيه.. مستشفى مجانين.. اذا هالحقيره ما قدرت نعمة الناس العاقله الي كانت عايشه بينهم خليها تعيش مع المجانين يمكن تروق لها العيشه معاهم.. وصف لي صاحبي مكان المستشفى.. قلت له اذا كان له دلال على المسؤول هناك.. قال انه ممكن يتصرف.. اتفقت معاه على اني برمي الحيوانه المرميه جنبي ولاهي حاسه بالدنيا.. الي كل ما احس عليها غفت عينها صحيتها بكف من يدي.. حاول صاحبي يفهم مني وش صار.. كلمته بحده وقلت له هذا الي ابيه اذا يقدر عليه يساعدني ما يقدر بشوف احد غيره.. اشترى خاطري وهدى اعصابي بكلامه.. والمسكين راح يكمل الاجراءات الي ابيها.. وصلت السعوديه ورحت للمستشفى.. لقيته ينتظرني هناك.. من شفته ما قدرت اقول له وش صار معاي.. عيبه في حقي اقول له زوجتي سوت هالشي.. قلت له ابيها تنرمي هنا وماحد يعرف عنها شي.. وما ابي مخلوق يسألها انتي من ومنين جايه.. اخترت لها مكان زباله في المستشفى يسواها ويسوى فعايلها.. وامرت انهم يعاملوها اسوأ معامله.. رميتها بالغرفه وقبل لاطلع عطيتها كف اخير من قوته اوجعتني يدي.. مسكت رقبتها بقوتي وقلت لها انتي طالق
سرحان.. بعيد عن الدنيا وما فيها.. ما غير احساسي بالذنب ناحية خالد ولبنى.. لبنى الي تزوجت من بدر وانا ما حاولت اسألها ليش مع اني اعرف حبها لخالد.. ليش ما تدخلت.. ليش ما منعت ناصر.. اشلون ما انتبهت.. انفتح الباب الي جنبي.. اكيد وصلت.. ما ابي انزل.. ما ابي اشوف احد
جراح بخوف: بوخالد.. انت بخير
بوخالد يفتح عيونه بتعب: بشرني عن الي عندك
جراح يبتسم: كلهم بخير وصحه.. قوم عندي لك اخبار تفرحك
بوخالد بتعب: احنا وين
جراح: قرب العماره
بوخالد بتعب: ابي ارتاح
جراح: رائد
رائد: سم عمي
جراح: ساعدني

&&&&&&&&&&&&&&&&&&&&&&

10:00 الليل
فيلا لافي ..غرفة لافي..
السعوديه


الان كلامها يعمل بي كل ذا؟!! وانا ليه ماليه روح حزن الي صار صار.. وفهد مات خلاص.. لو بيدي شي ساعتها كنت تصرفت.. بس هذا يومه واجله.. وانا مالي دخل بالي صار له ابد.. واذا كانت امي تبي تحسسني بذنبه تكون غلطانه.. ضميري مرتاح لانه مالي ذنب بموته.. لو تبي تشككني بلافي فلافي عاش معاي طول هالسنين من غير لا يضرني بسو.. واكيد ماله دخل بموت فهد.. حتى الحكي الي سمعته.. ماله دخل بفهد.. أي واحد يكون معصب يجيب طاري القتل بلسانه.. مستحيل لافي يقرب من فهد مستحيل.. ليه قلبتي علي المواجع يما ليه.. ليه دايم احسك غيرانه من الخير الي انا فيه.. ليه دايم تبيني اكره لافي.. ليه دايم تبين تحسسيني ان ازواج خواتي احسن من لافي بكثير.. ايش فيه لافي غير عن الرجال.. هذا هو رجال يملي العين.. تحسدني الحريم عليه.. وخواتي اولهم
لافي يدخل الغرفه: لسا واقفه عند الشباك وسرحانه
ام ناصر تبتسم له: لاياروحي ماني سرحانه
لافي يجلس على السرير: في ايش تفكري
ام ناصر تغير الموضوع: تعشيت ولا لسا
لافي يغير ملابسه: ما تعشيت
ام ناصر: فديت قلبه الي ما تعشى الان اجهزه لك
لافي يمسك ذراعها: اذا بتظلي بذا الوجه لا تجهزي شي
ام ناصر ترمي براسها على كتفه: انت عارف ان قربك يروقني
لافي يبتسم بثقه: جهزي العشا.. ولا تتأخري علي
عبير تدخل عليهم من غير ماتضرب الباب: ماما وينك فيه.. ادق عليكي وما تردي علي
لافي بحده: يا قليلة الحيا.. ما تدقي الباب تستأذني
عبير تشوفه باحتقار: وليه يعني.. مستحي من شي!!
ام ناصر بحده: انتي داخله غرفة امك وابوكي يعني احترمي حالك
عبير تضحك بتريقه: ليه خايفه اشوف شي!!
لافي يهجم عليها ويضربها: صحيح اني ما ربيت.. يا حقيره تبين لك تربيه من جديد
عبير تبعد يده وبثقه: انت عارف التريبه ناقصه مين.. اقول ماما انا بطلع مع صحباتي الان اتعشى
ام ناصر بصراخ: انتي اكيد انجنيتي شايفه الساعه كم؟!!
عبير بلا مبالاه: ايوا اشوفها.. ايش فيها يعني بروح اتعشى مع صحباتي ماني رايحه اصيع
لافي وكف من يده: انتي صايعه من غير لا تطلعي.. ويلا على غرفتك وما ابي اسمع صوتك
عبير بهمس: لا ياكثر معي تراني افتح حلقي واقول.. اسمعني انا طالعه.. واذا ما رضيت اقتلني ارحم لك
لافي خنقها بيده: خلاص ياروح ابوكي اقتلك وارتاح منك
ام ناصر بجزع: لا يا بوناصر.. لا يا بوناصر.. اتركها اتركها
عبير بعد ما ابتعدت عن ابوها: هههههههههههه ماراح اتأخر ماما.. واذا تأخرت دقي علي نبهيني
لافي بكل حده: الوقحه الحقيره.. على مين طالعه قليلة حيا هذي.. كنتي تركتيني اذبحها جعلها ما تربح
ام ناصر تهديه: اتركها عنك.. ولا اقول لك شوف لها أي واحد تتزوجه وريحنا منها
لافي وراقت له الفكره: صح هذا الي المفروض افكر فيه

&&&&&&&&&&&&&&&&&&

11:30 الليل
شقة ليال ..غرفتها..
البحرين

الحمدلله.. الحمدلله.. كل شي تمام.. صحيح لبنى ما تكلمت وساكته كل وقتها.. بس الحمدلله.. منير ووليد ما قصرو.. جابو شيخ وقرا عليها.. والحمدلله.. كل شي بخير.. عرفت بالي صار وسكتت.. يمكن صدمه.. يمكن خوف من الي صار.. قلبي عليها حزينه بداخلها.. ساكته مكسوره.. دخل عمي منصور عليها المغرب.. وصار يشوفها باهتمام.. استأذن مننا وقال انه يبي يتكلم مع خالد ولبنى بروحهم.. طلعنا من غرفتها بالمستشفى وجلسنا بقاعة الانتظار.. اخذو وقت طويل.. ما خفت عليهم بالعكس انا عارفه عمي منصور زين.. وعارفه انه ما اختفى الا وانه تصرف مع ام خالد التصرف الي يلوق لها.. واتمنى لبنى ترتاح من تصرفه.. اتصلت على جويل وطلبت منها تترك الي بيدها وتجهز احلى عشا للكل.. اول ماطلع منصور.. دخلنا كلنا على لبنى من جديد.. شفت لبنى ونفسها هاديه.. ماهو مبين عليها بكا.. الحمدلله تقبلت وضعها.. كانت تهمس لخالد.. اصرت انها تروح تشوف البنت.. تركناها مع زوجها واختفو عننا.. كنا نشوف بعض براحه.. بعد ما رجعت لبنى جلسنا معاها شوي ورجعنا للعماره.. صحيح حزانا بس زي محنا متعودين.. نقدر نعدي الازمات والمصايب.. وقفت قدام الكل.. قلت لهم انا حامل.. يمكن سكتو شوي.. يمكن ما توقعو ان بقا في حياتنا شي يفرحنا.. بس لقيتهم انقلبو 180 درجه.. صار الجو الحزين كله ضحك ومبارك لي ولجراح.. سهرنا مع بعض وبعد ماخلصت السهره الكل راح على شقته
ليال على التلفون: هلا ياروحي انت
جراح باهتمام: وقدامي بعد!!.. تكلمي بالتلفون وتغازلي غيري وقدامي!!
ليال تجلس بحضنه: هذا عاد حبيب قلبي انا.. روحي انا
جراح يبتسم: ومين ذا ان شا الله
ليال بدلع: خذ كلمه ابيك تتعرف عليه تراه يموت علي
جراح يشوفها وهو يكلم: الو
صلاح ميت ضحك: انت من صدقك يعني
جراح يضحك: تصدق حسبتها خوله.. ياخوي هالحريم ما يفكونك من المقالب
صلاح يضحك: دام خوله موجوده يا اخوي ما انصحك تنام.. ولا تغمض عيونك من ورا مقالبها
جراح يضحك: اخبارك يارجال.. صار لك فتره ما جيت
صلاح: وش اسوي ياخوي.. هالايام المراقبه شديده علي
جراح يحك لحيته: اسمع.. بأجر لك شقه بأسمك بمنطقه قريبه من الجسر.. بس في اليوم الي بتجي فيه عطني خبر عشان ادز من يراقب المكان ويبلغني اذا اتركوك ولا مرابطين لك.. واذا مشو عنك تعال شوف اختك
صلاح يتنهد: فكره.. ضروري انفذها.. عارف ليال اذا غبت عنها بتـ....................
جراح يقطعه: لا تصدق نفسك عاد.. تراها بحضن زوجها ولا درت عنك
صلاح يضحك: انت الي مصدق حالك وجالس تكلمني اشوف وينها خلني اكلمها.. واترك عنك الغيره الفاضيه
جراح يضحك: تبينه ولا اخليه يدق بعدين
ليال بدلع: حرام عليك جيب اكلمه
جراح بهمس شديد: قولي احبك بالاول
ليال بهمس: اموت فيك بعد
صلاح سمع كل شي.. كلمته ولقيته مبسوط بحياتي.. متطمن علي وعلى راحتي.. قلت له اني حامل حسيته يبي يطلع من التلفون ويجيلي.. تكلمت معاه مده طويله وانا بحضن جراح.. قال لي عن مشكلة ناصر مع ابوه.. حسيت ان هالشي جا في صالحي.. قال لي ان لافي تخانق مع المحاسب تبعه واطرده.. كمان نقطه في صالحي.. رحت اقول له كيف يقنع ناصر يشتغل مع ابوه.. علمته كيف يمشي مع ناصر خطوه بخطوه.. جراح كان يسمعني.. ابد ما حسيت منه بغيره.. حبيبي كان يوافقني على الي اقوله لصلاح.. قبل لا اسكر اكد صلاح على مسألة الشقه الي قال له عنها جراح.. واذا قدر من بكره بيكون احسن له.. تفداه روحي يبي يكون جنبي

&&&&&&&&&&&&&&&&&&&&&&

8:30 الصباح اليوم التالي
الشركه ..مكتب لافي..
السعوديه



السكرتير: انا قلت لك عمي هالشي من زمان
لافي يضحك: بعرف اتصرف.. لا تخاف انت
السكرتير: ايوا بس هذا طالب مبلغ كبير هالمره.. غير عن كل مره
لافي يضحك: يا اخي قلت لك لا تخاف
السكرتير بضيق: تامر بشي عمي
لافي: مسعود بيجي بعد شويه وبيجيب معاه بنته.. خله يدخل على طول معاها
السكرتير: مسعود موجود هو وبنته برا من قبل لادخل عليك
لافي بحده: وليه ما قلت
السكرتير: عشان موضوع جاكلين اهم من مسعود.. والكلب الي يبتزك ممكن في لحظه يضيع الي نعمله
لافي يمسك وحده من الاوراق المهمه: روح خليهم يدخلو علي.. وموضوع جاكلين ماراح ينفتح ابد
السكرتير يفتح باب المكتب: مسعود تفضلو عمي ينتظركم
مسعود يدخل: عمي
لافي يرمي الاوراق من يده وعينه على البنت: ياهلا ومرحبا.. يا هلا وغلا والله
مسعود يبلع ريقه: هلا بك عمي
لافي يأشر لهم يجلسو: اشوف صار عندك عروس يا مسعود.. كبرو العيال وكبرونا معاهم.. ايش اسمك ياحلوه
شهد متوتره: اسمي شهد
لافي بفرح كبير: حلو اسمك يا شهد.. كم عمرك
شهد تحاول تضبط اعصابها: 22
لافي وعيونه اكلت البنت: شاطره بالحسابات؟
شهد تهز راسها يعني ايوا: ...................
لافي بفرح: ممتاز.. شوفي الاوراق هذي وقولي لي عنها
شهد تشوف الاوراق وبعد مده: هذي ورقة الايرادات وهذي المصروفات.. بس التحويلات البنكيه مغايره للي مكتوب في ورقة الايرادات.. في غلط في التحويل
لافي يضحك: شاطره يابنت انك انتبهتي لهالشي.. انا طبعت لك ورقه أي كلام حتى اشوفك اذا تنتبهي ولا لا.. بكره دوامك.. بعلمك على حساباتي.. وابيكي تكوني دقيقه.. اذا رقم تسجل بالغلط ممكن يطير راسك فيها
مسعود يبلع ريقه: يا عمي قلت لك البنت صغيره وماهي......................
لافي بحده: مسعود.. البنت ذكيه اتركها تتعلم ويكون عندها خبره.. وبعدين الي بيعلمها لافي بن فهد
شهد تناظر ابوها: والنعم بك.. بس انا ماني قادره امسك شغلك وتطير رقبتي على اقل غلطه بسويها
لافي يضحك: هالكلام ماهو تهديد لك ياشهد.. انا اشجعك بس
شهد بخوف: انا اسفه.. ماني حابه اشتغل معاك
لافي بحده: يعني شنو!!
شهد: انا ابي اشتغل مع الحريم المكان مافيه غيري حرمه.. بصراحه اخاف من التعامل مع الرجال.. وانت شكلك تخوف
لافي يضحك: لايكون احد مخوفك مني بس
شهد وشوي بتبكي: من شوي تصارخ والحين تضحك.. انا آسفه.. خلاص الغيت فكرة اني اشتغل من راسي خلاص
لافي يلتفت على مسعود وهو متأكد انه محذر بنته توافق على الشغل: مسعود باين ان البنت جايه عندي وهي خايفه مني من قبل لا تشوفني
مسعود متوتر بصوره واضحه: ياعمي هي ما سمعت مني حرف.. وانت عارف اني ما اتكلم عنك ابد.. كل حرف بقوله عنك عارف انه سر.. اشلون تبيني اقول لها شي عنك
لافي يشوفها بلهفه: بتركك تحددي الراتب الي تبينه.. مري على الخزنه وانتي ماشيه.. فيه شيك ينتظرك هديه مني لك

&&&&&&&&&&&&&&&&&&&&&

10:00 الصباح
المطار ..قاعة الانتظار..
البحرين

وصلت المطار من شوي.. كنت محتاج اشرب كوفي.. يمكن اقدر اوصل لحنان الي صار بصوره ما تخليها تفقد عقلها.. خصوصا وان امها ما نعرف هي وين ولا ايش صار بينها وبين بوخالد.. اكيد حبسها في غرفتها ومنعها من الطلعه.. اشيا كثيره ممكن يكون بوخالد تصرفها.. ماكنت مشغول بام خالد.. كنت خايف على حنان والعيال.. جلست بالكوفي شوب.. شربت الكوفي وانا عيوني على البوابه لمحت راكان وقمت له
عبدالعزيز بفرح كبير: الحمدلله على السلامه
راكان يحضنه: الله يسلمك.. وحشتني عمي
عبدالعزيز: وانت اكثر.. هلا والله حنان
حنان مستغربه: هلا ياخوي.. انت بروحك!! وين الجماعه؟!!.. انا قلت بينتظروني كلهم
عبدالعزيز يطنش: هلا بسمر.. ان شا الله انبسطتي
سمر بفرح: وناااااااااااااسه ياعمي.. تمنيت الكل معانا.. تصدق ما شبعت تمنيت نجلس مده اطول
عبدالعزيز يمشي معاهم لحد السياره: معلش حبيبتي.. الايام جايه وبنسافر كلنا نغير جو
حنان بخوف: عبدالعزيز صاير شي؟!!
راكان: عمي انا حاس ان في شي.. ما اقدر اصدق انك جاي بروحك من غير خالي وزوجته
سمر: صح انا مكلمه خالتي لبنى من يومين وقالت انها بتنتظريني
حنان بخوف: خالد من يومين ما يرد على تلفونه لاهو ولا لبنى.. اكيد صاير لهم شي
فتحت الموضوع بصوره هاديه.. قلت لهم ان ام خالد مسويه حركه من حركاتها.. حنان تضايقت كثير.. علقت على كلامي عن امها بكلمات مليانه حزن وضيق.. قالت انها امها وماتقدر ترميها بالشارع.. ومافي حل يوقف امها عند حدها.. كانت تتكلم بضيق.. تذكرت امي.. تذكرت اشلون استقبلتني وقت الي رحت للكويت.. كره غريب من ناحيتها.. حسيتها ماهي امي.. حاولت ارضيها بكل شي يمكن اسمع منها كلمه تطيب خاطري بعد الي شفته من ابوي.. مالقيت غيرالصد والكره.. شريت لها بيت وكتبته باسمها.. قالت لي ماتوفي

يتبع

شي من العذاب الي شافته مع ابوي.. طيب انا وش ذنبي!!.. عطيتها فلوس كثيره.. تركت لها الي يسترها قبل لا يسرق ابوي فلوسي.. قلت يمكن الاقي نظره حنيه منها.. بس للاسف عطت الفلوس لاخوي الكبير.. والثاني عطته البيت.. البيت الي شاف عذاب لمى من عيسى.. حسبي الله عليك يا عيسى انت وعوض.. ليتني ما شريت هالبيت.. ليتني ما حاولت ارضي امي.. ليت وليت واهمها ليت الزمان يرجع واصلح هالغلط الكبير
راكان: عمي نناديك
عبدالعزيز يبتسم: معلش حنان.. تذكرت امي.. ساعات الواحد مننا متكتف او مربوط من رقبته.. الحركه البسيطه تقتله او ترميه جهنم.. حالي مثل حالك انتي وخالد.. لا تظني انك الوحيده الي تعاني.. على الاقل ابوكي انسان طيب وممتاز.. انا ما لقيت لا ام ولا اب.. طولي بالك وارمي حمولك على ربي.. دام الكل بخير نقول الحمدلله على نعمته
سمر تحس بوجعه: عمي انت قوي كثير
عبدالعزيز بفرح: انتي اقوى مني
سمر مستغربه: اشلون
عبدالعزيز: عشان امك حنان واخوكي راكان.. الله يخليهم لك
سمر بعفويه: ويخليك لي يا اطيب عم
وجعتني هالكلمه.. كنت ابتسم بفرح بس داخلي موجوع.. تذكرت سهام.. تذكرت كيف كانت تحبني.. ما ادري اخاف يكون حرام علي اذا تذكرت ايامي الحلوه معاها وهي زوجة ابوي.. اعوذو بالله.. وش بستفيد من الاحزان.. الحمدلله على نعمته على.. كنت وين وصرت وين.. ياربي..ياربي اذا تمنيت عليك ابي حضن ام تلبي لي طلبي.. وين واشلون.. اطلب شي يستجاب يا عبدالعزيز.. وش فيك قمت تخربط مع رب العاليمن.. الحمدلله الحمدلله ربي عوضني باخوان وزنهم ذهب.. انتبهت لتلفوني يرن
عبدالعزيز بفرح كبير: هلا وغلا بالرجال
.....: ..............................
عبدالعزيز: الو.. الو!!!!
.....: ..............................
عبدالعزيز بخوف: خليفه رد علي انت بخير.. خليييييييييفه
ام خليفه: لا تخاف خليفه بخير
وقفت الدنيا عندي.. ما قدرت امسك اعصابي.. خانتني القوه.. وقفت السياره خوف على الي معاي لا يصير لهم شي.. طلعت من السياره عشان ما يشوفون دموعي الي ممكن نتزل باي لحظه.. ابتعدت عن السياره حتى اقدر اصرخ من ظلم سكن قلبي وعمري.. كنت ابي اصرخ ابي اصيح ابي اطلع الي انحبس داخلي سنين
ام خليفه بحنيه: عزيز يما.. وين رحت.. ما تبي تكلمني.. يما رد علي
عبدالعزيز بصوت تعبان: ماني مصدق انك رضيتي تكلميني
ام خليفه تبكي: جعل التعب الي شفته فيني ولا فيك
عبدالعزيز بحده: لا.. لا تقولين جذي.. الحمدلله انا بخير.. بس تعبان لاني.. لاني.......................
ام خليفه تزيد في بكاها: يا جعل هالغصه فيني يما ولا فيك.. ليتني مت ولا صار الي صار يما.. غصب علي اتركك.. يما انت تعرف ان روحي فيك.. تعرف اني ربيتك بدل امك.. روحي انتي رد علي يما
عبدالعزيز كاتم غصته وماقدر يرد: ............................
ام خليفه: خليفه الحيقني اخوك ما يرد علي
خليفه ياخذ التلفون من يدها: عزيز.. عزيز رد علي
عبدالعزيز بتعب كبير: سكر الحين.. اهدى وارجع اتصل فيك
سكرت منه والدموع تحجرت بعيوني.. ما تعودت ابكي.. ما تعودت اسمع عمتي تبكي.. رجعت للسياره وعيون حنان وعيالها علي تتابعني.. ركان طلع واصر انه يسوق.. ما قدرت امنعه.. لاني ماني قادر اشوف دربي.. جلست في السياره ساكت مهموم.. حسيت الهموم تلاحقني كلما بديت انسى.. كلما بديت انسى ارجع اتذكر غصب عني.. كنت ابي اوصل العماره بسرعه.. كنت ابي اجلس مع الكل عشان انسى.. روحي لقيتها معاهم وسعادتهم عرفتها بوسطهم.. ليش اتعب روحي بالهموم.. عمرها الهموم ما بتعوضني الي فقدته

&&&&&&&&&&&&&&&&&

11:30 الظهر
شقة ليال ..الصاله..
البحرين
وصلت حنان كانو الحريم والرجال مجتمعين عندي طبعا.. من اول ما دخلت لاحظ الكل همها.. حاولنا نخفف عنها الي سمعته.. صحيح تركنا عزيز بوجه المدفع لانه اقدرنا على توصيل الخبر لها.. بس اكيد انها تقبلته من عزيز اكثر من أي احد.. عزيز له معزه اكبر من الكل عند حنان من شافته وهو يضرب هشام من قلبه وهي تعزه.. دايم تقول للينا لو احمد كان مكانه كانت بتعزه بدل عزيز هههههههههه وتبتدي المطاحنات.. اما احمد والباقي كان القهر معميهم على ام خالد واكيد بيتكلمو مع حنان عن امها بعصبيه.. غير كذا خالد بنفسه قال ان عزيز هو الي يقول لها.. جلسنا مع بعض لحد ماهي بنفسها طلبت انها تشوف بنت خالد.. سألت عن اسمها وماحد جاوبها.. ببساطه لبنى وخالد ما بعد سموها.. الكل رفض انه يروح معاها المستشفى كانو يبون يتركوها مع خالد لحالهم بس انا ترجيت جراح اني اروح.. وحبيبي ما عارض.. كنت ابي اشوف البنت.. ماحد فينا شافها.. شوقي للبنت كان كبير.. ابي اشوفها.. وصلنا للمستشفى جراح همس لي اننا نترك حنان مع اخوها وزوجته.. انا بعد كنت حاسبه هالحساب انا جيت عشان اشوف البنت.. وصلنا لغرفة الاطفال.. وسألهم جراح عن بنت خالد.. وقفنا خلف الشباك الجزاز نشوفها وفي وحده من الممرضات داخل تورينا من هي بنت خالد.. وقفت اشوف هالبنت الي صار لها سبع شهور في بطن امها تصارع حتى تاخذ انفاسها في هذي الدنيا.. وجعني قلبي عليها والالات محشوره بجسمها حشر.. جراح يقول ان امعائها تعبانه وتحتاج عمليه بسرعه.. وانه اتفق مع احد الجراحين وهو جاي البحرين على وجه السرعه.. ناظرته وانا ممتنه لرجولته وسرعته انه ينقذ بنت ما بعد فتحت عينها ولقت الاذيه من اقرب الناس لها.. طلع واحد من الدكاتره من الغرفه بعد ما قالت له الممرضه اننا تبع الطفله
الدكتور يمد يده: الاخ خالد مرحبا
جراح يصافحه: اهلا وسهلا دكتور بس انا...............
الدكتور يقاطعه: الطفله حنان تحتاج للعمليه بسرعه ياخوي.. انا حاب اوضح لك الوضع الصحي يمكن تقتنع ان واحد الدكاتره الموجودين يسوي لها العمليه
ليال تمسك ذراع جراح بسعاده: بتفرح حنان اذا عرفت ان البنت على اسمها
جراح: ياخوي انا ماني خالد.. انا صاحبه.. وبعدين كلها ساعه ونص والجراح بيكون موجود في البحرين.. عموما انا بكون مع خالد بعد شويه واشوف ايش يقول
رجعنا لغرفة لبنى.. وخالد اصر ان الجراح هو الي يسوي العمليه.. لبنى كانت خايفه على بنتها حيل.. كانت تترجى خالد انه يسرع وما يعارض.. يمكن البنت تتأثر.. جراح حاول يخفف من خوفها.. طمنها وقال لها ان الوضع الصحي للبنت ماهو سيء وممكن انقاذه.. كنت اشوفه كيف يتكلم حسسني انه دكتور ويعرض الحاله.. هذا طبعا عشان يطمن لبنى بس.. والوضع الصحي الحقيقي للبنت خالد عارفه تمام
على العصر تجمع الكل عند لبنى.. بعد ما انتهى الجراح من العمليه والحمدلله نجحت.. نزلت لبنى من سريرها وسجدت سجودي.. لقيتها تفرش الغطا الابيض وتسجد عليه.. بهاللحظه بس تذكرت حالي.. فجأه رجعت لي ذكرا عيالي.. ما قدرت امسك نفسي طلعت من الغرفه ابي هوا اتنفسه.. لحقني جراح ما قدرت ارفع صوتي.. مسكت ثوبه بقبضتي ورحت ابكي على صدره.. طلعت معاه من المستشفى جلست في السياره كنت اصرخ من قلبي.. لحد ما حسيت روحي ارتاحت.. مشينا بالسياره وصلنا البحر ووقفنا هناك

&&&&&&&&&&&&&&&&&

5:00 العصر
فيلا العايله ..مجلس الرجال..
السعوديه

ناصر يضحك: وانت محسب اني ماراح اصدقك ولا بتلاقيني مصدوم
صلاح: غسان انا ماني موافق علي الي تقول عليه
غسان بحده: وليه لا.. على الاقل شي يكسر لافي الكلب
ناصر يضحك: واذا تبي مني ورقه اقر فيها اني موافق ماراح اقول لا
غسان بعصبيه: يا اخي لا تنرفزني بضحكك ذا.. جبتكم هنا حتى نتفق ماجبتك حتى تصك راسي بضحكك
ناصر يضحك: وانت محسبني ما سمعتك.. اسمعك ومبسوط مره.. يدي بيدك دام هالشي بيكسر لافي
صلاح بحده: غسان انت ليه ما تفكر في زوجتك وزوجتي.. دايم تفكر في لافي وبس
غسان: دام اني بكسر لافي يعني زوجتي وزوجتك بيكونو بخير طول العمر
صلاح بحده: افهمني انـ.....................
ناصر يقطعه: اقول اكرمني بسكوتك انت.. قول لي يا غسان متى تبتدي الاجراءات
صلاح: ماهو معقوله الي تعلموه خلوني .........................
غسان يقطعه: ناصر دام انك موافق يبقى كل الي ابيه منك انك تبعد نفسك عن الي بيصير
صلاح بحده: ياحمير الضر بيكون...................
ناصر يقطعه: قول لي بس متى تبتدي
صلاح بكل قوته: ببببببببببببببببببببببببببببس.. عبير اذا انسجنت من ورا الي بتعملوه.. عيالنا هم الي بينضرو ياحمير.. ما تقول لي من بيقبل بولدك اذا رحت خطبت له
غسان ينتبه: ايوا بس..................
صلاح بحده: بس ايش يا اخي.. وقت ماتروح تخطب لولدك بتقول لانسابك ان عبير كانت شريره وحنا ناس طيبين.. انا ما رضيت اشتكي على لافي وقت الي ذبح ولدي وحاول يذبح زوجتي معاه خوف على سمعة الكل
ناصر يتنهد: من شوي كنت مبسوط اني لقيت الي بيكسر لافي.. بس للاسف مافي يدي شي ممكن يكسره
صلاح: لانكم اغبيه.. ما تفكرو بعقولكم.. تفكرو كيف تنتقمو منه وبس.. طيب والحريم الي برقابنا وش مصيرهم وش مصير عيالنا.. الف مره قلت لكم فكرو بعقولكم قبل أي خطوه تخطونها
غسان: اسمع مني بس.. خلاص ماراح نبلغ الهيئه عن عبير.. على الاقل نهدد لافي بالتسجيلات الي بيدي.. اكيد بيخاف على سمعته لا تتضرر من ورا بنته
صلاح: بصفتك ايش؟!! غسان الي خايف على زوجته وولده؟!! ولا فاعل خير يهدده ويبعده عن ناصر ونوف والعنود
غسان يبتسم: جاتني فكره وبنفذها
صلاح يتريق: وايش هي ان شا الله
غسان: باخذ اخبار عن لافي من عبير.. كل حركه من تحركاته وين يروح ووين يجي
صلاح: بصفك ايش؟ غسان الي عشقته وهو متزوج اختها؟!! ولا بتلعب عليها بشخصيه غير وتغير صوتك وتبتدي تكلمها من جديد وتاخذ اخبار لافي منها
غسان: بصفتي غسان زوج اختها الي هي عشقته.. دامي صريح معاها اكيد بتآمن لي.. وبتقول لي عن كل الي ابيه
صلاح: وكل ذا من غير مقابل؟!!
غسان: ما فهمت!!
صلاح: يعني تطلع معاها مثلا وتعيشو قصة حب من جد ا
غسان مستنكر: مين ذا الي بيطلع معاها!!!!!!
صلاح يضحك: حبيبها الي بيقول لها انه يحبها ويعشق ترابها.. خلينا نفترض انها اقتنعت انك تحبها.. طيب وبعدين اكيد تبي اثبات على حبك لها.. يعني يا حلو اكيد بتقول لك طلق العنود
غسان يوقف وبحده: تخسى عبير بنت ابوها ما بقا الاهي
صلاح يضحك عليه: يا اخي اشوفك ذكي.. وساعات مافي اغبى منك
ناصر يرجع يتكي على الكرسي: ماحد يقدر يعرف تحركاته حتى انا.. كيف عبير
صلاح يضحك: زين انك قلت له
ناصر: بأختصار مكالمات عبير الان مالها داعي
صلاح: بالضبط مالها داعي ابد.. اذا ضريناها بننضر معاها.. وماعندنا فكره ثانيه
غسان يتنهد بقهر: وكيف بتخلص منها ومن اتصالاتها
صلاح: سمعاها أي تسجيل من صوتها وهددها انك تدزه لابوها

&&&&&&&&&&&&&&&&&&&&&&

8:30 الليل
شقة ليال ..الصاله..
البحرين

ليال على التلفون: لا تلف وتدور علي.. قول لي ايش مالك اليوم.. من جبت حنان وانت حالك ماهو عاجبني
عبدالعزيز ينزل راسه: لا تخافين على
ليال: ليه ما تنسى هلك وتبتدي تفكر في حياتك.. زوجه وبيت وعيال
عبدالعزيز يبتسم بحزن: ومن ببتدي حياتي معاها.. مين الي بيزوجني بنته بعد الي صار لي.. الله يخليكي لا تدخليني في مشاكل جديده انا جذي مرتاح
ليال تتنهد: ماهو شرط وحده ما نعرفها.. وحده مننا وفينا
عبدالعزيز: ومن تقصدين
ليال: ماعندي وحده محدده.. بس عندك مزيان مثلا عندك لمى
عبدالعزيز يبتسم: مزيان ما تصلح
ليال: وليه!!!
عبدالعزيز: تظنين جراح يوافق يناسبني انا
ليال: وانت محسب نفسك من الشارع يا عزيز.. بس لاتكون مصدق انك واحد مجرم والناس كارهه وجودك وماهي طايقتك.. عزيز اصحى.. اذا كنت مخلي ببالك انك انسان منبوذ تكون غلطان
عبدالعزيز: هالكلام انتي تقولينه او أي احد من الي حولنا يقوله.. بس غيرنا!!.. كلهم يشوفوني مجرم
ليال: بلا كلام فاضي.. انت رجال تخاف الله.. وتعرف السنع وهذا بس يشرف أي رجال تحط يدك بيده
عبدالعزيز: حتى لو افترضنا جراح وافق.. ما اقدر ارتبط بمزيان
ليال: وليه عاد!!!
عبدالعزيز ما يبي يقول لها عن الفرق المادي بينه وبين جراح: الي اعرفه انها ليلحين تفكر في زوجها.. حتى انها ليلحين حزينه عليه
ليال: طيب تزوج لمى
عبدالعزيز: تبين اتزوج وحده اخوي معتدي عليها؟!!
ليال فاتحه عيونها: واخوك معتدي عليها!!.. هذا انت تقولها هو الي غلط فيها.. لمى ما ينعاب على اخلاقها
عبدالعزيز بحده: ومحسبه اني اغلط في لمى او اعيب عليها؟!!!
ليال: هذا الي فهمته منك.. طيب فهمني وش تقصد
عبدالعزيز ينزل راسه: لمى ما تحب فيني الرجال.. لمى تحبني عشان ساعدتها وهربتها من بيت عيسى وعشان خبيت على الكل سرها.. قالت لي انها اعترفت لك.. تذكرين يوم الي جيتي تدورين عليها ولقيتيها بشقتي.. كنت معصب عليها عشانها رافضه تروح لسهام.. ما كنت اصرخ.. بس كنت اتكلم بعصبيه.. نسيت نفسي ومسكت يدها بقوه اترجاها تروح.. لقيتها ترتعش وتطلبني لا اعتدي عليها.. البنت شافت عيسى بعيوني
ليال تغمض عيونها بحزن: ما نقدر نلومها.. الي شافته ماهو هين
عبدالعزيز بحزن: ودي اتزوجها بس هي بتشوفني عيسى.. لمى بعد الي صار لها عاشت حياه صعبه
ليال: تفكر فيها وما تفكر في نفسك!!
عبدالعزيز: غصب علي.. البنت رقيقه.. وطيبه.. ظلمها اخوها وجالسه تدفع الثمن على شي مالها ذنب فيه
ليال: لازم تقرر.. اما تاخذها او تاخذ غيرها
عبدالعزيز بحزن: ودي اتزوجها واستر عليها واصونها
ليال تدمع عيونها: وانت!! انا افكر فيك انت
عبدالعزيز يبتسم لها: وش فيني انا بخير
ليال تمسح دموعها: تبي تتزوج وحده ما تحبها عشان تحميها وتستر عليها!!.. طيب وانت؟!! ليه تدفع ثمن غلطة عيسى اخوك
عبدالعزيز بضيق: الله يخليك.. انا بخير جذي.. انا مرتاح معاكم وعايش حياة ماعمري شفتها.. ولمى وش فيها ما تنعاب
ليال: طيب كلمني.. لمى ما تكلمت معاك عن عبداللطيف
عبدالعزيز يمسك ضحكته: لا
ليال: احسك تبي تضحك!!
عبدالعزيز يضحك: ليش انتي ما تعرفين
ليال: خير!!
عبدالعزيز: لو ماهي ام عبداللطيف موجوده بحنيتها وخيرها على لبنى.. كنتي شفتي البنت ذابحته
ليال مستغربه: وليه عاد!!!!!
عبدالعزيز: ليلة الي هربتها من بيت عيسى اول من خطر ببالها هو عبداللطيف.. اتصلت فيه واستنجدت به حتى يجي ياخذها.. غلط عليها بالكلام وقال اشيا كثيره عيب اني اقولها.. قفل الخط بوجهها وهي من هذاك اليوم تكره وجوده بحياتها وما تطيقه ابد
ليال فاتحه عيونه: ابد ابد
عبدالعزيز يضحك: حتى هنا ياليال.. تكره شوفته حتى هنا.. ساعات تتصل فيني وتقول انها بتنتحر اذا شافته مره ثانيه
ليال تضحك: المجرمه ما قالت لي
عبدالعزيز: حتى ما حد ياخذ منه موقف على تصرفه معاها.. من تتصل تشتكي منه اموت من الضحك.. تكرهه بصوره عجيبه وتجامله بوجود الكل والاخص امه.. قلبي عليكي يا لمى
ليال: المفروض انا اقول قلبي عليها.. عزيز بسألك اذا عيسى اعتدى عليها.. اشلون وفيه ورقة زواج
عبدالعزيز: بعد ما هربتها واختفت عن عيون الكل.. اخوها زوجها لعيسى رسمي والثاني راح للمحكمه يطلبها لبيت الطاعه.. مفكرين ان الشرطه بتطلعها وتجيبها لهم على طبق من فضه
ليال: طيب اسمعني ياخوي.. اتركني اتكلم معاها واشوف ايش بخاطرها.. اذا قالت انها ما تبي ترتبط فيك وخايفه منك.. تتزوج غيرها.. بس اذا قالت انها مستعده تتزوجك؟
عبدالعزيز بفرح: ساعتها بتزوجها وانا ميت من الوناسه
ليال بفرح: جعلني افرح فيك وبعيالك يا خوي.. طيب اقدر اقول لها انك متقدم لها
عبدالعزيز يبتسم: طبعا تقدرين تقولين
ليال بحزن عليه: ياربي يوفقك ويكتب لك الخير
تذكرت سلطان.. تذكرت زواجه.. تذكرت احساسه بالموت.. تذكرت لهفته واصراره انه مايبي احد غيري يخطب له.. تذكرت حضنه.. تذكرت حبه لي الي جا متأخر.. جا متأخر كثير لدرجة اني ما شبعت منه.. حسيت اني ببتدي ابكي.. شفت جراح يقترب مني.. حاولت اغير مزاجي حتى ما ابين له اني مهمومه لاني تذكرت سلطان
جراح: بشري ايش قال



يتبع

ليال بحزن: قال لي اخطب لمى
جراح يوقف جنب شباك البلكون ضيق لانه توقع عكس الي سمعه: الف مبروك.. طيب ليه حزينه كذا
ليال: عشانه سر بحياة لمى وما اقدر اقول لك عليه.. كل الموضوع ان عزيز يبي يحافظ على هالسر
جراح يرجع لها: يتزوج لمى عشان يستر على سر؟!!!!
ليال تبلع غصتها: هذا عزيز.. تصدق ما فكر في نفسه
سمعت كلمات جراح الي كلها اعجاب برجولة عزيز.. كنت مبسوطه اني ما اشوف غيرته القديمه.. قال لي ليه اغير دام ليال زوجتي انا حبيبتي انا وفوق ذا كله مستأذنه مني حتى تتكلم مع عبدالعزيز عن زواجه.. قمت تركته وانا اضحك على كلامه الحلو.. دخلت عند بناتي ولقيتهم نايمات.. صبا صاحيه وتلعب.. حملتها وصرت ابوسها وهي تضحك.. ضحكها يجنني.. احبها بطريقه غريبه.. يمكن عشانها اكبر من بناتي وتحاول تتكلم وتحاول تشرح.. بناتي يا نايمات او يبكو او يتكلمو كلام ما افهمه.. حضنتها بحنيه.. كلهم بناتي وماراح اسمح لاحد يقترب منهم لو على موتي.. ربي حرمني من حملين ماعرفت اذا كانو اولاد ولا بنات.. وعوضني بثلاث بنات ياخذو العقل.. ياعزي بهم.. الحمدلله الحمدلله

&&&&&&&&&&&&&&&&&

9:00 الليل
فيلا العايله ..مجلس الرجال..
السعوديه
ناصر: استنو شوي هذي مكالمه مهمه
غسان يضحك: لا تكون متزوج على اختي وانا ما ادري
ناصر يسكته بصبعه وهو يرد على التلفون: نعم خير وش فيه
السكرتير: عمي ناصر انا عادل سكرتير عمي لافي
ناصر بملل: دارين انك زفت.. خير وش بغيت
السكرتير يبلع ريقه: الوالد يقول اذكرك بموعدك معاه بكره
ناصر بكل غضب: الان انت ياكلب جاي تقول لي عن موعدي مع ابوي
السكرتير ما عرف ايش يقول: عمي لافي هو الي قال لي اذكرك ياعمي
ناصر بحده: عمك لافي اذا يبيني يعرف يتصلي فيني.. انت ما تدخل بين الولد وابوه سامع ايش اقول لك
السكرتير بارتباك: اكيد اكيد عمي
ناصر سكر الخط بوجهه: لافي داز سكرتيره حتى يضايقني.. لا ومحدد موعد على كيفه.. هههههههههههه يا بختي به ابو
غسان: تظنه يتصل فيك
ناصر: لا طبعا ماراح يتصل.. بيظل يدز هالكلب لحد ما انفجر
صلاح: معلش اصبر ياخوي.. حنا عارفين وش نهايتها يعني مالها داعي العصبيه

&&&&&&&&&&&&&&&&&&&&&&

10:00 الصباح اليوم التالي
شقة ام لينا ..غرفة لمى..
البحرين

ليال: وش قلتي
لمى بجديه: طبعا لا.. وش تقولين انتي!!
ليال فاتحه عيونها: وش اقول يعني.. الرجال طلبك وانا جايه اشوفك
لمى بجديه: لا تشوفيني ولا اشوفك.. أي زواج الي تتكلمين عنه
ليال بحده: الزواج من الرجال الي مبين من كلامك انك حابته ومخبيه عن الكل حبك له.. يلا كذبيني
لمى بجديه: شوفي ليال.. يمكن اني اغلي عبدالعزيز واشوف فيه صورة الرجال الصح.. بس زواج لا
ليال بتطلع روحها: تبين تجننيني انتي.. تحبينه وزواج لا!!.. بذمتك هذا ماهو خبال
لمى: وشلون اشرح لك.. ليال زين الي قلبي يحب.. مابقى شي فيني صاحي غير قلبي
ليال تشوفها بشك: صاير معاكي شي يا بنت غير الي قلتيه لي
لمى تبتسم: تبين يصير لي شي ثاني بعد!!!
ليال تحضنها: لا طبعا.. الله لا يقوله.. بس اتأكد.. ماهو من حقي اتطمن عليكي
لمى بفرح: خلاص ياقلبي.. تطمني زواج ما ابي اتزوج.. قولي متعقده قولي اكره الزواج وطاريه.. بس صدقيني.. اني اتزوج مره ثانيه مستحيل
ليال: وانت تزوجتي مره اوليه عشان تتزوجي مره ثانيه!!.. يابنت لا تعترضي على حكم الله.. انتي بخير وما ناقصك شي.. شوفي حياتك وعيشي زي ما غيرك عايش.. والحقي جيبي لك طفل تفرحي فيه
لمى بحده: الله لا يقوله.. انا اجيب طفل ويصير له شي واجلس اتحسر باقي عمري عليه.. انا زين الي متقبله حياتي.. هالدور ولد يعرفوه الناس انه ولدي.. ياحلو السمعه الي بتلحقه
ليال: لاااااااا انتي طلعتي معقده من جد!!!!
لمى تضحك: ليش انتي توج مصدقه اني معقده
ليال: ظنيتك تستهبلي بس الان تأكدت
لمى: لا ياروحي انا جذي وماراح اتغير
ليال تمسك يدها وبحنيه: يابنت.. انتي تحبيه.. والي تحبيه يبيكي ويدور عليكي.. لا تجني وترفضيه
لمى بحزن: اجيبها لك من الاخر.. احبه أي.. بس ما احب احد يلمسني او يقترب مني.. فهمتي
ليال تنزل راسها: والرجال وش اقول له الان
لمى: انا بقول لك.. مزيان معجبه فيه كثير.. هي الوحيده الي بتطلعه من الي هو فيه.. اعرضي عليه مزيان.. ولا اقول لك انا بكلمه.. وبقنعه بها
ليال: اللهم طولك ياروحي.. يا سنين مزيان.. انا اتكلم عنك
لمى تبتسم: بذمتك انا اصلح لعبدالعزيز!!!
ليال بحده: وليه ان شا الله ما تصلحي له
لمى بحزن: عشان الي انكسر فيني مستحيل يتصلح.. يمكن مع رجال غير.. يمكن مع واحد ما يعرفني.. بس عبدالعزيز.. من المستحيل ارضى بالزواج منه.. انا ساعات اشوفه عيسى.. تجيني ساعات اخاف من وجوده
ليال: على حبك له!!!
لمى تبتسم بحزن: تصورى.. على حبي له
ليال: هو يشبه عيسى؟
لمى: لا ما يشبهه بس ماني عارفه ليش عقلي يربطه بعيسى على طول
ليال: انتي لازم يشوفك طبيب نفسي
لمى تضحك: قبل لا اشوفكم واتعرف عليكم كنت اقول بروح اشوف طبيب نفسي.. بس الحين لا.. انتو ما تدرون انكم صرتو علاج لي
ليال تحضنها: يلوموني اذا نسيت روحي وشغلي واهتميت بكم واحزانكم.. ماهو بس انتي الي تشوفين الكل علاج لك.. انا كمان صرت اشوف الكل علاج لي
لمى بخبث: شوفي يمكن اذا عرضتي جراح علي بواقف بسرعه
ليال تضربها بقهر: هذا وانا جالسه ادلع فيك من الصبح.. عيونك على رجالي
لمى ميته ضحك: فديت هالجراح.. يخبلني بضحكته.. يجنني بابتسامته
ليال تطيح فيها ضرب: اشوف عطيتك وجه يالدبه.. طلعت عينك عليه من جد.. يا قليلة الحيا.. كل ذا!! كل ذا!! وانا يا غافلين لكم الله
لمى تضحك من قلبها: تراني ماراح اتنازل عنه
ام لينا تدخل عليهم: وش صار اش فيكم على هالصراخ!!!
ليال وهي تضرب في لمى: عينها على جراح يما تخيلي.. بموت من القهر اذا ما ضربتها
ام لينا تضحك: خوفتوني جعلكم العافيه
لمى من كثر الضحك ماهي قادره تسوي شي:خالتي بعديها عني لا اضربها بالغلط ويصير على الي ببطنها شي
ليال بحده: يما اقول لك عينها على جراح وانتي مبسوطه
ام لينا تضحك: أي وش فيها خليها تحط عينها عليه.. ماراح تطول منه شي.. شوفي اشلون هو عينه على غيرها
لمى تضحك بجنون: بس ياااااااااااااااااااا مجنونه والله خايفه عليكي
ليال تبتعد عن لمى وبفرح كبير: صدق يما غلاتي مبينه بعيونه؟!!
لمى ميته ضحك: بقول له على الي سويتيه فيني عشان عيونه
ام لينا تضحك: انا بسبقك وبقول له

&&&&&&&&&&&&&&&&&&&&

11:15 الظهر
شقة ليال .. البلكون..
البحرين

جويل: ليه دايما سرحاني يا ألبي
مزيان تبتسم: سلامتك.. سعيده بس
جويل بفرح: ياربي تدوم هالسعاده
مزيان براحه: ودي نتغدى برا اليوم
جويل تكشر: شوبو طبخي!! هلأ ما بدك ياه!!
مزيان تضحك: بالعكس.. اقصد تجهزي الغدا ونطلع على البحر نتغدى
جويل منتبهه لها: لوحدكون ولا مع الكل
مزيان تبتسم: لا مع الكل طبعا
جويل تدندن: انا لحبيبي وحبيبي إلي.. يا عصفوره بيضا لا بئا تزعلي.. لا يعتب حدا.. ولا يزعل حدا انا لحبيبي وحبيبي إلي
مزيان تلاحظ وجهها: وش قصدك!!
جويل تضحك: شو أأصد.. انا بغني
مزيان بدت تعصب: لا ما تغني.. وش تقصدين
جويل: متل ما ألت لك.. بغني.. وبعدين هي اول مره تسمعيني بغني
مزيان تحاول تخبي عصبيتها: لا.. غني واسمعيني
جويل تكمل غنى: بحبو.. بحبو ما بأدر خبي.. وعيونو خلت ألبي متل رماااااااااد السيجارا.. تراتاتا تراتاتا
مزيان تضحك: الحين الاغنيه تقول كذا!!
جويل ماسكه ضحكتها: أي ما سمعتيها أبل هالمره
مزيان تبتسم: ما سمعتها.. وما ابي اسمعها
جويل: أي تزكرت.. ما سمعتي الاخبار عن عبدالعزيز
مزيان باهتمام: وش فيه
جويل: امس سمعته يكلم ليال ويئول.. انو بدو يروح لامو ع الكويت.. وليال مارضيت.. بس هو آل رايح رايح
مزيان بضيق: وليه يروح.. غلطان اذا راح.. هالحرمه ماعرفت قدر واحد زي عبدالعزيز.. ماني عارفه ليه مصر يجيب وجع القلب لنفسه
جويل: عبدالعزيز مافي منو.. هادي طاعة الوالدين يا ماما.. لا تأسي ألبك
مزيان بقهر: انا ما قسيت قلبي.. بس هو ماشبع من المشاكل.. كل ما افكر بالي سواه ابوه فيه احس روحي بجن
جويل تخفي ابتسامتها: وانتي ليه متعبه حالك وتفكري بعمايل ابوه لعبدالعزيز
مزيان تنتبه لنفسها: لا عادي شي يشيب الراس
جويل: ازا بدك شي يشيب الراس راح تلائيه عند لبنى.. هالمسكينه الي منا عارفه كيف تعيش
مزيان بضيق: جويل هو متى قال بيروح الكويت
جويل: ما بعرف يمكن زمانو راح
مزيان وقفت مصدومه: راح!!!!
جراح يدخل عليهم: مين ذا الي راح
مزيان تتركهم: بشوف البنات
جراح مستغرب: وش فيها!!
جويل بهمس: عاشئه يا ماما
جراح بفرح: تحب!! تحب!! من صدقك
جويل بفرح: أي أي.. هلأ لعبت بعئلا
جراح يضحك: وش سويتي
جويل: ألت انو مسافر وزمانو راح
جراح يشوف عيونها: تحب عبدالعزيز صح؟
جويل تبتسم: أي اسم الله ع ألبو ما يتعيب
جراح يحط رجل على رجل: شكلك خايفه مني وتبين تقنعيني فيه من غير لا انتبه لك.. بس انا كاشفك
جويل بشوية حده: لاني عارفه عئلك.. اكيد راح تئول كان محبوس وعليه أضايا
جراح يبتسم: صح هذا الي بقوله
جويل تشوفه بقهر: انا ما سدأت امتى مزيان تنسى حسن شوي.. البنت صارت مبسوطه من اول ما جينا ع البحرين.. الله يرضى عليك يا ابني لاتزعلا.. لا تكسر ألبا.. عبدالعزيز ما يتعيب.. مشفت العيبه منو.. عئلو كبير وئلبو اكبر.. بياخذ العقل بطيبتو اسم الله عليه.. جراح ماما لا تكسر ئلب البنت عشان شي فاضي
جراح يبتسم بخبث: الحين السجن والقضايا صارت اشيا فاضيه.. هذا نسب يا جويل
جويل برجا: الولد بريئ.. مافي شي اسبت ضدو.. لا تعملها حكايا الله يخليك
جراح ياخذ راحته بالقعده: قلت لا.. عبدالعزيز ما يناسبني نسبه.. ومابيك تعيدي هالكلام قدام مزيان مره ثانيه.. واضح
جويل تقوم بقهر: ماهو واضح.. واسمعا مني.. البنت عشئانه.. لاتجي بكره وتلوم حالك ع زعلا.. البنت امانه برئبتك وانت هيك ما بتصون الامانه
جراح بعد ما راحت جويل: اقول وصلك الحكي مني.. لا اشوفك تعانديني عليه
ليال تدخل البلكون: وش فيها صوتها واصل لباب الشقه
جراح يضحك: تعالي تعالي.. باين عليها كبرت وخرفت
ليال بزعل: لا تقول كذا عليها ما ارضى
جراح يسحبها ويجلسها جنبه: تعالي قولي لي الاول اشتقتي لي.. كيف قدرتي تصبري طول هالمده عن حضني
ليال تبتسم بفرح: فاضي حتى احكي لك.. تراني مطوله بالوصف
رحت اشرح واوصف واتعزل فيه.. مبسوط ويضحك بصوره تفرحني.. لفيته كل شويه يقول لي عيدي الي قلتيه صرت اغير مواقع الجمله واضيف وازيد والغي وهو انجن بضحكه معاي.. لقيته يسألني عن لمى وردها بلهفه.. مسكت ذراعه بقوتي وقرصته.. استغرب مني في البدايه بس بعدين قلت له علي القهر الي سمعتني ياه لمى.. صار يضحك من قلب قلبه.. يمكن هالحكي جا بوقته عشان يشوف غيرتي الي ماقد شافها عليه.. لما انتبهت لهالشي زدت بالحكي من عندي على كيفي.. شي ويبسط زوجي ليه ما ازيد فيه.. طبعا الحكي ماهو عن لمى.. الحكي عن غيرتي واني لمحت نظرة الاعجاب برجولته في عين اكثر من وحده قلت له عن غيرتي انها ممكن تكون قاتله مدمره.. وهو طاير بالي يسمعه.. ما حبيت ان الفرح الي اشوفه بعيونه ينتهي عشان كذا تابعت كلامي.. سألني عن رد لمى من طلب عزيز يمكن حسيت بسؤاله نوع من الخوف.. بس لما قلت له انها رفضت شفت بعيونه السعاده.. انا كنت منتبهه على تعابير وجهه.. كنت اناظره بحده وش يقصد؟!! قال حتى يخلى له الجو ويتزوجها.. قرصته بقوه في ذراعه خلته ينقز من الوجع.. هو موجوع هو يضحك ماهو عارف ايش يسوي.. بس انا قمت عنه امثل دور الزعلانه حتى يجي يراضيني.. احبه وهو يذبح عمره حتى ارضى عليه.. احبه

&&&&&&&&&&&&&&&&&&&&&&&&

7:00 الصباح بعد اسبوعين
شقة عبدالعزيز ..غرفته..
البحرين



مشت امورنا تمام التمام خلال هالاسبوع.. اقدر اقول اسبوع مريح من غير مشاكل.. من يومين لبنى طلعت من المستشفى جراح فاجأ الكل بعزومه عجيبه رحله بحريه.. فرحت كثير.. والكل طار بهالخبر خصوصا منصور وعياله.. كانو محتاجين هالتغيير.. محمد محامي جراح وصل البارح من لندن هو مع اهله.. جراح قال له يجي معانا حتى يتعرف على الكل.. وفرصه نتفق على الامور مع بعض بجو يكون مريح للكل.. جهزت اخذت شنطتي وطلعت من شقتي
عبدالعزيز يدخل شقة ليال وبحده: يلا ياجراح
جراح بدا يعصب: وانت تشوفني ماني جاهز.. هذول الحريم
عبدالرزاق يدخل الشقه: وانتو بعد ليلحين ما جهزتو!!!
عبدالعزيز بملل: يا اخي هالحريم معطينهم خبر من متى.. وشوف ليلحين ما اجهزو
عبداللطيف يدخل: يلا ترا امي وخالتي والبنات جاهزين
جراح يمسح وجهه بيده: بقو عماتي خوله وليال
احمد يدخل: يلا احنا جهزنا
عبداللطيف يضحك: اذكرو الله بس.. معلش حريم وعندهم عيال
احمد فاتح عيونه: لاااااااااا ما اجهزو ليلحين!!!
عبداللطيف يضحك: بكره حرمتك تجيب لك طفل وتتأخر مثلهم لا تستعجل
جراح: احمد خذ زوجتك والشباب واسبقونا خلكم على الرصيف البحري
احمد يتريق: ماشي.. ودي اقول لكم لا تتأخرون بس ما باليد حيله
جراح يضربه على كتفه: تتريق انت ووجهك
احمد يضحك: يلا نشوفكم السنه الجايه ههههههههههههههههه
نزل احمد والشباب.. وعبدالرزاق رجع لشقته جراح راح لغرفة العيال يشوفهم اذا اجهزو.. وانا نزلت.. احسن لي من حرق الاعصاب.. وصلت للبوابه.. جاني رائد يركض
رائد: عمي زين الي لقيت احد فيكم
عبدالعزيز: خير وش صار!!!
رائد يعطيه ورقه: المعلومات لسا واصلتني من دقيقتين .. هذا الاسم عمي موجود بالبحرين.. والمشكله ان في سياره واقفه هناك لوحتها سعوديه.. وانا انتبهت عليها من شويه بس



يتبع

عبدالعزيز يفتح عينه: ما شيكت رقم اللوحه؟
رائد: ما لحقت عمي دوبني استلمت هالمعلومات الان.. والسياره زي منت شايف بعيده مره.. ما شكيت ان ممكن يكون هو فيها
مشيت وقلت لرائد يجي معاي.. طويت الورقه وخليتها بجيبي.. مشيت وانا ادعي من قلبي ما يكون هو.. صحيح كان ودي اشوفه من زمان بس وجوده الحين وقدامي خطر كبير.. وصلت للسياره.. وكانت معتمه.. الشبابيك مغطاه بالعازل الاسود.. تأكدت من اللوحه والرقم.. وقفت جنب الشباك.. انتظرت انه يفتح واتكلم معاه.. صرت اشوف الشباك بحده.. ولما مالقيت منه استجابه.. ضربت الشباك بقوه.. فتح لي صرت مركز عيني بعينه وانا ساكت.. الحين هذا هو!! وش فيه من الزود.. اش فيه غير الرجال.. مسكته من ياقته بقبضتي.. ورفعت يدي ابي اضربه



داخل العماره عن البوابهالحارس بخوف: عمي انتظر شوي لا تطلع الان
جراح حامل صبا: ايش صاير!!!
الحارس: فيه معلومات وصلت لرائد من شويه.. هذا غير ان فيه سياره غريبه واقفه بعيد شوي
جراح بحده: و رائد وين؟
الحارس: مع عمي عبدالعزيز وشكلهم يتضاربو مع هالشخص
ليال حامله الحلا وبخوف: خلنا نرجع يا جراح
مزيان وهي ماسكه الغلا بقوه: نرجع يا جراح
جراح بحده: خان.. خاااااااان
خان يجي يركض: يس بابا
جراح: افتح الشقه هذي
خان بسرعه يفتحها:................
جراح يعطي صبا لجويل: ليال.. ادخلو بالشقه هذي ولا تطلعو الا اذا رجعت.. وانت انتظر عمك عبدالرزاق وقول لاهله يدخلو مع الحريم
ليال تدخل هي ومزيان مع الشغالات والعيال: ..........................
الحارس بحزم: عمي ما اقدر اتركك تطلع لهم.. رائد قال لي ما اتركك تطلع.. الاول يتأكد من السياره والاشخاص الي فيها
جراح بحده: وخر عن طريقي
الحارس يوقف في طريقه: على موتي.. رائد قال حتى لو تقتلني ما اتركك تطلع
عبدالرزاق يوصل: خير ليش هالصراخ.. وش صاير!!!
الحارس يطمنه: ما صاير الا الخير عمي.. خذ عمي جراح وتفضلو بالشقه مع الحريم.. شوي ونجيكم
خوله تلزق بعبدالرزاق: ليال وين.. وين راحت ليال
الحارس: عمتي الكل هنا بالشقه.. لا تخافي الكل بخير. عمي عبدالرزاق الله يخليك خذ عمي جراح معاك.. شوي ونجيكم



مع عبدالعزيز
عبدالعزيز: انت تكذب على من
ناصر بين يد عبدالعزيز: ما اكذب عليك.. اقول لك اهلي ساكنين بهالمنطقه ولاني عارف هم بأي عماره قلت اوقف انتظر يمكن اشوف احد منهم واروح لهم
عبدالعزيز بحده: مافي احد بهالمنطقه سعودي
ناصر: انا متأكد انا جاي مع صاحب لي من فتره لهم بس مضيع المكان.. والعماير هنا يا مكثرها
عبدالعزيز بذكاء: في عيله من السعوديه منتقلين من فتره بسيطه.. بعد وفاة قريب لهم.. يمكن هم
ناصر: اذا كان المتوفي اخو الزوجه فهم
عبدالعزيز: أي على ما اذكر انه اخو الزوجه
ناصر برجا: الله يخليك.. هذول هم.. ما تعرف وين راحو
عبدالعزيز يتركه: لا.. بس انت وش علاقتك بهم
ناصر تنزل دموعه: قصه طويله.. صدقني ماني عدو.. انا جيت اتطمن على اهلي بس.. ما ابي غير اني اتطمن عليهم
عبدالعزيز: ما ادري عنهم شي.. بس دامهم اهلك اشلون ما تعرف عنهم شي
ناصر يمسح دموعه: فيه من ظلمنا وفرقنا عن بعض.. حتى اني اتطمن عليهم ماصار لي امل فيه.. انحرمت من اني اتطمن عليهم
عبدالعزيز بجديه: ابيك تمشي من هنا.. هالمنطقه كلها عوايل.. واذا غيري شافك بيصير لك نفس الي صار لي معاك
ناصر يركب سيارته: ودي اطلب منك شي
عبدالعزيز بملل: ما بقدر اسوي لك شي.. العيله الي تقصدها ما اعرفها وكل الي جمع بيني وبين رجالها مجرد سلام.. كان يصلي معاي بالمسجد
ناصر بعد ما فقد الامل: شاكر لك
وقفت في مكاني لحد ما مشى.. ما حبيته ابد.. ما حسيته رجال ابد.. ولافيه ريحة الرجوله.. دمعته قريبه.. لا ويبكي بعد.. ليتني اشوف الكلب ابوك واذبحه بيدي.. الي شافته هالمسكينه من يدكم ماهو قليل.. ما نسيت وجهها المشوه.. قلب مزاجي حسبي الله عليه قال يبي يتطمن عليها.. بس منين عرف طريقها!!!
رائد: عمي انت بخير
عبدالعزيز بحده: بخير.. جعله ما يتهنى.. قلب مزاجي
رائد: ضروري افتح وحده من الشقق الي بالطابق الاول.. عشان اخليها مكان خاص للسيارات والحريم ما تظطر تطلع للشارع
عبدالعزيز بمزاج متعكر: زين ابتدي بالي قلت عليه من الحين.. بس الاول شوف مهندس
رائد يقرب من العماره: خير ان شا الله
الحارس بخوف: صار شي ياخوي
رائد: لا ياخوي كل شي بخير.. الجماعه نزلو؟
الحارس: ايوا وعمي جراح مره معصب
عبدالعزيز: انا اكلمه.. وينهم رجعو فوق؟
الحارس: لا ياعمي بهذي الشقه
عبدالعزيز: ادخل ونادي جراح مابي الحريم يحسون
الحارس: عمي دق عليه تلفون دخلتي بتخوف الحريم
عبدالعزيز ينتبه: ماترك فيني عقل هالكلب
اتصلت على جراح وطلع لي هو وعبدالرزاق.. قلت لهم الي صار وجراح بدى عليه التوتر.. السؤال الي محيرنا ناصر وش عرفه مكان ليال ومن متى!!.. طلعنا مع الحريم.. ووصلنا الرصيف البحري.. وشفنا محمد وتعرفنا عليه.. رجال ممتاز مبين عليه ذكي.. ويحب الشغل.. كلامه كان موزون حاول منير ووليد يمزحو معاه بس هو كان يبتسم لهم.. يعني انكتمو ماهو وقت مزح صرت اضحك على الخيبه الي تنرسم على وجوههم.. صرت اشوف مزاج ليال مريح.. كنت اشوفها لحد ما انتبهت لعيوني.. رحت اكلمها بشفايفي طبعا من غير صوت.. صحيح اني ما بعرف اش بتقول لي بس مهم عندي تعرف اش ابي منها.. لقيتها تضحك وتهز راسها يعني أي.. كنت اسألها عن جراح اذا قال لها عن ناصر.. فقالت أي.. ودام انها مبسوطه هذا يعني ان موضوع ناصر مافي خوف منه
احمد اقترب منه وبخوف: شنو تقصد بموضوع ناصر؟!!
عبدالعزيز: ناصر كان جنب العماره من شوي
احمد بخوف: اش تقول!!
عبدالعزيز: هذا الي صار
احمد: ليال عرفت
عبدالعزيز: أي جراح قال لها.. بس شكل الامور تبشر بخير
احمد ماهو متطمن: الامور ما تبشر بخير ياعبدالعزيز.. اذا ناصر وصل لليال بهالسهوله لافي بيقدر يوصل لها اسرع من ناصر
كنت اتكلم مع احمد بصوره جديه.. وأأكد عليه ضروره الانتقال للبنايه الجديده بسرعه.. هذا اسرع وأأمن حل ممكن اننا نلجأ له.. شفت ليال وهي تكلم لمى.. غصب عني ابتسمت للثنتين.. ماني عارف كيف لفيت بنظري عنهم وجات على مزيان.. شفت دموع بعيونها.. كانت ساهيه هيمانه.. وتشوفني!!!
صحيح لمى رفضت الزواج بي وليال قالت لي على كل شي.. بس انا بحياتي ما فكرت بمزيان.. وبعدين ما ابي اخسر جراح.. اكيد بتصير مشاكل من جهة الكل.. عارف انهم بياخذو موقف من جراح اذا رفضني.. ما ابي أي مشاكل.. ابد ابد.. انا سعيد جذي.. سعيد كثير


&&&&&&&&&&&&&&&&&&&


9:30 الصباح
على المركب
البحرين

سمر تدني من خالها: خالي حبيبي
خالد يحضنها: ياروح خالك انتي
سمر بدلع: خالي ريما تقول انهم هذيك المره صادو سمك.. ابي اتعلم انا بعد.. قول لعمي عبدالعزيز يعلمني
خالد: حبيبتي الحين الكل مشغول بالشغل.. خلك مع البنات انتي.. ومتى ما فضينا اقول له
مروان تدخل من غير شعور: انا اعلمك.. ما يبي لها شي.. بسيطه.. بس بنتظر راكان يجي راح يشوف الوالده
عبدالعزيز ينقذ الموقف: سمر يبا بغير ملابسي وبنجلس نصيد.. قولي للبنات يجهزون
سالم بجديه: وانا بعد ابي مثلهم
راكان وصل ويحمله: انت عاد خلك معاي.. وانا بعلمك
سالم بدلع: لا انا ابي ريما
مروان يضحك على حركة سالم: خلك مع الرجال حتى تطلع قوي مثلهم اش تبي في البنات
سالم يفكر: يعني ما العب مع ريما
راكان يشوف مروان بلوم: لا حبيبي تشوفها وتلعب معاها بعد.. قول لي اش رايك تلعب معانا شوي وتروح تلعب مع البنات شوي
سالم يركض بفرح: اوووووووووووووووكي
مروان يضحك: يجنن الله يحفظه
راكان وهو متضايق من وجود مروان: طلعنا في عمر بعض
مروان: انت اش تخصصك
راكان: انا درست تجاري
مروان بفخر: وانا علمي
عارفه انهم بيدخلو في تنافس على ديما.. الحلو ان ديما ماتدري عن الاثنين.. اما المجرمات لمى ولبنى ما اعتقو ديما المسكينه.. صرت انا وخوله المحامين عنها.. شوي وانتبهت ان مروان نظراته على سمر.. نغزت خوله وهمست له.. ولفت حتى تشوفه.. ما قدرت تمسك نفسها من الضحك.. قلت للينا وقالت احسن بعد خلنا نرتاح من وجع الراس.. حنان عرفت وفرحت.. قالت احمد يازينه اكيد اخوه يشبهه.. همست لي وقالت والاهم اني بتطمن على ركان ان ماحد يناشبه على ديما وبتطمن على سمر انها مع واحد اخوه احمد.. ضحكت على خبالها قسمت ووزعت على كيفها عشان بس تتطمن على عيالها.. استأذنت من الكل وقمت بروح اطلق رجولي.. انتبهت ان مزيان ماهي معانا.. رحت ادور عليها.. نزلت الكبينه ولقيتها جالسه بآخرها تبكي
ليال تحضنها: ايش صاير ياقلبي.. مالك مزيان
مزيان تمسح دموعها: مافي شي ياقلبي.. وجع راس بس
ليال تجلس وتبتسم لها: ماراح اعتقك.. بتقولي لي تراني بفضحك قدام الكل
مزيان تبتسم غصب: تفضحيني؟.. ماعندي مانع
ليال تضحك: ول عليكي ياكبر الحزن الي ساكنك.. قولي يابنت ايش جرا لك
جويل تجي ومعاها عصير: انا بئول لك يا ماما
مزيان بحده كبيره: جويل ولا كلمه
جويل طنشت مزيان: البنت عاشئه.. ولا راضيه تقول مين.. حالا مقلوب بكا ونواح وكل ما جيت اسئلا شو حصل لك.. تكدب علي وتئول بتزكر حسن
مزيان ويزيد بكاها: ولا شي من الي قلتيه صح غير اني فاقده حسن.. هذا الصحيح فاقده حسن
ليال تبتسم: وخير يا طير.. وتحبي مافيها شي.. حبي ياقلبي واعشقي وش فيها غلط.. ليه تخبي هذا حنا قدامك نقول كل شي بخاطرنا.. ليه انتي تسكتي.. ليه تخبي بقلبك وتعيشي بضيق
جراح يجيهم وبخوف: مالكم ايش صاير.. اختفيتو وخفت عليكم
جويل تشوفه بقهر: حزرتك أبل هيك وما سمعت الكلام.. شوف النتيجه هلأ
جراح يدني من مزيان ويحضنها: وش فيه القمر يبكي.. مين ضايقك
مزيان تبتسم غصب: ماصاير شي جويل تحب تكبر الموضوع.. تذكرت حسن بس.. هاليومين ذكراه ماهي تاركتني
جراح يحضنها بقوه: تكلمي عنه.. تكلمي عن الي بقلبك.. ليه تسكتي.. اذا انك تستحي مني هذي ليال عندك
غمزت لجويل عشان تطلع.. وطلعت.. جلست شوي معاهم وخرجت لجويل.. سألتها مزيان تحب مين قالت عبدالعزيز.. ابتسمت لااااااااا انا فرحت.. كنت بطير من الفرحه.. بس صدمتني جويل وقت قالت ان جراح ماهو موافق.. خفت شوي من الجمله الي قالتها جويل.. سألتها عن الموقف الي خلاها تقول ان جراح ماهو موافق وقالته لي.. ضحكت عليها تذكرت نظرته وقت قلت له عن لمى ورفضها لعزيز.. عرفت انه هو بعد يتمناه لمزيان.. تركتها وبمشي بس مسكت ذراعي وصارت تترجاني اقول لها وش فهمت.. قلت لها جراح يبي عزيز هو الي يطلبها مايبي احد يفرضها عليه.. يبي عزيز من نفسه يقول ابي مزيان.. ارتاحت بالي قلته لها ومشت عني.. الان جا دور احمد.. رجعت جلست مع الحريم وعيني على احمد ما صدقت وقت الي التفت علي يشوفني.. قلت له القصه ضحك بالاول وابتعد عن عبدالعزيز حتى ما ينتبه عليه.. طلبت من احمد انه هو يبتدي باقناع عزيز او بطرح الموضوع
لينا باهتمام: اش عندك معاه اشوفكم تكلمو بعض.. ودي خاطري اعرف لغة الشفايف
ليال تضحك: ما يبيلها شي.. ركزي في حركه الشفايف وبتعرفين الحرف كيف ينطق
لينا: الحقي الحقي احمد يبيكي
انتبهت عليه.. وعرفت انه يبي يتكلم عن ناصر.. اخذت المعلومات منه وعرفت ايش يبى بالضبط.. اقتنعت بفكرته.. اتصلت على صلاح وقلت له كل كلمه قالها احمد.. صلاح وافق وقال لي انه بيفتح الموضوع مع ناصر.. احمد اكد على ان صلاح يقول لناصر ان له ولد.. بكذا بيتشجع حتى يشتغل مع ابوه وبينقل كل المعلومات الي في المكتب خوف على حياة ولده من ابوه
مزيان جلست جنب ليال وبضيق: جراح يقول لك انتي بخير
ليال تمسك كتفها: قولي له ليال تقول دام مزيان متضايقه هيا متضايقه
مزيان تحاول ما تلتفت ناحية عبدالعزيز الي واقف مع لمى: ماله داعي الخوف.. انا بخير شوي واروق
هويدا: مزيان ايش اخبار العيشه في البحرين
ليال ترد: العيشه هنا تاخذ العقل
مزيان بضيق: تلاقي روحك الي ضايعه منك.. بس ما تقدري تلحقي عليها
هويدا تضحك: يعني الشغل 24 ساعه
هناء: اختي تقصد بتشوف زوجها زي الناس والعالم ولا بتنحرم منه زي لندن
ليال واجعها قلبها على مزيان: يا بعد قلبي يا هويدا محمد يغيب عنك طول اليوم!!
هويدا تتنهد: ياختي خليها على الله.. لو اختي واخته ماهم معاي كنت جنيت
هناء تضحك: عاد هويدا وعذاباتها مع اخوي
هلا: اهم شي بشروها بتشوف زوجها ولا بتنحرم منه
خوله: شوفي اوعدج حتى لو محمد قعد معاج انتي من نفسج بتفتحين له الباب وتقولين له روح اشتغل
هويدا تمسك قلبها: واااااااااااي على محمد وليه ان شا الله اطرده انا ما صدقت لقيته
لمى تضحك عليها: عشان القعده معانا تنسيكي الناس والعالم
هلا: انا عن نفسي بجلس معاكم عمري كله.. انا من وصلت ما بطلت ضحك
جلستهم تاخذ القلب.. ناس بسيطين في جلستهم ماهم متكلفين ابد.. صحيح اسمعهم بس عيني على لمى والي تقوله لعزيز.. ابتسمت لانها تشجعه يخطب مزيان.. لمحت نظرة الجرأه بعيونه شفته يقول لها انه يقدر ينسي مزيان حزنها بس يخاف من رفض جراح.. التفت على مزيان الي جالسه جنبي بس عيونها تتبع عزيز بكل تحركاته.. ياليت اقدر اقول لها على عزيز والي يقوله يمكن تهدى نفسها



مع الشباب
عبدالعزيز: اكذب يعني
خالد بعد ما اختاره احمد حتى يافتح عزيز في الموضوع: لا تكذب ولا شي.. بس على الاقل خلك واضح
عبدالعزيز يرفع راسه للسما ويتنهد بقوه: بالاول كانت مشاعري مع ليال.. بس لقيت روحي ما تقبلها غير اخت.. لمى ما اقدر احبها.. ما اقدر هي بعد اخت لي.. صحيح كنت ابي اتزوجها عشان احميها.. بس الحقيقه اني ما احبها
خالد بهدوء: كنت بتظلمها
عبدالعزيز يبتسم له: بالعكس.. انا ما اعرف اظلم.. بتكون معززه مكرمه.. بجبر روحي على حبها دامي اشوفها سعيده
خالد: ورفضتك يا اخي.. خلاص الموضوع منتهي
عبدالعزيز يرفع عينه على مزيان الي اكشف انها شافته ونزلت عينها: هذا انت تقول منتهي.. خلاص عاد سكر الموضوع
خالد يمسك رجوله: هالموضوع ما ينتهي الا لما تتزوج
عبدالعزيز: خلاص ولا يمهمك بنشر بالجريده عن مواصفاتي والحياه الي عشتها والمصايب الي عاشت معاي.. وماراح انسى اكتب رقم تلفوني.. واوعدك ماحد بيتصل ويقول حياك نسبك يشرفنا.. امك رمتك وابوك محكوم عليه بالاعدام
خالد يضحك: يا اخي انا خسرت يوم من حياتي ماعرفت اشلون قضيته.. فتحت عيني لقيت الدنيا اختلفت.. رجال مرمي بالمستشفى زين الي ما ذبحته.. وزوجتي الي كانت ترمي بنفسها على الحيط وكانت تصرخ بجنون وهي بروحها بالغرفه ولو ما لحقو عليها الموظفين الي بالفندق كانت رمت روحها من سابع دور.. يا اخي احنا عايشين.. والاهم اننا مع بعض.. ليش تعقد الامور
عبدالعزيز يخطف نظره لمزيان: ادخل في الموضوع الي تلحن فيه من اول ما جلست
خالد يضحك: اخت جراح.. عينها عليك.. مزيان ومزيونه.. عانت في الدنيا وتبي تلاقي الراحه.. جراح منا وفينا وماراح يقول لك نسبك وامك وابوك
عبدالعزيز يبتسم بحزن: انت عارف جراح من؟!! عارف ولد من؟!! عارف اش يملك واش يقدر يسوي؟!! انا وين وجراح وين
خالد: وانت عبدالعزيز الرجوله والسنع.. وين يلاقي رجال مثلك وبأخلاقك.. وبعدين صحيح انك منت بغناه بس تملك
عبدالعزيز يفتح يده: وين الي املكه الي عندي كله راح.. الحمدلله.. الله انعم علي بالصحه والعافيه وبكم وبأشيا حلوه كثيره.. بس الفلوس انا ما املكها ياخالد
خالد يعدل جلسته: احمد ما قال لك؟!!
عبدالعزيز: عن شنو!!
خالد: المحكمه رجعت فلوسك.. وبعد ثلاث ايام تلاقيهم بحسابك
ما صدقت الي سمعته.. عارف اني كذبت على خالد.. بس ما قدرت اقول له اني اتابع نظرات مزيان لي.. حاسس اني ميال لها.. بس قلت لمى مستحيل اتخلى عنها.. وهذا لمى رفضتني ومن شوي تقنعي بمزيان ما بقى غير ردة فعل جراح وهذا الي خايف منه.. لا شعوريا رفعت عيوني ولقيتها تناظرني.. اشوف حزنها واشوف ضيقها.. وحاس ان هالضيق انا سببه.. بس ضروري اتصرف.. عارف ان رجولتي ترفض فكرة اني اترك مزيان بضيق جذي.. بس شسوي ما ابي مشاكل ما ابي افقد هالناس الحلوه الي عايش معاها لو جراح قال لا.. انتبهت اني اشوف عيونها واتمناها ترجع تشوفني.. وهذا هي شافتني ابتسمت لها.. احس اني اسمع دقات قلبها.. تنهدت وابتعدت حتى ماحد يلاحظ اللخبطه الي سكنت فيها.. وقفت ونزلت البحر.. رحت اغوص واسبح.. تفكيري انربط بها فجأه.. منعت روحي عنها بس الان احس بجرئه غريبه.. وياخوفي من الي بيصير بعدها

&&&&&&&&&&&&&&&&&&&&&&&&

11:00 الظهر
فيلا العايله ..جناح ناصر..
البحرين
الشوق اخذني لك ياليال.. ما اقدر ما افكر غير فيكي.. ياليت اقدر الحقك وين ما تروحي.. ما كنت ابيكي تحني علي.. كنت ابي اتطمن عليكي بس.. كاره روحي.. ما احس اني رجال حتى بنظر حالي.. كنت ابكي بين يد هذاك الرجال زي الطفل.. ايش اسمي الي كنت فيه غير ضعف.. ليه شخصيتي كذا.. ليه ما رحت على البحرين قبل كذا ودخلت للعماره الي كان سلطان فيها ودقيت على كل باب حتى اشوفها قدام عيني.. ليه ما اجرها واجبرها تعيش معاي واكيد حبي لها بينسيها قسوتي معاها.. ليه ما عملتها قبل كذا ليه.. ليه انتظرت لحد ما تركت المكان الي هي فيه وشافت مكان ثاني.. ليه استسلمت انها تكون لغيري وانا واقف اتفرج وابكي زي الاطفال.. ليه.. ليه ما قتلت زوجها وحرمتها منه زي ما حرمتني من قربها ليه.. ليه زوجها يملكها وانا لا.. ليال حبيبتي انا روحي انا.. ماراح اتركها لغيري ابد
بسمه تدخل عليه: السلام عليكم
ناصر بحزن: وعليكم السلام
بسمه: خير ياروحي مالك جالس كذا
ناصر بتعب: تعبان.. ضايق خلقي.. ليه راجعه بدري من الشغل
بسمه تجلس جنبه وبابتسامه حنونه: حسيت بضيقك قلت اترك الشغل واجي افرح معاك شوي
ناصر يشوفها بحزن: تجين نسافر كم يوم
بسمه بفرح: ايوا.. ودي اخذ اجازه شهر من شغلي اقضيهم معاك




يتبع

ناصر يبتسم: خلاص نحجز لاحلى مكان ونسافر عليه
بسمه بفرح: ودي اقول لك شي
ناصر يحضنها: اسمع ياروحي
بسمه ترمي براسها على كتفه: بحياتك ما سألتني عن العيال
ناصر يتذكر ليال: ماهم مهمين عندي.. المهم عندي هو زوجتي.. راحتي مع زوجتي.. في عيال او مافي ماهو مهم عندي
بسمه تبوسه: مرتاح معاي
ناصر يشوف عيونها: المفروض اني اسأك هالسؤال.. انا الي دايم سرحان ومهموم
بسمه تحضنه بقوه: احبك بكل مافيني.. احبك يابوعيالي
ناصر يشوف عيونها: حلوه منك يا بسمه.. اعجبتني هالكلمه.. بس.. بس.. انتي؟!!!!
بسمه بفرح: انا حامل
ناصر نسى كل شي حوله وحضنها بقوته: يا قلبي انتي.. يا روحي انتي.. تفداك روحي ياقلبي
بسمه وهي طايره من السعاده: حيلك حيلك مبسوط يا قلبي
ناصر بفرح كبير: مبسوط ياروح ناصر وقلبه انتي


&&&&&&&&&&&&&&&&&&&&


11:30 الظهر
شركة لافي ..مكتبه..
السعوديه

لافي يفكر: يعني احساسي بمحله.. صلاح ما يروح البحرين الا وفيها شي
مسعود: بس المكان الي وصل له عمي ناصر غير عن المكان الي يروح له صلاح
لافي بجديه: ولو.. اكيد ليال هناك
مسعود: ما اظن
لافي يشوفه بحده: وليه!!
مسعود: عشان الرجال الي خليته مكاني قال لي ان جراح بن مبارك طلع من العماره
لافي يضرب بقبضته المكتب: ايش دخل ناصر بجراح
مسعود: يمكن يبي يرد عليك بموضوع الشغل الي تسكر عليه
لافي يفكر: ممكن يتعاون مع جراح ضدي؟!!
مسعود: ممكن.. كل شي ممكن
لافي: سألت عن البنت الي تزوجها جراح؟
مسعود: ايوا ياعمي حنان منصورالشيخ.. الظاهر ان جراح تعرف على منصور الشيخ وحب انه يجازيه على المشروع الي خسرك ياه وتزوج بنته
لافي بقهر: معلش بكره اجيب خبره هالجراح واقتله بيدي.. وخليه ينفعه منصور بعديها
مسعود: عمي محتاج فلوس للرجال الي خليته في البحرين
لافي: مر الخزنه واسحب الفلوس الي تكفيه
مسعود: والسياره البحرينيه الي شريتها عمي تركتها للرجال هناك
لافي يهز راسه: شفت كان عندي حق وقت قلت لك اشتري سياره بلوحه بحرينيه.. هذه جابت نتيجه
مسعود: بس لو ليال في البحرين ما بنعرف طريقها غير من صلاح.. السياره جابت نتيجه مع عمي ناصر.. وماهو ذا طلبك
لافي يتنهد: اكيد صلاح كان يلتقي بجراح في البحرين.. ولا كيف صلاح ينجح بشغله بهالطريقه لو ما كان جراح ظهر له.. وكيف ناصر يخبي كل الفلوس الي بحسابه بهالطريقه.. لا فيه تحويل ولا فيه سحب للفلوس.. اجل وين راحت؟!!
مسعود: هذا السؤال بعد ماعندي اجابه عليه.. شي يحير.. بس زي ما قلت جراح مافي اخبث منه بهالمواضيع واكيد له يد.. بكذا تتجمع الخيوط لروحة صلاح للبحرين مع عمي ناصر.. جراح الرابط الوحيد.. بس ياعمي لو صلاح تعرف على جراح وجراح ساعده بشغله اكيد عرف عن قصة ليال.. واحتمال يكون ساعدهم انه يخبيها
لافي: ممكن.. ممكن.. الاهم من ذا كله ان ليال في السعوديه
مسعود: لا تخاف ولو لها علاقه بجراح بنكتشف هالشي بسرعه
لافي يبتسم: وساعتها بمسك مهرتي.. هههههههههههههه
مسعود: تامر شي ثاني عمي
لافي يشوفه بخبث: شهد ما داومت زي ما قلت لها يا مسعود
مسعود يبلع ريقه: ما بغت ياعمي.. حاولت معاها تاخذ الشيك الي تركتها لها بالخزنه.. مارضت بعد
لافي يبتسم: تخاف على بنتك مني يامسعود.. تخبيها عن لافي!!
مسعود: لا ياعمي ابدا.. انا عارف انك احن عليها من ابوها.. بس ما اقدر اغصبها على شي ما تبيه.. ماغير تقول لي انها خايفه منك وخايفه رقبتها تطير
لافي يمسك الفايل الي قدامه: بكره ماتجي غير وهي معاك.. والا لاتجي يا مسعود لعندي ابدا
مسعود بلع ريقه: بس ياعمـ..................
لافي يشوفه بابتسامه: فيه داعي اذكرك بالي ممكن يصير
مسعود فاتح عينه: لا ياعمي.. ما يصير الا الخير


&&&&&&&&&&&&&&&&&&&&&&


12:20 الظهر
على المركب
البحرين

جراح يسحب معاه: تعالي بس
ليال: وين ساحبني معاك
جراح بفرح: لهنا بنوقف هنا
ليال تبتسم: منت خالي وش فيك فرحان كذا
جراح يحاول يخفي ابتسامته: ما بي ادخل بتفاصيل
ليال: براحتك.. بشوف البنات وبرجع لك
جراح يمسك يدها: اجلسي شوي مزيان مع البنات.. اتركيها شوي معاهم
ليال: صار لها شي جديد
جراح يبتسم: تبكي
ليال بخوف: رجعت تبكي.. من شوي بدت تضحك
جراح بفرح: لا تخافي.. جالسه تنسى حسن
ليال تبتسم: حلو هذا الي انت تبيه.. بس ضروري يكون فيه بديل
جراح فاهمها: طبيعي يكون فيه بديل.. وانا غشيم عن الاحاسيس
ليال تحط رجل على رجل وبكل غرور: تراك ما تلعب علي.. شكلك كاشف الموضوع
جراح يضحك: كاشفه ومن زمان.. ومطنش براحتي
ليال: يعني موافق
جراح يتصنع الجديه: طبعا لا
ليال انقلبت ملامحها: ليه!!!!
جراح يضحك على شكلها: الي ابيه انها تنسى حسن وبس.. تنسى حسن وبس.. غير كذا مابي
ليال تضحك عليه: تراني كاشفتك.. بس ياجراح اذا ما فتحنا معاه الموضوع ماراح يفكر ويتحرك يطلبها
جراح يحك جبينه ويتنهد: ايش تبين اعمل اقول له تعال تزوجها.. نسيتي لمى.. كان يبي يتزوج لمى بس عشان يستر على سرها زي ما تقولي.. يعني ما يحبها.. ليال اذا فيه من اقنعه بمزيان بيتزوجها رجوله منه ماهو حب فيها.. افهميني
ليال: فاهمتك.. بس فكر معاي شوي.. الي عزيز مر فيه والي عاش فيه ماهو هين.. في راسه انه مافي احد بيقبل فيه.. جراح.. عزيز اول شي بيفكر فيه هو الماده.. انت وين وهو وين
جراح بطيب نفس: بس انا عمري ما فكرت كذا.. ماهو انا الي برفض رجال شهم مثله عشانه فقير ولا عشانه مر بظروف صعبه.. ليال حسن زوج مزيان ماكان غني.. بس كان رجال ذكي.. الي عجبني فيه اخلاقه.. ايش اعمل بغناه اذا كان رجال فاسد ويآذي اختي بحياتها.. الحمدلله الفلوس موجوده بس الاخلاق ما تنوجد بسهوله
ليال بفرح: تصدق لو ما هالخلق كلهم هنا.. كنت حضنتك بكل ما فيني.. كل يوم اكتشف فيك اشيا جديده تعجبني واحبها
جراح يتصنع الغرور: طبعا ياروحي انا جراح بن مبارك الحلا والزين
ليال تشوفه بقهر: تراني حامل لا تعمل هالحركات قدام ولدي حتى ما يقلدك
جراح ميت ضحك عليها: خلاص قررتي انه ولد
ليال تشوفه بحب: ..............................


&&&&&&&&&&&&&&&&&&&&&


3:00 العصر
فيلا العايله .. الحديقه..
السعوديه
صلاح: فهمت
ناصر يشوف عيونه: ليال هي قالت اني اشتغل معاه؟!!
صلاح: ايوا
ناصر: وينها فيه الان
صلاح: مع زوجها.. بنجلس نعيد الكلام كثير
ناصر: عندي احساس ان لي منها ولد
صلاح يضحك لان ناصر وفر عليه الكلام: وين في؟!!
ناصر: ماتظن ان من حقي اعرف اذا صار لي ولد ولا لا
صلاح: من حقك اذا صار في
ناصر يشوف عيونه: اذا بنفذ الي قلت لي عليه.. فهذا عشان ولدي.. ماهو عشان ليال
صلاح يبتسم: خلاص نفذه
ناصر بفرح: يعني لي ولد؟!!
صلاح يهز اكتافه بطريقه طفوليه: ما ادري
ناصر يحضنه: يعني عندي.. عندي ولد وشايل اسمي.. ما قصرت.. ريحت قلبي الله يريح قلبك.. عندي خبر
صلاح يبتسم: خير
ناصر: بسمة حامل.. ما ودي ليال تعرف
صلاح: وليه لا.. ليال بعد حامل من زوجها
ناصر تختفي ابتسامته: من جد!! حامل من جد!!.. طيب وولدي كيف يربيه رجال غريب
صلاح يبتسم بخبث: ومن قال ان لك ولد
ناصر: ما بي شي غير انك تطمني عليه.. عارف ليال زين بتخبيه عن عيون ابوي.. لو اعرف ليه يذبح عيالي
صلاح: ناصر.. خلنا نلتفت على شغلنا.. كسر ابوك ماهو بالساهل.. اذا ما قدرنا عليه ماهو ليال بس الي بتنضر.. نوف وعنود وانت اول الكل ولا تنسى ان بسمه حامل.. يعني الخوف على الي ببطنها اكبر
ناصر باقتناع: عيالي اول الكل.. ليال وش سمته
صلاح يبتسم: من هذا
ناصر يضربه: يا اخي يا ثقل دمك.. لا تخرب فرحتي عاد
صلاح: المهم عندي انك عرفت ان لك ولد.. لا تسأل كثير.. السؤال الان بيشكل خطر
ناصر يبتسم: صدقت.. خلاص رايح له بكره


&&&&&&&&&&&&&&&&&&&&


4:45 العصر
المركب
البحرين



جلسنا وصرنا نقرر اخر القرارات حتى نبتدي اللعبه الجديده.. جراح فاجأني ان البنايه خلاص تقريبا خلصت.. باقي الاثاث.. كنت اشوف احمد ماني مصدقه.. احمد ضحك وقال ان البنايه هذي اشترك في بنائها ثلاث شركات للمقاولات.. يقول كانو يشتغلو ليل نهار من غير اجازات.. طبعا كل شي مدفوع حسابه.. وليد كان يشوفني باهتمام.. وبما ان الاحاديث مع وليد ما قد اخذت مأخذها معاي الا في حدود.. فماتوقعت انه يكون عامل لي أي اهميه حتى يشاورني او يطلب مني اساعده بشي مصيري.. لما انتبهت عليه كلمني من غير صوت وقال اشوف له وحده من اهل محمد.. خلاص ماعاد فيه حيل يتحمل.. كاره الوحده ودام البنايه جهزت وفلوس الشركه تدخل عليه ارباح خلاص لا للعزوبيه.. ضحكت عليه قدامهم وانتبه لي جراح نزلت راسي وانا احاول امسك نفسي بس من جد جملته ضحكتني.. احمد وعزيز صارو يشوفوني مستغربين الضحك الي جاني.. عمي منصور خاف وتغيرت ملامح وجهه.. بس قلت لهم ان فيه واحد من الموجودين أمن مسكنه وارباح شغله ويقول لي لا للعزوبيه.. جراح انبسط وفهم من كلامي انه عزيز.. احمد صار يضحك هو بعد شايف لخبطة عزيز ومحسب انه كلمني وخلاص بسعى في الموضوع.. انحرجت ساعتها كيف افهم جراح واحمد.. احمد قدرت اتكلم معاه وقلت له اسم وليد.. اما جراح كان يشوف عزيز وهو فرحان ما قدرت امنع نفسي خفت من أي حركه تطلع من جراح تحرجه قدام الكل.. ومالقيت غير اني اهمس له باسم وليد.. حزنت لردة فعل جراح الي حسيت فرحته اختفت بس رجع يبتسم للكل.. ورجعنا للشغل من بعد حركة وليد.. منصور شاف اننا نبتعد عن لافي هالفتره وخصوصا انه الان وصله خبر بزواج جراح من حنان.. واي لعبه بتجي من ناحيتنا بيكون واثق انها رد على حركته الاخيره مع جراح.. قررنا هالمره نغير طريقة الشغل.. نعرض المشروع ونشوف الشريك المناسب الي يركض ورانا حتى نشتغل معاه.. انتبهنا لمحمد الي قال انه يتمنى ان لافي هو بنفسه يركض ورا هالمشروع حتى نعرف كيف نلعب معاه.. وما يقول اننا نسعى ورا خراب شغله
ليال بجديه: يبقى قاعة الاجتماع مع العملاء.. ضروري اننا نجهز القاعه باحدث مستوى من التقنيه المتاحه على الساحه
جراح: احمد اصر على هندسة قاعة الاجتماع في البنايه.. تصميمها بيعجبك
وليد: من هذي الناحيه لا تخافين.. بركب كاميرات وبيكون في غرفة جانبيه لقاعة الاجتماعات.. بتكونين فيها وتشوفين وتتابعين العملاء بالطريقه الي تريحك.. غير السماعات الي بتكون موصوله بالكل حتى نتخذ الحركه المناسبه لاي شي ممكن يصير وماحد فينا يكون ماخذ باله
عزيز: حلو.. وماله داعي تظهرين قدام الكل على انك ليال.. كل شي مخفي مخبى بطريقه ما تكشف وجودك
محمد: كم نصيب كل واحد فيكم
منصور: ليش تسأل!!!
محمد: لاني ابي اكون شريك معاكم.. ما اقدر اعيش معاكم في مكان واحد واقبض راتب وانتو كلكم شركاء
جراح يضحك: الي موافق على وجود محمد شريك معانا يرفع يده
احمد يشوف الكل: الكل موافق يامحمد.. نرجع العماره واوريك العقود وتدفع نصيبك
منصور بفرح: كسبنا فرد يا بختنا فيه
محمد بفرح: الله يحيي اصلك


&&&&&&&&&&&&&&&&&&


12:45 الظهر اليوم التالي
شقة حنان ..الصاله..
البحرين



ركان: حيا الله الي صحى متأخر.. اقول لا يكون بس مزعجينك في الليل اشوفك ما تنامه هالايام الي راحت
منصور يضحك: ولد
ركان يدني منه: ياروح هالولد انت.. ياعمره الي يبي يقضيه تحت ظلك وانت تاج على راسه
منصور بحضنه: ياعزي بك ياراكان
راكان: اخلص بس.. شنو نتغدى
منصور قتح عينه: عطيتك وجه بس لا تنسى روحك
راكان بجديه: ومحسب اني بدلعك.. اخلص بس.. اغديك ولا تغديني
منصور بجديه اكثر: اقول ان ما غيرت لهجتك معاي.. احلم تملك على ديما
راكان وينط في حضن جده: افا والله افا.. هذا وانا راكان عزك.. منت مزوجني وبتحرمني من روحي
منصور يضحك عليه: مجننتك هالديما
راكان باستسلام: يبا بموت لو ماعطتني وجه.. امس عيوني عليها ابيها تحس ابيها تلتفت ابها بس تشوفني بعيونها لو بالغلط.. مافي مافي
منصور: هذي البنت الصح
راكان: عارف يايبا بس انا خلاااااااااص بموت.. والي زاد علي امس وجود مروان اخو احمد.. روحي بتطلع مني.. شوف لي حل
منصور: خلاص بكلم احمد واخطبها رسمي
راكان: ما رضت قلت لسمر تقول لها اني بتقدم رسمي وقت الي ام احمد راحت اخطبتها لمروان.. بس ديما ما رضت.. احسها تبيني سمر تأكد لي هالشي.. امي بعد توصل لي مواقف ساعات تصير بين الحريم اكون فرحان.. بس قدامي مافي أي حركه
منصور: الحين انت منت مقتنع ان الي تسويه سنع وادب
راكان بضيق: والله عارف بس على الاقل حركه.. حركه وحده وما بطلب شي ثاني
منصور: الي تقوله ما يقبله عقل.. هذا حب وانت لازم تتحكم بعواطفك
راكان يشوف جده بخبث: وش رايك ازوجك امها.. وتكون انت المسؤول عن ديما وبعديها تزوجها لي
منصور ضحك من قلبه على هالولد: لا تحسسني انك من غير عقل
راكان بجديه: اتكلم جد.. انسى ديما الحين.. ليش ما تفكر بأم لينا.. وش رايك تلحق تتزوجها وتنبسط بحياتك شوي.. انسى الي صار مع جدتي.. اذا.......................
منصور يقطعه: ما ابي احد يجيب طاريها لا بخير ولا بشر
راكان: انا ما جبت طاريها.. انا اتكلم عنك انت.. اقول لك تزوج وانبسط بحياتك.. ما شا الله عليك ما ينقصك شي
منصور يتنهد: اش السر الي بينك وبينها ما رضيت تقوله لاحد
راكان يشوف عيون جده بارتباك: يبا اش بتستفيد من الي بقوله غير انك تزيد اوجاعك وجع
منصور: قول دام امك ماهي هنا.. وبعدين حنا رجال.. مانعرف للوجع طريق
راكان يضحك: وليش ما نعرف للوجع طريق محنا بشر.. ولا حرام نحس بالوجع
منصور بجديه: تكلم
راكان: كنت صغير وهي اخذتني معاها راحت لبدر ودفعت له مبلغ كبير حتى يتزوج خالتي لبنى
منصور مصدوم: وين شفتوه
راكان: في بيت خطابه.. الي قالته الحرمه لجدتي انه رجال زين بس ما عنده فلوس.. وجدتي دفعت المهر و الشبكه.. وعطته بملغ يخليه بحسابه لزوم المظهر قدام عمي ناصر.. لما سألتها قالت انها شافت خالتي لبنى مع بدر بس بدر ما عنده فلوس يتزوجها.. قالت تعطيه عشان خالي ما يتورط ويتزوجها وهي تحب غيره
منصور يغمض عيونه: حسبي الله ونعم الوكيل.. جعلها ما تربح
راكان: جدي خلاص انساها انت قلت لامي وخالي يعتبرونها ميته.. وانا بعد اقول لك اعتبرها ميته وخلاص صفحه وانطوت من حياتنا.. جدي تزوج ماهو شرط ام لينا.. أي وحده ثانيه.. انسى الهم وانسى جدتي بعد


&&&&&&&&&&&&&&&&&&&&&&


1:30 الظهر
شركة لافي ..مكتب لافي..
السعوديه

لافي برجا: ايش قلتي يا شهد
شهد تشوفه بخوف: ........................
لافي: حبيبتي.. رقي لحالي انا تعبت ارضيكي يا شهد
شهد بخوف: وانا قلت لا
لافي يبتسم: حبيبتي انتي قولي لا زي ما تبين.. بس بالنهايه انا اخذ الي ابيه
شهد: من بكره ماراح اجي الشغل
لافي يبتسم: بتلاقي ابوكي مطرود وراكي.. منين تاكلو ومنين تصرفو بعديها.. وديون ابوكي الي سحب فلوسها من الشركه بطالبه بها في المحاكم.. ويمكن يسجنوه.. وبعدها بتجيني ركض حتى اخرجه.. بس ساعتها ماراح تشوفي ابتسامتي ولهفتي عليكي ابد.. بتلقين الوجه الثاني للافي.. صدقيني ماراح تحبيه ابد
شهد تبكي: هالشي ما يرضي الله يا بوناصر
لافي سحبها: ايش رايك بالليله


&&&&&&&&&&&&&&&&&
[COLOR="SeaGreen"]

- لافي بيعرف طريق ليال من ورا ناصر؟!!
- ناصر بينفذ تهديده ويحرم ليال من زوجها؟!!
- لافي بيقدر على شهد بنت مسعود؟!!
- لافي بيلاقي طريق ليال؟!![/COLOR]