كاتب الموضوع :
دانة الحمادي
المنتدى :
الارشيف
كنت مبوسطه كثير كثير.. الحمدلله .. الله عوضني الخير اسرع ماكنت اتصور.. صحيح اني اشوف ام ناصر رافضه.. بس مو مهم رضاها.. سعادة صلاح اهم عندي.. صلاح مهم عندي كثير.. الحمدلله ياربي.. الحمدلله.
رحت اكل كأني اول مره اشوف الاكل بحياتي.. لافي كان يضحك من قلبه علي.. بعكس ناصر الي خايف علي.. كنت كل شوي اشوف نوف وسعادتها.. وعارفه ان عبير بتقتهر كنت عارفه انها تبي صلاح.. من يوم ملكتي وانا عارفه انها تبي صلاح.. سمعتها وهي تقول للعنود هالشي.. كنت سعيده انه نوف تكون زوجه لصلاح.. تستاهل ياصلاح زوجه مثل نوف.. وحده عدله صح.. طلبت من لافي انه يجيب الجده وفتحيه وما مانع بالعكس رحب كثير حسيت ام ناصر فرحت من طلبي هي بعد اكيد مشتاقه لامها وماتقدر تطلب من لافي هالشي.. بعد ما طلعو اتصلت على صلاح وقلت له.. كان شوي وبيطير يجيني.. قلت له اني خطبتها له وفي موافقه مبدئيه.. طلبت انه يحجز للكل ويجيبهم معاه.. وافق على طول.
بعد ماسكرت من صلاح ناصر قال
ناصر: انا بحجز لهم لا تخلي صلاح يحجز.. يعني نساهم بالمصاريف
ليال: ههههههههههههه أي مصاريف
ناصر: يعني انا اقول............
ليال: ناصر خلينا نتكلم بصراحه من غير زعل ممكن؟
ناصر: ياريت انا كنت بطلب منك هالطلب
ليال: ابتدي مع اني عارفه ايش بتقول
ناصر: ودام انك عارف ايش ابي اقول ليه تبيني اتكلم
ليال: عشان ابين لك الي منت عارفه
ناصر: انا بتكلم عن الفلوس
ليال: ايوا عارفه انه عن الفلوس
ناصر: ايوا انا عارف انه صلاح ما معه
ليال: وتظن اني اطلب اختك وانا عارفه انه اخوي ما معه!!
ناصر: انا ما قلت انه ما معه يعني معدوم.. انا اقصد
ليال: الي انت ماتعرفه انه صلاح صار عنده اربع محلات بمناطق متفرقه بالمملكه.. تجارته ناجحه الحمدلله
ناصر مستغرب: من متى هالحكي!!!
ليال: من زمان.. الله يحفظه من نجاح لنجاح
ناصر: ما شا الله.. يعني ماقلتي لي
ليال: واقول لك ليه
ناصر: يعني للعلم بالشي.. ابي اعرف هو بايش يتاجر
ليال: ناصر.. انا بحياتي ما سألتك انت بايش تشتغل.. انا اعرف انك تاجر ولد تاجر.. بس بحياتي ماسألت ايش نوع التجاره الي بيدك.. تعرف ليه
ناصر: ليه
ليال: لانه ماهو شغلي اعرف
ناصر: تقصدي انه مالي شغل اني اعرف عن صلاح
ليال: بالضبط.. لا تزعل مني.. هذي تجاره.
ناصر: ايوا بس انا مابروح اخرب عليه تجارته وبعدين انا نسيبه.. واكيد اني بساعده
ليال: اذا هو احتاج اكيد بيجيك.. بس انك تعرف معلومات دقيقه تخص شغله.. لا
ناصر: طيب طيب اكلتينا.. كل هذا حب وخوف على صلاح حتى مني
ليال: حب وخوف على صلاح هذا اكيد بس الاكيد ماهو منك.. هذي تجاره.. اذا ماحافظ عليها ممكن تطير من يده بسهوله
ناصر: اقول ياعقلك
ليال: اسألك سؤال
ناصر: قولي ياروحي
ليال: تظن انه ابوك بيوافق كذا من غير لايدري عن صلاح؟
ناصر: اكيد.. هو يبي يرضيكي بس
ليال: يرضي زوجة ولده ويرمي بنته؟
ناصر: ابوي معجب بصلاح من زمان
ليال: الاعجاب شي والنسب شي ثاني.. صدقني اذا سألته بيقولك انه ماوافق الا وهو متأكد انه صلاح يملك وبيوفر لنوف العيشه والمستوى الي هي عايشته
ناصر: كأني اكلم ابوي.. الغريب انك انتي تطلعي تشبهيه وبناته الي من صلبه ولا وحده منهم تطلع عليه
ليال: ههههههههههههه
بعديها بثلاث ايام طلعت من المستشفى لاني كنت محتاجه اروح للبيت وارتب لجية اهلي.. طبعا شلت فكرت اني اطلع من البيت.
في يوم الوصول كنا بالمطار كنت مبسوطه مره اني بشوف اهلي.. صار لي مده طويله ماني شايفتهم شوقي لهم كبير.. وفرحتي بجيتهم اكبر.. صحيح انه اتصالاتي بهم شبه يوميه.. لكن يبقا اني اشوفهم هالشي مهم لي كثير.. وانا في عز تفكيري بالي جايين.. لقيت طفل يوزع منشورات اعلانات عن اشيا كثير.. رمى كم ورقه بيدي.. وركض على غيري يعطيهم.. جلست على واحد من الكراسي.. وانا عيوني مركزه على باب الخروج للمسافرين.. سمعت من يناديني.. تلفت يمين وشمال لقيت صلاح بوجه يبتسم لي.. ياروحي ياخوي ركضت عليه وحضنته جلست ابوس فيه.. وهو ضامني لحضنه.. حسيت بيد تمسك كتفي رفعت راسي لقيته ابوي.. تركت صلاح ورحت لحضن ابوي.. الي ما كان ودي اني اتركه.. حسيت اني ابي ابكي بحضنه.. هو الي اماني بحضنه من دون الناس كلهم.. يا حبيبي يا يبا سمعت امي تنادي.. رحت لها وانا ابوس فيها لحد ما قطعت نفسها.. رحت ادور على الباقي لقيت سلطان واقف بعيد.. مجرد اني اشوفه واقف بعيد وهو قالب الوجه عطاني شعور بالجفا تجاهه.. اكتفيت اني مديت يدي اسلم عليه وبس.. رحت ادور على خواتي.. جاتني سوسن وهي حامله بنتها.. واول ماوصلت رمتها في حضني قالت
سوسن: هاكي انا الي حملت وتعبت واطلعت روحي عبال ماجبتها.. وهي بكل وقاحه طلعت تشابهك
ليال: هههههههههههههههه ياربي عليها.. ماشا الله تبارك الله.. تجنن والله قمر.. حرام عليكي تقولي انها تشبهني.. هذي احلى بكثير
عبدالله: كيف حالك ليال
ليال: هلا وغلا بو ليال
عبدالله: بالمهلي.. اشوف شبيهتك بحضنك
ليال: امها رمتها علي متضايقه انها تشبهني.. ياربي يحفظها هالجمال كله يشبهني حرام عليكم
عبدالله: عاد تصدقي كنا بنسميها منيره على اسم امي.. جدتي من شافتها قالت هذي ليال.. واختك ما كذبت خبر سمتها على اسمك
منال: لي لي حبيبتي
ليال تحضنها: ياروحي انتي وحشتيني كثير كثير كثير
منال: وانتي والله اكثر
ليال: سلمان حبيبي.. تعال يا ماما سلم علي
منال: يوه روح لخالتك ولهانه عليك
سوسن: هذا بالتلفون مافي اطول من لسانه.. على الطبيعه ما في اهدى منه
ليال: اذكري الله عليه
ناصر: يا هلا والله
عبدالله: هلا وغلا
ناصر: اقول الجماعه وينهم
عبدالله: تأخرت طيارتهم 3 ساعات كمان
ناصر: اقول نمشي حنا وبعدين نرجع لهم
سوسن: والله ياريت تراني ميته تعب
رجعنا البيت.. والشوق واللهفه كانت ماليه الكل الا سلطان طبعا.. حتى ناصر لاحظ جفاه.. انا طنشته سلطان من يومه وهو بعيد عني ماهو زي صلاح ابد.. ليه اهتم.. هذا سلام ماكلف نفسه يجي يسلم علي زي الخلق.. مايهمني.. وصلنا والجماعه ريحو وبعدين رحنا انا وناصر جبنا جدتي وخالاته.. وسعادتي كانت ماتنوصف.. كنت شوي وبرقص قدامهم.. وجودهم روح الهم الي بقلبي كله.. بعد صلاة المغرب دنت مني الجده وسحبتني نتمشى بالحديقه شوي.. طلعت معاها وجلسنا على وحده من الكراسي.. وراحت تسألني عن كل شي.. انا عن نفسي ما خبيت عليها شي.. ابد حتى عن عبير.. قلت لها كل شي صار لي كل شي.
الجده: ماني مصدقه يما
ليال: هذا الي صار يما
الجده: لافي مايسويها يما
ليال: الي صار قلته لك عطيني شورك ايش تقولي
الجده: والله لف راسي يما
ليال: انا فضلت اسكت.. وقلت اقولك انتي احسن بدل ناصر.. ناصر مابيرضى على ابوه.. شوفي يما انا ما ابي اتجنى عليه او ادعي شي ماهو فيه.. بس مافي رجال غيره و ناصر بالبيت.. والخدم كلهم حريم ومافي غير السايق والحراس.. وهذول مايدخلو البيت ابد..
مين غيره
الجده: ناصر وين كان وقتها
ليال: تركته بالطابق الارضي
الجده: وانتي تعرفي انه لافي كان بالبيت
ليال: ما اذكر.. ما اعرف اذا كان بالبيت او لا
الجده بخوف: هو حاول معاكي يما
ليال: لا لا يما اعوذو بالله.. الا هذي.. ماشفتها عليه.. صحيح انه معاملته لي مختلفه.. صحيح انه يدلعني وهالشي يثير غيرة البنات.. بس لا لا بحياتي ماحسيت معاه بشعور شاذ.
الجده: اجل كلامك يما مايتصدق
ليال: انا تاركتهاعلى الله.. اكيد بكره بيبان المخفي
الجده: الي ام ناصر كانت تقوله لي انه طاير من الفرح بحملك.. وكان يبي يفرش الارض لك حرير حتى ما تتأذي بمشيك.. لكن انه يدفعك من فوق الدرج.. هذي الي ما اقدر اصدقها
ليال: صحيح كلام خالتي صحيح.. كان يدور على رضاي هذيك الايام.. وحتى هاليومين يما.
الجده: طيب انتي شفتيه وهو يدفعك؟
ليال: لا سمعت همس بصوت رجال
الجده: يمكن الكلبه عبور
ليال: مستحيل.. الصوت كان ذكوري ماهو مصطنع
الجده: يا يما انا حاسه انها ورا هالشي.. اذا انك تقولي انها مهددتك.
ليال: والصوت صوت من!!!!
الجده: ما ادري يما
خلصنا قعدتنا.. وجينا بنلف ونرجع لهم.. لقيت لافي واقف بالمجلس ويتابعني انا والجده وشكله كان الفضول بيذبحه حتى يعرف ايش كنا نقول.. انا طلعت ذكيه جلست انا وجدتي بصوره ماتخلي احد يشوف حركة شفايفنا.. انا قلت للجده على هالشي بعد.. لقيتها استغربت اول شي.وبعيدن صارت تقول
الجده: ايوا ايوا.. وانا اقول كيف يعرف ايش نقول انا وام عبدالله.. كيف يدخل علينا عرض بالكلام حتى لو كنا بعيد الان فهمت
ليال: لا تلوميني اذا خفت على نفسي
الجده: وانا خايفه عليكي بعد.. بكلم ناصر ترجعو
ليال: لافي مابيتركه.. انسي هالشي
الجده: ياويل قلبي على عيالي بيذبحهم لافي
ليال: يما انا مفكره في شي وابي شورك.
الجده: قولي يما
ليال: انا استخرت الله عشان اتعلم كيف اقرا حركة الشفايف.. بس لسا مالقيت أي دلاله من الله تشجعني على هالشي
الجده: واكيد مابتقولي لاحد عن هالشي
ليال: هذا اكيد
الجده: بس هذا مايجوز يما.. لازم زوجك يدري يما
ليال: وانا لازم أأمن حياتي يما
لاجده: خلاص غيري الموضوع اشوف لافي جاي علينا
ليال تغير الموضوع: بس الحمدلله قال لي انه اقدر انجب وعطاني كم نوع من الحبوب وبعدين بيشوف النتايج ايش يصير
الجده: الحمدلله يما.. هذا مقدر ومكتوب.. والله بيعوضك الخير ولو فيه نصيب كان صار بين يدك الان
ليال: الحمدلله انا بحياتي ما اعترضت على قدرة الله
لافي يوصل لهم: الحمدلله.. انا احبك تكوني كذا على طول قوية ايمان.
الجده تناظره بحده: الحمدلله.. ليال قوية ايمان.. وبتقدر تعدي هالمرحله
لافي: ماهو كفايه حكي بالموضوع صار لكم اكثر من ساعه وانتو تتكلمو فيه
الجده بحده: وانت بتتدخل بسوالف الحريم بعد.. من متى وانت تعرف عن سوالف الحريم.. ولا انت الي بتقول لها وبتعلمها ايش تعمل وكيف تتصرف
لافي: لا انا ماقصدت.. اكيد بتتعلم منك بس انا اقصد انه هالموضوع يجدد حزنها وحنا ماصدقنا نطلعها من الي هيا فيه
الجده بحده: اقول اهتم بامورك يابو ناصر.. سيب سوالف الحريم للحريم.. ماهو انت بتعلمني متى اعلم بناتي كيف يتصرفو في امور مثل هذي.. وبعدين عيب عليك.. سوالف الحريم لاتدخل روحك بها نهائي واضح
لافي: اكيد.. اكيد
حسيته انكسر من كلامها.. يمكن زلزلته قوتها.. خاف من غضبها.. فعلا هو ايش دخله بهالامور.. هذي امور خاصه جدا.. عيب يتكلم فيها او يسأل عنها.. او حتى يلمح انه يعرفها
بعديها طلبنا نوف رسمي.. وتمت الموافقه رسمي.. وبعدها بخمس ايام تمت الملكه ولبس الشبكه.. وكانت فرحتي ماتنوصف.. بعد الملكه بيومين هلي ردو السعوديه بعد احلى اسبوع عشته معاهم الا صلاح ظل مع نوف.. عقب ما وصلتهم المطار رجعت تعبانه رحت رميت نفسي على سريري.. تذكرت اني نسيت اتصل على صلاح واقول له انهم سافرو فتحت الشنطه بطلع التلفون ولقيت مجموعة اوراق تذكرت الولد الي عطاني ياها تجاهلتها ورحت اكلم صلاح.. وانا اكلمه التفت على الاوراق ورحت اقرا ايش فيهم.. كانو عباره عن مجموعة اعلانات متنوعه عن شامبو وكريمات معينه من اماكن معينه.. عطر جديد.. محل ملابس.. رحت بقطعهم ولفت انظري اعلان غير عنهم.. رميت الاوراق من يدي ورحت اقراه مره وثنين وثلاثه.. سكرت المكالمه مع صلاح وانا مو مصدقه.. اعلان عن تعليم حركة الشفايف.. ماصدقت حالي وكأنه الاعلان ذا مرسوم رسم حتى يناسب ظروفي.. هذي هي الاجابه يا ربي؟ ما اصدق
كنت امشي في الغرفه مثل المخبوله.. ما ادري اتجرأ واتصل؟ ومن ايش خايفه.. الوضع مناسب جدا وما حد بيحس بشي ابدا.. خصوصا انه استاذي وآخذ عنده ماده بالجامعه.. واذا اخذت عنده حصص اضافيه محد راح يحس علي.. تجرأت ودقيت على الرقم
ليال بلغه انجليزيه: الو
مارتن: هذا الدكتور مارتن جايمس يتكلم
ليال: مرحبا دكتور
مارتن: من معي
ليال: اتكلم معك بخصوص الاعلان الذي بين يدي .. عن البرنامج التعليمي المطروح من قبلكم لتعليم حركة الشفاه
مارتن: ولكنك تأخرتي كثير في التسجيل.. قفد بدات الدراسه من اسبوع وفاتك الكثير
ليال: غير مهم سأستطيع مجارات الطلاب الي ماوصلو اليه
مارتن: ولكن باب التسجيل اغلق منذ فتره.. وانا اعتذر لعدم قبولك
ليال: دكتور.. سادفع لك ماتطلب.
مارتن: ولكن الجهه الراعيه لهذه الدراسه لن توافق على قبولك
ليال: الجهه الراعيه لهذه الدراسه ستمنح شهادات للمتخرجين.. وانا غير محتاجه لهذه الشهاده
مارتن: ولكن !!!!!
ليال: فكر في الموضوع.
مارتن: لم اتعرف بك حتى الان
ليال: ليس ضروري.. متى ماقلت انك موافق على طلبي.. ستراني شخصيا
مارتن: سأفكر
ليال: دكتور.. فكر ايضا انه سيكون بيننا عقد متفق عليه
مارتن: وعلى ماذا ينص هذا العقد
ليال: ينص على انا لا يعلم احد بأني طالبه عندك وادرس هذه الدراسه
مارتن: ولم كل ذلك التعتيم
ليال: لاني فتاه خليجيه.. واهلي غير موافقين على هذه الدراسه
مارتن: اها.. قلتي بانك فتاه خليجيه؟
ليال: نعم
مارتن: انا ادرس فتاه خليجيه عندي بالجامعه هل هذه انتي
ليال: جوابي يعتمد على موافقتك
مارتن: اسمعي.. اذا كنتي انت من اعني فانا اوافق.. واذا كنتي غيرها.. فاعتبري طلبك مرفوض نهائي
ليال: ومن تقصد بكلامك
مارتن: ليال النشمي
ليال: ولماذا انت متحمس لها لهذه الدرجه
مارتن: لانها فتاه ذكيه جدا.. وانا احب الاذكياء.. تعاملها مع الاشخاص شبه معدوم.. ولكن ذكائها وقوة شخصيتها.. اشهر من اني اذكرها حتى
ليال: اشكر لك هذا الاطراء.. اسعدني حقيقة
مارتن: اذا انت ليال؟
ليال: نعم انا ليال
مارتن: اذا نجلس مع بعض بعد المحاضره غدا.. ونتفق على المبلغ الذي ستدفعيه.. هذا ماقلتيه
ليال تبستم: وانا مستعده لذلك.. سيكون العقد بيدي غدا ايضا
مارتن: وانا موافق
انهيت المكالمه معاه.. وانا في سعادة كبير لانتصاري.. كنت ابي اليوم يعدي بسرعه.. حتى اروح للجامعه واقعد معاه.. بس المشكله الفلوس كيف بتصرف.. فكرت كثير.. كيف بدفع له انا تقريبا ما معي شي.. انا بحياتي ماطلبت من ناصر فلوس.. ماكانت لي حاجه بها اصلا.. كيف بتصرف.. جاني ناصر باليل.. وقتها كنت سرحانه بموضوع الفلوس كيف بدبرها.. اكتشفت اني ما املك شي.. ولاشي.. كيف مافكرت من قبل بهالشي.. انا بحياتي مافكرت اني اكون ماديه مع ناصر.. بس الوضع الان اختلف.. لازم أأمن نفسي.. اذا طلبت منه فلوس الان اكيد انه بيشك.. دنا جنبي وقال
ناصر: الحلو بايش يفكر؟
ليال تنتبه: ها لاحبيبي.. افكر بنوف وصلاح
ناصر: مالهم
ليال: افكر ايش اخذ لهم هديه
ناصر: بس كذا.. على ايش تامرين
ليال: محتاره يا ناصر
يتبع
|
25-12-08, 09:05 PM
جديد مواضيع قسم الارشيف
العرض العادي
