7:10 الصباح
شقة ليال ..الصاله..
البحرين

احمد بصراخ: اهدي شوي.. اهدي شوي
عبداللطيف: مستحيل نبتدي جذي
جراح بهدوء: ايش رايك تأجلي الموضوع ذا لحد طلعت عبدالعزيز
ليال: ماراح أأجل شي.. وبنبتدي اليوم.. مافي وقت
عبدالرزاق: مافي وقت لشنو
ليال: مافي وقت اننا نأجل الي حولي يروحون مني وانا أأجل الاول عبدالرحمن والان سلطان وزوجته.. ماعندي استعداد اخسر اكثر من كذا
لمى: انا معاج.. بس نقتنع بالي عندج الاول
احمد: لمى لا تجلسين توافقينها على تهورها.. جذي ماراح ننجح
لمى: الحكم بيننا هو الاوراق يا احمد.. اذا بدايتها مقنعه بنتابع.. ماهي مقنعه خلاص نكنسل وندور على شي ثاني
ليال: تعجبيني
عبدالرزاق: توقعت اول شي تقولينه تبين تروحين السعوديه
ليال: قلت لك مابي اخسر احد ثاني.. انسى الي بالسعوديه الان.. لازم نبتدي شغل
احمد: توكلنا على الله.. نبتدي
ليال: جهزت لجلسة عزيز؟
عبداللطيف: كل شي جاهز
ليال: يعني اليوم يطلع
عبداللطيف: اتمنى.. ما نعرف اش الجديد الي ممكن يصير
ليال تفكر: ماهو مهم.. المهم اننا نبتدي.. وجود عزيز او غيابه ماراح يعطل الشغل
اعجبتني.. اعجبتني.. واثقه.. قويه.. حاده بكلامه.. مقنعه.. حتى ما اهتمت لوجود عبدالعزيز.. كنت سعيد.. ما اخفي سعادتي بها.. ترفع الراس.. دخلت غرفتها وطلعت بمجموعة اوراق ولاب توب.. وزعت الاوراق على الشباب.. وانا لا.. شفت احمد يفتح حلقه مستغرب من الي بالاوراق.. شفت عبدالرزاق كيف كان مهتم ويقرا بصوره ملفته للنظر.. لمى بعد كانت كل شوي تقول لها.. "انتي عجيبه" ما انكر انه صابني الفضول حتى اعرف ايش يقرون
حنان بعد ما انتهت: لياااااااااااال انتي مافي مثلك.. انا موافقه
وليد: والله انج منتي هينه.. انا موافق
خالد يبتسم: موافق
خوله: انا من غير ما اقرا موافقه
عبدالرزاق يبتسم: طول عمرج ذكيه.. عجبني وموافق
لبنى: موافقه
لينا: طيب موافقه.. بس شنو دوري
ليال تبتسم: لا تستعجلي على دورك انتي وخوله لكم الدور الكبير
لمى: فيه ثغرات
وليد: نقدر نعدلها
عبداللطيف: صح فيه ثغرات.. بس ممكن تعديلها
منير: انا موافق
كانت تشوف احمد باهتمام.. عيونها متعلقه على ردة فعله.. كنت اتابع وانا ساكت.. كنت اشوف حركة عيونه.. كنت فاهمه.. اكيد ماهو موافق.. في شي.. الاوراق هذي فيها شي
ليال: انتظر ردك.. انت الوحيد الي ساكت
احمد متردد: من غير تعليق
ليال: ما فهمت
احمد: الشغل ذي مدروس؟
ليال: من الناحيه الحسابيه ايوا.. مدروس كويس
احمد: ودراسة الجدوى
ليال تبتسم: تعجبني.. تفضل هذي هي
احمد يقراها: بس ماهو مربح
ليال تبتسم: هذا الي ابيه
احمد: مافهمت
ليال: بنطلع بمشروع جديد.. ونبين للناس ان احنا موجودين.. بصوره سهله وبسيطه
احمد: للاسم بس؟!!
ليال: اكيد.. اول شي نشتغل على الاسم
عبدالرزاق: انا موافق.. فهمت ليال من اول حرف.. عارف انها تشتغل على الاسم
احمد: بس ماهو مربح يا عبدالرزاق
عبداللطيف: نطلع بالاسم وبعدين الربح
وليد: محنا خسرانين شي يا احمد.. ماهو غلط اذا اشتغلنا على الاسم.. انا مع ليال
احمد كان يشوفني.. وينتظرني اتكلم.. غمضت عيوني له حتى يفهم اني مالي دخل بالموضوع.. هي لو كانت حاسبه حسابي كانت عطتني وحده من الاوراق.. عارف انها تبي تبتعد عني.. يمكن هالشي كدر خاطري بس هي تفكر في بناتها.. طبيعي يكون تصرفها كذا.. تفاجأت بأحمد يعاندني
احمد: اش رايك جراح
جراح فاتح عيونه: ........................
خوله تشجعه: قول رايك جراح
لينا: ياخوي منت غريب انت مننا وفينا.. قول رايك
جراح: مالي راي.. ماني حاب اتدخل بشغلكم.. ابي اكون اخ وبس.. اتمنى ما تزعلو مني
احمد صار يشوفني بقهر.. وعبدالرزاق نزل راسه معارض للي قلته.. بس انا كنت منتبه عليها.. شفتها ساكته وما تكلمت ابد.. هذا يعني انها ماتبي رايي.. او ما تبي تدخلني بشغلها.. عادي ليه الضيق الي انا فيه.. وقفت استأذنت منهم ومشيت على شقتي.. مانمت من امس.. ومستعد ما انام العمر كله بس تعطيني وجه.. دخلت غرفتي وجلست على الكرسي.. سمعت تلفوني يدق
جراح: الو
عبدالرزاق: انت غبي.. ومافي منك
احمد يسحب التلفون: انا اجهز لك الجو وانت تتعامل بغباء
عبدالرزاق يسحب التلفون: ما ابي اسمعك تشتكي وتقول ساعدوني
جراح يضحك: طيب طيب اكلتوني
عبدالرزاق بناظر احمد: بيذبحني
احمد: حطه سبيكر ابي اسمع اش يقول
جراح: مالكم انتو الان
احمد: يا اخي لا تستغبي.. محنا صغار.. حنا نفتح لك المجال وانت تسكره
جراح: احمد ماهي راضيه تشركني بشي.. حتى ما عطتني من الاوراق الي في يدكم
عبدالرزاق: شفنا هالشي ماله داعي تقول لنا.. وبعدين انت عارف هالشي زين.. يا اخي دامنا فتحنا لك مجال ليش ما كملت
جراح: ما يهون علي اكدرها.. لو تبيني اتدخل كانت كلمتني
احمد بحده: جراح لا تجنني.. تبيها هي الي تكلمك.. ليش ما تبي تفهم.. الحرمه تبي الي يركض وراها.. ماهي هي الي بتركض وراك
جراح يضحك: يا حلوك يا احمد تبي تعملني كيف اتعامل معها
عبدالرزاق: جراح سكر التلفون واعمل الي تبيه.. دامك بارد قلب جذي براحتك.. بس اياك تشتكي
سكرت منه وانا افكر.. صعب صعب يا عبدالرزاق.. ما اقدر افرض حالي عليها وهي رافضتني كذا.. غيرت ملابسي.. ورميت نفسي على السرير.. سمعت التلفون لقيته عبدالرزاق
جراح يضحك: خير يا بوسالم
احمد: انا احمد.. اخلص ابي اسمع رايك.. المشروع الي ليال تبي تطلع فيه لمجرد ظهور الاسم بس.. ماهو مربح
جراح: من رايي تكملو بأسم منصور.. ليال هدفها لافي.. والشغل باسم منصور بيسهل العمليه الجايه مع لافي

&&&&&&&&&&&&&&&&&&&

9:00 الصباح
فيلا العايله ..جناح غسان..
السعوديه
ركبت معاه لجناحنا وانا بموت من رعبي.. ايش بيقول وايش بيعمل معي.. بيذبحني الخوف.. اول مره يمشي قدامي.. معودني يمشي معاي.. اول ما دخلنا الغرفه رمى نفسه على السرير.. ما كلمني ولاحتى شافني.. تغطى وانا واقفه اشوفه.. كان معودني يحملني ويغطيني.. نمت على السرير بس بعيده عنه.. حاولت انام وما قدرت.. كنت صاحيه طول هالفتره.. ماني قادره اغمض عيوني.. حسيت بجسمي يرتعش.. حاولت اني اهدي نفسي.. وينك ياغسان معودني انه يهديني.. حاولت اغطي نفسي بس ماني قادره.. ابي اصحيه بس خايفه.. خايفه ومرعوبه.. دق تلفونه.. وفز له
غسان: الو
صلاح: نايم
غسان: لا صاحي خير
صلاح: ابد قلت اسأل عنك
غسان بحزن: بخير
صلاح: ما اظن.. قوم تعال لي
غسان: ما ودي خلني ارتاح شوي
صلاح: ما بترتاح وانت تفكر فيها.. قوم اغسل وتعال ابوي يسأل عنك
غسان: هو بخير؟
صلاح: اكيد بخير ايش فاكر هو قليل ايمان زيك
غسان يغمض عيونه: ليتني زيه
صلاح: زيه واقوى منه.. قوم اخلص
غسان: طيب طيب.. قمت خلاص
كويس انه قام.. يمكن ارتاح شوي.. كنت ارتجف من جدي.. ماهو خوف.. ولاني عارفه ايش هو.. ارتجف احس ببروده بتذبحني.. ودي اكلمه اقول له الحقني.. ما قدرت اناديه حتى.. خايفه منه.. اسكت لحد ما يطلع وادق على بسمه تلحقني
غسان يشيل عنها الغطا: عنود مالك
العنود تبكي: غسان ارتجف.. برد
قام من السرير مرعوب.. راح يدور على غطا جاب كذا واحد معاه ورماهم علي.. راح يغطيني كويس.. وانا ابكي.. احس جسمي بارد.. بموت
غسان بخوف: لا كذا ما ينفع استني شوي
شفته دخل الحمام (الله يعزكم) وفتح الدش.. جا وحملني.. ووقفت تحت دش حار.. ارتاح جسمي واختفت الرجفه.. كنت واقفه بملابسي.. وهو بعد.. كان ما سكني بقوته وعينه على عيوني.. كنت خايفه افتح عيوني.. كنت خايفه منه.. رميت نفسي عليه.. بعدني عنه.. وجعني قلبي على هالحركه.. بعدني عنه.. احساسي بمحله.. كنت واقفه تحت الدش ابكي من غير صوت.. ماهو مهم عندي اذا كان منتبه علي او لا.. المهم ان بيتي انخرب

&&&&&&&&&&&&&&&&&&&&

9:30 الصباح
فيلا العايله ..مجلس الرجال..
السعوديه

كنت جالس من الصبح.. ما اذكر اني نمت.. بسمه تبكي.. وماتبي احد يقرب منها.. نزلت المجلس من بدري.. كنت افكر.. كنت ابكي.. ما كنت افكر غير بليال.. لو كانت هنا كان ذبحها من زمان.. وانا الي ادور عليها!!.. ولقيتها كيف بحميها؟.. انا ما قدرت احمي اخوها من ابوي.. ماني قادر اخذ حق اخوها الي ابوي ذبحه.. اليوم اقتنعت ان بعدها خير لها.. كويس الي عملت كويس انها ما رجعت.. الغريب ان الكل متقبل الوضع الا انا.. عمي بوسلطان يضحك ومبسوط.. وصلاح بعد.. عمتي ام سلطان وعمتي ام غسان كمان مبسوطين.. ملاحظ ان غسان يتجنبني.. ما اقدر الومه
بوسلطان يجلس جنبه: ناصر يبا
ناصر ينتبه: خير عمي
بوسلطان: قوم اغسل وجهك يبا.. وهو ايش صار يعني
ناصر يبتسم غصب: ايش صار؟!!
بوسلطان: ايوه ايش صار.. رجال وربك كاتب يومه.. ماحد فينا يقدر يعترض على الي صار
ناصر يغمض عيونه: الحمدلله على كل حال
صلاح يجلس جنبهم: هلا بالرجال الي لحد الان يبكي
ناصر: والله ماني رايق
بوسلطان: وليه ما تروق.. ايش قلنا من شوي
رفعت عيني على الباب.. وشفت غسان دخل.. وعيونه على الرجال.. راح سلم عليهم وجلس جنبهم.. مبين انه يتجنبني.. ماكنت ابي اقترب منه حتى لا اخليه ينفجر.. عارف اكيد قلبه مليان
غسان يقترب: السلام عليكم
بوسلطان: وعليكم السلام مالك تأخرت علينا
غسان: زوجتي تعبت شوي
صلاح: سلامات.. كل شي تمام؟
غسان من غير نفس: تمام
ناصر يقوم: اسمحولي
بوسلطان: وين يبا
ناصر: اتطمن على اختي
غسان بتريقه: بخير.. اختك بخير.. لا تخاف لحقت عليها وهي بخير
ناصر: ما منك قصور يا خوي.. عارف انك ماراح تقصر
غسان: زين الي تعترف ان القصور ماهو مني
شفته وابتسمت له ما حبيت اني اخذ واعطي معاه بالكلام.. عارف انه مليان ويبي الي يفضي قلبه فيه.. وانا والله مستعد للي يبي يقوله.. بس ما يجرا شي للعنود.. يسمعني الي يبي يقوله بس ما يسمعه للعنود.. دقيت على نوف.. وجاتني ورحنا مع بعض للعنود.. دخلت لغرفتها ولقيتها بدنيا ثانيا.. حزن غريب ملكها.. يكون كلمها؟.. قال لها شي كدرها كذا؟.. ما تكلمت اخذتها بحظني وجلست معاها.. جلست نوف جنبنا.. ساكتين.. مافي غير السكوت.. وماحد فينا لاقي شي يقوله

&&&&&&&&&&&&&&&&&&&&&

- كيف مات سلطان
- ايش بتكون حركة المجموعه
- غسان بيستمر مع العنود؟!!
- ايش الجديد الي بيصير بين جراح وليال

السلام عليكم ورحمة الله وبركاته

البارت 28 .... مع تمنياتي لكم بقراءة ممتعة .....


للان لا استطيع تحديد موعد قادم لكن ان شاء الله لن اتأخر عليكم .....



كاتبة الرواية ( دانة الحمادي ) مريضة وفي المستشفى ..... ادعو لها بالشفاء العاجل حتى تعود الينا وتنور المنتدى والرواية .....



ربنا يشفيكي يا دانة .....( طهور ان شاء الله ..... اجر وعافية )

وعليكم السلام ورحمة الله وبركاته


يسلمو عزيزتي عالنقل

كنت منتظرة البارت

بجد بارت مشوق

والله يرجع لنا دانة بالسلامة

مأجورة بإذن الله

الف سلامة على كاتبتنا الجميلة دانة


ماتشوف شر ان شاء الله ودعواتنا وكل من يمر هذا المتصفح لها بالسلامه والعافية

وطهور ان شاء الله يادانة



سلمتي عزيزتي ايمومسا .. وحبذا لو كان الخبر في موضوع اخبار الكتاب حتى لانضيف لصفحات القصة ردود مخالفة ..




الف شكر عزيزتي ..

السلام عليكم ورحمة الله وبركاته


ان شاء الله سانقل الخبر الى صفحة اخبار الكتاب .......