ماهي مكسروه.. طلعت من لمى واخذت احمد ووقفنا برا الشقه.. وقف ومسك الحيط بيده.. منع دموعه تنزل.. وقف مده وانا اشوف انهيار رجل ما عرفت في قوته احد.. الي لمى قالته يكسر عزيمة أي رجال.. كيف الاخ يعمل كذا باخته واحمد الغريب عليها ينهار عشانها كذا!!.. انتبهت انه في وحده فتحت باب المصعد ودخلت
مريم بخوف: احمد خير اش صار
احمد: بشريني انتي
مريم تبتسم: وراك مريم.. عن الف رجال
احمد: خليني اعرفك على ليال.. ليال هذي مريم
مريم: اهلا اختي
ليال تحاول تبتسم: اهلين اختي
مريم: وليش هالحزن والدموع.. تعالو بقول لكم اش لقيت.. عندي اخبار تفرح
دخلت الشقه ومريم معاي.. اول من شفت لمى.. رحت حولها على طول وجلست جنبها.. مسكت يدي خايفه.. همست لها ان كل شي بخير.. وسرها في بير.. جلست مريم بعد ما سلمت على الكل.. كنت ملهوفه على الاخبار الي عند مريم.. تقول انها تفرح
منير: يلا يا مريم.. قولي المعلومات الي عندج
مريم: سمعو يا حضرات.. انا قدرت اطلع تقرير باتصالات عبدالعزيز.. وعندي دليل انه ما كان عند الضحيه ليلة مقتلها.. او نقدر نقول انه ما كان جنبها على الاقل
وليد بفرح: الله واكبر
مريم تضحك: وعندي شي احلى
وليد: قوليه بسرعه بسرعه
مريم: سعود ابو عبدالعزيز.. متزوج من وحده غير الضحيه.. وساكن معاها بشقه بوحده من العمارات
خالد: وشنو الدليل الي في هالموضوع.. الرجال مسافر وجوازه يثبت هالشي!!
مريم بفرح: بواب العماره.. وواحد من الجيران شافو سعود ليلة مقتل الضحيه
عبداللطيف بفرح كبير: الله اكبر
منير: واشلون بتثبت ان سعود كان موجود في البحرين ياعبداللطيف.. الجواز دليل قاطع على عدم وجوده
احمد: فيه لعبه بالموضوع.. ولازم نعرفها
عبداللطيف: صح لازم نعرفها
مريم: في شي ثاني
ليال: عجلي به
مريم: احمد قال لي ان عبدالعزيز ساكن بهالعماره ومافي احد من اهله يعرف هو وين
لينا: صح وبعدين
مريم: سعود منين عرف عنوان عبدالعزيز وقدمه للنيابه
منير يضرب كف وليد: ايواااااااااااااا
وليد: لازم نعرف الاجابه علي هالسؤال.. بس اشلون؟
مريم: احمد قلت انه في شهود من جيرانه يشهدون ان عبدالعزيز كان بشقته
احمد يناظر ليال: أي صحيح
مريم: خلاص.. نحضرالشهود وهالشي في صالح المتهم
عبدالرزاق بحده: انت جالس تشوف ليال يا احمد؟
احمد: ماعندي غيرها يثبت ان عبدالعزيز كان موجود في شقته
عبدالرزاق: ليال مستحيل يطلع اسمها باي اوراق رسميه.. لا تنسى وضعها
ليال: ان كان هالشي بينقذ عزيز.. مستعده اني اشهد بهالشي
خوله بصراخ: مستحيل.. انجنيتي باين
لبنى: الي تقولينه ماهو كلام صحيح يا ليال
حنان: عبدالعزيز بيطلع.. في ادله كثيره في صالحه وماله داعي لشهادة ليال
مريم: نسيت اقول لكم ان في التقرير لمكالمات عبدالعزيز.. اتصل بوحده من المطاعم وطلب وجبه
عبدالرزاق: والوقت
مريم تتأكد من الاوراق الي بيدها: حسب تقرير الطبيب الشرعي ووقت حدوث الوفاه.. بيكون عبدالعزيز اتصل على المطعم قبل الوفاه بـ25 دقيقه من تلفون البيت الثابت
لمى: ومدة حظور الطلبيه تقريبا 30 دقيقه.. هذا اثبات ان عبدالعزيز استلم الطلبيه ساعة حدوث الجريمه
وليد يبتسم: الحمدلله.. ربي مسهلها
لمى: والمسافه من بيت سهام للعماره كم
مريم ترفع راسها: تقريبا 45 دقيقه.. صعب تواجد عبدالعزيز عندها
فرح قلبي بعد هالحزن الي دخله قبل شوي.. كنت متسرعه.. نسيت بناتي واماني ونسيت انه ماحد يعرف بوجودي في البحرين.. لقيت اخواني خايفين علي.. فكرو بأماني في الوقت الي انا نسيته.. بس عشان عزيز بعمل أي شي أي شي.. الجلسه انقلبت الي حوارات حاسمه لتحديد مصير عبدالعزيز
مريم: الادله الي عندنا كفايه.. هم كل الي عندهم شهود.. احنا عندنا ادله
احمد: الي الادله الي عندنا كفايه.. واذا صار شي جديد بنعرف نتصرف زين.. عبدالعزيز ماله علاقه بهالجريمه وهذا المهم.. غير جذي بنقدر ننفي أي ادله ممكن ابوه يجيبها
كنت خايفه ان لمى تفز للشهاده لصالح عزيز وتفضح روحها قدام الكل.. بس الحمدلله.. الوضع القانوني لعزيز مطمن.. لمى قالت لي انها كانت معاه هذيك الليله لانه طلبها تروح لسهام.. هذيك الليله بالذات كان احساسه بسهام قوي.. اكيد انه حاس بها.. ولا غير كذا ما طلب من لمى تروح تسأل عن سهام.. وكويس ان لمى ما راحت.. تكون لمى تحبه؟!! تكون تغير عليه؟!!.. والله ما ادري ما ادري.. كل ذا ماهو مهم عندي.. المهم ان اخوي يرجع ويطلع من الي هو فيه.. انتبهنا انه جرس الباب يندق.. قام عبدالرزاق وفتح.. لقيت سلطان قدامي.. يا بعد قلبي ياخوي.. اكيد حاس بضيقي.. وينك يا قلبي.. نسيتك ونسيت فرحتك.. الكدر الي داخلي نساني زواجك.. وصل جنبي شاف الدموع بعيوني وكان خايف علي.. رميت نفسي عليه.. محتاجه حضنه.. محتاجه له هو بالذات محتاجه اتطمن عليه.. اخذته وجلسنا بالبلكون.. سكرت باب البلكون ورحت ابكي بحضنه واقول له عن عزيز والي جرا له.. رفع راسي وهو مبتسم
سلطان: صبر جميل وبالله المستعان
ليال: ياقوتك
سلطان: انتي اقوى مني
ليال: وحشتني
سلطاني: وحشتيني اكثر.. قلت اجي اتطمن عليكي واقول لك مره وحده اني بتزوج
ليال من بين دموعها تبتسم: اخاف تقول لي انك خايف من الزواج
سلطان يضحك: واذا قلت لك تضحكي علي؟
ليال تبتسم: تبي تنسيني حزني
سلطان: اجل الحقي علي ياليال.. ترا الخوف ذبحني.. امي وابوي زوجوني غصب عني
ليال تضحك: يا حبي لك يا خوي
سلطان يحضنها: ظلمتك كثير
ليال: انت ما نسيت؟!!!
سلطان: بحياتي ماراح اسامح روحي
ليال تبوسه على راسه: اياك اسمعك تعيد هالحكي
سلطان يبوس يدها: طول عمرك غير عن الكل.. بروحك وحنيتك
ليال بخوف: مالك
سلطان: فيها شي اذا قضيت الليل عندك حتى اشبع منك.. قبل ما تشغلني مها عنك؟!!
ليال تضحك: لا تخليني اصدق ان امي وابوي غاصبينك من صدق
سلطان يناظر عيونها: عيونك الليله غير.. اول مره الاحظ ان عيونك غير
ليال مستغربه: غير كيف؟!!
سلطان: ما ادري.. على فكره.. سألني ناصر عنك
ليال بملل: هذا لسا يغني علي
سلطان يضحك: يحبك
ليال: قول له ينسى خلاص
سلطان: ليال.. انا قلت له انك تزوجتي من جد
ليال: ماهو شي جديد
سلطان: قلت له بعد.. انك حامل
ليال مستغربه: ليه قلت له هالشي
سلطان: ما ادري.. حسيت انه لو عرف انك حامل هاليومين بيعرف انك شفتي حياتك.. ويمكن هالشي يخليه يشوف حياته.. وابوه ينساكي
ليال تبتسم: انت واهم.. لافي مستحيل ينساني
سلطان: حتى لو ما نساكي.. ابي لو جا في يوم وشاف البنات معاكي.. يحط بباله انهم ماهم بناته
ليال تحضنه: خير ما عملت
سلطان: احاول أأمن حياتك.. هذا الي قدرت اعمله لك يا نور حياتي
ليال تضربه على كتفه: لا تقلد.. هذي كلمة ابوي.. شوف لك وصف ثاني
سلطان بجديه: انا عرفت انك حولتي مبلغ كبير بحسابي بالبنك
ليال: هو عيب اذا وقفت جنب اخوي
سلطان تدمع عينه: اخوك الي عمره ما وقف جنبك؟!!
ليال: ليه تحاول تحمل نفسك الذنب.. ليه مصر انك تذبح روحك اسف على الي صار لي
سلطان: لاني لو ما تصاحبت على ناصر ما صار ذا حالك
ليال: مقدر ومكتوب.. انت مالك دخل بذا كله.. وبعدين لا تنسى اني حبيته.. بس ماكنت اعرف انه ضعيف قدام امه وابوه
سلطان: انا رجعت الفلوس بنفس الحساب الي دزيتي لي منه
ليال بحده: ليه
سلطان: والله ماني محتاج.. الحمدلله.. ابي اطلع من هالدنيا وانا راضي عن حالي.. الفلوس ماراح تعمل لي شي
ليال بحده: انت ليه غثيث كذا.. هذا وقت هالكلام تقوله
سلطان يحضنها: حبيبتي.. الموت علينا حق.. وايش فيها اذا قلت لك هالشي.. يعني شفتيني بموت الان
ليال بحده: سوسن وامي يقولو لي عن هالكلام الي انت دايم تقوله.. ويقولو ان حالتك متغيره كثير هاليومين.. منت سلطان الاولي.. الموت وسيرة الموت على طول بلسانك.. ليه تبي تقطع قلبي عليك.. ليه تبي قلبي حزين ليه يا خوي
سلطان يضحك: يمكن ابي اشوف غلاتي بعيونك.. عشان خاطري يا ليال انسي العصبيه عنك.. ابيكي الليله تدلعيني.. انا خلاص كلها بكره وخلاص
ليال بغضب: خلاص ايش!!!!
سلطان يضحك: بتزوج
ليال تبتسم: ياربي يهنيك.. ويسعدك يا سلطان يا ولد امي وابوي
سلطان: انا بسافر بكره مع مها.. بعمل حفله بسيطه مع البيت وباخذها وبسافر
ليال: وين عزمت
سلطان: عمره ان شا الله.. كنت ناوي على الحج هالسنه.. بس باين انه مافي وقت
ليال: الله يكتبها لك هالسنه ياربي
سلطان يناظر عيونها: مافي شي بخاطرك علي
ليال: فيه
سلطان: احط رقبتي تحت رجولك
ليال تضحك: يا حبي لك يا خوي
سلطان: ودي اقول لك شي بس رجيتك لا تعصبي علي
ليال بدلع: قول وماراح اعصب عليك
سلطان يتأملها ويتراجع: لا خلاص.. ما ني عارف ليه اشوفك اليوم بدر.. احلى من البدر..جميله ومافي بجمالك احد
ليال: يمكن عشان هذي اول مره نجلس فيها مع بعض
سلطان يبتسم: يمكن.. بحياتي ما جلست معاكي لحالنا.. بحياتي ما حاولت...................
ليال تسكته بيدها: عشان خاطري خلاص
سلطان يبوس يدها: عشانك انتي وبس

الصاله
منير: هذي اخر نقطه نمشي عليها.. في شي بعد
عبداللطيف: مابقى شي خلاص
خالد: يلا.. الحريم اتعبو.. وانتو بعد.. الكل يروح.. وبكره نتوزع
منير: كل واحد عرف شغله وحركته؟
مريم: أي خلاص.. وانا بتابعكم من المكتب.. وبوجه كل واحد فيكم
عبدالرزاق: بقى شي ليلحين ماعرفناه
احمد: شنو
عبدالرزاق: ام عبدالعزيز.. ليش اتركته
مريم: انا بطلع اسمها وعنوانها.. من بيتابع موضوعها
وليد بسرعه: انا.. انا بتابع موضوعها وبسافر لها
احمد: خلاص وليد يتابع
عبداللطيف ينتبه على حركة وليد: وليش وليد.. انا اتابع.. انا راجع للكويت عشان الشركه.. مره وحده اتابع الموضوع
احمد منتبه على الاثنين: عبداللطيف انا محتاجك هنا جنبي.. وليد يروح للكويت
عبداللطيف بشك: وليش انا اظل هنا.. جنبك منير
عبدالرزاق: عبداللطيف.. وجودك مهم.. وبعدين انا قررت ابيع نصيبي لواحد من اصدقائي.. وابيك تكون هاليومين هنا حتى تقابله.. وياخذ منك بعض المعلومات الي هو محتاج لها
ليال تطلع من البلكون مع سلطان: ما خلصتو؟!!!
لبنى: لا خلاص.. خلصو.. والكل بيمشي الحين
ليال: طيب الشقه الي جنبنا فاضيه.. تنامو فيها.. انا مجهزتها للطوارىء
خالد: لا.. دام سلطان معاج.. نرجع احنا البيت وبكره نكون عندج
حنان بتعب: انا وعيالي بنام هنا
ليال تبتسم: تنوروني يا قلبي
خالد يسحب لبنى: يلا حبيبتي
لبنى ترتبك: انا...................
خالد بهمس: قومي معاي عشان ما تنحرجين قدامهم
لبنى بهمس: خالد ما ابي ارجع معاك.. دام البنات كلهم مجتمعين عند ليال.. ما ابي اتركها انا بعد
حنان بهمس: استحي عاد.. خالد محتاجك جنبه الليله.. شوفي وجهه اشلون يوجع القلب
سلطان: ما ودك نطلع نتمشى على البحر
ليال بفرح: والله من جد؟!!
سلطان: اكيد من جد.. تبين الصراحه ماودي انام
خوله: روحي معاه.. انا بقعد هنا مع العيال
لينا: امي مع العيال.. روحي انتي مع زوجك وياها
عبدالرزاق: شوفي الطريق يا ام سالم.. خليني اخذ العيال
خوله: رزاق طلبتك
ليال بفرح: الله يخليك ياخوي.. لا تقول لا
عبدالرزاق يبتسم: من كم ساعه كنتي مقطعه روحك على عبدالعزيز.. اشوف الان تغير كل شي بوجود سلطان
ليال تناظر سلطان: وجوده قوى من روحي
خوله: رزاق الله لا يهينك.. ودي اروح معاهم
ليال بهمس: هييييي انتي ناسيه حالك.. تناديه كذا قدام الكل
سلطان بهمس: اقول اترك عنك تراني ما ادل المكان في البحرين.. زين الي حفظت الطريق من جيتي مع صلاح اخر مره
عبدالرزاق يضحك: وان ما خاب ظني تراك ضيعت الطريق لحد ماوصلت هنا
سلطان بهمس: استر على ما عرفت.. امشي خلني ابسط اختي
عبدالرزاق: يلا يا ام سالم جهزي روحج
خوله: الله لا يحرمني منك.. ثواني وتلقاني جاهزه
ليال: بروح اجيب مفتاح الشقه لحنان وولدها.. ما بتأخر
صحيح الي قاله عبدالرزاق.. كنت قاتله حالي على عبدالعزيز.. بس وجود سلطان نساني همي.. الحمدلله.. بلحظه ضاع حزني.. وبلحظه حسيت انه ربي راح يفك عزيز من الي هو فيه وبسرعه.. وبلحظه لقيت الحل لكل شي قدامي.. وبلحظه تجددت الطاقه داخلي.. وبلحظه مسكت لمى بيدي ووصلت معاها لغرفتها
ليال: انا عارفه انك تحبي عزيز.. ماهو بس حب هذا عشق.. انا عارفه بهالشي زين
لمى بحزن كبير: لا تظلميني.. عبدالعزيز ماهو اكثر من اخ لي.. مانسيت انه ساعدني في هروبي من بيت عيسى.. عبدالعزيز سترني وستر علي.. جميله على راسي.. هذا ماهو عشق ياليال.. هذا امتنان.. الي مثلي ناسيه الامان.. جات على فتره نسيت فيها النوم.. نسيت الراحه كيف تكون
ليال بحنيه: تعالي اوقفي تحت المويه شويه.. خذي حمام دافي.. واطلعي اسجدي لله حاجه.. قولي كل الي بخاطرك.. وعزة جلال الله.. ماحد سجد سجود الحاجه والله رده بطلبه.. ثقي بكلامي.. وبتلاقي روحك مرتاحه وبداخلك قوه ماهي هينه.. ثقي بكلامي
هزت راسها موافقه.. وقفت اشوفها وهي تجهز ملابسها حتى تاخذ شور.. تأكدت انها بخير.. ورحت جهزت سجادتها.. وطلعت من غرفتها ودخلت غرفة بناتي.. تطمنت عليهم وبست كل وحده فيهم وجيت بطلع
ام لينا: انتي بخير؟
ليال تلفت عليها: الحمدلله خالتي.. لاء.. من اليوم بناديكي يما
ام لينا تجلس وتفتح ذراعها: ربي لا يحرمني منك يما
ليال تحضنها: نامي وارتاحي كل شي بخير
ام لينا بخوف: ولمى يما
ليال تبتسم: تطمني.. لمى ماتعرف للغلط طريق
ام لينا براحه: الحمدلله.. انا تذكرت اليوم الي كنا ندورها فيه.. اكيد كانت مع عبدالعزيز
طلعت من الغرفه بعد ما قلت لخالتي ام لينا عن بعض من الحقيقه.. بعيد عن حقيقة لمى.. ورحت غرفتي.. اخذت مفتاح الشقه ورحت عطيته لحنان.. المسكينه خذت ولدها وطلعت وبنتها كانت نايمه مع خوات لينا.. شفت عبداللطيف واقف مع منير ووليد واحمد يتكلم بحده
ليال تبتسم: خير
عبداللطيف يناظرها بحده وبعدين نزل راسه: في شي وليد عارفه عن لمى.. مومعقوله لمى حالها مقلوب على عبدالعزيز وهي ما تعرفه
ليال: اذا في شي بينها وبين وليد.. فهذا يعني انها لقت في وليد الامان حتى يداري على موضوعها.. اما حالها مقلوب على عزيز فلا تتوقع ان بينها وبين عزيز شي.. عيب عليك
عبداللطيف بتوتر: انا ما قصدت اتهمها.. كل الي ابي اعرفها اش الي وليد يعرفه عنها وماهو راضي يقوله لنا
ليال تبتسم: ثق تمام الثقه.. ان الي يعرفه وليد.. يخص لمى بصوره شخصيه.. صح وليد
وليد منزل راسه: ............................. ما اعرف شي
ليال: شف يالطيف.. لمى ما تعرف للغلط طريق.. كن واثق من هالشي.. واذا وليد يعرف شي.. فهذا بينه وبين لمى نفسها.. اذا جا يوم وصارت فيه ثقه كبيره بينك وبين لمى الي تخليها تجي وتلجأ لك وتكون في يوم بر الامان لها.. بتكون ساعتها الشخص الوحيد الي هي من نفسها تجيك وتآمن لك وتقول لك الي صار معاها..فاهمني


يتبع

عبداللطيف: افهم من من الي قلتيه ان في شي صار معاها
ليال: ماحد يعرف هالشي غير لمى.. اترك لها المجال حتى ترتاح لك اذا كنت تحبها.. اما اذا شفت طريقها غير طريقك.. من الافضل انك تغير طريقك يا خوي.. الحرمه منا تشيل بقلبها اكثر ما تبين.. بس متى مالقت بر الامان لها تلقاها على طول تلجأ له
ماني عارفه منين جاتني هالجرأه حتى اتكلم معاه كذا.. منين عرفت ارد عليه ما ادري.. منين عرفت اغلبه بكلامي ما اعرف.. بس الي متأكده منه ان الله سخرني لعبداللطيف حتى ينام الليله مرتاح.. ويرجع يعيد حساباته مع لمى من جديد.. مشى عبداللطيف ومنير ووليد.. وكنت واقفه انتظر خوله
احمد بحزن: ساعات اقول انه مافي اضعف منك.. وساعات تبهرني قوتك
ليال تبتسم: عارف اني ماني قويه زي ما تشوفني
لينا: بالعكس.. ساعات احسدك على قوتك
ليال: شكلك مصحصحه انتي معاه
احمد يسحب لينا: اقول انسيني انا وزوجتي.. ترانا متزوجين ماصار لنا كم يوم
ليال تشوف عيونه: قبل ما تمشي بسألك عن وليد
احمد: تكلمت معاه.. ومثل منتي شايفه ما يعرف شي.. المهم اني ما بينت له شي من الي عرفناه.. بس المهم عندي ان روحته للكويت تجيب نتيجه زينه لعبدالعزيز
ليال: تظن لطيف ينسى الموضوع
احمد: وحتى لو ذكره.. مافي احد فينا يقدر ينفعه بشي
لينا: دام تتكلمون عن عبداللطيف اكيد الموضوع لمى.. ما ابي اتدخل بالي عرفتوه عنها.. بس المهم انكم تعرفون ان الكل ملاحظ حالتها من عقب عبدالعزيز.. سمعت ام عبداللطيف تقول لامي احتمال لمى تحبه
ليال: خليها تثبت.. وبعدين من بكره بتشوفين لمى نفسيتها تغيرت كثير
احمد: اكيد سحرتيها بكلامك.. كلامك ينخاف منه
ضحكت من قلبي عليه.. عارفه حزنه.. وعارفه انه مكسور الليله.. بس بيعرف كيف يتغلب على حزنه.. اخيرا وصلت الحسناء خوله.. ياربي ما يحرمني منها.
خوله تغطي على تأخيرها: يلا يا ليال اخرتينا
عبدالرزاق يبتسم: أي صح يا ليال اخرتينا.. حركي نفسك عاد
سلطان فاتح عينه: وانتي ساكته لهم يعني!!!
ليال: ماعليك منهم شوي وتشوفني قالبه عليهم
سلطان: اشوف يعني تاركتهم على راحتهم.. ما اشوفك كذا معانا
خوله تضحك: يا يما انا غير.. غلاتي غير.. محسب غلاتي زيك انت وخواتك
ليال: لا تنسي نفسك عاد.. هذا الغلا كله.. هذا سلطان عاد
سلطان يضحك: والله لو ايش تعملي.. خلاص الغلا صار لام سالم
ليال تضربه على كتفه: حرام عليك.. من جيت وانا ادلع فيك
عبدالرزاق: اقول الله لنا.. حنا الي ندلع بس.. ما اشوف احد دلعنا
خوله: وانت بتحط عقلك وعقل هالعيال!!.. احنا غير
عبدالرزاق: الله واكبر يا حرمه
سلطان يضحك: يلا صرنا عيال يا ليال

&&&&&&&&&&&&&&&&&&

3:30 الصباح
سيارة خالد
البحرين
خالد: وصلنا حبيبتي
لبنى تنتبه: ها.. أي
خالد يبتسم: وين وصلتي
لبنى: لا تعبانه بس
خالد: جعانه
لبنى: لا
خالد: بس انا ميت جوع
لبنى: اش في خاطرك تاكل
خالد: محسبه اني بتعب زوجتي وبخليها تطبخ بهالوقت
لبنى: عادي.. قول اش في خاطرك
خالد: لا نروح شارع المطاعم ناخذ وجبه
لبنى: ..........................
خالد: ما تبين
لبنى: لا عادي
خالد يحرك السياره: في شي حبيبتي
لبنى تشوف عيونه: لا
خالد يبتسم: قولي لا حبيبي
لبنى: ومن قال لك انك حبيبي
خالد بهمس: انتي قلتي لي
لبنى تشوفه بحزن: انا ماقلت
خالد: متى بترضين علي.. ودي نبتدي من جديد
لبنى: وانا ودي ننتهي
خالد بحنيه: مستحيل اننا ننتهي.. احنا لبعض.. ومافي احد بيفرقنا
لبنى تبتسم بتريقه: ..........................
خالد: اشوف ماهو عاجبك الي اقوله
لبنى: الغريب انك ليلحين عايش بالاحلام
خالد: ودي تسامحيني.. اعتذرت وبعتذر عمري كله.. لبنى.. ما بتسامحين خالد
لبنى: ما ودي
خالد: ليش عاد
لبنى: خالد
خالد: يا روح خالد وعمره
لبنى: تظن انه ما بتصير مصيبه جديده تفرق بيننا
خالد: الله لا يكتب علينا
لبنى: واذا كتبها
خالد: ان شا الله لا
لبنى بحده: لا الاه الا الله.. رد علي
خالد: لا تعصبين.. احنا نتكلم مع بعض
لبنى: انت تتعامل معاي ببرود.. بس اذا صار شي هذيك الساعه بتبين لي حدتك وغضبك
خالد: وصلنا عند المحل.. اش تاكلين
لبنى: أي شي
ما انكر اني كنت ضعيفه.. ومنى عيني ارتاح مع زوجي.. نفسي احس اني متزوجه.. ودي احس اني حرمه وعايشه مع حبيبها.. ودي انسى كل الي صار.. بس ماني قادره اتطمن على روحي وحياتي معاه.. ودي .. ودي.. ودي اقول له اني سامحته.. ودي اقول له ان عمري ما حبيت غيره.. انا ليش حارمه روحي عن حبيبي.. لحد متى بصبر على بعده.. لحد متى بحرم روحي منه.. شفته وهو يستلم الاكل ويدفع الفلوس.. انتظرت لحد ما سكر الشباك وقلت له
لبنى: خالد
خالد: يا روحي
لبنى: ودي نسكن بعمارة ليال
خالد مستغرب: ليش؟!!
لبنى: ما راح اخبي عليك.. انا اكره امك.. وامك ابد ما تحبني وطول عمرها تكرهني.. اذا جات البيت عندنا حياتي كلها تنقلب.. اكره وجودها.. وفي نفس الوقت ما اقدر امنعها من شوفتك.. مانسيت الي عملته فيني.. ومابنسى طول عمري الي صار.. امك ما تبي تتركني في حالي.. وانا بحياتي ما ضريتها.. اسمع منها اقذر الكلام.. واستحمل منها تصرفات ماحد يقدر يطيقها ولا يرضاها على نفسه.. ليش عشاني احب حضرتك.. تعبت وانا استحمل.. تعبت وانا اسكت.. وتعبت وانا بعيده عن زوجي وراحتي معاه.. الي يسمع عني يعرف اني متزوجه والي يشوف حالتي.. يقول اني..................
خالد: كملي
لبنى تمسح دموعها: زوجه مع وقف التنفيذ.. تنضرب وتنهان من زوجها عشان انه صدق سوايا امه فيها.. وبعدين اذا زوجها اكتشف الحقيقه راح لها واعتذر بكل سهوله.. الكلام مافي اسهل منه خالد.. بس من يقدر يستحمل الي انا فيه
خالد: وشالي تامرين فيه
لبنى: ابي اسكن في عمارة ليال.. اسمي عايشه بين ناس يحبوني.. والاهم انه اذا امك تبي تشوفك تروح عند شقة حنان تشوفك هناك.. ماني مستعده استقبلها في بيتي او مكاني حتى ما تحط لي شي يثبت علي تهمه انا ما ادري عنها
خالد يبتسم: غالي والطلب رخيص
لبنى مستغربه: يعني شنو؟!!!
خالد: ننتقل عند ليال.. الي تامرين عليه يصير.. بعد ايش تامرين عليه
لبنى تهدى نفسها: ابي اعيش مرتاحه معاك.. ابي اعيش مع حبيبي
خالد يلتفت لها: حبيبك؟ من هو ذي
لبنى: واحد حبيته طول عمري.. وما درى عني
خالد: واذا قلت لج انه يدري عنج
لبنى تغمض عيونها: ما يدري.. ما يدري
سحبني لحضنه.. استسلمت له.. رميت براسي على كتفه.. كنت حاسه بالقهر في قلبي.. انا ما اخذت حقي منه على الي سواه فيني.. وما خذيت حقي من امه على الي سوته فيني.. بس قلبي غلبني.. حاجتي لاماني مع زوجي اغلبتني.. ما اقدر ابتعد عنه.. ما ابي ابتعد عنه.. لو شنو يصير.. ودي انها تتركني في حالي.. ودي انها تشيلني من راسها
دخلنا البيت.. وكان في قمة الذوق.. حملني ووصلنا للطابق الثاني.. اصريت اني ما ادخل الغرفه هذيك.. اخذني على غرفتي.. نزلت من حضنه وانا ما ودي.
خالد يبتسم: ثواني اجيب الاكل من الصاله واجي
لبنى تمسكه: بتتاخر؟
خالد بلهفه: لا ياقلب خالد ثواني قلت
لبنى: بتوحشني
خالد يضحك: اش رايج تجين معاي
لبنى تفكر: أي اروح

&&&&&&&&&&&&&&&&&&&

4:50 الصباح
شقة جراح ..غرفته..
لندن
جراح على التلفون: يا حيا الله من دق على بهالساعه
احمد: حيا الله هالصوت
جراح: اخبارك يالمعرس.. ان شا الله مبسوط
احمد: الحمدلله.. وانت اخبارك
جراح: الحمدلله
احمد: رجعت لشغلك؟
جراح يضحك: انت عارف اني ما رجعت لشغلي
احمد: ليش ابتعدت
جراح: وجودي خطر عليها انت عارف
احمد: انت بتجلس تعيد علي الكلام الفاضي الي هي تقوله
جراح يبلع ريقه: تصدق اذا قلت لك اني صدقته.. عشت باحساسها وصدقت خوفها
احمد: انت حبيتها من جد؟!!!
جراح يبتسم: وليه تسأل.. بأيش يهمك الجواب
احمد: ماهو الجواب الي يهمني ياخوي.. الي يهمني من هالشي انت وهي
جراح: تشوف اننا بنكون اسره ناجحه
احمد: يعتمد على احساسك واحساسها.. اذا انوجد الحب بتكون فيه حياه حلوه
جراح: اذا بتسألني فأنا روحي فيها.. واتمناها اليوم قبل بكره.. اما هي ما اتوقع تكون فيه ذرة احساس ناحيتي
احمد: اليوم قالت كلمة اعجبتني فيها
جراح يبتسم: ايش قالت
احمد: تقول ان الحرمه متى مالقت بر الامان لها تلقاها على طول تلجأ له
جراح يغمض عيونه: .............................
احمد: وين وصلت
جراح: ابد معاك
احمد: ليه ما نمت ليلحين
جراح: جفاني النوم
احمد: مايجافي النوم غير المهموم بالحب
جراح: يعني ما تدري عن همي
احمد: ادري
جراح: اجل لا تسألني
احمد: الي اعرفه عنك انك اذكى من جذي.. ما توقعت انك تمشي بهالسرعه وتتركها.. توقعت انك تكون موجود.. وتدافع عنها وتخليها غصب عليها تحبك
جراح: انت تتكلم عن ليال يا احمد.. ماهي ليال الي اقدر اغصبها على شي ما تبيه
احمد: ابيك ترجع البحرين
جراح: واخليها عايشه بخوف؟.. لا ما يهون على خوفها
احمد: في مشكله حصلت
جراح بخوف: خير لافي عرف هي وين
احمد: عبدالعزيز متهم بقضية قتل
جراح مصدوم: مستحيل
احمد: عارف هالشي.. وفي ادله تبرئه
جراح براحه: الحمدلله طمنتني
احمد: ابيك تكون موجود جنبها
جراح بغيره: ايوا.. هذا عبدالعزيز الغالي.. اكيد انهارت بعد الي صار له
احمد يضحك: يا دمك يا اخي.. لاتخلي الغيره تعميك.. البنت اشرف من انك تغير عليها ومن معاه.. عبدالعزيز!!
جراح: انا ما اعيب عليها وعلى تربيتها واخلاقها.. وعبدالعزيز متأكد انه رجال والنعم به.. بس يا خوي.. اغير
احمد: اقول اترك عنك.. حاول تجي بسرعه
جراح: ليه تبي تقربني منها
احمد: اقولك وتفهمني؟
جراح باهتمام: اسمعك
احمد: بعد مصيبة عبدالعزيز.. حسيت اننا ممكن نختفي من قدامها بسهوله.. لافي ممكن يذبحنا واحد ورا الثاني.. ما ابيها تكون وحيده.. ابي أأمن لها الناس الي يكونو حولها.. ابي أأمن حياتها قبل لا يصير لنا أي شي
جراح: سبق وقلت اني مستعد اتزوجها وابعدها عن عيون الكل.. بس هي رافضه
احمد: هي خايفه.. واتوقعها تدور على بر الامان هي بعد.. الي اعرفه اني اكلم جراح بن مبارك.. جراح الي ما يوقف قدامه احد ابد.. وما يقدر يكسره احد.. لا تخلي قلبك يغلبك.. وجودك مهم جنب ليال وانت عارف هالشي.. اذا ليال خوفها معميها.. بين لها ان خوفها غلط.. ووفر لها الامان الي هي تدور عليه بس بوجودك

&&&&&&&&&&&&&&&&&&&

4:15 الصباح
في سيارة ناصر
البحرين

ماني عارف ايش الي جالس اعمله.. معقول كل ذا قلق على سلطان؟!!.. وبعدين احس انه ما كذب علي.. فيه ناس كثيره طلعت من هالعماره.. اكيد عزومه من جد.. بس هو ليه ما طلع لحد الان.. ايش الي اخره.. يكونو عزمو عليه ينام عندهم؟!!.. وليه لا.. بس انا بظل كذا واقف زي الحرامي؟!!.. والله عيب علي.. ارجع السعوديه احسن.. شغلت السياره وجيت بمشي.. حركت السياره ومشيت مبتعد عن المكان.. ماني عارف كيف عيوني جات على المرايه.. شفته طالع مع حريم.. سلطان مع حريم؟!! لفيت السياره ووقفت اتابع.. مستحيل.. مستحيل.. ومستحيل الي اشوفه.. ليال؟!!!

&&&&&&&&&&&&&&&&&&&&&&&

- ايش هالحنيه الي نزلت على سلطان مره وحده
- وعزيز.. بريء صدق ولا هو الي قتل سهام
- يا ترا ليال بتلجأ لجراح حتى يطلع عزيز؟!!
- ايش بتكون حركة ناصر بعد ما شاف ليال

السلام عليكم ورحمة الله وبركاته

سلمووو يالغلا عن النقل

وتمنياتي لدانة بالشفاء لتنورنا


تقبلو مروري

,,,,,تراني متابعة بس مااعلق,,,,,,,,,:D

أجزاء رائعة كالمعتاد ..
أنا كمان متابعة بس بصمت ..
فين دانة يا ترى ربنا يطمننا عليها يا رب و يرجعها بالسلامة
مشكورة يا أحلى ايمووووووووووو