الله يعطيج العافيه دانه انا من المتتبعين خلف الكواليس بس هالمره ماقدرت ما اعبر لج عن اعجابي بالبارت صراحه بارت يجنن وان شاء الله خالد مايصدق المقلب الي سوته امه مع اني اعتقد انه من النوع الي راح يصدق ويطلقها ويندم اتمنى نعرف قريبا

الجزء الثاني والعشرون
فيلا منصور ..الصاله..
البحرين
كنت اشوفها بغضب وهي جالسه بين ليال وحنان.. ودي اهجم عليها واضرب فيها لين تطلع روحها.. ما ريحني الكف الي عطيتها ياه.. كان ودي اذبحها.. من قال هالكلب اسمه رحت لمكان الصوت ومسكته.. مسكته وكنت بذبحه.. كنت اضرب فيه وهو يضحك.. اثارني هالشي تخلص من يدي وهرب مني.. حاولت الحقه ماقدرت رجعت للمكان الي كنت واقف فيه مع لبنى.. لقيتها ماسكه خدها ودموعها متحجره بعيونها.. جريتها ودخلنا المطبخ.. كنت اسألها والنار تحرق قلبي.. كنت ابي اعرف من ذي.. اشلون تعرفه.. اش عرفه انها بتكون هنا.. اسأله كثيره في بالي اغلب اجوبتها بيكون لصالح لبنى.. بس الغيره عمتني.. غمضت عيني وندمت على الي سويته معاها.. كلمتها بصوره حاده آمرتها انها تغسل وجهها وتدخل للصاله معاي وهي مبتسمه.. نفذت الي طلبته منها من غير لا تنطق.. تعابير وجهها توجع قلبي.. كان ودي اخذها بحضني واعتذر لها ماكان قصدي اضربها الغيره عمتني.. بس ابي اعرف من هالنواف ذي.. ومنين يعرفها.. كانت تهمس لليال كل شوي.. مبين عليها الضيق.. فكرت اني اجبرها تقضي الليله هنا.. بس تذكرت امي.. دنيت جنبها وهمست
خالد بهمس: ابي اتكلم معاج
لبنى: .........................
خالد بهمس: قومي معاي احسن ما اجرك قدامهم
لبنى: ......................
خالد يمسكها: قومي معاي
لبنى بهمس: ابيك تبتعد عني ولا تقرب لي.. مابي اصرخ قدامهم.. ابي امشي من هنا وما ابي اشوفك مره ثانيه
خالد يسحبها: تعالي
لبنى ما سكه اعصابها: اترك يدي
خالد يسحبها: ولاكلمه ابي اتكلم معاج بس
لبنى تمشي معاه: ماراح ارد عليك.. وما ابي اعرفك
خالد يوصل للمطبخ: ماهو على كيفج ماتبين تعرفيني.. انا زوجك
لبنى بتريقه: زين الي عارف انك زوجي.. تصدق ما انتبهت.. من كثر ما اهملتني تصدق نسيت اني متزوجه
خالد: عشان جذي عرفتي غيري
لبنى بحده: المفروض اني اعطيك كف على وقاحتك معاي.. بس ترتيبتي تمنعني.. انت عارف ومتأكد اني ما اعرف الغلط ماهو انا الي اعرف واحد واتزوج بثاني.. وماهو انا الي تخون زوجها يا خالد
خالد يشوفها بغضب: اش يثبت لي
لبنى تدمع عيونها: تصدق ماعندي شي يثبت لك.. افتضر اني اعرفه ماهو من العقل اناديه هنا وفي بيتك عشان اشوفه
كلامها صح.. وفكرت فيه قبل لا تقوله.. كنت عارف ان في غلط.. في شي غلط.. بس غيرتي اغلبتني.. كنت ابي اعتذر منها.. كنت ابي اقول لها اني زوجها الي يحبها.. كنت ابي اعترف لها اني تعذبت بغيابها.. اشيا كثيره كنت ابي اقولها.. امنعتني نظرة الغضب الي بعيونها..سحبتها لحضني..وارفضت بشده
لبنى بغضب: اياك تلمسني.. انا عشت بعذاب ما حد ذاق مثله.. ومابسمح اني اعيد الي كنت فيه ابد
صدقت.. الي شافته من يد بدر ماهو شوي.. كفايه الكسور الي صارت لها وقت مالحقت عليها.. كفايه الرضوض.. وجعني قلبي عليها.. اشلون تعاملت معاها جذي.. غصب علي يا حبي.. احبج
سمر تدخل عليهم المطبخ: خالتي.. انتي بخير
لبنى بحده: بخير ياروحي
سمر بحزن: ليش تصيحين
لبنى تمسح دموعها: شعره كانت بعيني حبيبتي
سمر تشوف خالد: خالتي ليال تقول يلا
خالد: قولي لها انا بوصل لبنى
لبنى بحده: لا.. انا ماشيه مع ليال
خالد بحنيه: عشان خاطري انا اوصلج
لبنى بحده: قلت لا
مشت عني واتركتني.. ما عرفت ارتاح من خذتها.. من صارت حلالي.. ماهو ذي الي تمنيته ليش ماني قادر ارتاح.. ليش بدل ما اخليها فرحانه اتركها بحزن كبير.. بدموع تكسرها قدامي
حنان: ليش واقف جذي بروحك
خالد بضيق: ولاشي
حنان بحزن: صار شي بينكم
خالد بضيق: ولاشي
ام خالد تدخل المطبخ: وينك يما ليش واقف جذي
خالد بضيق: ولا شي
ام خالد بفرح كبير: صار شي بينكم
خالد بضيق: ولا شي
ام خالد: اش رايك في امك هذا انا استحملتها عشان عيونك
سمر: ماما انا بمشي مع راكان
حنان: راكان وين؟
سمر: مع جدي برا
حنان: لا تمشون احنا بنام هنا
سمر بحده: لا.. احنا راجعين بيتنا.. وماراح ننام هنا
حنان بحده: ماهو وقت لعب عيال.. قولي له انكم بتنامون هنا
سمر تروح: انا بروح اناديه لج
خالد: انا رايح انام
حنان: ماتعشيت يا خوي
خالد يناظرها: ماني طايق الاكل
حنان تحضنه: ليش ياروحي.. ليش الزعل الي انت فيه
ام خالد بابتسامة انتصار: من الدلوعه.. اكيد مزعلته وقالب مزاجه
راكان بحده: يما.. انا وسمر ماشيين
حنان بغضب: انتو ماتسمعون الكلام.. قلت بنام هنا
راكان يشوف جدته: انسي.. عندنا بيتنا وبنروح ننام فيه.. وقعده هنا ماراح نقعد
ام خالد بحنيه: ليش يما هالبيت بيتكم
راكان يشوف جدته: يما سمر بالسياره تنتظرني
حنان بحده: شنو يعني بتمشون كلامكم علي.. قلت بتنامون هنا.. روح نادها وروحو غرفكم
خالد يمسكها: لا تعصبين عليهم روحي معاهم انا بخير

&&&&&&&&&&&&&&&&&

11:15 اليل
فيلا لافي ..غرفة عبير..
لندن



عبير على التلفون وبخوف: عبدالرحمن يعني شنو
عبدالرحمن: حبيبتي مالقيت حجز
عبير: طول الاسبوع!!!! من يصدقها هذي
عبدالرحمن: عبير هذي الي قالوه لي.. حتى اني مكلم حامد صاحبي عشان يدبر لي مكان.. بس قال لي بيحاول.. يقول فيه وفود طالعه من الدوحه عشان مؤتمر.. ماني منتبه على الي قاله لي.. بس اكد لي انه مافي حجوزات
عبير بخوف: عبدالرحمن.. لا تتأخر علي.. عبدالرحمن الضيق بيذبحني.. ابي تلحق علي
عبدالرحمن: حبيبتي من شنو خايفه
عبير: ابوي قال انه بيزوجني.. وانا ما ابي غيرك.. لا تتركني
عبدالرحمن: حبيبتي مايقدر يزوجك.. انا رديتج خلاص
عبير بفرح: احلف يعني انا زوجتك خلاص
عبدالرحمن: أي حبيبتي لا تخافين
عبير: مابرتاح الا ذا اخذتني من هنا
عبدالرحمن: في شي مخبيته عني؟
عبير: فيه يا عبدالرحمن الحق علي وانا اقول لك
عبدالرحمن بخوف: تكلمي اش صار معاج
عبير: على التلفون ما اقدر.. عبدالرحمن حبيبي تعالي بسرعه
عبدالرحمن: بحاول اشوف حامد مره ثانيه اكيد بيلاقي حل.. اهدي حبيبتي انا معاج
عبير تبكي: عبدالرحمن.. الخوف بيذبحني.. ودي اطلع من هنا بسرعه
عبدالرحمن: لا تخافين يا روحي.. ان شا الله بجي بسرعه

&&&&&&&&&&&&&&&&

11:30 الليل
شقة ليال ..غرفة لبنى..
البحرين

دخلت لغرفتي وقفلتها.. ماودي اكلم احد.. ليال شافت وجهي ولمى خافت علي.. بس حاولت اقنعهم انه تعب ومحتاجه ارتاح.. رميت روحي على فراشي.. صرت اصيح حظي.. اصيح من قهري وحرق دمي.. من نواف ذي!!.. ومن وين يعرفني.. ليش يصير لي جذي.. انا تمد يدك علي يا خالد.. انت بعد!!.. انا استحملت الضرب من بدر عشان ابوي.. الحين بستحمله منك عشان من؟.. كنت افكر اني انفصل.. انا الي بطلب الطلاق.. ماراح انتظر انه يجي ويقولي انه بيطلقني.. مستحيل ارضاها على نفسي.. مستحيل اسمح انه احد يمد يده على مره ثانيه.. ماراح اسكت.. كنت اسمع تلفوني واسمع نغمة خالد.. كان يتصل ولا هو موقف.. ملاني الضيق يا خالد.. ملاني الهم.. ودي ارتاح بس ماني عارفه اشلون.. اشلون اقدر ارتاح.. اشلون الاقي قلب يحبني ويخاف علي.. اشلون اقدر الاقي الحضن الي ارتاح فيه.. تعبت من حياتي ومن حظي.. تعبت من عذابي ومن قسوة الناس حولي.. قمت من فراشي وكنت بسكر جهاز التلفون ما ابي ارد عليه.. ولا ابي اسمع منه كلمه.. ما ابي اعرفه.. اذا يبي ينفذ طلب امه ويبتعد عني.. خلاص يروح بس المهم اكون مرتاحه.. قفلت الجهاز ورميت نفسي على الفراش من جديد.. غرقت بأفكاري.. ضعت بحزني.. سمعت ليال تنادي
ليال: لبنى.. لبنى حبيبتي افتحي الباب
لبنى تفتح: خير ياروحي
ليال: ليه متضايقه كذا.. الي اعرفه انك كنتي مع حبيب القلب.. واكيد صار شي يفرح القلب.. ليه هالحزن والضيق
لبنى: .................................
ليال تبتسم: خذي طيب خالد داق ويقول جهازك مسكر.. يقول انه نسى يقولك تصبحي على خير
لبنى: قولي له اني نمت
ليال: الرجال على التلفون ويسمعك.. خذي
لبنى تاخذ التلفون: نعم
خالد: ابي اتطمن عليج
لبنى تسكر الباب: تتطمن على شنو
خالد: عليج
لبنى: ......................
خالد: لبنى انتي بخير؟
لبنى: مالك شغل فيني.. بخير ولا لا.. هذا شي يخصني ومايخصك ابد.. ومابيك تتدخل في حياتي من جديد
خالد: اشلون يعني.. انا زوجك
لبنى: وانا ابيك تطلقني
خالد مصدوم: شنو!!.. اشلون اطلقج
لبنى بحده: مثل الناس ماتطلق.. مابي اعيش معاك ومابي اعرفك ومابي أي شي يجمعني فيك
خالد بانكسار: تبين تبتعدين عني
لبنى: كرامتي ماتسمح استمر معاك.. وبعدين انت كنت بتنفذ الي امك بغته وبتطلقني.. يعني الي اقوله ماهو شي جديد
خالد بحده: ومن قال اني بطلق
لبنى بقهر: اهمالك لي.. وشكك فيني
خالد: لبنى.. احسبيها غيره عليج.. حبيبتي انتي تعرفين اني احبج
لبنى: كلام يا خالد.. اسمع منك الكلام بس.. عمري ماشفت فعلك.. ماراح اسمح للعذاب يسكني من جديد.. ابد انت سامع
سكرت الخط بوجهه.. رجع يتصل وانا رافضه اجاوب عليه.. كنت اصيح من قلبي.. كنت ابي انام القهر منعني النوم.. طلعت من غرفتي ورحت للبلكون.. الكل تقريبا نام.. وانا الوحيده الي جالسه ابكي حظي ,حزني ,عذابي.. قلبي تعبان.. وماني عارفه اشلون ارتاح.. ودي ارتاح.. محتاجه ارتاح

&&&&&&&&&&&&&&&&&&&&&&

10:00 الصباح ..اليوم التالي..
شقة عبدالعزيز ..الصاله..
البحرين

خالد بحده: تعبان وماني لاقي طريقه اكلمها فيها
عبدالعزيز بهدوء: انت زوجها يا اخي
خالد: عبدالعزيز.. ماتبي ترد علي وماتبي تشوفني.. اقولك تبي تنفصل
عبدالعزيز: انت تشك فيها؟
خالد: لا.. انا غرت بس.. يا اخي من حقي اغار عليها.. انا عارف لبنى زين عمرها ماتعرف طريق للغلط.. بس......
عبدالعزيز: بس شنو.. تبيني اقول لك اشلون تراضيها
خالد يمسك راسه: ياريت قول لي أي شي بسويه بس ترضى علي.. المهم انها ترضى علي
عبدالعزيز: بيتك جاهز؟
خالد: بيت؟!!!
عبدالعزيز: بيتك انت ولينا
خالد: أي جاهز
عبدالعزيز: يعني ماناقصه شي
خالد: غرفة النوم بس
عبدالعزيز: كلم احمد وقوله انك تبي لينا تجهز لك غرفة النوم
خالد مستغرب: وليش لينا!!!
عبدالعزيز: لينا مصممة ديكور.. بتفرش لك الغرفه تخلي فيها شغلات.. يعني شغلات انت فاهمني
خالد: هذي وقته انك تستحي.. يا اخي والله ماني بعقلي قول لي اش تقصد
عبدالعزيز: يعني تجهزها لليلة الزواج فهمتني.. يعني حركات ورد وهدايا وعطور وشموع.. جذي يعني
خالد: فهمتك.. وبعدين
عبدالعزيز بحده: لا انت مختوم عليك ختم الغباء
خالد بحزن: غبي لاني ماني عارف اشلون ابين لها حبي
عبدالعزيز يمسك كتفه: خالد انا اتكلم عن زواجك.. عجل بزواجك.. لبنى اذا صارت في بيتك بتختلف الامور.. بتقدر تكلمها وتدلعها وتاخذ راحتك معاها
خالد: صح.. لازم اعجل بالزواج.. بس عرس احمد
عبدالعزيز: لبنى قالت تبي حفله بسيطه بيننا.. وعرس احمد باقي عليه عشر ايام.. انتهزها فرصه وخلي زواجك نهاية هالاسبوع
خالد: بعد ثلاث ايام؟!!!
عبدالعزيز: وليش لا.. تبين لها انك ماتقدر تبعد عنها.. وتخليها تحس بانك مهتم بوجودكم مع بعض
خالد يقوم: صح
عبدالعزيز: وين تروح
خالد: بروح لابوي اقول له
عبدالعزيز: والله العقل نعمه.. كلمه بالتلفون وبلغه بالي تبيه.. وقل له يجي عند ليال وانت روح معاه بعدين.. ادخلو عليهم وكلموهم
خالد: صح انت صح.. تظنها بتوافق
عبدالعزيز: لازم اكلم ليال واقول لها الي صار بينكم.. هي الوحيده الي بتقنعها
خالد بحده: لا.. ليال لا.. اذا عرفت هي الي بتصر اني اطلقها
عبدالعزيز يضحك: يا اخي الكف الي جاك من ليال اشوف خوفك منها
خالد: انت ماتعرف ليال لها قدره على التأثير ماهي طبيعيه.. لبنى متعلقه فيها كثير.. ما ابي اخسر لبنى بغضب ليال
عبدالعزيز: خلاص ادخل انت وابوك واترك مسألة اقناع لبنى على ابوك.. وقول له خلي يأثر عليها بالكلام يعني انا مابقالي من العمر كثر الي راح وابي افرح فيكم قبل لا اموت وجذي يعني كلام من الي يوجع قلب الحريم
خالد: اكيد بتوافق لبنى تحب ابوي واكيد ماراح ترده
عبدالعزيز: لو مخك يشتغل شوي كنت عرفت تتصرف
خالد يحضنه: الله يخليك لي ماكنت عارف اتصرف من غيرك
عبدالعزيز: خالد.. لاتظن اني بسكت عنك اذا عرفت انك رفعت يدك عليها مره ثانيه.. بقتنع ان الغيره عمتك هالمره.. بس صدقني مره ثانيه بتلاقيني ارفع يدي عليك.. لبنى اختي.. ومابرضى عليها
خالد: ان شا الله ماتتكرر.. بس المهم انها توافق

&&&&&&&&&&&&&&&&&&

10:45 الصباح
فيلا لافي ..غرفة لافي..
لندن

ام ناصر بخوف: يعني شنو
لافي: بنرجع السعوديه
ام ناصر: ليه!!!!
لافي: شغلي خلص بلندن
ام ناصر: بس انت تقول انك بتستقيل
لافي: ايوا خلاص.. تعبت من الشغل.. ابي اتفرغ لتجارتي.. احس اني خسرت مشاريع كثيره في الفتره الاخيره.. لان دلوع امه ترك كل شي على ظهري وراح يدور على بنت الكلب الي تركته
ام ناصر: يعني خلاص اجهز اغراضنا
لافي: جهزيها.. معك اسبوعين او ثلاثه.. وحنا راجعين
ام ناصر: قلت لبنتك
لافي بحده: لا اقول لها ولا تقول لي.. خليني بعيد عنها.. بكره تقول اني اعتديت عليها وانتي تصدقيها
ام ناصر: اسفه على تسرعي
لافي بصراخ: هذا الي آخذه منك
ام ناصر: لا تزعل مني.. عارف اني احبك واغير عليك
لافي يقوم عنها: لا تتوقعي انه حبك في قلبي يزيد.. الا ينقص.. وهذا انا اقول لك.. ان حصل لي اني اعرس على وحده ثانيه.. بعملها
ام ناصر بخوف: تعملها يا لافي
لافي يبتسم: اعملها ماتلزمني وحده زيك
ام ناصر تحضنه: تهون عليك لطيفه يا لافي.. وقت الغضب كل شي يصير
لافي يبعدها: الا انك تشكي فيني
ام ناصر: من حبي يالافي.. من خوفي عليك.. اخاف عليك من نسمة الهوا
لافي يقوم: كلامك ماله طعم.. ماسخ.. ماعجبني
لطيفه تجري وراه: لافي حبيبي لا تتركني وتمشي وانت زعلان
لافي: ما اظن ان زعلي يهمك.. لو يهمك ماتشكي في لافي
ام ناصر تحضنه: من حقي اشك.. لافي ذا روحي.. انا عايشه بحسه.. وقت الي ذا بيختفي عني بخرب الدنيا
لافي يبتسم: يعني لو اعملها واتزوج عليكي ايش تعملي
ام ناصر بحده: بحرق عروسك قبل لا تدخل عليها
لافي: اجل جهزي بنزينك ونارك.. لاني نويت اعرس
ام ناصر بغضب: تراني بحرقها من جد يالافي ما امزح معك
لافي بلا مبالاه: مايهمني حتى ارتاح منك ويسجنوكي واروح اعرس على غيرها
ام ناصر تضحك: يعني مرتبها
لافي يبتسم: عشان ارتاح منك ممكن اعملها
ام ناصر: اجل خلاص.. اقتلك واقتل روحي معاك
لافي يفكر: لا هذي مافكرت فيها.. تحتاج الى اعادة تفكير
ام ناصر: هههههههههههههه فكر فيها براحتك
لافي يبتسم: ودي اشوف احبك لي على طول.. لا تنشغلي عني بعيالك وقت الي اكون معاكي.. انسي كل شي وعيشي معي

&&&&&&&&&&&&&&&&&

12:00 الظهر
شقة ليال ..الصاله..
البحرين

كان بالي مشغول في الفتره الاخيره بالشغل.. كنت اوزع الادوار وارتب القوانين والنظم الي المفروض نتبعها في المشروع الجاي الي راح ندخله.. اكتشفت ان المجموعه كلها عايشه في كم من المشاكل الي لازم تنحل وبصوره سريعه.. لازم العقل يكون مرتاح حتى ينتج صح.. كنت ابي ابتدي بأسرع وقت لكن مشاكل المجموعه تمنعني.. كل شوي مشكله وكل شوي مصيبه.. انا عارفه ان الحياة كذا على طول.. وما راح تنحل كل المشاكل حتى نتفرغ للشغل.. بس من المهم اننا نحل من المشاكل اغلبها.. حتى البال يصفى شوي.. كنت افكر في عزيز وحزنه.. وعن حياته الشخصيه ومشاكله الي مارضى احد يعرف عنها.. كنت خايفه انه بعد فتره ممكن نكتشف شي.. يأثر على الشغل.. موضوعه مع لمى الي لحد الان ما عرفت حقيقته.. لبنى وخالد.. اكبر المشاكل الي راح تبتدي مع امه.. حسبي الله عليها.. حتى ما خلتنا نتهنى بالشاليه.. ما جلسنا جلسه عدله.. حتى ما كملنا يوم.. يمكن اني كنت انانيه وقت الي فكرت ان ذا في صالح لبنى.. وممكن يحفزها تنزل معانا الشغل هي اكسبت من ناصر الله يرحمه اسلوب ولا اروع مع الزباين وذا الاسلوب محتاجه له كثير.. بس رجعت بتفكيري وقلت المسكينه ودها ترتاح.. قررت اني أأجل الشغل شوي.. ازوج لبنى ولينا ونفضى بعديها.. والله يستر بعد كذا ايش بيصير.. مع اني واثقه اني ببتدي بدايه صح.. طلعت من غرفتي اول ما عرفت ان منصور وخالد عندي.. رحبت بهم وجلست اسمع ايش يقولون.. كنت اشوف الفرحه بعيون منصور وهو يتكلم مع لبنى.. واشوف الحزن بعيونها.. وهي تفكر في الي يقوله.. كنت مبسوطه انها اخيرا بتتزوج حبها.. بس حزينه على كسر خاطرها.. واضح ان خاطرها مكسور.. يمكن لان ابوها ماهو موجود.. يمكن خايفه من ام خالد وسوالفها.. ليتها تفتح قلبها وتقول.. لبنى الوحيده فينا كتومه وما تثق في احد بسهوله
منصور: ها يبا اش قلتي
لبنى متردده: عمي.. انا.. كنت.........
خالد يقترب منها ويمسك يدها: اطلبي الي في خاطرج.. الي تتمنينه.. الي تبينه.. لا تستحين ولاتحسبين حساب أي شي غير راحتج وسعادتج
شفت عيونها تلمع.. اكيد اسعدها هالكلام.. كانت متردده وساكتها.. كلام منصور احرجها.. كان يتكلم معاها عن عمره وفرحته بها وبخالد.. وهالشي تمناه من سنين.. كان يطلبها بأنه يبي تكتمل سعادته بها وبخالد.. كنت حاسه انه داخلها كلام كانت تبي تقوله.. بس كلام منصور منعها.. او خوفها عليه هو الي منعها.. يمكن ماتبي تكسر فرحته
خوله: ليال ليش سرحانه
ليال تنتبه: لا ابد معاكم.. اشوف العروس.. احسها ماهي مبسوطه
لبنى تنتبه: لا من قال
ليال: اذا ودك تأجلي عادي.. نأجل
خالد: ليش التأجيل.. عمرنا راح واحنا نأجل كفايه جذي صح لبنى
لبنى تهز راسها موافقه: ....................
خوله بشك: انتي مستحيه ولا في شي مضايقج
ليال: انا بعد احس انه في شي مضايقك
عبدالعزيز: لا متضايقه ولا شي.. عروس ومستحيه
احمد: انا بعد حاس انها متضايقه.. اذا عندج شي قوليه.. والي تبينه يصير
لبنى بحزن: لا مافي شي
لمى: من الصبح وانتي مافي شي.. والله باين انه فيه
عبدالرزاق: لبنى يبا.. هذي زواج.. ماهو عشان عمج قاعد يكلمج بتسوين الي يرضيه
منصور: حبيبتي كلامهم صح.. انا بعد اشوف انج منتي سعيده.. قولي اش فيج
لبنى: ولا شي عمي.. عادي
عبدالعزيز: قلنا مستحيه لا تزيدونها عاد
خالد: اش رايج نطلع مع لينا وتختارين غرفة نومج
لينا بفرح: انا موافقه
لبنى تهمس: ماهو وقته
خالد يهمس: ليش
لبنى بهمس: ماودي اطلع الحين
ليال: وانا بروح معاكم
احمد: وانا بعد
خالد: كلها غرفة نوم الي بناخذها.. اشوف الشعب كله بيجي معانا
لينا: وان شا الله منت متضايق مننا
خوله: وبعدين نختار الغرفة ونروح نشتري اغراض العروس وجهازها
خالد: نروح ونختار.. وليش الجمع.. خلج مكانج مرتاحه.. وانا وزوجتي نروح نخلص امورنا
لبنى بهمس: قلت لا
كنت اشوفها تهمس له بحده.. متأكده انه في شي صاير بينهم.. ماهو معقول الحيا بيخليها بهالحده.. ايش عامل يا خالد ولبنى مغطيه عليك.. قلبي كان مقبوض.. ليه يبي يعجل بالزواج كذا.. ليه هي تتعامل معاه بحده.. ليه وليه وليه.. انتبهت على عزيز يهمس لي
عبدالعزيز: ليال
ليال: نعم
عبدالعزيز: مزعلها وهي تتغلى عليه.. البنت تحبه بس زعلانه عليه
ليال بخوف: كنت حاسه انه في شي صاير بينهم
عبدالعزيز: خلاص اسكتي.. اذا اشتكت هذيك الساعه بنتدخل.. الان مانقدر
ليال: يا وجع قلبي عليها.. الفرح مايدل بابها
عبدالعزيز: اعوذو بالله اش الي تقولينه
ليال: عارف ودي أأجل هالزواج
عبدالعزيز: لا يكون مصدقه روحج انج مسؤله عنها تقدرين تأجلين وتعجلين بالزواج
ليال تبتسم: ساعات انسى نفسي من صدق
عبدالعزيز: انتي متعنتره من جد
ليال تضحك: تصدق ايوا
احمد بضيق: مالكم انتو الاثنين
ليال: ابد على هالي قدامك.. والله اشك انهم يعرفو يعيشو من غير مشاكل
خوله تدخل بالنص: الي يشوف شكل لبنى مايقول عروس
احمد بضيق: وهذي الي مضايقني
عبدالعزيز: مافي يدنا شي نسويه.. البنت ممكن تلجأ لنا اذا حصلت أي مشكله تضرها.. بس تراهي ماهي من اهلنا عشان نتدخل بحياتها..احنا اسمنا اخوان دنيا وبس
احمد بضيق: صدقت
خالد: خلاص حبيبتي
لبنى تقوم: خلاص انا قايمه
منصور بفرح: الله يتمم لكم على خير
لينا: حنان وين؟
خالد: مشغوله مع العيال
لينا: يلا انتو يالي مسوين اجتماع مغلق.. بنمشي ولا ماتبون ترحون معانا
خوله تفز: لا حبيبتي انا اول من تركب السياره
خالد: والله يا اختي اشوف راحتج هنا
عبدالرزاق: مالك شغل زوجتي اول من تركب السياره
خوله: الله يخليك لي يابوسالم
عبدالعزيز: فكك روحك.. الكل بيجي معاك
خالد يبتسم: دام الامور متيسره.. حياهم الله
احمد: غصب عليك ماهو بكيفك
خالد يضحك: ولو حبكم في القلب ساكن
ليال: ياليت حبها هو الي يسكن بقلبك وماتشوف غيره

&&&&&&&&&&&&&&&

3:00 الظهر
فيلا العايله ..جناح غسان..
السعوديه

العنود: غسان.. غسان قوم
غسان يصحى من النوم: ايوا يا روحي
العنود: غسان اصحى عاد
غسان يقوم: مالك
العنود: احس الدنيا تلف فيني
غسان ينيمها: ارتاحي شوي
العنود تغمض عيونها: الدنيا تلف يا غسان
غسان بخوف: افتحي عينك
العنود: ماني قادره
غسان: ايش آكله
العنود: الغدا بس
غسان يحملها: نروح المستشفى احسن
العنود بخوف: ليه
غسان: يمكن ضغطك نازل زي هذيك المره
العنود تحضنه: ماودي اروح المستشفى
غسان يبتسم: بلا دلع.. ما شبعتي وانتي تتدلعي علي
العنود بدلع: لا ماشبعت
غسان: اجل تدلعي زي ماتحبي.. وانا بتطمن على حبيبتي زي ما احب
العنود تبوسه: احبك.. من جد احبك
لبست عباتي ورجع حملني.. ركبت السياره وانا متعلقه بصدره.. الدوخه مضايقتني ما احس اني ما خذه راحتي معاه.. وهو ياقلبي كل شوي يعطيني ابتسامه تضيعني من الدنيا.. كنت احضنه وانا ابتسم.. كان يسولف معي في اشيا فاضيه.. كنت اجاوب عليه وانا عارفه انه يبي يتأكد اني صاحيه معاه ماهو اكثر.. وصلنا المستشفى ونزلت معاه.. رحنا على غرفة المعاينه.. وجات طبيبه تفحصني وهو معاي.. كانت طيبه ومحترمه كثير.. غسان عرفني عليها هي وحده من زميلاته المحترمات الي يشتغل معاهم.. اجلست جنبي واطلبت من غسان انه يتركنا.. بس انا رفضت بخوف.. ومسكته من ذراعه لا يسيبني.. كانت تضحك على حركتي.. قالت ماهو مهم خليه موجود.. صارت تشرح لي عن اشيا تخص الحريم.. وتسألني عن اشيا خاصه انحرجت اجاوب عليها.. ابتسمت وقالت محنا قلنا الدكتور غسان يطلع برا احسن.. صرت ماسكته اكثر من احراجي.. صارت اغلب الاجابات غسان هو الي يجاوبها.. كنت منحرجه كثير.. وقفت الدكتوره في النهايه وقالت
الدكتوره: هو احتمال حدوث حمل.. بس ضروري التحليل
غسان بفرح: الله يطمن قلبك
الدكتوره: لا تستعجل يا دكتور.. نتيجة التحليل وبعدين نقول مبروك
من سمعت عن موضوع الحمل.. زاد خوفي وارتباكي.. كنت ساكته وغسان طاير من الفرح.. كان يحضني كل شويه.. كنت مصدومه.. احساس في داخلي يقول اني ما ابي اكون حامل.. ما ابي عيال.. ابي اعيش معاه كذا.. كذا مرتاحه.. سيطر علي الخوف.. وهو ملاحظ هالشي صار يطمني بس انا ماني معاه يمكن عيوني كانت تتبعه بس احساسي في مكان ثاني.. ماني عارفه احساسي وين.. المهم اني رافضه فكرة الحمل.. رجعت الدكتوره بعد مده.. اول ما ادخلت الغرفة غمضت عيوني.. همس باذني
غسان بهمس: حبيبتي
العنود تفتح عيونها: نعم
غسان: خلاص بنمشي
العنود بخوف: شنو النتيجه
غسان يوقفها: انتي اش تبين
العنود بخوف: غسان ما ابي شي
غسان يطمنها: خلاص يا قلبي.. مافي شي
العنود تطلع من الغرفه: تلعب علي صح
غسان يبتسم: لا.. اطمنك بس
العنود: قول لي
غسان: ايش تبين اقول
العنود: ايش النتيجه
غسان: قلت لك.. انتي ايش تبين
العنود بضيق: والله ما ادري
كنت اشوفه مبتسم.. اكيد اني حامل.. حبيبي ماهو قادر يداري فرحته.. عيب علي اخرب عليه هالفرحه.. غسان ماهو مقصر معاي في شي.. ليه دايم اتعبه معاي.. والله عيب علي.. حتى لو كنت رافضه موضوع العيال لازم اتقبله عشان غسان.. وصلت السياره وفتح لي الباب.. ابتسم لي ابتسامته الي تدوخني.. ضحكت له ودخلت.. ركب وهو يشوفني
العنود: بتظل تشوفني مده طويله
غسان: في شي مضايقك
العنود: بالعكس احبك وانت كذا
غسان يقترب منها: كذا كيف؟
العنود تبتسم: ماراح اقول لك
غسام: عن الدلع وقولي لي
العنود: ليه تحبني كذا؟
غسان يبتسم: تصدقين ما ادري.. احس اني من انولدت على الدنيا وانا احبك.. سألت روحي كثير ليه اموت على هالبنت
العنود باهتمام: وليه تموت عليها
غسان: عشانها روحي.. حبي.. قلبي
العنود: وام عيالك؟
غسان يضحك: ماراح اقول لك
العنود تحضنه: ما هو مهم عندي.. المهم اني بحضنك.. والاهم ان ما ابي احد يعرف اني حامل غير بكره
غسان مستغرب: ليه!!
العنود: عشان اليوم ابي افرح انا وزوجي لحالنا
غسان يبوسها: احبك

&&&&&&&&&&&&&&&&&&&


يتبع

4:00 العصر
في محل المفروشات
البحرين

رفضت تركب معاي السياره.. كنت مع عبدالعزيز وعيني عليها.. على حزنها.. مبين انه خاطرها مكسور.. عارف اني غلطان.. وماني عارف اشلون اراضيها.. وصلنا المحل وكانت كل شوي ترفع عينها تشوفني ومن تشوف اني اتابعها تهرب بنظرتها لبعيد.. كان ضحك لينا وليال وخوله واضح لي اسمعه.. الا هي.. كانت تكتفي بابتسامتها.. ما انكر اني كنت مهموم.. بس معلش.. كلها بكره وبعده وهي تكون في بيتي.. انتبهت على عبدالعزيز راح للحريم.. اخذهم وتركو لبنى بروحها.. ماقصرت يا عبدالعزيز.. تحس فيني يا خوي
خالد يدني منها: لبنى
لبنى بجفا: نعم
خالد: اش عجبج من الغرف
لبنى متردده: خالد
خالد: ياقلبي
لبنى: ودي اخذ غرفتين
خالد بحده: مافهمت
لبنى: ابي اخذ غرفتين نوم
خالد بحده: ليش
لبنى تتهرب: عشان سمر.. متفقه معاها انها تنام عندي.. ابي اخذ احتياطي.. وين تبيني اخليها تنام
خالد: اه.. الي تامرين عليه
لبنى: ما ابي احد فيهم ينتبه اني ابي غرفتين.. بيفسرونها شي ثاني
خالد يبتسم: خلاص بتفق مع صاحب المحل.. وين الغرف الي اعجبوج
لبنى: ابي هذي
خالد: أي مناسبه لسمر.. وغرفتنا؟
لبنى بجفا: اختارها انت
خالد يمسكها: لا تقسين علي
لبنى تمشي عنه: تعلمت القسوه منك
خالد يمسكها: بس انا احبج
لبنى تمشي عنه: ماهو قد حبي
خالد يبتسم: يا بعد قلبي انتي.. صدقيني كل شي بيتغير بعد الزواج.. حبيبتي.. منتي تاركه لي فرصه حتى اقعد معاج
لبنى: عشان كلما جات فرصه تقعد معاي تصير مصيبه
خالد: حبيبتي ماهو بيدي.. والله غصب علي
لبنى تنزل راسها: حصل خير
خالد: مسامحتني
لبنى: حصل خير ياخالد.. بس انا ما اعرف من الي كان يناديني
خالد يسكتها: مصدقج.. من غيرتي عليج نسيت روحي.. يمكن اعتذاري مايشفع اني مديت يدي عليج.. بس صدقيني ماهو انا الي يشك فيج.. انتي وزنج عندي اكبر
لبنى تشوفه: ............................
خالد: منتي مصدقتني ؟
لبنى: لا
خالد: معلش بتثبت لج الايام
عبدالرزاق: خالد يلا يايبا تأخر الوقت اخترتو ولا ليلحين
خالد: خلاص يا بوسالم.. اخترنا
اتركتني وراحت للينا.. تشاورو على غرفة وجات قالت لي عليها.. اتفقت مع صاحب المحل على الغرفتين واعطيته العنوان.. كنت اتمنى انها تركب معاي السياره.. ترجيتها وكنت ببوس يدها.. لبنى شافت اني ماراح اتركها استسلمت واركبت معاي.. كنت طاير من السعاده.. صحيح انها كانت ساكته طول محنا مع بعض.. بس معلش عارف انها شايله بقلبها.. وصلنا العماره ونزلنا.. وقف احمد مع عبدالعزيز وعبدالرزاق.. وانا كنت مع لبنى ماودي انها تنزل.. كان ودي اننا نسهر مع بعض.. كانت جافه.. عنيده.. ماكنت حاب اني اضايقها.. تركتها على راحتها.. مشت لحد ليال.. وكنت اتابعها بعيوني.. وقفو الحريم عند باب المصعد.. كنت بدخل معاهم وشفت كأنه احد تحرك ناحية الدرج.. عادي اكيد واحد من المستأجرين.. وقفنا شوي لحد ما وصلو احمد والي معاه
عبدالرزاق: انا بمشي شوي وراجع لكم
خوله: وين يا بو سالم
عبدالرزاق: عندي شغل اخلص وارجع
احمد: خذني معاك
لينا: وانا
احمد: برجع لج
ليال: صار لكم شغل من وراي وانا ماني عارفه
احمد: عندي ضيوف من الكويت اليوم يوصلون بروح استقبلهم وبرجع
لينا: طيب لا تنسى روحك معاهم وتتأخر علي
احمد: لا يبا ماراح اتأخر
مشى عبدالرزاق واحمد.. عبدالعزيز كان معاي.. اتفق معاي نوصل الحريم ونسهر مع بعض بشقته.. يمكن عرضه جا بوقته لاني متضايق وماني عارف وين اروح.. وصلنا الطابق العاشر
ليال: طيب دامكم بتسهرون مع بعض.. خلونا نعملها سهره عندي في البلكون..عشان اوريكم كم ورقه تخص الشغل
عبدالعزيز: وانتي حاشره روحج بكل شي.. قعدة رجال ليش تبينها عندج
ليال منحرجه: ما قصدت قلت نجلس مع بعض للشغل
خالد: هههههههههههههههههه عبدالعزيز يمزح يا ليال
خوله: انا صدقت
لينا: تبون الجد.. خالد ودي اجلس معاك ومع لبنى عشان اعرف الالوان الي تحبونها
خالد يشوف عبدالعزيز: دام الموضوع متعلق بزواجي.. بروح معاهم
عبدالعزيز: ههههههههه روح
خالد: وانت
عبدالعزيز: معاك طبعا
.....: لبنى.. لبنى
خالد يسكت الكل: ولا كلمه
.....: لبنى حبيبتي انا جيت.. انتي وين
عبدالعزيز بهمس: الصوت من وين جاي
خالد بهمس: من الدرج
.....: لبنى.. وينج انا هنا
عبدالعزيز بهمس: ردي عليه
خالد بغضب: لا
عبدالعزيز بهمس: اسكت انت.. لبنى ردي عليه احنا معاج لا تخافين
لبنى بهمس: انا برد
خالد: قلت لا
عبدالعزيز: ماهو وقت غيره يالخالد خلنا نمسكه وبعدين يصير خير
خالد: ردي
لبنى بهمس: الاول الحريم يدخلون وانتو استخبو ورا الباب
عبدالعزيز: انت خلك ورا الباب وانا في المصعد
ادخلو الحريم داخل الشقه.. ودخلت معاهم وتركت الباب مفتوح حتى اشوف لبنى.. عبدالعزيز استخبى بالمصعد وترك الباب مفتوح.. تأكدت لبنى اننا معاها وشفتها وهي تقرا قرآن وتسمي
لبنى: من ينادي علي
.....: حبيبتي انا نواف
لبنى: وينك يا نواف ماني شايفتك
بهالوقت سمعت صوته يرد عليها وماني ذاكر ايش قال.. لقيت لينا واقفه قدامي.. صحيح انه الغيره تاكلني بس انا مصر اعرف اش القصه.. همست للينا ووافقت على الي قلته لها.. اطلعت لبرا عند لبنى.. وانا سحبت لبنى لداخل.. صحيح ان لبنى كانت معارضه لتصرفي.. بس انا كان مهم عندي اني اتأكد من الي براسي
لينا: انت وين نواف
نواف: هنا حبيبتي تعالي لي هنا
لينا: انت اطلع لي خلني اشوفك.. مافي احد جنبي
نواف: طيب
طلع وصار قدام لينا.. كان يشوفها ويبتسم لها كان يكلمها على انها لبنى.. تأكدت من الي براسي.. طلع له عبدالعزيز وهجم عليه.. طلعت وراه وصرت اضرب فيه بجنون.. لحد ما اغمى عليه من الضرب.. عبدالعزيز اتصل على احمد.. والمسكين جا بسرعه عبدالرزاق بعد وصل بسرعه.. ليال كانت خايفه ولبنى ومنهاره وخوله تهدي فيها.. لينا الوحيده الي كانت قويه.. وقتها اعترفت لهم على الي صار في بيت ابوي في الحديقه.. لبنى كانت رافضه انها تتكلم معاي.. رافضه انها تشوفني حتى
احمد بحده: احنا وثقنا فيك.. بس تبي الصراحه الي انا اشوفه انك منتـ...................
عبدالعزيز بحده: احمد.. خلاص الرجال قال الي صار من نفسه ومحد اغصبه يقول شي
عبدالرزاق: انا منصدم فيك خالد
ليال: ايش تتوقع اننا نقول الان
خالد: انا معتبركم اخواني.. انا ماشكيت في لبنى ابد
احمد: واش تسمي انك تخلي لينا توقف مكانها.. ماهو شك
خالد: لا ماهو شك.. من حقي اعرف من هالرجال.. ومنين يعرف زوجتي
عبدالعزيز: احتمال يكون من تبع زوجها بدر
احمد ينزل راسه: احتمال
عبدالرزاق: وحتى ان طلع من تبع زوجها.. البنت اشلون بتراضيها
خالد: اذا اقتنعت انه من واجبي حمايتها و..........
سكت.. ماعرفت اش اقول.. ماعندي شي اقوله.. كنت ابي ادخل عليها الغرفه اهديها.. من شوي بس قدرت اضحك معاها.. والحين انخرب كل شي.. نزلت راسي.. وانا في دوامه كبيره ماني عارف اطلع منها.. حسيتهم كلهم ضدي عشانها.. كنت حاس انه احمد بيذبحني على اني خليت لينا مكان لبنى.. حسيت روحي ماني رجال.. فعلا مافي رجال يسويها.. نظراتهم لي اذبحتني وقفت وكنت بمشي.. سمعت لبنى تناديني
لبنى بحده: خالد
خالد: نعم حبيبتي
لبنى: ابي امشي معاك الحين
كنت مصدوم من قرارها.. ما توقعت انها تطلب هالشي.. الكل التفت عليها ويشوفها.. ماهم مصدقين الي اسمعوه منها.. حسيت اني سمعت غلط.. او اني متوهم.. يعني شنو..اش تقصد
ليال بحده: ليه هالقرار
لبنى: كفايه الي صار لكم.. ماني مستعده تصير مشاكل اكثر من جذي بسببي
خوله بحده: مالج طلعه من هنا.. انتي سامعه.. ومشاكلج هي مشاكلنا.. وزوجك اخونا.. ممكن نختلف مع بعض ممكن الاسلوب ما يقنعنا بس يبقا اننا نحب بعض
احمد: روحي غرفتج.. طلعه معاه مافي
لبنى بحده: ماحد يقدر يمنعني.. انا بمشي معاه.. ابي اطلع من هنا
عبدالرزاق بحنيه: ماراح تطلعين لبنى.. بيتطلعين من هنا يوم زواجك.. غير جذي لا
لينا: ماصار شي يستدعي هالقرار لبنى.. وبعدين ماحد زعلان ولا احد متضايق
احمد: الي زعلان فيكم يقول
ليال: عني انا ماني زعلانه
خوله: ولا انا
عبدالرزاق: ولا حتى انا
لينا: شفتي ماحد متضايق.. ولا احد شايل بقلبه غيرج.. ريحي روحج الكل بخير
لبنى تطلع شنطتها: بس انا ودي امشي.. انتو ماقصرتو معاي.. لحد هنا وخلاص.. بنتظركم بكره المسا على العشا في بيتي
لينا: بس انا مالحقت اسوي شي..حتى غرفتج ماوصلت عشان انفذ تصميمي
لبنى بحزن: مايحتاج.. يلا يا خالد
ليال بحده: وين رايحه انتي غرفة نومك لسا ما وصلت على ايش بتنامي اليله
لبنى: ماهو مهم
خوله تمسكها: اشلون يعني ماهو مهم.. مافي طلعه من هنا
لبنى تشوف خالد: يلا ياخالد
سحبني عبدالعزيز وطلعنا من شقة ليال.. طلع احمد وعبدالرزاق معانا.. كنت اشوفهم بحزن وهم كبير.. كنت اسمع صراخ لبنى ماكانت تبيني امشي.. كانت تبي تمشي معاي.. احرجتها بينهم.. خليتها بوضع ماهو حلو ابد.. كسرت نفسها للمره الالف.. عجزت وانا اقول بصلح الامور.. تعبت من محاولاتي اني اكون معاها او اكون حبيبها الي تنتظره.
عبدالعزيز: اش بنسوي بالكلب المربوط عندي داخل
احمد: خلونا نقعده ونسأله
دخلت معاهم شقة عبدالعزيز.. احمد كان حاد مع نواف صحاه من اغمائه بصوره عنيفه.. صحى وهو خايف ومرعوب.. كان يرتجف وهو يشوفنا.. شكله صغير.. بس منين عرف لبنى
احمد بحده: انت من
نواف بخوف: اسمي نواف
عبدالرزاق: ومنين تعرف لبنى
نواف بخوف: من.. من
احمد واحلى كف: منين تعرف لبنى
نواف من الخوف نسى اسم بدر: من زوجها.. أي أي زوجها
عبدالرزاق: واش تبي فيها تلاحقها
نواف ونظراته زايغه: انا.. انا
احمد بحده: انت شنو
نواف: كنت مفكر انها..................
احمد وكف ثاني: مفكر شنو
عبدالرزاق يبعد احمد: ابتعد انت.. نواف رجال طيب وبيقول لنا على كل شي
نواف: بس ما اعرف شي
عبدالعزيز يرفعه من الارض: بخلي دمك يغرق الارض وبدفنك في مكان ماحد يلقاك فيه اذا ماتكلمت وقلت لنا الي نبيه
نواف بخوف: هي هي قالت لي الاحقها..
خالد ينتبه: هي؟!! من هي الي قالت لك
نواف بخوف: اقد هو زوجها قال لي انها وحده تمشي مع الرجال وانها...............
ماتركته يكمل.. اثارتني الكلمه.. تمشي مع رجال!!.. مسكته وصرت اضربه من قلبي.. كنت اضرب من غير رحمه.. احمد وعبدالرزاق ابعدوني عنه بالقوه.. لدرجة اني سحبت شعر راسه بيدي.. وهو صار يصرخ من اوجاعه.. حسيت اني افضي فيه قهري
عبدالعزيز: تكلم يا حلو.. تكلم عشان ما تنضرب من جديد
نواف بخوف: ما اقرب منها بس اتركوني.. ببعد وبحياتكم مابتشوفوني.. بسافر بهاجر.. بس اتركوني
احمد بحده: ماهو قبل مانعرف الي نبيه
عبدالرزاق: انا من رايي اننا نسلمه للشرطه
نواف بخوف: لا الله يخليك لا.. بسوي لكم الي تبونه بستحمل ضربكم بس الشرطه لا.. انا عندي خوات اصرف عليهم
خالد بصراخ: تبينا نخاف على خواتك وانت ماخفت على حريمنا
نواف: انا اسف.. هي قالت لي اسوي هالشي واعطتني فلوس.. اقصد هو هو انا جيت انفذ الي اتفقت فيه معاه.. صدقوني صدقوني.. انا ما اعرفها ولا عمري شفتها

&&&&&&&&&&&&&&&&&

7:30 الليل
بيت حنان ..غرفة راكان..
البحرين

سمر: ديما تقول انه زواجهم بعد بكره
راكان: الله يسعدهم
سمر: ان شا الله عقبالك
راكان: انتي قلتي لها
سمر تبتسم: اكيد قلت لها.. شي وانت تبيه اكيد بسعى فيه
راكان: اكيد رفضت
سمر: بصراحه أي
راكان يبتسم: تعجبني سعيد انها رفضت
سمر: سعيد؟!! والله ظنيتك بتزعل
راكان: ازعل عشان حبيبتي وحده عدله
سمر: اتمنى انك تتزوجها.. تصدق اني احبها كثير
راكان: بس عاد تراني اغير
سمر: لا تصدق روحك عاد
حنان تدخل: اش عندكم
سمر: هلا ماما.. نتكلم عن زواج خالي
حنان: احتمال يكون بكره
سمر بخوف: وجدتي
حنان: اش فيها جدتك
سمر: اكيد بتسوي لها حركه من حركاتها
حنان تضحك: ابوي مهددها
راكان: احسن.. هذي يبيلها جدي
حنان: اموت واعرف انت اش الي عارفه عنها وماتبي تقوله لي
راكان: وماراح اقوله لاحد.. بخليه سر اهددها فيه كل ماشفتها تخرب علاقة خالي بزوجته
حنان: اكيد شي كبير..ونفسي اعرفه
سمر: ماما ماقلتي لي.. فيه ترتيبات بكره
حنان: اكيد فيه ترتيبات
راكان: انا محضر مفاجأه حلوه
حنان تبتسم: شنو يما
راكان: مسوي.......
سمر بدلع: راكان انا اقول عشاني انا اقول
راكان يبتسم: قولي
سمر: جهز الحديقه الي في البيت.. واشترى جلسه تاخذ العقل.. واتفق مع فرقة D J عشان يعملو ليله عجيبه
حنان تحضنه: ياربي يخليك لي.. فرحتني
راكان: ياليت خالتي تفرح بعد
حنان: الله يعوضها الخير

&&&&&&&&&&&&&&&&&&&

8:30 الصباح ..اليوم التالي..
شقة ليال ..غرفة لبنى..
البحرين

الساعه الان 8:30 الصباح.. ليلحين مانمت.. ما غمضت عيني.. كنت انتظر انه يجي.. احس بغصه بحلقي كنت ابي اطلع من هنا.. ليتني اقدر اروح بيت ابوي.. يمكن ارتاح شوي..سحبت شنطي وقلت بطلع بروح بيت ابوي.. ودي اصيح.. مقهوره وقلبي موجوع.. الحين هذي السعاده الي كنت ادور عليها.. هذي الراحه الي كنت اصيح الليالي متحسره عليها.. هذي خالد الي حبيته عمري كله.. قعدت بروحي في الغرفة وماني طايقه روحي.. راح الوقت وانا الافكار تلف براسي.. انتبهت على الساعه صارت 10:00 قلت بطلع ودي اطلع بالسياره اشم هوا.. واريح اعصابي وبروح بيت ابوي ارتاح هناك شوي.. اخذت شنطتي وطلعت للصاله لقيتهم مجتمعين فيها
ليال: صباح الخير على الحلوين
لبنى بحزن: صباح النور
لمى: بدري ياحلو.. صرنا الظهر وانتي من شوي صاحيه
خوله: والله ما اظن شوفي عيونها.. متأكده انج مانمتي البارح
لينا: والله مكبره الموضوع
احمد: وبعدين هالموضوع مايستاهل الي تسوينه في روحج.. كل رجال من حقه يغير على زوجته
خوله: وبعدين هالشي المفروض يفرحج.. حلوه غيرة الرجال
عبدالعزيز: انتي ياسرحانه.. نكلمج
لبنى منزله عيونها: ......................
عبدالعزيز: قعدي طيب خلينا نتكلم مع بعض
لبنى: ماودي اقعد ودي اروح بيت ابوي شوي.. وبعدين انا رايحه مع خالد
ليال: لبنى لا تكبرين الموضوع ماصار شي.. خلينا نفرح فيكي وبعدين اعملي الي تبينه
لبنى: الي يريحني اني اروح معاه اليوم
كنت عنيده برايي وهم يقنعون فيني والكل كان متعاطف معاي ويهديني.. بس انا قلبي موجوع.. حزني ماله حدود.. انتبهت انه دخل علينا الصاله.. قرب مني وابتعدت عنه.. كان قدامهم هالشي وهم يشوفون جفاي له.. جلس وانا واقفه.. كنت مصره اني اطلع وقف وحمل شنطتي.. ومشيت عنهم.. كنت امشي وانا بعيده عن الكون والي فيه.. اتذكر اني ما سلمت عليهم.. كنت امشي وانا جنبه
خالد: حبيبتي وصلت غرفة النوم
لبنى بحده: والغرفه الثانيه
خالد: وصلت بعد.. تبين تروحين البيت
لبنى: ياريت.. ابي اروح وابي اقعد بروحي
كان ساكت.. طول الطريق وانا مادريت عنه.. ولا حتى شفته.. متضايقه منه ومن تصرفاته.. متضايقه اكثر لان امنيتي بالراحه معاه مالقيتها وماشفتها.. وصلنا البيت ونزلت معاه.. حتى ما انتبهت للبيت اش فيه واش شكله.. شفت الدرج وصعدت عليه.. وصلت لنهاية الدرج ووقفت ماني عارف وين اروح.. وصل وراي
خالد: ليش واقفه جذي
لبنى: ابي اروح الغرفه الصغيره
خالد يفتح عينه: من هنا
دخلت الغرفه ودخل وراي.. حط الشنطه واقترب مني.. يمكن هالشي تمنيته من قبل وحلمت فيه.. الحين الضيق الي فيني كرهني حتى بوجوده جنبي
لبنى: ياليت تمشي وتتركني ارتاح
خالد: اشلون اراضيج
لبنى: بانك تتركني عشان ارتاح..انا ما نمت البارح
خالد: من عيوني.. نامي وارتاحي انا هنا بالصاله
لبنى بحده: ابي مفتاح للغرفه
ابتسم وقالي المفتاح تلاقينه بالباب.. طلع ورميت نفسي على السرير رحت اصيح من تعبي من همي من النار الي داخلي.. ليش حظي جذي.. ماتهنيت.. بحياتي ماتهنيت.. يما وينج حتى اسألج الي صار لي ذي كله من السبب فيه.. اول مره احس اني ابي اعرف من السبب في الي انا فيه.. ليش يصير لي جذي.. ليش ماني قادره افرح حتى وانا معاه.. انا في بيته والمفروض من شوي اكون بحضنه.. ليش احس بفرحتي ناقصه.. ليش احس نفسي مكسوره.. زاد التعب الي فيني.. حسيت بعيوني تنقفل.. وغصب عني غمضت عيوني

&&&&&&&&&&&&&&&&&&

11:30 الظهر
فيلا العايله ..جناح غسان..
السعوديه

الجده تحضن العنود: الف مبروك.. فرحت من قلبي
نوف بفرح: مبروك يا حلو
ام سلطان: يا فرحتي يا يما.. الله يتمم عليكي فرحتك
ام غسان: اشربي المويه يما.. من جلستي مابطلتي بكا
العنود تبكي: والله ماني عارفه ليه ابكي
بسمه: ههههههههههههههههه عبط
نوف تضربها: لا تقولي عبط لاختي
مها: هههههههههههههه ايوه لا تقولي كذا ولد اخوي يطلع معقد
الجده: هههههههههههههههه زين كذا قومي اغسلي وجهك لا يطلع الولد معقد لنا
ناصر: اقدر ادخل ولا الحلوه بتمنعني
العنود تقوم له: من ذا الي يقدر يمنعك
ناصر يحضنها: الله يتمم فرحتك..ماتتخيلي فرحتي
نوف: تخيل عاد العنود اكبرت وحامل
ناصر يبتسم: وتخيليها تمشي وهي بالشهر التاسع
نوف: ههههههههههههههههه ودي والله.. بصور فيها وبجلس اتريق عليها
مها: وانا بجلس معك
الجده: ههههههههههههههه الله يجمعنا على الخير يا يما
ام غسان: آمين.. وين غسان
ناصر يبتسم: اقول لكم وين وما تضحكون عليه
ام غسان بخوف: خير يما وينه الان
ناصر يضحك: واقف مع صلاح يمسح دموع الفرح
مها: ههههههههههههههه
نوف: هههههههههههههههه يا حلوه والله
العنود تضربها: لا تتكلمي عن زوجي كذا
ام غسان: خلكم انتو معاها وانا رايحه اشوف ولدي
بسمه: رايحه معاكي يما
ام سلطان: ليه يما.. خليكي معانا
بسمه: معلش خالتي ابي ابارك لغسان وبروح الشغل
نوف: مافي شغل اليوم اجلسي معانا شوي.. من صرنا في بيت واحد وحنا مانشوفك
مها: بسمه الله يخليكي اجلسي معانا اليوم.. اليوم بأوله وما خلصنا تريقه على العنود لسا
ام سلطان تبتسم لها: اليوم تتريقي عليها وبكره نتريق عليك
ناصر: ان شا الله خالتي ودي بهاليوم.. متى بس بتريق على مها
العنود بدلع: وتقول لها زي ماجالسه تقول لي
ناصر: ببهدلها لاجل عيونك
مها بحده: صدق عاد.. يا حلوكم ومن هذي الي بتسكت لكم
نوف: انت محسبها العنود الي بتجلس تبكي.. هذي مها والله ما تفكك من لسانها
مها تضربها: بس يا بنت لا يخترب مستقبلي
ام سلطان: هههههههههههههههه لا يما ما يخترب مستقبلك باذن الله مضمون
مها: اشوفك واثقه.. لا يكون جايبتلي معرس
ام سلطان: ماراح اقول لك
الجده: ههههههههههههههههه وانتي يعني ماتبين
مها منحرجه: تراني امزح لا تقلبوها جد
ناصر: ههههههههههههههههه الان صار مزح
ام سلطان: ايش رايك يا بسمه
بسمه: في ايش خالتي
ام سلطان: في زواج مها
بسمه: الله يكتب لها الخير.. طول عمري اتمنى لها حياة سعيده
نوف: اجل نتوكل على الله
بسمه: اسمحولي بشوف امي
مها تمشي معاها: وانا بعد
الجده: توكلي على الله يا يما.. اليوم كلمي ام غسان
ام سلطان: ان شا الله
نوف: زمان صلاح وعمي بوسلطان يكلمو غسان الان
ناصر: عشان كذا تركتهم وجيت للحلو افرح معاه
العنود بهمس: انا خايفه
ناصر بهمس: من ايش
العنود بهمس: ولدي يموت
ناصر يبتسم لها: اجل ليه حنا عايشين مع بعض.. وليه الحراسه كبيره على الفيلا.. وليه مانسيبكم لحظه
العنود تحظنه: يعني ماراح يصير عليه شي
ناصر بهمس: توكلي على الله انتي بس.. ان شا الله نلاقي الخير
الجده: ماقصرتي يا ام سلطان.. والله ان مافي منك
ناصر ينتبه: على ايش
الجده: وانت ايش دخلك.. موضوع بيني وبين خالتك
ناصر: افا يما
ام سلطان: وانا بعد اقول لك لا تتدخل في شي مايعنيك
ناصر يفتح عينه: وانتي بعد.. لا الموضوع ذا لازم اعرفه
الجده: شوف الي يقول لك عليه
نوف: هههههههههههههههه والله لو ايش تعمل ما تقدر تاخذ منهم لا حق ولا باطل
ناصر: شفتي يالعنود.. حنا نجتمع في بيت واحد عشان نعلاج مشكله.. وتطلع لنا مشاكل اكبر ماندري عنها
نوف: ههههههههههههههههه
الجده بغضب: وخري يا ام سلطان ضاربته ضاربته
ام سلطان تمسكها: يا يما سيبك منه هذا بيموت ويعرف حنا اش نتكلم فيه.. وبعدين انتي ايش قاهرك.. نسوي الي براسنا وبيلقى نفسه غصب عليه ينفذ
ناصر بحده: والله والثقه.. ناصر بينفذ لكم الي انتو تبونه.. الله لا يخيب رجاك ياخالتي.. ماعرفتي ناصر
العنود: هههههههههههههههههه.. ما اعرفوك يا ناصر
الجده: قلت لك وخري عني خليني اضربه
ام سلطان تضحك: والله انك بتتعبي نفسك على الفاضي.. لا تحرقي اعصابك يما.. واتركيه
الجده تغير رايها: صدقتي.. خليه
ناصر: امشي قبل لا يجنوني
نوف: وين تروح والله وناسه

&&&&&&&&&&&&&&&&&&

4:30 العصر
فيلا خالد ..غرفة لبنى..
البحرين
خالد بحنيه: لبنى.. لبنى
لبنى تقوم مفزوعه: اش صار
خالد يمسك كتفها: ماصار شي.. حبيبتي احنا العصر وقلت اقعدج
لبنى: اشلون دخلت انا قافله الباب
خالد يبتسم: كان مفتوح يا روحي.. قومي لا تنسين العشا.. الجماعه جايين
لبنى تنتبه: انا نسيت اقول لحنان
خالد: قلت لها ياروحي.. وجايه بالطريق
ظلت ساكته ومنزله عينها.. كنت ابي اقترب منها.. بس حزنها منعني.. كنت اشوفها بشوق.. ودي اقترب منها.. احضنها.. بس ما اتركت لي مجال.. ليلحين زعلانه علي.. فضلت اني اطلع عنها.. طلعت ورجعت الصاله.. ظليت شوي ودخلت عليها الغرفة مره ثانيه لقيت شنطتها مفتوحه.. وملابسها مجهزها.. سمعت صوت الشور.. رجعت لغرفتنا وطلعت من الخزانه علبة الذهب.. رجعت غرفتها وخليت العلبه جنب الفستان الي جهزته.. كنت بطلع بس ما قدرت.. رجعت ومسكت الفسان ورحت اشمه.. ليش حظي معاج جذي.. المفروض اني اسعدج.. غصب علي اضايقج وازعلج.. المفروض انج عروس.. ماقدرت حتى احسسج بهالشي.. تركت الفستان وطلعت للصاله.. كنت فاتح التلفزيون بس كان بالي مشغول فيها.. اشلون اقدر اراضيها.. اشلون اقدر انسيها همها.. سمعت جرس الباب.. اكيد حنان.. رحت افتح.. لقيت امي قدامي.. من شفتها حسيت بضيق.. حضنتني وباستني ودخلت
ام خالد: وين الحماره
خالد بحده: يما
ام خالد: عشتو ان شا الله منت راضي عليها
خالد: يما الله يخليج لا تعصبيني
ام خالد: تزوجت ولا ليلحين
خالد مستغرب: .............................
ام خالد بحده: رد علي
تركتها ومشيت عنها.. ماني ناقص.. كان ودي اقول لها تمشي وتتركني.. كان ودي ما اسمع كلامها خصوصا هاليومين.. رحت للتلفون واتصلت على حنان.. كنت اترجاها تترك الي بيدها وتجيني تلحق علي.. هذا وامي ضيفه عندي.. لو كنت ساكن معاها اش بيصير فيني.. سمعت صوت لبنى تناديني
لبنى: خالد
خالد: نعم حبيبتي
لبنى: حنان جات
خالد بضيق: هذي امي الي جات
لبنى تتصنع الفرح: اخلص واجي بسرعه
كنت عارف انها تمثل.. بتمثل على الكل الفرح وهي بداخلها حزين.. كنت جالس مع امي وتفكيري مع لبنى.. ودي اروح لها وهي تتجهز.. ودي اطبع احلى بوسه.. من حقي.. وقفت بركب لها.. شفتها نازله.. عيوني تعلقت بها.. رائعه.. ناعمه.. وصلت عندي وسلمت على امي واجلست.. جلست جنبها وانا فرحان بها وبرقتها
خالد: طول عمرج حلوه
لبنى تبعد عيونها عنه: شكرا
ام خالد بقرف: والله يا لبنى تمنيت ازوج خالد بنت.. افرح فيه وفي عرسه من جد.. ماهو وحده متزوجه وجايه الحين تاخذ وحيدي
لبنى تبتسم: من طيبج
ام خالد: حطيه في عيونج.. هذا خالد.. ولدي انا
خالد: حاطتني في عيونها يما.. لبنى مافي مثلها
ام خالد: في الاحسن منها.. بس انت عمي يما
لبنى تقوم: اجيب لج عصير خالتي
ام خالد: قعدي مكانج مابي منج شي.. تسحريني مثل منتي ساحره ولدي
خالد بضيق: يما اش هالكلام
لبنى: انا في المطبخ بجهز لجية الجماعه
عارف انها جايه عشان تنكد عليها.. وماتدري انها متنكده جاهزه.. وصلت حنان.. وسمر جات تركض سلمت علي واحضنتني.. طولت بحضنها.. احبها هالبنت دوم احسها حنونه علي.. تحبني اكثر من ابوها حتى
سمر: وين خالتي
خالد: في المطبخ
سمر: عروس وفي المطبخ!!!.. مايصير جذي ياخالي المفروض انك تدلعها
ام خالد بقهر: احنا عرسنا وثاني يوم العرس كنا نشتغل مثل الشغالات لرجالنا
سمر: هذاك زمانكم يما.. الحين غير
خالد: وين رايحه
سمر: بروح لخالتي
خالد: حنان وين
سمر: مجهزه مفاجأه هي وراكان.. جايين وراي
ام خالد: مانبي مفاجأت ولا غيره.. قولي لهم يجون يقعدون احسن لهم
سمر وهي ماشيه: اذا ماهو عاجبج تقدرين تروحين البيت
ام خالد: قليلة حيا.. تربية ابوج يالحماره
خالد بحده: يما يما ليش تتكلمين جذي
ام خالد: مقهوره عليك يما.. كان ودي ازوجك زواج عدل
خالد بحده: وانا متزوج زواج مقلوب يعني
ام خالد: بس هالبنت ماتناسبك يما.. ودي اني ازوجك وحده على كيفي
خالد بحده: اش اسوي فيها هذي الي على كيفج.. انا ابيها على كيفي
حنان تدخل: لا حول ولا قوة الا بالله.. يما الولد توه متزوج.. صراخه واصل لبرا
ام خالد: بس جيتي الحين انتي وياه علي
راكان بحده: وانا بعد هنا لا تنسين
لبنى تطلع من المطبخ: حنان يا قلبي وصلتي
حنان تحضنها: ياروحي انتي.. مبروك يا عروس
لبنى بحزن: الله يبارك فيج ان شا الله نفرح بالعيال
راكان يبتسم: دامج انتي الي بتخطبين لي بعرس من بكره
ام خالد: ربي نفسك الاول وبعدين فكر في الزواج
لبنى تمسكه من يده: تعال معاي مجهزه عصير بيعجبك
راكان يروح معاها: تسلمين خالتي جا في وقته.. انا متربي جدتي اكثر من غيري
حنان بحده: وبعدين.. وبعدين.. متى بنخلص من الي تسوينه
ام خالد: لين يطلقها ويتزوج الي ابيها
حنان: تزوجيها انتي.. خالد يحب لبنى.. وخلاص تزوجها
ام خالد: على جثتي زواجه
خالد: بس انا تزوجت يما.. وانتظري كم شهر وحفيدج يوصل
ام خالد بحده: الله لا يربحها الكلبه بنت الكلبه
حنان: الافضل اني اتصل في ابوي.. اذا سكت اكثر من جذي بتذبحنا بتصرفاتها
تركتهم ومشيت.. زادت همي.. الكلام الي قالته يقتل الفرح في القلب.. ليش تكرهها جذي.. ودي اعرف ليش تكرهها.. رحت للمطبخ وشفتها مع راكان وسمر.. كنت اسمع ضحكها.. حسيت براحه من سمعت ضحكها.. نسيت همي والكلام الي قالته امي.. كنت واقف عند الباب وانا اشوفهم
راكان: عن الدلع وجيبيه
سمر بدلع: خالتي شوفيه
لبنى: هههههههههههههه ياراكان خذ غيره
راكان: لا ابي هالكاس.. انتي عطيتيني ياه.. وهي خذته مني
لبنى: ههههههههههه طيب خلاص بعطيك كاس ثانيه بس اترك اختك
راكان: ابي فيه عصير مابي تعطيني ياه خالي.. عن البخل عاد
لبنى تضربه: ههههههههههههههههه انا بخيله
سمر تحضنها: مستحيل هالجمال ذي كله وتكونين بخيله
راكان: يعني الجمال بيبعد البخل
سمر: مالك شغل.. ما شا الله عليها اليوم تجنن
راكان: في هذي صدقتي.. يا بختك يا خالي
لبنى تضربه: بس ياولد لسانك
سمر: باخذ العصير لهم خالتي
لبنى: لا ياروحي ثقيل عليج.. انا اخذه
راكان: لا انا اشيله.. الرجال مهمته يشيل الاشيا الثقيله
ضحكت عليه.. قبل ما كانو يحبونها الحين متعلقين فيها وما يرضون عليها.. التفتو على ضحكي وشافوني وافق.. لبنى نزلت عينها.. وسمر وراكان مشو واتركونا بروحنا
خالد: ما اقدر اوصف جمالج
لبنى: ..........................
خالد يفتح ذراعه: ممكن
لبنى تبتعد: تأخرنا عنهم خلنا نمشي
كنت ابي اقترب.. بس اصرارها انها تبتعد يخليني ابتعد عنها..محسستني بالذنب لاني قطعت فرحتها.. استاهل الي يصير لي.. انا الغلطان.. تسرعي هو سبب الي انا فيه
خالد يمسك يدها: انتي عارفه انج حبي.. وعارفه انج حبيبتي.. انا مالي غيرج.. اذا زعلتي علي ومابغيتيني وين اروح؟
لبنى تنزل راسها: .......................
خالد يبوس يدها: احبج

&&&&&&&&&&&&&&&&&&

7:00 الليل
فيلا لافي ..غرفة عبير..
لندن



عبير على التلفون: تأخرت
عبدالرحمن: حبيبتي اش اسوي.. مافي حجوزات عندي.. وصاحبي ماهو مقصر.. بس مافي
عبير: عبدالرحمن
عبدالرحمن: عيون عبدالرحمن
عبير: احجز على ديره ثانيه ومن هناك تعال لندن
عبدالرحمن: وافترضي مايكون فيه حجوزات عندهم.. حبيبتي طولي بالج شوي.. من شنو خايفه انتي بس
عبير: ماهو خوف.. احس روحي بتطلع
عبدالرحمن: تعوذي من ابليس بس.. قومي صلي ركعتين وانتي ترتاحين من الهم الي انتي فيه
عبير: اصلي!!!!
عبدالرحمن: أي حبيبتي.. عبير خلج معاي على الخط شوي
عبير بخوف: وين تروح
عبدالرحمن: امي تنادي.. بشوفها وبرجع لج
عبير: لا تتأخر
عبدالرحمن يفتح الباب: هلا يما
ام عبدالرحيم: امي انت.. ليش حابس روحك بغرفتك
عبدالرحمن: ولا شي يما معاي تلفون
ام عبدالرحيم: من يما
عبدالرحمن: واحد من الربع
ام عبدالرحيم: بدل منت تتكلم في التلفون معاه جذي قوم اطلع روح معاه أي مكان غير جو يما
عبدالرحمن: فكره.. الحين بقول له
ام عبدالرحيم: جعان يما اجيب لك شي تاكله
عبدالرحمن: لا حبيبتي ماني حاس بجوع
ام عبدالرحيم: الله يخليك لي وافرح بزواجك
عبدالرحمن يبتسم: الله يخليج لي يالغاليه
ام عبدالرحيم: انا بروح لساروه
عبدالرحمن يقفل الباب: هلا عبير تأخرت عليج؟
عبير مستغربه: امك ماتدري انك رجعتني!!
عبدالرحمن: ليلحين ماقلت لهم.. بخليها مفاجأه
عبير بخوف: وافترض انه هالمفاجأه ما اعجبتها
عبدالرحمن: لا تخافين انتي في بيت وهي في بيت ثاني
عبير تبتسم: الحمدلله.. انا ما ابي مشاكل كفايه الي انا فيه
عبدالرحمن: لا تخافين ياروحي.. انسي المشاكل دامج معاي
عبير بقرف: من جد حبيبي
عبدالرحمن بفرح: ياحلو هالكلمه منج يا عبير.. انتي الي حبيبتي وروحي
عبير: عبدالرحمن ابي اطلبك
عبدالرحمن: آمريني
عبير: ابي اذا جيت قطر اشتغل
عبدالرحمن بحده: وانا اش مهمتي اذا انتي اشتغلتي.. اجلس ادير بالي على البيت لين ترجعين
عبير بحنيه: حبيبي.. انا طلبتك ما ابي اجلس في البيت بروحي.. بمل يا قلبي.. ابي املي وقتي.. حتى ما افكر في الي كنت فيه
عبدالرحمن: لو تقولين لي اش فيج

&&&&&&&&&&&&&&&&&&


يتبع