بارت رائع كما عودتنا دانه...ومختلف جدا
ظهور أشخاص جديده علي الساحه....نسجتيهم بمهاره
أتوقع أن حنان وخالد أولاد منصور الصائغ...فما علاقتهم بليال
وما الذي يدبر له الخسيس لافي ...
سلامي لكي
وتحياتي

السلام عليكم ورحمة الله وبركاته



لكل محبي (علمتني) البارت 17 بعد قليل ........


مع تمنياتي لكم بقراءة ممتعة .............
9

الجزء السابع عشر



12:00 الصباح
في المطعم .. طاولة خالد..
البحرين



راكان: ههههههههههههههه عجبتني
سمر بضيق: اكيد يعجبك.. انتو على طول جذي
خالد: وانتي اش قاهرج
سمر: كنت تقدر تخليه يمشي من غير لا تبهدله يا خالي.. بروحك تقول انه بدنيا ثانيا يعني اكيد عنده مصيبه من مصايب الزمان.. تقوم تزيده
حنان: سمر معاها حق.. الي سويته غلط
راكان: ماهو غلط.. ليش يعاند معاه.. اساسا المفروض ان خالي يشتكي عليه.. مايتركه جذي
سمر بعصبيه: صح انت صح
خالد: وانتي ليش معصبه جذي
سمر: افترض ان ابو هالرجال مات.. افترض امه بين حيا وموت.. افترض واحد من عياله تعبان وهو ماعنده فلوس حق الدوا.. افترض اشيا كثيره.. ممكن يجي يوم وتكون انت بمكانه شنو شعورك اذا احد تعامل معاك جذي بالشارع
خالد: طيب يبا آسفين أسفين.. واذا شفته مره ثانيه لج علي ابوس راسه واعتذر منه
راكان: من جدك انت!!!
خالد: بصراحه اقنعتني
راكان: هذي رقة حريم.. يعني كلام فاضي
سمر: رقة الحريم ماهي كلام فاضي ياراكان
راكان: الا كلام فاضي ودلع بايخ.. الحق مع الخال وانا لو منه ما اتنازل
سمر تلف راسها: هذي رايك
راكان مستغرب عليها: سمر ليش زعلتي مني جذي
سمر: عشان ساعات تحسسني انك مغرور ومافي في الكون غيرك.. مع ان مافي اطيب منك
راكان: طيب هذي الي مخليج تزعلين مني
سمر: ماني زعلانه قلت لك هذي رايك
حنان: خلاص يا عيال احنا بمكان عام
سمر توقف: انا جعت بقوم احط لي اكل
راكان يوقف معاها: انا قايم معاج.. المكان كله رجال
سمر تبتسم: شفت.. احب رجولتك وخوفك علي
راكان يمسك يدها: امشي طيب
خالد: نسخه مننا
حنان: بكل شي.. الفرق انك الصغير وراكان الكبير
خالد: الله لا يحرمني منهم
حنان: ماودك تجيب عيال مثلهم وتفرح بهم
خالد: تبين الصراحه لا
حنان: يعني لازم الام تكون لبنى.. مايصير تكون غيرها
خالد: ودي اعرف ليش اتركتني.. بموت واعرف
حنان: اذا اقنعت روحك انه ذي نصيب.. بتنساها
خالد: جربت وما قدرت
حنان تنتبه: الحق راكان يتخانق
خالد يفز: قعدي مكانج لا تتحركين

عند راكان

راكان يفك روحه: حلفت اني ماقصدت.. والله العضيم غصب علي
الولد يمسكه من جديد: انا شايفك بعيوني
ركان يمسكه بقبضته: لا تحسب اني ضعيف مابقدر ارد عليك.. انا مقدر انك معصب والوضع صار غصب علي.. ماقصدت.. والله ما انتبهت عليها
احمد يبعدهم عن بعض: بس انت وياه.. فكو بعض.. ماصار الا الخير.. من متى نتفاهم باليد ها
الولد: انت ما شفته كيف لمس اختي
احمد: الولد كان راجع وراه من غير لا ينتبه صدمها وعشان ما تطيح مسكها هذي الي صار.. وانا شايفه.. وبعدين لو غلط انا الي كنت بهدلته لك.. اختك بنتنا بعد واحنا مابنرضى بالغلط
راكان: وبعدين انا معاي اختي.. والله العضيم اني ما انتبهت لاختك
خالد: خير خير
احمد: خير ياخوي ما صار شي.. ارجع لاهلك.. سوء تفاهم وارجعو احباب ماصار شي
راكان: هذا خالي يا خوي
احمد: انا اسف حسبتك ومن هذول الفضوليين
خالد: ماصار شي.. اش فيهم
احمد: يلا انت وياه سلمو على بعض.. ماصار الا الخير
الولد يسلم: اعذرني هذي اختي مالي غيرها
راكان: الله يخليكم لبعض.. بس والله ما انتبهت لها
الولد: حصل خير
سمر تلزق بخوها: خلنا نمشي ما ابي اكل
راكان بحنيه: ماصار شي.. تعالي تعالي
خالد: ماقصرت يا خوي
احمد: لا تقول جذي
خالد: اسمي خالد
احمد: اخوك احمد
خالد يبتسم: فرصه سعيده
احمد: انا الي اسعد.. اعذرني ارجع لاهلي
خالد: خذ راحتك

على طاولة احمد

منير: خلاص
احمد: أي خلاص
لينا: يما اذبحو بعض قبل لا يسمعون ايش صار من بعض
احمد: صغار ودمهم حامي.. وبعدين حلو انهم رجال وهم بهالسن.. يدافعون عن عرضهم
لمى وهي سرحانه: حلو هالاحساس الاخ يدافع عن اخته
عبداللطيف فهم عليها: واكيد جربتي هالاحساس معانا وحنا ندافع عنج
لمى تنتبه: ها.. أي اكيد الله يخليكم لي
احمد: وانتي الوووووووو وين وصلتي
ليال تنتبه: معاكم
احمد: تراني قمت ورجعت قعدت حسيتي فيني
ليال بضيق: ها.. اي انتبهت
لينا: اكيد وحشتج خولوه ام لسان
ليال: محمد حرارته مرتفعه شوي
عبداللطيف: وشافه دكتور؟
ليال: ايوا اخذناه وعطانا ادويه ومحتاج لكمادات
منير: اقول عمتي انتي وياها.. ترانا ربحنا قضيه مهمه اليوم وطالعين نفرفش.. هذي سرحانه وهذي الضيق ماليها.. وانت عمي يالي هناك ساكت من تخانقو العيال
وليد ماهو طايق روحه: اشوفك نسيت حالك تكلم الحريم عادي
منير: والله دامي محسبهم خواتي ليه ما اكلمهم عادي
احمد: اش فيك يا وليد
وليد بضيق: سلامتك ياخوي
عبداللطيف: هذا انت قلت يا خوي يعني عندك اخوان يخافون عليك ويحبونك.. ماهو ضروري يكون اخوك ولد امك وابوك.. انت ولمى حالتكم وحده.. يا حلوين عيشو الدنيا اش فيها يستاهل
ليال: عبداللطيف معاه حق.. اذا بتجلسو تبكو على الي فات وتقولو ياليت.. عز الله انتهى العمر وانتو ما انبسطتو فيه.. شوفو الي بيدكم وقدام عينكم.. ولا تضيعو الي بين يدكم وانتو منتو حاسين فيه
لينا: اشوف قمتي تعطين نصايح وانت من جلستي وانتي متكدره
ليال: والله اعذروني انا قلت اطلع معاكم اعرف ادق التفاصيل الي صارت مع لافي.. بس انا حاسه ان اهلي ماهم بخير
احمد: تبين تروحين لهم
ليال: والله ما ادري
احمد: اتصلي عليهم وشوفي ايش عندهم
الجارسون: معذره
عبداللطيف: خير ياخوي
الجارسون: حضرتك السيد احمد
احمد: انا احمد خير
الجارسون: السيد خالد داز لك هالكيك ويقول لك شكرا مره ثانيه
احمد مستغرب: وعلى شنو ماصار شي!!!!!
عبداللطيف: وين رايح
احمد: اشوف هالمتفرغ

&&&&&&&&&&&&&&&&&&

1:45 الصباح
في المستشفى ..غرفة نوف..
السعوديه



غسان برا باب الغرفة: مالك
العنود بخوف: ما ابي ادخل
غسان يمسكها: فيكي شي
العنود ترتجف: ما ابي ادخل
غسان يحضنها: قوي قلبك اختك محتاجه لك
العنود بعيون زايغه: خايفه اشوفها
غسان: ضروري تكوني قويه حتى نوف تقوى معاكي
العنود: صح.. دقيت على ناصر؟
غسان: هو بالطياره الان اول مابيوصل بدق عليه مره ثانيه
سوسن توصل: السلام عليكم
العنود تحضنها: هلا
سوسن: شفتيها
العنود: لا لسا
سوسن: من معاها
العنود: ما ادري.. انا متردده ادخل
عبدالله: ايش هالكلام.. يلا ادخلي تطمني عليها
غسان: خلنا ندخل كلنا حتى ماتخاف
عبدالله: يلا

داخل الغرفه


منال: وعليكم السلام
سوسن: كيفها
منال: مثل منتي شايفه.. عيونها زايغه وفي دنيا ثانيا
العنود تحضن نوف: نشرب من الكاس الي شربت منه ليال
سوسن: عنود ايش هالكلام.. اختك محتاجه الي يعينها
غسان: وين صلاح يا اختي
منال: مع الدكتور ياخوي
سوسن: وسلطان وين؟
منال: منيم بالقسم الي جنبنا
غسان: اصابته بليغه؟
منال: تقدر تقول كذا
عبدالله: خلينا نروح له
غسان: استنى خلي صلاح يجي.. مابي اترك الحريم لحالهم
العنود: كلميني طيب ردي علي.. لا تظلي ساكته كذا
سوسن: نوف انتي مؤمنه بالله.. لا تعملي بحالك كذا.. انا كمان راح مني جنين لاتنسين
منال: نوف يا قلبي تحسي بشي
صلاح يدخل: السلام عليكم
غسان: هلا ياخوي
صلاح معصب: هلا ياخوي
عبدالله: طمنا
صلاح معصب: ايش تبيني اطمنك فيه.. زوج خالتك المحترم ذبح ولدي وبغا يذبح بنته.. واخوي مرمي اصابته خطيره
غسان: خلك مع الحريم رايحين نتطمن على سلطان وجايين
صلاح: خذ راحتك انا باقي هنا
عبدالله وهم طالعين: نتطمن على سلطان وجايين
صلاح بحده: سوسن.. كلمتي ليال
سوسن بخوف: مين ليال؟!!!
صلاح بحده: ايش تبين تخبين اكثر.. كلهم عارفين ان ابوهم واحد ظالم حقير مايسوى يعملو له حساب
منال: اهدى يا خوي وكل امرك لله
العنود تقوم من مكانها: الضر ماهو لك لحالك
صلاح يقعد جنب نوف: عارف هالشي
سوسن: الدكتور ايش قال لك عن نوف
صلاح: صدمه عصبيه.. حبيبتي ردي علي
نوف: ...........................
العنود: يعني اختي بخير
صلاح: من الناحيه الجسديه بخير.. بس النفسيه مثل منتي شايفه
العنود: هو ضربها؟
صلاح: عطاها حبه من نوع الي يسقطو الاجنه
العنود تبكي: حسبي الله ونعم الوكيل
صلاح يحضنها: نوف قلبي ليه ماتبكين.. حبيبتي الولد راح يجي غيره.. انسي كل شي صار
العنود تبكي: ليه ماترد
منال: عنود ماله داعي الخوف اختك معاها ردة فعل بس.. يومين وترجع احسن ماكانت.. تطمني
سوسن: هذي ليال تدق
العنود: انا بكلمها
صلاح يفكر شوي: لا.. ماهو الان استني حتى اقدر اكلمها واقول لها.. هي ماهي جنبنا مانعرف ايش ممكن يصير فيها اذا عرفت
سوسن: ارد ولا لا
صلاح: ردي وقولي لها اننا بخير واضحكي معاها

&&&&&&&&&&&&&&&

2:00 الصباح
في المطعم ..طاولة احمد..
البحرين


لينا: تطمنتي عليهم
ليال بضيق: الحمد لله
حنان: الحمدلله وانتي بهالضيق؟!!
ليال: والله يا اختي الي اسمعه غير عن الي يقوله احساسي
حنان: واحساسك متعلق بهم جذي
لينا: احساسها قوي بأهلها كثير
حنان: من متى مارحتي لهم
ليال: من مده بسيطه كنت عندهم
حنان: تعرفين نتبع رجالنا وين مايروحون واذا صار الجد نكره روحنا اننا تركنا اهلنا وجينا معاهم
لينا: ههههههههههههههه معاج حق
احمد بحده: وين الحق الي معاها فيه!!!
لينا تغمز له: هي تقصد ان ليال متزوجه بحريني وتاركه اهلها عشانه
احمد: اها
خالد: اشوفك احتديت
عبداللطيف: لانه خاطب ما صار له فتره
خالد: اهااااااااا
منير: هههههههههههههههههه عاد تعرف الي توهم خاطبين يبون الحريم تركض وراهم وين مايروحون
حنان: الله يعينج عليه يالينا
لمى: وتخيلي ان شغله بالكويت.. يعني بتترك اهلها عشانه
لينا بخوف: احمد
احمد بحنيه: هههههههههه انا وعدتج
حنان: عيني يا عيني
سمر: ماما انا بمشي مع راكان
خالد: ليش يبا
سمر بملل: خالي خلاص
خالد: خلاص ياروحي نمشي كلنا
عبداللطيف: يارجال لسا بدري
خالد: معلش البنت شكلها تعبت وما ابي اسهرها اكثر من جذي.. يلا يا حنان
حنان: والله العقده معاكم حلوه بس اعذروني
لينا: تشرفنا فيج اختي
حنان: الشرف لي حبيبتي
ليال: سعيده بمعرفتك
حنان: والله وانا اسعد
لمى: احنا اخذنا رقم تلفونج وبنتصل
حنان: انا الي بسبقكم وبتصل ابي اشوف ابوي بكره وان شا الله بعد بكره اعزمكم على العشا في بيتي
خالد: هذي الكلام الحلو

&&&&&&&&&&&&&&&&&&&

2:30 الصباح
في بيت ابولبنى ..غرفتها..
البحرين


لبنى على التلفون: انت اكيد مجنون يا بدر منين اعرف رجال حتى اطلع معاهم.. استحي على وجهك هالكلام ماهو لي
بدر بغضب: تعرفين اذا عرفت انج كنتي مع واحد بس.. واحد بس بقلب حياتج جحيم تسمعيني
لبنى: انا تعبت وانت ما تعبت!!!
بدر: كسرتيني بين الرجال انا تخونيني انا
لبنى: والله العضيم الي تقوله غلط.. ليش ماتبي تفهم.. 6 سنين وانا عايشه معاك ماشفت يوم حلو فيهم.. حرام عليك انا تعبت الهم هد حيلي.. شبابي راح.. روحي ماتت احس اني عجوز عدت ال 70 حرام عليك الي تسويه فيني.. خاف الله
بدر: انا اخاف الله.. انتي خافيه
لبنى: وين تخافه وانت سكران وين تخافه والورق ولعب القمار ماتتركه وين تخافه وانت تتبلى علي في عرضي.. حرام عليك بس عاد.. استحملت كثير وكل مره اقول انك بتتبدل بتتغير.. مافي فايده انا خلاص كارهه حياتي وعيشتي لو ماهو خوفي من الله كنت انتحرت من زمان.. الي اذوقه من يدك ماهو شوي.. ضرب وبهدله كل يوم.. بدر خلاص.. طلقني ابوس يدك خلاص مافيني على ذي كله
بدر: اطلقج عشان تروحين له يا خسيسه
لبنى بغضب: من الي بروح له
بدر: الي كنت معاه طول اليوم
لبنى: انا مع ابوي طول اليوم
بدر بحده: كاذبه.. كنتي مع رجال غيري.. اش كنتي تسوين.. ليش كنتي معاه
لبنى: اللهم اسألك الصبر على هالمصيبه.. يا حقير انت شفتني بعينك سمعت احد يقولك انه شافني
بدر: لا بس احساسي يقول لي جذي
لبنى: طز فيك وفي احساسك.. انا حياتي متدمره عشان احساسك المريض.. يا اخي روح تعلاج وارحمني
بدر: عندج الليله بس بكره انتي عندي في الشقه
سكرت الخط بوجهه وانا كارهه روحي وحياتي ليت حياتي تنتهي.. يارب انت عالم بحالي وضيقي فرج ضيقي.. او خذ عمري.. تعبت ياربي وانت اعلم بتعبي.. ما بقى لي شي ياربي مابقى

&&&&&&&&&&&&&&&&&&&&&&&

12:20 الظهر اليوم التالي
فيلا لافي ..الصاله..
لندن

عبير: ارتحت الان
ناصر بريبه: تصدقين لا.. لاني عارف انك قذره.. ماني مصدق التقرير الي بين يدي
عبير تبتسم: تحب تعيده من جديد
ناصر: وين زوجك
عبير: بعطيك رقمه ودق عليه
ناصر يناظرها بحده: ليه ابوكي زوجك بسرعه
عبير: رجال وزين وعنده فلوس بيعيشني مرتاحه العمر كله.. ليه ما اتزوجه بسرعه
ناصر: ابوكي عارف اني راح اجي ليه ما استنى جيتي
عبير: انا الي طلبت منه يعجل.. تبي الصراحه مايشرفني وجود واحد مثلك بملكتي
ناصر واحلى كف: طول عمرك قليلة حيا.. وانا الي تارك اهلي وجاي الحق عليكي.. طول عمرك خسيسه ووسخه عارفه كنت اتمنى من جد اني اكتشف انك منتي بنت.. ساعتها ماراح احس بالشفقه عليكي.. انا جيت حتى اتأكد من الي براسي بس.. اكثر من كذا انتي ماتهميني
عبير ماسكه خدها: ماراح اخليك تتهني بحياتك ناصر.. ماشبعت وانت تضرب فيني سنين.. اليوم جاي عشان تكمل الي حفظته لك ليال تصدق انت تلميذ شاطر جدا.. تحفظ الدرس بسرعه
ناصر واحلى كف ثاني: تهدديني يا كلبه.. حياتي دمرتيها.. كأني واحد من الشارع ماني اخوكي
عبير: فعلا انت بالنسبه لي واحد من الشارع.. عمرك ماكنت اخوي
ناصر وكف ثالث: راح اجرك معاي على السعوديه واحبسك هناك لحد ماتعفني.. راح اصبحك بضرب وامسيكي بضرب لحد ماتتربي ماتقولي اني حفظت الدرس.. بوريكي كيف حفظت الدرس تمام
عبير بصارخ: محسب انو بابا بيسكت
ناصر يجرها من شعرها: بابا الي تتحامي فيه.. بكره هو الي بيخليكي تتمني الموت.. اوعدك
عبير تتوجع: مستحيل بابا يحبني اكثر منكم
ناصر: اجل ماعرفتي لافي بن فهد.. لافي بحياته ما حب غير نفسه.. احفظي الكلام ذا كويس.. تذكري باليالي الي كان يدخل عليكي فيها ايش يقول لك وايش يعمل معك.. ههههههههههههههههه راح تعرفي قدرك عند لافي كويس.. انتي مجرد زباله عنده ماهو اكثر.. ويوم الي بيعرف انك تشكلي خطر عليه بيرميكي حالك حال جاكلين.. تذكري جاكلين
عبير بحده: ماراح يلحق انا عارفه انا ايش اعمل.. ماهو انت الي بتعلمني ايش اعمل
ناصر بحده: ما ابي اسمع لك صوت ..الو
غسان: ناصر
ناصر: هلا والله كيف الامور عندك
غسان: ماتسر.. ابيك ترجع بسرعه
ناصر بخوف: ايش صار
غسان: نوف سقطت
ناصر فاتح عينه: وهي كيفها الان
غسان: جسديا بخير.. بس نفسيتها صعبه مره
ناصر: من ايش ؟!!!
غسان: اقول لك سقطت جنينها
ناصر بحده: غسان ماني غبي.. من ايش ذا كله
غسان: افضل انك تكون بالسعوديه بأسرع وقت.. اترك الي بيدك.. الي هنا اهم
ناصر: انا بتصرف..مع السلامه
عبير تستفزه: ههههههههههههههه شكلك لقيت ليال وعايش معاها.. اكيد تعبانه لانك بعيد عنها.. مسكينه ليال ماتقدر تتركك ثانيه.. روح الحق عليها.. اكيد فراشها بارد بدونك
ناصر وكف ولااروع: حقيره.. زباله

&&&&&&&&&&&&&&&&&&&

1:15 الظهر
في الفندق.. وحده من الغرف..
لندن

ناصر بحده: ابيك تقول لي الان
صلاح بحده: ماهو وقت عصبيتك تراني ماني رايق.. لا تزودها معاي ماني طايق حالي.. ارجع وتعرف الي صار
ناصر: ابي اكلمها
صلاح بضيق: ماهي راضيه تتكلم.. عشان كذا اقولك ارجع يمكن اذا شافتك جنبها تنطق.. بنهبل على زوجتي حالها مقطع قلبي.. ليتني اقدر اعمل شي.. ياليت
ناصر: انا راجع كلمت واحد ما اصدقاي وبيحاول اني ارجع على طيارة بكره.. بحاول على قد قدرتي.. ناصر الله يخليك خلي التلفون على اذنها على الاقل
صلاح: حاضر.. نوف حبيبتي هذا ناصر على التلفون.. ياروحي بخلي سماعة التلفون على اذنك هو يبي يكلمك بس
نوف: .............................
صلاح: تكلم يا ناصر
ناصر: نوفي حبيبي.. انا ناصر
نوف: ..............................
ناصر: كلميني يا روح ناصر.. ايش الي صار حبيبي
نوف: ..............................
ناصر: تحسي بوجع.. قلبي تحسي بشي
نوف: ..............................
ناصر يبكي: لاتعملي بي كذا.. ايش صار ياقلب ناصر ردي علي يا روحي
نوف: ..............................
ناصر: غلاتي نوفي حبيبي.. ماراح تقولي لناصر ايش جرا
نوف: ..............................
ناصر: انا راجع على اقرب رحله حبيبتي.. ان شا الله ماراح اتأخر عليكي برجع واعرف ايش صار منك

&&&&&&&&&&&&&&&&&&&&&&&&&&

يتبع