كاتب الموضوع :
حلاهآ نجدي
المنتدى :
الارشيف
الجــــــــــــــــزء (2)
جالسـة بغرفتها ومشغلة لابتوبها .. بين أثاث غرفتها البني بدرجاته ..
فاتحة الفوتوشوب وتصمم عالصور اللي مصورتهـآ ..
شافت آخر الصور .. صور يوم الحفلة .. شافت بدر حبيب مزون ركزت بملامحه ... هو حلـو رسمة حواجبه وخشمه و جسمه والله وعرفت تختار مزونوه ...غيرت الصورة شافت صورة محمد ..,
بدر أحلى من محمد .. بس ان محمد نظرة عيونه تجذب ..فيها لمعة غييير فيها شي يجذب الشخص انه يتأملها ويفكر فيه .. عيونه كانت حادة حتى وهو يضحك نفس النظرة ماتتغير .., قصت عيونه لحالها وسوتها بتصميم حلو ومرتب .. وكتبت عليها بيت شعر ..,
"الموت ماهو طعنت السيف والرمح ,,, الموت عينك يوم ترخي هدبها "
حست بجوع من صحت ماكلت شي ..دخنت لها سجارتين وشربت علبة ببسي ..تدري انه يضرها بس انها تكيف على الببسي مع الدخان ..,
فتحت ثلاجتها كلها شوكولاتات وببسي .., تأففت
سهام : ياليييل مافي شي يسد الجوع
فتحت الباب بتطلع .. مرت من عند غرفة لميس سمعت صوت الاغاني يوجع الاذن .. ولميس والعنود يصفقون ..هالبنتين ساكنين بلد لحالهم ..طقت الباب عليهم ..
لميس : من الطـآرق
سهام : انا سهام مو طارق
لميس : هاهاها ماتضحك
سهام : افتحي الباب اخلصي
فتحت لميس الباب لسهام : حيـآآآكـ
طلت سهام عالغرفة ..
كانت اغنية الحنطور بأعلى صوت ..
لميس : تعالي شوفي أختك شلون ترقص
سهام : العنود ..؟
لميس : لالالا وعــد
سهام استغربت بس دخلت معها .. أول مادخلت حست ان دمها يغلي .. وش هالعاااالم ..؟!؟!؟!
ملبسينها لبس مصري حق الرقاصات ويصفقون لها ويضحكون على رقصها... والعنود تنقط لها بالريالات اللي ماسكتها
تكرهـ ان احد يضحك على وعد .. ماتحب أحد يأذيها ..
سهام : انتم صآآآآآآحين ولا تستهبلون
العنود : اوف وشوو بعد
سهام : هيييه هذي مسكينه ماتدري وش السالفة بالله لو انتي مكانها وحنا نضحك عليك بترقصين قدامنا ..,
العنود : ريلااااكس سوسو الدنيا ماتسوووى عادي وش فيها شوفي حتى هي مستانسة
سهام : اي مستانسة مب عشان وجيهكم .. مستانسة ان احد عطاها وجه ماتدري وش قاعدة تسوي وماتدري انكم تضحكوون عليها
العنود : طيب على قولتك ماااتدري .. يعني مب شايلة بخاطرها يعني عادي مافيها شي
سهام : تخـــــلف ...
وسحبت وعد من يدها وطلعت من الغرفــة معصبة
العنود : يوهووو هذي ليه دخلتيها..خربت جونا
لميس سكتت شوي تفكر كلام سهام صح وهي ماتبي هالشي لنفسها بس على المسكينه عادي .. بس ماردت على العنود .. ماتقدر تعارضها ماعندها الجرائة انها تعارضها ..العنود هي المتحكمة بكل شي بحياتها .. ماتقدر تعارضها بشي ..,
اما سهام دخلت غرفتها ودخلت وعد معها ..سدوا نفسها عن الاكل ..
على كثر عيوب سهام بس أنها "حنوونة" وخاصة على وعد ماترضى عليها ..
لبست وعد لبس زين وطلعت هي ويآآهـآآ نزلوا تحت ..
ام جاسم اللي كانت جالسة بالصالة تشوف تلفزيون هي وزيزو ومزون .. قالت لسهام : هيي انتي وين منزلة هالخبلة طلعيها فوق مع الخدم لا تكسر علينا البيت
عبدالعزيز : لا ماما حرااام عليك .. والله وعد طيوبة وقلبها نظيف
سهام : ماعليك من امك هي الخبلة .. بعدين ان كسرت شي فهو من حلاااال أبوها مو من حلال احد ثاني ..
مزون : هع يمة قوييية فشلتك
ام جاسم : مزونوه ناقصتك انتي الثانية .. خربت اخلاقك هالسهام .. ولا انتي وش حليلك دوم محترمتني ..,
سهام : ايييييه اطلعي وروحي وتعالي ولا تقعدييين بالبيت .. وتعالي قولي ليه عيالي مايحترموني ..,
ام جاسم : صدق انك ماتربيتي وش هالاسلوب تكلميني كذا وانا مثل امك
سهام : والله انا امي مو عندي تربيني .. البلا من اللي امه موجودة بس انه مو مترربي
مزون : اللهم طووولك ياروح خلاص انتي وياها امسحوها بوجهي انا الغلطانة بس خلوني اكمل الفلم ...
{~~~~~~~~~~~~~~~~~~~~~~~}
ينزل من الدرج بسرعة .. يخاف تفوته المباراة .. اخوه نايف يلحقه بملابس الهلال ..
زياد لابس ثوب وحاط على راسه شال اصفر واسود : يا أخي انت هلالي وش تبي تجي معي انا اتحادي وما أخذ الا اتحاديين..
نايف : زياااااد يلا عاد بروح
مزون نطت عليهم : على وين ان شالله
زياد : عالملعب ان شالله
مزون : من الظهر عاد
زياد : ايه مباراة الاتحاد والهلال اكيد زحمة لازم نروح بدري
نايف : مزوون شوفيه معيي ياخذني يقول بس ياخذ اتحاديين اوف
زياد : اي هو بيروح الجهة الثانية وبيضيع وبعدين تنشب فيني امي
مزون فكرت شوي وابتسمت ابتسامة خبيييثة : زيااااااد
زياد : وش ورا هالابتسامة قولي
مزون : زيود انا هلالية والله والله بنتبه لنايف زيين
زياد : تستهبليييين لو تموتين مافيه
مزون : والله والله محد بيدري
زياد سكت شوي بس مزون ماعطته فرصة : دقاااايق ونازلة ..
طلعت مزون من الدرج مستعجللللة دخلت غرفة زياد بيجي الثوب وسيع بس معليه لبست واحد من ثيـآبه ومرت غرفتها أخذت شال الهلال تلثمت فيه ولبست نظارة شمسية وبحكم نحفها مابينت معالم جسمها مرة .. وكأنها ولد طالعة .. نزلت بسرررعة
زياد : ممدى
نايف : وناااسة مابين انك بنت
مزون تبتسم بتوتر : يلا يلا لايجي سامي يقبرني بمحلي
زياد : يلا سرينا ..
نص ساعة وصاروا قدام الاستاد .. مزون ترتجف من الخوف ..
زياد : انا لله ياليتني ماجبتك زين
مزون : اووووف والله اخاف احد يحس
زياد : شوفي الناس هذولي كلللهم من بيركز فيك انتي
نايف : شووف مو كان هذا سلطان ومعه بدر ومحمد وصديقهم خالد
مزون شافته اييييه والله هو ياوييييلها بتروح فيها : صدوا صدوا تكفووووون لايشوفونا والله بيذبحوني
زياد : اوووف
مزون بدت تصييح : ياخي حس فيني ثلاثتهم بيتوطون ببطني لو يدرون
زياد : بترجعين البيت روحي الحين
مزون : لا مابي وصلت لين هنا خلني اكمل واللي يصير يصير
زياد : أجل خلااص أسكتي ..
بنفس المكان بس عند سلطان ..,
لابس لبس النصر وماسك بيدهـ شعار الاتحاد : تشوفون ماتفوزون يعني ماتفوزون
سلطان بثوبه الأبيض ولاف شال الهلال على رقبته وحاط شعار الهلال كبير على ظهره : ياخي أنت نصراوي جاينا هنا وناشب لنا لييييه اليوم مو يومك
بدر: كيفي ياخي اهم شي عندي ماتفوزون
محمد : مدري على من طالع نحيس
خالد : ماراح بعيد والله
{~~~~~~~~~~~~~~~~~~~~}
الساعة 5 العصر ..
نزلت سهام لابسة أزرق وأبيض وربطة الهلال وكل شي عليها بين اللون الازرق والابيض بـــس .. هي متعصبة هلالية بقوة ..
فتحت التلفزيون عشان تشوف .. تحب تشوف اللي قبل المباراة والتحليل وتحب كل شي بالكورة ..,
استغربت ان مزون مو عند التلفزيون دايم هي ومزون اول من يجلس ..,
مسكت جوالها ودقت على مزون ... دق 4 رنات بعدين ردت وصوت ازعاج قوي حوولها ..
مزون : الوووو هلا سهاااام
سهام : مزون وينك وش هالصجة
مزون بوناسة : انا بالاستااااد بشوف المباراة عالطبيييييعة واخلي التلفزيون لكم
سهام : ومع من طالعة عيووني .. ومن أذن لك .. وليه ماعندك اخت اسمها سهام تتذكرينها وتاخذينها معك
مزون : جا كل شي بسررعة والله .. أنا مع نيوف اخوي
سهام عصبت ودها انها مكانها : طيب دخلتوا المدرجات انتوا
مزون : ايييي دخلنا يمكن اطلع بالتلفزيون دورييييني
سهام عصبت : من زيييينك ادورك عاد .. "وسكرت السماعة بوجه مزون وهي معصبة "
جلست شوي تشوف الاستديو قبل المباراة .. شوي اللا دخلت نجلاء اختها ومعها عيالها "لمار وراكان"
نجلاء : هاااي
سهام : هلا ... "ولفت شافت لمار بنت نجلاء لابسة بنطلون اسود وتي شيرت اصفر" اقول نجول هذي ليه لابسة كذا
لمار"6سنوات" : انا لبسته عشان الاتحاد اليوم يفوووز .. انا احب اتحاد مثل باباااا
سهام : مالت عليك انتي وبابا كان تابعتيها مع بابا
لمار : اصلا بابا راح المسرح يشوف مباراة .. بيطلع الحين في تلفزيون خلينا نشوفه
سهام : يشوف مباراة في المسرح .. اقول اركدي بس
نجلاء :غريبة وين المتعصبة الثانية
سهام : الخااينة لاتجيبين طاريها راحت للاستاد مع نايف
نجلاء طيرت عيونها : خبلة هذي شلوون
سهام ترفع يدها تدعي : يارب يارب يصيدها سامي يارب
نجلاء : والله خبلة هالبنت
"بيت جابر كلهم متابعين للكورة .. بس انهم عصابات في منهم اتحاديين ونصراويين وهلاليين وشبابيين"
نزلت رزان تصيح ووراها وليد يضحك عليها ...
كانت رزان لابسة لبس الهلال اللي مشتريته مزون لها .. "رقم14" وهي تصيح ...
سهام : وش فيها هذي بعد,.,!
نجلاء : وش فيييك رزونة
زران تمسح دموعها بلبسها ورابطة قرنين بكلة بيضاء وبكلة زرقاء ولابسة سوارة زرقاء : اووف منها نور انا اقول عطيني رقم 20 عشان يسوري هي تقول لا
سهام : تعالي تعالي بس اهم شي انك هلالية معي بدال الخاينة
(((هذي عائلة جابر"أبو جاسم" رجل الأعمال المعروف .. وعياله الـ14
جاسم- نجلاء - سامي - العنود - سلطان - لميس - سهام - عبدالعزيز - وعد - مزون - زياد - نايف - وليد - رزان )))
{~~~~~~~~~~~~~~~~~~~~~}
في جهة ثانية من الرياض .. نفس المباراة ونفس القناة اللي يشوفونها عيال جابر .. بس فرق في البيت وفرق في الطبقة وفرق في الحي وفرق باللبس وبالحالة المادية ..,
بالصالة اللي عبارة عن جلسة أرضية مساند عالجدار .. وتلفزيون وسلك تلفون بين التلفون وبين الكمبيوتر عشان النت
مرام بجسمها النحيف ومع سمارها وعيونها العسلية .. وشعرها كستنائي كيرلي .. واقفة فوق راس اختها : ربــــــى سكررري تلفون ابي اشبك نت هديل بتعطيني مواعيد تسجيل الجااااامعات
ربى اللي أبيض من مرام بشوي وجسمها أعرض منها بس نفس لون الشعر والعيون .. تسد سماعة التلفون بيدها : ياحبيبة قلبي انتي حتى لو سكرت ماراح تدخلين نت
مرام : وليه يا مس ربى
ربـى : عشاااان تلفونا استقبال ياماما
مرام : اوووووف وش الدبرة
ربى : روحي بيت عمي سعد
مرام : يوووووه خلاص بكرة الحين بتبدا المباراة
ربى تذكرت صديقتها اللي بالتلفون : الووو هنااادي يلا يلا باي بروح اتابع المباراة "وسكرت السماعة"
انفتح الباب عليهم بقوة ودخلت "شغف" بنت عمهم سعد دبدووبة وشعرها لونه بني وكيرلي شووي .. مع بياض بشرتهاا .. وبلون عيونها البنية ...
شغف : مسيهم بالخير شخبار جو المباراة
ربى : أفا عليييك هدى مسوية لنا بطاطس مقلي
شغف : وين صالح جبت معي 5 ريال خل يجيب ببسي العائلة
مرام : اوص اوص دخلوا المدرجات الحين بيجون المزايين
شغف تكلم ربى : الحين هذي وش تبي قاعدة معنا اليوم مو مباراة للنصر يلا اطلعي برا بس
مرام : اليوم انا اتحادية موتوووا حرة
ربى : شوفوا هذا يجننننننننن
بالتلفزيون((المذيع : السلام عليكم تعرفنا بنفسك
.......: سلطان بن جابر الـ.....
المذيع : توقعاتك للمباراة اليوم
سلطان : والله اتوقع ان شالله 2-1 للهلال
المذيع : ماشالله شكلك متحمس للمباراة
سلطان : اكيد هذي مباراة حماسية الاتحاد والهلال لازم الواحد يتحمس
المذيع : شكرا لك
سلطان ابتسم وبينت غمآزته : هلا والله بالخدمة ))
شغف : يــآآآلبى الغمآزة ياناس خلاص هذا خطيبي اعتزلت باقي خطيبيني
ربى : وهـ والله انه خقق
شغف : هيييه ترا أغار على سلطوني
ربى : مشكلة الثقة الزايدة
شغف : خلني اروح لصلوح يجيب لنا الببسي بس
((مرام : 19س متخرجة من الثنوي نسبتها عادية .. رومانسية طموحة وخجولة شوي ))
((ربى :15س طالعة لآول ثانوي .. تحب الوناسة وسعة الصدر والسوالف ))
((شغف:18س طالعة لثالث ثنوي .. وضعهم احسن شووي من وضع عمهم خاصة انها ساكنه لحالها هي وابوها وماعندهم مصاريف كثيرة .. امها مطلقة من عرفت نفسها ماقد شافت امها .. ))
طلعت من الصالة للحوش تدور صالح .. اكيد بالشارع : حناااااااان حنييييييين ندووش
جوها يركضوون مطقمين ببجايم لولو كاتي هدى توها جايبتها لهم .., حنان وحنين توأم نسخـــــة من بعض نحيفات وشعرهم كشة .. أما ندى بنت هدى دبدوبة شوي وشعرها أنعم منهم .. "عمرهم 6سنين كلهم"
شغف : صادقة ربوهـ يوم سمتكم الساحرات الثلاث ..
ندى : نعم بغيتي شي حنا مشغولات
شغف : اخس وش مشغلكم لايكون تناقشون اسباب ارتفاع سعر البترول وانا مدري .. اقول خلصوني وحدة فيكم تروح تنادي صلوح من الشارع
راحوا يركضون يتسابقون للشارع ..,
شوي وجـآهآ صالح ببدلة النصر وماسك كورة بيدهـ : نعم يا بنت العم
شغف تمد له الفلوس : صلوحي رح جب لنا ببسي العائلة من البقالة
صالح يلعب بالكورة بين يدينه : خلي الفلوس عندك أنا بجيب لكم
شغف : صلووح تستهبل مع وجهك ماني بغريبة انا خابزتك الحين بتروح لامك تاخذ منها فلوس مسوي لي فيها كريم
صالح ضحك : نحاول نسوي كريمين
شغف : يلا روح عشان يمديه يبرد بالثلاجة
صالح أخذ منها الفلوس وراح يركض ...,
شغف تفكر"هو اللي قـآيم ببيتهم هو اللي يجيب لهم الأغراض وهو اللي يوديهم لمشاويرهم مع التكسي .., مو منصور المعقد اللي طول بعرض وماغير حابس نفسه بالبيت مايطلع"
((صالح 11سنة رايح لسادس ابتدائي ذكي ورجال صغير مايحب النظرة الدونية من المجتمع))
~~
جالس فوق بغرفته المشتركة مع اخوهـ صآلح .. منسدح على فرآشه المفروش بالأرض ويشوف السقف .., هذا هو وضعه من حول الـ10 سنين من يوم الحـآدث المشؤوم .. مايحب يطلع من البيت يحس بالناس يشوفونه نظرة شفقة .. جلس يتذكر الحادث شلون صار كل شي بسررعة شلون صدم شلون بتروا رجله .. ردة فعل أهله وردة فعل الناس .. ماقدر يكمل مدرسته مع انه كان آخر سنة وكان مجتهد بس ماقدر من الناس شلون يطالعونه ومن تعليقات العيال .. والحين هو عمرهـ 28 ووش سوآ بهالسنين .. ماسوا شي غير انه جالس بالسرير ونادر مايتكرم يطلع لآهله .., هو يبي يتغير بس مايقدر كل مايشوف نظرة شخص له ترجع تنتكس حالتهـ ..,
(( منصور 28سنة ... متشآئم وسلبي ))
مسك العصـآ بيطلع للصالة .., سمع صوت بنت عمه وتنحنح ..,
دخل عندهم .. : أوهـ بنت العم عندنا اليوووم وش الطاري
شغف اللي تغطت يوم سمعت صوته : لآ أبد بس جاية أتابع المباراة بجو حمااسي ..,
منصور : مباراة إيش
ربى بحماس : الهلااال والإتي
منصور : اووووهـ الهلاال حلو والله
شغف : أنت هلالي ..؟
هنا دخلت مرام عرض : ايييي هو هلالي متعصب بقوووة من زمااان هالكلام .. أصلا كان حلمه انه يلعب بالهلال بـس عاد صار اللي صار
منصور سكت مايدري ليه حس ان بنت عمه تشوفه نظرة شفقة ولا اشمئزاز من رجله ومن التشوهـ اللي بوجهه " هو مو تشوهـ بس خياطة ممتدة من جنب عينه لييين آخر وجهه هذا كان سببها هوشة بينه وبين واحد قعد يتهزآ برجله وتطورت الهوشة وانجرح بسكين .. الولد هذاك ماصار له شي بس منصور تشوهـ وجهه لآن ماكان يقدر يدافع عن نفسه زين "
بس استغرب من حماس شغف : وآآآو والله فلة لو انك الحين تلعب كان البنات طوابير معجباات
منصور بهدوء وهو موطي رآسه : قلتيها لوو
سكتت شغف حست انه تظايق .., شوي الا دخلت عليهم "نجد" 21 سنة طوييلة وملامحها هادية ..
نجد : وووع تتابعون مباراااة مادري وش تشوفون شي حلو .. كلها ناس يلحقون كورة وانتم هنا كله صراخ وصجة عليهم ..,
ربى : ماعندك حس الكورة انتي روحي بس أكتبي في هالخواطر اللي تكتبينها
نجد : هذي المشاعر تكون صـآدقـ...
ربى بطفش من فلسفة نجد : ايه ايه طيب خلاص انتي صح وانا غلط
نجد بقهرر : سخيفة
((نجد : 21 سنة رومآنسية لأبعد درجة وحالمة تجيهـآ حالات تتنح بقوة ))
{~~~~~~~~~~~~~~~~~~~~~~~}
التعديل الأخير تم بواسطة حلاهآ نجدي ; 16-10-08 الساعة 10:59 PM
سبب آخر: أغمق الألوآن =)
|
16-10-08, 10:29 PM
المشاركة رقم: 1
ماهقيت أن الهوى عذب قلوب رجـآل
جديد مواضيع قسم الارشيف
العرض العادي
