المنتدى :
الارشيف
استوطنت قلبه .. وعاش غريبا ( مسابقةقصة القصيدة )
بسمـ الله الرحمن الرحيمـ
صباحكم شوق ..
هذه روايتي التي شاركت بها في مسابقة قصة القصيدة ..
اعذروني لقصر الجزء .. فهو مجرد تقديم للقصة ..
أترككم مع الرواية .. آملة أن تنال إعجاب البعض ..
خطواته الواثقة .. شروده الحزين .. صوته المبحوح ..
سيجارته التي تلازم يسراه .. وفمه المائل بابتسامة ساخرة من كل شيء ..
شاربه الطويل .. الجرح القديم في جبينه ..
نظراته اللامبالية .. حاجبه المرتفع غرورا .. ونظارته الطبية ..
كل هذا جعله يشبه ممثلا سينمائيا يعشق الجمهور ظهوره على الشاشة ..
لم يكن وسيما أبدا .. لكنه لم يكن ليمر في شارع ما دون أن يلفت أنظار النساء ..
_ ابو العز .. عطنا وجه ياخي ..
_ هااه .. ناقصك أنا .. مايكفي تحملتك ساعتين بالمحاضره .. خلني اتنفس شوي ..
_ عندك ديت اليوم بعد هااه ؟
يقلد صوته ساخرا :
_ عندك ديت بعد اليوم هاه ؟ ..
ضف وجهك بس .. من جدد مادري كيف متحملك الروم ميت ..
_ هو اصلا يدري عني ؟ دايم مسطل ..
_ ودي اضحك بس وجهك مايساعد .. المهم انا مستعجل عندك شي ولا اروح ؟
_ لا والله ماعندي .. بس ابي افهم شي واحد ..
_ ماظن تقدر تفهم شي انت .. بس وش تبي تفهم ؟
_ انت ليه دايم كذا مالك خلق احد ؟
_ ماعندي اجابة .. شي ثاني ؟
_ لا سلامتك ..
_ يلا باي ..
رمى السيجارة من يده .. ومضى مسرعا .. مخلفا وراءه سعود ..
الذي هز رأسه بيأس وعاد أدراجه إلى مبنى الكلية ..
*******************
ظل يمشي في شوارع لندن بلا هدف حتى وجد نفسه على رصيف مقهى صغير ..
جلس على أحد كراسيه الصغيرة .. طلب قهوته المفضلة ..
خلع نظارته .. لم يكن يريد مراقبة المارة .. أراد فقط الاختلاء بنفسه .. والتفكير ..
تنهد بتعب .. وفرك عينيه ..
_ قهوتك ياسيد ..
_ شكرا ..
رشف رشفة ليعود ويضع يده على خده .. مركزا في نقطة ما من الشارع دون أن يراها ..
( هذي آخر محاضرة .. باقي لي الاختبارات والمناقشة .. يعني بالكثير شهرين وارجع .. ااااه من تخلص بس .. ذبحني الشوق ..
لديرتي .. ابوي .. اهلي .. ولها .. )
تسارعت نبضات قلبه مع ذكراها .. وضع يده على صدره ضاغطا عليه بقوة ..
( هانت يابو العز .. هانت )..
****************
كانت مستلقية على سريرها وسماعة الجوال في أذنيها ..
_ ياحبيبي انتي .. والله اقول لك تعبانه ..
_.....
_ ههههههه حتى انا وربي اشتقت لك ..
_ ......
_ طيب يرضيك ياندوش اداوم وانا تعبانه .. شوفي صوتي كيف ..
_ .......
_ ههههههه خفي علي شوي ترى ما أقدر ..
_ .......
_ اوكي حبيبي اكلمك بعدين بأقوم ألبس وراي عزيمه .. باي باي ..
القت بالجوال والسماعة من يدها .. ونهضت لتشغل الاستريو ..
_ مايعدل مزاجي بعد هالقرف الا ابو نوره .. ممممم أقرب الناس ؟ لا لا أعترف لك أحسن .. ياااويل قلبي بس ..
اووووف هالعله مابغت تسكر .. قالت ايش اروح وطي مع صوتك .. راحت روحك قولي آمين ..
الله يقرفها .. طيب وش حادك يامها تكلمينها ؟ كذا اقضي وقت .. بس مو على حساب نفسك .. ياشيخه الدنيا فانيه ..
_ مهااااااااااااااا ..
_ وجع يوجع العدو دقي الباب اول .. طيرتي قلبي ..
_ بسم الله على قلبك .. وش عندك تكلمين عمرك ؟
_ افكر ..
_ هههههههههه ماتعرفين تفكرين الا بصوت .. والله اشك فيك احيانا
_ بسم الله علي .. وش تبين بس اخلصي ..
_طفش .. ماكأن عندي اخت بالبيت .. وش رايك ننزل المطبخ نخبص لنا شي ؟
_ روحي خبصي على كيفك .. ماتشوفيني خاشه جو مع ابو نوره ؟
_ ياهالجو يرحم امك ..
( خد بالك علي ّ .. دي مش معاملة تعاملني بيها .. )
قطع حديثهما صوت إليسا منبئا أن اتصالا ما قادم ..
_ سوسو بالله الجوال .. شوفي مين داق ؟
_ أمل ..
_ يالييييل .. ردي تكفين صرفيها قولي مسافره قولي ماتت قولي اي شي ..
_ فال الله ولا فالك .. متى بتعقلين انتي .. الو .. اهلين اموله .. لا والله مها مشغوله شوي .. بعدين تكلمك .. باي
_ هذا اللي طلع معك مشغوله شوي ؟
_ ابي افهم بس انتي وش حادك تتعرفين على هالاشكال دامهم مايعجبونك ؟
_ بليز سوسو قفلي على الموضوع .. لأننا ماراح نطلع بنتيجه ..
_ انتي وحده غريبه من جد .. مادري هو استهتار .. ولا ايش بالضبط ..
_ ههههههههههههههه طيب طيب بس امشي ننزل قطعتي علي جوي وبس ..
_ الله يعقلك قولي آمين ..
_آمين ههههههههههه
أطفأت الاستريو .. وترافقت خطواتها مع خطوات أختها متجاهلة رنين الجوال ..
*************
( يااارب حسسها فيني .. ولين قلبها علي .. واجعلها من نصيبي .. انا مادري هي ماتفهم ولا تتجاهلني ..
ولا قلبها مو خالي .. لا لا لا يااارب الا هذي .. مين اصلا فيه عشان تحبه ؟ معقوله تحب ولد خالتها ذاك السبيكه ؟
ليه لا .. بطران ووسيم يقلع شكله .. بس دلخ دلخ مااااقدر يارب اتخيله حبيب لمهاوي .. ياقلبي انتي يامهاوي .. ااااه متى تحسين فيني .. وش فيك نسيت ياحمود ؟ وعبد العزيز كيف نسيته ؟ شهاده ومن برا بعد .. ورزه وهيبه وماناقصه فلوس .. بس كبير عليها ..
يااارب اجعلها من نصيبي أنا يااااارب .. )
ترك اوراقه بنزق .. ونهض من على مكتبه مغادرا الشركة ..
_ على ويين محمد ؟
_ مصدع وطالع البيت .. بالله كلم لي على طريقك ابو فهد ..
_ من حظك ان رئيسك ابو فهد .. اييييه من جد عليك حظ ..
_ اذكر الله لا ينسدح الحين .. تراي محتاااااجه وبقووة ..
_ لا اله الا الله .. تيسر تيسر .. بحفظ الله ..
_ مع السلامه .
ركب سيارته الكامري .. وتوجه إلى منزله .. لم يعد يطيق صبرا حتى يفاتح أخته بالموضوع ..
( احسن شي اقول لبدور .. بس لازم قعده وفيس تو فيس .. مواضيع مثل كذا ماتنفع تلفون .. )
وكأن أصابعه لم تستوعب ماقرره عقله .. أو أنها تجاهلته وأطاعت قلبه .. طالبة رقم أخته بدور ..
_ الو بدور ..
_ اهليين .. مابغى اسمك ينور جوالي ..
_ ههههه ياختي دايم بوجهي اربع وعشرين ساعه لايكون تبين نتكي بالصاله قبال بعض ونسولف بالجوال ؟
_ هههههههه لا بس رسايل ع الاقل ..
_ المهم بس .. فاضيه انتي الحين ؟
_ يعني .. وش بغيت ؟
_ ابيك بموضوع مهم ..
_ بخصوص مين ؟
_ مها ..
_ مييييييييييين ؟ مها بنت جيراننا ؟
_ ايه مها ماغيرها بنت جيراننا ..
_ وش فيها ؟ وليه تسأل عنها ؟ وش هالموضوع ؟ من وين تعرفها اصلا ؟
_ حشا حشا مسجل .. اسكتي دقيقه اكلتيني وانا مابعد قلت الا كلمه ..
_ اسمعك تفضل ..
_ تدرين .. انا عند اشارة بيتنا .. سوي لي شاهي وخليك بغرفتي دقايق واكون عندك ان شاء الله ..
_ أنتظرك لا تتأخر .. باي
_ باي ..
**********
" إلى حبيبتي الصغيرة ..
هذا هو آخر اختبار لي .. بتوفيق الله ثم دعاء والدي .. أبليت فيه حسنا ..
لم يتبق لي إلا أسابيع معدودة وأعود إلى الوطن .. إليك ..
حاملا شهادتي .. لتفخرين بي .. تعلمين ياحبيبتي أني أفعل هذا لأجلك ؟
تعلمين أنني أريد أن أكون جديرا بالمها ؟
أعرف أني لم أصارحك يوما بمشاعري ..
فعبد العزيز المتهور الشجاع .. يخاف حين يتعلق الأمر بك ..
يخاف إيذاء مشاعرك .. يخاف أن يخسرك ..
لكن حبي واضح جدا .. حتى عمر المراهق المنعزل .. استطاع رؤيته ..
قال لي يوم أمس :
_ أبو العز متى بترجع ؟
_ ان شاء الله ثلاث أسابيع وأكون عندكم ..
_ يوووه .. ارجع اخلص خلنا نفرح فيك انت ومهاوي ... ترى الأجواء كآبه هاليومين ..
_ ....... ايش
_ وش فيك تنحت .. تبي تعلمني انك ماتحب مهاوي بنت عمي ؟
_ وش احب وما أحب .. عيب تكلم اخوك الكبير كذا ..
_ ههههههههههههههههههه طيب طيب .. اليوم بس بنروح لهم تبي اوصل شي لها ؟
_ عويمر اقلب وجهك ..
_ ههههههههههههههه مع السلامه يالعاااشق ..
لم أصدق أبدا أنني كنت مكشوفا هكذا .. هل تراك أنت ِ أيضا رأيتي مشاعري ؟
اشتقت إليك ياحبيبتي ..
ابو العز 20 يوليو .. ""
طوى الرسالة بكل رقة .. ووضعها في صندوق يحوي أوراقا عدة .. تتشابه في المظهر ..
( الرساله المية والثلاثه وسبعين .. هذا انت يابو العز تكتب لها كل اسبوع اسبوعين .. وبعدين ؟ )
أغلق صندوق رسائله وغادر الشقة ..
*********
أصوات الضحك تملأ المكان .. يتخللها صوت ( خلاط ) .. أو ارتطام أواني ببعضها ..
_ ههههههههههههههههه مها وربي انتي ربة بيت فااااااشله ..
_ لاااااا ارحميني يامريم نور ..
_ وش دخل مريم نور الحين بالسالفه ههههههههههههههههههه ياملح اللي تفشلوا ويرقعوون ..
_ حرام عليك سوسو ترى بأصيح .. من جد أحب أطبخ .. أحس بأبدع فيه ..
_ ايه مره إبداع هههههههههههههههه
_ بتسكتين ولا شلون .. صدقيني هالحوسه دليل النبوغ .. بس يبي لي كم كورس في التنظيم عند سرتيني .. وشوفي كيف أصير
_ يخلف الله على التنظيم اللي بتتعلمينه من سرتيني هههههههههههههه
_ خلينا بس من سالفة الطبخ .. شكل مافيه أمل ..
_ ههههههههههه لحق الرسم أجل ..
_ مو بس رسم هههههههههههه مابقى شي ماحسيت اني بأبدع فيه وجربته.. بس صدقيني الطبخ غير ..
_ ههههههههه طيب فهمت .. إلا صدق مهاوي بتروحين لحفلة تخرج أمل ؟
_ لااااااع ..
_ شوي شوي على حلقك يالعربجيه .. وليه طيب ؟
_ انتي تعرفين اني ما أواطن هالأمل ..
_ تحبك هي بعد صح ؟
_ ايه حبتها القراده ..
_ ابي افهم يعني انتي الناعمه الحين ؟
_ طلعي الضحكه لا توجع بطنك .. ايه انا الناعمه عندك مانع آنسه سارة ؟
_ ههههههههههههههههههههههههههههه
_ الشرهه على اللي جالس معك ومعطيك وجه .. أروح ألعب بلاي ستيشن مع نويصر أصرف ..
( ياربي عليك يامها .. لمتى هالاستهتار بمشاعر الناس ؟ نفسي بس أدخل تفكيرك أشوفه ..
وش اللي يجبرك تعطينهم وجه وانتي ماتحبينهم ؟
وخالد يامها ؟ وش موقعه من الإعراب ؟ إذا له شي بقلبك مثل ما أحس .. ليه تتصرفين كذا ؟ )
حاولت تنظيم ما استطاعت من الفوضى الرهيبة .. وهي تفكر بأختها التي تكبرها بعامين .. تحبها جدا .. لكنها تعجز عن فهمها ..
( أتمنى ماتضرين نفسك بالنهايه مهاوي ) ..
*********
قراءة ممتعة ..
لكم كل الود ..
|
22-07-08, 12:12 AM
جديد مواضيع قسم الارشيف
العرض العادي
