21-07-08, 12:38 PM
|
المشاركة رقم: 1
|
| مدونتي |
|
 |
| الإتصالات |
| الحالة: |
|
| وسائل الإتصال: |
|
|
المنتدى :
كتب المسرح والدراسات المسرحية
كمال يونس , نص مسرحية دليلة وشربات , الجزء الأول والجزء الثاني
بسم الله الرحمن الرحيم
مسرحية دليلة وشربات
الجزء الاول
تأليف د. كمال يونس
الجزء الأول
المشهـــد الأول
يفتح الستار على منظر سوق تتزاحم فيه نداءات الباعة وتختلط الأصوات
( وتتعالى أصوات الباعة فى السوق ويدخل العجوز يتوكأ على عصاه ويمسك
مسبحة فى يده يتجه شلاطة نحوه )0
شلاطة : ازيك يابا الحاج00ايدك أبوسها 0
العجوز: ( يمد يده للشاب الذى يقبلها ) ازيك يابنى0
شلاطة : أنت مش عارفنى 0
العجوز: معلهش يابنى العتب على النظر 0
شلاطة : دا أنت كنت أعز أصحاب المرحوم أبويا00بالحضن يا راجل 0
العجوز: الله يرحم والدك ويجعل قراره الجنة00 كلنا لها 0
شلاطة : بالحضن يا حبيب المرحوم أبويـــا00( ويحضن الرجل العجوز وينشل صرة
نقود من جيب العجوز )00يا حبيب أبويا يا حاج شندويلى 0
العجوز: لا مؤاخذه يابنى00أنا مش الحاج شندويلى 0
شلاطة : سبحان الله00يخلق من الشبه أربعين00أنا أسف يابا الحاج 00ايدك أبوسها0 العجوز: ( يمد يده ليقبلها شلاطة وينشل الخاتم ) ولد مؤدب صحيح 0
شلاطة : مع السلامة يابا00( وينصرف )0
العجوز: ( يتحسـس جيوبه00وأصابعـه تفتش عن المسبحة )00فلوسى00فلوسى00
الواد النشال خدهـم00وخد السبحة 00طب هيعمل بيها إيه00لاحـول ولاقوة
إلابالله00فلوسى ياعـالم00قال ويقول لى يا عم شندويلى0فلوسى00السبحة00
طب قولوا لى يا عالم هيعمل بيها إيه بيها00الحقونى00الحقونى00امسك
حرامى00 ياعالم الحقونى00امسك حرامى00 ( يقف متحسراً )
( يدخل المقدم أبو حديد تسبقه مجموعة من الجنود00وأحدهم يصيح وسع وسع اخلى طريق للمقدم أبو حديد00بقية الجنود تردد 00على سن ورمح00الأهالى الموجودون فى السوق يتنحون جانبا00يدخل المقدم 00يخترق العجوز الجنود الذين يمسكون به من قفاه)
العجوز: سيبونى00سيبونى00عايز أكلم المقدم أبو حديد( الجنود يرددون تلقائيا على سن ورمح) 0
أبوحديد : (يشير إلى الجنود أن يتركوه) فيه إيه يا راجل أنت00عامل دوشة ليه 0
العجوز: الحقنى يا مقدم أبو حديد00انسرقت ياريس الشرطة 0
أبوحديد : ماحافظتش على حاجتك ليه يامغفل00واحنا هنعمل عسكرى يحرس كل
واحد منكم00ولا أحنا يعنى ما وراناش غيركم00فوقوا بقى0
العجوز: أمال أنت شغلتك إيه0
أبوحديد : شغلتى إيه00آهـ00( ويهز رأسه فى غيظ ) أنا رايح تشريفة الوالى00طبعاًً
الوالى أهم منك00ومن اللى زيك00ولا إيه00والله لولاش إنك راجل كبير
( ويرفع الكرباج مهدداً تمر فتاة جميلة ينظر إليها بإعجاب) غور يا راجل
من قدامى 0
العجوز: والعمل يامقدم 0
أبوحديد: العمل عمل ربنا00رَوَح على بيتكم 0
العجوز: وحاجتى 0
أبوحديد: عوضك على الله 0
العجوز: (يجلس على ركبتيه باكياً ) عليه العوض ومنه العوض00عوضىعلىالله0
(يخرج العجوز يدخل عمر من يمين المسرح ويدخل شلاطة من يسار المسرح )
عمر : شلاطة00شلاطة 0
شلاطة: ( بقرف شديد ) أيوه يا سيدى00أهلاً 0
عمر : أخيراً قفشتك00أنا دايخ عليك يا راجل 00فين ال200 دينار اللى ليه عندك00
ومعايا أهه صك الدين 0
شلاطة : بالذمة أنت خايب00وعلى إيه الدوخة00روح اشتكينى 0
عمر :( فى دهشة) اشتكيك00إيه مش همك00يكونش القاضى من قرايبك00ولا
المقدم نسيبك00حاكم دلوقتى الحرامية والنصابين بيصاحبواالمقدمين والعسكر
شلاطة:لا يا خفيف00لا ده00ولا ده00أنت لما تشتكينى00شهر يجر سنة00ولامؤاخذة
موت يا حمار00 ولوصدرالحكم00شوف مين راح ينفذهولك 00 وهتدفع
كام رشوة00 لأجل ماينقبض علىَ00هتدوخ يا مسكين 00كده صح ولا لأ 0
عمر : ( مطرق الرأس ) أيوه صح 0
شلاطة : بكدا فلوسك هتقل قيمتها00وهتضيع وقتك على الفاضى00مش برضه كلام
واقعى 0
عمر : فعلاً ده الواقع00( ويحدث نفسه ) القاضى بيحكم على مزاجه00براحته قوى
ايده فى الميه الباردة00ما وراهوش غير التأجيل0
شلاطة : ( يضع يده على كتف عمر ) أنت صعبت علىَ قوى يا ابن الناس00هات
الصك00وأنا هأديك 50 دينار00ويا دار مدخلك شر00أنا برضك راجل
عندى ضمير00و ياللا الطيبات لله 0
عمر : بس كده حرام 0
شلاطة : هتاخدهم00 ولا أحسرك على ال200 دينار كلهم00أما صحيح الطمع يقل ما
جمع00أنا ما رضيتش أقول 30 0
عمر : على إيه هاتهم00وخد الصك اهه00( و يمد يده بالصك ليأخذه شلاطة )0
شلاطة : خد فلوسك حلال عليك00 المفروض تدعى لى أنا وفرت وقتك00سلام بقى0
عمر : ( يتأمل النقود فى حسرة ) منك لله يا ظالم00روح فى ستين ألف داهية 0
شلاطة: أما صحيح راجل خسيس00صدق اللى قال00خيراً تعمل شراً تلقى00فعلاً00
اتقى شر من أحسنت إليه0( و يخرج شلاطة )
عمر : لولا إنى محتاجهم لعيا مراتى00مكنتش قبلتهم00أنا مش فاضى للمشاكل ماهو
اللى بيشتكى بيجيب لنفسه وجع الدماغ00بس هيعملوا إيه00الطبيب كشفه غالى
ما يقدرش على مصاريف العلاج عنده غير الأعيان00ما قداميش غير المزين
00وأمرى على الله0 ( ويبكى وهو خارج )
يدخل علوان وعليوة يتناقشان فيما بينها
عليوة : والله يا آبا00الواحد طهق وروحه بقت فى مناخيره 0
علوان : ليه بس يابنى ياعليوة00ارمى حمولك على الله 0
عليوة : ونعم بالله00أنتم مش حاسس يابا باللى إحنا فيه 0
علوان: طبعاً حاسس 0الشاهبندر00محتكر البضاعة ومتحكم فى سعرها 00 واللى
يعترض مايوردلهوش بضاعة 00 واللى يتأخر مايديلهوش مهلة 0
وقوام يجيب فتواته00ويقفل له محله ويطرده بره السوق
عليوة: بس البضاعة غالية علينا قوى وعلى الزباين00الزيت والشاى والسكر والدقيق
00مش جايبة هم القعدة والتجارة فيها 0
علوان : وأدينا بنزود السعر على الناس غصب عننا 00 أمال إيه00والمكسب اللى
طالع يا دوبك يغطى معايشنا 00يعنى هنعمل إيه 00 دى مش عيشة 0
عليوة : وكله كوم والضرايب كوم00كل يوم ضريبة جديدة0
علوان : هنشتكى لمين غير ربنا 00ياما بعتنا عرايظ وسلمناها فى ديوان الوالى 0
عليوة : ( بسخرية )هأ ماكنش حد غلب00عرايظ00دا مش جو تجارة0 0دا مص
لدم الناس الغلابة وطحن للتجار الصغيرين00ونفخة لكروش التجار الكبار0
علوان : ياللا ندخل الدكان الكلام مامنهوش فايدة00وماتنساش إن الحيطان ليها ودان 0
عليوة : مابقاش قدامنا غير الشكوى زى الحريم 0 أنا قلت وبأقول 00مفيش فايدة0
علوان : ياللا بينا على أرزاقنا00 ربنا يطعمنا ما يحرمنا00ويرزقنا برزق اللى حوالينا
عليوة : آمين يارب00ويفك الكرب00رزاق كريم 0
ويدخلا إلى الدكان
( وتتعالى وتتزاحم أصوات الباعة ثم تسمع أصوات تتردد فى جنبات المسرح00
بت يا شربات00امه دليلة00بت يا شربات00امه دليلة00تدخل شربات من
يمين المسرح وهى تردد امه دليلة00امه دليلة00وتخرج من يسار المسرح
وتدخل دليلة من يسار المسرح وهى تردد شربات00بت يا شربات00انتى فين
يابت00 وتخرج من يمين المسرح00دون أن ترى كل منهما الأخرى00ثم
تدخلان بظهريهما وكل واحدة تنظر ناحية اتجاه دخولها تبحث عن الأخرى ثم
تتصدامان بظهريهما ثم تلتفت كل واحدة بعد ذلك لتكلم الأخرى )0
دليــلة : كنت فين ياختى يا شربات 0
شربات : بألف فى السوق واتفرج 0
دليـلة : حقه 00السوق عجب 0
( شلاطة يمشى فى السوق يلمحهما يشد السلسلة من صدر شربات 00تعرقله دليلة فيسقط على الأرض )
دليـلة : جك مصيبة00والله عال يا شلاطة يا نصاب 00 هتستهبل يا واد00ما تطلعش
زرابينى00هفضحك00بقى عايز تسرقنى كدا عينىعينك0
شلاطـة : استرينى ياست00الله يسترك00ربنا ما يوقعك فى ضيقة00ابوس ايدك0
دليــلة : ( تمد يدها ) بوس ياوله 0
شلاطـة : ( يقبل يدها وهو متأفف فى ضيق وتبرم ) حاضر00فى حاجة تانى 0
دليـــــلة : ورينى عرض كتافك 0
شلاطــة : حاضر(ويستدير ليصلح هندامه ويمشى فى كبر وهو يعطى ظهره لدليلة)
دليـــــلة : ( تركله برجلها ) امشى عدل ياوله00غور من قدامى 0
شلاطـة : ( و هو يجرى و يمسك مؤخرته ) اه اه 00حاضـــــــر00الله يخرب بيتك
دليلة: يانهار مش فايت الواد سرق الخاتم من ايدى00حاضر ياشلاطة(وتتوعده)
( يمر مجذوب بيده مبخرة من أمامهما وحين يلتفت اليهما ويراهــــما )
المجذوب : الله جميل يحب الجمال0(ويبخرهما)
(ويمر السقا من أمامهما )0
الســـقا : يا عطشان سبيل يعوض الله ( ويقترب من دليلة وشربات ) يا عطشـان
سبيل (يمد يده بالكوب ناحيتهما ) عطشان عايز أشرب 0
دليـــــلة: روح للسقا يسيقك 0
السقا : السقا مات 0
شربات : طب روح أشرب من البحر 0
السقا : الأحمر ولا الأبيض 0
شربات : البحر الأسود يا ظريف 0
دليــلة : امشى اجرى من قدامى00بدل ما أشربك من البحر الميت0( وتجرى وراءه)
السـقا : ( يجرى ) يعوض الله00يا عطشان سبيل(ويمر الفكهانى وحين ينظر اليهما)
( ويمر عليهما طالب يحمل أوراق فى يده وكتب )
الطالب : ياسلام على نون النسوة00منورة على حق00يا أحلى مثنى مؤنث فى الدنيا
إن العيون التى فى لحظها حورٌٌ0
شربات : حول00حول إيه00جك خيبة0
دليلة : قال حول قال0
( يدخل المزين بيده حبل مشدود ولا يلتفت لدليلة وشربات ) 0
المزين : وسع طريق ياللا يا شلضم يا حبيبى00ياللا يابنى00ما تحرنش زى الحمار
ياللا تعالى00ماتشدش الحبل00أنا مفييش حيل للغلب ده0
شلضم : ( صوت من الخارج ) مم00مم00عيش حاف لأ00وحش0
المزين : بس تعالى الله يهديك00هنروح نحلق لزبون00 وبعدين نخلع له ضرسه
00وربنا يكرمك بحتة جبنة0
شلضم : ( صوت ) هيه00هيه00حتة عيش00حتة جبنة00عيش حاف تانى لأ0
( ثم يدخل شلضم يجرى بسرعة ضخم الجثة عملاق يقضم رغيف عيش كبير
وعندما يرى دليلة وشربات يتأملهما جيداً ويقف أمامهما متسمراً فى مكانه )
شربات : هو رابطه بالحبل ليه ياختى0
دليلة : خايف ليدوس حد وهو ماشى 0
( يستمر المزين فى سيره ويشد الحبل فيشده شلضم ويقع المزين على الأرض )
المزين : ايه تانى فى يومك المهبب00ماقولنا حتة جبنة00حتة عيش0
شلضم : عايز من ده ( ويشير إلى دليلة وشربات ) قشطة00زبدة00عسل0
( ويمسك بالرغيف ويغمس على الهواء ناحية دليلة وشربات )
المزين : ( حين يرى دليلة وشربات ) لا والله عندك نظر00تبارك الخلاق00أهى دى
الخلق اللى البصة ليها تقوى النظر00( ثم يشد المزين شلضم ويسير وهو
ينظر إليهما هو وشلضم فيصطدمان ببعضهما )
شلضم : ( وهو خارج مع المزين ) حتة جبنة00حتة عيش00لأ00قشطة00زبدة00
عسل00أه00مم00مم0
شربات : إيه اللى جرى للرجالة النهارده 00عينيهم زايغة كدا ليه0
دليلة : ماعدش فى أمان اليومين دول00مافيش حرمة تمشى فى الشارع لوحدهــا
دلوقتى إلا و تتعاكس0
شربات : وآه لما يعرفوا إن الحرمة وحدانية يطمعوا فيها و ينهشوا فى لحمها0
دليلة : مش كل الطير اللىّ يتاكل لحمه0
شربات : مين كان يصدق00 بنات المقدم صالح الله يرحمه00مش لاقيين اللضى0
دليلة : يا ختى ما تيأسيش0
شربات: أنا زى ما أكون نايمة و حلمت بكابوس و صحيت لقيت نفسى عايشه فيه00
ياختى الخُسسه00بقوا أصحاب الكراسى و السلطان0
دليلة : القوالب نامت و الانصاص قامت0
شربات : دنيا قلابة وغدارة 0 0حتى اللى حبيته طلع ندل 0
دليلة : ولا يهمك00أنا فكرت بينى و بين نفسى0
شربات : فى إيه ياختى0 أنا عارفة إن عليك تدبير يخلى إبليس يلف حوالين نفسه00
ويتف منك فى عبه0
دليلة : أعمل إيه00علشان نعيش لازم ننبح زى الكلاب وإلا يهجم علينا الديابة 00
لابد أخلى البلد دى00واليها ومقدمينها وناسها00يعرفوا اللى إحنا مرينا بيه
00 وسيدنا النبى لأشيبهم00و أتسلى عليهم00 يا للا يا حبيبتى0
وتضحكان وتـتجهان للخروج من المسرح وأثناء خروجهم تدخل سيدتان غير جميلتين ينظران إلى دليلة وشربات شذراً 0
حلاوتهم : شفتى النسوان يا جميلة0
جميـلة : اسكتى يا حلاوتهم يا ختى00نسوان دايرة على حل شعرها0
حلاوتهم : فين الرجالة اللى تلمهم 0
جميـلة : صحيح نسوان قادرة 0
شربات : ( تنظر إليهما ) أخاف وأكش 0
دليــلة : قال جميلة وحلاوتهم قال 0
شربات : لو كانت الاسامى تشترى 0
دليــلة : بت يا شربات00بت يا شربات 0
شربات : أيوه ياختى 0
دليــلـة : أجيب لك طاسة الخضة 0
شربات : ما تنفعش ياأختى 00دول ماينفعش معاهم غير زار0
( دليلة وشربات تخرجان ويدخل شلاطة مغيراً ثيابه السابقة من جانب آخر)
حلاوتهم : نسوان مايعين00خلوا الرجالة فى السوق ماشيين مش على بعضهم 0
جميـــلة : أيوه يا ختى الواحدة لازم تمشى بأدبها 0
دليلة : مش بكيفك يا جميل00دا غصب عنك00قصر ديل يا أزعر 0
الطالب : يا ساتر يارب00جمع تكسير00دول ممنوعين من الصرف للأبد0
جميــلة : امشى يا واد يا خسع يا قليل الأدب و المروة 0
شلاطة : على ايه الطيب أحسن 00الواد بيذاكر 00وده اللى مكتوب فى كتبه00
يعنى يغير المكتوب علشانكم0
الفكهانى : الفراولة00الفراولة00التفاح ( عندما يرى جميلة و حلاوتهم )
الزرع الشيطانى 00توم00بصل00كرات 00 فجل00حنضل 0
المجذوب : حى حى ( وحين يقترب منهما ) يا خفى الألطاف00نجنا مما نخاف00
العفاريت بقت بتظهر فى عز النهار00دا من ظلم الانسان لأخيه الانسان0
الحمّار:( يدخل الحَمار مسطول وهو يردد) حمارى00حمارى00ياجدعان ينوبكوا ثواب00حدش شاف الحمار00( يصطدم بجميلة وحلاوتهم) لا مؤاخذة يا سيدات 0
جميلة : ( فى فرحة ) مؤاخذتك معاك يا ذوق0
الحَمار : ( ينتبه لمصدر الصوت ويتأملها جيداً ويحدث نفسه ) ياه مال لونهم حمضان
وغامق كده00إيه الوشوش دى يا ساتر00هو أنا بأخدالمخدرات علشان أتكيف
وأعمل دماغ00ولا علشان أشوف كوابيس وأنا صاحى00بس أنا مش غشيم
الصنف دا حلو مش مغشوش00آه أنا عرفت 00بايينى مت ورحت النار00
حاكم الخلق دى ما تتشافش إلا فى جهنم00هاها00 سلام ياسيئات00
هاها نهقتين وحتة0
حلاوتهم : لا دا شىء زايد عن حده0
جميـــــلة : يا للا يا ختى00السوق مليان رجالة قللات أدب 0
حلاوتهم : مش هنشترى حاجة من السوق ده النهارده0
جميـلة : يا للا يا حبيبتى بلا قلة حيا 0
الحمّار : لكو حق السوق دا وحش00اشتروا حاجتكم أحسن من سوق السلاح0
جميــــلة : ياللا نمشى 0
الحمّار : ومستعجلين ليه الشيشة جاهــــزة00صراحة مالكمش حق00الواجب قبل
ما تخرجوا تدونا خبر00ألا كدا حرام ( وتخرج السيدتان و تختلط أصوات
الباعة) 00صوت نهيق
الحَمار : أدينى ربطتك آهه00برطع براحتك والبرسيم أهه قدامك 00سبنى أتكيف أنا
كمان00داحشيش ودا حشيش00حاكم أنا نباتى زيك00بعدإذنك ياحصاوى
(يجلس ومعه الشيشةً) وادى قعدة00( يضحك )هاها0ساعةالحظ
ماتتعوضش( نهيق ) عارف انك موافقنى00نهيقك كله حكم00صدق اللى قال
خد الحكمة من خشم الحمير00امال أنا بحبك ليه00أصلك عندك
انسانية وحنية00أأقصد حمورية مش متوفرة فى البشراليومين دول(ينفرالحمار)
لا شكرعلى واجب 00أنت بتسرح بي فاكرنى مسطول ( نهيق ) أنا عارف
إنك جد ودوغرى00وبصراحة أنا محتاجلك وعاوزك تقف جنبى00أنا مبقتش
قادرعلىالشغل00الصنف لحس دماغى00ماهوماكنش قدامى إلا إنى
أنتحر00أوأحط همى كلهفى التوهان00( صوت دق الحمار برجليه)مش
عاجبك كلامى 00طب بالراحة شوية00هتعمل معايا زى البشر00أبوس
حافرك00ما تتعصبش وتحرن على00أنا بقولك أهه00أحترم نفسك00ما أنت
شايف أهه00البلد حالها واقف والعيشة بقت صعبة قوى00وأنا مش قاعد
ساكت00 ادينى بأتسول فى حىالأعيان 00ودى حمورية منى00العالم دى
ذنوبها كتيرة على قد فلوسها الكتيرة00مش هم لما بيدولى حسنة بيخدوا حسنات
( نهيق ) ماسمحلكش أنا مش بشحت أنا بأتسول00خليك عندك ذوق 00دا أنا
فوت الدنيا وماليش صاحب غيرك00متعكننش على ( صوت نفرة حمار
سريعة ) أنت زعلت منى00معلش حقك على00أنا قايم أبوس راسك00وأنفخ
فى وشك نفسين تعميرة لاجل ماتتكيف أنت كمان ( ويخرج الحمار ومعه
الشيشة) مساء الخير00بالراحة شوية هو أنت خرمان للدرجة دى00مش كنت
تنهق00( ويسمع صوت كركرة وتسمع نهقةالحمار يفهم منها أنه قد أنسطل )
اوزن نفسك يا حمار ( نفرة ضعيفة جداً )اديك انسطلت00ياجدعان أيديكم معانا
نشيله لحد الزريبة00ايه مفيش حدعنده حمورية قصدى مروة وإنسانية 00
شيلوا الحمار وشيلونى أنا كمان ( ويضحك ) 0
( تختلط أصوات الباعة تعود دليلة للسوق متنكرة فى هيئة سيدة عجوز تمسك مقشة بيديها0وتتعالى أصوات الباعة00وتتقابل شاباتان وردة وإنصاف وتحضن كل منهما الآخرى وتفرقع القبلات فى الهواء على كل جانب00 و دليلة تتصنت عليهم)
وردة : ازيك يا إنصاف 00 وحشتينى يا بت0
إنصاف : إنتى أكتر00 ازيك يا وردة 0
وردة : تعرفى يا إنصاف00ستى بطة بنت القاضى صعبانة على قوى 0
إنصاف : ليه يابت 0
وردة :البت وأمها فى نكد ليل ونهار00والقاضى نفسه يجوز بنته بأى وسيلة00
وسمعته بيقول لمراته00نــدر علىَّ وحلف بالله لو جالى عريس لبطة00 حتى لو
ادانى مهرها نوى بلح00هأ جوزها له لحد ما العرسـان طفشوا من شروطه
وتحكماته00مهر وشبكة00ومؤخر 0
إنصاف : يا عينى عليها00تصورى ستى أميرة00مرات سيدى رئيس الشرطة المقدم
أبوحديد00ياعينى00يا كبدى عليها00بتعيط ليل ونهار00مابتخلفش وجوزها
عايز يتجوز عليها00واحدة اسمها لطافة العايقة 0
وردة : باين من اسمها00لطافة00وعايقة00باينها زغللت عينيه 0
إنصاف : سيدى المقدم ناوى يسافر بكرة الصبح00وهيرجع آخر النهار00ومهددها إنه
لما يرجع هيتجوز عليها 0
وردة : ياللا00كون ومدبره سيدك00سلام بقى00لأحسن يستعوقونى 0
إنصاف : سلام يا حبيبتى 0
(ثم تحتضن كل منهما الآخرى وتفرقع القبلات فـى الـهواء 00يخرج علوان وعليوة من الدكان)
علوان : بهية 00بهية 00 كويس إنك كنستى و رشيتى قدام الدكان لجل ما ربنا يفرجها
عليوة : ها ها 00 و هى سمعاك برضة 00 انت ناسى إنها طرشة ولا مؤاخذة 00
ولية غلبانة0
دليلة: تعبانة إيه00ليه كدا ياسى عليوة0
عليوة : ( يقترب منها و يعلى صوته بالقرب من أذنها ) غلبانة0
دليلة : و بتعلى صوتك ليه قالوا لك عنى طرشة 0
عليوة : ( يضحك ) ها ها00لا سمح الله0
علوان : يابنى ربنـا يهديك00مفيش بنت من بنات الأعيان عاجباك 0
عليوة : يابا القلب وما يريد 00مش كفاية البنت الوحيدة اللى قلبى حبها00خلتنى أخلى
بيها00وياعالم وياترى هى فين دلوقتى0
علوان : ياواد سيبك من الموضوع ده00شغل مخك00أمال ازاى تـاجروابن تـاجر وما
تعرفش إن جوازك ممكن يوسع تجارتنا00ويرجع عليك بالخير وعلىَّ معاك0
عليوة : عارف يابا انك عايزه جواز تجارى00فلوس تجوز فلوس00والنفوس واللى
تريده طبعاً ماتهمكش00طالما يابا مش هأتجوز على حب يبقى كلهن سواء 0
علوان : كلهن سـواء00وحب00حب إيه ياواد يا خايب00واللى اجوزوا سواء على
حب أوغير حب00النسوان فى النهاية عملوا لهم إيه00نكدوا على الجميع00
أسأل مجرب 00عموماً أنت ونصيبك00أنا مسافر وهأرجع بكرة بالليل 0
عليوة : تروح وترجع بالسلامة يابا 0
علوان : (يخرج كيس جلد من محفظته ) خد الخمس الأف دينار دول00أنا حاططهم
لك فى الكيس الجلد00اللى كان هدية من التاجر الهندى00وفيه الحجاب بتاعى
00بكرة أخر النهار00هييجى لك الشاهبندر00اديهم له مقدم بضاعة وإلا مش
هيورد لنا بضاعة تانية أصل يابنى ما أخبيش عليك00أنا قصرت معاه كتير
فى تمن البضاعة اللى جابها لنا00 الكام ولية اللى فاتوا 0
عليوة : قصرت00قصرت إيه00ومن امتى بتقصر معاه 0
علوان : أنا ما جبتش لك سيرة00ومـا حبتــش أقـول لك أن الظروف مش هى00
وخبيت عليـك علشان مـاضايقكش00كفاية مرض أمك اللى ملازمة السرير0
عليوة : ربنـا يشفيها00أنا مضـايق قوى يابا00يعنى سايبنى أصرف يمين وشمال00
طب قولى00إن ماوقفتش أنا معاك 00من هيقف معاك00ليه كدا يابا 0
علوان : ياواد ما أقدرش أخـليك تقصر فى مصاريفك00عياقتك وقيافتك ومظهرك 00
وعلشان كدا نفسى أجوزك جوازة مرتاحة 00
عليوة : مع السلامـة أنت يابا00وماتقلقش00وعقبال ما تيجى أكون استلقطت جوازة
سقُع يا مسهل00مع السلامه يابا00ولا تشغلش بالك0 (ويخرج علوان)
عليوة يجلس أمام دكانه وأمامه الشاى والشيشة فى غرور وكبر وتمر أمامه بنات وسيدات جميلات لا يعيرهن أى أهــتمام وهو جالس على كرسيه00ثم تدخل دليلة متنكرة فى هيئة درويشة وتدخل شربات وهى تغطى وجهها بطرف الطرحة وتشاهد المحلات 00
دليلة : حى00كريم00دايم00ما دايم غير وجه الله00فارج الكروب00ساتر العيوب0
عليوة : و نِعم بالله 0
دليلة : ربنا يفكها على كل مضايق 0
عليوة : آمين يارب00خدى يا ست الشيخة ( و يمد يده بحسنة ) 0
دليلة : خلىّ دنانيرك ليك00أنا اللى راح اديك0
عليوة : لا مؤاخذة00منين00دا انتى على باب الله 0
دليــلة : آهـ يا خايب00يا واد بطل تبص من خرم الإبرة00بص كويس0
عليوة : ما أنا باصص آهـه00أبص على إيه بالضبط 0
00( فى تلك الأثناء تمشى شربات فى دلال أمامه وكأنها تشاهـد السوق وينكشف
وجهها وهو يتابعها )00
دليلة : قصدى السعد جالك لحد رجليك 0
عليوة : ربنا يسمع من بقك00بس فين هو 0
دليلة : بص حواليك 0
عليوة : ( يتلفت ليجد أمامه شربات فيبهره جمالها )00تبارك الله00خلق و أبدع00
[ ثم ينظرإليها و تنظر إليه ثم يتقدم نحوها فترفع الطرحة لتغطى و جهها ]
يا سبحان الله بلدنا فيها الجمال ده كان فين مستخبى00( و يقوم ليلحق بها )
دليلة : [ تجذبه من يده ] عندك يا عليوة00تعالى هنا 0
عليوة : أجى إيه يا ست الشيخة 0
دليلة : يا واد با قول لك تعالى00ما تستعجلش على رزقك 0
عليوة : حاضر 0
[ وهو ينظر فى اتجاه شربات00ثــم يتجه ليجلس وهو مستمر فى النظر إليها فلا
يجلس على الكرسى ويقع على الأرض فيلملم نفسه وهو ينظر إليها وناحيتها ]
دليلة : عجبتك السينورة يا وله0
عليوة : قوى00قوى 0
دليلة : مش راح يصيبك غير نصيبك 0
عليوة : يا حلاوة لو كان النصيب من ده 0
دليلة : راح تنوله بس بالصبر0
عليوة : وهو برضه الجمال دا يخلىّ الواحد عنده صبر0
دليلة : عجباك 0
عليوة : آه يا ست الشيخة00أنا تهت وضعت00كان فين الجمال دا مستخبى00يا مين
يقول لى00مين دى00وأنا كنت أجوزها00الليلة 0
دليلة : واللى يقول لك 0
عليوة : إنتى عارفاها يا ستنا 0
دليلة : ( تضحك ) ها ها00دا أنا مربياهـا على إيدى0
عليوة : ونَعم التربية 0
شربات :(تناديها) ياللا يا ست الشيخة إحنا أتاخرنا قوى00لأحسن أبويا يعملها حكاية0
دليلة : مادام معايا مايهمكيش استنى00يا بطـة يا بنتى لفى شوية فى السوق0
( و يتابعها عليوة بنظراته ويتناول الشاى ليشربه فيسكبه على ملابسه )
عليوة : آهــــ00آهــ00الشاى سخن 0
دليلة : يا واد أركز وأعقل شوية0
عليوة : ما أنا عاقل آهــه 0
دليلة : عارف مين دى 0
عليوة : أبوس ايديكى قولى لى00مين دى00والنبى تقولى لى 0
دليلة : دى بطة بنت القاضى 0
عليوة : ( فى دهشة ) بنت القاضى 0
دليلة : أيوه بنت القاضى00مال00وجمال00وحسب00ونسب0
عليوة : صدقتى00يا ست الشيخة 0
دليلة : بطة ليك يا عليوة 0
عليوة : ( فى فرحة ) بجد أنا من ايدك دى لأيدك دى00ربنا يسمع من بقك 0
دليلة : بس فيه شرط 0
عليوة : عينيه و رقبتى00أ أمرى وأنا أنفذ 0
دليلة : مهر بطة مش أقل من خمسة آلاف دينار 0
عليوة : ( فى اندهاش ) ياه كتير قوى 0
دليلة : اخص عليك00كتير على بطة بنت القاضى00يا خايب يا نايب الجمـال دا
والحسب دا00والنسب دا00خسارة فيه خمسة آلاف دينار مهر 0
عليوة : مش القصد00بس الحقيقة00أبويا0
دليلة : أبوك علوان00ماتشليش همه0
عليوة : ازاى 0
دليلة : أبوك شافها وعجبته00وقال لى ربنا يجعلها من قسمـة عليوة ابنى00بس دا
دماغـه ناشف00ما بيعجبوش العجب 0
عليوة : القلب وما يريد يا ست الشيخة بس أنا طبيت00أنا عايز بطة 0
دليلة : أنت عايز بطة 0
عليوة : أبوس إيدك00هى دى 0
دليلة : ( تنادى شربات ) تعالى يا بطة 0
شربات: أيوه يا ست الشيخة 0 ( شربات تتجه فى دلال نحو دليلة ) 0
دليلة : عاجبك سى عليوة 0
شربات: الله00ما تكسفينيش بقىّ 0
عليوة : النبى تبسم 0تعالى لى يا بطة0
شربات: وأنا مالى هه0
دليلة : بطلوا دلع ولعب عيال00 امشى دلــوقتى يـا بطة00اسبقينى00وأنا هأحصلك
عند الناصية بعد شوية صغيرين00اتفرجى فى السوق 0
عليوة : أأقوم أفرجها 0
دليلة : يا واد اصبر مش لما نخلص موضوعنا الأول 0
عليوة : ليكى حق 0
دليلة : شوف ياسى عليوة00أبوك الحاج علوان قال لى قبل ما يسافر00حاولى
تعملى حيلة00وتوريهـــا لعليوة00رحت لأمها و قلت لهـــا00هاخدها معايا
السوق00وأمها مابترفضليش طلب مع إنها ما بتخرجش من بيتهم أبداً 0
عليوة: لهم حق00الجمال ده لازم يتحفظ من العيـون00مش كل من هب ودب يشوفه0
دليلة : بالنسبة للمهر00أبوك الحاج علوان قال لى00خلى عليوة يديكى مهرهـا الخمسة
آلاف دينار اللى سايبهم معاك فى الكيس الجلد الهندى وبالأمارة معاهم الحجاب
بتاعى00ويتمم كتب الكتاب فى أسرع وقت0
عليوة : ايدى على ايدك 0
دليلة : لأحسن ابن المحتسب حـاطط عينيه عليها00وأبوك قال لىكمان00لازم عليوة
لوعجبته00يديك المهر فى ايديك ويروح معاكى بيت القاضى00 لأحسن الواد
ابن المحتسب يسبقه ويخطف العروسة منه00وبصراحـة مش هتلاقى زيها0
عليوة : طب00 معلـش لىَّ سؤال00أبويا كان سايبهم أديهم لمين 0
دليلة : لشاهـبندر التجار00أنت بتشك فىَّ00أنا ماشية 0
عليوة : ( و يمسك يدها ) لا مش القصد00بس لازم أتأكد 0
دليلة : تعجبنى يا واد00ناصح وقرم 0
عليوة : قولى لى 00المهر دلوقتى مش مشكلة00طب الجهاز ولوازمه0
دليلة : يا بو تفكير خايب00يا واد ما تقفلهاش على نفسك00وما تمنعش رزقك بايديك
عليوة : إزاى نورينى 0
دليلة : أبوها و أمها مجهزينها من كله00وعاملين حساب كل حاجة0
عليوة : بس لو الشاهبندر جه ياخد فلوسه00أقول له إيه 0
دليلة : أ أقفل الدكـــــان دلوقتى00وسيبك منه00هو هيقدر يعمل لكم حاجة00دا أنت
وأبوك هتناسبوا القاضى00وبنته عينيها منك زى ما انت شايف00ويابخت
من كان القاضى نسيبه 0
عليوة : على رأيك 0
دليلة : دلوقتى زى ماقلت لـك00أأقفل الدكان00وروح الحمام00وروح للمزين
وقابلنى عند بيت القاضى بعد ساعة00وما تدخلش من غيرى0
عليوة : وبعدين 0
دليلة : هاديهم المهر00ونصمـم إن كتب الكتاب يكون الليلة بعد صلاة العِشا زى
ما أبوك قال لى00وسيب له خبر فى البيت إنه يحصلك على بيت القاضى 0
عليوة : كدا تمام 0
دليلة : وخليك واد ناصح وماتتكلمش مع القاضى ومراته كثير00ومش عايزاك
تطلب تشوفهـا إلا بعد كتب الكتاب00علشـان يقولوا عنـك راجل عفيف وحى
وفاهم الأصول كويس00وأكد لهم إنك هتحطها فى عينك0
عليوة : عينيه وقلبى 0
دليلة : فين مهر عروستك 0
عليوة : ( ويمد عليوة يده بكيس النقود فتأخذه دليلة ) أهـــه 0
دليلة : الله يبارك لك00مبروك مقدما00وربنا يتمم بخير00أسيبك دلوقتى 0
عليوة : ربنا يخليكى لنا يا ست الشيخة00يا بركة 0
دليلة : ( تـنادى شربات ) ياللا يا بطة 0
عليوة : مع السلامة يا ست الشيخـة مع السلامة يا بطة00أنا مش ها تأخر يا جميل
جاى لك نكتب الكتاب ونعلى الجواب 0
شربات: ( تضحك فى دلال ) ما تكسفنيش 0
عليوة : بطة 0
شربات : عليوة 0
عليوة : بطة 0
شربات : عليوة 0
(وتمسكها دليلة بيديها وتخرج من المسرح وشربات تنظر إليه وتشير بيدها00وعليوة ينظر إليها ويشير بيده فيرتطم بأحد المارة ويقع على الأرض )
المشهد الثانى
صالة فى بيت المقدم أبوحديد00رئيس الشرطة00تتعالى أصوات أميرة وأبوحديد 0
أميرة : كدا يا بوحديد 0
أبوحديد : أنا يعنى كنت عملت إيه00كفرت 0
أميرة : عيب يابن الأصول 0
أبوحديد : ماعيب إلا العيب 0 ( ثم يدخلان المسرح )
أميرة : أنت السبب أنا مافييش حاجة00قلة الخلفه منك أنت 0
أبوحديد : منك00منى00أنا قررت وخلاص 0
أميرة : أنا أميرة بنت المقدم جوهر رئيس الشرطة اللى أنت كنت من رجالته
وحفيت لجل ما أرضى بيك00ورفضت أمرا ولاد أعيان00تتجوز على
النهارده بابــوحديد00أ أقصد يا مقدم أبوحديد 0
أبوحديد : كل صحابى حواليهم ولادهم00وماحدش مقطوع غيرى 0
أميرة : بس يابوحديد00كدا خدتنى لحم00ورمتنى عضم00كـدا تفضحنى وسط
نسوان البلد 00ويقـولوا أبوحديد أجوز على أميرة00أنت ناسى انك عاهدتنى
من أول يوم فى جوازنا وقبل الزفاف00انك مـش هتتجــوز على وحلفت لى
على كدا 00وعاهــدتنى إنك ما تدخلش علىَّ ضرة فى يوم من الأيام0
أبوحديد : شوفـى يابنت الناس00هـى كلمة ورد غطاهـا يا إما تخلفى يا إما هاتجوز
برضاكى أو غصب عنك0
أميرة : يعـنى هأخلف بالعافيــــة00يابو حديد دى قسمه ونصيب00وإرادة ربناوحده
ثم احنا مش عارفين العيب من مين0
أبوحديد : نفسى يكون لى عيل يشيل أسمى0
أميرة : وأفــرض ماخلفتش مـن التانية00يبقـــى ضيعتنـى وضيعــت نفسك0
أبوحديد : اطمنى هتكونى معززة مُكرمة00الست أميرة مرات المقدم أبوحديد0
أميرة : لا00كتر خيرك00جوازك كوم وطلاقى كوم0
أبوحديد : عيب يا أميرة00طلاق إيه0
أميرة : شوف يا حدق00ارضى وفلوسى تردهالى00دينار00دينار0
أبوحديد : ماتخافيش00حقك ها تاخديه وزيادة0
أميرة : لك حق00من الرشاوى00ومد ايدك لأصحاب المصالح0
أبوحديد : عيب تقولى الكلام ده00أنا مابامدش ايدى00هما بيجيبوا لـــى هدايــــا
وعيب أرد هداياهــــم00 رشوة00هدية00أبوكى كان كدا00وكل المقدمين
قبلى وبعدى00 هيكونوا كدا00شيلنى واشيلك00يا بخت من نفع و استنفع00
أيوه 00 أيوه 00 ما أنا كل ما بأقبض علي مجرم يطلعه القاضى براءة00
ويضيع تعبى فى الهوا 00أأقبض عليه النهارده 00 تانى يوم ألاقيه فى الشارع
مطلع لسانه00ولا اللى ليه واسطة ولامعارف00غصب عنى بأسيبه 0
أميرة : بس بكرة راح يكون فيه يوم حساب00و عموماً مش كلهم بيقبلوا الرشوة00
الله يرحم المقدم اللـى عملتـوا له مكيده واتهمتوه بالباطل00ايده كانت
نضيفة00 وعمره ماقبل رشوة00طفشتوه بمقالبكم00وطققتوه ياولداه0
أبوحديد : دا كان راجــل فقرى00وأهــــو مات وغار فى ستين داهــــية سيبك من
الكلام العك ده00مش عــايـزين لت كتير00لما أجى من السفر يحلهاالحلال
انا هأسافر بكرة الصبح وهأرجع بعد العِشا 0
أميرة : براحتك يابوحديد00البلد مالهاش سيرة غير جوازك من لطافه العايقة0
أبوحديد : ( وهو مضطرب ) لطافة إيه0
أميرة : لطافة العايقة0
أبوحديد : ســــلام دلوقتى أنا ها تأخر على ميعادى مـع الوالـى لما أرجــع من السفر
يحلها الحلال00وهاعمل كل اللى يرضيكى وهأريحك على الأخر0
أميرة : منك لله00منك لله0
أبوحديد : عيب يا أميرة0
أميرة : بقى كدا ياقليل الأصل00هنت عليك كده بسهـولة00علـــى رأى المثل
على الأصل دور0
أبوحديد : أنا هأحسيبك دلوقتى00لأحسن الشيطان بيتنطط قدامى00(وينصرف)
أميرة : أعوذ بالله منك00و من عمايلك00أنا عمرى ماقصرت فى حقك00ولا
رديت عليك كلمة00ولا جرحت خاطرك آه ياقليل الأصل 0
(وتبــكى و تدخــل إنصاف وتـــربب على كتفها )
إنصاف : ماتزعليش ياستى والنبى ما فى راجـل يستاهـــــل00ولا يهمــك ربنـــا
يفكها مــن عنــده00
أميرة : عايز يخلف00طب وأنا ذنبى إيه00ومش عارفين العيب من مين00منى00
ولا00منه0
إنصاف : ماتزعليش ياستى00ربنا يفكها عليكى00آه صحيح كنت هأنسى00 واحدة
ست اسمها أم لطافة وبنتها معاهـا00واقفين علىالباب عايزين يقابلوكى0
أميرة :(متعجبة ) لطافة00لطافة0
إنصاف : تكونش لطافة العايقة وأمها يا ستى0
أميرة : وإيه اللى جابهم00قال يا قاعدين يكفيكم شر الجايين0
إنصاف : قابليهم ونشوف عايزين إيه00يمكن جايين فى خير0
(تخرج إنصاف وتدخل دليلة وشربات فتقابلاها بالأحضان والقبلات وأميرة مذهولة)
دليلة : إحنــــا آسفين إننا جينــا بــدون ميعـــاد سابق00بس مفيش قدامى غير كدا0
شربات: ياختى دا الست أميرة زى القمر00تبارك الله0
دليلة : صحيح00رجالة عينيهم زايغة00سبحان الله خلق و صور0
شربات: أيوه00ياللا ياختى بسرعة00بدل ما تحصل مشاكل0
دليلة : أنا عايزاكى يا ست أميرة فى كلمتين0
أميرة : إنصاف00اخرجى دلوقتى و لما أعوزك هاناديكى0
إنصاف: حاضر يا ستى ( و تخرج )0
دليلة :اسمعـى يا بنتى00أنتى عـارفة ان المقدم أبوحديد عايز يتجوز لطافة بنتى00
و بكرة الفرح00 وبصراحةالمقدم جـابرنا على الجوازة دى00وربنا عالم0
أميرة : وإيه اللىّ جابركم0
دليلة : اللىّ جابرنا إنه له عندنا خمسة ألاف دينار00 دفعهم لفك رهنية بيتنا و مش
قادرين نردهــم له00أتاريه طمعان يتجوز لطافة00وإلا هيسجنى00وأنا فى
سنى ده00يرضيكـى يا بنتى00وحاولت استقضى المبلغ ماعرفتش00مين
هيسلفنى الكـل طمعان فى بيتى وفىَّ أنا وبنتى00دنيا مالهاش أمان0
أميرة : يا عينى ياربى الدنيا فيها مآسى0
شربات: أناماادخـلش يـا ست أمـيرة علـى ضـرة أظلمـك انت ولا غيرك ليه00طب
هأروح مــــن ربنا فين00و أنتى أهــه زى القمـر0
دليلة : دا حـتى لـطافة مــا بقتش تـحط كحـل و لا تنضغ لبــــــــان00ومـا بقتش
عايقــة و لا حاجة00ومابقتش ياولـداه تتقصع فى مشيتها00من همهــا00
نفسها إنكسرت يــا عين أمها00عينى عليكى يا بنتى0
أميرة :( تمص شفيتها بسخرية ) يا عينى عليها00يا كبـدى لا يا ست أم لطافة
دى لطافة زى القمر00وألف من يتجوزها و يتاقلها بالدهب0
شربات: ربنا يخليكىّ0
أميرة : خدى دهبى أهـه00بيعيه وادى له الخمسة آلاف دينار 00 وقولى له لأ0
دليلة : طب و إنتىّ ذنبك إيه0
أميرة : ما تشيليش هم00أنا أعرف أدبر حالى00أما أنتم يا كبدى هتدبروا حالكم
إزاى00ربنا مع الولايا0
دليلة : على رأيك روحى ربنا يعمر بيتك0
شربات : آمين يارب00دا احنا ولايا زى بعضنا0
أميرة : ( تخلع ذهبها و تضعه فى إيشارب و تعطيه لدليلة ) ربنا يفك ضيقكم 0
دليلة : دا جميــل مــش هنسهولك طــول عمرى ربنا يعمر بيتك و يديكىّ على قد
نيتك00قادر00يا كريم0
أميرة : كتر خيرك00إنك فهمتينى الحقيقة00وربنا يعترك فى عريس أحسن منه
يا لطافة00ويكون ابن حلال0
شربات : كتر خيرك يا ست أميرة00يا أميرة00والنبى قمر وزى لهطة القشطة00
حقة رجالة عينيهم زايغة00و فارغة0
دليلة : مع السلامة يا ست أميرة00بس ما تعرفيش حد اللىّ حصل بينا00و إن شاء
الله فلوسك هاردهلك لما ربنا يسهلها0
أميرة : دا كلام برضة ربنا يفكها00عليكم00وعلى الولايا0
( وتسلم عليهم و تحضن كل من شربات و دليلة 00أميرة )
شربات: والنبى تقبلى منى الهدية دى يا ست أميرة00(تعطى أميرة المرآة والملقاط)
وأدى كمان كيس لبان00(أميرة مندهشة) ما تستغربيش زغللى عينه00بدل
ماطيرك يلوف على غيرك0
دليلة:اسمعى كلام أختك لطافة00
أميرة : ألف شكر00خليهم وأنا أشترى زيهم00لطافة هتقعد من غيرهم إزاى0
شربات: (تخرج غيرهم وتنظر فى المرآة) ربنا يسترها معاكى يارب00سلام بقى
وأقعدى بالعافية يا حبيبتى00ربنا يعطيك ما يحرمك00
(دليلة وهما خارجتان يرددان الدعاءويرددان آمين عدة مرات)
أميرة : مع السلامة0( و تودع دليلة و شربات )
المشهد الثالث
00 تدخل الخادمة وردة فى صالة بيت القاضى حيث يجلس وزوجتة سويا 00
وردة : ستى00سيدى القاضى 00 واحدة ست00درويشـــة00بره عايزه تقابلــك
وتقابل ستى00بخصوص حاجة مهمة00ومعاهــا شاب حليوة 0
أم بطة : خير عايزانا فى إيه الدرويشة 0
القاضى : يا خبر بفلوس بكره يبقى ببلاش00ندخلها ونشوفها عايزة إيه 0
أم بطة : على رأيك 0
القاضى : دخليهم يا وردة 0 ( تخرج وردة وتعود معها دليلة )0
وردة : اتفضلى يا ست الشيخة 0
دليلة : حى00كريم00دايم00ستار00وهاب00فارج الكروب00ستار العيوب00
سلامو عليكو يا أهــل الخير 0
القاضى : وعليكم السلام ورحمة الله وبركاته00اتفضلى اجلسى 0
أم بطة : يا أهــلا وسهلاً00خير00اتفضلى 0
دليلة : يعز مقداركم يللى ندرتم الندر والوفا بيه غالى00والقاضى لابد يوفيه 0
القاضى : ندر00ندر إيه 0
أم بطة : ندر إيه الكلام الغريب ده 0
دليلة : يا قاضى00ربنا راح يفرج همك وكربك00ولكن ما تقفش فى الطريق0
القاضى : يا ست فهمينى بالراحة00إيه الألغاز دى 0
أم بطة : صحيح كلام غريب وعجيب 0
دليلة : يا واكل البلحة ورامى نوايتها00غيرك جمع النواية لوقت عوزتها 0
القاضى : كفاية ألغاز00هاتى اللى عندك00ومين الشاب اللى جاى معاكى ده00ليه
مادخلش وسيبتيه بره 0
دليلة : الشاب هيدخل لما تمدوا له الأيادى 0
القاضى : ازاى يعنى 0
أم بطة : هو مين الشاب ده 0
دليلة : الشاب ده اللى اتربط قدره مع قدركــم00لما توفوا النــدر00راح يبقى عريس
بنتكم ويدخل داركم00ويبقى منكم00ويدخل معاه الفرح بيتكم 0
أم بطة : ( فى لهفة ) عريس00عريس 0
القاضى : ( فى لهفة ) يا أهــلا وسهلا 0
أم بطة : يا ألف مبروك00يا بشيرة الهنا00يا قدم السعد 0
دليلة : ( تمد يدها بالكيس الذى أخذته من عليوة) خــد يا قاضى ما تكسفش ايدى00
الكيس لو وفيت بندرك00هيملا بيتك سعد 0
القاضى : ( يأخذ الكيس ) كيس إيه ( يأخذ الكيس ويتحسسه ) كيس إيه ده 0
دليلة : مهر بنتك يا قاضى00يابو الوفا بالعهد والندر 0
القاضى : يفتح الكيس ( مندهشاً ويكلم زوجته ) إيه دا00بصى 0
أم بطة : ( مستغربة وتخبط يدها على صدرها ) دا نوى بلح 0
دليلة : أيوه نوى بلح00مهر بنتك00ندرك00وأسأل مراتك00ربـك مطلع00وسخرنى
لاجل ما أجيب معايـا سعد00بطة الغلبانة حرام عليك تعنسها00وتتلف أملها0
أم بطة : ( توجه كلامها للقاضى فى همس ) تكونش قاصدة الــ 0
القاضى : أيوه لما كنت بأقول لك راح ازيحها حتى لو كان مهرها نوى بلح 0
أم بطة : ومين اللى درى الدرويشة00عرفت ازاى 0
القاضى : ما تقوليش ازاى00سبحانه علام الغيوب 0
أم بطة : دى باين عليها مكشوف عنها الحجاب 0
القاضى : سبحانك يارب00سبحانك يارب 0
دليلة : ما تستعجبيش00الولد مافيهوش شىء يتعايب00صحة وشباب00 ورزقه
واسع إن شاء الله 0
القاضى : ما قلناش حاجة00بس00هو مين وابن مين 0
دليلة : عليوة ابن علوان التاجر 0
القاضى : يعنى00تاجر00ابن00تاجر 0
دليلة : هتشوفوه دلوقتى00تبارك الله أخلاق وأدب00وسنه باسم ووشه فيه القبول0
أم بطة : موافقين 0
القاضى : بس استنى 0
دليلة : ها00هترجع فى الكلام00ولا توفيش الندر00شوف اللى هيجرى لك 0
القاضى : بس الجواز مش مهر وبس 0
دليلة : جهز بنتك من كله00ما أنت عارف اللى فيها00قعدت تبيع وتشترى فيها
رفضت عرسان ياما خلتها يفيض بيها00ومن قهرها صابها ونابها اللى نابها0
أم بطة : أيوه صحيح00منك لله00تلفت أمل البنت00وافق يا راجل 0
دليلة : الواد مستعجل00اكتب الكتاب بعد العِشا 0
القاضى : وليه الاستعجال00وأبوه وأهــله وناسه 0
دليلة : أبوه هييجى وأهــله معاه بعد العِشا 0
القاضى : طب حتى ولو شبكة 0
دليلة : الظروف مقصرة معاه هو وأبوه اليومين دول00بس بنتك هتنسعد معاه
وهتكون وش السعد عليه00دا شاب والمستقبل واسع قدامه 0
القاضى : الناس هيقولوا على إيه00القاضى جوز بنته من غير شبكه ولا مهر0
أم بطة : أنا هاديله شبكتى ياخدها فى صندوق ويقدمها قدام المعازيم00المهم احنا
بنشترى راجل وكدا00كدا00هو دهب البنت00يعنى أنا كنت هأديه لمين0
أم بطة : ندى الصندوق للشيخة 0
القاضى : طيب أشوفه الأول00نشوفه الأول 0
أم بطة : لك حق00 ربنا يهديك00ويفك عقدتك يا بنتى 00قادر يا كريم0
القاضى: وردة00وردة00بنت يا وردة 0( تدخل وردة )
أم بطة : دخلى سى عليوة 0
وردة : سى عليوة مين 0
أم بطة : عليوة علــوان00عريس ستــك بطـة اللى واقف بره00اللى جه مع ستك
الشيخة المبروكة 0
وردة : حاضر يا ستى00وأنا ديك الساعة00اتفضل يا سى عليوة 00ياأهلاً وسهلاً
ربنا يتمم بخير 0( وتزغرد وردة )0
عليوة : السلام عليكم ورحمة الله 0
القاضى : وعليكم السلام ورحمة الله وبركاته 0
أم بطة : يا أهـــلاً وسهلاً يابنى00تبارك الله00مايتعايبش 0
القاضى : حقيقة00كلامك صح00يا أهـلا يابنى 0
دليلة : مش قلت لكم 0
القاضى : من غير كلام يابنى أنا موافق 0
أم بطة : ربنا يعوض صبرك خير يا بطة يا بنتى 0
القاضى : أناديلك العروسة تشوفها 0
دليلة : يشوفها إيه 0
عليوة : أشوفها إيه00كفاية إن مولانا القاضى أبوها00والست الأميرة دى والدتها0
دليلة : أدب00وكمال00وتربية00أصيل ابن أصول 0
القاضى : بس يابنى لازم تشوفها00ولا00أنت شفتها قبل كده 0
أم بطة : سيبك من حكاية الشوف دى00ما قال لك بلاش 0( وتغمز للقاضى بعينيها)
القاضى : كتب الكتاب بعد صلاة العشاء0
عليوة : أبوس ايدك00كتر خيرك00يا فرحى يا هنايا 0
دليلة : نستأذن احنا بقى00أيوه علشان نستعد 0
عليوة : أيوه علشان نستعد 0
القاضى : لكم حق00وإحنا كمان نستعد 0
أم بطة : ونجهز نفسنا0
دليلة : خير البر عاجله 0
أم بطة : تعالى يا ست الشيخة00يا بركة00أديكى الأمانة 0
عليوة : أمانة إيه0
دليلة : (بينها وبينه) هأ قولك بعدين00بلاش كتر أسئلة يا عليوة00 أتكل أنت دلوقت
ياعليوة00 روح الحمام0وللمزين يللا بقى ماتنشفش دماغك000
عليوة : هى صورة00ماأنا روحت وخلاص0 0 ( عليوة يحيى القاضى وزوجته )
سلامو عليكو يا حضرة القاضى00سلامو عليكو يا ست أم بطة 0
القاضى : وعليكو السلام ورحمة الله وبركاتة 0
أم بطة : وعليكوالسلام ورحمة الله وبركاته يا ابنى يا عليوة 0 ( وينصرف عليوة )
أم بطة : وردة00وردة 0
وردة : خير يا ستى00أ أمرى 0
أم بطة : (تهمس لوردة)هاتى صندوق الدهب بتاعى من جوه خلى بطة تديهولك 0
وردة : حاضر يا ستى 0
دليلة :(تهمس لأم بطة) ماكنتى تديه الصندوق بالليل لما ييجى 0
أم بطة : ما ينفعش لازم يدخل بيه قدام الناس 0
دليلة : ليكى حق 0
وردة : ( تدخل وبيدها صندوق الدهب وتعطيه لأم بطة ) أهـه ياستى0
دليلة : ربنا يتمم بخير 0
أم بطة : ( تأخذ الصندوق وتمد يدها بالصندوق لدليلة ) خدى يا ست الشيخة 0
دليلة : ( تمد يدهـــا لتأخذ الصنـدوق ) ياخد عدوينك00كريم00حليم00ستار
انصرف دلوقتى00يا للا يا عليوة00اسبقنى يـا عليوة0
دليلة : حى00كريم00حليم00ستار00 (وتخرج وهى تحمل الصندوق)0
أم بطة : مع السلامة يا ست الشيخة 0
دليلة : مبروك00زغرتى يا وردة 0
وردة : وانا ديك الساعة0
( وتزغرد وردة )
|
|
|
جديد مواضيع قسم كتب المسرح والدراسات المسرحية
العرض العادي
