هذي وردة للهوى هذي جروحك عطني روحي سيدي او خذها روحك(2)
محمد: باركلي
سعيد: على شو
محمد: قررت اعرس
سعيد: يلا عاد
محمد: اشفيك انا تكلم صج
سعيد: ومنو هذي سعيدة الحظ
محمد: تعرف سعود اللي كلمتك عنه
سعيد: هيه بس شياب طاريه الحين
محمد: باخذ اخته
سعيد بذهول: انت تمزح اكيد
محمد: لا ما امزح
سعيد: الحين هذا عقابك له انك تاخذ اخته بعدين انت وين شفتها
محمد: اليوم كانت وياه يوم شفته
سعيد: محمد اليوم شفتها و اليوم قررت تتزوجها
محمد: انت ليش مستغرب
سعيد: تبي تعرف ليش انا مستغرب . عسب انك ما يبت طاري العرس يوم على لسانك . عسب انك 32 سنه ولين الحين ما عرست ويوم قررت تعرس تاخذ اخت اللي سرق فلوسك
محمد: انت ما شفتها
سعيد: حلوة
محمد: هيه
سعيد: ها انا فهمت الحين شو السالفة
محمد: شلي فهمته
سعيد: هذي نزوة يديدة من نزواتك مثل سالفة البيت والارظ و السيارة
محمد: سعيد انت فاهم السالفة غلط
سعيد: لا يا محمد انا ما اعرفك من اسبوع او اسبوعين انا اعرفك من زمان واعرف يوم تبي شي شلون تسوي المستحيل عسب تاخذه . تذكر يوم سالفة السيارة . يوم طلعنا من المول و شفت السيارة و تميت واقف عدالها لين يى صاحبها و تميت تكلمه لين اشتريت السيارة منه و دفعت اكثر من سعرها بوايد بس لانها عيبتك . و بعدين شسويت فيها ركبتها اسبوعين وعقب خليتها و انا متاكد انك الحين ما تعرف وينها
محمد صامت فهو يدرك ان كلام سعيد صحيح
سعيد: وشو بتسوي الحين بتتزوجها شهرين وعقب بطلقها
محمد: سعيد انت قاعد تتكلم عن السالفة جني بسوي شي حرام . انا بتزوجها على سنة الله و رسوله
سعيد: و فلوسك الي سرقها اخوها بتخليها
محمد: لا يا سعيد فلوسي بتردلي
سعيد: محمد فكر بالسالفة عدل هذا زواج مب لعب . انك تتزوج وحدة لان شكلها عيبك هذا مب سبب . بعدين هلك ما بوافقون تاخذ وحدة مثلها
محمد: ليش
سعيد: انت نسيت اخوها شسوى. بعدين هي من اي عايلة
محمد: مب مهم بعدين ماله داعي اهلي يعرفون عن سالفة الفلوس
سعيد: محمد شلون مب مهم انت تعرف شلون هلك وهلي يهتمون بسالفة اسم العايلة
محمد: لا تخاف بيوافقون. المهم اعرس
سعيد: ما اعرف شقول بس انا السالفة مب عايبتني. شلون تاخذ وحدة اخوها حرامي
سعيد محق بكل كلمة قالها ومحمد يدرك هذا تماما . موضوع رغبته بالزواج من حمدة ليس الا نزوة جديدة من نزواته . راها فاعجبته و قرر ان يتزوج بها باي ثمن . و ربما بعد شهر او حتى اقل سيطلقها .
في منزل ابو محمد
ابو محمد: وين احمد
ام محمد: بحجرته
ابو محمد: ولدج هذا بيفشلنا . البارحة العرب كانو يسالون عنه في العرس و اتصلت فيه و اتصل فيه اخوه و رغم جي ما يى
ام محمد: بعده صغير و.......
ابو محمد: 23 سنه صغير محمد يوم كان بعمره كان ماسك الشركة بروحه
ام محمد: يعني محمد غير
ابو محمد: وبنتج بتفلشني ويى اخوي بعد. البارحة في العرس كلمني و قالي يبون العرس عقب اسبوعين ما عرفت شقول له
ام محمد: انزين البنية يبالها وقت لين تزهب عمرها بعدين هي بتخلص امتحانات عقب اسبوعين . يبالها اسبوعين عقب الامتحانات
ابو محمد: ما اعرف انتي تكلمي مع ام سالم و اتفقو
دخلت شما الى المجلس وهي تبكي
ابو محمد وهو يقف: شفيج ليش تصيحين
شما وهي تحتضن جدها وتبكي: يدي قلهم اني مابي
ابو محمد: ما تبين شو
شما: ما بي اعرس
ابو محمد :تعالي يلسي لا تصيحين
ام محمد: يمى لا تصيحين ما حد بيغصبج
ابو محمد: ومنو اللي بيغصبها وانا موجود
شما: يدي امي زعلانة مني عسب اني مب موافقة على المعرس
ابو محمد: اي معرس
شما: مبارك ولد عمي
ابو محمد: ليش هو متى طلبج
ام محمد: من يوم كانو صغار وهو يبيها وانت تعرف
ابو محمد: انزين وهي الحين ما تبيه
ام محمد: انتي ليش ما تبينه
شما:يدتي انا ما بي اعرس الحين
ابو محمد: يعني انتي ما تبين مبارك او ما تبين تعرسين
ام محمد: وليش ماتبي مبارك . ما شالله عليه ريال ما عليه قصور
شما: لا يدي انا ما بي اعرس
دخلت دانة الى المجلس
دانة: انتي هني و امي تدور عليج
سلمت دانة على جدها و جدتها
شما: انا ما سرت مكان غريب هذا بيت يدي و بعدين البيت عدال البيت
ام محمد: بس يمى ما يصير تطلعين من البيت بدون ما تقولين لامج
شما: الحين تقعد تناجر و تعصب وانا ابي ايلس وياكم و ابي اكلم هدى
ام محمد:انزين خلاص طلعو عند خالتكم وانا بتصل بامكم و اقول لها
صعدت شما و دانة الى غرفة هدى
واتصلت ام محمد بمنال
منال: هذي البنت بتفظحنا . ابوها متفشل من اخوه لهم اسبوعين مكلمينى بسالفة الخطوبة و لين الحين ما ردينى عليهم. و اليوم اسالها تقولي مب موافقة والله لو درى ابوها ما ادري شو بيسوي
ام محمد: انزين البنية ما تبي تعرس . خلاص
منال: يمى هذا ولد عمها ليش ما تبيه
ام محمد: هي ما قالت ما تبيه بس هي ما تبي تعرس
منال: والريال مستعد ينتظر سنة بس هي ما تبي حتى خطوبة مب راظية
ام محمد: سمعيني زين هذي بنتج بس يمى الزواج ما في غصب
منال: والله يمى ما ادري شسوي
ام محمد: اقول ليش ما تقولين لهم عقب ما تخلص البنية امتحانات بعدين بنرد عليكم
منال: شلون يعني
ام محمد: يعني انكم لين الحين ما كلمتوها بالسالفة . بتكلمونها عقب الامتحانات و ادعي ربج انها تكون غيرت رايها عقب الامتحانات
في غرفة هدى
هدى: انا ابي افهم انتي ليش مب موافقة
شما: ما ابي اعرس
هدى: لا والله بتمين جي من دون زواج
شما: ما ابي اعرس الحين
دانة: لا مب هذا السبب
شما: لا والله وشو هو السبب يا عبقرية
دانة: نسيتي شقلتيلي ذاك اليوم
شما: شو قلت
دانة: تنكرين انج قلتيلي ان هذي العادة السخيفة اللي عندنا ان البنية لازم تاخذ ولد عمها انتي ما تحبينها
شما: لا ما انكر
هدى: شهل الكلام
شما:هدى بسالج سؤال . ليش الوحدة لازم تاخذ ولد عمها . حتى اذا هي ما تبيه . هذا ظلم
هدى: شما مبارك ريال والنعم فيه وما ظنتي ان اهلج موافقين عليه بس عسب انه ولد عمج
شما: لا يا هدى ابوي ما يقدر يرفظ شو بيقولون الناس ما رظت تاخذ ولد عمها . الحين احنا بالقرن الواحد و العشرين ولين الحين نفكر بنفس تفكير الناس قبل التاريخ
دانة: انتي قاعدة تتكلمين جنه مبارك مب زين
شما: لا يا دانة انا ما نكر ان مبارك زين ماشالله عليه هو طيار و شغله زين و اخلاقه عالية و وسيم بس انا ما شوفه غير ولد عمي
هدى: تصدقين انج غريبة
شما: هدى الحين انتي ليش وافقتي على سالم ولد عمج
هدى: لانه زين
شما: لا يا هدى لانه ولد عمج ومن يوم كنت صغيرة زرعو بتفكيرج ان سالم لهدى و هدى لسالم لين انتي اقتنعتي بالسالفة . او مثل ما يقولون اقنعتي نفسج ان هذا المفروظ يصير
هدى: بس انا احب سالم
شما: لانج ما عرفتي غيره
هدى: شقصدج تبين تتعرفين على شباب و تحبين
شما: اعتقد انج تعرفيني زين يا هدى و تعرفين اني مب انا اللي اسوي جي
هدى: انزين شتقصدين
شما: انتي يا هدى و من كنت صغيرة شفتي سالم جدامكم و حبيتيه بس انا ما بي مبارك انا ابي اخلص جامعة و اشتغل و بعدين افكر بسالفة الزواج
هدى: تصدقين ما كنت اعرف انج هالكثر معقدة
شما: انا معقدة
هدى: هيه معقدة . مبارك يحبج و يبيج وانتي قاعدة تقولين هذا الكلام الفاظي. انا
يوم حبيت سالم حبيته لاني حبيته مب عسب الكلام الفاظي اللي تقولينه. اذا ما تبين مبارك خلاص بس لا تتحججين بسالفة ولد العم و ما ادري شو بس تبين نصيحتي فكري بالسالفة زين اخاف تندمين عقب
في منزل ابو سعود
ام سعود: اقول يمى امل وين اختج
امل: بحجرتنا
ام سعود: شخبار دراستج
امل: بخير ما صدق يوم بخلص
ام سعود:يلا نبي نسبة زينة
امل: انشالله , صحيح يمى وين ابوي
ام سعود: بعده بالدوام
امل: لين الحين يمى الساعة تسع و نص
ام سعود: الله يعينه يمى يطلع من الشركة يسير المصنع
امل: يمى انا ما ابي ادش الجامعة انا بخلص ثانوية و اشتغل
ام سعود: ليش يمى
امل: عسب اساعد بمصروف البيت .
ام سعود: لا يمى ابوج ما بيرظى . الشي الوحيد اللي مصبر ابوج هو انتو و قاعد يشتغل ليل نهار عسب انتو تتعلمون و ترفعون راسه
امل: يمى بس الجامعة يبالها مصاريف وانا اقدر اشتغل بشهادة الثانوية و اساعد
ام سعود: انتي ما عليج خليج بدراستج والله كريم
دخل يوسف الى المجلس و جلس بجانب امه
يوسف: يمى يوعان
ام سعود: ما في عشى لين يرد ابوك و اخوك
يوسف: بس الساعة الحين 9 و نص متى بيردون
ام سعود: سير ازقر حمدة عسب تساعدني و نص ساعة بيكون العشى زاهب و بيكون ابوك و اخوك هني
في منزل ابو سعيد
ام سعيد: اقول يمى فهد انت مزعل حرمتك
فهد: ليش يمى هي قالتج شي
ام سعيد: لا ما قالت شي
فهد: يمى ما في شي بس هي تبي تسير بيت هلها تقعد جمن يوم وانا مب موافق
ام سعيد: ليش يمى خليها تسير
فهد: لا والله وانا اقعد بروحي
سامية: اللي يسمعك الحين يقول هذا يموت بحرمته
فهد بغضب: هيه اموت فيها وانت عندج مانع
سامية: لا بس ما حسك تحبها
فهد: استغفر الله العظيم . انا ما اعرف انت شتبين بالظبط . ما بترتاحين لين تخربين بيني وبين حرمتي
ام سعيد: شهل الكلام يمى اختك هذي
فهد: هيه وهي ما تحب حرمتي . لانها كانت تبيني اخذ ربيعتها نورة
سامية: انت ما تستاهل نورة اصلا . انا بيوزها لسعيد
فهد: لا رحيي عمرج سعيد ما بياخذ ربيعتج الخقاقة
سامية : الحين نورة خقاقة
فهد: لو ما كانت خقاقة ما بتكون ربيعتج .
ام سعيد: عيب هذا الكلام
فهد: قولي هذا الكلام لبنتج . اللي شايفة عمرها عسب ان الله عطاها شكل و فلوس . هي لازم تشكر الله مب تشوف عمرها
سامية: انا مب شايفة عمري
فهد: لا والله وشو تسمينه انج ما ترابعين بنات الا اذا كانو من عوايل غنية و معروفة
سامية: حرمتك من عايلة غنية بس ما تعيبني
فهد: لانها مب شايفة عمرها مثلج انتي و ربيعاتج
ام سعود: وبعدين معاكم
فهد: انا ما اعرف شلون هدى بنت عمي خليفة ربيعتج
سامية: وليش والله
فهد: لانها مب مثلج
ام سعود: وبعدين وياكم جني مب قاعدة وياكم و مب مسوييين لي اي اعتبار
دخل سعيد الى المجلس
سعيد : اشفيكم
ام سعود: ما شي
سعيد: يمى شو السالفة شكلج متظايجة
ام سعود: ما شي يا وليدي
سامية: فهد قاعد يقلي اني ابي اخرب بينه و بين حرمته
سعيد بغضب: ردينا لهذي السالفة انتو ما تستحون .
سامية: انا مالي ذنب
سعيد: سمعوني زين . انتي مالج شغل فيه و بحرمته وانت مالك شغل باختك. وهذي اخر مرة تكلم وياكم بهذي السالفة .
فهد: انا بسير عند حرمتي احسن عن القعدة و يى هذي
خرج فهد من المجلس
سعيد: الحين انتي و بعدين وياج شتبين فيهم
سامية: الحين انا الغلطانة
سعيد: مالج شغل فيهم . هو و حرمته احرار واذا حرمته ما تعيبج ما حد يغصبج تحبينها بس لا تتدخلين بينهم
سامية: انشاالله
سعيد: يمى امنة كلمتني بيوون باجر على الساعة 7 بتوصل طيارتهم
ام سعيد: يوصلوون بالسلامة انشالله
سعيد: انزين يمى انا بسير ارقد
ام سعود: ما بتتعشى
سعيد: لا مب مشتهي
في منزل ابو محمد
على مائدة العشاء
محمد: وانا اقول ليش الدنيا منورة . اكيد دام دانة و شما عندنا
دانة: ما حد يرفع معنوياتي بهذي الدنيا غيرك
محمد: ليش وامج و ابوج
دانة: لا امي اتم تتظارب وياي عسب سالفة الدراسة . وكل ما تشوفيني تقولي سيري درسي
احمد: لانج ما تدرسين
دانة: لا ادرس
احمد: الحين يوم تحلين الواجب او تدرسن نص ساعة هذي دراسة . يماما انتي ثانوية عامة
دانة: خلاص ذبحتوني جني اول وحدة في العالم بتاخذ ثانوية
احمد: انتي اخر وحدة بتاخذ ثانوية بالعايلة لازم ترفعين راسنا
محمد: اكيد بعد نسبتك الرهيبة نبي وحدة تتخفف علينا
احمد: 75 مب عايبك
محمد: وانت ما تستحي تقول نسبتك
شما صامتة و كلام هدى يتردد في راسها . مبارك ليس سيئا . وهي لا تنكر انها معجبة به و لكن ما سبب رفضها له.
محمد: شما اشفيج ما سمعنا صوتج اليوم
شما: ما فيني شي
هدى: بعدين محمد
دانة: يدي و يدتي ليش ما تعشو ويانا
هدى: ليش هو في حد يتعشى الساعة 12 غير الميانين مثلنا. يماما يدج و يدتج الحين نايمين
محمد وهو يقوم عن المائدة: هدى اذا خلصتي تعالي حجرتي ابيج
في جناح محمد
محمد: انا قررت اعرس
هدى :قول والله
محمد: والله
هدى: ومنو سعيدة الحظ
محمد: وحدة عندكم بالجامعة
هدى باستغراب: تعرفها
محمد: لا لا يروح فكرج لبعيد . اخوها يشتغل عندنا وانا شفتها و ياه
هدى: يعني هي مب من عايلة معروفة
محمد: ما كنت اعرف ان هذ الامور تهمج
هدى: ما تهمني انا بس تهم امي
محمد: لا تخافين انا بكلم امي .
هدى: انزين شو اسمها
محمد: ااسمها حمدة عبدالله
هدى: هيه اعرفها بس اعتقد شما تعرفها اكثر هي تاخذ وياها بعظ المواد
محمد: و شرايج فيها
هدى: حلوة . انزين شرايك انخلي شما تكلمها
محمد وهو مستنكر هذا الموضوع فهو لا يعتقد انها يمكن ان ترفض: ليش
هدى: عسب نعرف رايها
محمد: ليش هي بترفظ
هدى: يمكن البنية مخطوبة
محمد لم يفكر بهذا الاحتمال او بالاحرى لا يهمه
هدى: تصدق انا مب مصدقة انك بتعرس
محمد: ليش
هدى: ليش لان امي تعبت من كثر ما كلمتك بالسالفة وانت مب راظي
محمد: انزين انا خلاص بحقق لها حلمها
هدى: ههههه هيه والله انها بتستانس . رغم انها ما بتكون موافقة على البنية
محمد: ليش لانها مب من عايلة غنية
هدى: يمكن بس لانها مب هي اللي اختارتها
محمد: انتي ما عليج من امي انا بكملها و اقنعها
في غرفة هدى
شما: خالي محمد يبي يتزوج حمدة
هدى: وشفيج هالكثر مستغربة
شما: يدتي بتوافق
دانة : و ليش ما توافق
شما: لان حمدة مثل ما اعرف ظروف عايلتها صعبة . بس البنية من عايلة سمعتها
زينة ومحترمة
هدى: وانتي شرايج بالبنية
شما: انا احبها وايد لانها وايد طيبة و حبوبة و بعدين ماشالله عليها وايد جميلة
دانة: لحظة شوية حمدة هذي اللي يت عندنا مرتين
شما: هيه تذكرينها
دانة: اكيد اذكرها بصراحة خالي عرف يختار . البنية مب حلوة تهبل ما شالله عليها. بس مب جنها صغيرة . خالي عمرها 32 و هي 19
هدى: ما فيها شي
شما: انا بكلمها باجر
هدى: تدرون شلون انا عندي فكرة . امي ما بتوافق الا اذا شافت البنية شكثر حلوة و مؤدبة عسب جي احنا نييب البنية هني او عندكم عسب تشوفها امي
دانة: وامي بعد لان يدتي يهمها وايد راي امي
شما: خلاص انا بقولها تيي عندنا باجر واو خالي بياخذ ربيعتي انا مستانسة من الخاطر
اليوم التالي في الجامعة
حمدة و منى في الكافيتريا
اقتربت شما من حمدة و منى
شما: شحالكم يا نذلات الواحد ما يشوفكم الا في المحاظرات
منى : الحين احنا النذلات مب انتي الاول ما تخلصين المحاظرات تسيرين البيت
شما: شسوي هذي هدى اللي ما تحب تقعد بالجامعة واول ما تخلص محاظرات تبي تسير البيت
حمدة: الحين احنا عندنا امتحانات خلينا نخلص و بعدين بنشوف بعظ مثل ما نبي
شما: انزين حمدة ابي منج خدمة
حمدة: عيوني
شما: تسلمين. بس امتحان الاسبوع الياي فيه وايد اشياء انا مب فاهمتها . يعني اذا ما فيها ازعاج ممكن تشرحينها لي
حمدة: اكيد باي وقت
شما: انزين شرايج تيين عندنا البيت اليوم
حمدة: ما اعرف لازم استاذن من امي
شما: قوليلها انج بتسيرين وياي و بتردين مع الدرويل
حمدة:انا بكلمها و برد عليج
في منزل ابو خليفة
دانة في غرفتها عندما اعلمتها الخادمة ان مبارك ابن عمها جاء و لا احد غيرها في البيت
خرجت دانة الى المجلس حيث كان مبارك
مبارك في الخامسة و العشرين من عمره تخرج من كلية الطيران و يعمل طيارا في طيران الامارات شاب ملتزم وهو الابن الاكبر لابو مبارك و له شقيقين هزاع في الثالثة والعشرين و هو يدرس هندسة الكمبيوتر مع خليفة في لندن و علي في الثانية و العشرين يعمل مع والده متزوج ولديه ولدين.
دانة: هلا والله بولد العم شحالك
مبارك: بخير الله يسلمج . الظاهر انه ما حد بالبيت غيرج
دانة: هيه والله امي في بيت يدي و شما بالجامعة بس بترد الحين
مبارك : انزين انا كنت جريب من هني و قلت امر اسلم على خالتي على كل حال بغيت اقولكم ان خليفة و هزاع بيردون من لندن الاسبوع الياي انشالله
دانة: والله الحمدلله
مبارك: انزين انا استاذن
دانة: خليك امي بتي الحين و شما بعد
مبارك: شخبارهم
دانة: شخبار امي او شما
مبارك : الثنتين
دانة: ههههههه بخير
مبارك بارتباك: دانة ليش للحين ما رد عمي على ابوي عسب سالفتي انا و شما
دانة: أي سالفة
مبارك: يلا عاد
دانة: أي سالفة
مبارك: سالفة ملجتي على شما
دانة: ليش انت تبي تملج على شما
مبارك بغيظ: دانو و بعدين معاج
دانة: ما اعتقد ان امي تكلمت معاها بالسالفة بتنتظر لين تخلص امتحانات
مبارك: انزين هي موافقة او لا
سمعت دانة صوت سارة تدخل الى المنزل
دانة: شرايك تسالها هذي هي يت
مبارك: ما قول غير الله يعينه هزاع
دانة باستغراب: هزاع و شياب طاريه
مبارك: ما عرف شرايك تسالينه يوم يرد
دانة: مبارك شو السالفة
مبارك: كما تدين تدان انا ما بقول شي الا اذا انتي قلتي. يلا باي
خرج مبارك من المنزل بينما دخلت كل من شما و حمدة الى المنزل
تنهد مبارك بصوت مسموع عندما راى شما. لقد كان يحبها و منذ زمن بعيد
مبارك......متى بتحنين علي بس
اما شما و كما يحصل معها في كل مرة ترى مبارك بدا قلبها يدق بسرعة
شما: شحالك مبارك
مبارك: بخير من شفتج
كان يرغب بالحديث معها اكثر و لكنها و كعادتها صدته
شما: عن اذنك بندش داخل
دخلت هي و حمدة الى الداخل و بقي مبارك واقف وهو لا يعلم لما تعامله بهذه الطريقة.
كانت دانة تقف و ترى ما يحصل بينهم
دانة وهي تكلم مبارك: ما قلتلك ان امي بعدها ما كلمتها بالسالفة
مبارك وهو منزعج: دانة اختج ليش تعاملني جي
دانة: مبارك ربيعتها وياها مب حلوة اتم واقفة تكلمك
مبارك: انزين بنشوف اخرتها وياها . يلا مع السلامة
دانة: مع السلامة
في منزل ابو محمد
ام محمد و ام سعيد و منال في المجلس
ام سعيد: يبي ياخذ وحدة اخوها يشتغل عندكم
ام محمد: هيه بس البنات قالو انها حلوة وايد
ام سعيد: البنات الحلوات في كل مكان . هي من أي عيلة
ام محمد: مب معروفة . بس اللي فهمته ان ابوها كان وظعه المادي زين بس خسر فلوسه
ام سعيد: بصراحة انا يوم ولدي بعرس ما بوافق الا اذا كانت من عايلة معروفة
منال : خالتي المشكلة انه هو هذي اول مرة يقول انه يبي يعرس واخاف اذا عارظنا يقول خلاص مابي اعرس
ام محمد: هذا ولدي واعرفه هو طيب و ما يخالف ابوه بس يوم يبي شي بيسويه وانا اقول دام ان البنت من عايلة محترمة والبنت حلوة ما له داعي نخالفه
ام سعيد: الله يوفقه
لكن ام سعيد لم تكن مثل ام محمد . فاسم العائلة وو ضعها المادي هي امور تهمها اكثر من أي شي اخر.
رن هاتف منال
منال: الو
شما: يلا يمى البنية صارت عندنا بالبيت
منال: انزين يلا احنا يايين.
في منزل ابو خليفة
شما: حمدة انتي لو طلبج حد الحين بتوافقين
حمدة: ما اعرف يعني ما فكرت بالسالفة
شما: تبين تقولين انج للحين ما حد تقدملج
حمدة: لا بس هلي ما وافقو
شما: ليش
حمدة: اللي مب متعلم و اللي سمعته مب هالزود
هدى: سمعتي يا شما هذا اسباب اتخلي الوحدة ترفظ مب اسبابج انتي
حمدة: ليش انتي في حد تقدملج و رفظتيه
هدى: هيه وتدرين ليش رفظته لانه ولد عمها
حمدة باستغراب: رفظتيه لانه ولد عمج
شما: السالفة مب جي . بس السالفة اني مب لازم اوافق لانه ولد عمي
هدى: ما حد قالج وافقي لانه ولد عمج بس مبارك ما ينعاب
حمدة: مبارك ولد عمج
شما: هيه
حمدة: شما بس انا كنت احس من كلامج انج معجبة فيه
دانة: الله الله عيل ليش رفظتيه
شما: انا ما قلت انه اكرهه بس انا ما حبه بعد
هدى: خلاص عيل خلي امج تكلم ام مبارك و تقول لها انج مب موافقة . عسب الريال يشوف نصيبه و يدور على عروس
شما و فكرة زواج مبارك من غيرها قد ازعجتها: يدور على عروس ثانية
هدى: اكيد بيدور على عروس . انتي محسبة انه بيتم طول عمره على ذكراج
دانة: شما اذا انتي ما تبينه انا بيوزه لربيعتي اسما هي وايد معجبة فيه من يوم شافته
شما بغضب: الحين مبارك بياخذ اسما
دانة وهي تتعمد اثارة غيرة شما لانها تدرك انها معجبة بمبارك و لكنها تكابر: ليش اسما حلوة و مؤدبة
شما بغيظ: اسما وايد ظعيفة
دانة: لا جسمها حلو . بعدين هذي الموظة الحين
شما وهي تكاد تنفجر من الغضب: انا بسير اشوف امي ليش ما يت
خرجت شما من الغرفة وهي لا تفهم ما ينتابها من مشاعر
حمدة حرام عليج دانة
هدى: خليها تستاهل . هي ما بتحس فيه لين تحس انه بيظيع من ايدها
دانة: والله ان مبارك يموت فيها وهي مب معبرتنه الريال ليمتى بيتم ينطر يعني
حمدة: وهي ليش ما تبيه
دانة: تبي تتمرد على العادات و التقاليد اللي تقول ان البنت لازم تاخذ ولد عمها. شوفي انا معاها يوم هذي العادات تجبر بنت تاخذ ولد عمها وهو مثلا مب زين بس مبارك ما شالله عليه وهي قاعدة تكابر و تقول ما بيه وتلعوز بالريال وهو مسكين قاعد ينطر فيها
هدى:انا اخاف ان يي يوم وتندم . عن اذنكم شوي
دخلت هدى الى الغرفة و اتصلت بمحمد
هدى: الحين هي هني في بيت بو خليفة
محمد: انزين
هدى: شو انزين . نكلمها بالسالفة او لا
محمد: امي شافتها
هدى: لا بعدها
محمد: انزين لين امي و منال يشوفونها بعدين .
هدى: انزين مثل ما تبي
اغلق محمد الهاتف و رغبة واحدة تسيطر عليه هي انه يريد ان يراها . كان في حجرته نزل منها و اتجه الى منزل اخته الذي يقع بجانب منزلهم ولا يفصل بينهم سوى سور
بقي في الحديقة الخارجية للمنزل يتمشى هناك وهو يشعر ان رغبته بالزواج من حمدة تزيد اكثر و اكثر.
دخلت ام محمد ومنال الى المنزل و جلستا مع حمدة وهدى و دانة . اعجبت ام محمد ومنال بحمدة كثيرا و اكثر ما اعجبهم ادبها . و حتى حمدة احبتهم كثيرا فهي اعتقدتهم انهم اناس متكبرون او على الاقل جافون بالتعامل ففكرتها عن محمد انعكست على رايها بعائلته و لكنها لاحظت من التعامل معهم انهم اناس طيبون و رحبو بها و عاملوها معاملة حسنة.
اتصلت شما بمحمد
شما: شو نكلمها او لا البينة بتسير البيت
محمد: شلون بتسير
شما: ويى دريولنا
محمد: انزين خليها تطلع انا بكلمها برع
شما باستغراب: شو
محمد: لا تخافين انتي بس خليها تطلع
سلمت حمدة عليهم و خرجت الى خارج المنزل . ولكن عندما اصبحت بالخارج لاحظت ان السائق لم يكن هناك همت بالعودة الى الداخل لكن محمد الذي كان هناك استوقفها
محمد: شحالج
حمدة بانزعاج من رؤيته : بخير
محمد: 10 دقايق و بيكون الدريول هني
حمدة: انا بتريا داخل
محمد: لحظة
حمدة وهي لا تفهم ما يحصل: خير اخوي في شي
محمد: هيه و بدون مقدمات انا ابي اطلبج من ابوج
حمدة منصدمة وتعتقد انها تتخيل
محمد: ما سمعت ردج
حمدة مذهولة مما يحصل . ان يطلبها محمد خليفة ان ينزل من برجه العاجي و يطلب فتاة من عائلة متواضعة مثلها . لم تفهم السبب و لكنها لن توافق ان تاخذ شخص يخلو قلبه من الرحمة . شخص كل ما يهمه ان يحصل على ما يريد .
حمدة وهي لا تريد ان تثير غضبه فشقيقها يعمل عنده : اخوي انا ما اقدر اوافق
محمد وهو يعتقد انه يتخيل ما سمع: ليش
حمدة: انت من عالم و انا من عالم ثاني
محمد: ليش حد قالج اني من المريخ
لو كانت في ظروف اخرى ربما كانت ستضحك مما قال. ولكن ما تشعربه من مشاعرغريبة جعلها غير قادرة على التفكير بوضوح
حمدة: اخوي انت من عايلة معروفة وانا من عايلة ....
محمد: كنت اعتقد انها ميزة ان البنت تاخذ واحد من عايلة غنية و معروفة .
حمدة: انا ما تهمني الفلوس
محمد: في حد ما تهمه الفلوس
حمدة: انا
محمد: يعني انتي ما تبين تطلعين من الحالة اللي انتو فيها لوضع احسن
كان يتكلم بتعالي ازعج حمدة
حمدة: الحمدلله على كل حال
محمد: واخوج بعد ما تهمه الفلوس
حمدة: اخوي ماله دخل بكلامنا
محمد: عيل ليش اخوج سرق فلوسي دام ان الفلوس ما تهمكم
حمدة: اخوي سرق فلوسك ؟
محمد: 200 الف درهم
حمدة: انت تجذب
محمد: مب محمد خليفة اللي يجذب. اخوج سرق فلوسي . واذا مب مصدقة ساليه
حمدة: انا متاكدة انه ما سرق , بس انت تبي تورطه
محمد: وليش ابي اورطه
حمدة: ما اعرف
محمد: ما في شي بيني و بين اخوج عسب اورطه
حمدة بغضب من كلامه و اتهامه لشقيقها بالسرقة : ما في داعي انه يكون في شي بينك و بين اخوي عسب تورطه . مثل ما سفرت الريال من هني عسب تاخذ بيته و مثل ما تطرد الموظفين عندك عسب انهم عارظوك بتورط اخوي بسالفة السرقة
محمد وهو يرفع احد حاجبيه: الظاهر انج تعرفين عني وايد . بس اللي ما تعرفينه اني يوم ابي شي باخذه باي طريقة
حمدة بخوف: شقصدك
محمد: يعني انا بعطيج اسبوع تفكرين و عقب اسبوع بيي انا و ابوي عسب نطلبج اذا وافقتي بنسى سالفة الميتين الف وما حد بيعرف ان اخوج سرق فلوسي واذا رفظتي اخوج بيدش السجن واوعدج انه ما بيطلع قبل 10 سنين
حمدة وكلامه يهزها ويرعبها : ليش ابي افهم ليش
محمد بغضب: تبين تعرفين ليش. لانه مب محمد خليفة اللي ينقاله لا
08-04-08, 12:45 PM
هذي وردة للهوى هذي جروحك عطني روحي سيدي او خذها روحك للكاتبة شمس ابوظبي
جديد مواضيع قسم القصص المكتمله
العرض العادي
