بيتكلم عني وعنك بمنتهى العامية ومنتهى المهارة

الكاتب .. علي سلامة
من الكتاب الشباب
صاحب كتابات اجتماعية سياسية ونقد للحالة العامة للشباب
بالعامية الشديدة الي بتكلم بيها انا وانت في الشارع كل يوم
بيعمل منها شعر ونثر وخواطر بتيجي ع الجرح
وتوصلك بمنتهى السهولة
رائع فعلا الشخص دا
وانا قاصد اجيبلكم حاجة من كتاباته هنا
في قسم الشباب
لأنه بيتكلم عن الشباب دايما
اسيبكم مع حاجة ليه
وعايز اعرف رأيكم

وفضلت أسَِتنى أستّنى...


لَحدّ ما عََدّى اخر قطر وفَات...

حَزنت قَعّدت أعيط أعيّط...

قلت أتمشى أتسلّى...

أتفرج عَ الشّوارع والنّاس والعربيّات...

زهقت...

قُلت أرتاح...

سنَدت عَلَى روُحى...

إتلخبَطتّ جُوّايا كلّ الحَاجَات..

مدّيت إيدى ف جيوُبُى...

لقيت شُوّية وَرَق قديم...

وصَوُر وكرُوت تليفونات....

قُلت أكلم مرَاتى...

افتكرت إنها خدت الدّوا...

ونَاَمت من تلات ساعات....

قُلت أكلم أخُويا....

افتكرت إنه طلعِ مَعَاش مُبكّر...

وكَاَره تاريخُه...

ومركّز ف التّأمينات..

أكلم أُختى...

هاتعيد وتقول نفس الحكَايات...

أكلم خَالىِ....

افتكرت إنه غتت غَتَاتَة...

ومعايا أنَا بالذّات...

أكلَم خالتَى...

قُلت يا وَاد..

دى كانت خالتى وخالتك...

واتفرقّت الخالات...

أكّلم صاحبى صلاح....

افتكرت إنة سافر العراقُ....

وفى إحتمال يكون مات....

قُلت أنا أصطاد مُزة...

واعمل دماغ...

بسّ معرَفش حد بتاع مُخدَّرات...

قُلت أمشى ف مظَاهرة...

لقيت العساكر راجعين...

مشَطبين علَى كل الُمظاهرات...

قُلت اتصل بالسّادة المسئُولين...

هايتّهمونى بإزعاج السُّلطات...

قُلت ياربّ...

هُو أنا إيه...

وليه...

ونسيت إيه...

وقطر إيه اللّى فات....

اَلَلًه يرحَمَك بقَى يَابَا...

والفاتحة عَلَى كُل الأموات....