المنتدى :
من عيون الشعر العربي والعالمي
من كلمات استاذنا الجميل علي سلامه
جايبلكم كلمات ممكن تكون مرت عليكم للأستاذ الجميل / علي سلامه
وهو على فكرة من أكتر الكتاب الي باحترمهم وباحترم كتاباتهم وباحفظها بصراحه
دي حضرتها ليه اول مرة قالها في " ساقية الصاوي"
عجبتني جدا وتقريبا حفظتها من تاني مرة سمعتهالو
يا رب تعجبكم
فضلت أسَِتنى ...
لَحدّ ما عََدّى اخر قطر وفَات...
حَزنت قَعّدت أعيط أعيّط...
قلت أتمشى .. أتسلّى...
أتفرج عَ الشّوارع والنّاس والعربيّات...
زهقت...
قُلت أرتاح...
سنَدت عَلَى روُحى...
إتلخبَطتّ جُوّايا كلّ الحَاجَات..
مدّيت إيدى ف جيوُبُى...
لقيت شُوّية وَرَق قديم...
وصَوُر وكرُوت تليفونات....
قُلت أكلم خطيبتي ...
افتكرت إنها خدت الدّوا...
ونَاَمت من تلات ساعات....
قُلت أكلم أخُويا....
افتكرت إنه طلعِ مَعَاش مُبكّر...
وكَاَره تاريخُه...
ومركّز ف التّأمينات..
أكلم أُختى...
هاتعيد وتقول نفس الحكَايات...
أكلم خَالىِ....
افتكرت إنه غتت غَتَاتَة...
ومعايا أنَا بالذّات...
أكلَم خالتَى...
قُلت يا وَاد..
دى كانت خالتى وخالتك...
واتفرقّت الخالات...
أكّلم صاحبى صلاح....
افتكرت إنة سافر العراقُ....
وفى إحتمال يكون مات....
قُلت أنا أصطاد مُزة...
واعمل دماغ...
بسّ معرَفش حد بتاع مُخدَّرات...
قُلت أمشى ف مظَاهرة...
لقيت العساكر راجعين...
مشَطبين علَى كل الُمظاهرات...
قُلت اتصل بالسّادة المسئُولين...
هايتّهمونى بإزعاج السُّلطات...
قُلت ياربّ...
هُو أنا إيه...
وليه...
ونسيت إيه...
وقطر إيه اللّى فات....
اَلَلًه يرحَمَك بقَى يَابَا...
والفاتحة عَلَى الأموات....
|
02-02-08, 07:52 PM
جديد مواضيع قسم من عيون الشعر العربي والعالمي
العرض العادي
