المنتدى :
الارشيف
هل هناك حب من أول نظرة؟ (أتمنى من الجميع المشاركة)
هل هناك حب من أول نظرة؟
بصراحة سؤال محير جداً تكلم فيه كثيرون وأجاب عليه كثيرون وكثيرون لم يجدوا الإجابة أنا بصراحة فكرت فيه وقبل كم يوم قرأت هذه العبارة "الحب يبدأ بالصدفة ويكتمل بالإرادة" ما ادري بس هذه العبارة كإنها اوحتلي بجزء من الإجابة على الأقل بالنسبة لي أنا.
أنا بصراحة وجهة نظري في الموضوع انه ما في حب من أول نظرة بل هناك إعجاب من أول نظرة وتعريفي للإعجاب هو حب مبدئي سطحي غالباً ما يكون حب للمظهر الخارجي فقط أو لطريقة الكلام أو غيره من الأمور كيف يعني؟
يعني مثلاً ممكن تقابل شخص وتحبه (تعجب فيه) من أول مرة وتحس انك حبيته جداً لاكن بعد فترة وبعد ما تتقرب منه أكثر تلاقي انك كرهته من تصرفاته أو افكاروا أو غيره من الأسباب وممكن برضوا تقابل شخص نظرتك المبدئية له مو كويسة وبعد فترة ممكن يكون أحب شخص على قلبك المهم من هاذي المثالين حبيتا وضح وجهة نظري وهوا انه الحب ما يكون من أول نظرة أو مكالمة أو لقاء لأنوا كلمة حب معناها كبير جدا بل ممكن يكون فيه إعجاب ومع الوقت ومع البحث ممكن الإعجاب هذا يتحول إما إلى حب وطبعاَ وقتها بيكون إرادة لأننا إحنا الي حبينا نكمل بإرادتنا وإحنا إلي بحثنا عنو وإحنا إلي أتقربنا منه أو طبعاً ممكن يتحول إلى كره ومن هادا الكلام يا ريت كل واحد اقنع نفسه انه حب من أول نظرة انه يصحح مفهومه وهو انه أعجب من أول نظرة طبعاً أكيد بتقولوا اش الفضاواة هادي مرة فرقت معاه الكلمة ؟ وممكن واحد تاني يقول طيب اش الفرق؟ بكل بساطة أقلك لو أقنعت نفسك انك حبيت حتكون كإنك بتربط نفسك بالشخص اللي حبيته (طبعاً على حسب كلامك) عقلك الباطن راح يخليك تتعلق فيه زيادة وراح يعميك عن جميع أخطائه مهما كانت كبيرة وراح يخليك تلتمس له الأعذار مهما عمل فيك وبكل صراحة راح تعيش نفسك في وهم سخيف وتسمع أغاني أم كلثوم وعبد الحليم حافظ وفيروز ومحمد عبده وووو الخ وتعيش كذبة أنت كذبتها على نفسك وصدقتها وممكن في الآخر تنصدم في انه حبيبك (على كلامك) ما أتقبلك أو رفضك أو أي شي ثاني يزعلك طبعاً هذا الكلام لو كنت مقنع نفسك انه حب من أول نظرة إما لو قلت إعجاب من أول نظرة و أقنعت نفسك انه إعجاب وقتها ممكن تعطي عقلك للتفكير للتميز بين الصح والخطأ بين محاسن الشخص ومساوئه تعطي عقلك فرصة لمقارنة مدى التوافق بينكم بعد كذا إذا عجبك الشخص أكثر من السابق ساعتها نقدر نقول انه حب مو كلام فاضي و طبعاً ممكن تشوف مساوئ الشخص وتبعد عنه وطبعاً كلنا مساوئ وأخطاء بس أخطاء عن أخطاء تفرق مساوئ عن مساوئ تفرق .
وقت ما تحب الشخص بعد الإعجاب والتفكير والمقارنة ساعتها نقدر نقول عبارة "الحب يبدأ بالصدفة وينتهي بالإرادة" وكلمة أخيرة لزيادة التوضيح إحنا بنشوف ناس كثير في السوق في المطعم في العمل في المستشفى في الشارع في المناسبات الخ ممكن الشاب يشوف بنت زي القمر وتكون أجمل بنت رآها في حياته حتى الآن طبعاً أجمل بنت حسب مقياس الجمال عند هذا الشاب والبنت ممكن يسير لها نفس الكلام طبعاً الشاب أو الفتاه كل واحد فيهم أعجب جداً جداً بما رآه هنا عندنا احتمالين
الاحتمال الأول الولد أو البنت ما أتصرفوا أي تصرف غير عادي وممكن يرجعوا البيت ويفكروا ساعة ساعتين يوم يومين اسبوع شهر وبعدين في الأخير النسيان كل واحد نسي الموقف إلي سار ونسي الشخص إلي شافه على الرغم من انه أجمل شخص رآه في حياته
الاحتمال الثاني انه ما تتوقف عند كدا لأ بالعكس كل واحد فيهم يحاول يوصل للطرف الآخر طبعاً مو شرط بالطرق الغلط ممكن مثلاً يتقدم للخطبة ومع الأيام والتواصل ممكن تتطور العلاقة إلى حب أو ممكن إنها تنتهي.
عشان كده نشوف ليش انه الزواج الإسلامي التقليدي غالباً يكون هو انجح زواج حتى الآن لأنو بيمشي في الخطوات الصحيحة الأهل شافوا البنت عجبتهم اتقدمولها الولد شاف البنت الشوفة الشرعية عجبتوا خطبها وفي فترة الخطوبة ومع تعرفهم على بعض أكثر حبو بعض واتعلقوا ببعض والله يوفقهم وممكن يفترقوا لأنو ما يقدروا يحبوا بعض
طبعاً عشان أكون منصف في زواجات بطرق تانية بتنجح سواء عن طريق النت أو الجوال أو غيره من الطرق بس غالباً ما تفشل قبل ما يكمل الزواج 3 سنوات لأنو من البداية لبس قناع الحب أعمى وانعمى.
وعشان أكون صريح معاكم إنا لغاية تقريباً شهر كنت مؤمن بفكرة الحب من أول نظرة.
وفي الأخير هذي وجهة نظري والاختلاف في الرأي لا يفسد للود قضية
وآسف إني طولت عليكم
وما هذه إلا شخابيط قلم
ياريت الكل يشاركني ويقلي وجهة نظروا في الموضوع
"هل هناك حب من أول نظرة؟"
|
06-08-07, 11:12 AM
جديد مواضيع قسم الارشيف
العرض العادي
