المنتدى :
من عيون الشعر العربي والعالمي
ديوان المزاد بقلـم / د. غريب جلال ( طبيب القلوب ) " عامي "
رباعية الضمير
المسافة بين ضميرك والعمل
تِفرِق كتير
ياللى بتدوس عالعمل وبتهمله
إوزن ضميرك..واسأله ..
ماتلاقى أصدق م الضمير..
الكل إخوة م الصغير للكبير
زى ما ادم أبويا
هو برضه كمان أبوك
يبقى لازم تعتبر
إن اللى جايلك يطلب الخدمة
أخوك
وان البشر محتاجة دايماً بعضها
فاللى بيحفظ ودّها
دايماً بخير
فالمسافة
بين ضميرك والعمل
تِفرِق كتير
ــــــــــــــــــــــــــــــــــــ
احتجت مرة للطبيب
وان كنت عمرى ماعِزُّهم
لكن لقيت الكحة زايدة
والحرارة بتِرتِفع
فانا قلت ازور عم الطبيب
يمكن بعلمه أستفيد
وأنتفع
وأتارى محسوبكم فى خيّة الدكتور
وِقع
فوق الجدار لِستة بريئة
واللى فيها مش برىء
فوق ما يتصور خيالى
أو يطيق
كشف عادى
كشف مستعجل وبس
كشف مستعجل قوى
والسعر عالى كمان ونار
بالمصرى قال إيه
والدولار
لا قدرت اصدق اللى شفته
ولا قدرت كمان أقُـــر
وف نفس لحظة ماتصدمت
كنت عامل
خلف در
قلت ادوّر عاللى من توبى
وتوبهم
سبت قلبى يدلنى على خط سيرى
قام واخدنى عالأميرى
يعنى رحت يا كرام
مستشفى عام
ملجأ الناس الغلابة
والتقيت نَفسى يا عالم
وسط غابة
المريض واقف يسب
والطبيب عمّال يحب
واللى شايل حاجة ساقعة
وفول ولب
واللى بينادى على امُّه
واللى واقف يشكى هَمُّه
واللى مش لاقى المدير
والمدير ولا حد هامّه
غير فلوس الكشف
وطابور الزباين
واللى باين
ياكرام
إنى مش حاقدر أكمّل فى الزحام
والمهازل فى الأميرى
فوق ما يحصرها كلام
فوق ما يقدر حد يتحمل ويقدر عالسكات
داللى داخل كان سليم
وامّا داق الذل
مات
قلت أروّح بيتى
واعمل
كمّدات
ــــــــــــــــــــــ
فالمسافة بين ضميرك
والعمل
تفرق كتير
و( الصبر مفتاح الفرج)
مكتوبة بحروف من دهب
فى المصلحة
فوق الجدار
والصبر دايب فى هوا الأوضة
وفى تراب السجاجيد اللى دابت
إنتظار
و (الصبر مفتاح الفرج) تِشرِِب مرارة
بسيونى بيه حالف ما يمضى
الّلأ ان مضت كل الوزارة
والشطارة
إن أعصابه حديد
بس إحنا دايماً نتحرق
زى السيجارة
والدوسية فوق الدوسية
فوق الدوسية
بسيونى بيه
ولا فيش رقيب أبداً عليه
إلا الضمير
ودا مات فى أول عيد كبير
بعد الغلا
والمسألة
متشبِّكة
لو يوم حاولت تفكها
حاتعقدك
والدرج مفتوح يندهك
( إبرز لتُنجز)
والضمير يشبع موات
والسبت فات
والحد فات
وكل يوم بيفوت
زمان
غرقان أنا فى البحر لاحمر
والسمك دايماً جعان
نفس السمك
نفس الحيتان
نفس العيون الميتة
نفس العيون اللى رمتـنى من سنين
على غربة الروح
والمكان
غرقان أنا
فى البحر لاحمر
يا زمن مطحون
جبان
الظلم ياكل جتتى
وكل اللى عشت عشانه
هان
هل يا ترى فيه حد حاسس
باللى كاين
واللى كان
يا شمس جايلك قلب
لسة بتطلعى
فوق اللى خان
فوق اللى باعنى واشترانى
وباعنى تانى للهوان
غرقان أنا يا أرض مصر الطيبة
كان نفسى ألقى فيكى
ضلاية أمان
يا بحر نيل فرّط فى حقه
واستكان
مابقاش من الجسم النحيل
غير بس روح
واقفة على راس الوطن
تنده بصوت الحق
وتدق البيبان
غرقان أنا فى البحر لاحمر
والحيتان
نفس الحيتان
*********************************************************
الدروس الخصوصية
اصحى يا نايم واسمع ليه00
التلاميذ بتمد وتجرى00
م العصر لحد الفجرية00
وامـا سألـت عـلـى الـلـى بيجرى00
قاموا قالولى دروس خـصوصية00
درس خصوصى ازاى ياخوانا00
والـمـدرسـة كـان إيـه لـزمـتـها00
واحنا ذاكرنا ازاى فى زماننا00
والمدرسة كان لــيـه أزمـتها00
تـبـقى عــيـالنا طول اليوم00
داخلة بـيوت مابنعرفهاش00
حتى اليوم بيضيع فى الشارع
لاهـو بـيـذاكـر ولا يـقـراش00
عمال طالع نازل بس00
ده بـيـمد لأنـه اتـأخـر00
ودا بيصور ورق الدرس00
والمجموعة يا دوب راح تبدأ00
والأســتاذ مـحمود بـريـفـكس00
يـدى الـدرس كـمان بـالـساعة00
زى الـمـكـنـة ومـن غيـر نفس00
والأسـتاذ مـتـولـى شـاهـيـن
أجدع أستاذ فى الجغرافية00
يـدى خريطة أو إتنين00
لازم حايجولك بالعافية00
كـــل الـطـلـبة بتحجـز عنـده
قبل السنة قال إيه بسنتين00
والأعـداد بـيـقـول مـحـــــدودة00
فى المجموعة يا دوب خمسين00
وبــيـاخـد تـمانـيـن عالراس00
بس الناس حاتجــــيبله منين00
هى النـاس بـتجيب م البحر00
واللا الناس أصحاب ملايين00
والأستاذ محمود مسروع00
هو ساعات يــمكن بـينجح00
لكن عمره ماجاب مجموع00
مش بالذمة دى تبقى أذية00
واصحى يا نايم00
واسمع لية
****************************************************
المزاد
مين يزود00؟
مين كمان00؟
إحنا بنبيع اللى كان00
إحنا بنبيع المحــبة00
والمودة00
والأمان00
زى ما باعت حبيبتى00
زى ما باع الزمـــــان00
إحـنا بـنبـيع اللى كان00
الليالى الحلوة00
والشوق00
والمحبة00
فكرونى00وحب إيه00
وفات المعاد00
كله نــازل عالـرصيف00
كله داخــل فى الـمـزاد00
كل إحساسنا بـحياتنا 00
وذكرياتــنا كــل لــيلة00
حتى قصتـنا الجمـيـلة00
كـل أشــواق الـبـعـــاد00
كـله داخـل فى الـمـزاد00
مد إيدك00
شوف000وجرب00
زى ما جربت قبلك00
واوعى رجـلـك00
واوعى قـــلبـك00
ينخدع من كلمة حلوة00
أو يـصــدق فى الحنان00
مين يزود00مين كمان00
إحنا بنبيع اللى كان00
لمسة الإيـد اللى هـانـت00
رعشة القلب اللى هــان00
كل أوجـاع اللى فـــارق00
واللى داق معنى الهوان00
كـل نسـمة حلـوة هـفـت00
من سطوح بنت الجيران00
بـسمــــة الـبنت الخجولة00
حتى إحســــاس الرجولة00
كله فـــــارش فى الميدان00
جنب بعضه00زى بعضه00
كــل دا ومــن غـير ميزان00
إشترى00قلب00وفــاصل00
فى اللى حاصل00واللى كان
لمـــة النــاس الـحبــايــب00
والــسـؤال على كـل غـايب00
كل كلمة قالها راجل إبن راجل00
واحنا كنا معاه زمان00
كلـــه خــردة00
شروة واحـدة00
قسط 00كاش00
قول00يابلاش00
بعنا ياللا00
ياللا بعنا00
بعد ماضاعت00
وضعنا00
بعد ماخان اللى خان00
مين يزود00
مين كمان00
إحنا بنبيع المودة00
والشهامة00
واللبان00!
إحنا بنبيع اللى كان00
كل اللى كان00
****************************************************
فى محرابك
أنـا عــاشق فى محرابــك
وروحى فانوس على بابك
وانــا فى المبتدا منك
ومن نيلك وفى ترابك
أضم الاهة بين قلبى وبين قلبك
أفسر حــلم لــــيالـيّه على دربك
يعيش الحلم كالإنسان بلحم ودم
يلملم فكرة الأوطــان وطعم الهم
يبص لفــوق يـــلاقيكى
قمر فى الــمشربية حلال
يقول مـوال على عنيكى
وفى عنيكى يلاقى الأصل والمنشأ
لكل قلــوب تحب الوصل وبتعشق
زمان رايح زمان اًتى
فى دمى ودم إخواتى
بتسرى كالنسيم فى الليل
وحسـك معجبــانى أصيل
بيخلق فـــيه ما يــخلق
ويرسمنى سحابة صيف
تضلل عالوطن كله
وتجـــمع كل أحبابك
وانا عـــاشق فى محرابك
وروحى فانوس على بابك
وانا فى المبتدا منك
ومن نيلك
وفى ترابك
واصحى يا نايم وحد الدايم
رمضان كريم
****************************************************
مصرى
شط الكنال عـاشـق00
شـط الـكنــال فـنان00
شط الكنال مسحور00
وانا اللى شربت من نوره00
باسحــركم واصحـــصحكم00
فى كل سحور00
أنا المصرى00
سبايك من عصور النور00
راقين دهبى وراقين لولى00
وتـرس ومـنـجـلة وعـبور00
عـيـون مـلـيـانـة شـقـيـانـة00
وأنـفـاسـنـا مـدد وعـطــور00
أبويا النيل واخويا زويل00
وأولادى شموس وبدور00
قريت محفوظ قريت حقى00
وكان واجبى أساس حقى00
كتاب منشور00
أنا المصرى00
سبايك من عصور النور00
حـنـان قـلـبى شـجـن سـومة00
وحـس ريـاض عـلى عــوده00
قلوب مضمومة ملضومة00
منـيـن مايروحوا بيعودوا00
وانا المصرى00
حبايبه كلها حدوده00
أدان أزهــر مافـيـش أطهر00
مـن الـدم الـلى كـان صـأيـم00
عـشـان نـفـطر فى طور سينا00
ولا العرق اللى سال ومازال 00
عــشـان تخـضـر أمـانــيـنــــا00
ما بين ناصر وبين حلمه00
سـافـرنـا كـتـيـر ولا نسينا00
طابور شهدا ورود وزهور00
وانا المصرى00
سبايك من عصور النور00
تـدور الـدنـيـا مهما تـدور00
أنا واقف على أرض الأمل
إنسان00
ورافع إيدى للرحمن00
أكون راضى 00
أكون حمدان 00أكون مستور00
وانا المصرى00سبايك من عصور النور
***************************************************
ممنون يا صاحبى
إتغيََّرِت كل القلوب
والمفردات00
والمعنى مات
عشرين سنة00
وانتَ 00وانا00
واقفين على حدود المنى00
رغم ان صوتنا وشكلنا00
يادوب سكات00
قابضين على جمر المودة00
والمحبة00
والثبات00
والكيان00كل الكيان00
مشدود لصاحبُه00
عمر تانى من الفراق00
كل أيامه00لُقا00
واللُقا00يادوب ساعات00
بس موصولة الساعات00
واحنا أكِّدنا وجودنا00
برّة دقات الساعات00
برة حبَّات الثوانى00والزمن00
والأمنيات00
لينا برّة الكون00
زمن تانى00جميل00
مِن صنعنا00
واقف معانا 00يضُمِّنا00
إنتَ00وانا00
ممنون أنا لقلبك ياصاحبى00
ممنون أنا لقلبك00حبيبى00
إللى دقاته00
زمن عمرى اللى عدَّى00
واللى ات00
ممنون أنا لقلبك00
حمانى وشدِّنى00
فوق المعانى 00اتبدِّلِت00
فوق الحياة من غير حياة00
فوق المَوات00
فوق المسافة00واللُّغات00
وانا كنت فى شُرفِة مطار00
من كام سنة00
ساعة ماغاب الحلم00
جوة البوابات00
عدت ليالى00فوق ليالى00
واللى جاى ف لحظة فات00
واكتشفت انَّك معايا00
فى كتفى00وعنية00
وسمايا00
واكتشفت ان النبات00
لسة عايش وسطنا00
عشرين سنة00
ممنون يا صاحبى00
ومركبى00
ممنون00
أنا00
***********************************************
.حصان ميرى
حصان ميرى
ولما اكبر
حايقتلنى اللى أكِّلنى
فى يوم سكر
وينسانى الى سمَّانى
كمان عنتر
حصان ميرى
ويوم ماكبَر
حاتبقى الدنيا ماتِسْوَى
رصاصة واحدة
فى الجبهة
وتنظرلى
عيون الناس
بلا شفقة
وأَصبح كلمة
على ورقة
وصاحب العهدة يترقَّى
وينسانى
ويِتسَلِّم
حصان تانى
سَبَقت الكل
بس العمر
عدَّانى
وقرب يِنْهى كل الشوط
وانا محطوط
فى زنزانة
وعايش لحظة الإعدام
ونظرة عينى
حزنانة
وندمانة
على الأيام
حياتى بكام ؟؟!!
ولا تسوى
رصاصة
واحدة
فى الجبهة
*************************************************
الشهيد
مسحراتى أنا ولون الحليب إخوة
يهون العمر جنب الطهر والنخوة
صباح الخير على عيونك
يا نور بيتنا وأعز شهيد
جمايلك فوق جبين الخلق مكتوبة
بدون دمك ماكنش العيد
يا واد عمى ومن دمى
بإيـدك هـلّ فـجر جديد
يا واد خالى على بالى
وبــال أولادك الــــحرة
مفارقـتش ولا هنـتـش
على قلوب البشر مرة
يا قلب امك
وكان همك
تحللى بدمك المرة
عشان ترجع
طيور النورس الحزنانة عالمينا
ماحسينا
بلحظة مافتديت سينا
ماشفنكش إلا وانت
نصر ف إدينا
ولما اتوضت الرملة
بدمك يا عزيز عينى
مافيش غير العلم همك
وضمك عمرى وسنينى
أشوفك فى الضمير شمسه
وفى موج القنال همسه
وبكره اللى افتداه أمسه
مافيش فى الدنيا أطهر
من شهيد صايم00
واصحى يا نايم
وحد الرزاق
رمضان كريم
**************************************************
عامل تراحيل
البال مهموم00
والحِيل مقطوم00
والضَهر من الأحمال00
مقسوم00
وباجرجر رجلى وباتجرجر00
على أرضِك تايه متبعتر00
وباعلِّم فيكى برجليَّه00
وف رجليَّه ترابك00
موشوم00
أنا شفت الدنيا ف شباكِك00
عامل تراحيل00
غربِلْت00عَجَنْت00وعلِّـيتِك00
مهدود الحيل00
وف غنِّـيـوتى ريحتِك إنتى00
والكِتف يشيل00
والقلب يشيل فى الأحلام 00
المليانة شباب00
مع إن رغيفى00
ف اخر اليوم00
معجون بتراب00
والقلب ان شاب00
مابيسألشِ00ولا يستطعم00
طعم الأحباب00
لكن إنتى طعمِك تانى00
من فوق القصعة مانسانى00
وبتهمِسى دايماً فى ودانى00
إطلع إنزل00
كانى00ومانى00
وقروشِك جوة السيَّالة00
وانا طالع فوق السقَّـالة00
وباغنى ف حبِّـِك على كيفى00
مشكلتى رغيفِك00
ورغيفى00
مانا عارفِك زَيِّـنا تعبانة00
صاحية من النجمة وشقيانة00
وبْـتِـحْـتِـلِى زى البنى ادمين00
دا لأنِك بَرْضَك إنسانة00
إنسانة ودمِّك من دمى00
من نفس فصيلتى00ومن همى00
مانا بيكى وبعيالِك مهموم00
والضهر من الأحمال مقسوم00
وباجرجر رجلى وباتجرجر00
على أرضِك تايه متبعتر00
وباعلِّم فيكى برجـلَـيَّه00
وف رجلِيَّه 00
ترابِك00
موشوم00
*******************************************
أبسط بسيط
مسحراتى أنا00
والخوف لا قلبى يميل00
منقراتى أنا00
أشتاق لكل جميل00
هو الأمل فى الله00
والصبر يا إنسان00
مخلوق سبب وحياة00
ماتكونش يوم حيران00
ماتقولش ليه وازاى00
ربك مقدرها00
حاتدوق حلاوة حياتك00
وحاتنكوى بنارها00
وتشوف عجايب زمانك00
وتقول مافيش تدبير00
لكن بقوة إيمانك00
الشوك حايبقى حرير00
العمر دا رحلة00
بالود راح تحلى00
والشوق لكل أصيل00
أترك زخارف زمانك00
واعرف00وحس بمكانك00
وابعد عن التهويل00
أبسط بسيط يبسط00
والفطرة غلابة00
نور الحقيقة ادان
00وقراية00وكتابة00
نور الحقيقة ميدان00
فيه العرق بالكيل00
فيه العرق ألوان00
والرك عالنية00
باسحركم أنا فى النور 00
علانية00
وصابح زيكم صايم00
واصحى يا نايم00
أصحى يا نايم00
وحد الرزاق00
رمضان كريم000
*****************************************
البستان
لسََّه الشمس بتشرق دايماً
كل نهار
ترمى خيوطها ف قلب الليل
تهدى قلوب00
وقلوب تحتار00
لسَّه بتجرى الثانية ف ثانية00
لسه بتِتفَتَّح أزهار00
كل نْهار00
يبقى الندى بيبوس عالإيد00
لحظة عيد00
لما يلف الكون من تانى00
ويبقى جديد00
لسة الرزق ف هَم الناس00
والإحساس 00
عبد 00وسِيد00
لسه00ولسه000
ولسه00
ولسه00
زى ما تِصْبَح00
زى ما تِمْسَى00
كل خطوط وفصول الدنيا00
زى ماهى00
مهما اختلفِت00
برضه عادية00
إلا عنيكى بتخلق فيّه00
حق00ورحمة00
وصفحة جديدة00
خلق جديد00
ومناسبة سعيدة00
نور00
إنسان00
مكتوب00
تنهيدة00
نسمة ف قلبى00
وقسمة بعيدة00
إلا عنيكى ياسمِك مِنِّى00
ياللى عيونِك00
عمرى00وسنِّى00
صورتك كانت00
قبل ما كنتى00
زى ما كنت اتمنى00
وكنتى00
مالية حياتى00
وكل وجودى00
ولا بتقلِّى00ولا بتزيدى00
زى النبض00ودقة قلبى00
زى ملامحى00
وبصمة إيدى00
تبقى الثانية تزيد عن ثانية00
فتَّح ياللى ما دُقت الدنيا00
فتح تلقى الدنيا أمان00
طيف ألوان00
فجأة نزِِلت بكل وجودك00
فى البستان00
جَمِّد قلبَك00
وادخل وافرح00
زهر الحب ف قلبك00
فَتَّح 00
بعد سنين الغربة الصعبة00
فجأة لقيتلك فى الكون00
مطرح00
صدََّق نفسك وافرك عينك00
كانت فين الدنيا00
وفينك00
كانت فين البسمة الحلوة00
جاية تنور كل سنينك00
تقلِب كل حدود المعنى00
والإمكان00
تلقى ف حضن عنيها الملجأ00
والأوطان00
شمس بتحضن فجر وليد00
يبقى الندى بيبوس عالإيد00
لحظة عيد00
لما يلف الكون من تانى00
ويبقى جديد00
لسة الرزق ف هم الناس00
والإحساس00
عبد وسيد00
لسه00ولسه00
ولسه00
ولسه00
زى ماتِصْبَح زى ماتِمْسَى00
كل خطوط وفصول الدنيا00
زى ماهى00
مهما اختلفت00
برضة عادية00
إلا عنيكى00!!
*********************************
مشوار
مسحراتى منين ماتكون
أناديلك00
تسافر وسط قلب الكون00
واناديلك00
مابين الناس وبعضيهم00
أمور ياما00
كتير الناس وأساميهم00
كتير ياما00
بتشغلهم من الدنيا00
حاجات ياما00
وتشغلهم عن الدنيا00
حاجات ياما00
بنتحرك فى كل طريق 00
ياخدنا معاه00
لكن نفس الأمل يجمع 00
نفوس ياما00
وحتى الخوف من المجهول00
بيجمعنا00
وحتى كلامنا لما نقول00
بميت معنى00
وكان القلب لسه وليد00
بلون صافى00
وكان زى الصباح لابيض
جميل دافى00
وكان مولود جميل موعود00
لكنه بالقدر موعود00
وسكة طويلة يمشيها00
معاه كل البشر ألوان00
زمايل عمر طول عمره00
مابين صادق وبين خوان00
وكام أمنية عاش بيها00
لا حــققـــها ولا نسيها00
وعاش العمر يتبنى00
أمانى الغير ويتمنى00
تعود الدنيا زى زمان00
لكنه بالأمل واهم00
ماهــــــوش فاهم00
وحايعيش عمره يستنى0000
لأن الدنيا بين زمنين00
زمـن عايــشينـه بـقـلـوبنا00
وزمن عايشينه فى زماننا00
|
07-08-07, 04:04 PM
جديد مواضيع قسم من عيون الشعر العربي والعالمي
العرض العادي
