المنتدى :
الارشيف
عذاب مَلك " قصتي الحقيقية "
السلام عليكم
اولاً حابة أعرفكم بنفسي
اسمي ملك " طبعاً مب أسمي الحقيقي " حابة أقص عليكم قصتي او بالأحرى مأساتي يمكن يكون فيها عبرة ودرس لغيري عشان لا يغلط نفس غلطة مَلك ويعيش الألم إلي لليوم أني أعيشه
بسم الله نبدأ
أسمي مَلك من مواليد 81 خليجية المولد والنشأة من عائلة محافظة ومتدينة جداً عندي أخوين أكبر مني واخت واخ أصغر مني عشت معزولة عن المجتمع ما عدا أهلي والمدرسة ما عندي صديقات ولا غيره بحكم ميول أهلي الشرقية المحافظة " المتعصبة " .
حياتي كانت سعيدة أهلي ما بخلوا علية بشي بحسب إمكانياتهم البسيطة فكنت مدللة ما اقول شي إلا وصلني طبعاً في حدود المعقول.
بداية مأساتي كانت لما نسيبتي حصلت لي شغل وياها بنفس المكان هذا بعد ما خلصت الثانوية ومليت من الجامعة وتركتها فبطبيعة الحال وظيفتي ما كانت على مستوى وكان معظم الشغل مانيول جوب " يدوي " ويحتاج كسار ظهر ونهاية الشهر ما تسوة عليك ال 120 دينار إلي تحصلها شاءت الصدف أني كنت في قسم كله بنات وكل أربع بنات في طاولة فبطبيعة الحال كونت صداقة قوية مع البنات بسرعة والمهم أني فكرت إني مثل ما تربيت على ناس أثق فيهم وثقت في هالبنات بسرعة " وهذا أكبر غلط " لأن في ناس عمرها ما تستحق الثقة المهم مر شهر وإثنين وكانت اقرب صديقة لي من هالأربع في مثل عمري اكبر مني ب 2 بس راح أسميها بدور لأن بدور كانت بداية القصة.
بدور حبوبة وجميلة وجها دائري قمري عيونها عسلية واسعة البنت سمرة رشيقة بس قصيرة " الكامل الله " عندها زوج يحبها يعبدها ولها منه ولدين وبنت ، الثانية كانت ريم وهذي هي العاقلة فينا يمكن نهاية العشرين او دخلت الثلاثين ما كان فينا أحد له الجرأة يسألها لأنها عازبة للحين البنت ملتزمة حبوبة وخفيفة دم والأهم من كل هذا كانت حقانية خلوقة وفعلاً تستحق الثقة كانت بيضاء البشرة ما كأنها منا وفيها طول حلو بس شوي عريضة رقم ثلاثة القرارة إلي ما ترضى عن شي وعلى طول تتحرطم وتحطم وهي دايم مضلومة هذي إسمها قمر فرأيها هي مظلومة دوم وفيها بخل مو طبيعي ولو إنها حبوبة لين بغت ضعيفة قصيرة سمرة بس حديناها على كريم اولي وفتح لونها ولليوم هي تستخدمه.
مساعدة المسؤل: شخصية ****ة وفي نفس الوقت تعور القلب الإنسان عقب إلي يشوفه منها ما يقدر غير إنه يشفق عليها صار لها 12 سنة متزوجة وما قادرة تحمل ومطلعة حرتها في البنات مساكين وعلى فكرة مجموع البنات في القسم 35 بنت من آنسات وسيدات وكلهم من نفس المنطقة خالك عمك اخوك ما عدا أني ونساباتي الثنتين وصديقة لنا كنا من غير هالمنطقة.
ارجع لطاولتي ملك ، بدور، ريم ، وقمر ونسيت شخصية مهمة عذروني سمر وهي على طاولة ورانه لكن كانت صديقة لبدور ولي بعد بس هم أقرب لبعض مني لهم .
بدور: مَلك حبوبة سوي لي خدمة
ملك: آمري عمري تدللي
بدور : تذكرين ولد أخوي عبد الله " طبعاً هو بطل القصة " إلي أني متعلقة فيه وايد وعلى طول أتكلم عنه.
ملك : وشلون ما عرفه وإنتين خابة راسنا به عبود وعبود قال عبود سوة عبادي ، أنزين شفيه هالمرة شمسوي.
بدور : صار له تقريباً شهر ما سأل عني وعلى طول لين اسوي له مسكول ما يرد إلا بمسكول وحتى ما إيي البيت العود .
مَلك: زين يمكن عنده ظروف سبحان الله اتصلي شوفيه.
بدور: لا . لازم هو يتصل أني عمته أكبر منه هو لازم يسأل عني مو العكس.
ريم : إلي يسمعش تتكلمين عنه يقول زوجته مو عمته . " بطريقة مزحة ونغزة في نفس الوقت لأنها كانت تلاحظ أن بدور تتدخل في حياة عبد الله زيادة عن اللزوم وطبعاً اني ما كنت أدري لأني توني بادية وهم بادين قبلي بسنة ويعرفون بعض من قبل.
قمر: إهو شلون شكله يعني حلو ينجز ينفع للمغازل . مسكينه قمر عمرها 26 سنة وتدور الحب وعلى بالها أنه بيها عن طريق التلفون والمغازل ويا الصبيان كلنا كنا ندري أنها تكلم واحد قاص عليها يسحب منها حتى الفلوس وتطرش لها كردت على أساس انه يحبها وبيخطبها وإحنا ندري يستغلها وكل ما كلمناها ما في فايدة.
مَلك: أنزين الحين شنو تبين بالضبط بدور شلون أخدمش.
بدور: سوي له من تلفونج مسكول بشوف يتصل او لا.
ملك وريم مع بعض: لا مالي كار ما ابي اوزع رقمي وريم اعترضت بعد انه غلط.
بدور: خيو لا تخافين هذا ولد اخوي مهما كان ما راح يصير شي اني بكلمه.
بداية ما رضينا بس مع إلحاح بدور وكسرة خاطرها وافقنا وبدينا اللعبة وياريتنا ما بديناها.
لحد إهني راح أكتب اليوم وخبروني لو حابين تعرفون كامل المأساة وراح أكملها تحياتي لكم
مَلك
|
30-05-07, 10:59 PM
جديد مواضيع قسم الارشيف
العرض العادي
