المنتدى :
الارشيف
حكاية روايات عبير وكاتباتها
كلنا بنقرى روايات عبير واحلام (طالما انت هنا بالمنتدى صح؟) وكلنا لما بنفتح اول صفحة بالرواية بنلاقى مكتوب العنوان الاصلى للرواية وسنة الطبع واسم المؤلفة وتحت فى آخر الصفحة مكتوب
Harlequin (Cyprus) ltd يعنى فرع هارليكوين بقبرص ايه هى بقه هارليكوين دى ؟
ومعروف ان هارليكوين هى اكبر دار نشر بالعالم لنشر الروايات الخاصة الرومانسية بالمراة (الزبون الاساسى لها اناث غير الروايات الرومانسية الادبية التانية )
طيب البداية كانت ازاى ؟؟؟؟؟؟؟؟؟؟
البداية كانت فى انجلترا زى مهو متوقع (كل البطلات انجليزيات تقريبا زى ما احنا عارفين ههههههه) وكانت شركة اسمها مايلز اند بوون Mills & Boon هى لسة موجوده لحد النهارده لكن كجزء من هارليكوين الشركة اسسها اتنين بريطانيين Gerald Mills , Charles Boon سنة 1908 لنشر اى روايات لكن بقت متخصصة بس فى الرومانسى فى الثلاثينات وكانت الخدمة قائمة على البيع بالمتاجر المعتاد والاشتراكات (وهو الاساسى )
يعنى ان الروايات المطروحة بالسوق كانت اقل عددا من المتاحة كاشتراك شهرى للقارئات واللى بتوصلهم لمنازلهم بالبريد من الشركة وده طبعا لتشجيع القارئات على الاشتراك بالشركة وزيادة المبيعات خاصة ان قوانين الشركة حتى اليوم ان الكتب تستمر بالسوق لمدة 3 شهور فقط بعد كده تباع مستعمله (يعنى زر الراجع بتاع الصحف ) وكانت بتوزع فى انجلترا وامريكا فقط
اما شركة هارليكوين اللى بنترجم منها روايات احلام وعبير هى شركة كندية اتاسست سنه 1949فى شكل شركة صغيرة جدا وكانت بتطبع كتب منوعة من قصص رعاة البقر لكتب الطبخ يعنى كتب خاصة بربات البيوت واسسها زوجين هما ريشارد ومارى بونيكاسيل Richard and Mary Bonnycastle وزى ما قلت ان روايات مايلز اند بون كانت محدودة فاتجهو لطبع او اعادة طبع الروايات دى وتوزيعها فى كندا ولما مارى (الزوجة شافين شطارة الستات ) لاحظت ان الروايات الرومانسية لها شعبية كبيرة قررت ان شركة الطباعة الصغيرة بتاعتهم تتخصص فى الرومانس فقط وفكرتها دى كانت ناجحة جدا جدا لدرجة ان مبيعات الشركة كبرت جدا وتوسعت فى الستينات بقت شركة هارلكوين شركة كبيرة واشترت مايلز اند بوون نفسها !!!!!!!!!!!!!!!!!!(ده بيفكرنى بمثل علمناهم الشحاته سبقونا على الابواب ههههههههههههههه) ومن اول 1971 بقت للشركة كاتبات من امريكا وكندا واستراليا بخلاف الانجليزيات طبعا (يعنى الدول الناطقة بالانجليزية لان زى ما احنا ملاحظين لازم البطلة تكون بتتكلم انجليزى والبطل سواء من انجلترا ولا من كولالامبور لازم غصب عن عين اللى خلفوه يكون بيتكلم الانجليزية بطلاقة والجمله الشهيرة مع لكنه جذابه فاتنة ههههههههه.......)
اما كلمة قبرص دى فده فرع الشركة لان لها مكاتب بكل انحاء العالم وطباعة الروايات لغاية السبعينات للشرق الاوسط كانت بقبرص
فى السبعينات تولى ادارة المبيعات بالشركة لارى هيسى (موش مهم الاسم حتى لو قلنا عبد الحفيظ هيسى موش فارقة المهم الراجل ده عمل ايه ؟؟؟؟؟؟ اول حاجة وحد اشكال الروايات بالشكل المعروف اللى فى دائرة بها الصور و مكان العنوان واسم الكاتبة المالوف وبعد كده قال انه هيبيع الروايات بنفس مبدا بيه ادوات النظافة انه هيوزع الكتب فى محلات البقالة والسوبر ماركت والصيدليات والخردوات يعنى الامان اللى بتروحها ستات البيوت وبقفوا كتير فيها
عشان كده كتير من الروايات بتكون لها طبعتين واحدة هارليكوين والتانية مايلز اند بوون واحنا الصور اللى بتكون على الغلاف العربى غالبا هارليكوين لكن القديمة جدا منه اصلا مايلز اند بوون على فكرة وفى حاجة ظريفة جا باغلفة ماليز اند بوون القديمة ان لازم االصورة المرسومة يكون لها علاقة بالقصة ولازم اوصاف الابطال تكون فعلا فى الصورة يعنى مايقولش البطلة شقرة وتطلع الغلاف شعرها احمر مثلا والروايات الاولى من هارليكوين كانت بتكتب اسم الرسام كمان بعد كده كطنشوا وبقى الغلاف فى الهند والرواية فى فى البرازيل والاغلفة الحديثة اللى من اول 2001 مثلا كل البطلات بقمصان النوم ده لو هى بنت ناس ولبسته اصلا هههههههههههههههه عشان كده روايات احلام اغلفتهاالاخيرة ا من تاليف الناشر العربى الا حاجات قليلة جدا فى البدايات
يعنى مثلا ده غلاف انين الساقية القديم
وسااعات الغلاف العربى بيكون رواية تانية خالص
[IMG][url]http://www.shazly.net/~freehosting/3x1/3scq82ir_flag.jpg[/url[/IMG]]
وبالرغم من حركات تحرير المرأة اللى ظهرت بالغرب بعد كده بالسبعينات واللى تنات بزوال الروايات الرومانسية الموجهة للمراة لكن برده مبيعات الشركة زادت لا موش كده وبس لكن الشركة توسعت واصدرت سلاسل مختلفة من الروايات
ملاحظة :
الروايات الاول كانت شقين
رومانس وده اللى بيترجم عندنا فى شكل روايات عبير القديمة وتاريخى (زى حاجات باربرا كارتلاند كده )
بعدكده ظهر انماط زى اميريكان رومانس وغيرها فى صورة السلاسل بتاعة النحاس وكده
اما حاليا روايات احلام بتترجم من سلسلة هارليكوين بريزينتس Harlequin Presents وبعدين هشرح الفروق بينها بس خلينا دلوفت فى حكاية الشركة دى الاول .
الكاتبات
لازم كل كاتبة يكون لها اسم شهرة الاسم ده من حق الشركة حصريا ولو سابت الشركة لشركة تانية فالاسم تتركه وتستخدمه الشركة ممكن لكاتبة اخرى جديد (جايز ده يكون السبب ان فى قصص رائعة لبعض الكاتبات وروايات اخرى لنفس الكاتبه زبالة جدا الله اعلم ؟؟؟؟؟؟؟؟؟؟؟؟)
على فكرة اجر الكاتبة المبتدئة بهارليكوين 2000 الى 3000 دولار والمحترفات 15000 دولار وبعد نشر الرواية لها نسبة من الربح ولو الكتاب فرقع اوى ممكن توصل ارباحها الى 40000 دولار
لو فى حد عنده الموهبة بجد هما طالبين كاتبات بس انجليزى طبعا
طبعا (بدون زعل) معروف ان روايات هارليكوين تعتبر من الادب الضعيف القيمة ادبيا لان الشخصيات والاحداث متوقعة مسبفا وحتمية وجود نهاية سعيدة للرواية وشكل معين لابطال
وشروط محدة لشكل القصة :
طول القصة مثلا فى Harlequin Presents ما يتعداش 192 صفحة
فى مواضيع محددة لا يجب الاقتراب منه زى الارهاب والسياسة والمخدرات والابطال المدمنين للكحول وغيرها
وطبعا فى خلطة مكررة لبطلة جميلة صغيرة السن باسم رومانسى جميل سيلينا ولا فلورا (لو باتعة الرواية تسقط ومحدش يقراها طبعا ) بتقايل بطل غير متقيد بالرسميات اسمر ويهبل وغالبا اكبر بكتير (الحته دى بتغيظنى على فكرة ) له اسم رومانسى وقوى (نصهم الكسندر والنص التانى جايك بس انا بحب اسم جايك فمش هعلق عليه ) بيتخانقوا من اول الرواية وهى بتسىء الظن فيه موش عارفة اذا كان بطل ولا سافل ولا ايه ........وطبعا فى الاخر كل حاجة بتمشى اخر حلاوة .
احصائيات الشركة بينت ان متوسط عمر القراء 39 سنة هو الموقع اللى بيقول موش انا 45% منهم خريجى جامعات 50 % بيشتغلوا بره البيت
فى حاجة برده ملحوظة بالروايات ان كل البطال بيض موش من اعراق تانية حتى لو الرواية بتتوزع بالصين ولا الفليبين لازم يكون الغلاف لاتنين من الجنس الابيض (القوقازى يعنى ) زينا يعنى لحسن حد يكون موش فاهم
وبالنسبة للنوعية دى من الروايات بيلاحظ ان اللى بيقراها وهو احنا طبعا بيكون نوع من الفسحة من هموم اليوم ايه يعنى الرجالة بيخرجوا ويمارسوا رياضة ده الكويس منهم والباقى بيدخن الستات بتقرى رومانس ههههههههههه
معلومات طريفة :
58% من مبيعات المطبوعات بالولايات المتحدة روايات رومانسية (هارليكوين او غيرها بس نفس النوع يعنى موش روايات تاخد نوبل يعنى )
احصائية اجراها خبراء بعلم النفس ان الستات اللى بيقروا رومانس بمارسوا علاقات حميمة مع ازواجهم او شركائهم (فى امريكا )بنسبة 74% زيادة عن الستات اللى مابيقروش وااااااااااااااااااااااو ؟؟؟؟؟؟؟؟
فى الاربعين سنة الاخيرة لو جمعنا كل الروايات هنلاقى ان:
ابطال هارليكوين تبادلوا قبلات بعدد اكتر من 20000 قبلة (بالمناسبة الروايات المترجمة كلمة عناق يعنى بوسة غالبا موش حضن بس هما بيتكسفوا شوية ........) واكتر من 30000عناق
والابطال اتجوزوا اكتر من 7000مرة
سنة 99 باعت الشركة اكتر من 150 مليون كتاب بمعدل 5.5 كتاب بالثانية
عدد قراء هارليكوين بمريكا الشمالية فقط اكتر من 25 مليون قارىء
والكتب تباع فى اكتر من 100 دولة وبتترجم ل24 لغة مختلفة
دى هى المعلومات اللى قدرت احصل عليها عن مؤسسة النشر وطبعا اللى عنده اى اضافة يا ريت
باقى الموضوع ان شاء الله اكملة بمعلومات عن الكاتبات نفسهم ان شاء الله تباعا
يارب الموضوع يعجبكم ويسليكم
وطبعا الموضوع لسه هيتكمل بمعلومات عن الروايات والكاتبات
|
25-10-06, 04:54 AM
جديد مواضيع قسم الارشيف
العرض العادي
