بسم الله الرحمن الرحيم
السلام عليكم ورحمة الله وبركاته
ملاحظة مهمة جداً جداً / البارتات الأولانية نظراً لطولها الممل في الدفتر قسمته بالوورد كل بارت راح يصير بارتين فلا تتعجبوا ان الخاطرة راح تتكرر في بارتين ورى بعض لأنهم مكملين بعض
واتمنى تتفهمون هـ الشيء ..
ومواعيد نزول البارتات بـ اذن الله كل سبت وثلاثاء
فـ اعذروني اني مراح ارسل لكم روابط >> فيس منحرج
اترككم الآن مع هذا البارت " قراءة ممتعة "
البارت الثاني
احـــس بالـضـيـقـه بــــدت تحـتـويـنـي=واشوفهـا كـل يـوم مـن زود فــى زود
واخــاف مــن مـاضـى قـديــم يجـيـنـي=ويميل حضى ويصبح الدرب مسدود
واصـيــر ضــايــع والامــــل مقتـفـيـنـي=واصـيـر ادق الـبـاب والـبــاب مـــردود
واذا فـتــحــت الــبـــاب زت الـونـيــنــي=تـقـول مـطـعـون بخـنـجـر ومـضـهـود
مـالـى جــدا يـاكــود صـفــق اليـديـنـي=ورجـوا خـيـال صــار مـاهـو بمـوجـود
احـيـانـا اهـونـهــا واخــــاف تـحـديـنـي=وغيرى يقول افرح ترا العمـر محـدود
محتـار مـدرى كيـف ابقضـى سنينـي=لاالوقت طايعنى واخاف الـف منقـود
يالله يـــــا ربـــــى عــســـاك تـهـديــنــي=واعوذبـك مـن شـر حاسـد ومحـسـود
سجـدت لــك خــوف ومهـابـه وديـنـي=سـجـدت لـــك يـــارب يـاخـيـر مـعـبـود
~ سعد بن حسين قاسم ~
__________________
سمع طرق الباب ..
-: تفضل
-: هيه انت شوف انا مسافر السعودية انتبه لعمتك المريضة
وعيالي بـ آخذهم معي
هو يفهم العربية ولكن لسبب ما لا يستطيع التحدث بها -:
حسناً اطمئن عمتي تحت ناظري والأطفال دعهم هنا فأنا اعشقهم
ابتسم -: لا الوالد يبيهم وجيت اسلم عليك
وهالله هالله بالألبوم الجديد
-: سيروقك فهو عن زوجتك
*
نظر إليها نظرة خاطفة لكنها لم تنتبه له ابداً .. فهو مرتدي نظارة
سوداء تحجب عينيه عنها ..
وهي الأخرى تبحر في خيالها الواسع لعلها تجد طرف خيط لحياتها السابقة
..جواد عندما رآها لا تتحدث ابداً تنحنح قائلاً -: الحين كذا حجابك ؟
-: ...............
نظر إليها بطرف عينه -: الجازي انتِ معي !
انتبهت لصوته فنجت من دوامة سرحانها المرهق وقالت بفزع -: نعم
-: لا ابد سلامتك .. بس اسألك الحين انتِ مرتاحة وكذا حجابك
عقدت حاجبيها خلف الغطاء -: امممم عادي مابه خلاف
-: بس الرمية احياناً تكون شفافة وبعض الاحيان تطير
مع الهوا يعني ماينفع ..
بدأت ملامحها تلين -: طيب والسواة
وكأنه أخترع الذرة -: عادي مثل باقي البنات البسي
نقاب وغطي عيونك بالشيلة..
صمتت لتفكر .. جواد ايضاّ صمت عندما رآى بأنها فضلت الصمت موقفاً لها .. ودام الطريق في صمت دامس
-: احححم وصلنا
اوقف سيارته امام منزله او لنقل فلته وفتح الباب من جهته وكان سينزل ولكن لف بسرعة -: لحظة جزاوي انا بفتح لك الباب خليك
ونزل بسرعة واتجه لباب الجازي وفتح لها الباب ببتسامة -:
عروس لازم ندلعك .. ثم غمز
ابتسمت من خلف الغطاء والحمرة تعتليها .. رغم انها لم تذق هذه الكلمة ولكنها تنحرج منها ولاسيما ان كانت على لسان جواد بالذات ..
نزلت من الباب وتشعر بأنها اميرة وبدأت تمشي رويداً رويداً
-.. يوه فشيلة امشي واترك جواد
جواد من خلفها -: وش فيك توقفتي يلا دخلنا
ومد لها يده .. قدامهم زوجك هاااه عاد لاتفشلينا
همست -: ان شاء الله
ومسكت يده وشدتها بقوة وهي متوترة جداً .. وصلا الباب
-: احـم احم يا ولـــــــد درب .. طريــــــــــــق ..
ام جواد جاءت مسرعة الخُطا ومعها مبخرة العود -:
اللللااا الللااااا لللااا لااااوووي
-: اكشفي مافي احد
ابعدت الغطاء وماشعرت الا بحضن قوي من ام جواد تبارك لها وتسمي عليها من عين كل حسود ..
جواد ابتسم وتقدم لأمه وقبلها على رأسها ويديها -: هاه يمه كيف البيت بدوني عساه شين
سمع صوت رجولي من خلفه -: الا قول الليلة كلها تمت تبكي تقل عزا ولا ورعها ضايع
ضحك -: افااا يمه لهدرجة .. وبصوت واطي .. انتِ خكرية
شهقت -: وش قلة الحيا هذي .. سمعت يابو جواد وش قال
اقترب منهم -: ليه وش قـ .. لا ماشاء الله تبارك الله ذي بنيتنا
الجازي لا اله الا الله ووفقتم بـ اختيارها
انحرجت ووجهها انصبغ بلون الحمرة .. جواد لمها من كتوفها -:
يبه حدك ترا اخليها تتحجب منك .. لا تتغزل
-: هههههههههههههه يقطع ابليسك انا الحين عمها بمثابة ابـ ...
سكت بحرج ولكي يتلافى ماقال .. الا عيب مادخلتوا عروستنا داخل ترتاح ..
الجازي نبيهه وعلمت ماكان سيقول ابتسمت ابتاسمة تصارع مابداخلها من آلم .. اما عند باب الصالة تطل منه ثلاث اعين
تضمر الشر الاجرامي ومتوعدة لهذه العروس التي ستصبح ضحية لهن >> هذا ماتقوله تلك العيون .. !
.. سحبت الجازي -: تعالي يمه الصالة والمجلس حيل نسوان وبنات بتستانسين .. وانت جواد " بقهر " اذلف مع ابوك في معازيم رجال
يكتم ضحكته -: ليه عزمتوا مايحتاج ..
تجاهلته وذهبت مع الجازي للداخل
يقلد حديثها عندما تقول " هاو " -: هاااو شفيها !..
-: حد قالك تقولها خكرية ياقليل الحيا
-: يبه شدعوة امزح .. الا انت قولي منو فيه
-: منو يعني يافهيم خوالك وعمامك وعيالهم ..
-: اهاا يعني باقي القبيلة سحبتو عليهم ههههههههههههههه
*
داخل بالصالة ..
الجازي يتلبسها توتر فضيع وتحاول جمع ثقتها محاولة في الكلام
ولكنه كله يتبخر عندما ترفع عينيها إلى الجالسات بالصالة ..
-: اقول انتِ يانجمة المكان
رفعت بصرها اليها .. صدق قليلة حيا .. وبجرأة وحدة غريبتين -: تكلميني ...
-: لا اكلم الجدار اللي وراك .. اكيد انتِ
-: الجوهرة !!؟ عيب وش ذا اللسان
-:
عبير لاتسوين يعنني العاقلة .. ترا جد استفزتني
-: الجوهرة ترا بعلم عليم امك وش تبين البنت تقول عنّا
.. ولفت للجازي .. اعتذر لك بالنيابة عنها هي المشكلة طولها طول بعير والعقل عقل حمير ..
ضحكت -: هههههههههههه لا ابد عادي بس حلو
هالمثل من وين جبتيه
عبير قامت وجلست بجانب الجازي -: من مخيخي
الجوهرة بغرور -: وبعدين من انتِ علشان تقولين عني اعتذار مزور .. مايحصل لي شرف اعتذر من هـ الامثال .. وبسخرية
بنت ملجأ هه هه .. وقامت
عبير شهقت من وقاحة الجوهرة ولفت على الجازي المرتسمة على شفتيها ابتسامة هادئة وكأن كلام الجوهرة لم يحرك بها شيء -: الجازي معـ ..
-: آآش حبيبتي صار خير
ألمار الواضعة رجلها اليمنى على رجلها اليسرى وتفرقع العلك بصوت عالي -: اقول .. ونظرت للجازي .. عدساتك
هذي من وين شاريتها
بغرابة -: عدسات !! أي عدسات
ألمار وتريد جرح الجازي بأي حال من الأحوال -: عدسات عيونك
شكلها سو كيوت .. انا لقيت منها في بقشان شريتيه من هناك صح !
-: لا حبيبتي هذي عيوني كذا
عبير لفت عليها -: اوووما عيونك
مسكت عينيها -: ايه .. وضحكت .. طيب قولوا ماشاء الله
.. بمزاح .. اخاف تنظلوني
هللت -: لا اله الا الله ماشاء الله تبارك الله
-: وييييه قطيعه مالت رغم اني عارفة انك تكذبي .. وقامت
بفشلة لفت -: معـ...
-: آشش صار خير
-: بس
-: قلت صار خير
-: طيب آ..
ضحكت -: لا حول قلنا صار خير
-: ok حصل خير حصل خير " وبخجل " الا ممكن
نصير صديقات
شعرت بـ ارتياح لهذه الفتاة -: اكيد ولو
قطع عليهما اصحاب تلك العيون الثلاث وصافين صفًّا امامها
ينظرون لها بتفحص ..
العيون الاولى -: ليه اخذتي جواد
العيون الثانية بفيس حزين -: ذالحين يعقل !!
العيون الثالثة -: ادري بيتركنا اصلاً
وتبادلن النظرات لبعضهن بقلق ..
دخلت ام سطام وهذه عمة جواد -: هئئئئئ انتو وش تسوون هنيا
تبون تقضون ع البنية وبعدها ما راحت شهر عسلها ..
ودخلت بعدها ام عمار وصكت وجهها -: وااه خزياه ..
ثم دخلت ام جواد -: هيه انتو يا مجانين تركوا مرة وليدي
الجودي بقهر وهي تنظر للجازي -: وحد قالها
تسرق رئيس العصابة
الجوري -: انا مو قاهرني الا انه الحين بيعقل
مجدلين -: يعني مافي امل اكشنات كما في السابق..
شيلاء صرخت -: انتو بنات !! عز الله مستقبلكم طار ..
اقول اهجدن..
ام سطام تحادث ابنتها -: الجودي قسماً بالله اذا مادخلتي اسبوع كامل مافي طلعة من البيت
الجودي هذي الطلعات عندها عششق -: هااااه يمه على امرك انا كم لي ام بهـ الدنيا اكيد وحدة وتسوى كل الخلايق ..
تنهدت -: اجل داخل يلا
-: شلون ادخل وانصافي الأخرى في الفضاء تسبح
مجدلين بضحكة شر -: اذلفي انتِ وجور وانا عندي تحقيق شخصي مع الآنسة " وتشير الى الجازي بنظراتها الحادة " نيااااهههاهااا
الجازي عندما استوعبت ماحدث انفجرت ضحك -: هههههههههههههههههههههههههههههههههه
الجوري -: افاا ماخفتي منا
الجازي وتحاول ان تصمت وهي تمسح دمعاتها -: قسم انكم نكته
الأمهات شعرن بـ " فشيلة " وكل ام من امهات الثلاتي ...
ام جهاد -: مجيد اسبوع كامل مافيه مطاعم ولا اكل داخل البيت وتاكلي خبز يابس وطحينية وزيتون ..
مجدلين شارفت على البكاء فالأكل عندها عششق -: لا لا يمه ابوس ايدك لا ..
-: اجل اذلفي ..
مجدلين ذهبت وهي تتحلطم ..
ام الجوري -: وانتِ اسبوع كامل لاب مافي .. والكاميرا مسحوبة منك .. وتلفزيون بح .. والنت مفصول ووش بعد
الجوري شهقت -: خافي الله يامرة عز الله مستقبلي ضاع
خبطتها بجنبها -: قليلة حيا ضفي وجهك يلا ..
-: لحظة .. شكل زوجة الرئيس طيوبة ابي اتعرف عليها >> تتميلح
بتهديد-: طيب طيب ان ماصار اسبوع كامل ..
لم تكمل تهديدها بسبب ان الجوري طارت للداخل فهذه الأجهزة
لديها عشق أيّن كانت ..
ام سطام رفعت حاجبها للجودي -: وانت علامك مالحقتيهم
قالت وهي ماسكة خصرها وتهز رجلها بقلق -: منتظرة تهديدك
ام سطام لفت خلفها وجدت علبة العود وحذفتها عليها لكن الجودي
كانت اسرع من ذلك وذلفت للداخل
الجازي كانت " فاطسة" ضحك عليها .. والأمهات بفشيلة يتهامسن
.. وااااه خزياه فضحونا
ام جواد تكلمت بصوت عالٍ -: عبير .. شيلاء خذوا الجازي المجلس وعرفوها على الباقي
عبير نهضت -: على امرك خالتي " ولفت للجازي " يلا دخلنا داخل
بهمس خجول -: منو فيه .. فيه بنات واجد ؟
شيلاء التي كانت بجانبها مسكت يدها بحنيه -: حبيبتي ليه متردده
اذا قصدك على الموقف اللي صار .. فـ انتِ تجنبي الجوهرة وألمار لأنهن قليلات حيا .. وترا .. ولا اقولك قربي اذنك
قربت اذنها عن طيب نية
شيلاء قرصتها بمرح لتجعل الجازي تصرخ .. وعبيبر اسرعت لتغلق فم الجازي بيديها حتى لاينفضحن
دخلت الجدة مستندة على صالحة -: هاااو علامكن تتحرشن بالبنية
الأمهات التفتن بـ استغراب وشفن عبير وشيلاء محاصرات الجازي ولم يكن هناك مجال للسؤال لأن عبير وشيلاء اخذن الجازي وركضن للمجلس ..
صرخت صالحة بعدم استيعاب - : واااااااو ذي العروس صح .. ونااااااااسة .. وتركت الجدة المستندة عليها وركضت للداخل
اما الجدة فوقعت على الأرض من غير سابق انذار -: ياجعلك الصلاح يابنيتي علامك هجيتي .. وش بلاك !
آآآخخ ياظهري آآآآخخخ
جاءت ام سطام ركضاً -: يممه ! .. وحاولت ان تسندها عليها ..
عساك بخير يمه
رفعت الجدة رأسها لتتفاجأ بأن جميع الأمهات ملتفات حولها ..
ام جواد نزلت لمستواها -: سلامتك يمه صاير لك شيء
ام جهاد بفزع -: يا الغالية عسا ماصابك ضر
ام سطام -: صويلح التبن شغلها معي
أم ايمن وأم سطام اسندنها ونهضن بها لم يجعلن الجدة تتحدث حتى
وكل لحظة يربتون على كتفها .. وعسا ماشر وعسا ماضر وان شاء الله ماصابك وجع ..
الجدة ( بهية ) عندما جلست على الكنبة -: كاااافي ذالحين انتن حريم سنعات؟! .. وش هالهذرة اللي ماتخلص .. انا
زينة الحمدلله
وصالحة بنيتي ماسوت شيء غلط بس شكلها اندفعت يوم ناظرت ذيك البنية .. الا منو ذيك .. منو بنته !
بهدوء -: ذيك العروس مسرع نسيتيها يمه ..
-: ياحليلها بس شسوي صرت انسى هالايام واجد كان يجيني هالمرض الزهِيمر مدري شسمه ..
ام الجوري -: لا يمه مابك سوء بس ضغوطات شوي تنسي الواحد
ام عمار -: بعد كبر السن يمه له دور
ضحكت -: يابنياتي انا خرفت يالله ان ترحمنا ياارب حسن الخاتمة
ام ايمن خافت -: يمه لا تقولين كذا عسا يومنا قبل يومك
واكملن سواليفهن على هذا الموال ..
- اما داخل المجــــلس -
الجوهرة تهز رجلها بقلق ونظرت للجازي بترفع -: احم الحين ابي اعرف ليه جايه وراي
- نظرت لها ببتسامة ولفت ..
ألمار لـ الجوهرة -: الحين مغرورة على جمال ولا مال ياحظي
-: مادري هي وذي العدسات الرمادية بنت الملجأ ..
وكان هذا كله نجوى فيما بينهما ..
ام رهف بـ اعجاب وهذه يكون زوجها اخو حصة " ام جواد " -:
ماشاء الله الجازي تدرسين أي صف
الجازي ابتلشت ولكن صالحة انقذتها -: احم هي بالجامعة
مثل البنات ..
-: ماشاء الله مبين صغيرة ع الزواج .. ياالله .. الله يسعدكم ياقلبي
ببتسامة -: لا عادي في بنات يتزوجن بالابتدائي بعد ..
آمين وياك ياخالة ..
-: صدقتي امي تزوجت وهي بنت تسع سنين .. وانا تزوجت بالمتوسط بس هذاني عايشة الحمدلله .. وبلاش
من خاله وناديني نادية ..
-: ماشاء الله .. ok ولا يهمك .. طيب هذي منو " واشارت على امرآة تكلم بالجوال "
نادية ابتسمت -: عاد هذي خليها على يم ذي
ياستي تكلم قيس بن الملوح ..
عقدت حاجبيها ....
شيلاء ضحكت -: هذي اسمها سملي زوجة حاتم خال جواد
ومتزوجة لها سنتين واللي يشوفها
ماشاء الله يقول توها بشهر العسل
الجازي انحرجت من جراءة شيلاء واكتفت بهز رأسها ..
عبير -: طيب الحين نعتذر منكم بناخذ الجازي على يم عاد هي بعمرنا وصديقتنا ..
نادية ضحكت -: تهنوا فيها .. وحملت ولدها رائد بين ذراعيها
وعندما خرجت من المجلس صادفت ام جواد -: معليش حصة ياوخيتي ابي غرفة فاضية ارضع الصبي
-: تعالي معي غرفة المعيشة ..
*
نظر إليه وهو متوعد له بتلك النظرات وضربه على فخذه -: وحيا الله عريسنا ..
-: اولاً ابي افهم يدك من وشي مصنوعه وثانياً كم مرة قلت هالثلاث كلمات ..
حاتم -: هههههههههههههه يدي مصنوعة من ماي وطين
وكم مرة اتوقع ..وهو يعد على اصابع يديه .. 1..2..3..3..4..5..6..7..8..9..10
وبحث عن اصابع زائدة لكن للأسف اصابع اليدين 10
يااااربي وش السواة انا قلت اكثر من
عشر مرات واصابعي خلصت
فطس ضحك -: الا باقي اصابع رجلينك يارجل ..
حاتم اخفض نفسه ليعد رجليه ولكن ما اوقفه وسادة كنبه من عمار -: ياشيخ معقولة انت بغل ولا ثور .. ياخي
استحى على وجهك شوي
لف عليه -: وانت وش دخلك ياشيخ عادي المجلس مافيه غريب
رحيمي .. واباءكم وجدكم ..
واخوي وصلى الله وبارك على نبينا محمد
الجميع -: اللهم صلِّ وسلم عليه
حاتم لف على جواد بغبن يهمس له -: يا المقرود ليه
ازعجتني وانا اكلم ..
رد له بمثل همسه -: وانا شدراني انك تكلم الاحم احم
-: اقول يا بابا الحين بتزعجني .. انا بعد بزعجك عاد انت بعد صار معك الاحم احم " وغمز"
جواد خبطه بمزح ..
سطام -: انتو علامكم تتساسرون
-: هلا والله بأبو الأربع ..
ضحك -: يا هلا والله بأبو الوحدة وعقبال الثانية والثالثة والرابعة
شهق -: ياعم مقرن اشهد على وليدك يبي يخربني من الحين
بضحكة -: افااا ياسطام خلّ الولد يتهنى بعدين خربه براحتك
سلطان -: عاد انا ارحموني ابي اتزوج
لو عاشرة ماتفرق اهم شيء اتزوج ..
الجد -: شف قليل الخاتمة ابن اللذينا وش يقول
-: ههههههههههههه لا امزح يبه خلاص هوّنت وسحبت كلامي
ابو عمار -: انت يوم تعقل حنا نزوجك
-: لا والله وجواد بعده اهبل ولا على راسه ريشة لا قدر الله
طق صدره -: لا احم احم انا غير ياحبيبي
ابو ايمن -: وش اللي غير عنه
بمزاح -: انا كنت بعنس اذا ماتزوجت
لم يشعر الا بفنجال القهوة الفارغ يحذف ناحيته من ابيه ولكنه تفاداها .. واكلموا حديثهم على هذا النحو ..
الا ان والد جواد اتاه اتصال من زوجته وبعد ما اقفل هاتفه نهض -: حيااااكم تفضلوا الغذاء ...
*
ابتسمت عبير وهي تكمل -: بس شكلك
ما استوعبتي ولاشيء من شيلاء
عقدت حاجبيها -: نص نص
-: افا تحشون علي
قالتا الاثنتان -: حاشاك من يقوله
-: ايه علبالي بعد
عبير -: اسمعي .. شفتي ذيك ام جلابية بيج واحمر .. هذيك امي واسمها فاطمة .. واكبر عيالها سطام عاد ذا نكته متزوج اربع حريم والرابعة توها عروس وعنده بنوته يالباها .. المهم وبعده سلطان الخبل من ثم انا من ثم صويلح ..
صالحة من بعيد -: من ذكر اسمي ..
ارخت صوتها -: اعوذ بالله ذي شلون سمعت .. ورفعت صوتها
لا حبيبتي بس اعرفها العايلة الكريمة
صالحة ونظرها على لجين -: ايه بعد اشوى
لفت للجازي واردفت قائلة -: ايه وبعد صويلح الجودي وبعدها حمودي اخر العنقود دلوع الماما طبعاً
اتسعت ابتسامتها -: ماشاء الله .. الله يخليهم لكم .. اشارت بعينيها
طيب وصاحبة الجلابية الزيتي والذهبي
-: سلمك الله ذيك تصير خالة ميادة زوجة عمي ام المصون ذي
-: احم احم دامها عايلتنا انا بعرفك
.. 2 بصوت واحد -: لا يرحم امك لااا
برطمت -: مالت خلاص بكون مستمعة افضل
-: برافو يا امورة ..
ضحكت -: طيب كملي حزرتك
-: ايه جهاد ولدها العود تقريباً اصغر من رجلك بسنة وبعده ذي المصون ثم بعدهم عامر وبعده مجدلين المطفوقة ..
وذيك صاحبة الجلابية البيج عمتي فايزة اكبر عيالها ايمن وبناتها الجوهرة وألمار ..
شيلاء كشرت .. والجازي عقدت حاجبيها -: بس مبين امهم طيبة ..
بسخرية -: طيبة هه هه بس انها .. لم تشعر الا بطراخ على كتفها .. لتقول عبير بضحكة ترقيعية وتصريفية -: ههه هههه ههه ههه اصلاً شيلاء ماقصدها شيء بس
تحب تنكت واجد صح شيول ..
بغباء -: لا ماكنت انكت بس كنت بقول انـ..
حست بضربة على رأسها وضحكت ببلاهه لتردف ....
انا قصدي انها احسن من عيالها بكثير صح عبير
-: yes yes ofcourse
ابتسمت .. وبخاطرها - غريب امرهم وش فيهم " ضحكت بسخرية " والله ما الغريب الا انتِ حتى عمرك منتي عارفة كم !
قطعت حديث افكارها لتسمع بقية حديث عبير عن عوائلهم ..
-: وهذيك ام جلابية عنابي مشجرة تكون ام عمار طبعاً هي خالة دعاء .. حنا ننادي زوجات اعمامنا خالة احتراماً لهم ..
وبنتها لجين ذيك البنت الساكتة اللي جالسة قريب من صالحة
-: ايه المعقدة
-: الله هداك ياشيلاء وانتِ بعد مثلهم .. والله انها طيوبة حيلات
-: بس هي غريبة اطوار وبعض الاحيان
احس وقسم فيها مس اعوذ بالله
... مسكت رأسها بألم وكأنه مر عليها طيف ساخر وناس كثير حولها ينعتونها بلقب غريبة الأطوار .. -: آآآآآآآآآه رآسي
-: وش فيك ياقلبي شكلك ماتحملتي تستوعبين ترا ادري عايلتنا كبيرة شسوي عاد ذا زيادة الانتاج
عبير خبطت شيلاء -: آوش انتِ بعد .. واخذت ماء من الطاولة ومدته للجازي ... تفضلي
اخذته بيدٍ ترتجف وسمت بالله لتشربه دفعة واحدة ...
عبير + شيلاء -: صحة
ابتسمت -: على قلبكم
-: هاه نكمل ولا ...
-: ايه
-: اصلاً بس بقى عايلة عمتي فوزية طبعاً ذي اقل عايلة
ماشاء الله بنتها البكر الجوري وبعدها فهودة الورع وبس
اما بخصوص نادية انا ما اعرفهم زين لأن مانلتقي الا بالمناسبات واندري انه بنتها البكر رهف لأنهم ينادونها بها وولدها رائد لأنه دايم معها .. وسلمى ادري انها متزوجة من سنتين وربي مارزقها الولد
-: شوفي اذا تبين تثقفين اكثر اسألي رجلك هو اخبر بذلك
-: لا ابد عادي ماني ملقوفة
شيلاء -: اوووووما
~ قطع احاديثهن دخول ام جواد وإخبارهن بأن الغذاء جاهز ويتفضلن ~
*
يــــوم جــــــديـــــــد
فتحت شنطة امتعتها بكسل وعينيها تنتقل في جميع انحاء الغرفة
فقد كانت الغرفة تصرخ روقان واريحية ثم نقلت نظرها الى تلك الساعة المعقلة في الحائط كانت دائرية الشكل محاطة بإطار مزخرف.. تشير إلى انّ الساعة العاشرة والنصف صباحاَ
والقت نظرة خاطفة على الممدد بالسرير وواضع يديه خلف مؤخرة رأسه ومغمض عينيه وكأنما هو في انسجام عميق ..
ابتسمت .. واكملت ماتقوم به في شنطتها من عبث لتخرج لها لباس ترتديه فاليوم في فترة الظهيرة سيخرجان من الفندق
ويذهبان إلى منزل جواد ..
على ذكر اسم جواد ما رآيكم بأن نرى هل هو في غفوة نائم
ام هو مسترخي فقط ...
جواد لا لم يكن نائماً ولم يكن مسترخياً بل كان في صراع ذاتي
وحديث نفسي ..
- اوووف طيب الحين وش قلنا ... اممم بس انا اذا نفذت اللي قالته
راح اهجرها والهجر معصية .. الا بعدين في احد يمتنع ويعرض عن الحلال ..ياااارب ساعدني
ايه لقيت فكرة انا راح ابتدي معها خطوة خطوة علشان ربي يرضى عنا واذا مافي راح اطلقها واتزوج واعيش حياتي .. " عارضته نفسه بقوة " .. شلون ياجواد تطلقها والطلاق مابعده الا الشتات
تنهد في داخله .. مي حالة ذي ياتبقى على ذمتي بنت يا اطلقها!!! .. لازم نكون واقعيين شوي لو طلقتها المجتمع والقبيلة وش راح يقولون.. بعدين انا وش لي بنظرتهم .. عادي تخالف افكار وعادات وصلى الله وبارك على نبينا محمد ..
همست له نفسه بفكرة راقت له ... طيب ليه ماتخليها على ذمتك نبل وشهامة منك وحاول انك ماتنفتن فيها وتنسى انها زوجتك ..
دعونا الآن نترك اخينا في الله يكمل حواره الطويل بينه وبين نفسه
ونذهب إلى مكان آخر ..
*
في فلة بسيطة وربما انها واسعه ولكن لاتكلف فيها ...
جلست العائلة ناقصة الأفراد ككل مرة ..
-: بس ما يصير يادعاء كم صاير لنا على هالحال
مدت له فنجال القهوة -: يابو عمار شنسوي
ذي حال بنيتك وانت عارف
-: شوفوا حاجة من ثنتين يانوديها لطبيب نفساني
ياشيخ يقرأ عليها ..
بهدوء -: لايبه مايحتاج لا ذا ولاذا .. بنتك عندها عقدة وانت اخبر
نهض .. عن اذنكم بروح اغتسل ..
ابو عمار تنهد ليقول هو وزوجته -: اذنك معك ..
-: لا تشيل هم ياناصر اهم شيء بني جلدتها متقبلتهن
-: يا ام عمار انتِ ماتشوفين حتى بنات اخواني ماتجلس معهن
واتحدى بعد بنات اخوانك تجلس معهن ..
زفرت -: الله كريم .. الله كريم .. الا يلا قم البس قميصك
ذالحين خلص اذان الغسل .. وبعد اطيبك .. اميمتي بهية اعطتني طيب يهببل ..
ابتسم -: الله يخليها لنا هالغالية .. يالله قايم يابعدهم كلهم
دعاء نهضت بـ احراج خشية الا يسمع احد من عيالها
لتذهب قبله لغرفتهما ..
*
خرج من دورة المياه وهو يصلح الكبك في كمه .. تفاجأ
بأن الجازي قادمة نحوه بـ المبخرة استغرب وضحك بداخله ..
من وين لها هذي اكيد من امي ماتقصرين والله يا ام جواد
وخاطبها قائلاً بالمصرية -: له له له له إدي الحلاوة
كلها ياستي .. إده القمال كله
اتسعت ابتسامتها -: فاجأتك صح
اقترب من رائحة البخور ولوح بالدخان عليه -: ايه الا من وين لك
بـ احراج -: من خالتي حصة .. احم يعني اعطتني نصايح وكذا
جد حسيتها حنونة .. طأطأت رأسها .. يابختك عليها
رفع ذقنها بإصبعه -: امي هي اجمل واعظم نساء العالم .. واتمناك تصيرين مثلها ..
بخجل لقربها من جواد هزت رأسها -: ان شاء الله .. وتنحنحت
يلا الحق ع الخطبة ..
قبلها بسرعة خاطفة على " خشمها " وفرّ هارباً لكي لاتوبخه
زفر وتمتم بداخله .. هذه آخر قبلة في حياتنا !
________________
انتهى ....
آمل بأنه قد ناسب ذائقتكم
ملاحظاتكم الراقية .. ونقدكم البناء سبب في تفوقنا بعد الله ..
لا اله الا انت سبحانك اني كنت من الظالمين
كفارة المجلس .. سبحانك اللهم وبحمدك اشهد ان لا اله الا انت استغفرك واتوب إليك ..
07-06-14, 09:42 AM
كفاني لك شوقاً ياسيدي
جديد مواضيع قسم القصص المهجورة والغير مكتملة
العرض العادي
