الرؤيه الشرعيه

السلام عليكم أخ أحمد
ماشاء الله كاتب الموضوع اسلوبه رائع جدا وطرحه متمكن ربنا يوفقه .. لا وعنده سعة صدر وخفة دم ، اللهم بارك ...

المهم نيجى للموضوع نفسه ..

أولا هحط نقاط بسيطة احاول ألخص بيها اللى فهمته من التلات مقالات الطويلة العريضة دى عشان ماتوهش ..
1- الكاتب بيتكلم عن أخ جاد فى طلبه للزواج ، عنده بعض المواصفات الجمالية اللى عايزها فى زوجته بعد التأكد من دينها وخلقها طبعا وكمثال اتكلم عن رؤية الشعر والنحافة والسمنة .
2- هو حدد الكلام ده انه يكون فى جلسات تانية بعد مايكون شاف وجهها اولا وحصل توافق بينهم


عن رأيى بقى ..

بالنسبة للموضوع نفسه شرعيته من عدمها .. هو استشهد بأقوال من السنة وزى ماحضرتك كمان قلت انه بعض فقهاء الحنابلة اجازوا رؤية الشعر ... لكن مازلت أرى انه الموضوع محتاج يطرح على نطاق اكبر من كده ، وعن نفسى ماقدرش التزم بيه كفتوى شرعية.

كمان ليا تعليق على نقطة .. هو بيتكلم على رؤية الشعر مثلا وبيقول " انا بتكلم على الشخص اللى مش مكتفى انه أحد محارمه يروح يشوفها ، بل عايز يطمئن قلبه ويشوف الواقع بنفسه " سؤالى ليه ... طيب وحضرتك هتعرف منين إنه ده شعرها الحقيقى ؟؟
معظم البنات دلوقتى بيعملوا شعرهم عند الكوافير بصورة شبه دائمة من فرد أو صبغ أو غيره .. طيب فرضا إنه فى الوقت اللى حضرتك اتقدمتلها كانت عاملة شعرها ... كده انت اتطمنت ؟؟!! وهى أكيد مش هتقولك " على فكرة ده مش شعرى الطبيعى !!"
وبالمقابل ... إذا كان فيه مشكلة فى شعرها مضايقاك فاعتقد ان مستحضرات التجميل والشعر ماخلتش حد نفسه فى حاجة .. يعنى لو بعد الزواج لقيت نفسك متضايق من شعرها تقدر تخليها تظبطه بالشكل اللى يريحك .. ممكن اكون بتكلم نظرى وعن عدم خبرة .. بس ده تفكيرى.


ردا على اسئلتك ..


السؤال هنا هل الجمال عامل جوهري و مؤثر مثل ما في المقال؟

ماقدرش اقول كده ... أنا متفقة مع الكاتب إنه بيختلف من حالة لحالة .. فيه ناس عندها مواصفات معينة ماتقدرش تتنازل عنها وفيه ناس تانية مش فى بالها اساسا والمهم عندها التوافق الفكرى والقبول .
وأنا فعلا أول مرة اعرف إنه الموضوع ده مهم كده .. يعنى ماشفتش حواليا حالات بالشكل ده ، أنا ياما شفت مشاكل وخناقات فى البيوت بس لاسباب تانية خالص ... لكن أكيد الكاتب ماتكلمش إلا بناء على خبرة وواقع هو شافه بعينه .


هل الزواج و هو الأمر المصيري اللي يحدد حياة الناس بتلك السهوله و اي شخص يتزوج اي بنت و ينتهي الأمر؟

أكيد لا طبعا .. ماينفعش أى حد يتزوج أى بنت وينتهى الامر .. فيه افكار معينة لو ماتوافقش الطرفين عليها هينتهى الامر بكارثة بغض النظر عن مستوى التدين والأخلاق
" الأرواح جنود مجندة ماتعارف منها ائتلف وماتنافر منها اختلف " يبقى المسألة هى مسألة توافق روحى وتوافق طباع وشخصيات من الاساس ، وده مالوش علاقة بمستوى التدين والالتزام .. فلان ده قد لا يرتاح لفلانة ولا يحبها لكن غيره يحبها .. رغم أنها هى نفس الشخصية لم تختلف ..
من الآخر ماينفعش انه حد يقبل يتزوج حد مش مرتاحله لمجرد إنه على خلق ومتدين ويقول لنفسه " انت تطول تتزوج واحدة متدينة ؟ " ده مش منطق فى رأيى .


هل الرؤيه الشرعيه من المفروض انه تتجاوز الوجه و الكفين ام لا؟

زى ماقلت مش أنا اللى هتكلم فى النقطة دى .. لو كان فيه اختلاف فى الموضوع ده يبقى لازم شيوخنا يوضحوا إيه الصح والغلط فيه ويفهموه للناس .
بس عندى رأى بسيط .. إنه الموضوع مش بس متوقف على الحكم الشرعى فى النقطة دى .. الموضوع ده بيرجع كمان لحكم العادات والتقاليد اللى الناس اتربت عليها .. المتعارف عليه رؤية الوجه والكفين فقط ، ومش سهل إنه تخلى حد يقتنع بأكتر من كده حتى لو كان ده حلال والشيوخ افتوا بكده .. غالبا هيكون الرد " إنه أحد من محارمه ييجى يشوفها " وعن نفسى أنا متفقة مع كده ( طالما أنت طلبت رأينا الشخصى ) يعنى أنا بحاول اتكلم بمنطقية واتقبل رأى الكاتب لكن ده مش معناه إنى موافقة .


هل يجوز للبنت انه تكزب و تخفي عيوب جسدها علي زوجها المستقبلي؟

أكيد لأ طبعا .. بالعكس ده فى رأيى نوع من الخداع .. بالنسبة للمثال اللى ذكره ممكن تكون البنت دى خادت الموضوع بحسن نية وإنه مش مهم .. بس العقل والأمانة كانت تقتضيها غنها تعرفه وتترك الموضوع ليه .. مش تفترض رأيه مسبقا وتتصرف على أساسه .. والعيب مش عليها بس .. لانه أكيد أهلها خاصة أمها عارفة بالمشكلة اللى عندها .. فإذا كانت البنت ساذجة وشايفه الموضوع عادى فكان المفروض على أهلها يكونوا أعقل منها ويكونوا على قدر الأمانة
من الآخر المفروض إنه اى بنت عندها حاجة مش عادية المفروض تخبره بها قبل الزواج وتترك له حرية الاختيار .. ومش بس يكون عيب خلقى أو مشكلة جسدية .. لكن لو مثلا عندها مرض مزمن مهما كان حاجة بسيطة .. لو حصلها مثلا حادثة أو غيره وسابت أثر فيها حتى لو كان غير ظاهر وغير مؤثر على حياتها .. وطبعا الكلام للطرفين مش البنت بس.


هل نستحي من الطلاق لو تضايقنا من ازواجنا ام نكمل رغما عنا؟؟

اعتقد مافيش خلاف على إنه الطلاق مشروع فى الحالات دى .. وإلا لما شُرع الطلاق أساسا .. الطلاق أفضل من أن يكرهها ويكره الحياة معها أو هى تكرهه ، واعتقد أن تاثيره النفسى أرحم بكثير من تلك الحياة إن لم يستطع أحدهم تقبل الآخر ..

فهل انتم تتفقون انه من حق الشخص انه يعرف من سيتزوجها جيدا ام تروا انه هزا يرخص من قيمة البنت و يحولها لسلعه تباع و تشتري في سوق عبيد؟؟

زى ماقلت .. بالتأكيد هو لازم يعرف اللى هو عايز يعرفه ، وده فى رأيى مش بيقلل من كرامتها ولا حاجة طالما ده بحدود زى ما الكاتب وضح .. يعنى أكيد مش لأى شخص .. لكن النقطة بقى هى الطريقة اللى بيها يعرف اللى هو عايزه وأنا وضحت رأيى فيها فوق .

أرجو إنى ماكنش طولت فى الكلام بس عندى لسه كام نقطة ..

1-اعتقد إنه الكاتب المفروض يعرض فكره ده على مشايخ كبار عشان الصورة تتضح أكثر ونبقى واثقين من كلامه وفكره ده مع احترامى ليه طبعا .

2- فيه نقطة بس استغربتها " الكاتب بيتكلم على إنه طلبه الاساسى إن البنت تقابل المتقدم ليها بملابس المناسبات " .. صراحة أنا ماتخيلتش إنه فيه واحدة ممكن تقابل اللى متقدم لها بملحفة ولا إسدال مثلا .. أنا مش بتكلم على نفسى لأنى مش الملتزمة اللى هو بيتكلم عليها ، بس ليا اصحاب ملتزمين ومع ذلك اعرف انهم بيقابلوهم بملابس عادية .

3- من الآخر الموضوع ده بيختلف من شخص لآخر على حسب احتياجات كل واحد ورؤيته للانسانة اللى عايز يتزوجها ، وبالتالى الفيصل هنا زى ما هو قال إنه كل واحد يبقى عارف هو عايز إيه بالضبط ويحاول يوصله بأى طريقة كانت عشان مايرجعش يندم ويبقى ظلم نفسه وظلمها معاه .. واعتقد الكلام للاتنين مش للرجل بس لأنه طبعا احنا كمان بيكون لينا مواصفاتنا .


" أنا عايزك تفهم نفسك إنت الأول كويس وتفهم طلباتك عشان ما تظلمش بنات الناس معاك وتظلم نفسك ..
وعايزك إنتي كمان تفهمي إن في حاجات (بتوجع بس) وفي حاجات (بتوجع أوي) ومش عايزك ترجعي بيت والدك تاني معيطة عشان العشم أخدك زيادة.))


السطرين دول بجد فيهم الخلاصة كلها ...


ألف شكر الشبح على الموضوع ده .. وآسفه على الإطالة .

رأيت الرد و لي عوده بعد يومين إن شاء الله للرد
سوري عندي مشروع و بعد الإختبارات هههههههههه