مازلت..

مقهوره
موجوده
مجروحه
كل الكلمات دى بتعبر عنى
بجد تعبانه نفسيا مع ان حياتى ماشيه للافضل
بس بجد ف حاجات مؤثره بتحصل ف حياتى تخلينى احس بده

اول حاجه حصلت ف حياتى تخلينى مضايقه انى حبيبت واحد ماحبنيش


صغيره!! عارفه بس متاكده انه حقيقى مفيش حب وهمى بيفضل سنين

مازلت مستنيه انه يجى يقولى بحبك مع انى هارفض الرجوع

عشان ارضى غرورى ..يمكن

اكتر حاجه مخليانى مقهوره بجد

موت بابا ..رحمه الله عليه

مبسوطه عشانه كان تعبان اوى ف الاخر حاسه انها نهايه حلوه كان بيصلى و يصوم

كان متدين جدا

بس زعلى ع فراقه مات قبل ما اقرب منه كنت دايما بعيده عنه

مرضه و موته جيه فجأه ف اقلل من اسبوع لقيت نفسى من غير اب

موجعه جدا عدم وجوده حاجه لسه ماتعودتش عليها ...ولا هاتعود

حاسه انى محطمه نفسيا حاسه بعدم اتزان ف حياتى

حاسه كانى كنت بلف وفجأه وبطلت حاسه انى هافضل ف الاحساس ده كتير

بدايتى مع القرايه كانت مع ماما وانا صغيره كنت بلاقيها ع طول بتقرى عبير, انيس منصور , فتحى ابو الفضل

بابا كنت بلاقيه بيقرى كتب لعباس العقاد ,طه حسين

عمرى انا وبابا ما اتفقنا ع كتاب

ماما كانت دايما تحكيى قصص وانا صغيره وكانت بتعجبنى اوى عشان كده حسيت انى عايزه اقرى كل حاجه بتقراها

اول كتاب قريته كان الغاز للمغامرين الخمسه كان اسمها البصمه السوداء كانت 128 صفحه فضلت فيها اسبوع ههههههه

بس كانت جميله بجد انا فاكراها بس بعد فتره بدأت تمردى ع الالغاز بسبب انى لقيت ماما و اختى بيقروا عبير و انا بس اللى الغاز

ماما وعدتنى انى هاقراها ف تالته اعدادى ف اخر يوم امتحانات ف تانيه اعدادى قريت اول قصه كان اسمها الفخ رائعه جدا