رياح الذكرى

ياهلا ومرحبا بروح عمان في صرح ليلاس الغالي

ان شاء الله تلقين مايسر خاطرك ونشوف قصتك في قسم المكتملات

قوانين القسم ( شروط انتسابك ككاتب + قانون القصص المكتمله والمهمله + الردود المخالفه )

السلام عليكم ورحمة الله وبركاته,,,,

هلا وسهلا اخت"عذرا يا قلب" ومشكووورة على الترحيب.....

واتمنى ان تكون روايتي في محل اعجابكم وعذروني عقصير,,,,

<<اختكم روح عمان>>


الجزء الثاني

[CENTER][CENTER][SIZE="5"][SIZE="5"]"حارة العين "
تعوّد سالم يروح يسلم على اخته كذية فكان دايما يصلي المغرب في قرية العين لانها قريبة من قرية الفلج فكان شي لازم يروح ويسلم عليها ويسالها عن اخبارها.. وهو يمشي وسرحان بهمومه وما حس الا بحد يمسك اعلى كتفه ويقوله :سالم وقف شوية جالس انهمك ماتسمعني؟؟؟التفت سالم على الشخص وهو يشوفه:مسلم !!!!! هينك انت اليوم ...رحت بيتكم وقالولي رايح عند خالك؟؟
مسلم:هيـــه ما كنت فالبيت .... من يوم الصبح وانا مرتز عند خالي اوين باغني اساعدة في الجداد !!
سالم وباين على وجهه علامات الاستغراب:ماشالله من متى ؟؟مااحيدك تروح المقاصير ولا لمصلحة عاد؟؟؟؟؟؟؟؟؟
مسلم وهو يضحك :اسميك ما حد فاضحني الا انت؟ يا ود الحلال قلت حمو ما اسير عند خالي واتقرب عسى احصل من قداه مقصورة زينة ولا كم قرش ينفعن!!!
سالم وهو يمشي ويكلم مسلم:زين والله !!عجب لاتنساني صاني ربيعك ابغى من القسمة شي...
توقف مسلم وعلى وجه علامات الجمود واستغرب منه سالم والتفته : مالك بعيد الشر والبلى.. قلت شي غلط صاني اضحك عليك الحمد لله عندي خير ورزق...مسلم وهو على وقفته وكانه يصارع شي فراسه فباله حاجة : تعرف سالم انك مسيكين وضاهي على عمرك؟؟؟
سالم عقد حواجبه من دهشته فكلام ربيعه مسلم: سلوم مو قصدك يعني ؟؟؟
مسلم : عندك خير ورزق و مخلي غيرك يتهنى فيه !!! عاد هنا سالم عقد وجهه من الغميضة وشوية ويكرخ(يضرب) مسلم"سلوم تعرفني اذا استغمضت افلق راسك نصين.. خبرني مو السالفة صاني ما فهمتك؟؟ مسلم وهو يمسك يد سالم ويسحبه :قوم امشي معي بيتنا اخبرك هناك ما ينفع فالطريق...راح سالم مع مسلم وهو يقلب الكلام فراسه ودخلو السبلة من الباب الخارجي,,,,,,المتعارف عند اهل القرى يكون باب سبلة الرجال من الخارج يعني في حدود البيت بحيث اي رجل غريب يدخل مباشرة دون الدخول داخل حوش البيت,,,,, دخل سالم سبلة بيت مسلم وتدكى على وحدة من الدكي القليلة المصفوفة على جدران السبلة اما مسلم راح داخل البيت وجاب الفواله ..خلى الفوالة فالارض وهو يشوف سالم اللي عليه علامات السرحان ويبتسم في قلبه ويقول فنفسه (ان ما فرقت بينك وبين اخوك ما اكون رجال!!! ): سالــــــــــم سالــــــــــــم,,,,هين وصلت عندنا ولا بعيد؟؟انتبه سالم من سرحانه وهو يشوف على مسلم: معك , معك!! مسلم: سوي اتقهوى ولا تشغل عمرك صا السالفة ما باغية كذى... سالم: سمعني مسلم تتكلم ولا والله اكب ملة الماي فوقك!!!
ضحك مسلم وهو يناول سالم حبة رطبة فيدينوه :اقولك كلّ قبل وبعدين افهمك..خذ سالم الرطبة ويتم يوكلها وهو ساكت و رفع عينه على مسلم وهو يكلمه وعليه علامات الشماتة:اقول صحيح متى يجي شمجك سمعنا انو خوته سويوله "حورة جلب" وان اختك بعدها تترجاه.. هنا عاد نقلب مزاج سالم ونهض ويتم يصارخ على مسلم:كم مرة اقولك لا تجيب طاري اختي في لسانك فاهم ولا والله اذبحك,,, هنا عاد مسلم نهض وعيونه شوية وتخرج من مكانها وهو يحاول كبت غيضه ويتكلم "يوم بغيناها ما طاع اخوك تم يقولنا هي بعدها فذمةرجا ل, ويوم قلتله يصير تطلق لانو زوجها محد يحيده هين.. رفض مسوي عمه الولي عليها , وقولي هينو ذا الرجال اللي لوعتونه بوه ؟؟؟ سمعني يا سويلم اصلا اخوك جالس يلعب بورثكم لعب ,لانو عارف انكم ما قايمين تتكلمو بشي... مسوي عمره فالحارة الشيخ ومحد كماه,,,,,,,اقول نهض على عمرك وشوف الدنيا زين,,,, هنا عاد سالم حس الدنيا ادوربه وماقدر يجلس وخرج بسرعة من السبلة وفراسه مية الف همّ....................
\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ \\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\
,,,,,,,,,,حارة العين هي احد الحارات المنتشرة في الولاية او المنطقة ...سميت لوجود العين التي تنبع بوفرة والمميز في هذه الحارة وجود بيت اثري قديم وكبير تم ترميمه فالعهد الحديث ويوجد بجانبه مسجد مبني من الطين وتوجد به بيوت بسيطة وقليلة وتكثر فيه المزارع النخيل ....,,,,,,,,,,,,
............................................................ ............................................................ .................................
"حارة الفلج"
طوية السجادة وخلتها فوق السحارة الوحيدة الموجودة فالحجرة اللي تخلي فيها ثيابها وثياب عمتها والتفتت لقيت عمتها مخلصة مصلية وجالسة تسبح الله وتستغفر جلست تراجع في قلبها السور اللي حافظتنهن يوم كانت صغيرة تروح عند المعلم راشد ....:كذية مالش هاجسة حاجة ؟؟؟؟ التفتت كذية وكملت الاية وبعدين ردت على عمتها:لا لا ماه , جالسة احرصش نراجع السور مع بعض .....تمت كذية وام محمد يراجعن حال بعضهن البعض بعض السورالعظيمة اللي تبرد الفواد وتونسهن فوحدتهن في ظلمة الليل وفخلوة البيت....ام محمد: الحمد لله جزاش الله خير يا بنتي ويآجرش ,تجملي كذية نهضي خفي عسراج غايتنا نرقد ,,نهضت كذية وخفت عسراج وبالها شاغلنها على اخوها سالم ضاري يخطف عندها بعد المغرب واليوم ما جى لايكون مريض ولا حد من حياني فيهم شي... يارب تحفظهم ستناولت كذية االدواشج والوسايد اللي كانن مدكايات على جدار الحجرة وصفدتهن تسحبت ام محمد اللي كانت تسبح الله وتستغفر وانسدحت على الدوشج وهذا طبعها ما تحب تتكلم عن شي البرّ بعد ما تخلص من صلاة العشاء وانسدحت كذية فالجانب الغيره من الحجرة على دوشجها وهي تستغفر وخذت جانبها الايمن وما جاها رقاد وتقلبت على الجانب الايسر وتمت تقرا المعوذات واية الكرسي وسورة الملك وما عارفة شي كأنو شي ماسكلها فوادها وتمت تتعوذ وتقرا الايات إليين رقدت,,,,,,,,,,
نهضت منتزقة بصوت ضرب على الباب الخارجي مال الحوش خافت وتعوذت من الشيطان الرجيم وتعوذت من طارق الليل وتذكرت ان اخوها حمد خبرها مرة ان الرسول _صلى الله عليه وسلم_ كان يتعوذ من طارق الليل إلا طارق ياتي بخير...تمت تتعوذ وتسال الله تعالى خير هذا الطارق بغيت تنهض عمتها لكن شافتها سانية عينها...ترددت تروح ولا تجلس مكانها خيفانة ,,,ومازال الضرب متواصل وهي ما عارفة مو تسوي ,,وما حست الا بصوت عمتها تنهض من رقادها وجلست تتعوذ:اعوذ بالله ,,اعوذ بالله نسال الله خير هذا الضرب ونعوذ بالله من شره,,وشافت كذية جالسة وعلامات الخوف في وجهها ,,:,تعالي كذية ساعديني اشوف من هناك ..نهضت كذية ومسكت يدين عمتها وساعدتها وخرجن من الحجرة ومشيا فالمبرز وبعدين وقفن فالحوش :ايه من هناك ؟؟........:انا ماه ,,انا سعيد ..ام محمد وهي تحاول تتسارع فمشيها اليين باب الحوش وفتحته :سعيد ادخل ,,ادخل مالك ابّك شي ولا اهل بيتك بهم شي؟؟؟؟؟سعيد وهو يدخل ويوقف فنص الحوش ويسلم على امه يشمها من يديها وراسها: سمحيني ماه ,,نهضتش من رقادش وجيتش فذاالليول,,لكن زوينة مستوجعه قلت بيكون غايتها تو تربي؟؟؟ ام محمد بخوف على حرمة ولدها: انزين انته تقدمنا وروح عند خالتك ام مبروك وجيبها معك ..ونلحقك انا وكذية بيتك ,,,: كذية سيري حبيبتي جيبيلي الليسو وتلقي فروزنة الحجرة قالب الخيوط ومقص ...دخلت كذية بسرعة الحجرة اما ام محمد تدعو الله تعالى فسرّها يخفف على زوينة....طفت كذية السراج وخرجت من الحجرة وهي لابسة ليسوها : ماه دوش بسرعة لبسي خلا نواحيلها بيكون وحدها فالبيت.............
وصلت كذية وام محمد بيت سعيد ولقين ام مبروك ذييك الساعة واصلة ..... ام مبروك معروفة عند جميع قرى الولاية الحرمة المتخصصة فامور الولادة وهي من اهل قرية الفلج ....دخلت ام مبروك وكذية الحجرة وتمت ماسكات زوينة ويساعدنها وشلنها البخار (المخزن) لان والج (بعيد ) عن الحجر ....فرشت ام محمد دوشج فلبخار وقربت المقص وقالب الخيوط ومجموعة من قطع القماش ,,,,انسدحت زوينة وهي متحاملة على عمرها ما قادرة من وجع الولادة وتحاول تصابر عمرها ,,,كانت كذية عند راس زوينة تمسح على راسها وتقرىء عليها وام محمد فالوسط تمسح على بطنها وماسكها وحدة من يدين زوينة وتقولها:الله ياجرش يابنتي ويطلعش بسلامة قريّ سورة الزلزلة عسى الله يخفف عليش ,,,اما ام مبروك فكانت عند رجولها ...تمت زوينة تتوجع وتصابر بدون ما تصارخ ودموع من الوجع تارسات وجها تحاول تقرا وتدعي وهي تتالم...ام مبروك وعلامات الحيرة على وجها وما عارفة موتسوي من بعد كل زفرة احتارت وتسحبت شوية عند ام محمد وهي تساصخها(تهمسلها):ام محمد البذرة(الطفل)صاها متروجلة ..مو نسوي تو علا تموت وتخنقها النفس.. :لا حول ولا قوة الا بالله العلي العظيم,,,هي تو طالعة كلها ..ام مبروك :لالا..تو طالعات الرجول والبنية تعبانة من الزفر اخاف يلحقها شي...كذية خافت وعرفت ان فالامر شي كبير يوم شافت ام مبروك وعمتها يتساصخن ودموعها على وجوهها .....تحركت ام محمدبسرعة من مكانها وشلت راس زوينة وخلته فحظنها وجابت شوية من طرف شعر زوينة وحاولت تدخله داخل فم زوينة ..ام مبروك وكذية يشوفن وما عارفات بو تسويي ام محمد..فلحظة دخول الشعر في فم زوينة رغم آلآمها حست بحاجة قوية بلوعة وباغية تستفرغ إلا وهي تزفر زفرة قوية عشان تستفرغ خرج الطفل وهو يصيح ام مبروك بسرعة خذت الطفل وهي فرحانة تشكر الله تعالى ان الطفل عاش وما استوالو شي ,, ومسكته وخلته على رجولها وستناولت ام محمد القالب وتمت تلويه على الحبل السري اللي شوية قريب من بطن الطفل وبعدين قصته بالمقص ,,,خذت ام محمد الطفل ونظفته ولفته بالقماط(لفافة من قماش قطني) وناولته كذية :كذية وديّه عند ابوه وخليه ياذّن عليه فاذنه اليمين ويقيّم فاذنه اليسار ,,,نهضت كذية ودموعها تارسات عيونها وتدعوا الرحمن الرحيم فقلبها يرزقها الولد الصالح لكن تتمنى ما يكون ابوه الا" محــــــــــــــمد " صحيح زوجها هاجر عنها بعد اسبوع من زواجها لكن ذاك الاسبوع بينلها من هو محمد وهذا اللي خلا ابوها يزوجها وهي صغيرة من ابن ربيعه,,,وسنوات عيشتها مع امه هي اللي جعل اصرارها على انتظار رجوعه وتتمنى انه يكون آب اولادها...........
كان سعيد جالس على رفصة المبرز ومتخوف على زوينه لكن استبشر خير يوم سمع صوت الطفل بغى يسير ويسالهم لكن خجّل وجلس مكانه ......فرح يوم شاف كذية جايبة الطفل وستناوله من عندها وتم يحببه ويشمه ويشكر الله تعالى وخبرته كذية انه ياذن عليه ويقيم ,,,
ساعدت ام مبروك زوينة و وصلتها الحجرة اللي تقيم فيها فترة رباها ...فرشتلها كذية الفراش ورتبته وخلت قريب منه المريكب(سرير للطفل) ,,,,,,,,,,راحت ام محمد وستناولت حبة سحة(تمر) وتمت تنحك الطفل وجلسن هي وام مبروك عند زوينة.... اما كذية راحت المطبخ وقامت تعجن الطحين وستناولت الحطب وشعلت عليهن فالموقد(عبارة عن ثلاث صخور متوسطة الحجم متباعدة توضع في وسطها الحطب لاشعاله ) وخلت عليه الحديدة وتمت تخبز الخبز وترش عليه من السمن المحلي ....بعدها سويت سخانة حلبة (وهي عبارة عن ارز مطحون وحلبة وحليب وسكر ) .....اذن الاذان لصلاة الفجر وكذية مخلصة مسوية الريوق ومتوحية من تنظيف البيت,,,
\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ \\\\
..........ام محمد (اصيلة) امراءه صالحة وصابرة وهي من منطقة بعيدة تبعد عن حارة الفلج بحوالي 25كم توفى زوجها وهي ما زالت شابة تعبت وصبرت في تربية اولادها الاربعة محمد وسعيد وناصر وحميدة ....تزوج محمد من كذية ابنت صاحب والده اما سعيد تزوج زوينة وهي احدى قريبات امه اما ناصر فمتزوج من ابنت احد معارفهم من حارة العين وحميدة تزوجت من ابن عمها.....

............................................................ ............................................................ ................................
"حارة الكوس"
جاية تعبانة ومخلية فوق راسها وقر حطب ولافتنهن بالليسو وفي يدينها صرة حشيش ووهي داخلة البيت شافت قدام باب السبلة وطاية واجد عرفت انه حد عند زوجها........وهي متعودة قبل لاتخرج من البيت تخلي فوالة في السبلة لان زوجها شيخ الحارة ويكثر عليه الضيوف...دخلت البيت وخلت الحطب برع ودخلت المطبخ وستناولت الجلاس وفتحت الخرس عشان تشرب : امنوه جيتي انتيه؟؟؟؟ لفت امنه على وراها وشافت زوجها حمدان : ايــــه جيت تو!!!! ما شاالله عندك رجال واجد وهي تبتسم...حمدان وعلى وجه الغميضة ويصرخ: بسرعة قومي ركبّي الغدا ,,ابغى اغديّ الرجال قبل لا يروحو يصلوا الظهر!!!استغربت امنه ليش زوجها مستغمض مع انه من وقت على تركيب الغدا :انزين اهدى انت وان شالله بيزهب الغدا ,,بس خلييني شوية اتروع(ارتاح) فالمبرز وبعدين اسويه الغدا..زادت غميضة حمدان وما حس الا وهو ماد يدينه على وجه امنه وصفعها صفعة وبعدين دفرها على الجدار ...وتم يهددها ويتنازع عليها ,,,امنه مستغربة ومستحمقة وما قادرة ترفع عينها لزوجها وما عارفة سبب غميضته .. حمدان خرج من المطبخ وراح السبلة,,,صبرت عليه واجد وخاصة يوم جابلها مشاركة (ضرة) فوقها زاد عناده ومعاملته القاسية عليها وهي كاتمة فقلبها وما خبرت حد من اهلها...نهضت وراحت الحجرة وستناولت البوي بوي(عباية راس مخيط معها غطاء للوجه ميزتها ليس بها اكمام بمعنى ان اليد تكون داخل العباية)ولبسته وخرجت من البيت وهي مقررة فنفسها قرار وخلاص ما تتراجع عنه,,,,,,,,,,,,,,,,,,,,,,,,,,,,,,,,,
\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ \\\\\\\\\\
.............حارة الكوس هي قرية ساحلية اي قريبة من البحر معظم اهلها يعملون في صيد الاسماك وهي تبعد بحوالي 12كم عن حارة الفلج................
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,

[CENTER] الى الملتقى بإذن المولى[.,,,,,,,,,,,,,,
/CENTER]

تغلق لتاخير