المنتدى :
الأطباق الرئيسية
جنون البطاطا >> موضوع مميز
السلام عليكم ورحمة الله وبركاته
اخواتي بنات المطبخ اختنا الجود عطتني فكرة من بعد ما شفت طريقتها الحلوة بطبخ البطاطا
فقلت خل نسوي موضوع يلف ويدور ويصب في محيط حبيبة الصغير والكبيرة السيدة بطاطا حفظها الله
ورعاها لكل عين وبطن ترجيها
انا بقدم لكم وصفتين الاولي سلطة البطاط بالثوم
المقادير:حبتين بطاط وسط,بصلة مقطعة قطع صغيرة جدا.ثومة وحدة وللي يحب الثوم لك الخيار بالزيادة,
عصير ليمونة صغيرة او نص ليمونة كبيرة,ملح ,فلفل اسود,زيت زيتون
الطريقة:قشري البطاط وقصصيه مكعبات عشان يستوي بسرعة وسلقيه بالماي
نحط الثومة المدقوقة والبصل الناعم والملح والفلفل السود وعصير اليمون وملعقة زيت زيتون ونخلطهم عدل
وهالخطوة للي مايحب طعم الثوم والبصل يكون طاغي تتسوى قبل لانسلق البطاط ليش يانونة
عشان اليمون يتفاعل مع البصل والثوم عن طريق الاكسدة فيخفف من حدتهم بعبارة امي الشهيرة
عشان الليمون يطبخهم(اتفلسف واجد صح؟)
المهم وبعد ماتستوي البطاطا تتصفى وتنحط وهي حارة على خلطتنا عشان حرارة البطاط تكمل استواء الثوم والليمون ولا تفهموني غلط اهو ماراح يستوي بس مجرد تخف حدته ولدعته(جني رديت اتفلسف)
وبس وهالسلطة افضل مكان لها مع المشويات سواءا لحم اوسمك اودجاج انا احب اسوي معاها ستيك بقري اتبلة ليلة كامة بالصويا صوص والفلفل الاسود فقط لا غير واصبخه باني احمسه بملعقة من الزبدة ولانه بقري مولحم غنم الزبدة ما بتخليه دسم واجد
الطبخة الثانية وتنفع تكون اكلة رئيسية وهي صينية البطاط المهروس بالحم
المقادير:
4حبات بطاط كبار,ملعقتين الى ثلاث معالق زبدة,ثلث الى نص كوب حليب سائل ما عندج الا بودر ذوبي ملعقتين بالماي يصير سائل(بطلي استهبال وكملي),ملح وفلفل اسود
الحشوة:حسب ما تحبين يكون اللحم كثير او قليل من ربع الى ثلاث ارباع الكيلو من اللحم المفروم,بصلة مفرومة ناعم,3 ثومات مدققين,واذا تحبين الخضار الورقية حطي اللي تحبين بمقدار 3الى 4 معالق مفرومة من البقدونس او الكزبرة او الشبنت انا احط الثلاث واحيانا استغني عنهم كلهم,ملح فلفل اسود كمون مطحون كزبرة مطحونة رشة دارسين(قرفة) وبهار مشكل
الطريقة:
نسلق البطاط وبعد ما يستوي نهرسه مع الزبدة والملح والفلفل ونضيف الحليب شوي شوي لين نحصل عجينة طرية سهلة التشكل وماتكون مايعة لانا بنسويها طبقات بس هالخطوة لازم نكون محضرين الحشوة قبلها والحشوة بكل بساطة نحمس البصل بشوية زيت ونضيف له بعد ما يذبل الثوم والبهار واللحم وبالاخير بعد مانطفيها نحط الخضرة عشان تضل محتفظة بلونها وعقب نحط ببايركس نص كميه البطاطا وبعدها نحط حشوة اللحم وبعدين نحط الطبقة الثانية بتاني نسوي منها شوية بايدنا على شكل قرص ونحطه عل الحم ونكرر العملية لين نخلص المقدار وتساوي سطح الصينيو بالشوكة مثل ما تحبون شوارع ارصفة تخمسون مثل ما تبون انا مرة سويتها لزوجي كتبت فيها اسمي قالي شالمناسبة زعلت ولما شاف البرطم قال موكافي انج بقلبي لازم ببطني بعد ام الرومانسية اللي يعرفونها رجالنا
المهم يمكن تكون اكلاتي سهلة وبسيطة وخالية من الابداع لكني اظمن لكم لذتها
وناطرة منكم وصفات للبطاط ولوسمحتي اخت بياض الصبح لا تصكينا باكلة تخرب علينا وتبدعين مثل البطاطا الحارة وعقب عاد من يشوف اكلاتي ولا يلتفت صوبها
ولا تنسوني من التقيم اللي عجبهم خاطري بوسام السنع او الرفالة اوسام ماله داعي عفية عجبني الاخير
والله لايحرمكم مني ويخليني لكم يارب.........نموره
التعديل الأخير تم بواسطة بنت المطــر ; 06-04-12 الساعة 12:11 AM
سبب آخر: اضافة الوسام
|
05-04-12, 12:10 AM
جديد مواضيع قسم الأطباق الرئيسية
العرض العادي
