كاتب الموضوع :
بسمة براءه
المنتدى :
القصص القصيرة من وحي قلم الأعضاء , قصص من وحي قلم الأعضاء
واقف على باب القاعه والخطوات القليله اللي بينها وبيني هي اللي تفصل الحلم والحقيقه
خلاص بتكون لي حليلتي ورفيقة دربي .. ناظرت للايد اللي عانقت يدي بهدوء ..
: احم هلا عمه ..
عمتي أخت ابوي وهي اللي ربتني وربتها تقريباً ..
حسيت قلبي ارتعش لما شدت كفي وحطت يد عروستي فيه ..
ابتسمت لعمتي وبست راسها وهي ودعتني بهمسها ودعواتها ..
بعد بضع دقايق بالسياره وصلنا للفندق اللي نبيت فيه الليله عشان من بكرا ان شا الله نسافر للبنان..
بدينا كاي عروسين بالدعاء وركعتين السنه .. على اني احس الجو حولي حلوو بسسسس احس بشي غريب ..
حتى " نوف " وهي قبالي بحلتها الانثويه الطاغيه بالنسبه لي .. ما حسيت اني ابيها .. ابي قربها كزوجه ..
جلسنا نتعشى ولما خلصنا .. ما قدرت اناظرها وهي لابسه الفستان القصير ..
: نوف الله يرضى عليك ، البسي بيجاما وتعالي ..
ما ابدت اي معارضه بالعكس قامت بسرعه وكأنها تنتظر هالطلب ..
مسحت على شعري بقوة ..
يالله وش فيني .. مو هذي نوف اللي ابيها ومت الف موته على ما تزوجتها .. ليه ما فز لها قلبي زي اول ليه ؟؟
دخلت .. احسها زي احساسي .. منطلقه بالكلام .. ما في هيبة العروس بعيونها .. ولا حركاتها ..
نوف وهي تتربع فوق الكنبه : ركوون وش ذااا ليه حالق العوارض حرام عليك كنت احلى قبل ..
ابتسمت بهدوء : شسوي قلت اغير اسوي نيو لوك ..
ضحكت بدلع ما قدرت الا ابتسم له .. لو اقول اني بدون مشاعر هالوقت ما اغلط .. صراحه شكيت بعمري ..
بسس والله ما فيني شي .. طبيعي وكامل ولله الحمد ..
قمت ودنقت عليها بستها على خدها ... يا الله احس اني اتعامل مع اختي مو مع زوجتي ..
حضنت وجهي بعفويه : يالسخيف وقسم العوراض احلى عليك ..
طبعت بوسه على خدي .. نكشت شعرها ولعبنا زي الاطفال .. تعاندنا وركضنا .. ليما بالاخير نمنا من التعب على الكنب ..
من بكرا .. سافرنا على لبنان .. الجو رايق وشاعري واجواء الفندق حيل رومانسيه تنفع للعرسان مو لي انا وهالهبله هههه ..
اقولكم ليه هبله .. ناظرتها بنص عين : وبعدييييييين معــك بزر انتي ..
تخصرت بزعل وعصبيه : إييييييه بزززززر الحيييييين توديني ملاهي قوووم اقووولك ..
استرخيت اكثر : انا عن نفسي ماحب دوشة البزران تبين انتي روحي ..
نوف باصرار : طييييييب ..
تعدلت بسرعه ووقفت ع الباب : خييييير وين على الله ..
نوف وصوتها يتراجع للبكى : وخخخخر ابطلع طقت روووحي اووووووف
ناظرتها باستغراب ف استرسلت ودموعها تنحدر : لك يومين مسنتر بهالبلكونه ، قاعد تاكل وتنام وتاكل وتنام ، حشششاااااااااا كييييس نووم حضرتك ، طقييييييييت يخي
تراجعت لنص الصاله : تبيييييييني اعد لك كم قطعة رخاااام فيه والا اسمع لك وش يطلع مسلسلات على كل القنوات ..
حطيت كفي على فمها : إششش خلاااص آسفين .. بكرا ان شا الله اطلعك زين كذا .....
نزلت يدي بقوة وبنفس الانفعال : لااااااا طبعا مو زيييين ، لان حضرتك كل يوم تقولي بكرااااا اطلعك بكرااااا اطلعك وبكرتك للحين ماجات ..
كتمت ضحكتي بالغصب لما بدت تقلدني بتهكم طفولي : بزر
هزيت راسي بأسى .. من جد بزر ..
مر كم يوم وهذا حالنا .. إخوااااااااان لا أكثر .. كلامنا جلستنا عنادنا كل شي بحياتنا أخّوووي لا أكثر .. ما قدرت ابدا اقرب لها او اتعامل معها كزوجه .. طوال جلستنا بلبنان ..
وانا وهي صحبة سفر ولعب وضحك ووناسه فقــــــــط ..
اخر يوم نحزم امتعة السفر .. ناظرتها بتردد ..
: نوف .
نوف : سم ؟
: إذا أحد سألك عن شي قولي لهم اننا خالصين ..
نوف : شي ايش ؟؟؟؟؟؟؟؟
: بتعرفين بوقته ..
عزمت بنفس اللحظه وقمت لها .. مسكتها من عضدوها ووقفتها ... حضنتها بس تحاشيت احضنها برغبه غصب عني ..
حضنت وجهها .. لما دنقت عليها .. في شي فيني يقول اللي تسويه غلط يا راكان .. تعوذت من الشيطان وابعدت ..
بينما هي استنكرت ملامحها هالقرب .. تراجعت عني قبل ابتعد ..
رجعنا ديرتنا .. على وصولنا سوى لنا عمي عزومه كبيره ..
كان روتين كل عزيمة رجال جلسة أغلبها وصف وضحك وقهوه وريحة البخور وجو الفرح اللي العرسان مو عايشينه فعلا ..
دخلت اسلم على عمتي .. جات تضحــك وهي حاضنه راس نوف بطريقة مضحكه ..
عمتي : هالبنت متى بتعقل اذا العرس ما بدلها ولا حرك فيها شعره هههههههههههه
نووف : هههه يا ربي يالحسسد شعليكم مني خلوني استانس بحياتي والعب على هالبزران ..
ضحكت : وانا عمه والا الحضن كله لنويف ..
نوف تمد لسانها : نويف بعينك يالطويل ..
ناظرتها بنص عين : ايه ما تشوفيني ما شفتك ولا عطيتك بال ..
نوف : ها ها ها مليييييق ..
ناظرنا عمتي اللي فوق راسها علامة استفهام : انتو من جدكم ؟ هذا كلام عرسان بالله عليكم ؟؟
لا ارادي ناظرت لنوف وانفجرنا نضحك ، اذا على هالكلام نقدونا ، أجل لو يشوفون شلون نتعاند مع بعض شكلهم بيتعوضون الله فينا ههههههههههه ...
هالموقف وغيره من ردات الفعل العفويه .. خلا الكل حوالينا ملاحظ وضعنا المشبوه ..
خاصه اني على حركات العزوبيه اتاخر بالسهره مع عيال عيلتي .. نوف ماخذه راحتها مع البنات زي زمان ..
مر اقل من ثلاث ايام والكل صار يرمي علينا كلام بالمزح والا بالجد أن وضعنا مو وضع اثنين عرسان ..
كنت جالس أفكر بعمق وهاليوم قررت ما أطلع كثير من بعد الصلاة دخلت غرفتي وظليت افكر ..
الاحتمالات الوارده ..
اما ان يكون في سحر تفريق بس هالشي مستعبد لاننا الحمدلله نذكر الله ونتحصن ونسمع قران والحمدلله ما في شي يدل على السحر بحالتنا ..
او يكون عين .. اوووف وكل ما دق الكوس بالجره قلنا سحر وعين .. تؤ تؤ في شعور غريب .. احسه طبيعي وحلوو .. شي انا فاقده ولاقيه بنوف ..
اخذت نفس عمييييق وشهقت باخره ..
امــــــــي من زمان ما كلمتها وش هالنسوووه اسسستغفر الله . اكيد هذي عقوبه من الله عشان ما كلمتها .. والله مدري اذا عمي قالها عن عرسي والا لا ..
امي متطلقه من ابوي قبل وفاته ..
انا ربيب عمتي الارمله من انا صغير ، بالبدايه كانت نوف معها لان امها توفت بعد ولادتها بشهرين الله يرحم اموات المسلمين اجمعين ..
امي عايشه الان مع زوجها بالخارج .. كل كم شهر تنزل اسبوع والا اسبوعين .. اشوفها فيهم ..
طلبت رقمها بحرج كبير ..
: السلام عليكم
امي : هلا امي حبيبي شلونك يمه وينك عني ما ترد علي ..
: السموحه يمه اكون نايم والهى ما ارجع ادق ..
امي : مسموووح حبيبي بس كني سمعت انك تزوجت ، افا عليك يمه تسويها بدوني وبدون علمي بعد ..
: يمه ما سوينا ذاك العرس بعدين انا اخذت بنت عمي نوف ووو .......
قاطعتني بسسسسرعه وبششهقه : اييييييييييييييييييييشششششش نوووووووووووف .. يا ويلي من متى تزوجتها ؟ لا يكون لمستها ؟؟
وقفت متفاعل مع كلام امي ومندهش : وش فيهااااااااااا ؟ وش السالفه ؟؟!!!!!!!!!!!!
امي وصوتها ينحدر للبكي : نوووف اختك بالرضااااااااااعه ..
ناظرت لنوف اللي دخلت بهدوء وبحله مو المفروض اشوفها فيها لانها اختــــــــــــي ؟؟؟ ,,,,,,, جلست بدون حيل احس كل طاقتي انسحبت ...
سألت أمي بخوف : متأكده ؟ ليش محد قالنا ؟
أمي بصوتها الباكي : محددد قااالي حتى عمتك قالت تزوجت وانقطع الخط ، انا متأكده مليووون بالميه ما رضعتها مره والا مرتين من توفت امها الله يرحمها الى ان صار عمرها سنه قبل اتطلق بشهر وانا مستمره ارضعها لك صدر ولها صدر ..
: طيب يمه خلاص انا اتصرف واعطيك خبر ان شا الله ..
وقفت اناظر لنوف لانها شهقت تبكي ..
: وش فيك ؟!!
نوف وهي تمسح مكياجها بقوه : احس اني غلط ، عمتي اجبرتني البس كذا ..
حضنت راسها اهديها ولما ابعدت شوي مسكت الروب على جسمها حتى ما يطلع ..
ناظرتني مفجوعه .. همست لها باللي عرفت اسمه .. مشاعر الاخوه اللي ربي وهبني اياها لها بالفطره ...
: نوف إنتي إختي ..
نوف : حتى انا احسك اخوي خلنا كذا والله مرتاحه ..
رجعت اهمس لها : زاوجنا باطل ..
نوف واثر البكى واضح بصوتها : باطل ؟؟
: امي مرضعتك اكثر من سبع شهور بس مدري ليه محد تذكر ونبهنا .. بروح اشوفهم ابوك وعمتي ..
دخلنا بمعمعه السسؤال والاجابه والتأكد والشهود .. فسخنا العقد وتحررت من حبل الزوجة اللي ما حسيت فيه .. انولد فيني احساس جديد ..
هالاحساس اللي تشوش بمسمى الزواج صار واضح مثل الشمس .. عندي أخت .. شي فاقده .. مضيعه ولقيته ..
.
على الرغم من صعوبه الموقف والوضع اللي انحطيت فيه مع نوف .. الا اني معها لقينا ضالتنا ..
اخوااااااااان
ويا زين هالحروف ولمتها واحساسها .. ما كرهت ابد اللي صار لي مع اني ما انكر الاحراج الكبير والوضع اللي كنا فيه ما سهل ..
لكن غيرنا خلفو وبعد سنين اكتشفوا هالشي .. حمدت ربي على ان وهبني هالاحساس وانقذني من معمعه مالها اول ولا تالي ..
اليوم وبعد مرور ثلاث شهور ..
انا عريس بس عريس مدلل بكل معنى الكلمه ..
اختـــــــي هي اللي جهزت شقتي واغراضي .. رتبت وضعي ووضع زواجي .. كانت فرحه بكل ما تعنيه الكلمه من معاني ..
انتهت بخطبه صديقي المقرب لـها .. شي أسعدني وضاعف الفرحه بقلبي ..
|
11-02-12, 01:15 AM
جديد مواضيع قسم القصص القصيرة من وحي قلم الأعضاء , قصص من وحي قلم الأعضاء
العرض العادي
