المنتدى :
الشعر والشعراء
القصيده التي انهكت الامير عبدالرحمن بن مساعد وقصيدةرثاء الامير نواف بن فيصل في والديه
يقول صاحب السمو الملكي الأمير عبدالرحمن بن مساعد عن قصيدة _ اربعين_
القصيدة كتابياً
ادلهمّ الكـون حولـي وأطْبقَـت سحـب الكآبـة
أغرقَت جوفي بدمعي وأهلَكـت أخضـر حقولـي
وينكم يا ربع عمري ؟ من بقى مـا صـك بابـه؟
ما بقى لي صاحبٍ أرمي عليـه أهْـوَن حمولـي
الكتابة عن همومـي ذنـب أفْشَـل فـي ارتكابـه
هكذا حزني أنانـي غيـر فرْحـي للّـي حولـي
من همـوم النـاس أبنـي دافعـي لجـل الكتابـه
ما حسَبْت حساب ضاقوْا بْما كتبت أو صفّقوا لـي
كم كتبت و قيل تكفى هذا شـي مـا ينحكـى بـه
مو بكيفي صرت وابِل تُرتَقـب لحظـة هطولـي
ما تعبت أرقى و أرقـى بالدُّعـاء حالـي تشابـه
مقدر انزِل لو أبنزل غصب ترقـا بـي رجولـي
لي إلهٍ جـلّ شانـه عنـدْ مـا أكـون فْـرِحابـه
في ركوعي في سجودي أصْعَد فْـقِمّـة نزولـي
لي مكانٍ في الكواكـب ذا طموحـي لسْـتُ آبَـه
نجم عالي ذا مكانـي عـل موتـي هـو أفولـي
باقيٍ يـا دنيـا شعـري يملئـك فخـر و مهابـه
قد يـزول فْـيـوم آتـي عندمـا أنتـي تزولـي
انتسبت لْجَـد مُعْجِـز ديـن و عـزوم وصلابـه
هو أخو نوره معَـزّي تبطـي جـداً يـا ذُبولـي
ولي أبو ما شفت مثْلَـه مُحتسِـب مهمـا أصابـه
كل زهدٍ غيـر زُهْـدَه مُفْتَعَـلْ وَهْمِـي وصولـي
عنـدي أمٍّ مستحيلـه طيبهـا صعـب اجتنـابـه
آه يُمّـه كـم أحبّـك فـي شراييـنـي تجـولـي
ولـي وطـن أحيـا لعـزّه أفتـدي ذرّة تـرابـه
مسلم سعودي عروبي ذي فروعـي ذي أصولـي
ولي شقيقٍ ماني أقـوى نبـرة الحـزن فْـعتابـه
كيف عاد ان كان يزعل ؟ أحترق من فرط هُولـي
ولي ولد عمٍ غمَرني فضلـه و سِـرْت فْـرِكابـه
شفت له في كل لحظه فزْعه و موقـف رجولـي
ولي حبيبه مستديمـه حُـب عمـري مـن شبابـه
ما لي فصول ومواسم وَحْدَها هي بـس فصولـي
أم قلبيـنٍ بجوفـي هـم بعـد كــل القـرابـه
هم سبب سعدي و مجدي هم سبب خوفي و جفولي
ما فعلت الخير أرجـي مـن بشـر فانـي إثابـه
عالمٍ ربّي بقصـدي ومـا سبَـبْ أطيـب فعولـي
إن بغيت أعطي فأعطي فوق مـا أقـوى اكتسابـه
رزق باكـر هـمّ باكـر اهتمامـي لَسْـتُ أوْلـي
ما أفكر فـي عواقـب جـور وقتـي و انقلابـه
أوْثَق بْمَا عند ربّـي صعـب عـن هـذا عدولـي
جُل خيرٍ قد فعلتَـه كنـت فـي عَكْسَـه أ ُجَابـه
لم يفاجئنـي جحـود ولـم يُثِـرْ حتـى فضولـي
يا زماني قبل غدرك كنـت أقـول الدنيـا غابـه
يا زماني بعد غدرك مـا نقـص مـا زاد قولـي
أربعيـنٍ مـن تجـارب أربعيـنٍ مـن غـرابـه
أربعيـنٍ مـن تأمُّـل شكّلـت ذاتـي و ميـولـي
الكِبِـر أردى الخطايـا مــا تجـبّـه استتـابـه
أستعيذ بربّي منّـه فـي خروجـي فـي دخولـي
شفت في الدنيا مهـازل تُفقِـد المـدرِك صوابـه
يفخر الكافـر بكفـره تُشْتَـم بْقولـة " أصولـي "
النفاق اكبر رمـوزه كـان فـي عهـد الصحابـه
كيف عاد الوقت هذا ؟ كل شبـرٍ بـه " سلولـي "
الرضوخ أصبح فضيله وقول " لا " أصبح دُعابـه
والمشاكـل مبتدعهـا قـال : تِلْزِمْكُـم حلـولـي
كيـف تغييـر المعانـي يُرجِـع الحـقّ لْنصَابـه
والثوابـت مستباحـه عنـد ذول و عنـد ذولـي
كـل حـقٍ دون قـوّه زاهـق و ثابـت ذهـابـه
يُكْتَب التاريخ ناصع للقـوي لـو هـو " مَغولـي"
العـدو بالحيـل قـرّب واضـحٍ تكشيـر نـابـه
وبعضنا لازال يسـأل ظنّكـم أسـرِج خيولـي ؟
بين تفريط و تطـرّف تـاه جيلـي فـي خِطابـه
خير أموري هو وَسَطْهَا طال عـن هـذا غفولـي
احترس يا ذيب و احذر من زمن سـادَت كلابـه
الوفا بَـه صـار عِجْبـه والغـدر فعـلٍ بطولـي
لا تثـق بالّـي تثـق بـه بـد شكّـك وارتيـابـه
كم عُهُرْ سافِـرْ يُغطّـى بْملْمَـحٍ طاهـر طفولـي
عنـدي للدنيـا سـؤال ومـا أبـي منهـا إجابـه
هو يغيّر شـي رفضـي أو حيـادي أو قبولـي ؟
كـن يـا دنيـا همومـك جُمِّعَـت مثـل الذّيابـه
سالمَت كل اللّي قبلـي تنتظـر لحظـة وصولـي
كلّ غـدرك مـا يسـاوي فـي موازينـي ذبابـه
ربّمـا لـوّك وفيتـي كـان أرّقْـنِـي ذهـولـي
يا عذولي هاك بوحي هـاك جرحـي و انسكابـه
ما سوى ذا وقت سَانح قـم بـدورك يـا عذولـي
أتعبتنـي هالقصيـده فكـر و جـروح ورتـابـه
بـس يـا هـذي القصيـده أقصريهـا لا تطولـي
يا كريـم يحـب عَفْـوهْ رحمِتَـه تسبـق عذابـه
ألطـف بذلّـي أمامـك حينمـا يَحْتُـمْ مثـولـي
................................................
قصيدة الأمير نواف بن فيصل بن فهد(أسير الشوق)
في رثاء والده المغفور له بإذن الله الأمير فيصل بن فهد بن عبدالعزيز.
فجعتني يا سبت باغلى وأصـدق الأحبـاب
وصدمتني بامـر ولانـي حاسـب حسابـه
اقول مدري وش يقـول الذاهـل المنصـاب
راح الهنا والفـرح طـارت عنـي أسرابـه
المـوت حـق ولا إلـه إلا هـو الوهـاب
يعطي وياخـذ ولـه حكمـه مـع أسبابـه
يابوي أنا فيني وجع لـه مخلبيـن ونـاب
يجتاحني واكذب لوأنـي قلـت مـا أهابـه
يابوي لو صاب الصلد ما صاب قلبـي ذاب
قضيت والهاجـس غبنـي وأطلـق ذيابـه
يابـوي وينـك مزعجتنـي عجـة النعـاب
افديـك وينـك فكنـي مـن رهبـة الغابـه
يابوي شبلك من تركته كـن راسـة شـاب
تقاطعـت فيـه الـدروب وقلـوا أصحابـه
يابـوي ذل الحـزن ذل ولا عليـه حجـاب
من يا طويل الصمت ينصفني مـن حرابـه
يابوي أه مـن العـذاب وصبـري الكـذاب
أه مـن الفرقـا وهـم ثـارت اعصـابـه
يابوي مـا تمـلا مكانـك زحمـة الاقـراب
انت الامان وغيـر ظلـك صعـب أهنابـه
يابوي لو شفت الديـار ودمعهـا السكـاب
النـاس تبكـي والشجـر واليـم وعبابـه
حبك تغلغل بالوطن ماهـو ريـا واعجابـه
يـا ساكـن روح الشبـاب وقلـب شيابـه
انعاك لا ما انعاك ما يرثي فضـاك شهـاب
مثلـك وجـود بـلا حـدود مشـرع بابـه
يا سدرة العـز ونخيـل المجـد والمرقـاب
يا شذرة السيف وعمـود البيـت وأطنابـه
صورتك في دمعي تعانق رعشـة الأهـداب
ونبضـك بشريانـي يشاركنـي بعنـابـه
واسمك وسام فوق صدري والفعـول كتـاب
تمـر أيــام العـمـر والـكـل يقـرابـه
ومن جا يعزيني بفقدك قلـت لـه مرتـاب
ابـوي عايـش لكـن انـي مـت بغيابـه
ورب الضحى والليل الاسود لا سجى ما غاب
طيفه ولا فارق ضميـر احـد مـن احبابـه
مامات ابوي ومن يظن انه رحل ما صـاب
الطيـب مـا يفنـى ولـو حطـوه بترابـه
مامـات وردك يالحيـاة المـورق الجـذاب
باقـي شـذاه يفـوح بالتاريـخ وثيـابـه
روح تعالت فـي سمـاوات الغـلا ترحـاب
فيهـا سمـوه طلتـه طيـبـه وترحـابـه
جعل الخلود أخـر مداهـا والنعيـم البـاب
روح مع أصحـاب اليميـن تقلـب كتابـه
............................................................ ..
قصيدة نواف بن فيصل أسير الشوق في وفاة والدته رحمها الله بصراحة احزنتني القصيدة
بصراحة قصيدة الأمير نواف في أمه محزنة وانصحكم أي واحد مافقد أمه انه يبر فيها ولايخليها والله الواحد مادري كيف عايش بدون أم
أخليكم مع قصيدة الأمير نواف بن فيصل أسير الشوق وادعوا لوالدته بالرحمه الله يرحمها ان شاءالله
سبع وخمس سنين ياهي مريرة
مابين خسف صاب دنياي وكسوف
يوم أنطفت شمس الجزيرة ظهيره
وعني رحل فيصل وجت عجة ظروف
صارت حياتي لكل الآهات ديره
وكنت الحزن كله , تعابير وحروف
ودعت أبوي , ولا بقى قلب غيره
إلا خفوق كنت به دوم محفوف
حضن الأمان اللي وهبني ضميره
واللي سقاني كل طهر ومعروف
وأصدق شعور لفني في حريره
وأحن صدر ضمني , وأعذب وصوف
أمي , بكل حروف توصف كبيره
ومن غيرها يقدر يبرد على الجوف
بنت السمو اللي زهت به مسيره
وأم الجريح اللي من العمر محذوف
سبت فجعني والمنايا شطيره
وحتوف , لاحل القدر طاحت سيوف
سبت لحق سبت وتاهت بصيره
وجعت , اون وعود الوجه مخطوف
أصيح وأشهق والسعيره سعيره
ويارب صبرني .... يارب ملهوف
فقدتها يارب هدي السريره
ما ابتل ريقي , وينها ؟ ياظما روف
كن القمر من عقبها مات طيره
وتوشح ثياب الكدر واقبل خسوف
عزا .. وعزتني صفوف كثيره
وما فيهم اللي رد صبح لمكفوف !
ما عادت ديار السهارى منيره
ظلما هنا وهناك , والباقي طيوف
وذكرى تزلزلني , ودمعه غزيره
وطفل يتيم هده البعد والخوف
مكسور ولاتنفع بكسره جبيره
مقهور , ما بيده ولا شي , مكتوف
لبست ثياب أحرام عمره أخيره
وصار الكفن في عرش رب السما يطوف
ربي يتقبل نيتك يا لـفـقـيــره
وحنا برجوى خالق العالم ضعوف
يمه : صمت , وموجعات عسيره
وضيقه ورا ضيقه , وهم , وعاصوف
يمه : وداع , وخيره الله خيره
وفي ذمة اللي كلنا بأرضه ضيوف
أقول وش أقول : راحت (منيره)
يعني فقدت النبض والسمع والشووف
...........................................................
الله يرحم والديه ويسكنهم فسيح جناااته..
كلهم سبحااان الله ماتوا في يوووم السبت!!
الحااال من بعضه ياسمو الامير..
اللهم ان والدي انا..واي شي سيئ يصير لاحبابي يكووون يوم الجمعه..
واذا جاء يوووم الجمعه لازم ادق واتطمن على جميع الغوالي وياويل ويا سواد ليل اللي اسمع انه مسافر يوووم الجمعه..اللهم لا طيره..
|
05-08-11, 09:39 PM
جديد مواضيع قسم الشعر والشعراء
العرض العادي
