الحكم بعد المداولة
سيدى القاضى ... حضرات المستشارين
قضيتنا اليوم هى قضية حياة ... قضية رأى عام
ان هذا المتهم الماثل امامكم فى قفص الاتهام غوى وغرر بالحياة ، تملكها ورسم
لها الاحلام ، علقها بحبال الهوا وما هى الا لحظات ونامت فى احضان الارض
مكبلة بالآلام ، تملك الاحساس واشعل الاشواق بنيران الوحشة واللهفة
نقدر نقول سيادة القاضى " اتمسكن لحد ما تمكن " ، قيد العقول فى ساحة كبيرة
على ملىء من القلوب ، حاكمهم وأمر باعدامهم فانحنت له القلوب وانصاعت
لأوامره فاستعبدها وسيطر عليها ، اسدل الستار على العقول ودفع بالقلوب لهاوية
الجنون فأحبت بجنون
دفع بهذا الى الانتحار عندما أحبها حبا شديدا ومع أول عريس متريش شطبت على
الاحلام اللى رسموها وحسبتها ودورت على مصلحتها
وده الى انه يعيش فى عار طول عمره لما حبها وقاد لها صوابعه العشرة شمع
ومتمرش وفى الآخر خانته
وده غرر بيها لما سمعت وشافت قصص الحب ، حبت وسلمتله نفسها وفى الآخر
ضحك عليها
الوقائع دى سيادة القاضى مثبته و ضحاياه كتير ودا كله بدافع منه وهو واقف يتفرج
سيدى القاضى انى اطالب بتوقيع اقصى العقوبة عليه وهى اعدامه من الحياة ورجوع
حق الحياة وحق الملكية للعقول وسيادته على القلوب
شكرا سيادة القاضى ...................
الحكم بعد المداولة .
... محكمة ...
بغض النظر عما اثبته محامى المجنى عليهم ، وبغض النظر عما احدثه المجنى
من اصابات ، وبغض النظر عن جنونه ومرآته العمياء .
وحيث انه :
لما مال الفل على الياسمين وشوشها بكل حنين ورقص النحل على سيمفونيه جميلة
اتولد الحب وعرفنا معنى الحب
ولما جريت امواج البحر وحضنت الرمل بحنية وباركتهم الشمس اتولد الحب
وقلنا الله على الحب
ولما نسم الهوا على شعر الصبية واتمايل مع خصرها وباس خدها معجب بيها
اتولد الحب وزاد حنينا للحب
ولما تاه من الليل القمر وحزن الليل ووساته النجوم رجعله تانى يوم وبفرحة الليل
اتولد الحب وسهرنا فى حب القمر
ولما نام التلج فى حضن الشجر عشان يدفى من برده وزغزغت فروعه بياضه
اتولد الحب ونور ضلمة قلوبنا
ولما اتجنن قيس بليلى وعشق روميو جوليت وأرخت الكتب عن كليوباترا وأنطونيو
اتولد الحب وحلمنا بالبطولة فى أسطورة حب
ولما غنى حليم أهواك وابدع بسن قلمه جاهين وحكتلنا ثومه عن سيرة الحب اتولد
الحب واتمنى كل واحد يعيش قصة حب
وحيث اننا بجد منقدرش نستغنى عنه وبندوق حلاوته بالقرب منه ، ويهرب دمنا
ويحمر وشنا فى أول مقابله ، وبيعلى احساسنا وتقيد اشواقنا نار بعد أول كلمة حب
ونرجع نسهر طول الليل نحكى ونشكى من حلاوته للقمر
وحيث أننا منقدرش نلغيه من حياتنا لأن هو حياتنا
حكمت المحكمة حضوريا بالبراءة وتحمل المدعى اتعاب ومصاريف المحاماة
رفعت الجلسة ...
14-12-10, 10:07 PM
الحكم بعد المداولة
جديد مواضيع قسم المنتدى العام
العرض العادي
