~ .. عيدنا أحلى من عيدكم ( صبوحه ) .. ~

~ ... ~ بسم الله الرحمن الرحيم ~ ... ~


~ ... ~ السلام عليكم ورحمة الله وبركاته ~ ... ~


~ ... ~ صباحكم / مسائكم خير و فرح و أعياد من الرحمن ~ ... ~



~ ... ~ كل عيد والخير دربكم وممشاكم ~ ... ~

~ ... ~ والبسمة دوم ما تفارق شفـاكم ~ ... ~

~ ... ~ وجنة ربــي هـــي سكنــــاكــــم ~ ... ~

~ ... ~ عيدكم مبارك ~ ... ~

~ ... ~ و كل عام وأنتم بألف خير ~ ... ~




~ ... ~ طبعا حضرتي كنت نايمة على روحي توي من شوي شفت دعوة دندون لي <<< ربي يسامحها على ~ ... ~


~ ... ~ عشان جذي ما صورت شيء بس عمنا قوقل ما قصر <<< العذر والسموحة منكم ~ ... ~

قعدت الساعة خمس صليت الفجر وكان باقي وقت على صلاة العيد وانسدحت شوي بس

للأسف راحت علي نومه عشان جذي مارحت صليت نكب فيني باباتي <<< فيس متحسر

على الصلاة اللي طافته

وما قعدت إلا الساعة ست ونص قدها الصلاة مخلصة وتو أبوي جاي من الصلاة كل هذا وأمي

نايمة لانها كانت بعافية شوي بالليل وما قعدناها

المهم أبوي جاء تكشخ عشان يروح يسلم على جدتي والجماعة عاد أنا من عادتي ما أعايد

أمي وأبوي إلا بعد ما اتكشخ وأتعدل بس توبت العيد اللي طاف ما عايدت باباتي إلا بالليل بعد

ما رجعنا من بيت خوالي يا دلالي عشان جذي لما جيت أعايده أستغرب وخاف علباله فيني

شيء ما تشوفون إلا عويناته طايره فيني عاد انا فاكة الكشرة لا بابا ما فيني شيء بس

بعايدك قبل تطلع <<< طبعا بتقولون ليش ما ضحينه لان أبوي ما أحرم هالسنة وبعدين أبوي

مطيع سمع كلام هالخروف






بعد ما طلع أبوي رحت طليت على أمي أشوفها وقالت إذا ما قعدت الساعة عشر قعدوني

وبعدها مسكت التلفون أعايد يماتي (جداتي )


على الساعة ثمان قعد أخوي اللي أصغر مني وتكشخ بعدين جاني يعايد وهو يقول

الله بدلتج حلوة وتهبل وشعرج روعة وأنا مستغربة منه بالعادة يكسر مجاديفي طلع

الأخو مفلس ويبي عيده عشان يعبي بنزين سيارته بيروح عند خوالي عاد أنا هني

اشتغلت النذاله أول شيء قلته جيبلي ماي - بعدين قتله يروح يجيبلي بيبسي

(حبيب ألبي ) من البقاله بالاخير قلته حب رأسي وأعطيك

<<< ذليته من قلب مسكين بس عطيته اللي يبرد قلبه

بعد ما قعدت ماماتي سوينه ريوق عالطاير عاد بيتنا كلنا ما نحب الريوق بس عشان

فكة الريق وبعدها قمت أتكشخ ولما خلصت رحت أعايد أمي وأختي وبس بعدها ركبنا

السيارة أنطلقنا لبيت خوالي يا دلالي العيد هذا عند جدتي

اول ما وصلنا ما كان في أحد إلا جدتي الكل فوق يلبس ويتكشخ عايدتها ورحت عند خالتي فوق

أكمل لبس عندها وبعدها نزلت تحت لقيت جدتي الثانية (ام أبوي )مع عماتي وعمتي العروس

معاها وبعدها عاد قاموا يجون خالاتي وحدة ورى الثانية وبعدين خوال أمي وأبوي هم نفسهم وأكتملت

الجمعة بلمة الاهل والاحباب


~ ... ~ العيد يجمع الله فيه القرابه ~ وتصفى فيه كل النفوس المعاليل ~ ... ~

~ ... ~ سنه الله في منزل كتــــابـه ~ فرح وسعــــاده مع تكبير وتهليل ~ ... ~


وطبعا زلام القهوة والحلو وحلاو العيد عاد هذا جدتي ما تستغنى عنه لازم










والغدى جدتي اطبخته عشان سلامتها لان العيد اللي طاف كانت حيل تعبانة وبالله تقوم وكان

الطبخ بمطعم فقالت معوضين هالعيد وما قصرت ربي يتم عليها عافيتها ويخليها لنا

<<< بس شنو كان لزيز طبخ حريم أول من غير زفر ولا شيء

وبعد الغذى الناس اسكرت اللي نعاس واللي راح بيته بس بقوا خالاتي طبعا








~ ... ~ ... ~ ... ~







وبعد صلاة العصر شغلنا مسجل واشتغل الرقص من أمه حتى العيال الصغار قاموا يرقصون

وبدوري قام يدح وطبعا بما ان خوالي غير قبيلة عمامي فانا ساندت ولد عمي ودحيت معاه بس

بالاخير زهق مني وقال ما تعرفين

وقامت منافسة بين عيال خوالي وخالاتي وبيني (انا وبدوري واخوه )ناس تدح وناس تعرض

واستمرت المنافسة لي قبل المغرب

وبعد صلاة المغرب راحوا الشباب الحلوين وجابوا ألعاب نارية وهاتك يالعب والبنيات الحلوات

شروا لهم تفافيخ وقعدت انا معاهم

كني (( ماما أنيسة والاطفال ))وعبيناها ماي ونرمي على بعض عاد كان الجو بااااااارد

والملابس والحوش صاروا دمار

طبعا جدتي كانت راح تعصب عليهم بس لما شافتني معاهم اسكتت على قولتها (( كبيرهم هبيلهم ))<< يا حبي لها

ولما خلصنا رحت بدلت ولبست دراعة ميني خطيتها عن مشغل خالتو طبعا البيت كله مخيط عندها

وقمنا نسوي عرض أنا وخالاتي

وحريم خوالي وجدتي وأمي الحكم وطلعت انا المركز الثاتي <<< أحسن من ولا شيء <<< فيسي اللي يشجع عمره


وبعدها خلاص البطارية فضت عند الكل تعشينا ورحنا بيتنا وتوته توته خلصت الحتوته


وكل عام وانتم بألف خير