كاتب الموضوع :
مشاعر العتيبي
المنتدى :
الارشيف
الفصل الأولْ ~
بـآرت 1
.
.
الساعه2 إلا ربع الظهر
بالمطبخ تغسل المواعين بروآقه اليوم أربعاء يعني انواع الفله . .
أمها تناظرها بالمطبخ : فرح يمي صوتتس الله يهديتس
فرح بصوت عالي: يمه انا مستانسه اليوم اربعاء ماتبيني افرح وبدت تغني الأغنية ل آحلام تحبها حيل . .
خل بـآلك نزل عينك هنا ولا هنا ويلك
ترى قلبي مو بس يغار عليه غيره تهد ديـآر
خلصت فرح غسيل موأعين وغسلت يدينهـأ للمره الأخيره
فرح تبعد الخصل عن وجهها: اووف واخيراً خلصت
طلعت من المطبخ واهي تناظر التلفيزون وتشوف أمها تقلب مالقت لها محطه زينه . .
امها: يمي فرح حطي لي على محطتن صاحيه
خذت من امها الكنترول وبدت تقلب لقت قناة المجد وحطته عليها: ها يمه تبين ذي ؟
أمها: ايه ايه خلاص الله يجزأتس خير
فرح حبت راس امها : يالله يمه انا بروح اخمد تبغين شيء؟
امها:لا ياعمري بس مري ابوتس شفي ان تسان وده بشي
فرح : ابشري
اتجهت ل غرفه أبوها اللي كانت جنب غرفتها على طول
دخلت وشافت ابوها يسبح رفع عينه وناظرها ب ابتسامه بينت تجأعيد وجهه :
هلا والله ب نوره هذي الحلا والطرى
*أبوها كان وده انه يسميها نوره على اسم امه
مو مقتنع ب اسم فرح وصار يناديها نوره
ابتسمت فرح ل ابوها : هلابك
مد يده لها عشان تجلس جنبه : تعالي هنيا تعالي
سوت فرح مثل ماقال ابوها لها وجلست جنبه : سم يا يبه أمرني
ابوها بحنيه يمسح بشعرها: مايمر عليتس عدو والله
فرح ب ابتسامه : يبه تصدق اليوم اوم اوم الفله اربعاء تكفى طلعنا خلنا نغير جو العصر
ابوها :ابشري والله ماطلبتي شي
قامت فرح وحبت رأس بوها :تسلم لي ماعمرك رديت لي طلب خلني احسن من فوزيوه شوي
ضحك ابوها عليها : ماتتركين خبالتس
فرح ب أستهبال : يبه هذا يعني شي اساسي يعني تخيل لو فرح ماتستهبل وتخبل من يبعث الفرح في عيون الأنبأء؟ يا والدي حشى كني سعاد عبدالله ههههه
ابوها : والله مدري وش تقولين هههههه مير الله يسترتس
فرح وقفت : امين يلا يبه الوقت بيروح علي بروح اقيل مع اني اليووم تأخر بألحيل . .
طلعت فرح من غرفة ابوها واتجهت ل غرفتها وطفت النور وطقت المكيف اللي كان الوحيد بغرفتها . .
مكيف واحد بالبيت بس. . ؟ بغرفة فرح بنائاً على طلبهـأ
حطت راسها على المخده وغمضت عيونها وبسرعه تسلل النوم ل أجفانها . .
.
.
أبو خالد : كبير في السن يحب فرح حيل لانها تختلف عن اخوانها كلهم ب كل شي . .
أم خالد : كبيره أصغر من ابو خالد ب سنه فقط إلا ان دأيم المرأء تكبر قبل الرجل وتمرض قبله ومعاها جلطه بالقلب
خالد :بعيد عن امه وأبوه علاقته مع فرح مو مره . .
مرته دأيم تزيده كلام وتخليه يكره يروح لمه ابوه
نـأدر مايروح إذا كانوا تعبأنين بالحيل
وعندهم 3بنات
ساره:تبعد عن قرية اهلها ب 40 كيلو علاقتها مع اهلها حلوه وزينه بس اللي كانت تنقهر منه حيل انها بعيده عنهم مو دايم تجيهم
عندها 3 عيال وبنت
محمد : أخف من اخوه شوي ولانه جنبهم ف لازم يطل عليهم كل بنت فتره وفتره
مرته ماكانت تكرهه ب أهله ولا كأنت تهتم فيهم معلمه بنفس قريتهم
وعندهم ولد
.
.
على الساعه 4 العصر بغرفة فرح . .
أمها طفت المكيف : فرح يمي قمي الصلاه قضت
فرح تسحب الشرشف وتحطه على عيونها
: ياليل يمه بس دقـآيق
امها علت صوتها شوي: يافرح قمي احرقتي قلبي
فرح : لحوول يمه قولك دقيقه بس شوي
أمها : يابنت ابوتس برى يقول ان ماجت مشيت
فتحت عيونها وكانها تتذكر: أبوي يقوله ؟
امها : ايه يالله قمي
تمغطت فرح وتحس عظامها بتتكسر : اووه
راحت توضت وصلت و غيرت لبسها وافتحت علبتها
وطلعت كحلها وتكحلت وقفت بسرعه واهي تاخذ بشتها وتطلع من الغرفه . .
أمها بيدها سله : يالله يافرح طولتي تراتس
فرح اخذت السله: خلصت
طلعت امها ولحقتها فرح وهي تقفل الباب بقوه عششان يتسكر. .
ركبو سيـآرة ابوهـم امها قدام وفرح ورى . .
فرح: الله سيارتك كشخه وانت حيل مزيون
ابوها : هههه الله ياعليتس ياساره ما اقدر على لسانتس
فرح : تبيني اششعر عليك لين نوصل . .
ابوها :قلي اللي عندتس
بدت فرح تقول ل ابوها كل القصـايد اللي حفضهـآ إياها زمـآن
وأبوها مبسوط عليها كل اربعاء نفسيتها
تحلو اكثر واكثر
.
.
رفع شعره عن وجهه بعصبيه:أوف أوووف
: شفيك انت من اليوم تافف؟
يحط يده على ركبته ويسند ظهره:شايف يعني الجو حلو؟وتبيني ابتسم؟
:لا طبعا بس اصبر دقايق يعني بتطير الدنيا
: شوف انا زهقت دقيقتين بس ماجات بنمشي
: طيب طيب لاتعصب علي تراي ولد عمك مانيب وحده من خوياتك
ناظره بطرف عينه ومارد عليه اليوم المود مو تمام
.
.
رجعوا البيت عقب ماغيرت جو على قولها بالبر
الساعة 6 المغرب . . .
نزلت فرح لسبها اللي عليها و طلعت من غرفتها واتجهت للمطبخ بداء شغلها من جديد اللحين . .
رتبت المطبخ وجهزت أكل ل سهرتها
ثم ركبت ل أمها وابوها اكل لأنهم يتعشون بدري . .
أبوها جالس بالصاله : ساره يابنتي تعالي شفي لي محطه شعر كود أني تلها فيها
طلعت من المطبخ وحطت على قناة شعريه ورفعت في الصوت واهي تشوف امسيه شعريه ل شاعر محبب لها
فرح بنفسها [الله الله اما جيت في وقتك إلا شوي دقايق بس اطفي القدر واجيك لاتروح ] ضحكت من نفسها واهي رايحه للمطبخ . .
طفت عن القدر ورجعت تتأبع الأمسيه ولشاعرها المفضل. .
أمها : يمي فرح العشى طفيتي عنه ؟
فرح تاشر برأسها وعيونها على التلفزيون : أيه ايه
.
.
بصوت عالي: واللي يعافيك هد السرعه مانبي قسايم وشكأوي
ويرص على اسنانه: أوص لاتخليني اتهور واسوي اعظظم
رن جواله وطلعه من جيبه ومن قو العصبيه طاح تحت عند رجلينه : اوف انا رايق لك بس تستخف
نزل يبي يجيب الجوال ولفت يده اللي على الدركسون
وانحرفت السياره
اللي جنبه مد يده للدركسون
.
.
رن التيلفون مدت يدها بسرعه قبل يمكل
فرح : الو
ساره: السلام عليكم
فرح ب ابتسامه : هلا والله وغلاآآ وعليكم السلام
ساره: شلونكم ؟
فرح : بخير طيبين
ساره: وشلون امي عساها طيبه؟
فرح :لا طيبه الحمد لله , انتي شلونتس عساتس بخير ؟
ساره: بخير والله
فرح: وششلون خالد و ريا وسكينه والبقيه الطالحين
ساره: اهبي وش طالحينه هاه ؟
فرح : هههه اجل على بالك انهم صالحين ايه فداك شعري مير
ساره: اقول عطيني امي بس ماعندك ماعند جدتي
فرح : وجع يلا خذي مدت السماعه على امها : يمه خذي ذي ام سعدون
امها واهي تضحك من بنتها خذت السماعه
وقتهـآ انطق الباب ولفت ترف جهة الباب وراحت تفتحه [لحوول حتى ماخلوني أكمل بس قصيده وحده]
فرح ب ابتسامه: هلا والله وغلا
محمد سلم على فرح وبيده ولده نايف سنتين
فرح مدت يدها ل نايف : هاته عنك يامحمد
شالته واهي تلعب بشعره الطويل الناعم : تجنن والله انك تاخذ العقل دخلت عليهم ومحمد سبقها
محمد: شلونك اليوم يابيه عساك احسن ؟
ابوه: لا ولله اليوم حالي زوين
ناظر ب فرح واهي شايله نايف : هاتيه يا ابوك هاتيه
مشت فرح وتزلته عند ابوها وجلس يسلم عليه طلع من جيبه 20 ريـآل وحطه بجينز بصعوبه . .
محمد بحرج: خيرك سأبق يابو خالد وشوله تكلف على عمرك
ابوه: اسكت خله يفرح بها
قامت فرح تسوي القهوه وأذن العشأء [يالله زين بس باقي ساعه بالكثير وتفضى لي الصاله]
تقهوى محمد وتستأذن راتحت تصلي العشاء ونتظر امها وابوها يصلون عشان تحط العشى . .
.
.
الساعة 11
فرح فاتحه mbc2 وقدامها حلى وقهوه والأنوار طأفيه والبيت هـآدي . .
فرح : حسافه يافوزيه ولا كان اللحين جايه عندي وجعووه
رن التلفون ورفعته ب اسرع ماعندها . .
فوزيه : افا يالخاينه وش جالسه تسوين ياسوده سهرانه؟هاه؟ وناسيتني
فرح : بسم الله هيه ترى روعتيني هذا أولاً ثانياً ايه سهرانه عندتس مانع ؟
فوزيه:لا دوأس هههه
فرح: سسامطه ماتضحك اسمعي وينتس انتي؟
فوزيه:بالرياض هههههههه
فرح: ايه حلمتس المهم تعالي مسويه ىحلى وقهوه اسرعي ولا اكلته كله
فوزيه: لاجد مسويه حلى طيب اللحين جايتس افتحي على أم بي سي
فرح: ههه لاتوصين حريص تخصصي مير امشي بسرعه
قفلت فوزيه منها وراحت لمها تستآذنها امها وافقت لانها تعرف فرح واهلها حييل
.
.
فوزيه : سلام عليتس
فرح تدخلها : وعليتس اقلطي حياتس
فوزيه ترفع بشتها وتمده : تراني ادل الطريز مير اخذي . .
جلست فوزيه وفرح وهم يتأبعون شوي وتنـآقرون شوي
وكانت من أحلى السهرات في يوم الاربعاء
.
.
[وبداء العد التنـآزليْ]
|
12-10-10, 01:02 PM
جديد مواضيع قسم الارشيف
العرض العادي
