**الجزء السابع**
مشى سيف صوب الميلس وبخفة وايج اذا حد موجود ولما اتاكد انه المكان خالي
يلس يدور على أي شي يخص غاليه وحصل باكيتها،فر فيه وردة حمرة ورد الباكيت مكانه وشرد.
سيف فخاطره:ممكن اتشك فيني
غاليه:اكرمكم الله
اليازيه:غليوه..ماكلتي شي
غاليه:ماشا الله عليه،وين ماكلت وانا غاسله الصحن
اليازيه:انا ما شوف غير صحن الفتوش الماكول منه
غاليه:ماتبغيني البس فستان فعرسج؟
اليازيه:مافينا...ههه
غاليه:يا الله......... اتأخرت خالتي مريم
اليازيه:ليش توه الناس
غاليه:شو توه الناس...بتستوي 11
اليازيه:خليني اشبع من شوفتج
غاليه:آآآآه لا تذكريني
غاليه:بتصل فخالتي....وين باكيتي؟
اليازيه:اظنج خليتيه ع القنفة.....اندوج موبايلي
غاليه:اشكرج........الو
ام سلطان:الو
غاليه:وينج ؟استوت 11
ام سلطان:عشر دقايق واظهري عند الباب
غاليه:اووكي
اليازيه:وصلت؟
غاليه:لا ..بعد عشر دقايق بتوصل
اليازيه:شرايج نمشي في الحوي على ماتوصل .
غاليه:اوكي... الجوحلو اليوم
اليازيه:يلا قومي
غاليه:بغيت باكيتي
اليازيه:اغسلي يدج وانا بييبلج اياه
غاليه:متشكرة يا حبيبتي..نخدمك في الافراح والليالي الملاح
اليازيه وهي تفتح الباب الخارجي:يلا بينا
سيف هالوقت يالس فسيارته يدورموبايله الثاني وصاك الباب،وفجأة يسمع حس بنات،صك ليت السيارةوخلى الدريشه مفتوحة,
غاليه:وريلج موافق انج تسوقين؟
اليازيه:هيه،ماعنده مانع حتى انه يشجعني عالشغل
غاليه:ماشا الله،لايكون بس يبغي يستفيد من وراج
اليازيه:غليوه مستويه سوسه
غاليه:هههه
سيف فخاطره:انا اللي اسويه صح والا خطا؟بس اذا ظهرت من السيارة بيخافون واذا....
اليازيه:اصلا الخير فوقهم وتحتهم وما اظن انه محتاج،وبعدين انا بشتغل من الملل
غاليه:صح ...آآآه متى بفتك من الملل؟
اليازيه:غليوه....شو لون فستانج؟
غاليه:فيه لونين...وردي واخضر
اليازيه:ياااي ،احب الوردي
غاليه:انا قايله،بسوي رياضة هالايام حتى يطلع الفستان حلو عليه
اليازيه:انا بعد كنت مفكرة العب رياضة
غاليه:وليش من الاساس تلعبين رياضة؟ناويه تنقرضين
اليازيه:حبيبتي...الرياضة صحة
وهم يمشون وصلوا حذال كراج البيت وسيارة سيف مجابلتنهم
غاليه(تغني):الجو جميل..جميل الجو
سيف:يا عيني
اليازيه: مو احسن لج تذكرين الله ونحن عند الشير
غاليه:هيه،صدق...استغفر الله
وفجأة صدت غاليه صوب السيارة،وحست براس يتحرك،في هاللحظة دمها وقف في كل عروقها
اليازيه:اسمع صوت سيارة يايه
غاليه:............
اليازيه:غليوه سيارتكم تضرب هرنات
غاليه:م مع السلامة
ومشت غاليه صوب الباب من دون ما تسلم على اليازي
غالية وهي تركب السياره:صباح الخير،اقصد السلام عليكم
ام سلطان:ههه...وعليكم السلام والرحمة،اكيد فيج رقاد
غاليه:جايز
غاليه وهي في السيارة تذكرت الملف اللي وصلها عن طريق البلوتوث وفضولها ماخلاها تصبر لتوصل للبيت
غاليه(وهي تظهر موبايلها من جيب الباكيت الامامي):وين خزنته؟
غاليه وهي تفتح الصور:اظن هذا
واظهرت الها صورة قمر
غاليه(فخاطرها):قمر؟شويعني؟.......بس،بس منو اللي ممكن يكون طرشها؟
سعيد؟سعيد عمره عشر سنين،مستحيل يكون هو...بس كل شي جايز،واذا سيف،ليش يطرش لي صورة قمر؟؟
سيف في هذا الوقت فغرفته يفكر بالمواقف اللي صارت
سيف:معقوله،شافتني؟.....ما ظن...شافت الورده والا بعدها؟افففف
بس انا ليش حطيتلها الورده؟اكيد بتشك فيني....شو بتقول عني؟
غالية هاللحظة فغرفتها تسترجع شريط اليوم اللي مر
هذي السيارة سيارة سيف...ليكون...هواللي يالس ف السيارة
لاااا...مستحيل،ليكون سمعنا...يالفضيحة
**الفجر**
خالد راقد فحجرته في سابع نومه وفجأة يرن موبايله
خالد:افففف..........وين الموبايل؟منو يدق هالوقت
خالد(من غير مايشوف الرقم):الو
عبدالله:الو..خلود
خالد:منو انته؟
عبدالله:قوم صل
خالد:اصلي؟انته منوه؟؟
عبدالله:هههه انا عبدالله
خالد:عبدالله؟منوه عبدالله؟
عبدالله:يا ولد الحلال قوم صل،كفايه انك في البيت
خالد:اوووكي
عبدالله:الله يعيين
**الصبح**
سلطان يدق باب غرفة غاليه
سلطان:غليوه..غليوه
غاليه(وهي ع الفراش):نعم...شو تبغي؟
سلطان:غالية الغالية..
غاليه:الله يستر...خير
سلطان:خير ان شا الله....تعرفين اني انا اخوج الصغير المسكين
غاليه:المختصر ،ابغي ارقد
سلطان:بغيت مئة درهم عدا ونقدا
غاليه:نعم؟قول لابوك او لامك ،انا شليه
سلطان:اووه،الصراحة انا ماخذ موبايل يديد ومتسلف من ربيعي وتم اللي ادفع مية درهم واذا عرف ابويه بيذبحني
غاليه:ما شا الله...من الحين تتسلف..عيل يوم بتكبر تبغيني اسلفك نية الف
سلطان:غليووه حبيبتي،اوعدج هذي اخر مرة
غاليه:اخر مرة،واذا عدتها بخبر ابويه او خالد
سلطان:والله العظيم اخر مرة
غاليه:عطني بكيتي اللي ع التسريحه
سلطان:فدييييت غليوه الغاليه
غاليه:خلك من هالخرابيط
سلطان:تفضلي
غاليه وهي تظهر بوكها،طاحت الوردة الحمرا
غاليه:ورده؟
سلطان:غليوه بسرعة اسمع حس ابويه
غاليه:اندوك
غاليه:من وين هذي الوردة؟امس ماكانت موجوده.......بسم الله الرحمن الرحيم
غالية:اتذكرت...انا خليت باكيتي ع القنفة ورحت اتعشى..بس من بيتجرا وبيفتح باكيتي؟انا ليش مكبره السالفه يمكن هذي زوزو
بعد سالفة الوردة وسلطان النوم راح عن غاليه وقررت انها تستغل وقت الفراغ الطويل وتروح مكتبة مجرودي تاخذلها كتب تتسلى فيهم،اشترت اربع كتب ورجعت البيت
بوخالد وام سلطان يالسين في الصالة وغاليه يالسه حذالهم تقرا كتاب
بوخالد:ما شا الله شو تقرين؟
غاليه(وهي تقرا العنوان):اقرا شوربة دياي
بوخالد:شو؟شوربة دياي؟
غاليه:هيه بوية
بوخالد:جان سالتي خالتج مريم كيف يسوونها
غاليه:هههه
بوخالد:جيه تضحكين،قلت شي يضحك يا مسودة العين
غاليه:اسمحلي ابويه،هذا كتاب شوربة دجاج لحياة المراهقين ،فيه
قصص كثيره عن حياة المراهقين في امريكا
بوخالد:شرايج يام سلطان انسوي كتاب عن حياتنا.
ام سلطان:عاد شو بتكتب؟
غاليه:هههه..شرايكم اتسوون كتاب عنوانه شوربة عدس لحياة المسنين
ام سلطان:محد مسن غيرج
بوخالد:شو تقصدين يام السان الحمدالله انا بعدني شباب
غاليه:ههه..هيه ما شالله ،الله يديم شبابك
فهذي اللحظة وصل لغالية مسج
غاليه:اخيرا حد تذكرني
ان غبت عنكم
يرجع العقل بأفكار""
فكري وحالي ماااذكر انه نساكم""
حتى بديت اشك في النفس واغار""
وارجع على نفسي
واخاطب رضاكم""
هذا غلاكم مابقى عندي اسرار""
ولافيه من نغليه
يشبه غلاكم""
لاحظت غاليه انه هذي المرة بعد اسم المرسل مو موجود،فتحت المسج اللي وصلها قبل شافت انه وصلها الساعة وحده،ورجعت فتحت المسج الثاني واستغربت انه في نفس الساعة...الساعة وحده
غاليه(فخاطرها):يمكن هذي حركات خلود،يبغي يخوفني،بس الغريب انه حد متعمد يطرش لي الساعة وحده،مايندرى يمكن صدفه.
خالد وعبدالله يشتغلون في نفس المكان في الاتصالات وهذا اللي كان يقوي صداقتهم اكثر واكثر
عبدالله:خلود...صليت الفجر؟
خالد:لا..امس نسيت ما شغلت المنبه
عبدالله(متعجب):مافيه حد وعاك
خالد:لا
عبدالله(وهو يحطي يده على يبهة خالد):بسم الله عليك
انا اتصلت فيك،ماتذكر؟؟؟؟
خالد:لا،انته تنكت
عبدالله:انته اللي تنكت،روني موبايلك
خالد:خ
عبدالله وهو يفتح المكالمات المستلمة:وهذا شو؟؟؟
خالد:والله العظيم ما اذكر
عبدالله:الله يعين عقب عشر سنين،اظن بتفقد الذاكرة
خالد:هههه..لا ان شا الله ،ان شا الله تخرف قبلي
عبدالله:عوذ بالله،يالله بطولة العمر
خالد:عبود ما اتخيل شكلك وانت معرس
عبدالله:ليش يعيني، انا مو مثل باقي الخلق؟
خالد:لا ،بس اتخيل شكل البشت عليك
عبدالله:منو قالك اني بلبس بشت؟
خالد:احلف انت
عبدالله:ما احب هالاشيا،انا ساعة ما البس
خالد:مريح عمرك
عبدالله:الحمدالله
خالد:انا عندي فكرة انا بلبس بشت فعرسك حتى يشكون اني انا المعرس مو انت
عبدالله:لا والله
وبعد دقيقتين سمعوا حد يدق الباب
عبدالله:تفضل
الشخص:.........
عبدالله:الباب مفتوح
ورد الشخص مرة ثانيه يدق الباب
خالد:نعم
الشخص:................
الجزء الثامن
قام عبدالله من مكانه وراح صوب الباب،وخالد عينه ع الباب
عبدالله:هههه..سلطان ماتيوز عن حركاتك
سلطان:مرحباا
عبدالله وخالد:مرحبتين
خالد:ماتبغي بعد نفرشلك سياده حمرا
سلطان:هههه ...شحالك عبدالله؟...شحالك ولد عمي؟
خالد:الحمدالله بخير،طاب حالك
عبدالله:شو مشتهي تشرب يا بو مايد؟
سلطان:كابتشينو
عبدالله:محي الدين جيب 3 كابتشينو
خالد:حي الله ضيفنا
سلطان:الله يحييك.........الصراحة فيه سالفه مستويه وانا مب عارف شو اقول
خالد:خير..شو صاير؟
عبدالله:اسمحولي
سلطان:لا يا ريال انت مو غريب
عبدالله :تسلم
سلطان:الصراحة انا ابغي مشورتكم
خالد:يلا ..قول شو صاير؟؟؟
سلطان(وهو يتنهد):الوالد ظهر انه متزوج
خالد:شوووو؟؟؟
سلطان:متزوج من 3 سنين
خالد:حسبي الله ونعم الوكيل....ومنوه هاي اللي ماخذنها؟
سلطان:آآآآآآآآآآآآآه....تتذكر واحد ابيضاني هادي،دوم يتيلس في ميلسنا
خالد:ما اذكر
سلطان:اللي اسمه عبدالوهاب
خالد:هيه عرفته،اذكر انه مرتين زارنا في البيت
سلطان:هذا الهادي سلمك الله،طلع ميوز الوالد من اخته....عنده 4 خوات ويبغي الفكة منهن
خالد:اشوف الوالد يتغير ويهه كل مازارنا ،اتاريه يلعب براسه
سلطان:اتخيل كم عمرها؟
خالد:كم؟
سلطان(بقهر):20 سنه
خالد:جيه،نحن رجعنا لزمان قبل الميلاد
سلطان:لا والقهر ،مسكننها في فيلا
خالد:وامك عرفت؟
سلطان:حتى الساعة ما تعرف شي عن الموضوع
خالد:لازم اخبر ابويه،حتى يتصرف
سلطان:ما اظن انه يطلقها
العصر......
عاشه وسلامه وغاليه راحو مركز البستان يتشرون قطع حق فستان عرس احمد
غاليه:عنبوه هذي القطع كلها وماعيبج شي
عاشه:حبيبتي ابغي شي اسبشل
سلامه:تدرين انج انتي اللي اماخرتنا
عاشه:ابغي قطعة عجيبة اللي على بعد ميل يشوفها
غاليه:خيييييييييييييييييييبه،بيظهر الفستان دفش
عاشه:انتي مو فاهمتني
سلامه :انتي اصلا منو يفهمج؟
عاشه:فديتني انا وفديت ذوقي
غاليه:عاشه..4 محلات دخلنالهن ،معقوله ماعيبج شي
عاشه:انتي مرتاحه شعليج،فستانج جاهز
غاليه:الله اكبر عليج اخاف يحترق والسبه عيونج
عاشه:الحمدالله عيني ما تصيب
البياع:شو رايك اختي بهيدا
عاشه:ماشي حاله
البياع:هي الاطع اليوم الواصلين،شو رايك فيهن؟
عاشه:هذا التور التركزازي يجنن
غاليه:امم حلو
عاشه:اي حلو ،هذا يخبل
البياع:هي الاطعة الوار ع 500 درهم لعيونك 450
عاشه:شو؟حرام عليك انا باخذ عنك 3 وارات
البياع:والله يا عيني ما بقدر،هيك بيخسر المحل
سلامه وهي تساسر اختها:عويش،ابويه عطا لكل وحده فينا 5000 درهم ، للقطعه والتفصيل فالله يخليج فكري
عاشه(بعصبيه):اقول..قص لي 3 وارات من التور الاحمر
البياع:هي الاطعة والا التانيه؟؟
عاشه:هذي اللي وارها ب 250درهم
البياع:تكرم عينك
غاليه وهي تصد صوب سلامه:حبيبتي جيه مو متغشه؟
سلامه:صراحة..انا قررت اتغشى بعد الثانويه
غاليه:شو الفرق بين هالسنه والسنه اليايه؟
سلامه:بالنسبة لي فرق كبير...شاسع
غاليه:سبحان الله
غاليه فخاطرها:والله وكبرت يا احمد .....هيه.. نصيب
خالد في السيارة يفكر بالسالفه اللي صارت وكيف راح تواجه العايله هذا الخبر،وعبدالله في السوبرماركت اللي حذال شيشة البترول
خالد(وهو يتصل بعبدالله):يلا يا بويه تاخرنا
عبدالله(وهو عند الكاونتر يحاسب):ياي ياي
عبدالله وهو يركب السيارة:ذليتنا يا خويه
خالد:من متى وانا واقف ماصار عصير اشوف سوبرماركت بحاله
الهندي وهو يركض صوب عبدالله:بابا انت نسيت 10 درهم زياده
عبدالله:خلها حقك
الهندي(بابتسامة عريضة):مشكور بابا
خالد:مسكين
عبدالله:يلا ودني لوكالة السيارات
خالد:جيه ناوي تاخذ سيارة يديده
عبدالله:لا طبعا رايح اخذ سيارتي ،خلصت من التجييك
خالد:شو رايك اخبر ابويه بالسالفه وهو يتصرف
عبدالله:كيفك بس هو الكبير وهو ادري
خالد:توكلنا على الله واللي فيها فيها
المغرب
غاليه وبنات عمها توهم داخلين البيت
غاليه:الحمدالله ع سلامتنا....تفضلوا
عاشه:غليوه الغاليه انا ميته من العطش
سلامه:آآه يا ريلي
عاشه:محد قالج تلبسين كعب
سلامه:والله انتي اللي هلكتينا،الله يعيننا فعرسج،اظن اني بتخبل
غاليه (وفي يدها 3 كاسات ماي):اكيد بنتخبل
عاشه:حبايبي انا انسانه ذويقه مو شراتكن
غاليه:ليش الغاليه...وهذا الخاتم اللي فصبعج لمنوه؟
عاشه:حشى ،عرفنا انه مالج
سلامه:ههههه
في هذي اللحظه دخل خالد:السلام عليكم
عاشه وسلامه اتوقن عدل واتغشن
عاشه:وعليكم السلام والرحمة
خالد(مشى بسرعة صوب الميلس وبخاطره يقول):يا غافلين... لكم الله
غاليه(باستهزاء):سلموه..اشوفج اتغشيتي؟
سلامه:والله ...ادرب
غاليه:والله؟؟
خالد وهو يدخل الميلس:السلام عليكم
بوخالد:وعليكم السلام والرحمة
خالد:ما اشوف حد عندك؟
بوخالد:قبل شوي ظهر عمك سعيد
بوخالد:شي فيك شي يعورك؟
خالد:لا..
بوخالد:ويهك متغير ،هذا كله من اكل المطاعم
خالد:جايز
خالد:...........ابويه
بوخالد:نعم
خالد:شحال عمي بو سلطان؟
بو خالد:الحمدالله بخير
خالد:صدق اللي سمعناه
بوخالد:خير؟؟
خالد(بتوتر):ظهر متزوج...من 3 سنين
بوخالد وهو يبتسم:صحيح
خالد:يعني تعرف وما خبرتنا
بوخالد:هو خبرني ولزم عليه اني ما اخبر اي مخلوق
خالد:والحين،الخبر بدا ينتشر واكيد خالتي وعيالها راح يعرفون
بوخالد:هو مو اول واحد ولا اخر واحد
خالد:بس هذي كبر بناته
بوخالد:مايخصك بالموضوع واللي صار صار
وقام بوخالد وظهر من الميلس،ورد مرة ثانية الميلس
بوخالد:بنات عمك مكانهم داخل
خالد(باستغراب):هيه
خالد(فخاطره):معقولة يخبرهم؟؟
غالية وبنات عمها يالسين في الصالة يشوفون القطع ويتخيلون الفستان اللي راح يصممونه.
غالية:عويش شو رايج بذيل طويل؟يناسبج انتي طويله
عاشه:فكرة حلوة بس انا ابغي شي مبتكر
سلامة:انا ابغي اسويلي ارقبه في الفستان
غاليه:حتى انا مسويه ارقبه
بو خالد:هود هود
عاشه:هدا هدا عمي
غاليه:جيه ماتسلمون ع ابويه
خالد:مسلمين عليه قبل لا تسيرون السوق
غاليه:هههه،ظلمتكم
سلامه:انتي دايما جيه
بو خالد:فيه موضوع مهم ابغيكم تعرفونه مني قبل لا تعرفون من غيري
عاشه:خير ..عمي
بو خالد:ابوكم ...مقصر معاكم في شي؟؟
عاشه:لا ..ابد
سلامه:بالعكس...ابويه مو مخلي علينا قصيرة
بوخالد:الحمدالله....يا بناتي ابوكم ..اتزوج
عاشه وسلامة (بذهول):شو؟؟؟؟؟؟؟؟؟
غاليه:عمي ..متزوج
عاشه(بصوت عالي):ليش؟؟امي ما تستاهل
بو خالد:..........
سلامه:شو اصلها؟
بوخالد:وحده من سنتين محصله الجواز
عاشه:ماشا الله
بوخالد:باختصار ..انتو لازم تتقبلون الموضوع
عاشه(بانفعال):نحن ممكن نتقبل،لكن امي ..
سلامه:كم عمرها
بوخالد:اعتقد في اول العشرينات
عاشه:ما حصل غير ياهل يتزوجها
بو خالد:عيب عليج هذا مهما يكون.. ابوج
عاشه بغت ترد على عمها ،لكن خافت
غاليه:حسبي الله ونعم الوكيل
عاشه(وهي تاكل ظفرها):عنده عيال منها؟؟
بوخالد:لا..
عاشه:الحمدالله
سلامه:تخافين ع الورث
غاليه:سلموه..هذا مو وقت نكت
عاشه:انتي ولا كانج مهتمه للموضوع
سلامه:لاني صراحة شاكة في الموضوع من سنتين
عاشه:خييييبه من سنتين وما خبرتيني
سلامه:ماكنت متاكده
عاشه:عمي..
بوخالد:نعم
عاشه:عمي ..ابويه من متى متزوج
بو خالد:من...3سنين
عاشه:ما شا الله...الوالد مرتب اموره
غاليه:الحين عرفت عويش على منوه ظاهره
عاشه:امي لازم تعرف بالموضوع
بوخالد:شو رايكم عقب عرس اخوكم
عاشه:واذا عرفت من حد غريب....شو راح يصير فيها؟؟؟
سلامه:انا عندي فكري
عاشه:شو هي؟؟؟
سلامه:نخبر يدوه بالسالفه وهي تخبر الوالده
بوخالد:انتي جذيه راح تشعيلينها اكثر من انج تهدينها
غاليه:انا اشوف خالتي مريم هي احسن وحده تخبرها
بوخالد(بابتسامه):اشهد انج بنت ابوج
غاليه:ههههههه
عاشه:ما عرف كيف اجابل امي...احس اني مرتكبه جريمه
غاليه:انتي بتخربين علينا
عاشه:الله يستر...
عبدالله وخالد في المسيد ينتظرون الامام حتى يصليبهم العشا
خالد:نحن جيه يايين من وقت
عبدالله:احسن حتى نصلي في الصف الاول
خالد:بس هذي صلاة العشا مو الجمعة
عبدالله:احسن حتى نكون من السباقين دايما
خالد:استغر الله استغفر الله
عبدالله:موبايلك ع السايلنت
خالد:متعايز اظهره...بس ما اعتقد حد بيتصل بي
عبدالله وهو يوقف:السلام عليكم
الريال:وعليكم السلام
عبدالله:شحالك يا ناصر؟
ناصر:الحمدالله بخير شحالك انته
عبدالله:الحمدالله(ورد يلس)
خالد:منو هذا؟؟
عبدالله:اخو العروس
خالد:ههه
عبدالله:جيه تضحك
خالد:اقول انا هذي الابتسامه العريضة لمنوه
عبدالله:ماتيوز عن حركاتك..وانا الحمدالله انسان مبتسم في كل الاحوال
خالد:الله يدوم الابتسامه
الامام وصل واقام الصلاة،في الركعة الاخيرة وتحديدا عند التشهد الاخير رن موبايل خالد على رنه (انا جايه اقول لك)لشرين،خالد هاللحظة ما عرف كيف يكمل صلاته،ماصدق الامام سلم حتى يظهر موبايله ويغلقه
عبدالله ماسك ضحكته والناس كلها عيونها ع خالد
الامام:اخويه مره ثانيه اغلق موبايلك لو سمحت..او خله ع الصامت
خالد(والويه احمر):.....ان شا الله
عبدالله:هههه
خالد:تضحك؟؟انا خلاص ما بصلي فهالمسيد
عبدالله:تستاهل ..قلت لك خله ع السايلنت ما سمعت كلامي
خالد:توبه ما عيدها
عبدالله:هههههههههه
بعد يومين بوخالد خبر مريم بالسالفة وباللي راح تقوله لام سلطان
مريم وهي تنتظر حد يشل السماعة
مريم :.......الو
ام سلطان:الو
مريم (بتوتر):السلام عليكم
ام سلطان:وعليكم السلام والرحمة
مريم:شحالج يا ام سلطان؟عساج بخير
ام سلطان :الحمدالله بخير..ويسرج الحال
ام سلطان:شحالج وشحال بو خالد والعيال؟
مريم:الحمدالله كلهم بخير
ام سلطان:شوفيه صوتج متغير
مريم:انا...ما فيني شي
ام سلطان:يقولج الزجمه منتشره هالايام
مريم:هيه..فايح......ام سلطان
ام سلطان:نعم
مريم :فيه سالفه ابغي اخبرج عنها
ام سلطان(وهي ترجع فنيان القهوة للصينيه):خير..شو مستوي
مريم:..............
الجزءالتاسع
مريم هاللحظة ماعرفت بأي طريقة ممكن انها تخبر ام سلطان
مريم:تعرفين يام سلطان ان رياييل هالزمن مالهم امان
ام سلطان:صدقتي
مريم(وهي تهمز ريلها):شورايج بالريال اللي يتزوج على حرمته بعد عشرة عمر؟
ام سلطان:مايستاهلها...وهو الخسران اما هي فما خسرت شي
مريم:...شو اقولج يا ام سلطان...ريلج...بوسلطان طلع متزوج
ام سلطان:...........
مريم:الوووو؟؟؟
ام سلطان:معاج.....ادري
مريم:تدرين؟؟؟؟؟منو خبرج
ام سلطان:يا مريم مثل ماتعرفين الوحدة فينا تحس اذا ريلها ناوي ع العرس
وانا مثل ما تعرفين مالي ابو ولا ام اشتكيله او ارجع له وبيت العايلة مأجر ،وانا مافيني قوة ع المشاكل،والريال اذا حط في باله انه بيعرس فبعرس ،عشان جذيه قلتله يكتب هالبيت باسمي ويشتري لي ارض
مريم:وافق
ام سلطان:اكيد وافق
مريم:وكيف تحملتي هالمدة كلها؟؟
ام سلطان:آآآآآآآه يا مريم الوحده فينا مالها غير الصبر
مريم:صحيح....
غاليه فغرفتها تجلد كتاب اخوها سلطان،وفجأة يرن الموبايل
غاليه:سلطان..قوم هاتلي الموبايل
سلطان:اندوج
غاليه:الو
اليازيه:الو...مرحبا
غاليه:مرحبتين بالعروس
سلطان(بابتسامه):هذي اليازيه؟؟
غاليه:شو اخبار عروستنا؟؟
اليازيه:آآآه مشغولة طول الوقت ،الحمدالله حصلت وقت اكلمج فيه
غاليه:من الحين انشغلتي عني
اليازيه:ياربي...المهم وصلت بطايق العرس
غاليه:لا..ماسمعت الجرس
اليازيه:يمكن بعد 5 دقايق بتوصل ...المهم بتحصلين عشر بطايق وزعيها ع الاهل
غاليه:ان شا الله ...من عيوني
اليازيه:تسلم لي عيونج
سلطان:سلمي عليها
غاليه(بدون نفس):اليازي... سلطان يسلم عليج
اليازيه:الله يسلمه ويسلمج...يالله الغاليه اسمحيلي بخليج
غاليه:مسموحة حبيبتي
سلطان(بصوت عالي):غليوه
غاليه:شو؟؟؟؟؟؟
سلطان:هذا الطابع فيه صورة باربي...تبغين ربعي يعلقون عليه
غاليه:ههههه...بس انا جلدته
سلطان:اتصرفي
غاليه:شورايك احطيلك طابع فوق هالطابع وجلده
سلطان:بتجلدين الكتاب مرة ثانيه؟
غاليه:لا..بس بجلد الطابع
سلطان:اوكييي
بوخالد ومريم في الصالة يتقهويون
بوخالد:كلمتي ام سلطان؟
مريم:هيه..نعم
بوخالد(وهو يحرك عصاته ):وكيف كانت؟
مريم:طلعت تعرف بالسالفه قبلي وقبلك
بوخالد(مصدوم):تعرف؟؟؟بس بو سلطان ماخبرني
مريم:كتب الها البيت باسمها واشترالها ارض
بوخالد:ماخبرني....
مريم:سبحان الله ...الكتمان صفه مشتركة بينهم
خالد:يعني سكتها بالارض
مريم:انت ع بالك اذا الريال اتزوج ع حرمته ،حرمته ترضى عليه بكم ارض
بوخالد(وهويبتسم):بعد شو تبغي اكثر من جيه
مريم(بعصبية):لو عطاها مليون ماترضى...
بوخالد:يعني ما بترضى الا اذا طلق الثانيه
مريم:لا..
بوخالد:عيل شو الي يرضيكم يا الحريم
مريم:يا عبدالرحمن ..القلب مثل الزجاج اذا انكسر ما يرد مثل ما كان
بوخالد:اقول...صبيلي فنيان ثاني
مريم(وهي تشوفه بنظره):بسك هب زين لك
بوخالد:مايخصج
سلطان وهو ياي صوبهم:تعوذوا ..تعوذا من الشيطان
بوخالد:نتعوذ من الشيطان والشيطان جدامنا؟
مريم:ولدي ملاك..وافديته
سلطان:الحمدالله ..عندي محامي فهالبيت
بوخالد:ههه..محامي ببلاش
ومرت الايام بسرعة ويا يوم العرس المنتظر...يوم الخميس
في بيت بوخالد
حجرة غاليه في حالة يرثى لها،الفستان ع الكرسي والعباة والشيلة ع السرير
اظهرت غاليه من غرفتها رايحه عند خالتها مريم
غاليه بتوتر:وين سونيا؟ابغيها تكويلي طقم العباة
مريم:فغرفتها
غالية:خالو..خبرتي ابويه اني بروح بيت اليازي
مريم:من العصر بتروحين؟
غاليه:هيه...لازم اكون معاها فهالحظات ،اكيد راح تحتاجلي
مريم:وانتي ما بتروحين الصالون ؟
غاليه:خالو ..الماكييرة هي راح تسير بيت اليازيه ،بتعدل العروس وبتعدلني
مريم:سلمي ع العروس وما وصيج اقري عليها المعوذات
غاليه:ان شا الله..يبلغ
رجعت غاليه غرفتها اتجهز اغراضها،ويرن موبايلها
غاليه:مسج...اكيد هذي اليازي
اشتياقي صارع امواج
الهجر...
وانهزم في رحلة فراقك
طعين...
احسب الساعات في
غيابك دهر...
وانتظر مرسولك الغالي
سنين...
كم كتمت الجرح كم
قلبي صبر...
وانكتب اسمي على
صفحة حنين...
"خاص للغالين"
غاليه:اففف..متفيجين
سونيا وبيدها طقم العباة:مدام..فيه يريد شي؟
غاليه:ابغي فحم
سونيا:اوكي ..مدام
غالية وهي سايره صوب الصالة:ام سلطان
مريم:نعم ..يلا انا ظاهره
مريم:الله يحفظج...غاليه
غالية وهي تلبس شيلتها:نعم
مريم:شليتي طقم ذهبج؟
غاليه:لا..اصلا انا مااحب الذهب بلبس اكسسوار
مريم(بعصبيه):اخخ...تخلين الغالي وتلبسين الرخيص
غاليه:ياربي...فيه وايد بنات يكرهون الذهب مب انا الوحيده
مريم(بسخريه):وان شا الله يوم بتعرسين بتلبسين هالاكسسوار؟؟
غاليه:طبعا لا..ههه..لازم اخسره
مريم:انتي...الله يحفظنا من شرج يا غليوه
غاليه:انا؟؟؟انا مسكينه
مريم :هههه
بعد ساعة اركبت غاليه السيارة وقلبها يدق بالقو جنها هي العروس هب ربيعتها.
في ليلة العرس
غاليه تتامل ربيعتها ورفيقة الدرب الطويل قبل لا تظهر للمعازيم،كانت تحس بشعورين امتزجوا مع بعض شعور الفرحة لفرحة صديقتها وشعور الحزن لانها راح تبتعد عنها
اليازيه(بخوف):غليوه اقري عليه..انا خايفه
غاليه :توكلي على الله..لا تركزين في وجوه المعازيم
ومشت اليازيه ع الممر جدام المعازيم ومشت غاليه صوب طاوله خالتها مريم وبمجرد انها يلست ع الكرسي مارامت تتمالك نفسها وهي تشوف ربيعتها ع الكوشه فغبنت عينها...
الساعة 3 الفجر
عاشه:الووو
غاليه:الو
عاشه:يلا بسرعة ابغي الموجز
غاليه:جيه ما ييتي؟
عاشه:انا زجمانه
غاليه:اتعلثي
عاشه:والله العظيم اني زجمانه
غاليه:ماله داعي تحلفين
عاشه(بحماس):كيف كان الفستان؟؟
غاليه:بسم الله الرحمن
عاشه:يلا قولي
غاليه:انا ما اعرف كيف اوصفلج اياه بالتحديد، لكن اللي يميزه رسمة امواج البحر اللي ع القطعة
عاشه:اهاا...الله يسعدها
غاليه:آمين
عاشه:غليووه
غاليه(وهي تتثاوب):الله يخليج انا هلكانه ابغي ارقد ،بكلمج باجر
عاشه:اوكيي..تصبحين على خير
غاليه:الا قولي صباح الخير
عاشه:ههههه...صباح النور
يوم السبت
الكل في الدوام ماله خلق يكلم اللي حذاله
خالد وعبدالله في مكتبهم ،كل واحد لاهي بشغله وفجأه يدخل واحد
جاسم:السلام عليكم
خالد:وعليكم السلام
عبدالله(وبيده سماعة التلفون):محي الدين ..جيب قهوة...وعليكم السلام
،شحالك جاسم؟
جاسم:بخير ولله الحمد...خالد
خالد:نعم
جاسم:روح عند عقيل ،فيه كم شغله موفاهمنها.......لاتنسى
خالد(بضيج):ان شا الله..ما بنسى
وظهر جاسم من مكتبهم
خالد:افف هذا الانسان معقد،ما ارتاح له
عبدالله:جاسم؟؟
خالد:هيه جسوم
عبدالله وهو يصد صوب الباب:اسكت عن يسمعك
خالد:خله يسمع ،ما يهمني
عبدالله:استغفر الله العظيم
ظهر خالد من مكتبه بخطوات سريعة والشرار يطلع من عينه....وهو رايح الدور الثاني قرر انه يركب اللفت،ولما انفتح باب اللفت اتفاجأ باللي واقف جدامه
نهاية الجزء
25-07-10, 05:43 AM
طلبتج لاترديني ... للكاتبه : جواهـر
جديد مواضيع قسم القصص المكتمله
العرض العادي
