أعطني حريتي .. أطلق يديا

البااااااارت ؛؛ الثاني ‏؛؛ ‏..



أبو صقرر : عقاب جاني البارحه .. ويبي يستعجلنا بالعررس .. طاح وجهي من كثرر مارده .. كل سنه نقول له الزمان الجآي .. لا أعرس ولاعين خير ..

اللي كبره عياله قدهم يدرسون .. كله من دلع أختك .. ماودي أكسر بخاطرها وأجبرها .. أبيها تجي من طيبة نفسها .. مانبيها غصايب .. بس هي الله يصلحها ماتبا اللي يباها ..

صقرر : أنا أقول نجبرها .. اسبوع اسبوعين .. شهر شهرين .. سنه سنتين ومصيرها بترضى ..

الرجال مهوب صغير ينتظرها ..
نهار .. وماجد اللي أصغر منه قدهم معيلين ..

أم صقر بشرهه :
يعني تدري إنك موب صغير ..
وش تحتري أجل ؟؟

أعرس خل أشوف عيالك .. قبل تغاب عيني ماشفت ضنآ لك أخبره وراي ..

وتلاعبهم .. وينسونك كل هم تشيله في عمرك ذا ولا قدك شيبه ..


صقر : يمه مهوب ذلحين ..

أم صقر : أجل متى ؟؟
البنت راح عمرها تحتريك .. وأنت راح عمرك في راحة غيرك ..

صقر فلتت أعصابه : البنت ماحترتني .. بس ماجاها أحد ..
وأنا ماقلت بحيرها ولاشي .. بس عمي لزقها فيني ..

أبوصقر اللي كان مستمع .. خل نخلص سالفة أختك ونلتفت لك ..

.‏ ‏* * *

بدر : محمد أرسل أحد يستقبلني في المطار .. بطلع للدوام على طول ..


كان حاس أن حسن مسوي شي بغيبابه .. مستحيل يفوت هالفرصه .. ولو عليه ماوكل حسن .. بس جاه التكليف من منهو اعلى منه ..


بدر يهوجس بالسياره رايح للدوام ..

هين ياحسن .. أنا بنبش وراك .. وأراجع كل صادر ووارد بغيابي .. دق على أم مازن بمكتبها ..

أم مازن ماعليك أمر _ بدر يحترمها كونها أكبر منه وعلى مشارف الخمسين ولأسلوبها المحترم _
ياليت لو تجهزين لي ..
جرد للخزنة كوني لجنه بأشرافك .. وألأستاذه المسؤوله عن الخزنه وثنتين من الموظفآت بقسم الآيداعات ..

أم مازن : بس الشغله بتطول ؟؟

بدر : ماعليش أضغطوو علآ أنفسكم حتى لو ماتطلعون ألا الساعه 12 بالليل .. وأنا برفع لكم فيها خارج دوام ..


أم مازن بعقلانيه : بس استاذ بدر مسؤلة الخزنه لسا بنت وصعب تقعد لها الوقت معنا ..

بدر : بس استاذه منى متزوجه حسب علمي .. ومو أول مره تجلس خارج الدوام ..

أم مازن بحذر : بس استاذ حسن نحا الأخت منى عن منصبهآ ..
ونقلها لخدمة العملآ .. وهي مبسوطه بها الشي


بدر بغضب : ومن سمح له ؟؟

بأي حق ؟؟

من عطاه الصلاحيه ؟؟

وليش مابلغتوني ؟؟

أم مازن : استاذ حاولت ،، بس جوالك مغلق ؟؟

بدر : أنا على وصول .. نفذي اللي طلبت ..سكر منها وهو يتنهد ،،

علينا ياحسون ؟؟
جايبها من طرفك عشان تلعب أنت وياها ؟؟
أول قرار بطلعه هو .. فصلها أو تنحيتها لعمل ثاني وبتشوف ..


دآئما هناك أعدآء للنجاح ..

يحركهم الحسد والغيره ..
ولو فكر بنفسه شوي .. أنه ماراح يستفيد من حسده شي غير .. غضب ربه ، وكره الناس له ، وغيره تنهش قلبه لاهو اللي أرتاح ولا ريح ،، ولاحصل له شي من خير المحسود ،،


‏*‏ * *

نوف : لا يعني لا .. قسم بالله ماخذه لو يطلع الشيب براسي وراسه ..

والله لأطق منكم أن غصبتوني وماتعرفون لي أرض من سما ..
‏<‏< كانت مجرد تهديدات ..

أبوصقر : يابتي تعوذي من بليس .. مالس الا ولد عمس طال الزمان وألا قصر .. فخوذيه وأنتي توس صغيره .. أحسن مايروح عمرس وعمره ماعينتو خير ولاظنا ولا راحة بال ..


نوف بعناد :
جعلني ماعرس حيات عيني .. جعلني البندق اللي تشق نحري شق كان خذته .. جعلني ...

سكتها أبوها اللي مسك راسه من باس وعناد بنته ..


* * *

بتول : مضاوي وش فيك ؟
أحسك منتيب طبيعيه هاليومين ..


تنهدت موضي :
تشوفين ضحكي وسعة صدري وخاطري معس هنيا ..
تراه في البيت .. هم ونكد ..

نوف .. باسها بآس .. وراسهآ راس .. عقووب ولد عمي دم ضروسها .. وعقاب ألعن منها راسه صميله << يعني يابس ..
حالفن ماتاخذ غيره ..


وصقورر : بياخذ مهيان .. أدري به .. مايبلعها مع المآ ..

وبياخذها بس عشان يخاف لاخلاها .. تخرب حياة ماجد ،، ونهار ، وجوزا ، وشيخه مع حريمهم ورجالهم خبرس مالنا ألا هالعم .. وبذر الوسيعه ذر بلشنا بهم .. ألا غصب ناخذ منهم وياخذون منا ..


بتول بتغير مودها :
طيب جآك زمانه ،،جبوور ،، ماقلتيلنا عنه ..

موضي شهقت ورجعت لمودها وهي تذكر قبل يومين :

جعلس الليل .. ماقلتلس إني شفت جويبر .. والله يوم شفته ذليت منه .. خبري فيه شبر ونص .. مدري وش شحطه لين صار متر ونص !!


بتول : هههههههههه وين شفتيه ؟؟
لاتقولين طليتي عليه ؟؟

موضي : لا .. ليت وقت وبس ..
يوم الجمعه بعد المغرب .. ماتحرينا لاحد يجينا ..


حنيت شعري وقعدت أغسل الحوش وأشطفه عشان يآبس شعري ..

جا ولد نهور .. ورشحني بخرطوم المآ ..

وخبرس بشكلي بالحنا قميص روز أحمرر .. وكشتي فاردتها عشان تيبس بسرعه .. وأتناقط مآ .. لحقته بالشطافه بالعن خيررره

وفرك مع باب الرجال ..
و بآخر لحظه فرك لشآرع .. فتحت الباب ووقفت وراه رافعه الشطافه بجلده بهآ ..

دخل جبور بصفره المغرب ..
وصرررخت لمن شفته .. وهو التقت وصرررخ من الخررعه
ههههههههههههههههه

وتنحنا في بعض ثواني ثم حط رجله وهج .. وأنا صفقت الباب بقوتي مدري كان قرطت رجله وألا يده من الفشيله ..

بتول : هههههههههههههههه

لازم تعوضينه عن هالهبله .. تشيكي وأخبطي فيه سوي نفسك ماشفتيه هههههههههه

مضاوي بلكاعه : بسويها بس من عينه << يعني شافه

والله أن يطق من البلآد بلا فواد .. تلقينه عند المطاوعه شايلينه بدوريه يقرون عليه ..

بتول : طيب هو عرفك ؟؟
ماتوقع يدري أنه أنتي ؟؟

‏ مضاوي : العيال جن .. من سن ال 10يبدون يخزنون صور هالحريم بعقولهم .. ويسترجعونها لاكبرو ..

بعد العشا .. دق علينا ورديت .. هذي حزته يكلم أن صار بيجي معه أحد .. والا بيتعلل عند أحد ..


موضي : مرحب بالشيخ فهيد

جابر : الشيخ جابر .. ماينفع ؟؟

موضي طنشته : العيال طالعين من قبل أمس للقنص .. وابوي عاده بالمسجد مابعد وصل ..

جابر : أنتي موضي ..

موضي بنفسها ياليل أبو البعارين مهوب ممرح ذا الورع :

وصلت خير أنا موضي ..

جابر بضحكه: وش أخبار حنآس ؟؟
آربه صبغ ؟؟
غسلتيه وألا عاده على راسس؟؟
والحمر ياقلبي على المقطع الحمرر ينقط رومنسيه .. مايشبه لمقطع جدتي هههههههه

موضي بفشيله .. من قال إنه أنا ؟؟

جابر بنغمة صوت خافته .. هزت أعمآقها ووسرت رعشه وبرد بكل عروقهآ ..

آه ياقلبي علآ الشامه وأهلها ..
لاصارت فوق الشفايف ماودك ألا ... وألا بس خلي هالحكي بعد عرسنا ..


موضي : ألا ياقليل الأدب ..
تحسبني من خنيزك اللي مطيح معهن بالتلفون بانصاف الليول ..

وسكرت السماعه قبل لاتسمع رده ..


‏*‏ * *

بدر بنرفزه : كيف تطلع بدون أذني ؟؟
..‏ وألا تحسب أنها بتهج وبنتركها ..
عجز بمليون ريال ؟؟
وبفرعي أنا ؟؟

هذا أختلاس .. مو عجز ..


أنا بسوي تحقيق معها ..
وياليت لو تكوني موجوده أم مازن .. راح يكون معي أستاذ سعد وسكرتيري محمد ..

منتهى : لايمكن .. أجلس مع ثلاثه رجال ؟؟
وبدون علم أهلي لا ؟؟

أم مازن : أنا معك .. أدري إنك مظلومه ؟؟
بس مابيدي شي ؟؟
ماقدامنا ألا الأوراق ؟؟

بدر : نعم .. رفضت التحقيق !!
حوليني لمكتبهآ ..

منتهى : نعم استاذ


تنحنح بدر وبهدوء : بدون شوشره وعشان سمعتك وسمعة أهلك
تعالي مع أم مازن لصالة الاجتماعات ..
بدل مايجي الأمن يسحبك قدام الموظفين والعملاء ..

منتهى : رمت السماعه وبكت بانهيار .. مليون مو سهله ؟؟

وفضيحتها لو أحد درا ؟؟

وأهلهآ ؟؟ وأبوهآ ؟؟

خذتها أم مازن بيدها بحنان :
ساعدتها تغسل وجهآ وتلبس عبايتها ..

وأتجهو لصالة الاجتماعات ..


شافها بدر تدخل :
عرفها على طول لان أم مازن ببساطه متينه وطويله جدا ..

تأمل خطاها متردده ..
باين عليها التوتر ..
تلف جزء من عبايت أم مازن بيدها وتفركه بتوتر بعدها تتركه .. وترجع تجمعه ثانيه

متمسكه بعباية أم مازن من ورا .. وكأنها طفل بأول يوم له بالروضه !!


ربكتها وتوترها أكد له 60 % أنها هي المختلسه أو ساعدت المختلس على الأقل ؟



عقد حواجبه لشكه فيها وجه كلامه لأم مازن :
تفضلو استريحو ..
سعد سم بالله وأبدأ بالأسئله ..


ضغطت لاآرادي على فخذ أم مازن ا للي حطت يدها على يد منتهى عشان تطمنها ..


سعد : البطاقه الشخصيه لو سمحتي ..
اسمك .. سنك .. شهادتك .. و...


قاطعه بدر اللي كان يقلب في ملفها .. وهو منزل راسه والحدة اللي فصوته تلآشت ..

وبخاطره عرفت تلعبها صح ياحسن .. طعنتي بسكينتي ..

بدر بأشاره بيده .. أخ سعد .. أخ محمد تفضلو مكاتبكم وأتركونا ..

فزت منتهى واقفه .. وبأشاره بيدها .. لا لا وين يتركونا !!
أنا بطلع !!

كانت خايفه أنه يطلع أم مازن بعد ..

طالعو فيه محمد وسعد مستغربين .. وطلعوو

بدر : أجلسي منتهى .. تعرفين أنا مين ؟؟

هزت راسهآ بموافقه : أستاذ بدر ، مدير البنك

بدر : وهو يركز بعيونه عليها ..
بدر سعود محمد البدر ،، ولد عمك سعود


‏*‏ * *

بمكآن آخر في نفس الثانويه

جمع بينهمآ الشيطان ،، وسول لهمآ برآءة فعلتهمآ ..


نوره : آه ياقلبي .. يحبني ياأمل ..

قلت له بعد ماتوطدت علآقتنا إني مو حلوه .. قال عادي ..
مايهمني .. أنا أحبك وأبيك أم لعيالي .. وخذ رقم أبوي بيخطبني منه ..


أمل .. لاتحلمين أهلك يوافقون عليه .. غير أنه بلا وظيفه ..أنتم قبايل وهو خضيري !!

نوره : وش فيه الخضيري ؟؟
مهوب أنسان مثلنا .. ياكل ويشرب .. ويصوم ويصلي ؟؟


أمل : نوره .. أكيد أهلك يدرون إنك تطلعين معه ؟؟

أكيد مايدرون .. بس ورب البيت هي 5 مرات اللي طلعت معه وكانت في كافي أو مطعم بوقت الدوام ..

ماأنكر حاولت أغريه وأتجاوز اللمسات فقط .. عشان يتمسك بي أكثر .. وعطيته ضوء أخضر بس رفض وبشده ..

‏<‏< قصه هاتان الفتاتان حقيقيتان وليست من نسج خيالي >>


أمل نزلت راسها .. ياحظك أنا م شهر .. وبتردد طلعت معه بشقة أخته اللي كانت مسافره .. وصار اللي صار .. ومن يومهآ ماعاد عدناها .. بس للآن يكلمني ..


..‏ أمل وحيدة أمها وأبوها العجوزان وفرا لها كل سبل الراحه واحدث التقنيات ..
وقتلها الفراغ والوحده لتوجهه أسوأ توجيه ..



نوره : نشأت بين تسع بنآت ..
وأب يشتكي شظف العيش ..

بحثت عن الحنان في إطار البيت فلم تجد سوى أب يعود مسآء منهك القوى ليوفر لهن لقمة عيش بالحلآل .. وأم صبوره .. تنهك نفسها بالتعب في شؤون المنزل .. والبنات .. والزوج .. والروماتيزم ..


خرجت نوره .. تنشد موردا غير موردها لترتشف جرعات من حنان .. وأن كانت مغمسه بتريآق ..



‏"‏ انتهى البارت "

لانقول وداعآ .. ولكن إلى لقآء "








‏

،،‏ ‏..‏ الباااارت الثاااالث ‏،،‏ ‏..



أبو سالم : بنتس مهيآن بدالهآ نصيب اليوم .. ابن عيد خطبها مني اليوم بعد صلآة الجمعه عقب مآأقفوو الريجايل من مجلسنا ..


أم سالم متعجبه : وولد أخوك صقر ؟؟

أبو سالم : أنا مارديت عليه ، الرجال مابه شين يعيبه .. وولد أختس مهوب لم عرس .. بشاور البنت .. وأشوف ..


أم سالم : ريح عمرك مآهيب باغيته .. وعنده حرمتين .. وشلقت بزارين .. وهي في رجا صقيرآن ..


وطرت ببالها فكرره وابتسمت لأبو سالم وهي ناويه تقوله عليها ..


أحيآن الحريم .. تخطط وتدبر .. والرجال لاصار محتآر ماله ألآ ياخذ بالدبرره ..


‏*‏ * *

جوزا .. صقر تكفى شور على سالم .. عشان نتعالج برا .. يقولون فيه دكتور بالأردن شاطرر .. محدن يعالج عنده ألا شهر وألا شهرين وربي مكرمهم ..

صقر : هذي السوالف بينس وبين رجلس .. مقدر أحاكيه فيهآ ..

جوزا : حاكه بطريق غير مباشرر .. هو يقدرك ويوثق برآيك ..

صقر : مع أن رجلس ماله ألا علمه .. بس بحاول ..


موضي نزلت من الدرج وسمعت آخر الحكي ..

موضي : اللي مالهم ألا علمهم واجد ..

صقر بابتسامه : كن مهوب أنا اللي مقصود ؟؟

نوف من ورا موضي :
ههههههههه ألظاهر أنا وأنت صقورر ..

صقر يبي يقهر موضي :
وش أخبار المها ؟؟
آربهآ طيبه ؟؟
مالها شووفه ؟؟

موضي بغيظ :
خبري في مهيآن وتخب عليها .. وش جابها المها ..

صقرر : عيب موضي أحشميها بنت عمس .. وبنت خالتس .. وقريب مرت أخوس ..

وقبل لاترد .. وجه كلامه لنوف :
أبوي ما حاكاس اليوم ؟؟

نوف زفرت بضيق : لا ..

صقر : جايس خطاب .. غير عقاب .. بس مالس أمل وعقاب وراس .. تركهم وطلع لأمه اللي تسقي نخلها اللي بالحوش ..


‏*‏ * *

بدر : ماعليش أم مازن أتركينا شوي ..

منتهى : لااااا بروح مع أم مازن .. وكان عندك حكي وصله مع أم مازن ..


بدر وقف وسفهها .. أشر لأم مازن تطلع .. وأعترض طريق منتهى ..


بدر : ارجعي اجلسي .. بفهم منك وأفهمك ..

وبترك الباب مفتوح ..
رجعت جلست .. بعد ماشافت ام مازن راحت ..

وبحده .. نعم ..

بدر : بعرف كيف صار العجز أو الأختلاس .. أن صح التعبير ..
وين راح المليون يامنتهى ؟؟


منتهى بقهر .. احترم نفسك استاذ بدر .. أنا مو سراقه .. قسم بالله ماخذت هلله وحده بجيبي ..

جاني أمر صرف مليون ريال .. من أستاذ حسن وبأوراق رسميه ومختومه ..

نفذت أمر الصرف .. ومعي لجنه ..
بس للأسف ماكانت أم مازن معهم .. بعدها بأسبوع اختفت الأوراق من الملف وسألت الاستاذات اللي وقعو معي .. بس أنكرو وبشده ..

يمكن خافو يتورطون معي بشي ..

كان ينقل عيونه بين عيونها اللي تلمع بالدموع .. ويديها اللي تحركها يمين شمال .. فوق تحت .. في محاوله لها للتوضيح أكثررر .. شتت ذهنه بعد ماكان مركز معها في البدآيه ..

وأفكار تجي وتروح .. تشبه لسعود أخوهآ .. وألا حمد ‏.. والا محمد .. بس ماظن .. يمكن فيصل ؟؟



صحى من سرحآنه علآ صوتهآ ..
فهمت أستاذ بدر ؟؟

بدر بحرج ‏ : معلش عيدي اللي قلتي .. ‏

منتهى بغيظ وحاسه أن قصده يحقررها بكونه ماأهتم لها وهي متحمسه وتدافع عن نفسها .. ‏
عادت اللي قالته ببرود ‏.. وهدوء أكثرر ..

بدر باهتمام : مشكلتك إنك كبش الفدآ .. جيتي بوجه المدفع ..

منتهى : نعم ؟؟
مافهمت ؟؟
وش قصدك ؟؟

بدر : أنا بحاول أحل الموضوع قبل لايطلع من يدي ..


وأنتي .. لاتردين علآ أي أحد يسألك .. واضح أن اللي سواها أكيد بينشررهآ ..



‏*‏ * *


بعد أسبوع من خطبة ابن عيد لمها ..

وفي مجلس أبو سالم اللي أتصل علآ أخوه وعياله عشان يتعشون عنده ‏.. وماقالهم مناسبه العشآ :

أبوسالم : والله يابن عيد انت ماترد .. وقليل جنسك .. بس شورها مهوب لاعندي ولاعندها .. عند ولد عمهآ ..


وأشر لصقر اللي يجلس يمين الشيخ اللي كان جايبه أبو سالم .. عشان لاتمت خطته .. يستغل الموقف ويملك لصقر ومها علآ طوول ..

صقرر مستغرب الجلسه وحاس فيه مؤامرره ..


رفع جسمه شوي وقدمه .. وهو ناوي يقلب عليهم الطاوله ..


..‏ قال : بنت عمي شيخة البنآت ..وماودي أرخص بها لحد ..


" هنا استبشر وجه أبو سالم وعياله .. ونوف وأمها اللي قاعدين يتنصتون على كلام الرجال عشان يعرفون وش بيصيرر ..


غيرر أن ماودي أوقف نصيبها .. ويروح عمررها .. وهي تحتريني .. وأنا مابعد جهزت لا لعرس ولا لغيره ..

ومنب مرخصهآ ألا لشيخ يستاهلهآ .. مثلك وشرواك ..

وأنا الشاهد الأول ..

انحرج أبو صقرر من كلام ولده .. كان وده أنه يرفض ويملك له .. مهوب عشان بنته .. عشان أخووه وهو ماله ألا هالاخوو ..


أبو سالم أنكسرر خاطره .. كان وده يجوزها لولد أخوه .. رجال ينشرا .. غير أنه توه ولد مابعد أعرس ..

تنهد بنفسه .. طلعت منها ياصقر ببياض الوجه .. وفكيت نفسك ..
أدري أن مالك خاطرن بها .. بس قلت يمكن لا خذاها .. يتغير شي ..


أبن عيد .. ماعليك زود .. جزاك الله خير ..
وأبشر باللي تستاهله >> يقصد العطايا عشان خلا له بنت عمه ..


صقر : راسك سالم .. بنت عمي ماتقدر بعطايا .. نبي منك السترر .. والحشمه والقدر ..



أم سالم : سحبت بنتها وطلعتها فوق .. خافت تفضحهم بصوتها وهي تنتحب ..


مها تشد في ملابسها وشعرها .. ودموعها تذرف :
حسبي الله عليك ياصقرر .. حسبي عليك ..

أحتريك لين صكيت الثلاثين .. تاليتها ترخصني لأبو مرتين .. وعواله 15 ..

جعل ربي مايوفقك ..
جعل ربي يقهرك مثل ماقهرتني ..
جعلك ماتشوف الولد حيات عينك ..
جعلك ماتهنى ..
‏ جعلك .... .... .....

بس هين هالشيله مهيب على مره كان خليتك تهنا بعمرك ..

وقضت ليله من أتعس ليالي حياتها ..

في حين أبن عيد .. من أسعد الليالي في حياته ..
لأنها أول زوجه عذرآء ياخذها ..

زوجته الأولي .. كانت أرملة أخوه أخذها .. عشان عيال أخوه مايطلعون من العايله !!!!! ..

والثانيه .. مطلقه .. يتيمه .. شيمته .. وفزعته .. خلته يأخذها لأن مالها أحد بعد ماتطلقت وحب يكسب فيها أجرر ..

‏
‏*‏ * *

صرخت موضي بفرحه .. ورمت نفسها على أخوها .. وكأنه هو اللي معرس ..

مبروك ياخوي مبروك ..
ربي يحبك أن شآالله لانه فكك منها ..


ابتسم صقر هالمره وهو يبعدها عنه .. عكس كل مره يتنرفز ويعصب ..

بس لانه أسعد منها ولو مابين هالفرحه .. لكن واضحه لو اخفاهآ .. في ملآمحه المرتاحه ..


وخري كتمتيني يالناقه .. قالولس معرس .. عشان تباركين لي ..


موضي : نذر بهالمناسبه .. لعشيكم من .. .. وسحبت بوك صقرر بخفه وخذت 500 ريال ..

..‏ وكملت من بوك الشيخ صقر ..
ورمت عليه بوكه ..

ضحك هههههههه وهو يرجمها بعقاله ..

مهوب الليله .. لا يدرون حريم خوانس يزعلن ..


‏*‏ * *

منتهى : من يومين مانمت زي خلق الله ..

أنا وش بلآني بالبنوك ومشاكلهآ ..

مقدر أقول لأبوي ..
أنا متعهده له بعد ما أصريت أتوضف أني ماأشكي ولا أبكي له ..

أجيه هالحين بمصيبه ؟؟
قطع هواجيسها ‏.. صوت جوالها يدق ..

أستغربت الرقم المميز .. بس ما أهتمت .. هي متعوده ترد علآ أي رقم غريب ..

عشان خواتها .. وبنات عمها يغيرون أرقامهم باستمرار مو غريبه ..

بس الغريب تميز الرقم ..


ردت : نعم

السلآم عليكم ..

منتهى : وعليكم .. نعم من تبي !! ..

شكلك ماعرفتيني أنا بدر .. ولد عمك أو مدير البنك ..

منتهى بغيظ : أستاذ بدر لو سمحت .. مشاكل الشغل بالشغل ..
مالك حق تدق على جوالي أبد ..
تدري أنا مارضآ ..
وأبوي واخواني مايرضون ..


بدر : أذا تبين أهلك يدورن أنا قريب بيتكم بأقلط وأقولهم ع السالفه ..


منتهى بشهقه : لا ، أمانتك ماتقول لاحد ،،
أبوي يمكن يروح فيها بسكته والا جلطه بسم الله عليه ،


بدر : اجل اسمعيني ..
أنا سددت المبلغ من حسابي الخاص .. مو عشانك عشان اللي ورطوك يبونها فيني ..


بكره تتركين الشغل نهآئي ..
وألا بقول لهلك ..

منتهى بعد ماتطمنت رجعت لها القوه ..

مستحيل .. اللي معي بقسمي وام مازن يدرون بالأختلاس .. مابي أترك الدوام وتتأكد شكوكهم .. وبكره بداوم ومايحق لك تفصلني دام العجز انسد ..

وسكرت بوجهه السماعه قبل لاتسمع رده ..

..‏* * * ..



أمل : نوره أنا حاسه بحاجه فيني متغيره .. أنا خايفه موت .. لي شهر ونص ماجتني الدوره ..


..‏ بعد مانسوي الخطأ نبدا نفكر في النتائج .. ولو فكرنا بالنتآئج قبل لانسوي الخطأ .. كان ماسوينآه ..


..‏ نوره شهقت ..
وش قصدك ؟؟
حمل يعني ؟؟


أمل نزلت راسهآ : يمكن ..


نوره : طيب جيبي لك تحليل حمل منزلي وتأكدي ..

واستعجليه يجي يخطبك .. هو قايلك باتزوجك بعد اللي سواه علآ طول ..



‏*‏ * *

موضي : بتله أبشرس أبشرس ..

بتول : ومرض أن شآالله .. كم مره أقولك بتول .. توته .. مو بتله ..

موضي : جعلس القوم .. أي سعيد أخي مبارك ..
ماطاح ألا أنبطح ..

عليكم يالحظران أسامي .. تجيب المرض ..
بتول ، وسن ، بيان ، جنان .. وآخر نكته .. جاكلين وروز ‏
هههههههههه

بتول : ههههآأااي بايخه ماتضحك ..

اجل مثل .. نجر ‏، محماس ، طلق ، جوزا ، نوير ، وأحلآ حاجه وحش .. ‏
هههههههههههه

موضي : جعل الجحش يتربق ببطنس .. عاد ماقلتي ألا أشين ماعندنا ..

عندنا محمد . وناصر . وفهيد .
ونوره ونوف واحم احم محسوبتس مضآوي ..


بتول : ههههههههههه
طيب ودي أعرف سر تصغيركم للأسمآ .. نوير ، فهيد ...


موضي : لبى قلبس ماتعودتي علآ الدلع هذا دلع ..

مهوب مثل دلعكم السامج يالحظرآن ..
ميمي .. جيجي ..
شوشو .. ميدو ..

كله خيطي بيطي .. خرآط ماله سنع ..

نسيتيني ماقلتلس البشاره ..

بتول : ههههههههه
قولي ولا تكثرين ..

موضي : مهيآن .. ابشرس تملكت .. على شآيب من جماعتنا .. وحلت عن صقور ..

بتول : ههههههه حسافه ودي إنها قعدت علآ كبدك ..

موضي بخبث كجس للنبض : ألا انتم يالحضرآن ماتجوزون البدوان لو خطبو منكم ..


بتول : هههههههه ‏
تخيلي شكلك أنتي وبدور أخوي ..
ههههههه بس يبله وحده قويه مثلك تصدقين ..

موضي : وجع عظم بلآ ..
أنا أقصد لو صقور خطب عندكم .. تجوزونه ؟؟



‏ ‏.. ،، انتهى البارت ،، ..

إلى لقآء .. متمنيه لكم طيب القرآءه ..
وتفاعلكم مع القصه ..


]

..‏ السلآم عليكم ورحمة الله ‏..


..‏ ‏،، البآااارت الرآاابع ،، ..


حسن : طيب يآبدر .. قدرت تطلع نفسك منهآ ..

خيرهآ بغيرهآ .. ‏
على الأقل طلعنآ حق سفرتنآ لآجآزة الربيع .. والصيفيه بعد .. وبآحسن دول آوروبآ ..

بس يآرب تستر علي ومآينكشف شي ..

،،‏ آنى يستجآب له ومطعمه حرآم ومشربه حرآم .. وملبسه حرآم !! ،،



‏*‏ * *

بتول : قدرت أصرف موضي .. عشآن ماتحرجني .. بأن البآب يدق وبفتح له .. بدون لاتعرف ردي ..


طلعت غرفتي .. وسكرت البآب .. وابتسمت .. كل شي عن صقر أعرفه ..

سكرت عيوني .. وآنآ أسترجع بذاكرتي .. شكله .. وكل سوآلف موضي عنه ..

صحيح كنت أتمنى آخذ وآحد أبيض مثل بدر أخوي .. يآحظ من بتآخذه شكلآ .. ومضمونآ الله يعينهآ ..

بس عآدي .. يكفي آنآ بيضآ .. اسآسآ السمآر حلوو على الرجآل .. ‏

فزيت وتوجهت لتسريحتي .. ‏
رفعت رآسي فوق .. وآنآ آتخيل كيف بيكون طولي بالنسبه له ؟؟

أذا النآقه مضآوي ‏.. أوصل فوق كتفهآ بشوي .. فكيف هو ؟؟

طالعت شعري اللي مدرج تحت كتفي ‏..
البدو يحبون الشعر الطويل .. صح كل الرجآل يحبونه طويل .. بس البدو بزود ..

تنهدت .. أووف وش طرآ علي .. دآيم موضي تسولف لي عنه .. مآقد فكرت فيه كزوج .. يمكن عشآن أحنآ حضر .. وهم بدو ؟؟

أوووه ‏.. آنآ حطيت منه سآلفه .. ويمكن هو مآقال .. بس لقآفه من موضي ؟؟

وحتى لوو كآن يبي يخطب .. يمكن أهلي مآيوآفقون ..

ورآحت بهوآجيسهآ وأحلآم اليقضه ..


‏*‏ * *

موضي .. خذني صقر يوديني موعد لآسنآني .. ولقيتهآ فرصه .. أحاكيه بعيد عن أهلي ..

موضي : صقر ليش مآتعرس ؟؟

صقر : علآ يدس .. كآن عندس مهرتن طيبه .. لآتنسين أخيس ..


موضي : نعبوه ، وين هرجك .. مآنيب معرس لين يجهز بيتي ؟؟
وأستعد نفسيآ ؟؟

صقر : البيت قده جآهز .. 8 شهور ويخلص ..

والنفسيه وزآنت .. وش أحتري ؟؟

موضي : أمممم .. طيب وش رايك ببتول بنت البدر ؟؟

صقر بآهتمام : الحضريه .. زميلتس ..

موضي : آيه آنفدآك .. وش قلت ؟

حك صقر عآرضه ‏.. وببتسآمه .. أوصفي لي شكلهآ .. آربهآ زينه ؟
وأهم شي ‏.. بيضآ خبرس بخوس .. يلق لق .. وشعرهآ ابيه طويل مثل شعر نويفه أختس .. وابيهآ أخلآق ودين ..

موضي .. ول ول ول .. جعلك القوم .. وش خليت ..
وش رآيك أخطب لك لميس التركيه .. وألآ سيرين عبدالنور ..


صقر .. آتهبين .. آخذ هآلخيز .. خلآص .. أقطعي هرجس وخلس من ذالسآلفه ..

موضي : أعصآبك يآلشيخ .. نمزح .. نتعجب عليك .. العذر والسموحه .. عزالله مآأمرحت معك بنت الحضرآن كآن ذا أسلوبك معهآ ..

صقر : لآإله الا الله .. بتحكين وألا ؟؟

موضي .. وصفت له بتول وكآنه يرآهآ ..

موضي .. عآد الشعر .. لآجآتك طووله .. والطول مهب طويله .. يقآلهآ أطول القصآر ..

صقر : أبد في طولهآ ماعندي مشكله .. ودي تجي قصيره .. أحس آنهآ أنثى .. ولآهوب طولس كنس نآقة عقآب العفرآ ..

موضي بغيظ : مآينعرف لكم .. أن جينآ قصآر .. قلتو مابيهآ تحك في الآرض .. وأن جينآ طوال .. قلتو الأنوثه شرق وأنتم غرب ؟؟

ويقوا في المرآيه .. وشوفو خششكم قبل .. ‏


صقر : نعنبوه من لسآن .. الله يعين جويبر .. لآزم نخصم له من المهر .. كتعويض .. بدل فآقد .. لآنه بينطرش مآدار السنه معس ..

موضي .. يحمد ربه .. ويسجد له صبح ومسآ .. أن الشيخه .. موضي بنت أبوصقر قبلت به ..

المهم .. أحآكي البنيه ؟
صقر .. أصبري بقلبهآ في رآسي ..


‏*‏ * *

بدر : لي يومين مآشفت جدتي اللي سآكنه معنآ بنفس البيت ..

عآدتي .. لآرجعت من دوآمي .. أحط رآسي وآنآم لحد أذان العشآ .. طبعآ أبوي مستحيل يخليني أنآم ماصليت .. لكن صلآة ا لمغرب أصليهآ بالبيت .. وأرجع أنآم للعشآ ..

أدري مقصر بحق أهلي .. وجدتي .. بس غصب عني .. أرجع تعبآن مآشوف وش قدآمي ..

نزلت .. شفت في حركه مو طبيعيه بالبيت .. أدري ضيوف .. بس شكلهم سبشل ..

الجوهره أختي .. جآيه ومعهآ صوآني ‏..
بدور تبخر البيت ..

بتول .. معهآ الشبشب .. وتطلع روزه .. وعيآل محمد والجوهره للصآله فوق .. وتهددهم مآحد ينزل لحد مآيروحون الضيوف ..

وبغرفة الضيوف .. مصفوف حلآ .. وترآمس قهوه ..

جلست وصبيت لي فنجآل .. وخذت حبة دونآت ..

مسكت بدور اللي تدور بالبخور : وش السآلفه ؟
من بيجيكم ؟


بدور بهمس : عمي فهد وأهله .. بس لاتقول لجدتي ترآ مادرت ..


سعود أبومحمد : من دريت من بدر أن بنت أخوي فهد معه بالدوام .. طلعت بسرعه ..

عآرف مكآنه وين بيكون .. سحبت بدر معي ومريت نآصر أخوي وخذته معنآ .. من تركنآ مآعاد سمعنآ عنه شي .. ولآشفنآه ..


منتهى : أووف وش هالعم الأقشر اللي طلع لنآ بعد ..

مآبي أروح .. كفآنآ مآجآنا منهم هالعمآن .. بس أبوي حلف ماحد يقعد خآصه منى أختي ..


عزيز .. خآله منتهى .. أنا حفظت تسمعين لي ..

منتهى .. هآت .. ويآويلك أن ماكنت حافظ ..

أبو محمد : دقيت الجرس وقلبي يدق معه .. مدري وش بواجه ..

فتح لي ولد صغير عمره تقريبآ 7 أو 8 سنوآت ..
جيت بسلم عليه وأسأله عن أبوه .. بس نآصر أخوي سحبه من يده .. وضمه لصدره .. وأنهآر يبكي كنه طفل ..

نآصر من عمره وهو حنون وهش .. ومايتحمل ..

أبو حمد .. أنا ماقلت لك لأتفتحون الباب ألا ... ...


رمى نآصر نفسه عليه بعد ماترك الولد .. وبكآ أكثر .. نزل ليديه يبوسهآ وهو يقول سآمحني .. سآمحني يآخوي .. أمسحهآ بوجهي ..

رفعه أبوحمد وضمه لصدره .. وبكوو مآكأنهم شيآب فوق الستين والخمسين ..

بدر : كان ودي أقول لعمي عن سوآيا بنته بالبنك عشان يفصلهآ .. بس بعد اللي صآر .. تراجعت .. سالفه من سنين نسينآها ..

وعيآله ماعدت أذكر أشبآهم زين حتى حمد .. رفيق عمري نسيته ونسآني ..

‏*‏ * *

الجوهره : بدر يالله أطلع الضيوف جوو ..

بدر : لآ منيب طالع .. بشوف لقآء جدتي بعمي فهد وعيآله ..

الجوهره : يآحبك للشر .. غريبه تهتم لشي .. بس بنآديك لآجا عمي بيدخل .. اطلع أنت بس الحين ويصير خير ..


‏*‏ * *
صقر : مضيوي .. خلآص حاكي البنت .. عشان كانهآ وافقت نخطبهآ من أهلهآ ..

ويآويلس مني كآن ذوقس مهوب زين .. لآعلقس بآذانس في المروحه .. وأخليس عبره ..


موضي : لبى قلبي .. عومه مآكوله مذمومه .. بس أحلقهآ من لحيه كآن ماطيرت عقلك ..

صقر : ههههههههه تحرين باللحيه .. مرجلآنيه وعلومس علوم غانمين ..

موضي تشققت : نفدآ عوينآتك هالصغآر .. هذا الحكي الزين ..

السبت بحاكيهآ وأردلك العلوم ..


‏*‏ * *
بدر .. شفت عمي أبوحمد وعيآله بيدخلون على جدتي .. ودخلت معهم .. أنآ مآحب أدخل وفي المكان حريم مهوب محارمي .. بس هالمرره غيرررر ..



،،‏ انتهى البآرت ،،
ألى لقآء قريب بعون الله ..

أتمنى أن يكون لبصمتكم أثرر ..

السلام عليكم ورحمة الله ‏
منتديات ليلاس
//‏ البآاارت الخآااامس //
منتديات ليلاس

..‏ أبو صقر .. معصي ،، بنآت عمك وبنآت قبيلتك مايملن العين ؟؟
أشرر على أقربهن وأذربهن .. وأخطبهآ لك من ذا الليل ..
لكن تخلي بنيت عمك وتآخذ بنت الحضرآن ..


صقر .. مآكآن متعلق فيهآ لدرجة يعآرض أبوه .. بس مآيحب احد يفرض عليه شي .. وبعد كان يبي يآخذ بعيد عن قبيلته عشان لآجا بينهم زعل وطلآيب .. فهم من بعيد السعه .. مهوب أهل يهمه مايخسررهم ..


صقر : الله أكبر يآبوصقر .. هذا عيال عمك ..
واحدن خذآ له كنديه ‏.. لاأصل ولافصل .. وهجت ببنآته لديرتهآ ..

والمحكمه حكمت لامهن بحضآنتهن ..
بنآت حمآيل وقبآيل .. يتسكعن بشوارع كندا بلا حسيب ولا رقيب ..

وأخوه العقيم خذآ له مسيحيه .. وكلت ماوراه ودونه .. وحدته على الدين .. عشآن هدآيا وشرآيا أهلها وجيرانها وقرآيبها .. عقب يوم فضآ البوك ..
والبطآقه صفرت ..
والديآنه تحآدوه ..
وعلى السجن قآدوه ..

حثت في وجهه الترآب ..
وقالت له .. آنا ماخذيت عشان سواد عوينآتك .. آنا خذيتك عشان الزرق << عملة السعوديه 500 ريال

بآعت أغراض بيته .. لو فرآشه بآعته .. وهجت لأهلها ..

وأبو هادي رفيقك الله يرحمه .. خذا له هنديه عقب موته ورثته .. وخذت خويه ..

..‏ وش قومها بنت الحضران .. ماخذها ؟
أقلها معروف أصلها وفصلها ‏.. وأنهآ جآت بالحلآل ..

أطلع من بيتي وآنا ضامن أنها بتصون عرضي .. مهوب يدي على قلبي أقول من عقبني على بيتي في غيبتي ؟؟

وتربي عيآلي على كتآب الله وسنة نبيه ‏.. مهوب على رقص وكاس وقلة حيآ ..

منتديات ليلاس
أبو صقر : أجل بهوآك .. سو اللي في راسك .. وليآك تجي عقب تشكي مثل النسوان .. وتقول الحضريه فيهآ مالا فيهآ ..0

أم صقر : لا .. مهوب بهوآه .. يآخذ من بنيت عمه وهو مايشوف الجآده << الطريق
ولو تشيب عيونه مآخذآها ..

منتديات ليلاس
صقر : أنا عصاكم اللي ماتعصآكم .. أنتم أمي وأبوي .. ومالي شور عقب شوركم .. وكان تبون أهون عن هالعرس اللي ماوراه اللا ضيق الخلق هونت .. لاني أن ماخذت بنت الحضرآن منيب ماخذن أحد ..

وطلع ومعدته طآيشه .. من نفسيته الزفت ..


موضي قربت لأمهآ وقعدتهآ وهي تحآوط كتوفهآ .. وتسآيسهآ

جعلني فدآس يآلغآليه .. وش قومكم على صقير ؟؟
يوم بغآ يفررح .. تكآثرتوهآ عليه ؟؟
نآكدتوه .. وضيقتو صدره .. وخربتو فرحته ..

ماقلنا ربي هداه .. وفك عقدته عشان يتزوج .. تجون تحرونه ..

معجبس حاله ؟؟
طآف الثلاثين وهو لاولد ولاتلد ‏.. يركض لذا .. ويعطي ذا .. ويساعد ذا .. ويوم جآ يبي منكم العون صديتوه ؟؟ موب حق !!


أم صقر تبكي :


من قآلس أني مابآه يعرس .. أنا ودي ذا الساع أشوفه ابشته .. وأم عياله جنبه ..

صقر أول فرحتي ..
وجآبر كسرتي ..
ومآسح دمعتي ..


آنا مآبا مرت الصقر تذوق الويل والمر مثل ماذاقته اميمتي .. بس عشآنهآ غريبه عنهم .. ومهيب من ثوبهم ..

واسترسلت أم صقر بذكريآتهآ ..


..‏ أبوي كان يعرف جدي الجنوبي .. كآنوا خويآ في البندق .. << جنود الحرس الوطني

وأبوي لآقده رايحن للجنوب لزوم يمره .. أبوي وآجد خير .. وعنده حلآل .. ذود ،، وغنمان ،،
ويدآين بدوانه ،،

وشاف حال جدي .. عيشتن قشرا .. ووراعين كثر الدبآ .. وزود يربي عيال أخته أيتام ..

وراتب البندق مغير 2500 يروح نصهآ في أجار لآراح للشمال .. وفي مصاريف بيته ..

..‏ ‏
كل مآجاهم أبوي .. حمل الشآص .. من الخيور .. عيش وحب وسكر وقهوه .. وحتى اللحم ماينسآه .. وكسوتن له ولعجوزه ..

..‏ وجدي استحى من جمايل أبوي اللي مقصده فيهآ وجه الله الكريم ..
منتديات ليلاس

جآته أمي تشل معه الأغراض من الشاص اللي كان أبوي يوطيهآ ..
منتديات ليلاس
قال لابوي يمزح معه .. ماتجوزني ذا الذآهبه ..

كان أبوي يسبرهآ وهي تهدف بالبهم .. وجت تشل معهم ..


جدي .. وكنه همين طاحن منه .. رد الجميل لابوي .. وهم ورعن طآح عنه ..

قآل : أتريهآ جآتك هبه .. وعلي الحرام مايدور كفره ألاوهي معك ..

أبوي مايحب يرد هدية أحد خص لوه أدون منه .. عشان ماينتقصه ..

خذآها معه بعد ماملكو له .. تلطم وفتح الدرايش من ريحة البهم اللي معه ..


وصلو لأهلهم .. ودخلهآ علآ حرمته .. هي بنت عمه ووحيدت أبوهآ وصآه أبوهآ يآخذهآ .. وكآنت أكبر منه ب 12 سنه ..


لأن مالها احد عقب ابوها ألا ولد عمهآ .. كانت رآجع .. وهو توه صبي .. شوفته من الله عيشه ..

طول .. وزين .. ومرآجل .. ويده ميسوره ..


..‏ قال لبنت عمه .. خذي هذي طبينس .. عمرهآ 13 عديهآ مثل بنتس .. سنعيهآ


..‏ عآينتهآ بنت عمه .. وكانت حرمتن جيده بطآعة ربهآ .. وذكره مايطيح من لسآنهآ ..
ويدهآ رطبه للضعيف واليتيم والمسيكين ..

وقدهآ نفضت بطنهآ من الصيب جآبت علآ ابوي خمسة وراعين .. مآعاش منهم ألا سعيد أخوي الله يحفظه ..

عوالهآ اللي مآت بجدري .. واللي سل .. واثنين غرقو بالسيل .. ‏

أمي كآنت قدهآ سويدا من الشموس ..
وكشيشتهآ مخلآتن على طروقهآ .. والقمل مسداد مرداد .. ويعجز المشط يدخل فيه ..

قالت لابوي : البنت خآويه .. ذآبحهآ الجوع .. نظرة عوينآتهآ ساهيه ، وهدبهآ متبرم ، وبطنهآ ضآمرر ، وصوتهآ ذاوي ،،


..‏ لاتدخل عليهآ .. ذي مابعد جآتهآ عآدة الحريم ..

خذتهآ عمتي .. وسبحتهآ ولبستهآ من ثويبآت بنيتهآ اللي قد مآتت .. أكبر بنآتهآ قدهي بعمر أمي يوم تموت ..


مشطت شعرهآ بمشآط .. وجدلته ‏.. وسوت لهآ قرص ودقته بعسل وسمن وأقط .. وسوت لهآ دلة حليب بزنجبيل ..

أمي كلت من القرص والعسل والسمن يتنآقط من يديهآ .. لين تطققت جنوبهآ من الأكل .. وشربت من الحليب شرب الهيم ..

منتديات ليلاس
،،‏ يتبع ،،
منتديات ليلاس