انت وينك؟؟ من زمان... كنت أدور في وجيه الناس عنك وجه / وجه ... ولا لقيتك

كل ماطار الفراش أعرف إن أمي طفت
يمه ويني ؟؟.. يمه .. يمه ويني

نامت سنيني علي تلتحف من برد عمري
مامعاي إلا عيونك .. تقطر الدمعه في بالي

تطفي البرد ويجيني زولك بداخل عيوني
أحضن عيوني وأنام

تهزهزي البرواز أدري
صح يمه ؟؟

مثل ماكنت اتهزهز باغنياتك

يمه نامي تمشط الصوره عيونك
تشعلي دمك تدفي الغرفه من بحات صوتي

مجدله شيبك تقولي آآآآآه يانذر نذرته
تفتحين كروت عرس وترسمين بشوت عرسي

ألبس الاسود في بالك
ألبس البني في بالك
ألبس الابيض ترفضين
الكفن يطري في بالك
صح يمه ..؟؟

يمه أدري همك هو وجودي
هو زواجي
تشوفي عيالي وتموتي

غربيني لالمحتي شروق ربعي
تلملميني من زوايا البيت حتى
تتجه للقبله روحك
تلتقي وياها روحي
بكل صلاه
واعرف انك بآخر ايام الضواه

غافي فيك الفراش
كل ماطار الفراش اعرف ان امي طفت
ضايقه من التنك يمه
ايه انا ادري ضايقه من التنك يمه

كحتك كنها بصدري
آه لو اني عنك شلته في ضلوعي
وجيت اسير
صج تعالي
موعدك عند الطبيب
اذكر إني مسجله في شهر تسعه
رحتي يمه ولا طاف ؟؟

لايطوووف

أدري ماعندك يايمه
غيري أحد ياخذ الكرت ويجدد كل مواعيد الطبيب
يمه نامي .. نامي يمه

الأسر هو نام فيني
والله مايقوى يزعزع شخص راضع من حليبك
او يهز يايمه شعره
شعره من ونات شيبك

قولي أقدار وخذتنا ورحنا أسرى
ويعني أسرى
ماهو لازم مثل هذا اليوم نعرف
من عدوك من صديقك

يعني جوع ماأجوع
وانتي اصلا تذكرين
عزة النفس ويميني
ماوصلت أكل ٍ ولو هي
نفسي تدفعني عليه

يعني حريه يايمه
اجمل الحريات والله
إني اغيد كل عمري
ولايتضايق صدر شارع
من رئة خطوات فاجر
تاطى مسلم مانطق الا الشهاده
باصبعه ووقف فجر

لاغسلك الدمع يمه قولي فدوه
فدوه لعيون الشواطي لاغسلها المد قامت
توقظ الناس بفرحها
بعد ماكانت حزينه

ادري همك هو وجودي هو زواجي
تشوفي عيالي وتموتي

مثل همي إني اشوفك قبل لايطير الفراش
خلي همك إني طالب يد بلادي
ومهرها أبقى أسير
حتى لو طار الفراش

انت وينك ؟؟ انت وينك
من زمان كنت أدور في وجيه الناس عنك
وجه وجه وجه وجه
ولالقيتك

في زوايا البيت أدور
في الشوارع في الصباح الي تشرب غترتك
بالمكان الي فرشته بالجريده
لما تقراها وتشرب كل صباحي قهوتك
وآخذ الفنجان حتى تقرى حظك لي عجوز
ترفع البسمه تقول فيها لك شي بيتحقق
وفيها له شي ثمين
ليه ماقلتي فيها لي شي بيتهدم
وفيها له شي حزين
أدري كنتي تكفرين

إنت وينك تسأل الأشجار عنك
لما ترمي فوق ظلها كل ظلك
لما تسقيها بدمك هي تبلك
تنحني لك

تدري إنك لو تغيب ينكسر طير
وتموت

إسأل الأيام عني
والا تدري اسأل نعاس تكسر في وريدي
اسأل شفاهن هجرها
من بعادك ماي بارد

ليه تتركني أتوسل
واتسول في عيون الناس
انا اطلب منهم حفنة حنان
انت وينك ماتركت إلا بعباتي
عطر جسمك من صلاتك
وشعرتين بكف مشطك
صافحني وسط بالي
واتذكر .. يالله يمه .. يالله يمه اخطبيلي
والا يعني ماني رجال بعيونك
شفتي شعرك الا افله في زواجي

انت وينك هذي دارك ماتغير شي فيها
هذا بوكك هذا عطرك هذا مشطك
الا ساعه يوم طاحت من يديني اتكسرت
لاتخاف جبت ساعه تشبه الي تكسرت

انت وينك ماتركت الا عيونك داخل البرواز
تتبع وجهتي من وين أروح
ماتركت إلا عيونك داخل البرواز تسأل
يمه وينك
إنت وينك ؟؟

للشاعر/ سالم سيار ..