قلـوب ضائعـة تجـري فـي سـاحـة الـغـدر الطـويـل

[ الفصل الأول ]


في أحد أرجاء المستشفى .. واقفة أناظر الباب ، يا رب لا ترجع اللي صار مرة ثانية ، كنت أنتحب و أنا أدعي .. فجأة طلع الدكتور و كانت ملامحه تكسوها البرود غير مبالي بحالتنا و خوفنا ، كأن الموقف عادي بالنسبة له ، دعيت ربي يا رب ارحمنا برحمتك ، اللهم لا أسألك رد القضاء لكن أسألك اللطف فيه ..

سمعت كلمات الدكتور المألوفة بالنسبة من كثر ما تكررت على مسامعي في أيام سابقة ..
الدكتور : عظم الله أجركم ..
طالعت أبوي و أخوي أتأكد من اللي سمعته ، كانت وجوههم جامدة ، مستحيل أكيد غلطت يمكن الموقف اختلط بذكرياتي القديمة ، قلت بصوت متردد مترجي أن الكلمات اللي سمعتها تكون وهم ..
: شو قلت ؟
عاد علي الكلمات و طعناتي تزيد مع صداها ..
الدكتور : عظم الله أجركم ..
شهقت بقوة ، ز كنت راح أطلق صرخة مكتومة ما انكتب لها تطلع ..و طحت على الأرض أهرب من مأساتي ..



أحس بثقل براسي ، ضباب .. كل ما أشوفه ضباب ، شوي شوي بدت الصورة تتوضح ، أنا في اكثر مكان اكرهه ، قعدت أتأمل الغرفة يا كثر ما قعدت و شفت في هالمستشفى ، ما يحتاج أوصف لكم الغرفة زي كل غرف المستشفيات تلوع الجبد ، بس ليش أنا في غرفة خاصة ، شو صار ؟

التفت شفت أخوي جالس يمي .. تنحنحت و قلت بصوت مبحوح : بـ ـدر ..

التفت لي بدر مستغرب ، و بانت علامات الفرح على ويهه بس بمثل سرعة ظهورها اختفت ، ناظرني شوي و ما طول هالنظرة ، بس حسسني إن في شي صار ، بس ما قلت شي استنيت ليمن تكلم ..

بدر : شلونج ريهـــــام ؟
يعني مستحيل أعرف من البداية لازم هالمقدمات ، بس رديت عليه بهدوء ..
ريهام : الحمد لله ..
سكت أفكر شوي ، بعدين قلت بسرعة ..
ريهام : حلفتك بالله يا خوي تقولي شو صار ..

أدري تقولون ما عندها تفاهم ، على طول حلفت عليه إجباري .. بس لا تلومني ، كان بدر يناظرني بعد هالحلف يفكر شلون يخبرني ، أما أنا كنت أناظره بدوري أحاول أطرد الفكرة اللي تدور في بالي ..

قال بدر بدون مقدمات لي : البندري يا ريهام ، البندري راحت وما عاد ترجع ..
تنهد بدر ، أما أنا قلت بسرعة و بهدوء عكس البراكين اللي بداخلي .. ريهام : الله يرحمها ..

قمت بسرعة من مكاني و عدلت حجابي و مسكت إيد بندر و هو ما مانع بالعكس رحب بي ..
و أنا أسير كنت أفكر و دموعي تسيل على خدودي بدون توقف ، اللي ما أتمناه صار اللي كنت أدعي في كل ليلة و في كل صلاة إن ما يصير صار ، البندري راحت و ما في شي راح يرجعها ..

اللي فهمته من بدر إني لما نقلولي الخبر طحت مفجوعة ، الظاهر إني نمت ساعتين و أبوي بعد ما أنهى كل الإجراءات رجع البيت ، أكيد يفكر في اللي صار ، الله يعينه و يعيني و يعين بدر و يصبرنا ..


ريهام ياسر [ ... ] 19 سنة
بدر ياسر [ ... ] 27 سنة
البندري ياسر [ ... ] 25 سنة
أبو بدر ( ياسر ) [ ... ] 52 سنة

وصلني بندر البيت طول الطريق كنت ساكتة ، أصلا في أحد يحب يتكلم في هالمواقف ، أول ما وصلنا ركضت على غرفة البندري يقولون الميت لين مات أهله ما يحبون يدخلون غرفته ، يكبر حزنهم فيها لكن أنا مو مثل الناس الميت مو أي أحد هاي حبيبتي البندري و أنا مشتاقة لها ..

فتحت الباب وبدت دموعي تنزل و أنا أناظر أغراضها ، غرفة البندري غرفة ناعمة مثل البندري ، كان أغلب لون الأثاث أصفر ، كان لونها المفضل كانت دايما تقول اللي إسمهم البندري يصلح لهم الأصفر ، آآآآه يالبندري أنا حبيت الأصفر لأنك حبيتيه ..

انسدحت على سريرها ، و أنا أشمه فيه ريحة عطر البندري ، من كان يصدق كانت تنام على هالسرير كل ليلة و إني خلاص ما عاد أقدر أشوفها ، من كان يتصور البندري حياة البيت تتركه ، ما عاشت كثير 25 سنة يا خسارة شبابش يالبندري ..

انتبهت على نفسي هذا يومها مكتوب عليها ، ما في أحد يقدر يغير هالشي .. الله يرحمك برحمته راحت للي أرحم منا عليها .. بس أنا حياتي كانت تدور حوالين البندري أول ما أصحى أركض لحجرتها أنادي : البندري قومي ..
قمت بسرعة من مكاني و أخذت قرآن البندري اللي كانت تقرأ فيه ، قعدت أقرأ و أرتل بصوت عذب طالع من قلب ، صج لين قالوا ما ينفع عند المصايب غير القرآن يعطي راحة للنفس ..

بعد ما خلصت رحت لغرفة بدر ، فتحت الباب و طليت براسي لقيته على السرير يناظر في الفراغ و في جفونه دمعة ، أول ما بدر إنتبه لي مسح بدر دمعته و قال : هلا ريهام دخلي ..

دوم يقولون دمعة الرجال مو سهل تنزل و إذا نزلت ما تنزل قدام الناس ..
دخلت و قفلت الباب و سألت السؤال اللي يدور في بالي : متى راح يدفنوها ؟
بدر : بكرة الفجر و العزا راح يكون في العصر ..
ريهام : خلاص معناها هي راحت صج ..

ما بكيت هالمرة بس كنت عاوزة أتعود على هالواقع ، تقربت من بدر و جلست يمه و هو تقرب مني و ضمني لصدره ..


في اليوم اللي بعده كان الخبر منتشر عند الجميع ، ففي الظهر زاروني عمتي و بنتها يساعدوني و ويواسوني في نفس الوقت ، سلمت على عمتي نورة و بنت عمتي سديم ، كان واضح الحزن بوجوههم ..
: عظم الله أجرتس ..
ريهام : أجرنا و أجركم ..
سديم : أول ما قدرنا نجي جيناش ..
ريهام : مشكورين ، ما قصرتوا ..

كان واضح بالنسبة لهم إني ما أريد أتكلم فاحترموا سكوتي و استأذنوا للمطبخ ، تقول عمتي راح تسوي لنا لقمة ناكلها مهما يكون لازم ناكل ، بس من له نفس ياكل ..
رحت المطبخ يمكن أتسلى شوي ، بس سمعتهم يتكلمون و من دون ما أحس قعدت أتسمع ..

سديم : الله يرحمها يمه ، أصلا كان معروف عند الكل من البداية إنها راح تموت من شخصها الدكتور بالسرطان كان موتها مأكد ..
العمة نورة : كل له يومه ، و هذا يومها مكتوب لها الله يساعدهم ، الأولى المرحومة أمهم و بعدين أختهم اتحملوا العذاب في المستشفى و في النهاية الثنتين ماتوا .

مع إني أدري عن هالكلام من زمان أدري إن الكل بنفسه يقوله ، بس ما تحملت أسمعه ..

راح أوضح لكم الأمور .. احنا فقدنا أمنا بعد تشخيصها بالسرطان بأيام معدودة كان السرطان تمكن من جسمها كله و ما ينفع معها العلاج بس أبوي ما سمع لهم و حاول يعالجها ، بس ما شي نفع و ماتت و كان عمري حينها ست سنين ..

بعد وفاة أمي تعلقت بالبندري كثير رغم أنها ما هي أكبر مني بكثير ، أحاول أعبي فراغ الأم فصارت أكثر من أخت لي أم و أخت و صديقة و كل شي ، بس السرطان تمكن منها مثل ما تمكن من أمي ، حينها كان عمرها أربع و عشرين سنة ، عاشت سنة من حياتها في المستشفى بس مثل ما شفتوا هي الثانية ماتت في النهاية..
كنت أتعذب لما كنت أشوفها تروح للمستشفى ، يوم عن يوم كانت تذبل بس ما كان بيدي شي غير إني أدعيلها بالشفاء ، مثل الحين ما بيدي شي غير إني ادعيلها بالرحمة ..

حبست نفسي في حجرتي و أنا أذكر يوم إكتشفنا إنها مريضة بالسرطان ، كنت دايما أدعي بسري إن الله يشافيها و أكون أنا مكانها ..

//

انفتح الباب و ركضت بسرعة لأبوي ، درت بعيوني أدور على البندري ، خفت كثير لما طاحت علينا كنت ألاحظ عليها هالأيام كثير تعبانة فكانت تقول : ما فيني شي ..
فما كنت اخذ بالي ..
ريهام : يبه فين البندري ؟
ياسر : البندري بعدها في المستشفى راح تبات هناك جيبي أغراض لك و لها ، راح تباتين معها ..

في ذاك الوقت كنت خايفة على البندري فما دققت بملامح أبوي و طرت فوق أجيب الأغراض ، بس لما وصلنا المستشفى دققت بملامحه و كانت ما تبشر بالخير ، يا ترى شو فيها البندري ؟ و ليش رقدوها في المستشفى ؟
و صلني أبوي الغرفة و تركني بس ما قال لي إيش راح يعمل ، دخلت و أنا متوترة بس لما شفت البندري جالسة على السرير و تناظرني ارتحت شوي ، تقربت منها و قلت لها بسرعة : البندري ، إنت كويسة ؟ شو قالوا لج ؟
البندري : الناس يسلموا أول ما يدخلوا ..
ريهام : ما تتركين قواعدش حتى و انتي في المستشفى ، السلام عليكم ..
البندري : و عليكم السلام ، الحين أحسن و راح أجاوبج على أسئلتش، أولا: أنا الحمد لله كويسة شكرا ، ثانيا : ما قالوا لي شي ..
ريهام : عيل بروح أسأل ..
ما أدري ليه كنت خايفة أن يكون في البندري شي ، أول دكتور شفته سألته ..
ريهام : السلام عليكم ، لو سمحت أنت دكتور المريضة البندري ياسر [ ... ] هي مرقدة هني اليوم جبناها..
الدكتور : و عليكم السلام ، ايه أنا قبل شوي استلمت نتائج التحاليل ..
ريهام : و شو فيها ..
الدكتور : هي معاها السرطان ..
مشى عني الدكتور و تركني أواجه صدمتي ، فقدت توازني و تسندت على الجدار ، و أنا أذكر البندر شلون كانت كويسة ما يبين عليها شي ، قمة في النعومة و الجمال و معاها السرطان ..
و فارس شو راح يسوي و هل البندري راح تموت و تتركنا مثل أمي ، عند هالفكرة ما قدرت أتحمل و كنت بطيح على الأرض لولا إيدين امسكوني ، رفعت راسي أشوف الشخص اللي مسكني ، حفظت ملامح وجهه الجميلة القمة بالوسامة بعدين رحت لعالم ثاني ، و الظاهر بعدها نقلوني لغرفة من الغرف .

//

عمتي نورة [ ... ] 42 سنة
سديم بنت نورة [ ... ] 23 سنة
فارس ؟؟؟

نهاية الفصل الأول

[ الفصل الرابع ]

.
.

أحس بالتعب .. تعب داخلي أكثر منه جسدي ، لمتى راح أظل أعيش هالحياة بهذي الطريقة ..!
أحس حياتي ما لها معنى أبدًا ، أنا ما أريد أغير أي شي في حياتي كل لأبيه إني أعيش ..
الكل يدري إني مو مثل ما الكل يتصور ، الكل يدري إني أتصنع اللامبالاة ، و إنها ما هي طبيعتي بس ما يدرون شو هي طبيعتي ..!
يمكن ما تعرفون منو أنا ..!
و شو هي قصتي ..!
أنتم تعرفوني بس ما تتذكروني مثل الكل ، أنا سديم بنت العمة نورة ..
أنا أتصنع اللامبالاة في كل شي لأن أحس حياتي إنتهت بطريقة غير عادلة لي ..
كيف ..؟ و من مين ..؟
اللي ظلمني هو زوجي .. إيه زوجي اللي المفروض أعيش بقية حياتي معاه ..
أنا تزوجت بعد ما خلصت المرحلة الثانوية ، كنت جميلة و جذابة فكثير من الخطاب خطبوني ، و بما إني مو مال دراسة تزوجت بأول واحد جاني من مستوانا يعني ولد عز و فلوس ..
فوافقت و كان يوم تعاستي يوم وافقت ، ما كنت أظن إن هالقرار راح أظل أندم عليه طول حياتي ..
طول ما عشت معه عشت ذل و هوان لكني حبيته رغم كل شي و رغم كل اللي سواه فيني ، لكن زيادة على ذله لي خاني بالسر و العلن و أكثر من مرة ، لكني صبرت عليه و صبرت على الكل اللي يجي منه ..
لكن لما مل مني طلقني و بكل سهولة و لا أتأسف و كأن العشرة اللي بيننا هانت عليه ، مع إنها كانت سنة وحدة لكن هالسنة شفت فيها الكثير ..

سمعت طق الباب ..!
استغربت محد يجيلي إلى غرفتي عادةً ؛ لأنهم يدرون إني ما بي أحد و أبي أنفرد بنفسي لكني قلت : من عند الباب ؟
..: أنا أحمد ..

استانست بصراحة إنه راح يقعد معي شوي حتى لو كنت أتظاهر بالعكس لكني أشتاق لهم ..
و ما أظن أحد يعرف أحمد و ما يشتاق له ..!

دخل الغرفة بهدوءه المعتاد الغير مناسب لسنه ، كان مبتسم إبتسامة من قلبه ما قدرت إلا إني أبادله الإبتسامة ، مع إني ما أبتسم إلا نادرًا ..
كنت جالسة فجا و جلس جنبي و قال : شلونج سديم ..؟
سديم : الحمد لله ، عايشة ..
أحمد : تدرين من زمان ما تكلمنا مع بعض كذا ..
سديم : ايه ، كنا منشغلين ..
ما علق على كلامي و قال : تدرين باقي ثلاث أيام ع الجامعة ..
سديم : ما يفرق عندي عرفت لو ما عرفت ..
تجاهل وقاحتي معاه و قال : بس أكيد هالمرة راح يفرق ..
سديم : مو مهم بس مجاملة بسأل ليه ؟
أحمد : يا سديم شو صار لج ؟ كل شي صار عندج مو مهم ..! إحنا أهلش يا سديم ، حسي على نفسج ، أهلش صاروا مو مهمين ، نسيتي نفسج و نسيتينا ما تدرين هالسنة شو بالنسبة لي ، مدام هالسنة مو مهمة معناها أنا مو مهم عندج ..

كلامه كان صحيح بنسبة 100 % ..
بس ما قدر أغير هالشي هاي الطريقة الوحيدة اللي أفرغ فيها اللي بداخلي ، و أبين لهم أني لسه حزينة ..
لكني خفت أن أحمد زعل مني ، و أنا ما أتحمل إنه يزعل مني ، فتعلقت فيه و قلت : احمد أعذرني .. مو قصدي كذا إنت فاهمني غلط .. أنا أسفة أنت و أمي و أبوي أهم شي في حياتي من لي غيركم ..!
أحمد : ألحين سألتي نفسش هالسؤال يا سديم لكن بعد أيش .. بعد ما صار مالج وجود تقريبًا في البيت ، ما نعرف شو فيش بعد ما نعزلتي عنا بعد ما صرتي مو مهمة في حياة الناس سألتي نفسش من لي غيركم ..!
ليش ما تخلين نفسش جزء من حياتنا مدام مالش غيرنا ..

كلامه كان له وقع كبير في نفسي .. تركني و طلع من الغرفة ، مع إنه مبين من كلامه العصبية لكنه ما غضب أو عصب كان يكلمني بهدوء كأنه ينصحني ..
طبيعة أحمد أبدًا ما تناسب سنه ، و لو أحد ما يعرفه راح يستغرب منه ..
فكرت في كلامه و مرة ثانية كان صحيح ..
إذا راحوا عني و تركوني من بيظل لي ..!
أنا لازم أعمل المستحيل عشان أرجع مكانتي و وجودي في البيت ، عشان لا يتركوني ..

طلعت من غرفتي و مشيت لغرفة أحمد و دخلتها ، كان الباب مفتوح .. شفته قاعد على سريره و شكله سرحان ..
جلست جنبه مثل ما عمل معي و قلت : شو راح يصير بعد ثلاثة أيام ؟ و ليش كنت تتكلم عن الجامعة ؟
دار وجهه لي و قال : أنا أتخرجت من الثانوية يا سديم .. كنت أتمنى أشوف فرحتش بنجاحي .. توقعت إنش راح ترجعين لنا بس لما ما شفت هالشي قلت يمكن إنت فرحانة لي بس ما تبينين .. و تعرفين أخباري بس طلعت شي مو مهم ..
سديم : لا تقول هيك أحمد .. مثل ما قلت من لي غيركم ممكن ما أسأل و أعرف لكني أهتم فيك ، بس إنت ما خبرتني شو راح يصير ..؟
أحمد : راح أدخل الجامعة ..
سديم : أكيد مدام إنك تخرجت راح تدخل الجامعة ، هذا شي طبيعي ..
أحمد : بس ما سألتي و ين الجامعة .. !
سديم : و ين يعني .. ! أكيد في السعودية هنا ..

طالعني بنظرات غريبة كأنه يشرح لي الموضوع ، لما فهمت قلت بهمس : لا .. لا تقول ..
تمسكت فيه و بدت دموعي تسيل : لا تروح .. لا تروح أحمد ..
و هو بدوره تمسك فيني ، لكن بدل ما يطمني و يهديني و يخفف علي قال : راح أروح سديم .. راح أروح ..

ما قدرت أتحمل هالصاعقة اللي نزلت علي مرة وحدة ..
قعدت أقلب الفكرة قي راسي ، أحسب الأمور ..
أحمد راح يسافر يتغرب ..!
راح يسافر و يتركنا و يعيش سنين برة ..!
ما راح أشوفه ما راح أشوفه ، أي شي إلا إني ما أشوف أحمد ..
رغم كل شي أحمد بث الحياة و السعادة على هالبيت ، رغم حزني الدائم كان أحمد يفرحني ، لما كنت أستمع لأحاديثه كنت أستانس و و أحس بفرحة كبيرة ما أحسها إلا لما أكون مع أحمد ..
أحين يروح و يتركني مع حياتي الكئيبة و اللي بتزيد كآبة من غيره ، هذا شي ما أقدر أستحمله ..
بس لما وصلت لنقطة ما قدرت أمنع نفسي ما أقول : كيف قبلوك ..؟
تباعد عني أحمد شوي و هو يقول : شلون كيف قبلوني ..؟ مثل ما قبلوا أي واحد ثاني ..
سديم : بس حالتك ما تسمح لك ..
ابتسم أحمد بستهزاء و قال : شلون ما يقبلوني و أنا الأول على دفعتي ، عملت كل جهدي عشان ما يكون لهم سبب واحد يرفضوني عشانه ..
صرخت بوجهه : بس ما تقدر تسافر لحالك ..
قال بهدوء و برود : راح أسافر سدم تقبلي هالشي ، تبين تهربين من الواقع مثل المرة الأولى لما طلقش سعود أهربي .. لكن شي واحد ما راح يتغير و أنا كنت ناوي أودعش و أعطيش خبر بس و طيارتي بكرة الظهر ..

طلع من الغرفة و سكر الباب و تركني و أنا أشهق و أبكي بقوة رماني بالجرح ..
شلون .. شلون يقبلونه ..! أنا لازم أمنعه من إنه يسافر ، مستحيل أخليه يسافر ..

أحمد حكايته طويلة و أطول من حكايتي أمي لما جابتني ولدتني بعملية قيصرية و هالعملية أثرت عليها و صار الحمل عندها صعب و احتماله شبه معدوم من بعدي ..
فكنت أنا أساليهم و أخفف عنهم بوجودي و كان أمي و أبوي دائمًا يحمدوا ربهم إن رزقهم بي ، لكن طيف الطفل الجديد أبدًا ما غاب عن بالهم و حاولوا يعالجوا أمي لكنهم فقدوا الأمل ، لكن بعد أربع سنين أمي حملت و تمسكت بهالحمل ، حتي بعد تحذيرات الدكاترة إنه خطر على حياتها و زعل أبوي منها بسبب كلام الدكاترة عن إنها إذا حاولت تحتفظ بهالحمل كأنها قاعدة تنتحر ..
لكنها تمسكت بالحمل رغم التعب اللي كانت تحس به ، و ما بغت تسقطه بعد ما كانت فرصة الحمل مرة ثانية معدومة من بعدي ..
لين ولدته و ذاك اليوم الفرحة مو سايعتها و احنا كنا مثلها ..
لين كبر أحمد و أكتشفوا إنه مصاب بالصـــــــــرع ..!
كانت نوبات الصرع من النوع الجــــــــــزئي المعقـــــــــــــــــد ..!
و في البداية كان أحمد دايم يزور المستشفى ، لكن بعدين إكتفى بالأدوية اللي كانت تحد من النوبات لكنها ما كانت تقدر تمنعها في بعض الأحيان أو إنه ينسى يتناول الدوا فكانت تجيه ..
عرفتوا ليش ما أبي أحمد يسافر ..!
هذا السبب الأول و سبب الثاني رغبة في داخلي إني أبي أحمد يظل معي ، أنا أحب احمد كثير و كان هو الوحيد اللي يقدر يسعدني لما أكون حزينة ، فما أريد أفارقه .. أي أحد يعرف أحمد ما راح يريد يفارقه فما بالكم بي ..
أحمد رغم سنه عقله كبير أحس أحيانًا إنه أعقل مني و أعقل من شباب كثير يكبروه بأعوام ..
الحياة علمته الكثير ..
أيام كثيرة قضاها يعاني من نوبة من نوبات الصرع لكنه بعد هالشي صارت شخصيته هادية عاقلة ذكية كثير ما يستخدم عقله و خصوصًا في الدراسة صارت شي يقدر يثبت فيه نفسه و أن الطلاب السليمين ما هم أفضل منه ..
لكن بالنسبة لنا أحمد ما كان يحتاج يثبت نفسه لأن شخصيته كانت تفرض نفسها بنفسها ، رغم إنه مو إجتماعي لذيك الدرجة لكنه كان عنده أوصاف تخلي الناس تحترمه أو تحبه ..
أحمد كان من النوع اللي إذا كلمته مرة وحدة أو صار لك موقف معاه مستحيل تنساه ..
و لأحمد ملامح حلوة تشدك غصب تتأمل في وجهه ، و صوته عذب و كلامه عذب يدخل على قلبك من دون ما يستأذن ..
قاعدة أوصف أحمد و جروحي تزيد أحاول أهون فراقه لكن هذا شي فوق استطاعتي ..
أنا لازم أمنعه من إنه يسافر لازم أمنعه ..

ركضت لحجرتي و أخذت الموبايل و اتصلت في أبوي أكيد إنه في العمل ..
ما أن رد حتى قلت بصياح : يبه ..
أبوي ماجد : سديم ..! شفيك ..؟ شو صار ..؟

كان واضح إنه مستغرب إني أكلمه و مستغرب صوتي اللي واضح فيه إني أصيح ..
سديم : يبه أحمد يبي يسافر .. يبه لا تخليه يسافر ، لا تسمح له ..
ماجد : حبيبتي .. ليه ما تبينه يسافر ..؟ هو مو رايح يلعب رايح حق مستقبله ..
سديم قلت بصياح أكثر : بس أنا ما بيه يروح يبه .. ما بيه يروح ..
ماجد : طيب ليه ما تبينه يروح ..؟
سديم و هي تشهق : ما بيه يروح و بس ..
ماجد : حبيبتي ما في شي من غير سبب ..
سكت شوي و بعدين قال : سديم إنت لحالك ، ما في أحد يمك ..

عرفت إنه أبوي ما راح يفيدني ، فسكرت الموبايل من دون ما أرد ..
نزلت تحت و لقيت أمي في المطبخ ، بس لما فكرت فيها شفت إنه ما راح ينفع مدام ابوي موافق أمي ما بيدها شي ..
لمنو أروح ألحين ..!
مدام أبوي و أمي موافقين ، شلون أتصرف عشان أحمد ما يسافر .. !
خطرت لي فكرة خطيرة لو يدرون عني راح يزعلون مني ، لكن أنا لازم أتصرف ، مستحيل أترك أحمد يسافر ..
مثل ما قلت يا أحمد من لي غيركم ..!
و مثل ما نصحتني راح أتمسك فيكم مثل ما تريد و هالمرة ما راح أهرب من الواقع راح أتصرف و أخليك ما تسافر ..

أحمد ماجد (( ولد العمة نورة )) [ ... ] 19 سنة
أبو أحمد (( ماجد )) [ ... ] 46 سنة
.
.

اليوم أنا ماخذ إجازة مثل معظم الموظفين في هذا الوقت من السنة ، بس في ناس لسه يشتغلون مثلًا اليوم أبوي مداوم عكسي أنا اللي أفضل أداوم لما تبدا الجامعة أي بعد ثلاثة أيام ..
بس ما أظن أظل مع خواتي طول الوقت أكيد راح تنزعج مرة أبوي مني ..

ما كان محتاج أصلي الفجر لأني صليتها في وقتها فعلى الفور تسبحت و لبست ملابسي و طلعت من الغرفة و دخلت غرفة ما في أحد يدخلها غيري و و غير الخدامة ( الخدامة من الخدم ، إحنا نسميها كذا ) ..
طقيت الباب مع إني أدري إنها ما راح ترد كالعادة لكني أفضل إني أعلمها بدخولي ..
فتحت الباب و دخلت ، شفتها جالسة على الأرض و ضامة يدينها و رجلينها إلى صدرها و شكلها سراحانة و هي دائمًا تكون سرحانة ..
رحت لها و بست راسها و قلت : صباح الخير يمه ..
ما انتظرت منها رد ، و جلست جنبها على الأرضية الباردة ، قعدت اتأملها .. مسكينة أمي .. صدقوني أقولكم أمي مسكينة ، من يتوقع لأحد هالحياة ..!
عايشة بس محد يسأل عنها لو أنا ما امر عليها كل يوم كان ظلت وحدها و ما في أحد يهتم فيها هالحياة ما أتمناها لا لعدو و لا لصديق ، فما بالكم بأمي جنتي و ناري ..!

قعدت أتأملها أحاول أسوي أي شي لها أحسسها بإهتمامي لكنها حتى ما التفتت لي ظلت تناظر للأمام كأنها سرحانة .. شلون راح تعيشي هيك يمه بس أنا ما أقدر أعملها شي ، كل الدكاترة أكدوا إن ما في علاج راح يشفيها و لو أظل أسافر فيها لأخر الأرض ..
أمي الله يسلمكم لما كان عمري أربع سنين أصابتها صدمة لما جدي و جدتي أصابهم حادث سيارة و ماتوا، و هي ما لها أحد غيرهم لا أخوان و لا أخوات ، فصارت هاذي حالتها من ذاك الوقت و أبوي ما قدر يستحمل فبعد سنة تزوج أم بيان و ليان و غلا ..
فجابت له ذيك عيال أما هاذي ظلت لحالها في حجرتها محد يهتم فيها ..
جلست شوي مع أمي بعدين طلعت من الغرفة ..
رحت على طول لغرفة بيان لأني أدري إنها ما بتمانع أقعدها في مثل هالوقت ..
طقيت الباب بس محد رد أكيد نايمة ، فتحته بشويش و شفتها نايمة فدخلت و سكرت الباب و تقربت من بيان و ربت عليها أقعدها سمعت منها همهمة غير مفهومة و لما ما شفتها قعدت هزيتها بقوة أكبر نطت من مكانها و هي تصرخ : نعم ، شو صار ..؟
قلت لها بهدوء : هذا أنا الوليد ..
بيان و هي تتنهد : إيه الوليد خوفتني ..
الوليد : أسف ما كان قصدي ..
بيان : اووه ما عليه تغيير جو الوليد يقعدني من النوم أحسن من دفاشة غلا ..
الوليد : أحين غلا دفشة ، و أنا شو اللي سويته ..؟
بيان : إنت تعتبر أبو الرقة و النعومة جنب غلا ، هاي تقعد تنطط على السرير و تصرخ ، و ما خفي كان أعظم ..
الوليد : ألحين أنا صرت أبو الرقة و النعومة ، المرة الجاية راح أجيب لج غلا الدفشة تقعدش عشان لا تقولين عني هالكلام مرة ثانية ..
بيان : لا لا الوليد أنا قصدي بالنسبة لتصرفات غلا مو شي ثاني ، و بعد أنا ما ني مصدقة إنك جيت قعدت معي في حجرتي تقول تجيب لي غلا ..

اسعدني كلامها الصراحة مع إنه كان بسيط فقلت : إنت بس قولي و أنا أجي لش على طول ..
تنهدت بيان و قالت : شان زين ..
سكت ما قلت شي أما هي قالت بعد فترة : الوليد ممكن أسألك سؤال بس ما تنزعج مني ..
الوليد : إيه أكيد ..
بيان : إنت ما تنزعج من أمي أعني إنها ما تحبك أو أقول في الأساس هي مو متقبلتك ، صحيح إنها ما تعمل شي لك بس هذا في نفس الوقت شيء يضايق ..
الوليد : لا ، لأن ..
قاطعتني : بس الوليد هذا ما كان يوم واحد بس أنت كبرت لحالك و أمي ما ربتك أو عطتك الحنان اللي تحتاجه ، و أمك ..
سكتت شوي بعدين قالت : إنت أدرى بحالها .. أما أبوي منشغل بشغله و ما يدري كيف عايشين ..
قلت لها و أنا متجاهل تعليقها عن أمي : مثل ما قلتِ هذا مو يوم أنا عشت عمري كله بهالطريقة و تعودت ع هالحال و ما تفرق معي ، و بصراحة أنا أمك ما أكرهها أحسها إنسانة طيبة بس خايفة مني و خايفة إني أخليكم تكرهوها ..
بيان : اسفة الوليد مو قصدي أزعجك بس هذا الموضوع دائمًا يتردد في بالي مع إنك أخوي و عايش معنا إلا إني عمري ما تجرأت أسألك هالسؤال ..
الوليد : ليش يعني ..؟
بيان : الوليد إذا إنت ما تحكي معنا في مثل هالأمور شلون تبغانا نسألك .. ؟ شلون ..؟
الوليد : أدري يا بيان أدري بس إن بعدك صغيرة تحتاجين أحد تشكين له أما أنا أكبر منك و ..
قاطعتني و هي تصرخ : بس انا عندي امي أما إنت أمك ..

سكتت بيان فجأة ، أما أنا خطرت في عقلي آلاف الكلمات اللي كان ممكن تقولها لولا ما مسكت نفسها ..
قلت لها بهدوء مخيف و الشرار يتطاير من عيني : مهما يكون يا بيان هذي أمي و ما أسمحلك تهينينها ، حتى لو تكون مجنونة أو مختلة فهي تظل أمي يا بيان و أنا سمحت لكم تتجاهلونها عشان تاخذ راحتها و لأن هي تبغى كذا لكن إنها تنهان أنا ما أسمح لكم ..

طلعت من الغرفة ، و صفقت الباب وراي و طلعت من البيت بأسرع ما يمكن ..
دون ما أهتم لبيان المصدومة المتأكد أنها تبكي نادمة و حزينة ..

أم الوليد (( هناء )) [ ... ] 44 سنة
.
.