المنتدى :
القصص القصيرة من وحي قلم الأعضاء , قصص من وحي قلم الأعضاء
&&((قصة من جميلات..ولكن))&& حقيقيه
&&(( قصة من روايتي جميلات.. ولكن ))&&
منتدى ليلاس الثقافي
هذي القصه قالتها لي أخت العريس منذ سنوات
ولا زالت عالقه بذاكرتي لغرابتها...
يعني هذي القصه حقيقيه مو من تأليفي أوخيالي>>
**(( قرر أخوي المدرس سالم أن يتزوج و أخترنا له ثلاث من العائله
وعشان يتصالح أبوي وعمي اللي متقاطعين بسبب خلافات قديمه
اختار بنت عمي ملاك واللي كانت خطوطها حلوه وجسمها أحلى بالنسبه
لأجسامنا الضخمه من عرض أكتافنا وطولنا تدرس بآخر سنه بالثانوية
مع اصغر خواتي (مريم)عايشه مع عمي بس, لأن عمي مطلق أمها
و ما كنا نشوفها إلا نادرا بيت عمتي وبعد خطوبتهم العائليه بيومين
اتصلت ملاك وطلبت تكلم أخوي وكان هذا شي مفاجأ لنا و لأخوي
و خطوة جريئه منها حتى هو أنحرج منا فكلمها بسرعه وطلع
وكان الواجب أنها تنتظر حتى هو يتصل أول لأن في بعائلتنا شباب
ما يشوفون خطيبتهم إلا بليلة العرس أو مرة وحده بس قبل الزواج
و إذا رضا لهم أبوها يكلمها
وأخوي ما يؤيد المكالمات ولا الطلعات قبل الزواج ومع ذلك طلع معها
مرتين أو ثلاث لأن أبوها ما يخليها تزور أحد فما تطلع إلا للمدرسه,
وبأسرع وقت جهز أخوي شقته اللي بالطابق الثاني ببيت أهلي
وصرف عليها آلاف حتى تكون من أفضل ما يكون...
وصارت ليلة الزواج و حضرت أمها وكانت سعيده لبنتها وزفتها معنا
لشقتها ووصت أخوي عليها و في اليوم الثاني أول ما صحى أخوي
أتصل وطلب أني أصعد مع أختي الثانيه المتزوجه وكان صوته مختلف
وصعدنا وهناك قال لنا شي تعجبنا منه..!!وما كنا حاسبين له حساب..!!
&&&&&&&&&&&&&&
**البــــــــ 7 ـارت**
قال لنا أخوي:
أن عروسته ما عندها ملابس غير فستانهــا الأبيض وعباتهـا
قلت:{شلون..؟؟ والمهر اللي دفعته لأبوها}
( ما أدري.... شكله خذه كله وما عطاها شي منه لأن الفستان الأبيض هديه من أمها...)
[و ليش ما قالت لك قبل ؟؟]
( ما أدري ..)
{ طيب على الأقل كان جابت ملابسها اللي تلبسها }
( هالكلام مو وقته و البنت سألتها وما ردت علي و أنا ما أبي أحرجها
ولا أبيكم تحرجونها... وهذي 5آلاف روحوا أشتروا لها ثياب و إذا أبوها
ستكثر عليها الملابس فأنا مو عجزان اكسيها...)
[ أي بس حنا لازم نجلسها الساعة أربع العصر <<عادة قديمة
عندنا وأكثرهم تركوها الحين>> يعني متى نروح نشتري لها ملابس؟؟]
قال أخوي بضيق:
(تصرفي أو أجليها لليل..)
[ المشكله ملابسي وملابس أختي أم أيمن واسعه كثير عليها]
{ما في إلا نلبسها من ملابس مريوم}
و أخذنا أفخم فستان لأختي مريم و الذهب الحمدلله أن خوي كان مختار
طقم ذهب هديه للصباحية عروسه
المهم جلسناها وفي الليل رحنا السوق رغم تعبنا...
و مرت الأيام ومضت شهور وتغير أخوي وكنت حاسه أنه مو مرتاح بس هو
ما يبين لنا هالشي وحملت أنا وحملت زوجته بس ما حسيت أنه فرحان
و زارني يوم في بيتي و ألحيت عليه اشتكى لي من اهمال زوجته ملاك
و أنها من تزوجها وهي تقول
((أنا زوجتك بس مو شغاله عندك و إذا تبي أكل جاهز
ومكان نظيف وثياب مغسوله جيب شغاله تخدمك))
(هذا غير طلباتها اللي ما تخلص كأن همها تصرف كل ريال بجيبي
و أن قصرت بكل جرأة تطلب من أبوي...
و أنا كل هالشهور ما خليت طريقه أحاول معها حتى تنصلح و تتعدل
ألا و سويتها بالأول قلت يمكن لا شافتني أنظف و أرتب و أغسل تستحي
أو تحس و قعدت شهر بس بدون فايده و قلت يمكن لا خليت المكان
بدون تنظيف تسوي وتفعل وخاس المكان و الريحة طلعت من الأكل المعفن
وهي مثل ما هي تاكل وتابع التلفاز و تنام و بيوم عصبت
و ضربتها سوت لي فضيحه وانزلت لبوي تحتمي فيه و عصب علي
و خانقني و عشان أهديه لا يرتفع ضغطه حلفت أني ما أضربها...
هالبنت جريئه و راسها يابس وما ينفع معها لا كلام ولا فعل وعمي الله يهديه
مقويها حاولت فيه أن يكلمها أو أني أخليها عنده فتره حتى تحس على دمها
أو تخاف أتركها قالي إذا بنتي غلطت فمحد قالك أو غصبك تتزوجها
و إذا بتجيبها عندي فأنسى أن عندي لك زوجه...وزي ما أنت شايفه
هي مقصره معكم و لا تبي تخالط أحد وتبي كل شي على كيفها...
و تعرفين شقتي اللي أنت جهزتيها معاي صايره كأنها شقة هنود.....
لا ويوم جنيت منها هجرتها و حطيتها بالملحق شهر بالأخير
مرضت وطلعت حامل بعد..
ياليتها ما حملت الكل يهنيني وأنا أعزي نفسي يختي خلاص
أنا يئست منها وكرهتها وناوي أتركها بس صابرعشان اللي جاي وما له ذنب )
منتدى ليلاس الثقافيو كمحاوله أخيره تدخلت أنا و أخوي الكبير حتى ما توصل لطلاق
وقالتها بدون ماتستحي من أخوي (أنا قلت له أنا زوجته بغرفة النوم وبس)
و ثارت أعصابه وقال لها أنه لو مكان أخوي كان طلقها وما استنا لما تولد فزودتها
و رفعت صوتها و أهانتنا...
و سمعها سالم اللي كان تحت فصعد و حاول يهديها و يسكتها ما سكتت
فما تحمل و طلقها ورجعت لأبوها....
بعد كم شهر ولدت وولدت ملاك بعدي بكم يوم و شاف اخوي ولده
مره بالمستشفى وبعدها ما خلوه يشوفه عشان يحرقون قلبه عليه
فما دفع لها نفقه وقام أبوها واشتكى عليه
فكتب تعهد أنه يدفع نفقه إذا ما حرموه من ولده مره كل أسبوع
فكان يجيبه لأمي في وقت البرد وما عليه إلا ثياب خفيفه وتخليه عندنا
باليومين و الثلاثه حتى ترتاح منه ورضعته مع ولدي (محمد)أكثر من مره
لأنه كان يدوخهم و ما يبي حليب صناعي ومن بعدها رفض سالم يتزوج
وحاليا ولده يعيش معه بين
جده وجدته وعماته بعد ما تخلت
عنه أمه ملاك ))**
<< هذه القصة أقتطعتها من روايتي
اللي أكتب فيها حاليا لذلك وضعت
هذا العنوان لأني احترت أي عنوان
أضع لها.....
شخصية ملاك حيرتني و حتى لحظتي هذه لم أعرف السبب في تصرفاتها
الغريبة أو عدائها لمن حولها و لزوجها ولنفسها...
هي دمرت حياتها بيدها دون أن تأسف لذلك.. هي كلما تذكرتها برغم أني
لا أعرفها أجد جملة [جميله...ولــكن] تقترن بأسمها وحينما رأيتها مرة
بمجرد أن عرفت أنها هي ملاك نظرت إليها لأقيس بعيني مقدار جمالها
فلم أجد نقطة جمال أحسبها لها و هذا لأني كرهتها لما فعلت فكيف لعيني
أن ترى جمالها أو بالأصح جمال الوجه و الجسد>>
أخيرا عندي سؤال لقرائي:
س:ماذا تفعل و ماذا ستكون ردة فعلك إذا اكتشفت بليلة الزفاف
أن عروسك ليس لديها ملابس غير فستانها الأبيض..؟؟
و سؤال لقارئاتي العزيزات:
لو أخبرك أخوك بصباحية زواجه
أن عروسه ليس لديها ملابس غير فستانها الأبيض
فهل ستصدقين أم تعتقدين أنه يمزح...؟؟
س:هل لديكم عنوان لهذه القصه..؟؟
**بشوق كبير أنتظر إجاباتكم**
و تقبلوا خالص تحياتي
صمـــــــت
|
08-02-09, 12:25 PM
جديد مواضيع قسم القصص القصيرة من وحي قلم الأعضاء , قصص من وحي قلم الأعضاء
العرض العادي
