بسمة العمر الجريح للكاتبه sama

________________________________________
...@@الجــــزء الثاني@@...



" الوووو دليــل ؟؟؟" >للمعلومية ديما تكلم بنت عمها عبد الله اللي بنتعرف عليها قريب (دلال)..
دلال: لاتكلميني سامعه..
ديما:هههههههه ليييش..
دلال: كذااااااا..
ريما لديما :وش تقول ؟؟؟
ديما بضحكة : زعلاااانه..
ريما:هههههه حطي سبيكر ..
ديما تناظر طلال بنص عين وهو قاعد قريب ومركزعلى جواله :وذااا؟؟..
ريما: موب لمك بعدين ازعاج وقصري على الصوت لاتفضحك امي منيره..
ديما: اوكيه..
قصرت ديما على صوت الجوال وحطت على السبيكر بس اللي مومنتبهين له طلال اللي كان معهم على الخط(رادار)الا لقافه والله..
دلال: ويييييينك يالدبا سااااعه اقول بتدق بتدق ؟؟..
ديما: اماك تقولين لاتكلميني؟؟
دلال : ايه صح ذكرت ..
ديما وريما:هههههههههه..
ريما: هلا دلول ..
دلال : لاتكلموني انتوا الثنتين يالخايسات عنبوكم تواعدوني واقنع ابوي واتورط مع هتلر بعدين ترسل لي > وهي تتهزأ <بتجيي رنا بيت امي منيره وبنـــروح..
ريما: ههههه والله مادرينا الا الصبح وقايله لديموووه وما كلمتك ..
ديما: حطيها فيني..
ريما: احلفي اني ما قلت لك..
دلال: هيييييييييه لاسكرتوا تطاقوا..
ديما: هههههههه اوكي وش سوى فصيل..
دلال: وش ما سوى عطاني محاظرة وهزائني معطله اجتماعاته في البيت الابيض وانا مدري..
ديما:هههههه انتي ماقلتي ان عمي بيجيبك..
ريما:ايه والله..
دلال: هذا اول قلت بروح بدري اقعد مع بنات عمي بس ماااااالت..
ديما:ههه سوري ياقلبوو تعالي بكرة..
دلال:وكالة من دون بواب حبيبتي متى اقتنعت ابوي اني بجيكم بلحالي من دون امي وما فيني توهيقات..
تعالو انتو..
ريما:صعبه بيتكم عياال..
دلال: وانا مامليت عينك ياست ريما..
وطلال ما سك نفسه لايضحك وينكشف ..ريما: ههههه موب قصدي يالخايسة بس صعبه من دون امي وانا ثلاث وانتي وحده..
دلال: اييه علبالي بعد ..
ديما: اقول ماتلاحظون اني عطيتكم وجه رصيدي بيخلص..
دلال: بدييينا..يالله باااي بكرامتي احسن بس فاتكم فلم هندي كنت بجيبه معي ..
ريما:مدري متى بتعقلين..
ديما:يالله بااااي بينا الو اوكي
دلال: اوكي....لحظه تعالوا شلون تكلموني الثنتين حااااااطين سبيكــــــــــــــــر >توها تنتبه الحرمه <
ديما وريما:هههههههههه صباح الخييير..
دلال: هيييين مردوده من عندكم؟؟؟..
ديما: محد ياحبك للهذره يالله مع السلامه
دلال بحزن :يالله اجل سلااااام ..

وطلال ما خذ انطباع اولي عنها ..

نجي لدلال بنت بين اولاد والاحرى ولديين وتعتبر بنات عمها خوات زعلانة لانه خميس وماطلعوا مقررة تروح بيت عمها بس ما الله كتب..وخالتها موب مرره معهم خصوصا بعد سالفة فيصل..

((نبذه عن العائلة عبدالله محمد الاخ الاكبرلخالد ..
هدى زوجته ..ام فيصل
فيصل..الولد البكر لعبد الله 28 سنه عازب عصبي ومتعقد من العرس لحاجة في نفس ايوب <<نعرفها بعدين ..طول وعقل وملح وثقل >هههه معجبه <ورأي يعني مسيطرعلى الوضـــع بزياده(هتلر على قوله دلال)..

بندر 24ونص سنة قممة في الوناسة وساعة الصدر وماخذ الدنيا براااحة الله يستر منها ..الاقرب لسعود قبل سفره يملك من جاذبية امه الكثيير لدرجه انه يدخل القلب من نظره..

دلال ههههههه هذي شي 19 سنة صديقه بنات عمها التوأم وخصوصا ديما >>وافق شن طبقة ..
واخر العنقود طلباتها مجابة ..واللي فراسها بتسويه..مرره طيبه بطول متوسط وجمال غييير وشعر لنص ظهرها محتفظة بلونة الاسود مثل ماهو..))..

ام فيصل: وش يقولون بنات عمك..
دلال: رايحين لبيت جدتهم رنا عندهم..
ام فيصل: ما شاء الله الله يوفقها وش اخبارها؟؟
دلال: بخييير ..يممممممه
ام فيصل :نعم..
دلال: وش عندنا بكره..
ام فيصل: ما ادري والله ودي اروح اسلم على اخويتي بس ما ادري ..
دلال: وش عندك..
ام فيصل: ابوك بالمزرعه وفيصل انتي عارفه لو اموت ما وداني وبنيدر مدري وينه هايت مع اصدقاه..
دلال: الله يهديهم تدرين وش ودي يمه..
ام فيصل تعرف لبنتها:وش ودك الله يستر ..
دلال: ههههه وش دعوه ودي ازوج فصيل وحده من بنات عمي خالد..
ام فيصل: ودي بس انا عارفينه ما ودي اغربل بالبنت..
دلال:ههههه والله انك صادقه مدري وش فيه من تالي..
ام فيصل: الله يهديه وينساها..
دلال: ياربيييييييييييييييييييييييييييه..
ام فيصل:وش فيك؟؟
دلال: اليوم خميييس واللي مايطلع يخييس
ام فيصل: بدييييينا ..


.........


ديما: مااامي البابا بره..
ام سعود:ورى مادق علي..
ديما: عجبه الاسم ودق علــي ..
ام سعود:مااالت يالله قومي اخوك بالمجلس وركبيه..
ديما:طيب الله يصبرني ..
ام سعود:متى بتروحين يالطيفه..
لطيفه: يمكن انوم عند اهلي عبدالله مناوب اليوم..
ام سعود وهي تلبس عبايتها:وانتي رنا؟؟..
طلال:بطلع اسلم عليه..
رنا: هذا زيد يدق بطلع معكم ..وقامت تلبس عبايتها..
لبسوا البنات عباياتهم وطلعوا وركبوا السياره ونزل زيد يسلم على طلال وخاله ابو سعود وتوجه لخالته يوم طلعت من البيت ..

ديما: رييييييم..
ريما:هاااه..
ديما: شوفي زيود كنه سامن؟؟..
ريما: خبله انتي ما درت عنك رنا ..
ديما:هههه والله في العرس ضعيف استلمته اختنا ماشاء الله ..
ريما: ماشاء الله ..
تطل عليهم ريهام من السيت اللي ورى :وش عندكم اسرااار؟؟..
ديما: يس ..
ريهام:صادقه ديما مررررره سامن..ناظروها الثنتين بصدمة وعيونهم بتطلع من البرقع..
ديما: وشلون سمعتي؟؟
ريهام:ههههههه مصدقه انها اسرار ..
ريما:هههههه حلوووه ريهام ..
ديما: لاوالله..
ابوسعود يدخل مع امهم: وش فيهم بناتي..
ديما:يرضيك يابو سعود يتبلون علي..
ابو سعود :افاا مين اللي متبلي ؟؟
ديما:ريهاااااااااام..
ابو سعود:ايه ريهام عاااادي..
ضحك الكل عليها وهي معصبه من تهزيئة ابوها المبطنة>>مبطنه نجـــــوده ههههههه ^_* ..

ريما وديما روح في جسدين (توام للتذكيير) بالرغم من التناقض الكبير الا انك تلاحظ انسجامهم خصوصا في الشكل مررره يشبهون بعض ما يفرق بينها الا اللي يعرفهم مرره مربوعين بالطول وبشره بيضاء صافيه وملامح متشابهه مرره من وسع العين وطول الخشم للفم اللي يشوفهم يقول سبحان الخالق.. اما الشخصيات حدث ولا حرج ريما (الكبيره) هااااديه ورومانسيييييه لدرجه كبيره والكل في نظرها طيب واهم شي الثقل مو من البنات اللي مع الخيل ياشقرى لا..
ديما(الصغيره)_بينهم خمس دقايق _جريييئة وماتحب الهدوء ابد تعتبره كآبه رجه وشي يعني خبله على بلاطة ..ومستحيل يتفقون بيوم الابالشديد القوي ونادرا مايطول اتفاقهم اكبر قضيه للخلاف ان ريما الكبيره وديما الصغيره ..
>قضية الشرق الاوسط عندهم <
..............


بيوم الجمعه الصباح 11 في بيت ابو فيصل ..
ام فيصل وابو فيصل بالصاله ..
ودلال وبندر ناييمين وفيصل نازل من الدرج..
فيصل :السلام عليكم..
:وعليكم السلام ورحمة الله وبركاتة
ابو فيصل: وين اخوك.؟؟
فيصل :مريت عليه وقومته مدري عنه..
ابو فيصل: المسجد بيقيم وهو نايم وموب منه والله مارج الا الفجر ..
ام فيصل توقف:بروح اقومه..
ابو فيصل : هدى..
ام فيصل : سمي ..
ابو فيصل : ترى اخوي خالد عازمنا على الغدا اليووم..
ام فيصل برووعه: اليوووم ورى ما علمتنا ياابو فيصل متى بيمدينا نتجهز..
ابو فيصل ببرود: لييه بتروحون لعرس غدا ترى وراجعين..
ام فيصل تمشي: الله يهديك بس..
ابو فيصل يلتفت لفيصل اللي يزين غترته مدري شماغه (الاحمر) اتوقع شماغ ..
ابو فيصل :حتى انت بتروح سامع..
فيصل :ما اقدر..
ابو فيصل : ليييه ان شاء الله عاجبك حالك اللحين..
فيصل: عاجبني وش فيه؟؟..
ابو فيصل بعصبيه من حال عياله: مشكلتك .بس انا موب عاجبني سامع وبشوفك في بيت عمك..
وطلع من البيت..
فيصل بعصبيه: غصصصصب يعني والله حاله..

"صباح الخيير وش فيك تزاعق"
فيصل يقوم:ولا شي ويتوجه للباب يطلع ويلتفت لبندر : تراك معزوم على الغدا عند عمي..
بندر: صدددق وناااسة من زمان عن اكل خالتي ام سعود ..
فيصل عطاه نظرة وصقع بالباب ..
بندر : استنــــــــــــــى بروح معه سيارتي بارده(حرارتها) ..وطلع يلحقه..
والمحاولات دئوبة لتقويم دلال من النوم عشان العزيمة المفاجئة خصوصا ان الدنيا عطلة ..
:يالله وانا امتس..
دلال: يممممه بليييز بنوم..
ام فيصل : قومي بنروح لبيت عمك خالد..
دلال: نطت من السرير..قولي والله؟؟
ام فيصل :ههههههه تكذبيني يادليل..
دلال: لا والله شلون..
ام فيصل : وشلووون وانا امك بالسياره.
دلال: ههههههههه داريه يمه تنكتين..اقصد شلون نروح وظهر بعد
ام فيصل : عمك عازم ابوك على الغدا امس وما قال الا اليوم..
دلال: يسسسسسس يعني بنروح..
ام فيصل: قومي تسبحي واخلصي وبنروح ان شاء الله
دلال قايمة من السرير :دقايق ..
ام فيصل: شوي وشوي لاتخبطين..


.............




وفي بيت ابو سعودالحال موب احسن من بيت اخوه بس ما عنده اولاد يخاوونه للصلاه سعود وبرى وراكان وصغير على المسجد القى القنبلة على ام سعود انه عازم اخوه على الغدا وراح..
وسارة بتنهبل الظهر اذن وما صلحوا شي راحت المطبخ وقعدت مع الشغاله تزيين وتحوس للغدا لان الوجبة الرئيسية(الرز) من برا >مطعم <..ونست بناتها نايمين..

الساعه وحده دخلت ريهام المطبخ وتشوف الدهره غريبة وش عندهم..
صباح الخيير ..
ام سعود: قولي مسا..
ريهام: اوكي مساء الخيير ..
ام سعود:مسا النور وين خواتتك..
ريهام: نايميين يعني بيقومون اللحين..
ام سعود : يووه نسيت اقومهم للصلاه ..
ريهام:نسيتي يمه ما عليهم..
ام سعود: الثنتييين؟؟..
ريهام:ههههه تؤام..
ام سعود : قوميهم ولو عمانك بيجون يتغدون عندنا ..
ريهام مستغربه: عماني؟؟..
ام سعود: ايه عمك عبد الله .....يالله وش تناظرين قوميهم يساعدونا وخذي الدخون دخني البيت..
ريهام: ان شاء الله..
ام سعود: واخلصوا موب تلزقون لي فوق ما في الا مرة عمكم..
ريهام: ان شاء الله..
ام سعود :ريهام ؟؟..
ترجع:هلا..
:دقي على رنا كانها بتجي مع رجلها
:طيب..

............

فتحت الستارة وولعت النور ..
"ريييييييييم ووجع"
ريهام: مسيكينه ذا الريم..قوموووووووا يالله انا ريهام ..
ريما وديما بغرفه وحده..وريهام وراكان بغرفه وسعود بغرفه والرئيسية لامهم وابوهم وصاله بالوسط هذا الدور الثاني..
:بسرررررررررعه..
ريما: خييير انتي ..
ريهام :عماني بيجون..
ديما: فارقي بسسس اليوم جمعة يالخبله طفي النووور بسرعه..
ريهام :ما الخبلة الا انتي بيجي عمي عبد الله وعياله ابوي عازمهم..
ريما تقعد: صدق والله ؟؟..
ريهام تقعد على طرف التسريحه وتطيح بعض الاطياب:والله وامي متوعده فيكم تقول انزلوا بسرعه..
ريما:هيييييه وخري عن الاطياب توني ماسحتهم..
ريهام:مالت بسرعه قوموا ترى بيجون اللحين وطلعت من الغرفة وخلت الباب مفتوح عشان تقهرهم..
ريما: ديما ديما قومي يالله..
ديما :قايمه ..
ريما: قومي ترى بتجي دلااال اللحين..
ديماتقعد: صادقه..
ريما تقوم : ايه يالله يمدينا ..
ديما تقوم بسرعه وتدخل الحمام وتضحك: سبقتك..
ريما: الحمد الله والشكر ..غسلوا لبسوا عادي تنانير جينز وتي شرتات بس اللون غيير ونزلوا..

........
ريهام :اشوه نزلتوا ديما دقي على رنا تقولها امي تجي للغدا نسيت..
ديما: الله يصبر ديما عليكم..
ريهام :لا والله ما ضفيتي حوسة راكان تحسين ..وريما سفهتهم وراحت لامها بالمطبخ..

"هاااااااااي رنو"
صوت رجولي:مرحبا..
ديما تلعثمت:اسـ..اسفه اخـ...ـوي غلط..ـا نـ غلطانه اخـوي..
زيد:ههههههه لحظه..
رنا: هلا..
ديما: لاهلا ولامرحبا انتي ورجلك روعني توي قايمه..
رنا:ههههههه وش دخل النوم..
ديما: خلينا اخبارك؟؟..
رنا: طيبه غريبه داقه تسألين والظهر بعد ..اعترفي خيتوو..
ديما:مالت موب حب لاتخافين امي تقول تعالي انتي وبعلك على الغدا عازمين عماني..
رنا: صدق كان علمتوني بدري طبخت غداي..
ديما: جيبيه..
رنا: بشوف بس يمكن امر العصر ..
ديما:يالله باااي الماما بتنده علي ..
رنا:هههه ياشين السرج على البقرة ..
ديما :البقرة انتي مع السلامة..
رنا: فمان الله..


"دييييييييييييييييما"
ديما: هلا جيــــت جيــــت يا امــــي جيـــت إليك مشتـــ.. (تغني)
ام سعود : عن الهذرة حطي الفاكهه في صحون ..
ديما: ان شاء الله..

________________________________________
...@@الجــــزء الثالث@@...







وصل عبدالله وعياله الساعه ثنتين تقريباً وكان مسحب فيصل وبندر كل واحد من فنيلته
ويالله وافقوا يجوون معـه >>>حركااات عيالنا الله يهديهم لو أنها استراحه مع العيال قام يطامر !

كل شي كان جاهز الرجال بمجلس الرجال اللي بمدخل بلحاله والحريم بالصاله..
ديما:هلا والله بدلول..
دلال:هلا وغلا شفتي دعائي ؟..
ديما:ادعي لي بالعرس يوم انه نفاذ
دلال:هههههههههه ما طلبتي أنا وياك بيوووم واااحد قولــي آآآميييين
ديما:ولك من بوك لباااااب السمــا ..
دلال:هههههههه من قلب
ديما:ههههههه افا عليك ..

سلمت على الكل وقعدوا سواليف وضحكـ ..

عند الرجال..الجو هادي شوي ابو فيصل واخوه يسولفون وبندر هادي موب العاده بس ما معه احد
وفيصل معصب لانه ما يبي يجي اصلاً..

"وش اخبار الشغل يافيصل"
فيصل: الحمد الله يا عمي ماشين ..
ابو سعود: وانت يا بندر لين اللحين تدرس ؟؟
بندر بابتسامة:ايه والله عم ندفش..
ابو سعود:ههههههه ما كنك طولت ..
ابو فيصل : الا خاااس..
بندر يغير السالفه: متى بيرجع سعود ياعمي له فقده الدب ..
ابوسعود: والله مدري وانا عمك على نهايه الاجازة ولابدايه الدراسه ..
ابوفيصل: شقت به ذا الدراسه وشوله دكتوراه كان استقر فيذا احس له..
ابو سعود:وش نسووي رغبته وما ابي ارده وانا اخوك..
ابو فيصل : الله يوفقه ويهدي اللي عندنا..
بندر:هههههههههه آمين ..


...........




وعلى هالحال لين وقت الغدا الرجال تغدوا بالمقلط وطلعوا لصلاة العصر بعدها
والحريم تغدوا وشالوا البنات الغدا مع الشغاله وطلعوا يصلون ..
رجع ابو فيصل من الصلاه مع اخوه :ونادى بنات اخوه يسلم عليهم قبل لايروح (لأن عياله راحوا طبعا زي منهم جاملوا للحين)
دخلوا ومعهم دلال تسلم على عمها اللي ما شافته..
ديما: حيا الله من جانا ..!
ابوفيصل : الله يحييك ويبقيك
ريما: وش اخبارك عمي؟؟
ابو فيصل : بخييير انتي ديما ؟؟
ريما: ههههههه لا ريما ..
ابو فيصل : الكبيره؟؟
ريما بحيا: اييه
ابو فيصل يناظرهم باعجاب.:ما شاء الله عليم كبروا بناتك يا ابو سعود وكل وحده تقول الزين عندي..
ابوسعود : الله يسلمك لك ان بغيتهم وعندك الخير والبركه ..
ابو فيصل: تسلم..دلال أبــوي نادي امك يالله بنمشي !..
ديما : عمي عبدالله؟
ابو فيصل :هلا يبه ..
ديما: ممكن اطلبك طلب..(مقررين عليه من اول)
ابوفيصل: سمي ..
ديما: سم الله عدوك والتفتت لريما بهمس ساعديني والثانية تصرفي
:ودنا بدلال تقعد عندنا..
ابو فيصل: وامها؟؟..
ريما: شاورنا خالتي تقول قولي لعمكم لاتحولنا على فيصل تكفي..
وحمر وجهها من اللي قالته وش دخل فيصل اللحين وخصوصا عند ابوها وعمها بس متعقده منه من دلال...
ابو فيصل: ههههههههه بتقعد تقعد عشانك والله ياريما ..
ديما:واناااااااا ؟؟
ابوفيصل: انتي الخير والبركة وعشانك أنتــي بعـد !
ديما: تسلم عمووو يالله دليل جتك الموافقه حركتات يمديك على بنات عمك ..
دلال:هههههههه لا والله تشوفيني قاعده مؤدبه أخاف يهوون
ديما:ههههههه ياعيني ع الأدب ..وقــاموا بيطلعـون
أبو فيصل :نادوا ام فيصل نمشي ..
ابو سعود: تونا تعتموا عندنا
ابو فيصل :ماعاد الا خيير والمعزبة تبي اختها..
او سعود:هههههه قل كذا من زمــان ..
ابو فيصل: لنا لقاء قريب إن شــاء الله (وفي نفسه شي قرره اللحين )
أبو سعود :إن شاء الله




.........




والبنات متشققين ما صدقوا ان عمهم وافق لدلال من كلمت ريما..
دلال:والله حركات ريما عندك واسطه عند ابوي..
ريما: اكيييييييد عمي بس والله اتفشلت منه !..
ديما ودلال :ليييييييييه ؟؟؟
ريما خافت تقولهم عن فيصل ويعلقون عليها: لا ولاشي ..
ديما:مالت وش تستحين عمك يالخبله..يالله وش تبون من البقاله؟؟..
دلال:ههههههه بقاله وينك فيه ؟ ..
ديما: وش نسوي الظروف ما في احد يودينا بنده وراحمنا ربي بذا البقاله اللي توصل..
ريما: اسالي امي و ريهام يمكن يبوون شي ..
ديما :طيب ..
دلال:رنا ميب جايه؟؟؟
ريما:مدري والله يمكن عاد رجلها سلطه
دلال:غريبه عاد شكله حبيب
ريما:حبيب بس مو على كيفها بكلش
دلال:ولييه تلقين اللحين رجــال على كيفك أصلا شينه في حقه لازم يصير له كلمته
ريما:أكيد أجل وشوله سموه رجــال بس يعني ما يطلع من البيت كثير
دلال:توهم معااااريس عاد بيمل وبيطلع
ريما:ههههه يمكن ..




............




في شقة رنا اللي ميب بعيده عن بيت اهلها في حدود الحارة قاعده تتقوى مع رجلها..
رنا:تصدق عن اهلي غداء اليوم
زيد: غــــــريبة ما رحتي اليوم ؟..
رنا: هذا جزاي سافهتهم..!
زيد مبتسم:عشاني يعني؟ ..
رنا:ماااالت الشرهه موب عليك على اللي يكلمك >>وتذكرت كلام لطيفه خالتها
رنـا :إيــه عشــانك عشان ميييين أجــل !..
زيد:متاكده انك رنا ؟؟..
رنا:لا خيالها ..
زيد:هههههههههه حلووووه
رنا :في شي يضحك..
زيد: انتي من قصتي شعرك وانت ولو ..!
رنا شالت الريموت لفت عنه بزعل:أحلف بس..
زيد: رنوووو
رنا:..........
زيد:رناااااااا
رنا :..........>>لارد
زيد:رنووووووووووو
رنا:خيير..!
زيد: محليتك القصه..
رنا بنص عين: متاكد انك زيد ؟..
زيد:ههههههه لا خياله ..
رنا: ماتضحك..
زيد:ههههههههه انا بروح الاستراحه تبين اذبك عن خوالي ؟..
رنا : وش اذبك قل اوصلك أحطك ..
زيد:طيب تبين انطلك عند خوالي ؟..
رنا:ههه العربجي عربجي لو غيير اسلوبه..
زيد:ههههههههههه مثل حلووو قل مفعول القصه
رنا:بدينا
زيد وقف:هههههه لا بتروحيين ؟؟
رنا : بدق عليهم عندهم احد رحت ما عندهم عندي غسيل بقعد ..
دق جوال زيد وارتبك استاذن وطلع بسرعه..

استغربت رنا وما خذت في بالها ودقت على اهلها وقالوا عندهم دلال قالت بروح من زمان عنها
وعن هبال اول..



..............




عند البنات ..على المغرب ..
"ما جت البقاله"
ديما:لا جعله المر ما جا..
دلال تستانس مع بنات عمها لانها تكون بسيطة بينهم بعكس بنات خوالها اللي رسميه برسميه..
ريما: دلول وش صااار على فلمك ؟؟..
دلال: فاتكم شيييييييي ..
ريما:هندي عاااد ما يعجبني هواية ديما ..
ديما: ياحبي لهم بسس من البطل؟؟
دلال: ذاااك وش اسمه ما ذكرتيه ..
ديما:لا عاااد ذكرته اي واحد؟؟
دلال: ابو عيون خضر
ديما:اي؟؟؟
دلال: اللي سكر سحابها >>في الفلم..
ديما:ايييييييييييييييييه عرفته
ريما:هههههههههه الحمد عرفتيه بالسحاب
دلال:علامة الجوده حبيبتي..
ريما:والله فاضيين رنا بتجي اللحين..
دلال:والله من زمان عنها ..
ريما:بتجي عشانك..
دلال :ياحبي لها..
دخلت ريهام بسرعه: ديما البقاله عند الباب
ديما: صدق وين راااكانوه
ريما: عند امي ..
ديما:خله يجـي تبين أطـلع له أنــا ..
ريهام:طيييب لاتصاارخين ..



.........



في بيت ابو فيصل الهدوء يعم البيت دلال الصوت اللي فيه في بيت عمها والعيال كالعاده ..
دخل فيصل بعد صلاه العشا ..
فيصل :السلااااااااااام عليكم ورحمة الله وبركاته
:وعليكم السلام..
فيصل: غريبة البيت هدوء وين بنتكم ؟؟..
ام فيصل : ياحبي لها عند عمك..
فيصل: بلحالها ؟؟..
ام فيصل : ايه بتنوم..
فيصل : ليييييه !غريبه يبه وافقت ؟..
ابوفيصل : عند عمها محد غريب وولده مسافر وطالبتها مني ريما وما ارضى اردها وهو يبتسم لولده..
فيصل الله يستر من هالابتسامه:انتى ادرى !وبندر وينه ؟؟..
ابوفيصل: بندر هايت مع اصديقاه مدري متى بيركد ذا الولد
ام فيصل :خله يوسع صـــدره ..
ابو فيصل : ما خربه الا دلعك..
ام فيصل :لا اله الا الله ..
فيصل:يمة ما فيه عشا مييييت من الجوووع ..
ام فيصل:بسم الله عليك الا فيـه كل خير خلني اقولها (الشغاله)..



............



"اشم ريحه خياااانة"

دلال:رنووووووووووو هلا والله
وقامت تسلم عليها وهي مشتاقة لها من تزوجت وهي ما تشوفها الا في المناسبات..
دلال: وش اخبارك من زمان عنك اعرستي وغطستي ؟؟..
رنا:ههههههه وش اسوي جامعه وبيت وجدري واللي تبين ..
دلال:ههههه ياحبي لك..
رنا تناظر خواتها اللي ماتحركوا من اماكنهم عند مبارة ومبين من ديما داخله جوو وريما قاعده تقشم حب
رنـا:ورى ما تقومون تسلمون يا عماتي ؟؟
ديما من دون ما تلتفت:امس عند امي منيره حلى هو >>السلاام ..
رنا:وجع استحي..
دلال:ما عليك منهم مافيهم خير أنـا ما أكفــي ؟
رنا ههههههه تكفين وزود شخبار عمي وخالتي ؟؟..
دلال :بخير والله طيبين..
دخل راكان متحمس :رناااااااااااا ؟؟
رنا:هلا يا بعد اهلي وجـــدانـي هو اللي معبرني بس
راكان:متى جيتي ؟؟
رنا :اللحين..
راكان :وين هذاك..>>هذاك زيد حاقد عليه لانه اخذها من عندهم..
رنا:راااااح بعيد
راكان: أبله سلمى تسلم عليك مرررره
رنا: الله يسلمها ويسلمك ياربي ..وتبوسه..
ديما:دلاااااااااال ؟؟
دلال: هلا
ديما :مافيه احد من اخوانك يجيب الفلم..
رنا :اي فلم ؟؟
دلال:هندي روووعه
رنا :للحين على حركاتكم !
ديما :لين بكرة تحسب العالم اعرسوا معها
رنا :انتي ووجهك بس من زمان عن فلم هندي خبري به بالثانوي..
دلال:مغبره انتي ..
ديما:هااااه فيه أحد يجيبه..؟؟
دلال:والله مدري اشوف بندرودقت عليه وما عطاها وقت اقل من ثانيتين..
دلال: يقول منيب فاضي يتابع مباراتهم في المقهى..
رنا: من الهلال ؟ ما الوم زيد صاجني..
ديما:عاااالمي ياختي وهتلـــر !!
دلال:هههههههه تنكتين فيصل يجيب لي فلم والله لو على موتي..
رنا : ههههههههه منهوو هتلر؟عسـى فيصــل !ههههه مسيكين..
ريما المتأثره:اييي مسكين انتي ما شفتي شي !..
دلال:صادقه..
رنا:والله اول وش حليله حتى معي بس اللي شافه موب سهل >>رنا تدري عن السالفه..
دلال :يمـــــكن !!ادق اجل ؟..
رنا: دقي ما ظنتي يعيي ...بروح عند امي وابوي شوي وطلعت ..
ودلال ماسكة الجوال وتسمي مسبب لها رعب..
ديما لهت مع المباراة وريما عندها متحمسه بس تخفي حماسها:
ريما:حطي سبيكر
دلال:لا والله عشان تضحكين علي ؟
ريما:هههههههه حرام عليك بسمع التهزئ بس..
دلال: لا والله ميب تخر فيها نقب
ريما:هههه اقول انتي وامثالك اللي مدري وش تبي دقي بس ..
دلال:بسم الله دقت وحطت سبيكر....
فيصــل :الووو
دلال :هلا فصولي..
فيصل:فصولي في عينك اصغر عيالك انا ؟>>ناظرت ريما وفي نفسها فاتحة خيير !
دلال: وش اصغرهم الله يهديك انت الخير والبركة..
فيصل: تصدقين ..استغربت تفاعله معهــا وجارته
دلال:وشو ؟؟
فيصل: البيت هدووووء من غيرك متى تعرسين بس ؟..
دلال:مااااالت..
فيصل:نعععععععععم؟؟
دلال: اقول اذا اعرست بعرس ..>>1-1 فاصل ^^
فيصل عصب:وش تبييين ؟؟
دلال خافت : ولاشي..
فيصل :ليييش داقه اجل ؟؟
دلال: هاااه...لا....اييه وريما ماسكة ضحكتها ..
ايه كنت ابيك كانك فاضي يعني تجيب شريط من الصاله بنات عمي ودهم يشوفونه ..
فيصل: ووش الشريط ان شاء الله..
دلال بتردد:....فلم هندي
فيصل:اقول فارقي انتي ووياهم فاضيين..
دلال:مشكووور
فيصل:باااي وسكـر في وجهها
ريما: ياربييه كذا دايم معكم الله يعينك دلال..
دلال:ايه والله من تالي والا اول وش حليله
ريما بفضول:لييييش ؟؟؟
دلال :هاااه لا بس مدري والله !..



"قوووووووووووووووول"


نطوا:وجع روعتينا..

>>كانت ديما متحمسة مع المبـــاراة ^_^..




...........




وعند بيت ابو فيصل فاتح مرته بالموضوع:وش قولك ؟؟..
ام فيصل:والله مدري بنات خالد والنعم فيهم بس ان عارف راي ولدك !..
ابو فيصل :لين متى بنطاوعه السنين تمر ولازم ينسى..
ام فيصل :الشور له ولك انا ما لي كلمة..
ابو فيصل :اذا موب برضااه يصيـــر غصب عنــــه ..

________________________________________
...@@الجــــزء الرابــــع@@...


الساعة 12 والبنات مجتمعين ومستانسين على اللمة الحلوه..

ديما: متى بيجي رجلك؟؟ ..
رنا: مدري بكيفة اتوقع انه في الاستراحة لييه؟؟
ديما:مستغربه طولتي ؟؟
رنا:خلني استانس..
دلال:ايه والله وش حارق رزك ..
ورن جوال رنا بمسج توقعته زيد >>جبنا سيرة الاط قانا ينط..
قرت المسج وابتسمت بفرح :بنات اسمعوا..


ألا ليت الزمن يرجع ورى واللياللي تدور
ويرجع وقتنا الأول وننعم في بساطتنا
زمان أول احس انه زمان فيه صدق شعور
نحب ونخلص النية وتجمعنا محبتنا
زمان مافية غيبة ولاحتى كلال زور
ياليته بس يرجع ونسترجع طفولتنا
صغار وقلوبنا بيضا تعيش بعالم محصور
ولانعرف ابد اغراب ماغير عيال حارتنا
صحيح صغار بالتفكير لكن ماعلينا قصور
نخطط نكسر اللعبة وتسعدنا شقاوتنا
نروح المدرسة بدري ونضحك داخل الطابور
نحاول نزعج العالم بروحتنا وجيتنا
وعشان نأخر الحصة نخبي علبة الطبشور
نشاغب بس في الاخر تميزنا برائتنا
نحب الضحك والبهجة نحب ننط فوق السور
نفرفش ليه مانفرفش مدام الضحك عادتنا



ولكن!!





دارت الايام وبان الخافي والمستور
وصار الهم متعلق على قمة سعادتنا
كبرنا وصارت الدنيا تصف احزاننا بالدور
وتهدينا الالم والهم غصب عن عين رغبتنا
تعبا من بلاوينا احد ضايق واحد مقهور
وكلن غارق بهمه وبالاخر

""تشتتنا""


دلال: رووووووووووعه..
ريما: هذي لفيصل اليامي على ماأتوقــع !..
رنا متاثرة: إلا له ..
ديما: من ميييين؟؟
دلال:ياشين اللقافه..
ديما:درجيها..
ريما: من مها صح؟؟
رنا بابتسامه:وش دراك .. ؟؟؟
ريما : اممم توقعت بس ..
رنا : ياحبي لها من زمان عنها خلني بدق عليها..




............




...... :الوووو
رنا:هلا بالطش والرش والبيض المفقش..
مها بفرحة:هلاااااا والله غلااااااا ،السلام عليكم..
رنا: وعليكم السلام ورحمة الله وبركاته..وش أخبارك يالغـلا ؟؟
مها:عايشه ..
رنا: وش ذا الرساله اللي تضيق الصدر سلامتك من الهم والله ..
مها:ههههههه الله يسلمك الهم متعلق على قمة سعادتنا ..!
رنا:مأثره فيك القصيده بقوووه ههههه
مها:هههههههه ملاحظه أنتي ههه وش أخبارك أنتي وزوجك ؟؟ عساك مرتاحه..
رنا:الحمد الله نزقح عقبالك خيتوو..
مها:لااا انا توني صغيره..
رنا:برسلك ديما تعطيك محاظرة عن العرس ..
مها ههههههه ياحبي لكم وش أخبارهم ؟؟
رنا:طيبين الله يسلمك أنا عندهم ودلال بعد عندنا بنت عمي عبدالله قد قلت لك عنها..
مها:ايييييه أخت فيصل ؟؟
رنا:هههههه هذا اللي تذكرينه..
مها:وش أسوي قصته مؤثرة !
رنا:الله يعين على ذا الدنيا وراك ماعد تدقين ولا شي ..
مها: ياختي أنتي متزوجه أستحي أدق ورجلك فيه !
رنا: أفآآآ يا مهيووو ما توقعت هالحكي بينا دقي بس وماعليك منه ..
مها: هههههه إن شاء الله هااا وعد منـي ..
رنا: نشووف , مشاريعكم بتسافرون ولا لا ؟؟ وإلا بحــر الرياض ؟..
مها تتنهد:والله مدري طفشت من السفر بس أتوقع نسافـر عشان حمد يغير جو..
رنا:روحي ووسعي صدرك وأنسي الهم توك ريضـه لاعرستي وش بتقولين أجــل؟؟
مها: هههههههه لاحقة خيير ..
رنا: يالله أجل ما أطول عليك جا زيد ياحبه يخرب أيااام الصبــا ..
مها:ههههه أوكـي فمان الله يا قلبووو ولاتقطعين ترى مالي غيرك..
رنا: موب أنا اللي أقطع مهي !..
مها : الله يسلمك يالله بااي ..
رنا : باايووو..

ديما: بسررررعه أزعجنا أهلي نايمين حشـــى ولا جرس إنذااار ترى فيه أختراع اسمه عبايات...!
دلال: هههههه مشتااق لها ياختي
رنا تلبس نقابها : مررررره
ديما: طيب يالله أخلصي وطسي !
دلال:باايووو رنا تعالي بكرره أوكي..
رنا:جازت لكم القعدة أنا معرســه وعندي رجل..
دلال:أوكي فارقي ..
رنا:ههههههه ماعندها وقت الأخت ..
دلال:هههههه لا للأسـف وقتي ثمين ..



.............




مها(مها ناصر حمد الـ ....
ناصر (ابو حمد)رجل الاعمال المعروف والرجل المكافح يملك من الثروة الكثييير وينعكس هالشي على حياته اللي مختلفة عن حياة الاسرة الاولى 180 درجة من القصر اللي ساكنة للسيارة
اللي راكبها ..
شيخه(ام مها)..معلمة و ام مها الابنة الوحيدة لها ومع ذلك مهملتها وحمد ابن زوجها من زوجتة المتوفية واللي يشوفها يقول امه..>>شكلاً طبعــاً المضموون يختلف ميه بالميه ..
حمد 25سنة شاب متخلف عقليا موب جنون لا ضمور في خلايا المخ اصبحت عاجزة عن النمو فهو شاب عمره25سنة انسان في منتهى الوسامة والجمال لايملك من العقل الا عقل طفل ب 7-8 سنوات..واكثر وحده قريبة له مها..
مها الاخت الوحيدة له 22 سنة صديقة رنا الروح بالروح من أيااام المتوسط والثانوي والجامعه متواضعة لدرجة فضيعة
وشخصيتها جنان طفله في جسد أنثـــى وفي أروع من هالشي !
بنتعرف عليها أكثررر في الأجزاء الجايه ..




.............





ديما: دلول وش قال اخوك ؟؟..
ريما:وش ما قال !..
ديما:ووش دراك أنتــي ؟..
ريما:كلمته عندي على السبيكر..
ديما:لاااااااااه ليه ما علمتوني..
دلال:من الوناسه نعلمك..
ديما:ولو ولد عمي تدرين ما اعرف شكله لاهو ولا بندر خبري بهم وإنـا بزران احتى اصواتهم ما اعرفها..
دلال:موب لاااازم..
ديما:ههههههههه منقهره..
دلال:والله يقهرون صدق احمدو ربكم ان سعود مسافر..
ريما:مرده بيرجع..
ديما:بس سعوود غيير على الأقل طلع برى تغيرت شخصيته شووي ..
ريما: يمكن !!
دلال بحزن:على الاقل انتوا خوات يعني ما تطفشون..
ريما:وانا بحسبه خواتك بدل الوحده عندك اربع..
دلال:ياحبي لكلامك ياريما كلامك شيييي..
ريما:هههههه انتي اللي شي !..
ديما:هااااه وش صار على الفلم ؟؟ ناظروا بعضهم ريما ودلال وضحكوا..
:ههههههههههههههههههههه
ديما:خيير قايله نكته..
دلال:لا بس لو تنطيــن ماجــــابه نووو وووي
ديما: وبندر خلصت المباره ..؟
دلال: اقول هجدينا تبينه تعااي بيتنا خلونا نستانس تراني مثل ما يقولون زورونا بالسنه مره
ديما:ههههههههههه حلوووه الله يعافيك تعــالي مرره ثاانيه ..
دلال:ههههههه أفكـــر
ديما:ههههه الحمد الله والشكــر



...........



وعدت الليله على خييير ومايندرى بكره وش مخبى للكل او وش راح يصير..



الصبح اليوم يوم سبت والاغلب دواماتهم ما انتهت بذا الوقت خصوصا البنوك (يشتغل ببنك)يعني عنده دوام ..
فيصل قايم بدري سبح ولبس ونزل تحت..والبيت هادي خصوصا ان مافيه بزران الصغيــره دلال وببيت عمها..

طلع وارتاح انه ما قابل ابووه لأنــه متاكد انه بيفاتحه بنفس الموضوع ..

قام ابو فيصل ونزل وما لقى فيصل ولاسيارته يعني سوها وطلع قبل ما يقومون وعصب عليه يدري فيه قاصدها..
أبو فيصل :مدري متى بيعقل الطول طول نخله والعقل عقل سخله..
ام فيصل:ياكافي وش فيك عبد الله من الصبح؟؟
ابو فيصل:وش فيني غيير عيالك الله لا يعافيهم..
ام فيصل: هووو لاتدعي عليهم منتب صاحي..
ابو فيصل:استغفرالله ..
ام فيصل:لا اله الا الله..
دخل بندر رايق مايدري وش اللي منتظره..:السلام عليكم ماي لايف..
ام فيصل:وعليكم السلام >>لاحظ ان ابوه ما رد عليه..
راح له وحب راسه:صبحك الله بالخيير يا أبو فيصــل ..
سفهه ابوه وقعد يقرى الجريده..
بنفسه:شارب شطة اليـوم (معصب او حااار)..!
ام فيصل :غريبه وش عندك من الصبح قايم ..
بندر :بروح الجامعه بشوف المواد اللي تصلح صيفي ..
شب فيه ابوه:وانت ما تقولي متى بتخلص من ذا الجامعه عنبوك خست فيها 5 سنين وش تحتري حتى المكافاة قطعوها عنك اللي اصغر منك توظفوا واعرسوا وانت مكانك حطـي تلقاااني يابعد جداني ؟..
بندر>هذا انا رحت فيها رفع راسة بابتسامه :هالسنه ان شاء الله..
ابو فيصل: هذا كلامك كل سنه هالسنه هالسنه ومانشوف شي
بندر:وش اسوي يبه احب أأكد على المادة ^^..
ابوفيصل بحزن على حال عياله:ولك وجه تمزح !..
راح وحب راس ابوه:السموحه يبه بس وعد هالصيف وان ما قدرت الترم الاول بالكثير..
ابو فيصل:نشوف ..
بندر:يالله طالع تامرون على شي؟؟..
ام فيصل: سلامتك يابعدي ..
بندر :تسلمين لي والله وطلع..
ابوفيصل:ما خربهم الا دلعك..
ام فيصل:حطها فيني ضايق طلع حرتك في عيالك انا مالي دخل..خلته وراحت تخلص شغلها..
مسك التليفون ودق على فيصل
فيصل:هلا
أبو فيصل :وينك فيه؟؟
فيصل: بالشغل لييه صاير شي؟..
ابوفيصل: متى بترجع ؟؟
فيصل: مدري على الخمس يمكن ..
ابو فيصل:مر اختك وتعال البيت ابيك ضروري..
فيصل الله يستر:خير ان شاء الله..
سكر السماعة في وجهه فيصل يناظر الجوال الله يعيني عليــه شكله معصب..



.............




وعند البنات مايدرون وش السالفه ماناموا الا وجه الصبح ومافيه امل يقومون الا اخر العصر بغض النظر عن اوقات الصلاه..
مر الوقت بسرررعه واذن العصر قامت ريما على صوت الاذان وهذا موعد قومتها في العطله لو سهرت للظهر ..
قامت وغسلت وغيرت جلابيتها وتوها بتنزل الا صوت جوااال مزعج ضحكت اكييد دلول راحت لقته جنب شنطتها اللي على الارض جنبها..لانها اصرت تنام على الارض لانها ما تحب تضايقهم وفرشوا لها..
قربت وناظرت وضحكت ههههه خبله دليل (هتــــلر) اكيد فيصل ..حطته على الصامت لان النغمة مزعجه
(تدل على المتصل)في نفسها..وتوها بتطلع الا يرن مرره ثانييه ..ياربي وش اسوي شكله مصر ..ناظرت دلال..شكلها يرحم اكييد مانامت الا الصبح لا مع ديما عزى الله نامت..وجفلت>>على قولة الامارتيين لما اهتز الجوال بيدها للمره الثالثه..
مالي الا ارد :ويننننك لي ساعة ادق عليك ؟؟..>>فيصل معصب وريما خافت ماتدري وش تقول..
فيصل: الوووووووووووو
ريما:.......
فيصل:الووووووو وصمخ..
ريما:الو
فيصل استغرب الصوت دلال رجه وهذا هادي..:دلال ؟
ريما:لا انا ريما و...وو و ..... دلال نايمه...تبيني اقومها..
فيصل ببرود:ايه قولي لها بمرها الساعه 5 خليها تكون جاهزة يالله بااي..
وسكر الخط في وجهها وريما في داخلها منقهرة منه مااااالت على وجهك سلم على الاقل
قل آسف جعلك مانيب قايله..الله يعينك عليه يادلال..


قومت دلال وقالت لها فيصل بيمرك 5 ونزلت لامها


ريما:صباح الخيير..
ام سعود :اي صباح..
ريما: اوف اوف خالي طلال عندنا..
طلال :بشحمة ولحمه ..
ريما سلمت على خالها وقعدت معهم تتقهوى ..ونست دلال..
ساره :مدري متى بتعدلون نومكم؟؟
ريما: هههههههه تونا العطله باديه ما امدانا يمه..
ام سعود:هـــذي ريهام ماتغير نومها ولاشي..
ريما:ريهام غيير ..
طلال :تتقهوين على فكة الريق منتيب صاحيه ؟
ريما:عااادي رجيم..
طلال:والله انكم يابنات أختي تحفه..
ريما:ورى ماجبت أمي منيره معك ؟..
طلال: أمي مسيره على الجيران عنـد أم صويلح اليــوم..
ريما:هههههههه دوريتهم؟..
طلال: ايه هههههههههه
ريما :مادرت ديما تبــي تروح..
طلال:ليييييه؟؟
ريما:تبحث عن الرزق الحلال على قولتها >>المعرس يعني..
طلال:هههههههههههه رهييييييبه
أم سعود بانتباه : تبحث عن وشو؟؟
ريما بخوف : ولا شي أمزح..!
طلال يغمز: أعلــــــــــــــــــــم !!..
ريما قايمه:علم منيب خايفه من يبغى غدى معي..؟؟
ام سعود:جيبي لخالك ماتغدى..
ريما: ان شاء الله..
طلال:ههههههههه سبحان الله..
ساره :شفيك؟؟؟
طلال: مع أنهم توأم إلا أنهم مختلفات حتى في الشخصيات وحده جراااائه والثانيه حياااااااا..
ام سعود: الله يصبرني على مابلاني..
طلال بجدية:احمدي ربك ياساره بناتك بالدنيا خلق وأدب وحشمه لو تشوفين بنات هالوقت
يشيب رأسك..
ام سعود مستغربه: وأنت وش دراك عن بنات هالوقت ؟؟؟
طلال:الله يهديك بنات اختي من يعني !..
ريهام:لا يالذكي قصدها وش عرفك في بنات الناس !..
طلال:هااااه ...؟؟ من الناس من وين يعني دايم تفكيركم غلط ..!
ريهام: آآه غلط !
طلال: هيييه أحترمي نفسك يا ..........
خزته ريهام بعين ..
قال بأدب : غلطه مطبعيه !!!

جابت ريما الغدا وقعد مع خالها تسولف وتناقش يعتبرونه زي الأخو وأكثر يمكن صديق أقرب معنى خصوصاً في غياب سعود هو اللي أخـذ مكــانه و ماكان يقصر عليهم أبد ..

فجأة نزلت دلال وعبايتها معفوسه>>متغطيه طبعاً>>طايره من الدرج >>الدرج موب في نص الصاله يعني وهي نازله ماتشوف اللي بالصاله الجانبيه اللي قاعدين فيها ولايشوفونها على اخر درجتين طرببببببببببببق طرااااااااااااااااااخ
خبطت على وجهها نطت ريما من قووه الضربه ووقف طلال بس ما راح يدري أن بنت عمهم عندهم ولحقتها ساره..
دلال شوي وتصيح وتحاول تقوم:هئ هئ آآآآآآآآآآي توجع..
ريما:بسم الله عليك وشلون طحتي ؟
دلال:مدري مستعجله وتعكرفت في عبايتي الله ياخذها..
ام سعود:لاتقومين واأا أمك يمكن كسر !
دلال :لاما يوجعني مرره عاد..
ام سعود :ولو اصبري أشوف ..
دلال:فيصل برى وبيعصب !
ام سعود:ريما قولي لطلال يدخله..
ريما:ان شاء الله..
نزلت ديما بكشتها وبجامتها وشافت شكل دلال وماتت من الضحك:هههههههههههههههه
ههههههههههههه وش فيكـ؟؟..
دلال: أضحكي ايه أضحكي يالخايسه..
ديما:ههههه جد دلول هههههههههه شوفي شكلك كنك من طرارات مكه ههههههههه
دلال: الطراره أنتي ووجهك وفصخت نقابها ووقفت بصعوبه احححح..
ام سعود: توجعك ؟؟..
دلال:شــــوي..
ديما بعربجه :سلامات سلااااااامات ما تشوفين شــر ..
دلال:وش عقبه بس الله يسلمك..!
ديما:هههههه وشلون طحتي صراحه فاتني ؟
ريما :والله أنك فاضيه ..

جاهم صوت طلال من عند الباب ودلال انعفست تتغطا >>ريمااااا
ريما:هلا ..؟
طلال:ترى فيصل يستنى أخته برى عيي يدخل..
ريما"تعلمني أعرفه بثر " :طيب..دلال فيصل يقول خلها تطلع ..
دلال :داريه..يالله مع السلامه..
طلعت وقابلت طلال في الحوش وصد يوم شافها طلعت وهي تسحب رجلها وتعرج رحمها
شكلها ينرحم ماتدري تغطي عيونها ولا تزين عبايتها على رأسها ولاتجر رجلها
وإلا وش تسوي >>حــالتها حاااله <<طلعت وسكره الباب..!




.............



/




...@@البارت الخامس@@...




أنا مـــــــا طـــحت من بعــــدك
انــــا بــــنت تــــهز رجـــــــال
تضـــــن بغيبــــــتك بــــــــبكي
ابضــــــحــك ماتبــــــــــــكيني

>>هههههه مدري جت ببالي كذا مع الطيحه تناسب ههههه >بتكفخني دلال


ركبت السياره وهي تسحب رجلها..
فيصل :سنه على ماتطلعين ..!
دلال:كنت طالعه بس خبطت على الدرج ووجعتني رجلي :( ..
فيصل:رباااشه والله
دلال:مادريت..!
فيصل:وش نومك عندهم ؟؟
دلال:وش فيك قايله لابوي بعدين ريما طالبته..
فيصل ازعجونا وش السالفه:احسسن البيت امس شي صراحــه نااااايس..
دلال تتنهد:الله يعين مرته .
فيصل:هااه ..!
دلال:أبد رجلي توجعني والله..
التفت لها:تبين تروحين المستشفى؟؟
استغربت وردت:لا بتخف تقول خالتي موب كسر..
فيصل:ووش دريها خالتـي تبين نمـر مريت موب ضارك..
دلال:لا الله يسلمك ما أبي أعطلك
فيصل :بسلامتك ..



..........




في احد ارقى احياء الرياض وفي ذاكـ القصر بالتحديد اللي يشوفه يحسد ساكنينه على النعمه اللي هم فيها >بس ما يدري
وش داخــله مها في غرفتها من بعد الغدا قاعده على النت في منتداها المفضل لانه تحبـه وترتاح فيه لأنـه(مخصص للنساء)
مع ان النت مافيه امان بس بكفي الحلف اللي عند التسجيل انك بنت..!

سمعت طق على الباب استغربت من اللي جاااي غرفتها..
مها :ميييين ؟ ما أبــي غــدى شبعانه ثاانكس ريتا ..
:انا حمد..
مها:هههه >>والله اني خبله على كيفي تلقاهم تغدوا اللحين <<ادخل حبيبي الباب مفتوح..
حمد:السلام عليكم
مها :وعليكم الســلام والرحمه ياهلا والله حمد عندي في غرفتي تو ما انورت والله..
حمد:ههههههه استحي..
مها:ههههههه عادي و انا اختك..
قرب منها وهي تشتغل على النت >>طبعا قلت لكم سابقاً مرضه شاب في 25 تفكيره مايتجاوز8 إلى10 سنين ..
حمد :وش تسووين ؟؟!
مها:اشتغل وش أسوي يعني ألعب كيرم !..
حمد:تكذبين قاعدة تلعبين!..
مها: هههههههه لا والله اشتغل ..
حمد:شلون ؟؟؟..
مها:في الانترنت..
حمد:ابي اشتغل زيك..
مها تركت اللي بيدها والتفتت لحمد :صعب حمودي عليك ماتعرف له وغريبه جاي عندي اشتقت لي..
حمد:لا بس طفشان وامي طلعت من العصر مدري وش اسوي ؟..
مها:اقعد عند التلفزيون..
حمد:طفــش كل الافلام كرتون قديمه..
مها:للحيين افلام كرتوووون ماغيرت ..
حمد:لا ليييش ؟؟..
مها:ولاشي طيب ليه مارحت للنادي ؟..
حمد بحزن:ما ابي زهقت منـه ..
مها :ليييش موب اول مستانس؟؟
حمد:الا بس كل اللي هناك يضحكون علي ..
حز بخاطر مها:ولييش يضحكون عليك انت احسن منهم كلهم
حمد بعتـب يملى هالكون :يقولون مخفــه !..
مها: ما المخاف الا هم ..
حمد:مها أنـا مخفه ؟؟
مها:لا لا تقوول كـذا قلت لك أنت أحسن منهم كلهم .
حمد:مها اقعدي معي والله طفشت..
مها:وش رايك تدخل دوره تتعلم على الكمبيوتر والنت ؟..
حمد:وشلووون يعنــي دوره ؟..
مها:يعني زي الدراسه مع اولاد يدرسونك كل شي في الكمبيوتر إذا ودك تتعلمه ..
حمد:ما ابي مع احد ابي بلحالي..
مها:اوكي فيه بلحالك عااادي ..
حمد:طيب وين فيــه ؟؟
مها:قل لابوي وبيسجلك..
حمد:ابوي بيقول مشغول زي كل يوم..
مها: خلاص انا بكلمهم وبسجلك..
حمد: والله ؟
مها:والله قرب التليفوون ..
قام وباس مها على خدها :احبك مها وراح يجيبه
مها والعبره خانقتها:وانا أكثـــر..
حمد:خذي تبين شــي بعد ؟
مها:لا خلاص
حمد :انا بروح برى باااي >>طلع والفرحه موب سايعته ..
مها: بااي ...ونزلت دمعتها يوم طلع الله يشفيك ويعافيك مع انه انسان شبه طبيعي الا إن تفكيره المحدود بعمر معيين
الحمد الله على كل حااال وصدقونـي موب عيب بس ماعندك أحـد يفهم ..
سكرت النت معد لها نفس دقت على الاستعلامات واخذت رقم معهد نيوهورايزن ودقت عليهم وسجلت حمد
وفهمتهم حالته وبغت بس درووس بسيطه وعلى انفراد وما عارضوا هالشي ورحبوا به حتى من بكرره..
سكرت وبشرت حمد اللي مات من الفرح انه بيتعلم اللي تشتغل عليه مها >الاب توب أو الكمبيوتر ككل ..




..........




دخلوا البيت قبل صلاة المغرب بنص ساعه ودلال تعرج ماتقدر توطـى على رجلها من الوجــع ..
سلمت على ابوها وامها..
ام فيصل: وش فيك يمه ؟؟..
دلال:طحت من الدرج ببيت عمي..
ام فيصل: بسم عليك عسى موب كسر بس ؟..
دلال:لا ..
ابو فيصل:مدري متى بتخلين عنك هالرباااشه وتعقليين لا تكسرتي ان شاء الله !..
دلال:ههههههه وش دعوه يبه تفائلوا بالخير تجدوه..
ابوفيصل:فيصل تعال معي ابيك بموضوع..
فيصل:ان شاء الله خذ بيالة الشاهي معه ولحق يور فاذر وراحوا في المجلس وتركوا ام فيصل وبنتها في الصاله..
ام فيصل : عساك انبسطتي عند عمك؟؟
دلال: اييه والله يمـــه وناااسه وســاعة صــدر ليت عندي خوات احسن من ذا البعارين!..
ام فيصل:هههههههه بعارين !ما سمعوك..
دلال:والله امس مرره استانسنا بنات عمي بس جمعه ما شاء الله وجت رنا في الليل يعني فله
ام فيصل: اشوه وش اخبارها رنا؟؟
دلال: طيبه وتسلم عليك ..
ام فيصل : الله يسلمها لاتنسين تدهنين رجلك بفقس قبل لاتنومين..
دلال: يمممممممه فيكس مرره وحده !خيااااس..
ام فيصل:عشااان تطيب ما تشوفينك تعرجين الحمد الله والشكــر..
دلال: ان شاء الله طيب لاتصارخين ..
ام فيصل:وين بتروحين ؟
دلال:برقى أغيــر !
ام فيصل:اللحين فيك حيل ترقين وإنتي مابله تعرجين أقعـدي وبجيب لك
دلال:لا والله أقعدي ما تقومين بخلي سوما تجيب وإلا عادي ارقى ..
ام فيصل:لا ترقين موب زين تمشين عليها وهي توجعك ..
دلال:طيب خلاص إن شاء الله ..




أما الوضع في المجلس متأزم على الآخر..
ابو فيصل:هذا اخر كلامي !..
فيصل: يبه انت عارف رايي في هالموضوع لاتجبرني على شـي ما أبيييه !..
ابو فيصل :لين متى يعني بتم على ذا الحال عاجبك وضعك إن كانه عاجبك ترى ما عجبنا لا انا ولا امك..
فيصل:بس انا عاجبني !..
ابوفيصل: وإنا ما عجبنا لمتى بتفكر بووحده خلاص اعرست وعندها ولد !..
فيصل بعصبيه:ومن قالكم اني افكر فيها ؟؟
ابو فيصل:انت وشكلك واللي قاعد تسوويه وإلا من متى انت تشرب دخــان !..
فيصل:يبه هالموضوع تكلمنا فيه كثير واللي باعني برخييص ابيعه بتراب وانا ما افكر فيها واخر همي هي ..
ابو فيصل:خلاص نخطب لك بنت عمك..
فيصل بعصبيه:ييبه الله يهديك قلت لك ما ابي اتزوج كرهت الحريم ياناس افهموا كرهتهم !..
ابو فيصل بحزن:بس انا ابي أشوف عيال ولدي امك قلبها متقطع عليك من اربع اسنين وانت على هالحال
حالك ما تسر لاعدو ولا صديق..
فيصل :مافيني العافيه انتوا اللي مكبرين الموضوع..
ابو فيصل: السالفه منتهيه بنت عمك عن عشر من عبير تدري وإلا لا ؟..
فيصل: ادري وعلى عيني وراسي بس انا ما افكر في الموضوع..
ابوفيصل: اذا انا ابوك ويهمك رضاي بتاخذها ولا لا أنت ولدي ولا اعرفك ..!
..انصدم فيصل..وكمل ابو فيصل والدمعه في عينه..قلبي يتقطع وانا اشوفك الكل يسالني وش اخبار فيصل
وأقـــول بخيــر والغضه بقلبي بكري وسندي وذراي اليمين يدفن نفسه بالحيــا بالشغل والهم عشان وحده ما تســوى ظفره..
الله يهديك الله يهديك غصــب عنك ..
ضاق صدر فيصل ما اتوقع انه مسبب كل هالام لاهله ولابوه كان يحس بكتمه يبي يطلع بس وإلا هـو يعرف دواه..
فيصل:يا ابو فيصل لاتضيق صدرك واوعدك افكر بالموضوع !..
رفع راسه بفررح:من جدك ؟؟..
فيصل يبتسم:بس بشرط..
ابو فيصل :تدلل وأنـا أبــوك ..
فيصل: ماتكلم عمي الا بعدين ..
ابو فيصل : ما طلبت انت امر..
قال يخفف عن ابوه:اللحين هم ثنتين بتزوجني التوم ؟..
ابو فيصل:هههههه لا ما يجوز الكبيره ريما
فيصل:يييييبه وش كبيرته هـم تووووم !
ابو فيصل:أدري أكبـر بخمس دقايق على قولة ديما..
فيصل: نسب يشرف..!
ابو فيصل :وش قلت؟؟
فيصل : اقول مشينا للصلاه لانتأخر..
أبو فيصل :يالله وانا ابوك ياجعلي ما ابكيك..
فيصل:آمييين بس أسبقني مشوار وبجيك
أبو فيصل:يااااولـــدي أتركه وفك نفسك من شــــره >الدخان
فيصل:ههههه ما أقدر والله
أبو فيصل:الله يهديك الحق على الجماعه بس
فيصل:إن شاء الله هذاني وراك ..


(اكييد الكل يسال عن قصــة فيصل ..فيصل الله يسلمكم من اربع سنين وشوي كان خاطب بنت خالته عبير وهو اللي
مختارها ويبيها من كان صغيـر وتم كل شي وسلموا المهر وكل شي اوكييه بعد فتره من الخطبة تفاجأ بالبنت واهلها
يرفضونه ويقولون مافية نصيييب ويرجعون عليه المهر بدون سبب يذكـر هالشي هز كرامته وشلون ينرفض وهو شاريها
وماخلى شي ما سواه علشان يرضيها في لا في الشبكه ولا في الملكه وقدام الناس و بعد ما تم كل شي ينرفــض !..
كره الحريم كلهم وعزم انه ما يعرس ابد ومن يومها وفيصل ماعاد فيصل الاول اللي البيت مايخلى من صوته وحسـه طلع
عصبي يعصب على اتفه الامور حتـى الدخـان اللي ما شربه في مراهقته دله عليه رفيق السوء في شدته اقناعاً له انه بيكون
رفيقه واللي يخفف عنـه انعزل عن الكل واللي قهرره زوود انه بعده باسبوعين بسس تنخطب عبير وتتزوج وتعيش حياتها
ومعها ولد اللحين دفن نفسه بالهم بالشغل أكثــر شي لدرجه انه ترقى اكثر من مرتبه في البنك لاجتهاده وحرصه..
ورجع عليه ابوه اليــوم يقلب المواجع الي يحااول ينساها أو حتـى يتناساها ..)





..............





"وش قلت زيد ؟؟"
زيد:وش اقول يعني؟..
رنا:رد علي اقول ابي اعزم صديقتي عااادي ؟..
زيد:اعزمي اللي تبين بيتي وإلا بيتك !..
رنا: طيب في اغرااض ناقصتني للمطبخ !..
زيد:انا مشغول بعد الصلاه عنـدي شغل ضروري دبري نفسك..
رنا:وشوو ادبر عمري عندي سياره وانا مدري !..
زيد:رنا لاتصدعيين راسي يالله باااي بروح اصلي ويمكن اتأخر بالليل..
رنا ما ردت عليه قهرها متغير مرره هالاسبوع ماتدري وش فيه..
قالت مالي الا خالتي لطيفه..

"هلا رناااا"
رنا:هلا والله اخباركم وسوير ؟..
لطيفه: بخيير نزقح انتي وش اخبارك؟؟؟ورجلك ؟..
رنا:طيبه..
لطيفه:هههه وش فيك من دون نفس ..لحظه صوييييييييلح ووجع خل اختك مصعتها ..
لطيفه :هلا
رنا:هههههه وانتي ما قد دقيت عليك الا تتطاقين وياهم ؟..
لطيفه: وش اسوي شقوا بي الله يهديهم مافيه تحفه ولا مزهرية ماكسروها ما يخلون على قلبي شي جعل وسكتت ... ابوهم مايعرس علي..
ماتت رنا من الضحك:هههه حلوووه لطيفه ههههه ضحكتيني وانا ماودي ههههه وش ذا الدعوه..
لطيفه:هههههه دام الواحد داعي داعي يدعي بشي سنع احس له وش عندك ؟..
رنا:ودي اعزم مها وزيد مدري وش فيه متغير ذا الايام ؟..
لطيفة:خيير ان شاء الله بعد بدييينا ؟..
رنا:مدري سارح طول الوقت ويهوجس تخيلي اقول ناقصني اغراض للعزيمة يقول دبري عمرك موب صاحي !..
لطيفة:هههههه انتقلت عدوة رجاجيلنا له..
رنا:هههههه الله لايقوله بس مدري وش فيه ؟..
لطيفة:لحظه ؟؟محيميــــــــد طلع الكوره لاكسر راسك بها
لطيفه:هلا ..
رنا: اقول يالله مع السلامه فقعتي أذنـي انتي وعيالك..
لطيفه:هههههه دقي على طلال يمرك ؟
رنا:بدق عليه أشوفه يالله باااي..
لطيفه :مع السلامــه .. وقســـم بالله ان ماقعدتــوا لا تشووفون شي ما شفتــ .... وسكرت
رنا:ههههه الله يعينها عليهم لوهم عيالي طبيت من فوق السطح ههههه استغفر الله

________________________________________
دقت على طلال وقال مايقدر الا بعد العشا ..
قالت معليش اهم شي تجيب اغراضها..
>>ههههه أختصــار المكالمه ..

............


كلمت مها وعزمتها لها قالت بتقول لامها وبترد عليها مع انها داريه أن أمها ما تدري عن هواء دارها..
بس يعنــي تحس أنه شي روتيني لازم تسويه خاصه قدام العالـم اللي برى ورنا عارفه لها
رجعت مها دقت عليها واكدت لها انها بتجي الاربعاء ان شاء الله لان امها معزومة..




............




ديما: غريبه رنا ما دقت اليوم؟؟
ريما:دقت تقول بتروح لبنده مع طلال..
ديما: لاااااااااااااااه ..!
ريما:خييير؟؟
ديما:خيانة ليش ما قالوا لي اروح معهم..
ريما:ياشين اللقافه..
ديما:ما لك دخل احد يفووت على نفسه طلعه في ذا الأيام الدنيـا قحط انتي ووجهك..
ريما:احترميني انا الكبيره وش هالالفاظ !..
ديما:لاتقهريني بسس قال ايش الكبيره ..
ريما:غصب عنك اكبر بخمس دقائق ياحياتي..
ديما:ما تفرق كلنا جينا مع بعض ..
ام سعود: لا إله إلا الله وبعديييييين ! >>سكتــوا
رن التليفون وطارت ديما له:
هلاوالله وغلا بالغلا والزين هلا بامي منيره يااااهلا والله تو ما انور تليفونا >>ههههه نصــابه
منيره:وش ذا الحتسي وش خليتي لرجلتس وحاطين في تليفونكم لمبه ؟؟..
ديما:هههههه لا ياحبي له بسس
منيره : منهووو؟؟؟
ديما:رجلي !..
منيره : ايا ياللي ماتستحين ..
ديما:هههههههه امزح تيته..
منيره :اها بس وين امتس ؟؟..
ديما:فيذا ..ما تدرين عن اخر الاخبار؟؟
منيره:لااا وشووو ؟؟ مدري عن شي والله
ديما: هههههههه ولا انا ..!
منيره :وييين امتس ؟؟؟؟..
وعطتها امها وهي تضحكـ لانها بدت تعصب ..
ديما:هههههه ياحبي لها
ريما :المشكله أنك كل مره تكذبين عليها وتصدقك
ديما :ههههه بلاها طيبه
ريما:إلا على نياتها والله ..



.........


مرت اليومين بسرعه واليوم الاربعاء رنا عازمة مها بلحالها حتى ماقالت لاهلها..لانها حاسة ان في مها شي من نبرة صوتها ذاك اليوم ومن الساعه 5 وهي عندها درات بها على بيتها لأنها أو مره تشووفه دايم يلتقوون في أمــاكن عااامه مها مستانسه
لأنها شااافتها من زمااان عنها في الجامعه ويالله تشوفها ..



.........


وام سعود وبناتها راحوا لبيت امهم منيره ولطيفه هناك وطلال بعد اكييد بتستغربون فرق العمر بين ساره ولطيفه بس كان بينهم ولد أسمه عبد الرحمن توفى في حادث من 15 سنه تقريباً وماعنده الا بنت عايشه مع امها بالشرقيه وماتجي للريـاض إلا
بالاعياد ونادراً بعد تسلم على عماتها وعمانها وترجع للشرقيــه ..


جتهم وهم يلعبون بلاستيشن >سونـي على قولتنا ومندمجيين وخااشين جوو لا أحد يحاكينا <
ديما:حمووودي ..!
محمد ولد لطيفه 10-11سنه:محمد لو سمحتي ..
ديما:محمد !..
محمد:نعم ؟؟
ديما: تشتري لي من البقاله !..
محمد: اي بقاله ؟؟..
ديما:بقاله امي منيره اي بقاله ..
محمد التفت بسرعه:امي منيره عندها بقالة؟؟؟ !.
ديما: من زمان يالخبل..
محمد: وليه محد علمني !..
ديما:وش فيك أنت من قبل ما تولد وهي على فراس الشارع..
صالح:يالغبي بقاله (الهدف) بس هم يسمونها امي منيره..
محمد:اييييه نسيت ذي تقوول بقالة أمي منيره >لا ما اقدر عندنا دوري..
ديما:مالت عليك وعلى دوريكم الدوري الايطالي وانا مدري ..على تحرطمها دخلت الصاله..
منيره: وش فيك ماده البوز..
ديما: عياال بنتس يرفعون الضغظ !..
لطيفة:ليييه وش سوو عيالي ؟؟..
ديما: اقول رح اشتر لي من بقاله امي منيرة يقول متى شرت امي منيره بقاله >>تتهزى..
ساره:هههههههههههه
لطيفة:ههههه صادق قولي بقاله الهدف وش دخل امي في السالفه ..
ديما تتقرب من منيره:والله من عرفت نفسـي وكل شي هنا لامي منيرة شارع امي منيره بقاله امي منيرة حتى المستشفى
مستشفــى امي منيره..
ام عبد الرحمن: الله يستر ميرمن ذا التلحوس !..
ديما:يييييمه وين خالي طلال ؟..
ام عبد الرحمن: مدري عنه فيك خيير قومي انتي واختك ونظفوا غرفته موب يخلي الشغاله تدخلها غاديه كنها زباله
ديما:يسسسسسسسس !
ام عبد الرحمن:وش يسه ؟؟
ديما تقوم :لقيت لي شغل ..رييييييييييييييمااااااااا ريماااااااااااااااااااااااااا
ساره:بشويش وجــع !
ريما تدخل مع بنت لطيفه سارة من الحوش:خيييير الجيران عرفوا اسمي
ديما:توهم اليــوم بيعرفونه يالله عندي مهمه ..
ريما: الله يستر من مهماتك خيير السطـح منيب راقيه لو وشوو يكفي اللي جانا ذيك المره
ديما:ههههه لا وش سطحه امي منيرة تقول رتبوا غرفة طلال خلينا نفتش يمكن فيه شي جديد..
ريما:انا اكرف وامسح وانتي تفتشين كالعاده.
ديما:لاااا والله لامسح يالله لايجي ..
ريما:ارقي وبجيب الفوط واجي..
ديما :سنعه أختــي
ريما :إلا والله لاقيتة لك وحده تلعبين عليها



...............

انتهى الجزء..



/





...@@البارت السادس@@...


السمــــــوحه منكم غبت غيبه طويله بس والله مو بيدي ظرووف والحمد الله عدت على خير ^^
العذر والسمـوحه منكم ..
أكيد بتعذروني صــح ؟
خلاص عذرتوني !أدري >>هههه على كيفها الأخت
يالله معليش جايبة لكم معــي رضــاوه جزئين وإن شاء الله تعجبكم ..

ما كل غـــــالي بالقصــــايد نوفيـه
بعض الغـلا في داخل القلب ذكراه
دايم لكل إنســــان ميـــــزه تحليــه
وأنتم بعينــــي شي ما ألحق أقصاه

>>هههه تتمصلــح ..!






.....



"تتوقين انه حل"

مها :والله ما ادري بس يقطع قلبي يمكن يلقى له وحده تفهمه !..
رنا:أنـا معك يامها بس انتي عارفه حالة أخــوك ؟..
مها:يعني وش رايك؟؟!
رنا:امممم ما ادري والله بس بتلقين بنت بهالوقت بتوافق عليه؟ موب قصدي شي بس انتي مثل اختي..
مها:عااادي واكثــر ياقلبي بس الفلوس تغير النفوس اكيد بيلقى !..
رنا:معقولة يامها تفكرين كذا ؟!؟
مها تتنهد:رنا انتي اكثر وحده عارفتي وعارفه تفكيري أنا ما أفكـر كذا بس هذا الحل ومو شرط متعلمه او غنيه أو من عايله
معروووفه لا ممكن من قريه مثلاً وعلى قد حالهم وعلى علم بحالته طبعاً!..>>تتكلم عن اخوها حمد تبي تزوجه>>
رنا:ما ادري يمكن !طيب شاوري اهلك واللي يريحكم سووه .هذا اللي مضايقك بس ؟..
مها بابتسامة:بس.. بغض النظر عن بنات عمي !..
رنا:لاتقوليين لي منالووه ؟..
مها:هههه إلا هي نفسها ترمي كلام وهي قايمه وهي قاعده وانا خلاص صارت عندي منـــاعه لدرجة اني ما صرت
اطب بيتهم..
رنا:الباب اللي يجيك منه ريح سده واستريح وش تبين بهم ريحي عمرك وأنا أختك ..
مها:ياحبي لك يارنااااا وين خواتك غريبة ما جوو؟؟..
رنا:ما عزمتهم اليوم فشة خلق بس المرة الجاية اعزمهم بعرفك على خالتي لطيفه فللله..




.........



ريما:وبعدين معــك ؟بالله عليك من دخلتي سويتي شي ؟..
ديما:هههههههه قوم تعاونوا ما ذلوا..
ريما بصوت عالي:لااااااا تذبحيني وشوو تعاونوا واني تفتشين من دخلنا وانا اكرف..
ديما:ياوخيتي هذي مهمه استطلاعيه..
ريما تكش عليها:مالت عليك وعلى مهمتك الاستطلاعيه قولي آميين ..

"" مسكـتكــــــــــم شتسوووووون؟؟؟"

كان صوت طلال عند باب غرفتــه ..
ديما تشهق:يمممه روعتني ما تعرف تنحنح تكحكح..
ريما:هههههههه اشوه انك جيت..
طلال:شين وقواية عين فغرفتي واتنحنح والله خوووش !..
ديما بدلع:يالله عاااد لاتذلنا هذا جزانا نرتب غرفتك..
طلال:شوفـــي ريما يمكن أصـدق انتي مستحيل ترتبين لله وش المهمه اليوم ؟..
ريما:ههههههه في ذي صدقت..
ديما:شفيك علي الله يهديك ويرزقك ويسخر لك بنت الحلال السنعه..
طلال:ههههه مسكتيني من اليد اللي توجعني آآآمييييييييييين..
ديما:من جــــدك!!!..
ريما:والله طييب ليه ما تعرس ؟؟والله ونااااااسه عرس خالي..
طلال:ريما نصيحه مني الاحظ بعض التغيرات عليك ترى من عاشر قوما اربعين يوما صار منهم انتبهي على نفسك ههههه..
ريما:ههههههههههه
ديما:شقصدك انت ووجهك الشرهه علي والله اللي أدعي لك ..
طلال:كلش ولاااااا ديما عاد مين بيرتب غرفتي بكره..
ديما:تتهزى هييييين ان ما جيت تقول اخطبي لي ياديما واقول فارق عن وجهي ما اكون ديما..
طلال:الله لايقوله مالٍ من عمري أخليك تخطبين لي..
ديما:نشووووووف..
جا راكان يركض:خالــي طلااال ديما ريما هه هه هه >>يتنفس ههههههه..
ماما منيره تقول انزلوا عشان العشا..
نزلوا مع راكان اللي شاله طلال ونزل به..
طلال:راكــــان وش اخبار سلمى ؟؟>>المدرسه..
تغيرت ملامح راكان:ابله سلمى مووب سلمى وطيييبه تسلم عليك..
ديما:يانصبي ذا الولد ما خلى احد ما سلم عليه حتى راعي البقاله أبله سلمى تسلم عليك ..
طلال:هههههه حلوووه كفك >>ومد يده..
مدت يدها يوم جا يضربها سحبتها:هههههه اسحب ملفك..
طلال:هههههه مردوده يالخايسه..




..............





بعد العشا في بيت ابو فيصل بندر كالعاده طالع مع اصدقاه وفيصل بالبيت واكيد دلال وام فيصل وابو فيصل..

ابو فيصل :وش قلت في الموضوع اكلم عمك..؟؟؟
تغيير وجهه :يبه خلاص الموضوع انتهى لين أجييك..
دلال وهي تناظر التلفزيون:اي موضوع..؟؟؟
فيصل بعصبيه..:مالك دخل خلك في اللي انتي فيه أحسن..
دلال بصوت واطي:اعوذ بالله شارب شطة..
ابو فيصل بصوت عالي:لا تلاغيها ومن قالك انتهى ما ينتهي الا لاشفتك مستقر>وسفهه واللي في باله هو اللي بيسويه..
فيصل:عن اذنكم تصبحون على خيير..
ام فيصل:وين وانا امك تونا..
فيصل :تعبان يمـه..
ام فيصل :بسلامتك..
حست دلال باخوها يمكن زعلته وهو هالايام نفسيته زفت يمكن من ضعظ ابوي عليه اعتذر ارحم لي..

ورقت تلحقه طقت الباب..

"ادخلي"
فتحت الباب بشويش:وش دراك يمكن ادخل؟؟..
ناظرها وهو على مكتبه ورجع لاوراقه:بلاذكى بندر طالع وابوي وامي موب لاحقيني..
دلال:ايييه طيب ..انا ..انا اسفه اذا زعلتك !..
فيصل ضاق صدره>انا اللي مزعلك وتتاسفين يالله عليك يادلال:ماسويتي شي ليش تتأسفين أنا اللي متضايق..
قعدت على السرير مقابله..:لييييش طيب ؟؟..سلامتك وش اللي مضيق صدرك..
رفع راسه وفي وجهه ابتسامه:ما تلاحظين اني عطيتك وجه..
قامت دلال:سوري يالله اجل نم ..
فيصل: لاتزعلين دلول بس والله فيني نوم..
دلال تلتفت بابتسامه:نوووووم العوافـــي ياربي ..
فيصل :الله يعافيـــك ..



............




ساره (ام سعود): يمه وش اخبار بنت عبد الرحمن من زمان عنها !..
لطيفه:ايه والله ماتكلمك ؟..
منيره:والله اني من زمان عنها من عيد رمضان ذا البنت قاطعه وامها شرانيه الله يهديها..
ساره:اميييين بس انتي جدتها ام ابوها المفروض تدق لو من جوالها عندها جوال ولا لا ؟..
منيره:الا والله عندها راتب ابوها يسلم في يدها ما نلمس منه ريااال..
ديما:تصدقون ماعمري شفتها من الابتدائي ..
طلال:افففف ليييه ؟..
ريما:والله بنت أخـوك قاطعه تجي تسلم بعيد الفطر ساعه وحنا نكون عند عماني..
ديما:وتروح مانشوفها..
لطيفه:ولا انا اللي نشوفها أنـا من سنتين ماشفتها ..
ريما:من كبره اللحين؟؟
منيره:في عماركم ان كاني منيب غلطانه..
ديما:لوني منها اعيش عندكم احسن..
طلال:خلونا من لحوم العالم بتجي الله يحييها ميب جايه بسلامتها..
ساره:وانت الصادق..
طلال:الا سعوودوه مت بيجي ما له نيه يرجع ولا عجبوه الشقروالحمروو ....وما خلق الله..
منيره:وشوو شقره ؟؟..
ساره:هههه مدري عنه يقول اخر العطله ان كانه صادق..
ديما:اشتقنا له الخايس..
ريما:كملي جميلك بكلمة زينه يرجع لنا بالسلامة ان شاء الله..
طلال يناظر ريما باعجاب:ياحظ اللي بياخذك يالريـــم ..
احمر وجهها وصفر وخضر اشاره مرور:مشكوووور..
منيره:موب الريم بس ياحظ اللي بياخذ وحده من بنات ساره ربت ولقت كل وحده تقول الزود عندي..
ديما:اوووووووه تحيا أمـي منيره..
طلال:بتكبر روسهم اللحين..
لطيفه:وبنتي؟؟؟
طلال: بنتك صراحه مستقبلها ضاااايع...
لطيفه:افااا لييه؟؟
طلال:مع جوز الكناري اللي عندك >>يناظر عيالها (محمد وصالح)اللي يلعبون بلاستيشن >راحت فيها..

:ههههههههههههههههههه
ضحك الكل عليهم ..وساره مع ريما تلعبها..وتضحك معهم ماتدري وش السالفه..




...........




بيوم السبت انتشر خبر سار لعايله عبدالله ترقيه فيصل بالبنك لمدير قسم الكل فرح له من قلب لانه دافن نفسه هالاربع السنين بالشغل ويستحق الترقيه بجداره من فرحه ابوفيصل ويضرب عصفوريين بحجر..عزم اخوه واهل مرته(ام سعود)ومن يعز عليهم وبعض معارفهم واقرباهم الرجال طبعا الحريم اكتفوا بالاوليين...وتقررت يوم الاثنين..

............


دلال:وش رايك؟وش احلى الكبك وإلاالقلم ؟؟..
ديما:على كل اللي يسويه فيك وبتشترين له هديه بعد والله انك طيبه..
دلال بصوت واطي: ديموووه اخلصي انا في المحل..
ديما:امممممم مدري انا ما اعرف هالحركات خذي ريما شاوريها..
دلال: هلا ريما الزبده محتاره بهديه لفيصل وش احلى كبك ولا قلم..
ريما: هو يلبس ثياب بكبك..
دلال: بالشغل اعتقد..
ريما: امممم طيب ما في طقوم كبك وقلم وكذا..
دلال: والله انك جبتيها ياحبي لك يا ريم احسن من ذا الدوره يالله بااي
ريما: بايوووو من بيجي كثيرين..
دلال: لا الحريم بس انا الرجال اللي وش كثرهم يالله باي
باااي..

.................

"تفضل"
زيد :مشكووووره..
رنا: كلمك عمي؟؟؟
زيد:ليييه؟؟؟
رنا :مسوي عزيمة لفيصل ترقى في البنك ماشاء الله بعد بكرره..
زيد: لا بس شفت رقم غريب وما رديت يمكن هو..
رنا:الا هو لادق رد انا اللي معطيته رقمك..
زيد :يصير خيير..
رن جواله واتغير وجهه حط الفنجال وقام يكلم برره..
رنا..وش فيه ذا من تالي ولو لييه يقوم العادة عااادي يكلم عندي من كثر ربعه عاااد ومتغير بعد الله يستر منك يازيوود..

.............
يوم الاثنين بعد المغرب بيت ابوفيصل يدهرووون الحاظرين ام سعود وبناتها وامها واختها اللي اصرت عليهم ام فيصل يجوون واخوات ام فيصل ام راشد وام ابراهيم بدوون بناتهم..ودلال راعية البيت اللي شايله العزيمة فوق راسها عند الحريم وماقصروا معها البنات وفيصل وبندر عند الرجال عرض طلال خدماته بس ماحبوا يتعبونه..

ديما داخله المطبخ:ياربييي تكسرت رجيلاتي من ذا الكعب الله ياخذه..
ريما من وراها بصينيه الحلى:وش حادك؟؟
ديما:لازم مايناسب مع التيور الا هو..
ريما تشيل صينيه البيالات وترتبها..تحملي من بغى الدح ما قال اح..
ديما:ريوووم..
ريما:هلا..
ديما: ماتشوفين خالتي هدى مهتمه فيك بزياده..
ريما :لا عااادي يتهيأ لك..

"لا والله تسولفون هنا وانا اصب بلحالي.."
ديما:خلاص دلال تكسرت رجولي نعطيهم قهوتهم ونتقهوى انا ..
دلال:مدري بس فشيله كلهم حريم كبار وش بتقول جدتك..
ديما:ههههههه لايكون حاطه العين على خالي ترانى اقرب..
دلال: لا انت ووجهك ولفت تطلع ..بس البحث عن الرزق الحلال على قولتك..

ريما:تناظرهم وتضحك..انتوو مدري وشوو..
ديما: ههههههه تخيلي دلال وطلال يناسب..
ريما: خلي التخيلات وامشي نروح لها ..

دخلوا على الحريم واللي تقول شابه فيهم حريقه من السواليف والنقاشات الحاده حريييم ما ينلامون..
اصواتهم لبيت الجيران
دلال:خالتي شاهي ولا نعناع..
منيره (ام طلال):نعناع وانا امك..
دلال: ان شاء الله..
منيره تسالها وهي تقدمه ..انت بنت عبد الله
دلال بحيااا: اييه
منيره:ما شاء الله لا اله الا الله ..

تدفها ديما :كنه عاجبك الدور..
دلال: اقول فارقي..
ديما تلف لامها منيره..بنظره خبث:يمة منيره وش رايك بدلول..؟؟؟
منيره:حرمـــة بسم الله عليها..
ديما: هذي ضمنتيها..
دلال سحبتها من بلوزتها :بلا بياخه ديمووه ترى والله لازعل ..
ديما تبوسها على خدها ..كلش ولا زعل دلول سوووري عم نمزح خيتووو..

..........

عند الرجال الربكه اكثر بما ان المعازيم اكثر من الحريييم معارف ابو فيصل ومعارف فيصل ..وفيصل وبندر قايمين بالكل خصوصا بندر طلع ابوفيصل حرته فيه اليوم كل ما شافه قاعد قومـــه مرره ثانيه...

..........

على الساعه 10 ونص تعشوا و11 بدوا يطلعون الرجال مابقى الا ابو سعود طلال وزيد رجل رنا ..
والحريم راحوا خوات ام فيصل ولطيفه اخت ساره مابقى الا ساره وامها وبناتها قاعدين في مجلس الحريم يسولفون..

.........
عند الرجال وفجأه تكلم ابو فيصل: يا ابو سعود طالبك طلبه..
فيصل زي المروع اللي يناظر ابوه >>تكفى يبه موب اللحين الله يعافيك تونى فرحان بس ما في امل المجلس شبه مليان ومايقدر يسكت ابووه..
ابو سعود:انت تامر وانا اخوك امر..
ابو فيصل : الله يسلمك انت عارف ان فيصل مشتغل ومكون نفسه واليوم يبي يكمل نص دينه وطالبين الريم له..
فيصل منزل راسه ووجهه الله لايوريكم وكل الانظار موجه له..
ابو سعود: ماتغلى عليك يا أبو فيصل وفيصل يستاهل نسأل البنت وارد لك خبر ..
ام فيصل :خذ راحتك ريما غاليةٍ علي مثل دلال واكثر..
ابوسعود: الله يكتب اللي فيه الخير..
طلال:حركاااات والله بتناسبنا أجـل ؟
فيصل وده يعطيه كف بس مثل ما قال عبد الرحمن بن مساعد الشاعر :ايه والله وش حليلهم الله يخليهم ويحفظهم هههههههه
رد عليه
فيصل بابتسامه بالغصب :شفت عاد !
طلال:هههه تشرفنا
فيصل :لي الشرف والله
طلال:منك المال ومنها العيال
فيصل :هههههههه خلها ترد بالأول >>وفي نفسه إن شاء الله ماترد



..............



دلال:يالله عااد بلا بياخه تتغلوون ؟
ديما:صاحيه أنتي ولامجنونه..
دلال:لا صاحيه..
ريما:موب نتغلا ولا شي بس والله صعبه اخوانك فيه بنضيق عليهم وحتى لو اننا رضينا ابوي مستحيييل يرضى..
دلال:هيييين ان نمت عندكم مرره ثانية هذا وجهي !..
ديما:مررره ثانيه فيها حلال >>يعني ميه وعشرين ألف حل تقريباً ..
دلال:يالشينه..
ريما:والله بيتنا كله بنات ولو سعود فيه مانمتي..
دلال:خلااااص معدنيب نايمه !
ديما:أحســن هههههههه
دلال:ههههه أنطمي بس


طلعوا الكل مابقلى الا ابو سعود ودق على مرته تطلع
ام سعود: يالله يابنااات ابوكم برره..
دلال:تونا خالتي..
ام سعود:معاد الا خيير 1إلا ربع تعالي أنتـي معنا..
دلال:لا ما ابي..
ديما:هههههه خليها يمه زعلانه دلول وين شنطتي ؟؟..
دلال مدري يمكن عند المغاسل يوم تزينين مكياجك..
ديما:مافيه احد هنـاك ؟..
دلال:لاكلهم برى ..

...

راحت للمغاسل اللي لم مدخل البيت واذا دخلتيها مقابلك حمام ما لقت الشنطه والتفتت معصبه ما انتبهت لباب الحمام اللي انفتح: هييييييين يادليييل تلعبين على اوريك صرخت :دلييييييييييييييييييل..وطلعت وهي تعرج (من الكعب)واللي طالع من الحمام انصدم وسكر اذنينه من الصرخه وجع ياطول لسانها ماشفت وجهها بس شعرها موب غريب علي ! >بعدين بتعرفون ليه <
بس اكييد وحده من بنات عمي خالد بس لييه تعرج؟ >لقاااافه ما كان الواقف الا بندر اللي ما صدق يفرج عنه ابووه ويروح الحمام
وقااعد يحلل الأخ




...............
انتهى الجزء..

/




...@@البارت السابع@@...




ودي أسج بديرة مابها ناس
------وأعيش لو لحظـه بلا هم وأحزان
ماتنزل دموعي ولا أحس بأحساس
------ولاينشغل بالــــي علـى أي إنســان
ترتاح روحي كل ماهب نسنـــاس
------ويميل قلبـــي كل ما مالت أغضان

تبي الصراحه:داخل القلب هوجـاس
-----مقدر أعيـش بدون همـــي والأحــزان
جنة بدون الناس وشلون تنداس
-----وديرة بـدون إنســـان ماتقبــل إنســان




...



فيصل بعصبيه:وش هالموقف اللي حطيتني فيه يبــــه ؟..
ابو فيصل ببرود:لييه ما كنت موافق؟؟..
فيصل على نفس الوتيره:أنت اكثر واحد عارف برفضي تقوم تحرجني قدااام الرجاجيل..
ام فيصل ودلال يناظرون المناقشه ومافهموا شي من الكلام وبندر يتابع وهو ساكت لانه حظر الخطبه..
ابو فيصل بعصيبه:اللحين اذا بغيت مصلحتك احرجتك الشرهه موب عليك الشرهه علي اللي اخطبها لك
وانت ما تسوى ظفرها !! ..
فيصل قفلت معه من جد منهي عشاان ما اسوى ظفرها؟..:ومن قال لك اخطبها لي اصلاً..
ابو فيصل: فيـــــــــصــــــــل..
ام فيصل :وش فيكم ياكافي تعوذوا من الشيطان..
...:اعوذ بالله من الشيطان الرجيم..
طلع فيصل وتركهم بالصاله..
ام فيصل :وش فيكم؟؟؟..
ابو فيصل:اسألي ولدك ..؟؟؟ وطلع معصب لغرفته..
دلال اللي ما تدري وش السالفه سألت بندر: بندر وش فيهم؟؟؟
بندر بلامبالاه أبـداً:أبوي خطب ريما لفيصل وفيصل عصب بس ..
دلال بصدمه:ريـــــــــمـــــــــا ؟؟..
بندر:وجع شوي شوي اذني ايه ريما >وبمكر ..ليه فيه احد غيرها ؟؟..>كنـي مدري يعني !
ام فيصل تنهدت وطلعت فوق لانها عارفه السالفه والشي اللي يحطه ابوفيصل في راسه لازم يسويه..
دلال:وشلووووون ..ومتــــى ..وليييييش؟؟؟
بندر: واحد واحد ترانـي تعبان وما استوعب..
دلال:بندر منيب فاضيه لهبالك جد الكلام ولابس كلام ؟..
بندر:وش كلام انتي ووجهك اقولك أبوي خطبها من عمي قدااام الرجاجيل تقولي كلااام ..
دلال:وهذا ليييش يرفض يحمد ربه ان وافقت هي عليييه..
بندر:ليييش؟؟
دلال:ريما مستحييييل توافق لانها تعرفه زيين..
بندر:والله بكيفهم من كان عندكم اليوم؟؟..
دلال موب مستوعبه السالفه:من يعني عيال عمي خالد واهل خالتي ساره..معقوله ريما وفيصل !!
بندر:برووح انام..
دلال: تنااااام غريبه النــاس عطله ترى ..
بندر:تعبااان والله لو تشوفين ابوك اليوم كرفني كرف الله لايوريك كنه حاقد علي من سنه..
دلال:ههههههه مزدي فيك..
بندر:يالله اقلبي وجهك بس ..




..............




"احبك يامها والله احبك كثيـــــر "
مها:هههههه حتى انا بعد احبك..
حمد:اليوم درسنا كثيييير بس الاستاذ عطانا واجب يقول لازم تسوونه على الكمبيوتر حقك وأنا ماعندي وأبي سي دي بعد ..
مها:بكره الصبح نروح نجيب لك واحد زي حقي..>>اللاب توب..
حمد بفرحه:والللللللللله..
مها:والله العظيم..
قام وباسها على خدها:اذ درست بصير اشتغل معك طييب ..
مها:هههه ان شاء الله بخليك مدير أعمــالي وش رايك ؟
حمد:عاااادي وأصير زي أبــوي شنطه وأوراااق كثيره وأقلام بعد هههههه صح ..
مها:هههههه صحيــن ..
دخلت عليهم امهم اللي جايه من وحده من صديقاتها:السلااااام وش عندكم اصواتكم طالعه برى ؟..
حمد بفرح:يمه مها بتشتري لي كمبيوتر زي حقها...
ام مها تناظر بنتها بنظرة:من جدك بشترين لذا البزقه لاب توب ؟..
مها:يمـــــــه!!..
ام مها:وصمــــــه ومن وين بتجيبين له بذري في هالفلووس >اللحين صار تبذير يرحم أيام الشنطه بـ 6 آلاف نست شكلها..
مها:بجيبها من عندي موب فلووس أحد طيب تصبحين على خييير وطلعت .. >كالعــاده ما تشوفها إلا دقيقه ونقاش حاد وتنتهي حمد بعد طلع ورى اخته لانه زعل من كلام مرة ابوه...




...............




في اليوم الثاني ريما وديما في الصاله قاعديين مع ريهام وامهم مع ابوهم فوق فاضين هالايام عطلة ونادرا ما يطلعون
وما سافروا ابوهم مشغول وان سافروا >ربوع بلادي>على قولة ديما لان ابو سعود يكرهه الطيارات..
ريما تقرأ مجلة ومتحمسه تحل اختبار شخصيه وديما عند التلفزيون وريهام تناقر راكان كالعــاده ..
ريما:ديما...ديماااااا....ديمووووه..
ديما: هااااااه..
ريما تناظرها بعين:قولي سم هلا نعم موب هااااااه كنك بقره..
ديما:اخلصي ..
ريما :اسمعي ..((انتـي فتاة حالمه،رقيقه،هادئه ومسالمه، كلاسيكيه ولديك خوف دائم من التجديد...تعيشين في قصه حب رومانسيه،ربما تكون خياليه أو واقعيه ،ولا فرق لديك بين الاثنتين اصلاً(قصه خياليه او واقعيه)..
همسه لك:
>ديما بدت تتحمس معها <

جميل خيالك وخصب،لكن عليك عدم التمادي في الخيالات المثاليه ،لأن الحياة سوف تصدمك بخلاف ماكانت تريه في أحلامك""وانتبهي لمسأله العواطف ..اي اكبحي جماحها قليلا..""!
انت عاطفيه ولكن بمثاليه لديك مشاعر شفافه متزنه، عاطفتك جياشه ولكنك تحتفظين بها في ثنايا قلبك،وتدعمين المقربين إليك في المحن...))صــدق هذي شخصيتي؟؟؟..
ديما فاتحه عيونها من الدهشه:ريموووه تحبين ولاتعلميني ؟؟..
ريما:خييير انتي وجع وش أحب لاتدخل امي وتقلبها جد من جدك ترى هذا امتحااااااان بس وركزي قصه خياااليه..
ديما:مدررري !..
ريما:وشو مدري انا كذا ولا لا توأم ببلاش !..
ديما:يمكن كذا بس قصه حب ما دخلت مزاجي..
ريما تتنهد:ولا انا..

دخلت ام سعود على بناتها ونادت ريما:ريما امي تعالي ابيك..
ريما تقوم :ان شاء الله..
ديما:وانا ..؟؟
ام سعود:وش اسمك؟؟..
ديما:سوري..والتفتت على اخوانها ..وجع خلااااص اسكتوا وانتي العاقلة تحطين عقلك بعقل بزر..
ريهام:بلااه يرفع الضغط راكانوووه ابعد عني احسن لك..
ديما:اففف بس متى اعرس وافتك..
ريهام بصدمه:نعــــــم !!..
ديما:خيير ولاتبغيني اعنس بسم الله علي من الشر..
ريهام:هههههههههه
ديما:قايله نكته الاخت..؟؟
ريهام:لا اضحك عليك من جدك طموحك زواج المرأه لازم تكون لها مستقبل مستقل عن الزواج لانه مشرووع فاشل صدقيني ما أدري شلوون ما تفهمون !..
ديما:بلييز احتفظي بفلسفتك لنفسك مستحيل هذا رايي ومستحيل أغيره الزواج اهم من اي شي للبنت..
ريهام:الحمد الله والشكر ناس ماتفكر..
ديما:مخليه التفكيير لك يا ......مدري وش اسمها..
ريهام :أحلفـي بس
ديما بخبث :تبين أطلع أسمهـــا ؟؟
ريهام :لاااا شكــــراً ..