في اشياء تقهر وفي اشياء تولع في قلبك جمرات ..

يالله مشتهيه اطلع الكبت اللي احس فيه


عقلي دي الأيام مو معايا مرهقة تعبانة احس بضعف بنيتي


اليوم نسيت مفتاح البيت مو مشكلة

نسيت بطاقتي الجامعية لحقني بابا بها

أما اني نسيت جوالي فهنا اعرف اني من جد خارج الخدمة ودحين مو عارفة فينو..

امارس طقوس الدراسة بحرفية طقوس الصداقة طقوس الضحك


وارجع البيت خالية من اي تعبير جمود

لا ابتسامة لازعل

مجرد كلمات مختصرة ..

لانوم ولا صحيان ..


احس ان في داخلي عصبية مكبوته احس فيه نار ..


واكثر من سبب

كأن الدنيا تلتم فوق راسي أميلو يمين ويسار واحس من الثقل بيطيح امسكو بيدي عشان لايفلت

اطالع في دكتورتي المتحمسة للشرح

بوجه مكفهر وزامة شفايفي وبحر في دماغي

افكار من كثرها احس النصف الايمن من عقلي ينبض

ضيقة احس قلبي يعورني في شيء معورني احط يدي ع صدري واخبط بشويش ابغى اشيل الوجع والقهر المشكلة اني مررة مااحتك بأحد دي الفترة

منطوية حتى ماما اجاوبها اجوبة مختصرة من زمان ماضميتها


صرخت الدكتورة وفزيت من الفجعة وهي ضمتني وتقول

: اييي مالك يابت انا اسفة آوي طالعت فيها والدموع متجمعة في عيوني

والبنات سطحو ضحك وانا صرت اضحك وابكي وهي تطبطب علي

فجعتني شكلها تشرح للبنات انو ماينفع في المقابلة الشخصية تدخلي عليهم بحماس

وطبعا النموذج اتطبق علي


وصاحبتي نذلة تضحك ماصارت من فجعة

بس وربي فجعتني


بعدين كل ماشرحت تسألني واجاوبها بس برضو احس اني معاها بس مومعاها


قامت تقول لااااا سهيله مش طبيعية خالص وطالعت فيّا تسألني فيكي حاقة احد عملك حاقة

وشك مخطوف كدا لي .؟


والله ودي اقولها فيني مليون حاقة مو حاقة وحدة بس ابتسمت لها

صراحة دي الدكتورة مرررة ماشاء الله تعجبني ودايم اكون مركزة معاها بس اليوم انا خارج التغطية ..


خارج العالم


افكر في ولا شيء شاغل بالي الاشيء

الحب .. الخوف .. الثقة


يزيد يقيني فيزداد حزني
و...


اتعثر
بصمة .. حفرة .. بركان

" في داخل شقي الايسر ..

اتردد

اتلعثم

ارتبك

فتنقذني قطرات من زجاج

تيقظني من سكرة ..


صحوة
وألم ..

في علاقة بين الوزن والنفسية

وبين الصحة والنفسية


اليوم خلاص احس ضلوعي اتشبكت في بعض من الألم اضم نفسي واكح لمن عروق رقبتي بتنفجر

حتى البنات يحاولو يشوفو ايش بي وامنعهم

عظامي فيها وهن وانا عارفة لو نفسيتي اتحسنت كل شيء بيرجع تمام بس انا اعرف باللي في قلبي واعرف كيف ترجع نفسيتي بس الموضوع معقد

رجعت البيت برغم الكرف والصيام إلا اني مو حاسة بجوع


ودحين أحس بنعااااس وعندي اختبار السبت

إن يخفق القلب كيف العمر نرجعه

كالذي مات فينا كيف نحييه ..