الهوى الغايب ، للكاتبة : حنان الجرح ، متوقفة من 2009 !!

الفصل الثاني


في بيت ساره
ابو خالد:هلا والله تو مانورت الشرقيه ادخلو البيت بيتكم لكم صدر المجلس واحنا الطرف
ابو راكان:الله يسلمك ويكثر من امثالك والله انك راعي واجب وماتقصر
ابو خالد:الله يطول ان بعمرك..تفضلو.. تفضلو ..ا
ومن الباب الخلفي اللفيلا
ام خالد:هلا والله بأم خالد تفضلي من هنا حياك
ام راكان واخته يتوجهون للباب بنثاقل مقصود:هلا فيتس يا ام خالد شلونتس شخبارتس عساك بخير
ام خالد:بخير ..الحمدلله على سلامتكم نورت الشرقيه والله ..عطوني عباياتكم اشيلها
لمياء:لا والله ياخاله انا اشيلها
دخلت ساره المجلس وريحة العطر اللي كانت تسبق دخولها بفتره..وهي لابسه جينز برمودا..وتي شيرت اخضر تفاحي ..ورافعه شعرها الكستنائي الجميل بكلبسات خضراء
ام راكان بإبتسامه مصطنعه:حي الله سويره ماشاء الله لا اله الا الله قمر يمشي ع الارض
ام خالد:ماعلى لمياء زود ماشاء الله عليها كبرت بسرعه وصار وش زينها اللله يحفظها من عين الحسود
ساره:الحمدلله ع السلامه شرفتونا والله
لمياء:الله يسلمك..والله لك وحشه يالدبه
ساره:هههههه والله انتي أكثر... ودي اسحبك الحين ونطلع للغرفه.. بس مسويه اراعي الذوق والبروتوكول عند امك..هههه
لمياء :ههههههههه وش رايك نخربها ونتركهم
ساره:يالله
طلعت لمياء ولحقتها ساره ..
ام راكان:ماصدقوا يشوفون بعض
ام خالد:ياحليلهم الله يخليهم لبعض على طول
ام راكان:انتو وافقوا وان شالله بيصير على طول >>تقصد زوجوها براكان ويصيرون دايم مع بعض
ام خالد بإبتسامه باهته:الله يكتب اللي فيه الخير..
.
.
.






ساره:هلا والله بالرياض واهلها ..والله وحشتونا
لمياء:والله انك واحشتهم أكثر
ساره بطيب نيه:مين؟
لمياء:أهل الرياض اللي وحشوك
ساره بإنفعال تحاول تخفيه:ماقلتي لي اخبار الجامعه معاك كيف ؟تألقمتي مع نوعية البنات اللي هناك؟
لمياء:اموووووت انا باللي يستحون هههههههههه
ساره:استحي من ايش..؟؟
لمياء ترفع كتوفها بإستنكار تقصد فيه "مدري" ..!
ساره:خلاص ماتدرين لاتتخيلين اشياء انتي اكثر وحده تعرف انها موصح
لمياء:طيب ليه منفعله ترى ماقلنا شي..
ساره:بروح اكلم الشغاله تتطلع اغراضك هنا
لمياء:اي والله تكفين تعبااااانه وابي انام وبجامتي بالشنطه
قامت ساره للدولاب وجابت للمياء بجامه من ملابسها
ساره:خذي هذي ونامي على سريري وبكره نطلع لك أغراضك عشان مانزعجك الحين
لميااء:اممممممواه ياعسل ..لكن لاتحاولين .سريرك لك..وانا بنام ع الكنبه
ساره وهي مطيره حواجبها:ياويل قلبي انتي من جدك..!.. علي الطلاق بالثلاث انك لتنامين على سريري يالموي
لميااء:هههههههههههههههههههههه والله حركه جديده صارن الحريم هن اللي يطلقن بالثلاث
ساره:ياعيني ع الحكي النجداوي ههههههه
لمياء:من عاشر القوم صار منهم ..هههههه
طفت ساره اللمبه وطلعت برى الغرفه وأغلقت الباب بهدوء..
.
.
ولما حست لمياء بالهدوء ووحشته ..والظلام اللي كان مثل الستر اللي تختفي تحته كل ما فاجأتها الذكرى اللعينه..حست بوجع يعصر قلبها..وهي تتذكر كيف كان متفاني في شغله ويضحك مع البنات
اللي في المحل..تذكرت كيف نساها..وهي ماقدرت تنزعه من ضلوعها اللي شابت من كثر التفكير فيه..
دمعت عيونها وبللت المخده
"صوت الباب يدق"
لمياء تحاول تمسح دموعها وتكح عشان تعدل نبرة صوتها المخنوقه
لمياء:تفضلي
دخلت ساره وهي حاطه يدها ورى ظهرها
ساره:آسفه لموي بس عندي مفاجأه
رفعت ساره يدها تبي تولع اللمبه وصرخت فيها لمياء بغرابه
لمياء:لا لاساره لاتولعين اللمبه راسي يعورني
ساره:أوكي براحتك بس كيف بتشوفين المفاجأه
لمياء تفكر بنفسها "ألحين وش تبي ذي مصحيتني من النوم عشان توريني مفاجأه جد ماعندها من الذوق شي"
ساره :هاه مستعده
لمياء::)
وطلعت ساره المفاجأه وكانت جوال N95 ..لمياء مستغربه من الوضع
وش جاب الجوال عند ساره..
وش دراها اني ابي جوال؟
ساره:اخوك راكان قال لأمك تعطيك اياه بس انا قلت لخالتي والله مايعطيها احد غيري
لمياء اخذت الجهاز ببرود :طيب..شكراً
انحرجت ساره من ردة فعل لمياء البارده وهي كانت تتوقع بتسوي لها مفاجأه..
طلعت ساره من الغرفه وهي تتمتم بغضب:الشرهه علي ابي افرحها.. وانا وش دخلني تطلع امها تطلع جدتها بالطقاق ..ناس غريبه!
.
.
.
ريناد:يمه والله العظيم انه كذاب
ام ريناد:تكلمي عدل..هو ماقال عنك كذابه..احترميه ع الاقل مااقول لك حبيه
ريناد:يمه كل زميلاتي يشتكون منه..ماترك وحده بحالها تدرين آخر مره شسوى اخذ رقم صاحبتي تولين ودق عليها
ام ريناد بهدوء :وكيف اخذه؟
ريناد:من جوالي يعني من وين؟
ام ريناد:خلاص انا اتناقش معاه في هالموضوع
ريناد تستغرب من برود امها وهدوءها ماكأن هذا زوجها ..لاتغار عليه ..ولاتحس بأي حب من أي نوع تجاهه..
دخل ابو سامر وهو يدندن كالعاده.."مقادير ياقلبي العنا.مقادير وش ذنبي أنا.."
ام ريناد:خلاص قفلي الموضوع
ريناد تعظ شفايفها بقهر :طيب
ابو سامر:ياليل البعارين...انتو متجمعين والله ان السالفه فيها" أنا".. ..خخخخخ

ام ريناد:الناس اذا دخلو يقولون السلام عليكم
ريناد:الظاهر داخل على يهود
ابو سامر:ريناد اسكتي لأجي ادوس ببطنك انا اتكلم مع امك
ابو سامر:تااااااااامرين ياماما خخخخخخخخ
ام ريناد تبتسم :طيب ياوليدي ..اليوم بتنام في الصاله
ابو سامر:لا تكفيييين امزح ترى
ريناد بإشمئزاز وقرف:انا طالعه انام
ابو سامر وهو يناظر لها بخبث ويقول بنفسه:ليتني شايفك قبل آخذ هالعجوز كان طلعت انام معاك مو مع ذي
دخلت ريناد الغرفه وقفلت الباب بالمفتاح وطفت اللمبه وراحت تنام
.
.
.
في بيت تولين
تولين:بابا ..بروح بكره انام عند صاحبتي ندى في الويكند
ابو تولين:طيب
تولين:بآخذ ميري معاي
ابو تولين:طيب
تولين:بآخذها عشان مايستثقلون طلباتي وتساعدهم في شغل البيت
ابو تولين:انا قلت لك لا عشان تبررين ليه تاخذينها ...ولا لازم اسمع هالثرثره كل يوم ويرمي الشوكه من يده ويقوم من الطاوله
تولين:آسفه بابا

جلست تولين لحالها على طاولة العشا وهي تحس بتأنيب الضمير انها خربت على نفسها فرصه العشا مع ابوها
تولين:ليه يابابا ماتبغى تسمع مني اي كلمه..ليه لهالدرجه صوتي يضايقك..ماتبغى يكون لي وجود حقيقي بحياتك..
انا بنتك..انا قطعه منك..انا حجابك من النار ان احسنت تربيتي..غيرك يدفع كل حياته عشان يسمع كلمة بابا..وانت تدفع كل حياتك عشان ماتسمعها..
طلعت لغرفتها وهي تحس انها مع كل خطوه تقترب للجحيم
دخلت غرفتها الورديه..اللي تكرهها رغم جمالها ..كان الديكور لأكبر المصممين والأقمشه الفاخره والإضاءه الاحترافيه لها أبعاد مختلفه وسحر مختلف
اخذت جوالها بيأس
تبغى تكلم صديقتها رناد الوحيده اللي تفهم معاناتها والوحيده اللي تتأتمنها على أسرارها
لقت رساله من الرقم المجهول
"تكفين عطيني فرصه اشرح لك
حرام اللي تسوينه فيني..يعني هاين عليك دموع رجال مابكت حتى في يوم وفاة امه..وبكت لما غبتي عنه"
كانت تولين تمر بحالة ضعف وإنكسار ..واستسلمت لإحتياجها للحب ودقت عليه واصابعها ترتجف مع كل رقم تضغطه
رد عليها من نص الدقه الأولى
؟؟؟:ألو
كان صوته يدل على انه توه قايم من النوم ..تولين:شكلك كنت نايم..
؟؟؟:كنت أنام عشان احلم فيك ..لكن مدام اللي يصير واقع..وش ابي بالنوم
تولين:ويمكن تكون للحين تحلم
؟؟؟:قولي لي..انا بالحلم؟ تكفين كافي صدمات ماعاد فيني اتحمل
تولين:خلينا نحلم سوى..الواقع مشوه..قاسي..بشع..والحياه ماتستاهل من قلوبنا كل هالقسوه
؟؟؟:يآآآآآه ..فلسفة الحلم عندك ..جميله جداً
تولين:غمض عيونك
؟؟؟:كيف؟
تولين :غمض عيونك الحين
؟؟؟:غمضتها
تولين:وش تشوف
؟؟؟:ظلااااااااااااام
تولين:فكّر في ريم ..تخيلها عندك ..تلعب بشعرك..وتهمس لك في أذنك بحنان...وتقول"احبك"..
لحظة صمت
تولين:وش تشوف الحين
؟؟؟:انا وريم..
تولين:والظلام وينه؟
؟؟؟:صار نور
تولين:وبداية كل حلم ..ظلام
فهمت علي ..:)..بالحب والخيال..كل شي حلو..كل شي وردي ..طاهر..عميق ..
بس بقلوبنا نقدر ننتقل من الظلمه الى النور..من الكآبه ..للفرح..من الوحده..للإنتماء
قاطعها بلهفه
؟؟؟:ونهاية الحلم
تولين:سراب
؟؟؟:ماتوقعتك متشائمه كذا
تولين:لأني مازلت محتفظه بجزء عقيم من واقعيتي..
؟؟؟:لهالدرجه واقعك قاسي
تولين:لو جربت انك تنولد وانت"بنت" في مجتمع ذكوري بحت..راح تحس بقساوة هالواقع
؟؟؟:كلامك هذا من تجربه ..ولا مجرد فكره مؤمنه بصدقها
تولين خنقتها العبره وهي تقول:تجربه ..والله..تجربه
لحظة صمت..
؟؟؟:روحي فدى هالصوت..ليه ساكته؟
تولين:بكره وراي دوام لازم انام الحين
؟؟؟:نامي واحلمي فيني هالمره..تعبت احلم انا لوحدي..يمكن نشوف بعض سوى
تولين:تصبح على خير
؟؟؟:تصبحين على حلم يشبه لك
حست تولين انها طول المكالمه وقلبها متسارعه نبضاته بشكل عجيب وكأنها كانت تركض لمسافات طويله..أطرافها باااااارده ..وتحس بسعاااااده وأماااااان ماعمرها اختبرتها بحياتها
حطت راسها ع المخده وحضنت الجوال ونامت

في الصباح في بيت ساره
قامت ساره بخطوات هادئه يم الدولاب تطلع ملابسها عشان تتجهز للجامعه ..وكانت تتصرف بهدووووء عشان لاتصحي لمياء المستغرقه في النوم بعد بكاء ليلة أمس المتعب
اخذت كل ملابسها ومكياجها وجوالها وطلعت برى الغرفه
اخذت شاور سريع
ونزلت للصاله وهي تفكر ياربي وين أتجهز
آها مالي الا المقلط فيه مرايا كبيره ومحد جالس فيه
نزلت بسرعه للمقلط ولقت فيه مخدات وبطانيه أستغربت مين جابها هنا ؟؟
خطر ببالها اخوها الصغير ..اللي يحب ينام عند التلفزيون
قفلت الباب وجففت شعرها وحطت ميك أب ناعم وتركت شعرها الكيرلي منسدل على اكتافها وكانت لابسه روب الحمام ...وواقفه تكوي التنوره
وحاطه سماعات الجوال في اذنها وتسمع الراديو..
انفتح باب المقلط وماحست بالصوت لأنها كانت بجو ثاني مع فيروز ..
وكانت المفاجأه الكبرى لراكان..
شاف بنت في الغرفه اللي نام فيها لابسه روب الحمام وتكوي ملابسها!!!!
من الصدمه وقف مكانه وهو يناظر لها كيف تكوي وكيف تغني بفرح مع فيروز..
التفتت عشان تحط التنوره ع الكنبه وتكمل كوي
وشافته
ساره وهي تشهق برعب وترجع لورى خطوتين
راكان انسحر بجمالها الهادئ وشعرها المموج مثل الشلال على اكتافها ..وماقدر يقول اي كلمه او يبرر دخوله للغرفه
ساره:اطلع برى وش تنتظر؟
راكان:آسف واللله ما...
ساره:اطلع برىىىىىىىىىىىىىىى
قفلت الباب بقوه وهي تحس بحراره في جسمها من القهر ..
وقح ..قليل أدب..ويناظر بعد..لا ويدور في البيت كأنه بيت ابوه..صدق انه مايستحي على وجهه..
طلع راكان من البيت وهو منكسر من الموقف السخيف اللي صار له مع زوجة المستقبل اللي مايتمنى احد في الدنيا غيرها
وهو في السياره
الحين وش بتقول عني
شكلي طحت من عينها بالمره
بس هي الغلطانه وش يجيبها للغرفه اللي نمت فيها
بس وش حلاتها وهي معصبه لو اني طولت شوي كان خقت علي وهو يناظر لأنعكاس وجهه في مرايا السياره

ساره وهي تلبس عباتها
معقوله هذا راكان
ماشاء الله صاير احلى من أخته
وهي تطالع لوجهها بالمرآيا
مااالت علي ولا شافني الا وانا بهالحال!!
استغربت من تفكيرها بهالشكل ورجعت لكبريائها وهي تقول
:وانا وش علي منه شافني كيف..مو لازم اعجبه..والله لو تنطبق السما ع الأرض مااخذه


ابو سامر يتجهز عشان يودي رناد للجامعه..وطبعا لازم يهندس بشكله عشان البنات اللي هناك..
نزلت ريناد بكسل وهي تشيل دفتر المحاضرات بتثاقل وملل
ريناد:تحرك بسرعه باقي خمس دقايق وتبدا المحاضره ولا لازم انطرد كل مره عشان ترقم بنات الجامعه انت ووجهك..
ابو سامر:والله لو لا احترامي لأمك ورغبتها لأخليك تروحين الجامعه على ارجولك جعلها الكسر ..
ريناد :هه ...احترام..انت ماتعرف وش يعني الإحترام
ابوسامر التفت لها وفي نظرته حقد وكره لعنجهيتها المفرطه كان يتمنى يقدر يغير امها عليها عشان ياخذ راحته في تعذيبها ..بس كانت ام ريناد..أمرأه من حديد..ماتسمح بالغلط..سواءا كان من ريناد او من زوجها..رغم انها ارتكبت اعظم خطا في حياتها يوم تزوجت واحد أصغر منها..وهي عندها بنت شابه في البيت
.
.
وصلت ريناد للمدرج اللي فيه المحاضره بعد مرور خمس دقايق على بدايتها..
كان المدرج فااااضي
دقت على نوف
ريناد:الو هلا نوف وينكم؟
نوف:عطيني البشاره
ريناد:لاتقوليييييييييين
نوف:الا والله انلغت المحاااااضره يااااااااااااي وناااااااااااااسه
ريناد:ييييييييييييييييييييس ياااااااااااااااسلام
نوف: يالله تعالي احنا تحت الدرج بعلوم اثنين
ريناد:ولايهممممممك ثواني وانا عندكم
نوف :ريناد جيبي لي معاك بيبسي وانتي جايه
ريناد:شوفي البنات مره وحده وش يبون من الكافتيريا وعلى حسابي احتفالا بالمحاضره الملغيه
وسط صراخ البنات كل وحده تبي شي وبعدين تكنسله ..قفلت ريناد جوالها وقررت تجيب لهم على ذوقها
دخلت ريناد الكافتيريا وجات وحده من البنات ودقت بكتفها عمداً
ريناد:وجع ان شالله ماتشوفين
رجعت البنت اللي دقتها وكانت مسترجله
المسترجله:قلتي شي
ريناد:ايه قلت ..فتحي عيونك وانتي تمرين مالها داعل هالحركات
المسترجله:انتي شكلك محد قد صفقك قبل شرايك بهذي
وعطتها كف على وجهها
كان بيد رناد علبة ببسي كبتها كلها ع المسترجله وسط صراخ البنات وتصفيقهم
تجمعو البنات كلهم وصارت ريناد ماتشوف وين المسترجله وفجأه
طاحت ريناد ع الارض مغشي عليها


تحت الدرج مكان تجمع شلة ريناد جات وحده من البنات اللي تدرس معاهم
فاطمه:تولين نوف بنات الحقو على ريناد تضاربت مع بنت في الكافتيريا واغمى عليها
صاحت تولين وراحت لفاطمه وشدت ملابسها بقوه :انتي وش تقولين ؟
قامت نوف وندى وساره وركضو ع الكافتيريا
ولحقتهم تولين وفاطمه ..
كانت سمر معاهم تحاول تهدي تولين اللي كانت ارجولها ماتشيلها من الرعبه والخوف على صديقتها
دخلو الكافتيريا ولقو دم مكان الهوشه لكن ريناد والبنت اللي تضاربت معاها مو موجودين
جلست تولين على الأرض وهي تبكي :وش صار قولو لي وش صاااااااااااااار
طلعت نوف وندى من الزحمه ومعاهم التقرير الكامل من البنات اللي شهدوا على المضاربه
اخذو تولين برى الكافتيريا
نوف:تولين بلا ورعنه قلنا لك مافيها شي بس انشق راسها بغرشة سفن أب
ندى:نوف مو وقتك تستخفين دمك
نوف:قسسسسسسم بالله مااستهبل سمعتي هذيك الدبه وش قالت ..
تولين:بس خلاص ماابي اسمع شي وينها الحين؟
ساره:ودوها للعياده
فاطمه:بنااات بنااااات هذي هي اللي تضاربت مع ريناد
وبدون شعور قامت ساره ولحقتها ندى ونوف وسمر وراحوا لها..
اخذت ساره دفتر نوف جق المحاضرات وكان كبير مره وحذفته على وجه المسترجله وجا السلك اللي بالدفتر على وجهها <<احح يعور
وبدأ شد الشعور والضرب
لكن أربعه على واحد..قويه
وكانت نوف قطوة الهوشه ..شوهت وجه المسترجله بالتمخيش
وصل أمن الكليه واخذ البنات والمسترجله للإداره
وكانت تولين وفاطمه يناظرون من بعيد للي صار...
.
.
.
راحت تولين للعياده تتطمن على صديقتها
دقت الباب ثلاث دقات متتاليه ودخلت
تولين:دكتوره..ريناد موجوده
الدكتوره:تفضلي ..هذي هي
تولين:ريناااااااااااااااااد..
ريناد وهي تبتسم:هلا وغلا ..وش رايك بشكلي الحين
تولين:ههههه يجنن..طمنيني كيفك الحين..كلمتي احد من أهلك يجي ياخذك
ريناد:لا لا ماابي مو ناقصني الحين الا شماتة ابو سمره ..خخخ.
تولين:اقول بلا عناد انا بكلم امك وهو زي السواق يجي لهنا ياخذك ويوديك البيت ولايقدر يتكلم
ريناد:طيب طيب بس بشرط..تجين معاي البيت
تولين:اوكي
ريناد:وين البنات؟
تولين:اهووو فاتك وش صار؟
ريناد:قولي وش صار
تولين:صديقاتك الله يبقيهم ذخر لنا...طقوا المسترجله طق..والله لو شفتيها كيف اندعست لترحمينها
ريناد:هههههه قولي والله
ريناد قطبت جبينها
تولين:ريناد شفيك راسك يعورك
ريناد:بس عشان ضحكت
تولين:اوكي اجل ارتاحي الحين وانا بروح اجيب لك عصير واكلم اهلك
ريناد:اقول اقعدي بس اخاف تروحين للكافتيريا وتنطقين مثلي خخخخ
تولين::) ماراح أتأخر..وانتي حاولي تنامين..
ريناد:تكفين روحي تطمني ع البنات اخاف ينفصلون بسببي
تولين:لا ماعليك واذا انفصلوا يومين ولا ثلاث عشانك وش فيها؟ ..والله لو كان فيني اعصاب وقتها ..كان قطعتها بأسناني الحقيره المريضه النفسيه هذيك
ريناد:تكفين يالقويه
تولين:افااا عليك وش على بالك ..ههههههههههه
.
.
.
وفي الرياض
ابراهيم :قلت لك خلاااااااص انا إنسان مااحب احد يأمرني
طلال:بس انا مأامرتك انا اقول تروح تعتذر له احسن لك لأان رزقك بيده
ابراهيم:رزقي بيد الله مو بيد احد من البشر وانا اعتذاااااار ماني بمعتذر له
طلال:بكيفك انا نصحتك لوجه الله.. مو بطايلني شي ان فصلوك
ابراهيم:مشكور ياطلال ومقدر لك نصيحتك ..بس احتفظ بها لغيري انا مااحتاجها..
.
.
.
طلع ابراهيم من المحل وهو متنرفز من سلوك مديرهم المصري اللي يعامهلم كأنهم عبيد عنده ..
ابراهيم:والله حلوه هذي البلد بلدنا ..والغرب يفصلونا ويطردونا
قابله المدير المصري وهو طالع
المدير:على فين يابني هي وكاله من غير بواب
ابراهيم:تدري مين اللي المفروض يكون هنا بواب ..انت وأشكالك
المدير:الله ..انتا عارف بتتكلم مع مين ؟
ابراهيم:ايه اعرف مع واحد راس ماله جرة فول وصحن كشري
المدير:اعتبر نفسك مفصول من دلوقتي
ابراهيم قرب وجهه لوجه المدير:نشوف مين بيرجع لأهله أول
المدير خاف من ابراهيم وماقدر ينطق بأي كلمه
طلع ابراهيم لسيارته وبدا يسوق بسرعه مجنونه وهو يلعن حظه اللي خلاه يحتاج لوظيفه مثل هذي
شغّل الراديو يعصبيه وكأنه يبغى يبعد صوت مديرهم النشاز وهو يقول له"انتا مفصول من دلوقتي"..
صحيتي بداخلي توك
وكنتي نااااااايمه بروحي
وفزيتي من اسبابه
صباااااااااااااااااااح الخيييييييييييييير ياجروحي
تركني بلا سبب وراح
خذا من دنيتي الافراح
وبدل ضحكتي بجرااااااااح
وقال لفرحتي روحي
صباااااااااااااح الخير ياجروحي.
.
كان بوقتها قلبه ينزف ألم..يوم تذكر لمياء وهي داخل المحل
تذكر الإنكسار اللي شافه بعيونها..تذكر قوة باسه وهو يحاول يبين لها انه ماعرفها
تذكر دموعها..اللي كانت تطعن في وفاه..
يآآآآآآآه كانت واقفه قباله وماقدر يقول لها حتى كلمة آسف
كان كل همه بذاك الوقت يبين لها انه ماعرفها
وكييييييف مايعرفها
وهي اصدق شي حصل له بحياته
كيف مايعرفها وهي كانت كل الحياه عنده
كانت هي السبب الأول في تركه للشغل
كره المحل وبوابة المحل والمكان اللي كانت واقفه فيه
كره جبنه وخوفه وانعقاد لسانه وقسوته
كره نفسه..حياته..ضروفه..خيانته
كره كل تفاصيل مستقبله اللي فرضوها عليه..
وقف عند استوديو للأغاني
واشترى شريط نايف البدر
وحط على اغنية صباح الخير ياجروحي..
اللي كانت اهداء من لمياء له..في "ليلة الخذلان الكبيره"..


وش اللي صار ليلة الخذلان الكبيره؟
والبنات هل بيتحولون لمجلس تأديبي
وموقف ندى مع اهلها المتشددين بعد اللي صار لها بالكليه كيف راح يكون؟
راكان وساره..واللي صار بينهم..هل معقوله بيقرب هالشي منهم ولا بيزيد ساره نفور وإبتعاد..؟