ايامنا الحلوة

الجزء الاول


في بيت قديم او بالاصح غرفه قديمه ام تنادي بنتها

يا طفله روحي شوفي من يدق الباب


راحت طفله تركض بالحوش الكبير اللي مليان سيارات قديمه


وحديد مصدي وحاويات ضخمه ومعدات ضخمه كلها قديمه ومصديه

ومتأكله


كانت طفله ساكنه هي وامها وابوها في حوش تابع للبلديه وابوها حارس عليه


والمفروض انه مايسكن عائلته معه بس ابوها بادي كان فقير ومايملك من الدنيا شي الا راتبه القليل


وكان كبير بالسن هو وزوجته وجابو بنتهم طفله على كبر


وماكان احد يدري انه متزوج وعنده عائله ومسكنهم بالحوش اللي تابع للبلديه


وصلت طفله عند الباب البني الكبير اللي عفى عليه الزمن وتأكلت اطرافه من كثر ماهو مصدي


وبيدها الصغيره فتحت الباب ولقت بنت الجيران وضحى



قالت طفله: لوضحى هلا وغلا وش تبين بهالظهر جايتنا وشافت بيد وضحى قدر


قالت وضحى: اول خذي مني بعدين اسألي وهي تناولها القدر اللي مرسلته ام الخير


اللي هي ام وضحى واسمهاام محمد


وضحى: امي تقولتس لا تنسين مريها بكرة العصر


قالت طفله: وهي تبتسم قولي لخالتي ام محمد تبشر


وراحت وضحى وهي تقول: يالله سلام


وقفلت الباب طفله وتوجهت للغرفه الوحيده اللي بالحوش وهي شايله

القدر اللي ارسلته ام محمد الله يجزاها بالخير


رجعت وضحى للبيت وشافت امها الحبيبه وهي تجهز الغدا


وقالت لأمها :ارتاحي يمه انا اكمل


قالت ام محمد: وديتي الغدا لأم طفله هزت وضحى راسها بالايجاب وسأ لت امها: يمه اصحي ابوي





قالت ام محمد: لا ارسلت اخوتس محمد يصحيه انتي نادي اخوانتس وخواتس وتجمعوا على السفره


السفره اللي كانت على الارض ببساطه ومحبه ابو محمد جالس ويناظر باولاده


ويقول :في احد ناقص وين امي جات بنته اللي دايما يناديها امي لأنه مسميها على امه شيهانه وراحت حبت راس ابوها



وجلست على السفرهوبدوا يتغدون



بيت ابو محمد بيت عائله محبه تتكون من ابو محمد وام محمد وبنتهم الكبيره وضحى( 18) واخوها محمد( 16) وبعده تجي اشواق( 15) ومنيره ( 14 )وشيهانه ( 12)ونورة( 10)و لمياء ( 8 )


على السفره وضحى تناظر خواتها وهم يضحكون وطيرت عيونها فيهن

تبغاهن يسكتن عشان ما ينتبه ابوها


وفعلا ابو محمد جت عينه على منيره ونورة وهن يهزن من الضحك اللي ما له سبب


وزعق فيهن ليش الضحك وهن زاد ضحكهن فقامن من على السفره يركضن فوق لغرفة البنات


ولحقتهن شيهانه وهي تقول :الله يقطع ابليس والله ان الضحك عدوى

صرت اضحك مثلكن وانا مدري وش السالفه الا ليش تضحكن قالت منيره:



ولاشي بس يتسلط علي الضحك قدام ابوي و ها لخبله نورة بس انغزيها

تشتغل ضحك

ومادرن الا بام محمد داخله عليهن وهي تهاوش :ليش الضحك كم مرة

نهيتكن عن الكركرة لازم ا بوكن يعصب

البنات: خلاص يمه توبه ان شاء الله مانعيدها

ام محمد تقول :المهم من تبي تروح معي للسوق اليوم
البنات كلهن بصوت واحد انا انا

قالت: شيهانه يمه انا اخر مرة خليت نورة تروح هالمرة دوري


قالت منيره :ياسلام لا والله مااحد رايح الا انا انتن انطقن

تأففت ام محمد وطلعت من الغرفه وهي تقول : لا أتفقتن علمني انا ابي

اروح اقيل واول ما يأذن العصر صحوني انا وابوكن





************************************************************ ****************************************




في بيت ابو طفله بيت العم بادي جلسو على السفره اللي مصنوعه من سعف النخل بشكلها الدائري



وطفله تحط القدر بالوسط وتقلبه بوسط صحن قديم المفروض انه دائري

بس من كثر ماهو معوج صار ماله ملامح


قالت ام طفله :يالله تكثر خيرهم وترحم والدينهم والله ان ام محمد هذي

بنت حلال ماعمرها قصرت فينا الله يجزاها الجنه


ومدت يدها السمرا اللي الزمن نحت عليه تجاعيده وسمت بالله وبدت تاكل


اما طفله فراحت طرف الغرفه وصبت من الحنفيه ما ء بطاسه وحطته عند

ابوها




وقالت: له تغدا يبه ليش ماتاكل


ناظر فيها ابوها ودمعت عينه

(الفتره الاخيرة صار ابوها قليل الكلام وكل ماناظرها دمعت عينه )


قالت له طفله :ليش يبه تنا ظرني كذا وش فيك الله يخليك لي لا تشيلني هم

لك كم يوم وانت ما انت عاجبني انت تعبان اروح اكلم جارنا ابو

محمد يوديك المستوصف


هز راسه وقال: لا يابنتي ما فيني شي بس افكر لا غمضت عيني وين تبين

تروحين انتي وهالعجوز والله ان الهم ذابحني


فزت طفله وقالت: لأبوها الله يخليك لنا لا تقول هالكلام توك شباب يا

ابو طفله


وهي تمسك يد ابوها وتبوسها وتضمها بقوة وتقول: الله لا يحرمني منك


يبه


ومدت يدها للصحن واخذت شوي رز وكورته بيدها ولقمته ابوها وهي تقول:


يله بسم الله والا تبي ترد يدي


واكل منها وهو ماله نفس بس يبي يرضيها



************************************************************ **



اذن العصر


وراحت نورة صحت امها وابوها للصلاة راح ابو محمد للمسجد وامهم

صلت ولبست عباتها وقالت : هاه من اللي بتروح معنا انا و وضحى واشواق


قالت شيهانه: انا ولبست عباتها وطرحتها وطلعت للصاله لقت امها

تكلم وضحى :تقولها روحي البسي شراب اسود


قالت وضحى: يمه عباتي طويله ماراح تبين رجولي


قالت ام محمد:ولو حنا بنروح السوق مشي افرضي طحتي تعثرتي بتطلعين


عتبه عاليه تكشف سيقانتس قدام الرجال البسي بسرعه يله بالحق العصر

من اوله


فعلن لبست وضحى الشراب الاسود وطلعت لباب الشارع ولقت امها واقفه


ومعها خواتها اشواق وشيهانه وجارتهم ام نايف وراحو للسوق يمشون وسط


الحاره والكل محترمهن من سترهن






في السوق




ام محمد تقول وضحى: بصوت واطي شوفي هذي الجلابيه مقاستس



قالت وضحى :ايه يمه قدي بس انا يمه ماابي جلابيه انا ابي تنورة

جنز


ردت عليها امها وقالت: ومن قالتس ان هذي لتس هذي لراعية


النصيب خذي لتس تنورة جنز وهاتي وحده ثانيه معتس وبسرعه عشان



احاسب


وبعد ماحاسبو مرت ام نايف محال العبايات واشترت لبنتها نوف عباة

راس


وقفت ام محمد وهي تنادي وضحى: تعالي قيسي هالعباة خل اشوف طولها

عليتس



قالت اشواق :يمه انا ابي عباة جديده وش معنى وضحى بس


ردت امها وقالت: هذي ماهي ل وضحى واسكتن خلاص


وشرت العباة بعد ما تأكدت من طولها ومقاسها ورجعو للبيت مشي زي


ماراحو


وقبل مايدخلون البيت ام محمد عزمت ام نايف على القهوة وما صدقت


ام نايف


قالت منيره: يوم شافت ام نايف داخله عليهم هلا والله بام نايف وسلمت


عليها


وقالت لها باروح ادق على نوف اخليها تجي مادامك عندنا


وفعلن خمس دقايق ونوف محضرة وجالسه هي ومنيره واشواق و وضحى وهات


يا حش بالمدرسات


ام نايف تسأل ام محمد: الا وش اخبار ام طفله من زمان ما مريتها


قالت ام محمد : ان شاء الله انهم بخير بس العجوز صارت ما تقدر تمشي


صارت تحبي تقولين صارت بزر والله ان طفله تقطع قلبي بين هالام المريضه


العاجزه والابو الشايب اللي ما يندرى وش سالفته ولا منين هو من يوم

سكن في هالحوش وهو محيرني


ام نايف: تسأل الا هو كم له سنه بها الحوش


ردت ام محمد : والله مدري بس من 18 سنه جاب زوجته وبنته وسكنهم


بهاا لخرابه ولا احد يدري وين كانو ساكنين


ام نايف :بشرافه وفضول ماعمرتس سألتي ام طفله وش سالفتهم وين كانو

قبل لا يجون


ردت ام محمد وقالت :والله يا ختي انا ما احب اسأل اللي يبي يقول

يقول من نفسه



واذن المغرب وقطع عليهم الاذان الكلام


وقامت ام نايف وراحت بيتها بعد ماخذت وعد من ام محمد ان بكره


السهرة عندهابالبيت لان اخوها ابو عبد الله رايح للديره


ام نايف ارمله وعندهانايف 18 ونوف 16 وبسمه 10وساكنه هي وامها عند


اخوها ابو عبد الله هو وزوجته وعياله




************************************
*******************************
*********************************


في اليوم الثاني



دقت طغله بيت ابو محمد وفتحت وضحى الباب يوم شافت طفله قالت: ياهلا

ياهلا والله ادخلي ادخلي حيا الله من جانا


دخلت طفله وهي متستره بعباتها وغطاها و وضحى تقولها: اكشفي ترى


ابوي واخو ي ماهم فيه


نزلت طفله طرحتها وخلتها على كتوفها وجلست بمجلس الحريم اللي كان

عباره عن جلسه ارضيه


قالت لوضحى : وشلونس يا وضحى وش مسويه بالدراسه


ردت عليها وضحى: الحمد لله ماشي الحال بس صعبه الدراسه من دونس


انتي ليش تركتي الدراسه يا طفله حرام والله كنت اشطر وحده فينا


تنهدت طفله وبان بملامحها الالم والحزن


وقالت لوضحى : بلله مامليتي من كثر ماسألتيني ها السؤال انا مليت



منكثر ما اجاوب عليه كيف تبيني اروح للمدرسه وابوي وامي بها



الحاله قولي


ابوي حاله هين يقوم بنفسه بس امي يبيلها احد يراعيها على طول



الله وكيلس ماصدقت على الله انها نامت عشان اجي اشوف امس وش تبي مني


الا على طاري امس وينها بلله روحي استعجليها انا مقدر اطول عن


امي


قامت وضحى وقالت :لها ابشري انا كم عندي طفله هي وحدة بنت جيرانا الله




يعيني عليها وجت بتطلع الا هذي امها داخله عليهم


وسلمت السلام عليكم هلا والله بطفله فزت طفله بسرعه ومشت لحد ام محمد

وسلمت على راسها




وقالت لها: هلا فيس ياخالتي وشلونس وشلون عمي ابو محمد ان شاء الله


كلكم بخير



ردت عليها ام محمد: يارب لك الحمد كلنا بخير بشريني عن امس عساها


احسن عسى عيونها اشوى



ردت طفله بهم: لا والله الا كل يوم احس اانها اردى من اللي قبله بس


الشكوى لله وداها ابوي قبل مده بس قالو ان عندها انفصال بالشبكيه


بالعين اليسار واليمين فيه مويه بيضا وانها محتاجه عمليه بس هي عيت


تسويها حتى القطرات اللي صرفوها لها عيت علي انقط بعيونها تقول

يتكحل وبتطيب عيونها


ام محمد تبي تغير مزاج طفله قالت لوضحى : يا بنت امس يومنا رحنا


للسوق وشفتي الجلابيه الورديه وقلتي لي يمه هذي تليق لطفله ابغى



اهديها ياها



روحي جيبيها هي والتنورة الجنز اللي بعد استحليتيها لطفله يلله



فزي



طبعا وضحى نطت عيونها ونا ظرت بأمهاوكأنها تقول وش تقولين يمه


انا ما سويت شي من اللي قلتيه الا انتي اللي شريتهن ماهو انا


بس بلحظه فهمت ان امها ماتبي تحرج طفله


وطارت على غرفة امها وجابت الجلابيه والتنورة و العباه ومدتهن لطفله


وهي داخله بالدور: طفله تصدقين انا من شفت الجلابيه



وانا اقول هذا اللون مايليق الا على طفله والتنورة اشتريت وحده لي


وحدة لس يللله من قدس طقمت انا وانتي




طفله كانت مرررررره محرجه منهم وقلب لونها احمر من الاحراج وقامت


وحبت راس ام محمد



وقالت: والله ياخالتي اني خجلانه منكم كل ما رحتو للسوق تجيبولي معكم



حاجه او اكثر بصراحه احس اني مكلفه عليكم



ام محمد تمسح على شعر طفله الطويل جدا اللي دايما وهو مجدل بظفيره


وحد ه طويله ومرتبه


وتقولها: انتي وحده من بناتي ولا عاد اسمع منس هالكلام اختس وضحى


واشتهتلس هاللبستين ما فيها شي



يلله انا بقوم باروح عند جارتنا ام احمد بمر اسلم عليها تبن شي


يابنات انا ماشيه


جلست وضحى وطفله يسولفن


وانضمت لهن اشواق اللي سألت طفله: الا يا طفله انتم وشلون ساكنين



بيتكم ذا والله اني اخاف لمن امي ترسلني لكم





اولا كبير وغر فتكم باخر الحوش بالزاويه



ثانيا كله سيارات كبيره ومعدات ومافيه مكان فاضي الا الدرب اللي



تمشون فيه مابين غرفتكم والباب اللي يا طووووووله





وكله كوم وبيتكم في الليل وظلامه كوم ثاني يخووووووووف



قرصت وضحى اختها اشواق وهي تهمس لها خلاص عيب




قالت اشواق وهي تفرك مكان القرصه:ااااااييي وش سويت ليش تقرصيني



قالت طفله :خليها يا وضحى ترى ما قالت شي وهي صادقه والله اني اموت


خوف احيانا وذاتا بالشتا بررد وظلام



واخس شي لا خلص كاز الدفايه ورحت اعبي الجالون من الحوش يارررررعب


ماهو طبيعي



بس وش اسوي هذا حياتي وهذي مقدرة ابوي الله يخليه لي ولا يحرمني منه



وقامت طفله ولبست عباتها وشالت الكيس حقها وقالت للبنات: يله


سلام يا حلوات


وطلعت والبنات واقفات ورى الباب يشوفنها لين وصلت باب بيتهم






************************************************************ *******



**


في نفس الليله ابو محمد طالع من المسجد سمع احد يناديه : يالأخو


لحظه لو سمحت



التفت ابو محمد للرجال اللي ناداه وقال : سم تامر بشي يالأخو



الرجل:السلام عليكم


ابو محمد :عليكم السلام


الرجل :بغيت اسألك عن رجال اسمه بادي بن سرور ال....


ابو محمد : اي وش فيه


الرجل ابي اعرف وين ساكن


ابو محمد خاف على بادي لأنه عارف انه ممنوع يسكن عائله بحوش تابع


للبلديه سأل الرجال: وش تبي منه



الرجل :ابد الله يسلمك بس بيني وبينه سالفه خاصه ومااعرف بيته


ابو محمد مسك الرجال من يده وهو يمشي معه وقال: اقلط معي خل نقهويك



واناديلك بادي


الرجال : تسلم والله بس انا مستعجل دلني بيته



ابو محمد : والله ان عشاك الليله عندي وبادي لاحقن عليه وهو يفكر انه


يخلص جاره بادي من الرجال ومن انه يدل بيته



استسلم الرجال وقال والله ماتكلف على روحك انا ماشي الليله ل بيتي بس


جاي اشوف بادي بشغله ضروريه


ابو محمد : ماني متكلف عشى بيت ويله خل نمشي عن البرد وهو يلف


نفسه بالبشت الصوف


وصل ابو محمد هو وضيفه للبيت ودخله للمجلس ودخل وشاف ام محمد


بالمطبخ وهي تقلب بالجريش وسلم عليها


ابو محمد : الله وش هالزين وش انتي لابسه يابنت وهو يبتسم



ام محمد وهي محمره من الخجل قالت: هلا والله من معك اسمعك ترحب وتهلي


ابو محمد : معي ضيف هاتو القهوة والقدوع وجهزو العشا ترى بيتعشى معي


رجالين ولا تنسون اللبن (( عاشق لبن ))



وراح وما امداه يوصل للمجلس الا رجع ثاني للصاله وشاف بنته شيهانه



وهي فزت وقامت



شيهانه : هلا والله ونطت تحب راسه



ابو محمد: وين اخوس محمد


شيهانه : توه راجع من برى اناديه لك



ابو محمد : اي والله يا بنتي قولي له يروح بيت بادي ويقوله ان ابوي



يبغاك في مجلسه ضروري يله بسر عه يا يمه



راحت شيهانه لأخوها محمد وعلمته باللي يبيه ابوها




و فعلا راح ودق الباب على بيت بادي وطلع له بادي وعرف ان ابو محمد




يبيه



بس ما فكر ابدا ليش يبيه ولو درى وش باأنتظاره ما طلع من بيته ابد






************************************************************ ******







انتهى الجزء الاول اتمنى منكم


ان تقيمو عملي وان تسعدوني بردودكم اختكم شبيهة امي

الجزء الثاني




في مجلس ابو محمد



محمدرجع عند ابوه وقام يقهوي الضيف ويسمع كلام ابو ه مع الضيف


ابو محمد سأل محمد : ناديت بادي


محمد ايه وقال انه بيجي هالحين


الضيف : على كذا هو جاركم وساكن قريب منكم


وينه عن حوش البلديه اللي مقابلكم



كان محمد بيرد بس ابوه بنظرة منه خلا ه يسكت


ابو محمد: لا وينه وين حوش البلديه و بعدين ليش مشغل بالك هالحين يجي

وتاخذ العنوان منه


دخل عليهم بادي وهو يسلم بصوت عالي ويوم شاف الضيف وهو يصنم وتتغير


ملامحه




ابو محمد ما فاته ملامح بادي المتغيره سلم بادي على الضيف ببرود


وحذر


الضيف يوم شاف بادي فز وعلى وجهه ابتسامة فرح وبنفس الوقت مرتبك


وسلم على بادي بحراره واخر السلام ضمه قوة



وهو يقول: هلا والله بريحة الغوالي هلا والله بالنسيب وشلونك وشلون


اهلك


بادي يرد عليه ببرود : هلا فيك يا ابو مساعد وشلونك انت وشلون من يعز


عليك


بادي وهو يلتفت لبو محمد وهو ياشر على ابو مساعد : هذا نسيبي


كان ماخذ اختي طفله اللي توفت الله يرحمها :


رد ابو محمد :يا هلا و يالله ان تحييهه


وقام لأنه حس ان في سالفه بين بادي وابو مساعد


ابو محمد :دقايق وراجع خذو راحتكم وهو يسحب ولده محمد معه


ابو مساعد وهو يقرب من بادي : شخبارك يا بادي وشي احوالك عساك


بخير ونعمه وشلون مرتك ترفه عساها بخير


بادي: الحمد لله ما نشكي من باس


تردد ابو مساعد بس تكلم بصوت مخنوق : بنتي شلونها عايشه والا ماتت


ولحقت امها


بادي قلبه رقع ورجف وحس ان الدم جمد بعروقه من سؤال ابو مساعد


بادي : توك تجي تسأل بعد كم سنه توك تذكر بنتك



مالك بنات بنتك اللي تكلم عنها ماتت من يوم ما ماتت امها وتركتها


باالمستشفى ولا سألت عنها


ابو مساعد وهو منهار : ماتت وانا كنت جاي ومتأمل انها عايشه عندك



وانت ربيتها


مسح دموعه وهو يقول : اختك لها كمن شهر وهي تزورني في المنام


وتقولي اتقي الله في بنتك اتقي الله



بادي :معليك يارجال تراه حلم لا يجي في بالك



الا مساعد وينه وش اخباره سمعت انه ماشاء الله صار ضابط في الحرس


الوطني


ابو مساعد : اي والله الله يخليه لي والله انه رجال طالع عليك يابادي في



كل شي يذكرني فيك كثير تقال انه ولدك انت ماهو ولدي انا



بنفس الوقت في جهه ثانيه من البيت ام محمد تنادي بناتها يساعدونها


على تجهيز السفره وحده تسوي السلطه والثانيه ترتب الفاكهه والثالثه


ترتب السفره في المقلط وام محمد عليها بس تغرف الاكل وطبعا زادت


اصناف سريعه تتقدم على العشا دخل ابو محمد المقلط وشاف السفره


مرتبه وعامرة بمالذ وطاب بس فيه شي ناقص



نادى وضحى وسألها : وين اللبن لا تنسين بسرعه طيري جيبيه



وراح المجلس وقلط ضيوفه وتعشو وشربوا الشاي بعد العشا وقام ابو


مساعد بيمشي سأله بادي : الا انت عندكم تلفون


ابو مساعد : اكيد خذ هذارقم بيتي



ابو محمد : يرجال ترى عطلة الربيع جايه وحنا بنخيم كان تجون معنا


للبر

ابو مساعد : والله انها ماهي بشينه تراني خويكم ((عاشق للبر))



بادي : انا والله ما قدر المرة تعبانه ماهي بحال بر وانا مقدر اخليها

لحالها


ابو محمد: لا تشيل هم يابن الحلال ام محمد بتهتم فيها هي والبنات


انت بس خاونا والله ان تستانس انت واهللك



بادي وهو يقوم : يصير خير يله تمسو على خير



قام ابو مساعد معه وابو محمد


ابو مساعد : يله ارخصو لي انا بسري (( ساكن في مدينه ثانيه))الليله


لهلي يله امنتكم الله ونشوفكم على خير


بادي وابو محمد : في امان الله






راح بادي لبيته وهو يجر رجليه جر من الهم والكدر وكل تفكيره هذا


وش جابه وش اللي ذكره فيني انا نسيته من 18 سنه ليش الحين رجع ليش


ودخل الحوش وقف يفكر بالسبب اللي قاله ابو مساعد انه له فتره زوجته

طفله تجيه بالمنام وتسأله عن بنتها وهو غرقان بالتفكير سمع

بنته تناديه


طفله : يبه علامك واقف بالبرد



بادي : ولا شي يابنتي بس توني جاي من عند ابو محمد امتس وشلونها


عسى تعشت واخذت علاجها



طفله : ايه الحمد لله بس احسها تتعب كل يوم اكثر من اللي قبله



بادي : يعين الله يابنتي امتس هاذي من اخذتها وهي دايما مريضه بس




ماشاء الله عليها صبورة ما عمرها اشتكت دايما حامده ربها وشاكرته





************************************************************ ********************************************8

بعدها ب3 ايام ام طفله تعبت مررره جتها صخونه شديده مانفع معها اي



شي


وداها بادي للمستشفى كان شايلها زي الاطفال من كثر ماهي هزيله



وقليله
ما كانت واعيه من السخونه الشديده تتنافض



طفله تبكي لأنها اول مره تشوف امها بذا الوضع دايما تتعب بس ماهو



زي كذا


دخلو الطورائ وحطها بادي على سرير واخذنها الممرضات وبادي



متابعهم هو وطفله جا الدكتور واستلم حالة ام طفله وعلى طول امر



الممرضه تحط لها مغذي وطلعوها غرفة التنويم وحطو لها جهاز تخطيط


الفلب لن نبضها كان ضعيف مررره



ولحق بادي الدكتور ومسكه من من كتفه عشان يلتفت له


بادي : طمني يا دكتور انا خايف عليها طمني بالله عليك



الدكتور: ماتخفش ياوالدي احنى دلوئتي بنديها الدوا عن طريق المغزي



وبنعملها تخطيط للقلب



بادي: ليش تخطيط للقلب يادكتور




الدكتور : مافيش حاجه بس النبض عندها ضعيف عاوزين نتابع النبض



ونشوف حيستمر كده والا مع الادويه حيتحسن



عموما هي عندها التهاب شديد اوي في الشعب الهوائيه وحنديها موسع



للشعب مع الاكسجين



بادي : شكرا يا دكتور





الدكتور :ربنا يطمنك عليها استازن انا دلوأتي


راح بادي للغرفه اللي منومه فيها ام طفله دخل وشاف طفله واقفه على


راس امها وتقرا عليها قران





ناظر فيها واشر لها اطلعي بهزة من راسه




طفله: بشر يبه وش قال الدكتور



بادي : الدكتور طمني الحمد لله على امتس



طفله : ليش ركبوا لها ها الاجهزه وهي تأشر على جهاز تخطيط القلب و


كمام الاكسجين


بادي : الدكتور يقول انه بيتابع نبضات قلبها لأنها ضعيفه




دمعت عيون طفله وحطت يدها على فمها ماتبي تصيح وتزيد هم ابوها


ورجعت تجلس عند راس امها وهي تقرا قران تبي تطمن نفسها بالقران



طلع بادي من المستشفى والجو كان بارد جدا كان اول يوم في


المربعانيه


تلطم بشماغه ولف نفسه بجكيته البني القديم اللي مايرد البرد وصار

يمشي





ويمشي يمكن المشي في ها لجو البارد ينسيه شوي من همه لمن وصل للحاره


اللي هو ساكن فيها


سمع اذان المغرب وتوجه للمسجد وصلى جماعه وبعد ماسلم تلفت يدور


شخص نا ظر مالقاه



وهو طالع من المسجد مسكه ابو محمد وسلم عليه


ابو محمد : كيف مرتك يا بادي


بادي في باله سبحان الله يها لرجال كل مافكرت فيه او ابيه ألقاه


قدامي : تعبانه ياابو محمد وتعبها هالمرة غير عن كل مرة


ابو محمد : عين خير يا رجال تلقاة برد ويروح مع الادويه


بادي: ياليت انا حاسه هالمره تعبها كايد والله اني يوم شلتها حسيتها


تودع


اني طول الطريق للمستشفى وانا اشهدها



ابو محمد: لا اله الا الله الله يطمنك عليها ومسك يد بادي وسحبه معه

لبيته




ودخلو بيت ابو محمد


ابو محمد : تعال خل نتقهوى ونشرب لنا شين دافي


بادي: يارجال من له نفس


ابو محمد : اجلس والله ماتطلع لمن تعشى وطلع من المجلس وخلى بادي


يهوجس بلحاله


************************************************************ ************
ابو محمد دخل وطلب من ام محمد قهوة وحليب بالزنجبيل وقالها سوو

لنا عشا ترى بادي بيتعشى معي الليله


ام محمد : ابشر من عيوني



ابو محمد : تسلمين ياغاليه


ام محمد : الا وش اخبار ام طفله



ابو محمد : والله لو تشوفين حال بادي مسكين غادي وجهه اسود من الهم

يقول انها تعبانه مررررررررره وانه يحسبنها تودع


ام محمد : يعزي لطفله والله ان تجن لو صار لأمها شي


ابو محمد : وين البنات خل يجن يساعدنس



ام محمد : فوق اللي تذاكر واللي تكلم واللي نايمه


ابو محمد : من اللي نايمه


ام محمد: وهي تتبسم : معليه منيرة تعبانه وعشان كذا خليتها

وبكره ماهي رايحه للمدرسه


ابو محمد: لا سلامتها يله انا بروح عند الرجال لا تبطون علينا بالقهوة


وضحى نزلت وهي تركض هربانه من شيهانه


شيهانه بصوت باكي : يمه شوفي وضحى


ام محمد : وش فيها وضحى


وضحى : والله يايمه ماسويت شي بس بنتس مدلعه ما تبي تعلم تبي كل شي

على الباردالمستريح


ام محمد وهي تجهز صينية القهوة وتمدها لشيهانه: روحي وديها عند باب


المجلس ودقي الباب على ابوس بسرعه ولا جيتي نتفاهم



وضحى : يمه انا ابيها تتعلم مومعقوله ماتعرف تسنع نفسها عند. الا يمه


من عند ابوي ؟


ام محمد:عنده ابو طفله



شيهانه وهي داخله المطبخ: يوووووة عشانها الكبيره ماتكلمينها


ام محمد : وبعدين تراكن عورتن راسي والله ان مامشيتن من قدامي لأوريكن


طلعت شيهانه وهي تتحلطم وصدمت بمحمد وهو داخل المطبخ


محمد: يمه ابوي يقول يبي بندول وماء بسرعه


ام محمد: ليش وش فيه ابوك


محمد: لا ماهو لأبوي بادي جارنا مسخن وابوي قال يوديه للمستشفى وعيا

يقول مايبي


ام محمد عطت محمد البندول وطلعت تصلي في غرفتها


************************************************************ ***********************************
*في المستشفى طفله جالسه عند راس امها وتقرى عليها وتدعي من كل قلبها


ان الله يشفي امها وهي على ذا الوضع امها كانت تهمهم وتهذي


ام طفله: باد ي بادي انت هنا تسمعني


طفله: يمه انا جنبس هنا وهي تمسك يد امها وتبوسهاوامها مستمره في

هذيانها


ام طفله : بادي لازم ترضيها روح لطفله ترى القطاعه ماهي زينه



طفله تقرب من فم امها تبي تسمع امها وش تقول والام مستمرة وغرابة


طفله تزيد امي وش تقول ماني فاهمه ؟؟؟؟؟


ام طفله :بادي طفله ماتستاهل منك اللي تسويه فيها را ضيها حرام


عليك


ام طفله تنتفض وهي تقول : وديها يابادي وديها لا تيتمها مايجوز خاف

الله


طفله وهي تشد على يد امها وهي تناديها يمه يمه وش تقولين مافهمت


يمه اصحي الله يخليس لا تخوفيني بس امها سكنت من دون حركه نايمه وماتحس


بشي قربت من امها تتحسس وجهها وتبوسها وهي تدعي ان الله يخلي لها



امها

يايمه ارجعي كافي ابجلس معك لو لحظات



واقبل ايدك ورجلك وافرش لك رمش عيني



يايمه ما تحملهم يقولوا فات ما قد مات


تعالي غيري هالقول واطيعك باقي سنيني


يايمه ارجعي تكفين وطفي شمعة الآهات


ابيك انتي ولا غيرك على موتك تعزيني


وضميني وداويني مثل ما كانت الهقوات


ما ابي احدن يواسيني ابيك انتي تواسيني


دخيلك بس لا تبكي اذا شفتي بي الدمعات


انا مقوى ابكيك اذا انتي تبكيني ..



((منقول ))
-------------------------------


بادي راح لبيته والهم كاسيه ومايدري وش يسوي بزوجته المريضه شايل هم

قد الجبال وكل ما فكر بطفله تنهد وزفر آه بعد آه من حر جوفه



ونام وهو يفكر ببنته وزوجته

بادي
يابادي
وش صارلك



اخبرك اقوى من كذا




اذكر الله

خاف الله في نفسك اللي انت قاعد تسويه مايجوز ارحم نفسك





واتقي الله في طفله لازم تسنعها لازم






طفله ماهي حمل بهدله












ترفه ماتت














لازم تقوم هالحين وتشوف بنتك وتصلح غلطتك









الحق يابادي ترى الموت مايمهل الحق يابادي

















انتفض بادي وفز من نومته وهو يستعيذ بالله من الشيطان وسمع


الله أكبر، الله أكبر، الله أكبر، الله أكبر
أشهد أن لا إله إلا الله، أشهد أن لا إله إلا الله .
أشهد أن محمداً رسول الله، أشهد أن محمداً رسول الله .
حيً على الصلاة، حيَّ على الصلاة .
حيَّ على الفلاح، حيَّ على الفلاح .
الله أكبر، الله أكبر .
لا إله إلا الله .



وقام للصلاة وهو في باله الحلم اللي شافه ووتذكر تفاصيله وعرف ان

اخته جته بالمنام رساله من رب العالمين دخل المسجد وصلى وتسنن

واستخار في امر بيسويه وطلع من المسجد واخذ فطور وراح للمستشفى

عشان يشوف ام طفله وطفله


دخل الغرفه اللي فيها زوجته ولقى طفله جالسه على كرسي جنب سرير امها

وهي متلفلفه بعباتها وراسها نازل على صدرها دليل انها نايمه وبعمق



هزها بشويش ونادها :طفله قومي يله قومي يا امي انتي



فزت طفله وقامت على حيلها وشافت ابوها واقف جنبها وقربت من عنده

وحضنت ابوها وقامت تصيح


بادي وهو يمسح على راسها يقولها :ليش البكا ترى امتس طيبه مافيها شي

امسكي نفستس يا امي


طفله : والله البارح خفت عليها قامت تهذي وتقول كلام كثير واخر شي صارت

تتنافض وماني قادر ه على شوفتها بذ الوضع امي مره تعبانه


حاولت افهم كلامها بس عرفت اها تهذري تقول يابادي استسمح طفله

وراضيها هذا اللي فهمته


مسحت دموعها وهي تناظر ابوها وتشوف ابوها نظراته ذبلانه وشكله كبر


الشيب مغطي لحيته وخطوط التجاعيد واضحه وكتوفه نازله كن فوقها حمل

كبير مسكت يد ابوها وجلسته على الكرسي اللي كانت قاعده عليه




وبابتسامه شالت كيس الفطور اللي هو عباره عن سندويشات وعطت ابوها

وحده هوشافها تمد يدها له بالسندويشه رد يدها وقال : ولله مالي نفس

اكل انا جايبه لتس



جلس بادي يناظر بنته وعزم انه ينفذ اللي براسه شافها صغيره وحس انه


لازم يعجل خاف عليها من هالدنيا لازم يدعس على قلبه ويقوم باللي


نواه قام ومسك يد طفله يله امي بمشي انتبهي لعمرتس انا يمكن

ماأقدر امرتس الليله عندي مشوار


طلع بادي من الغرفه وراح للدكتور مالقاه وطلع من المستشفى

*********************************************


في بيت ابو عبد الله اخو ام نايف ام عبد الله جالسه بالحوش وتقهوي

عمتها ام زوجها جتهم ام نايف وهي توها داخله البيت كانت

بالسوق شاريه قطع قماش بتفصلهم لها ولأمها وبنتها نوف


ام عبد الله : ماشاء الله عليتس يا ام نايف رحتي للسوق وما علمتيني


ا م نايف : لازم يعني اعلمتس


ام عبد الله : لا بس شوفي يمكن ابي اروح يمكن اوصيتس على شي




ام نايف : ابشري المره الجايه اعلمتس



الجده: وين ابو عبد الله



ام عبد الله : مسافر من يومين وقالي انه رايح للرياض




ام نايف تغير وجهها وانعفس حالها



الجده : الله يجيبه بالسلامه



**********************************************


في مزرعة نخل كبيرررره و بجوارها بيت كبير له واجهه من الحجر كان


يقف ابو مساعد واقف عند النخل ويكلم العمال ويعلمهم كيف يهتمون

بالنخل


وقف عند اول نخله زرعها وهو يتأمل طولها وجمالها


ياسبحان الله هالنخله زرعتها على حياة طفله الله يرحمها وكانت بركه


الحمد لله مزرعتي من احسن المزارع واكبرها والسبب فكرة طفله الله


يرحمها هي اللي شارت علي اشتري هالارض وازرعها نخل



قطع عليه تفكيره صوت سياره دخلت ا لمزرعه شاف مساعد



ينزل من السياره راح يمشي له ومساعد كان لابس لبس الحرس الوطني


اللي هو بدله عسكريه عليها شماغ وعقال مثبت عليه شعار الحرس


الوطني وهو سيفين ونخله وتحتهم عبارة الحرس الوطني وكان يتميز



بالوسامه وسماحة الوجه


مساعد:السلام عليكم يابوي



انحنى على يد ابوه وهو يقبلها



ابو مساعد : وعليكم السلام غريبه يا ولدي طالع بدري اليوم



مساعد : الله يسلمك امي مزنه تبيني اوديها للمستشفى



ابو مساعد : اي نسيت هي علمتني واحسبنها بتروح مع اخوها





مساعد : هي البارح قالت له وانا كنت موجود وهو تعذر مايقدر


يستأذن من عمله وتبرعت انا اوديها




ابو مساعد : الله يجزاك خير يا ولدي

مساعد: وش دعوى تراها بحسبة امي يله توصيني شي يالغالي
ابو مساعد : سلامتك
وراح مساعد يمشي باتجاه البيت بس وقف لما سمع ابوه يناديه

مساعد: سم يا بوي


ابو مساعد: سم الله عدوك بس البارح شفت خالك بادي



مساعد وبكل فرح واهتمام : والله وش اخباره ووينه ليه قاطعنا



ابو مساعد : يا ولدي خالك كبر واني يوم شفته فجعني شكله


مساعد : ليه ما اخذتني معك



ابو مساعد :شوف يا مساعد انا وخالك بينا خلاف من سنين بس امك الله


يرحمها حاولت تقرب بينا بس هو طول عمره ما يبيني كان معارض


زواجي بامك وجلس سنين مقاطع امك وخفت لمن يشوفني يصدني بعد

هالسنين الطويله




مساعد : ليه يابوي كان خالي بادي معارض زواجك من امي



ابو مساعد :لاني من قبيله وامك من قبيله ثانيه





شوف يا مساعد يمكن الاسبوع الجاي اروح له حاله ما اعجبني وابيك

تخاويني

مساعد : ابشر يا غالي يله تأخرت على امي مزنه



**********************************

راح بادي ومر ابو محمد في محله







بادي : السلام عليكم



ابو محمد : وعليكم السلام حيا الله بادي



بادي : ابو محمد بغيتك بسالفه
ابو محمد : آمر يا بادي محتاج شي

تراي اخوك واللي تبيه انا حاضر


بادي: تسلم الله يرضى عليك بس بغيت سيارتك بروح لنسيبي يوم



وارجع وابيك تخلي ام محمد تمر طفله بالمستشفى وتراها امانه حتى

ارجع


ابو محمد : السياره وابشر بها وطفله بنتي ولا تشيل همها روح خلص


امورك ربي يسرلك

بادي : شف يابو محمد عندي شي بقوله لك وابيه يكون امانه عندك ان


حصلي شي انت المسؤول بعدي عن بنتي طفله



ابو محمد تحفز وشد نفسه وجلس با استقامه : آمر يا بادي



بادي : بنتي طفله تراها ماهي بنتي


ابو محمد طارت عيونه وفز من جلسته :ايشششششششششش


ابك انت وش تقول


بادي : اللي سمعته طفله بنت اختي المتوفيه وانا ربيتها وخليتها


بنتي حتى بالاوراق الرسميه



ابو محمد : وابوها راضي




بادي : لا


ابو محمد : ليش


بادي :لأنه مايدري


ابو محمد : ما ني فاهم ليش مايدري ان بنته عندك


بادي : لأنه يحسبها ميته

السلام عليكم آل ليلاس وعيدكم مبارك وجعل الله ايامكم كلها اعياد وفرحه

كل الشكر لمن سطر ردا وتوقع حدثا الله لا يحرمني منكم

اليكم عيديتي





((((((((((((((((((((((((((((((((((((((((((((((((((((((((((
الجزء الثالث




في بيت ابو محمد


وضحى : يمه وش فيتس شكلتس تعبانه


ام محمد : اي والله اني حاسه بجسمي مثل الشوك




جت وضحى ولمست جبين امها لقتها مسخنه


وضحى : يمه انتي عليتس حراره قومي روحي لغرفتس و انا بسوي




لتس مره واجيب معها بنادول




ام محمد وهي يالله تقوم منكثر ماهي تعبانه




طيب لا تنسين شوفي الغدا سويته لا جى ابوتس غديه




**********************************


ابو طفله اخذ سيارة ابو محمد وراح وكله تصميم انه يبلغ ابو مساعد عن وجود طفله



ماشي بالسياره وسرعته كل مالها تزيد




نسى نفسه ورجله ضاغطه على البنزين



كانت عيونه تناظر لبعيد كل تركيزه وش بيقول لأبو مساعد وشلون يبي



يبرر له ماله عذر




ندمان ومتحسف انه حرم ابو مساعد من بنته بس هو معذور غلب عليه


الابوه وشعور انه يصير اب



رجعت به الذكرى لورى 18 سنه


************************************************
ام نايف جالسه بغرفتها وتهوجس



ياربي ليش ابو عبد الله راح للرياض معقوله راح له


دخلت عليها نوف


نوف: يمه ليش ماجيتي تعشين



ام نايف :مالي نفس اهم شي امي تعشت



نوف : ايه تعشت ونامت


ام نايف: نوفه تكفين هاتيلي من خزانتي بندول مصدعه وراسي


بينفجر


نوف: يمه انتي فيتس شي اول مره من فتره طويله اشوفتس بها الشكل




ام نايف : مافيني شي بس الصداع هلكني


راحت نوف تفتح الدولاب وشافت صوره قديمه لها ولأبوها كانت الصوره



الوحيده لأبوها التفتت لامها


يمه ابوي شلون مات



ام نايف دمعت عيونها وجتها رجفه : نوفه كم مره قلت لتس ابوتس


صارعليه حادث ومات




نوف: الله يرحمه تكفين يمه ابي هالصور ة تكفين وهي ترفع الصورة



توريها امها


ام نايف : انتي اللي تكفين عطيني البنادول واطلعي عني ابي انام



************************************************************ ******
بيت ابو محمد


ابو محمد دخل البيت وهو شايل هم بادي وبنته والقصه العجيبه


اللي قالها بادي له

وضحى : هلا باابوي الغالي وهي تمد تاخذ شماغ ابوها



ابو محمد : هلا ببنتي امتس وينها



وضحى : امي نايمه بغرفتها



ابو محمد : عسى ماشر لا يكون تعبانه




وضحى : شوي عليها سخونه وسويت لها مره واخذت بنادول ونامت

ابو محمد : يله انا طالع اشوفها






دخل ابو محمد غرفته ولقى ام محد تصلي استناها تخلص


ا م محمد خلصت صلاه وهي تصفط شرشفها



حياك الله متى جيت



ابو محمد توني داخل البيت الا وضحى تعلمني انتس تعيبانه


ام محمد : الحمد لله الحين احس نفسي احسن



ابو محمد : الحمد لله واذا بغيتي وديتتس للمستشفى




ام محمد: لا ماله داعي عارفه وش فيني



وابي منك البشاره تراي حامل



ابو محمد : لا اااااااااااااااالله يبشرتس بالجنه بس انتبهي على عمرتس

خلي البنات يساعدنتس



ام محمد : لا توصي حريص مع اني والله احس الصخونه هدتني



ابو محمد : بكره نروح للمستشفى تراجعين ونزور ام طفله


ام محمد : ان شاء الله






*******************************************


























يتبع

قبل 18 سنه

في مستشفى بسيط التجهيز ومتواضع الخدمات


دخل بادي ومعه ابو مساعد وهم شايلين طفله وهي تنزف



جتها الولاده بالبيت وحاولت جارتها تولدها بس الولاده تعسرت ونزفت الى


ان غابت عن وعيها




جارتها نادت زوجها ابو مساعد وعلمته وقالت له لازم توديها المستشفى هالحين يا تلحق عليها والا تموت


اخذنها الممرضات وودوها على طول غرفة العمليات




وابو مساعد وبادي واقفين بالممر ووجيهم مسوده من الكدر والهم


طلع الدكتور ووجهه يقول ويعبر



اقبل عليه ابو مساعد : بشر يا دكتور



الدكتور هندي وهو يهز راسه ويفرك ايدينه ببعض من الخوف : مريض في موت وبيبي واجد تأبان




ابو مساعد : ابك انت وش تقول






الدكتور:هزا مريض يجي تأبان نزيف كتير انا مايسوي موت






مسكه ابو مساعد ورجفه بالجدار اللي وراه ليش تقول فيه موت هاه


ليش طفله ماماتت



بادي انت تسمع وش يقول التفت على بادي




لقاه جالس على الارض ودموعه على خده ويشاهم كنه بزر



ابو مساعد بصراخ : ليش تصيح ليش علمني هاه




ترى ما ماتت اكيد حرمتن ثانيه اللي ماتت




بادي يناظر في ابو مساعد وشافه ثوبه دم وماعليه شماغ وازارير ثوبه



مفتوحه وعيونه ماترمش مصدوم ولاهو قادر يصدق بوفاة طفله زوجته ام ولده



بادي :اذكر الله ياابو مساعد قل انا لله وانا اليه راجعون




مسكه وضمه بقوه قل لا اله الا الله وابو مساعديتفلت منه وهو يصرخ


اقولك ما ماتت انت تفهم والا لا


خرج سرير من غرفة العمليات وعليه طفله مسجاه بغطاء ابيض



والممرضه تهز راسها من التأثر شاف ابو مساعد السرير وعرف انها



طفله ركض ومسك الشرشف الابيض ورفعه شاف طفله نايمه كأنها



نايمه مبتسمه او يتهيأ له انها مبتسمه


بس باهته مافيها اثر للحياه كنها شمعه وانطفت زالت الروح وبقي جسد



ابو مساعد : قومي طفله قومي شوفي بادي شوفيني انا




لا تروحين وتخليني انا ومساعد تكفين



بادي ماقدر يشوف ابو مساعد بها الحاله




بادي : الله يرحمها ياابو مساعد امسك نفسك تصبر وانا اخوك



ابو مساعد راحت طفله يابادي راحت الغاليه




بادي : الله يصبرنا على فراقها الحمد لله ان البزر ما مات احمدربك



انه عايش والله يعينك على تربيته



ابو مساعد: ما ابيه ولا ابي اشوفه ذبح طفله ما ابيه



بادي : استغفر ربك انت وش تقول



دفه ابو مساعد وهج من المستشفى




ثالث يوم العزا




بادي: يابو مساعد لازم تروح تشوف بنتك تراها تعبانه يمكن ما تصبح




ابو مساعد : احسن ليتها تموت وتلحق امها




ببادي :استغفر الله يارجال وش جاك ترى مالها ذنب ربي اللي كتب انها



تعيش وامها تموت



ابو مساعد يصد عن بادي : تكفى يابادي مالي قدره لعاد تجيب


سيرتها



بادي : على الاقل شفها يمكن يلين قلبك



ابو مساعد : انت ماتقول انها تعبانه وانها يمكن تموت وشوله

اشوفها ما ابيها ما ابيها



بادي : سميها على الاقل




ابو مساعد قام وهو معصب



: يا ابن الحلال ماااااابيهاا فكني يا اخي ترى ان رحت لها يمكن


اذبحها تغير صوته وبانت دموعه : تراها ذبحت امها تبيني اغصب



روحي والله ما اقدررتكفى فكني

وطلع من البيت




بادي شاف حال ابو مساعد ومايدري وش السواة














راح للمستشفى وراح للحضانه وطلب يشوف بنت اخته




طفله ضئيلة الحجم صفراء اللون مغمضة العينين سريعة التنفس




ملفوفه بقماش ابيض تحرك فمها وكأنها ترضع





حملها بين يديه واذن بأذنها واقام كان يذكر الله ويتأمل


خلقه ماروع هذه المخلوقه





مشاعر جميله تجتاح بادي لا يريد ان يترك الصغيره ولكن الممرضه طلبت


منه الخروج وان يتم اوراقها الرسميه


خرج من الحضانه وهو لا يعرف مالعمل فابو مساعد رفض طفلته




والاجراءات لابد ان تتم خرج وتوجه الى بيته


ترفه:بادي وينك من الصبح وانت برى




بادي : رحت لأبو مساعد ابيه يشوف بنته ويسجلها


عيا وهج وخلاني




ترفه : ياربي احد الله يطعمه ويعيي




بادي : لو تشوفينها ياترفه ياربي صغيره مررررره




ترفه: لا تولع فيها وتعلق انت تقول انها تعبانه ممكن ما تعيش




بادي : شلون ماتبيني اتولع وانا محروم من العيال وزود انها بنت


اختي



تصدقين افكر اني اخذها ونربيها ابوها مايبيها




ترفه : بادي انت وش تقول حنا الله ما كتب لنا عيال وراضين بكتبته




تبي تاخذ هالصغيره ليش ماهو معقوله ابوها يسخى فيها يومين وبيجيك




يركظ يدورها




بادي : يابنت الحلال انت ماشفتيه والله كنه مخنوق يوم كلمته هج عني



مايبيني اكلمه عنها




ترفه : وش السواه هالحين




بادي بتركه يومين ان تحسنت صحة البنيه اخذته غصبن عنه عشان



يشوفها وان تعبت زياده وماتت خلاص انا اكفيه




بعدها بيومين راح بادي وترجى ابو مساعد انه يجي يسجل الصغيره


لكنه رفض



اضطر بادي يتغيب عن المستشفى يومين ولما راح سمى الصغيره طفله




وسجلها باسمه واصبح ابو طفله














************************************************************ ***********************************************




والى لقاء قريب ان شاء الله لا تحرموني من ردودكم وتوقعاتكم فهي الدافع لي والمحفز