|
{ بسم الله الرحمن الرحيم .. السلآم عليكم ورحمة الله وبركاته }
آسعد الله مساء كل حبايبي بكل خير وسعاده ورضا من الرحمان الرحيم يارب وجزء الله كل من عزاني بكل خير .. والله لايذوقنا جميعا الإحزان يارب .. ويعمر بالمسرات والإفراح ديارنا .. والله يبارك لكل من هناني وباركلي في التثبيت والتميز .. والله يبارك في اختي الغاليه معزوفة حنين خاصه ومشرفات القسم عامه ومشكورين جميعا .. نجي للروايه احداثي في هالبارت قويه مره مره مره والأقوى القادم بإذن الله انكشاف خيوط ملغومه .. ومن ضمنها سر شيخه اللي الجميع متشوق يعرفه .. تراني والله مانسيته بس تاركه كل شي في وقته .. وكل اللي بوقته حلو واوعدكم مايطول انتظاركم كثير إلا أذا ربي خذ امانته .. والبارت القادم بيكون يوم الأحد بمشيئة الرحمان مع اطيب الأمنيات بقراءه ممتعه . سهم المملكه . لإله إلا الله ( البـــــارت الخـــــــــــــــــــــ 35 ـامس والثلاثيــــــــــن ) مشت بقهر لين مجلس الريجيل اللي مجتمع فيه اغلب عيال عمها وجدتها وقالت بقهر – مالنا مجلس بينكموعويذ الله من شركم الكل ارتاع من كلامها ومط عينه الجد بقهر – وش مناسبة علمتس هذه ,, وبعدين هالتسلبه وين رجلها عنها مهيتها هنيا هماني طاردهم من هالبيت الجده ناظرت في شيخه بقهر سليطة لسان وتبي تفضحهم شيخه عرق رقبتها نبض من القهر – ماني تسلبه التسلاب اللي يخططون من ورانا علينا يابنات ناصر حنا بنرجع للدوادمي والطيب اللي يلحقنا الجد حذف عصاه بقوه عليها وهو يقول – ولد ابوي ( وناظر في العيال وهو معصب ) نعنبوكم جالسين وهالجحشه تحداكم ,, قم قم ياسعد برد خاطري فيها اظهر عقالك سعد بلع ريقه .. جده حطه في موقف وهو مستنكر ضرب الحرمه وجده مالقى غيره شيخه تناظرهم واحد واحد بعصبيه وكأنها تحداهم الجد صرخ في سعد – اخس يالرخمه ,, ( ناظر ولده ضاحي ابو محمد وصرخ فيه ) لا خلوا الحرمه تحكم قم ياضاحي ولا ازهم على رجلها يشكمها الجده معصبه – اذلفي لخواتس يالقشرى شيخه وهي تطبخ قهر وعناد – مانيب ذالفه ,, وليه اذلف مثل ماجبتونا ردونا ولا لش تردونا حنا نروح برجلينا ( وطلعت وهي معصبه ) وقف فارس ولحقها .. وسعد كلم صقر يعلمه القصه ,, اللي من عرفها صقر ترك شغله واللي في يده وجاء طاير .. هالإنسانه تبي تخلص عليه في يوم متى ماهب عارف !! ابلغه الدكتور خبر الخروج .. واللي كأن مويه مصبوبه عليه .. تورط فيها وين بيحطها .. او كيف يعيش معها .. هاذي بتجننه .. وحركاتها حتى لو ماتعمدت .. تثيره حتى حد الجنون مشى بين الاسياب وكأنه يحمل هموم الدنيا فوق راسه .. تنفس بغيض وقهر .. واحاسيسه قاعده تلعب فيه لعب .. فتح الباب شافها جالسه وباين عليها زعلانه وطفشانه .. لفت راسها وناظرت فيه بزعل – شقال لك الدكتور ضاحي بلع ريقه وهو يتجنب عيونها اللي تذبحه – جهزي اغراضتس بوقع على الأوراق وراد لتس حز في خاطرها انه واضح عليه مايبيها .. انقهرت منه .. ووقفت تجمع اغراضها وهي تزفر غيض وقهر .. حطمها وهي في عز حاجتها له كانت مستعده له على أتم استعداد .. وفي لحظه حطمها مثل تحفه مالها معنى بعد فتره شافته دخل وشال شنطتها وعطاها ظهره طالع وهو يقول – انا احتريتس تحت في السياره استعجلي بسرعه لا كثير عليها .. نزلت دمعتها غبن وشي ماقد لاحظته فيه ابد .. قاعد يحطمها ويمسح فيها الأرض .. لفت طرحتها عليها زين ولبست عبايتها ومشت وهي تحاول تعجل الخطوه عل وعسى تلمحه .. وسط الزحمه والناس اللي تخاف منهم وقفها وهو يقول – شيخه وش هالكلام وانا اخوتس شيخه وهي معصبه – انت لاتكلمني مايخصك فينا ولا بتصير وصي علينا ناقصتك انا ( وراحت وخلته ) ,, انقهر منها .. هاذي بين مو معيره أي حد اهميه وقفها وهو يقول – صدقيني صقر مابيعدي اللي تسوينه على خير وقفت وكأنها محتاجه هالكلمه عشان تطلع غضب صقر فيه – يخسي اخوك مابقى غيره ,, والله إن يبطي اسمع كلامكم .. خواتي حلفت إن محد يمسهم وانتم تبون تغصبونا عليكم واحد واحد .. اصلا عيب عليكم تأخذون بنات مايبونكم .. مجبورات فيكم .. ماكفيتكم انا .. لعند خواتي وكلكم ستوب خواتي خــــــــط احمــــــر وقف بغضب وهو رافع حاجب بينهم – ليه وش فيتس انتي ووش فيهن خواتس ( مشى ومسكها مع كتفها وهو يجرها ) استحي على وجهتس ياقليلة الحيا طلعت نفسها بغصيبه وتمردت عن يدينه وبصراخ رج البيت رج وطلع من كان في الملحق - ماني بقليلة حيا قلة الحيا اللي بتسوونه في خواتي هاذا اللي ناقص الجد صرخ عليهم – اذلف انت وإياها اذلفوا ماوراكم غير المشاكل فضحتوبنا عند الجيران صرخت في وجهه شيخه – لاصار بيتك تكلم يالشايب مط عيونه وهو مقهور منها .. وسعد وفارس كتموا ضحكهم على جدهم ونايف متكتف يناظرهم ( اليوم قاعد يشوف فيلم عربي ميه بالميه ) ولاول مره يحس بخوف إن امره ينكشف وش يسلمه من لسان الضبعه اللي لأول مره ولا حد يقدر عليها .. واولهم صقر اللي مايقدر احد يوقف في طريقه لبست وضحى ونوره وهند وساره جلالهن وبراقعهن .. وطلعن للصراخ نوره بكت وهي تشوف الكل ضد اختها هي وساره وهند .. ووضحى ركضت لها وهي ماسكتها – خلاص ياشيخه خلاص شيخه بعصبيه وقهر – لاماهب خلاص ياوضحى لمتى ونحن مستعبدات وحراير عند ذا الآوادم وحنا تحت يدينهم وتصرفهم وتحكمهم نوره يوم شافت الجد قرب عصاه وناوي ضربة شيخه وهي لافه ظهرها على ورى صرخت – لااااااااااااا خلااااااااااااااااااااص انا موافقه موافقه بأخذه ابيه ابيه ساره اللي كانت اشجع من نوره وركضت ورى ظهر شيخه لايضربها الجد ويطرح حملها ورصت نفسها على شيخه تحميها .. تلقت الضربه هي وصرخت صرخه هزت الحي كلــه |
فتحلها باب الشقه وهو مجهم وجهه .. وهي تسرق النظرات ودمعتها
في محجر عينها .. دخل وتبعته وشافت شقه نظام امريكي بحت المطبخ اللي يطل على الصاله الوسيعه نوعا ما .. والتلفزيون الكبير مره وأخذ مساحة نص الجدار .. وملابسه اللي مبعثره في كل الشقه وباين انه مهمل كثير ومو مرتب .. عكسها هي تحب النظام والترتيب والدقه شافته حط شنطتها في الصاله ودخل الغرفه وسكر الباب عليه بقوه خلتها تنقز محلها وهي تتسأل وش فيه .. المفروض يفرح ويستانس بخروجها مو يعصب ويصارخ ويخوفها موضي اللي جالسه وضامه عيالها .. راحت لأهلها من بدري بتجهز معهم لملكة اخوها فهيد وسلطان وبيأخذون معهم حلويات شي جاهز وش بتسويه هي وريم وامها .. والشغل عندهم والترتيب على قدم وساق زايد – يمه متى بتأخذينا انقهرت وهي تتذكر كلام محمد لها اول ماخبرته قال يصير خير .. بس الصباح اليوم وهي تفتح معاه الموضوع وكأنه بيعاند بسبب كلامها اللي قالته في الليل رفض وهو معصب – انا تعبان ونفسيتي زفت ماني بناقص اصوات وغثا لاتجيبينهم تتذكر انها تهاوشت معه .. وصارخت عليه وبكت عنده .. وهو مارق له قلب ولا فكر فيها .. طلعت من البيت مع السواق وهي معصبه وبتفرقع من إسلوبه الوقح معها موضي وهي تناظر عيالها – عمكم محمد هالحين تعبان لين يطيب وبتجون عندي ( قالت في نفسها .. هاذي اخر فرصه لك يامحمد ولا والله ماقعدلك دقيقه وعيالي في مكان وانا في مكان ثاني ) الكل شهق من الموقف .. الضربه المريعه اللي تلقتها ساره مايتحملها أي رجل فكيف كأنسانه رقيقه مثل ساره .. واللي كان واقف ورى ظهر شيخه ويشوف الموقف كله نايف .. وهو اللي حضر موقف ساره لأختها من أوله وهو أول شخص رفعها قبل تطيح من قوة الضربه .. شافها وهي تلتوي في يدينه وشوي وتموت .. ناظر في جده بغضب وعيون حمراء ماأنتظر أي كلمه ولا تبرير .. شالها بسرعه وركض فيها للسياره وهو يشوف عيونها غارت من ورى البرقع وسود انهارت شيخه من منظر ساره .. وكانت بتلحقها بس صقر مسكها بقوه وركض فارس معه وهو يتألم لحال بنات عمه .. ويالله يالله لحق وركب بسبب سرعة نايف ,, وطلعوا وصوت السياره يطغى على المكان كله الجد بدون رحمه وبدون تألم من اللي صار وبعيون غاضبه – خذ اللي معك واذلفوا لابارك الله فيكم اذلفـــــــــوا صقر عصب من جده .. لف عينه لشيخه ,, ( ولسان حاله يقول .. محد متقبلك غيري ,, ولا حد يبيك .. انا اللي بحميك منهم ) جرها غصب عنها وسط انهيارها وصراخها .. ومحد معيرها اهتمام .. غير نظرات خواتها اللي راحمتها .. وعيون جدها اللي بتأكلها .. ركبها السياره بدون عبايه ببرقعها وجلالها وشخط بموتره وهو ميت قهر من كل اللي صار عقب ماراحوا الجد ناظر في وضحى ونوره – المملك بيجي هالحين الطيبه فيتسن اللي ترفض وتقول لا ( ناظر فيهن بدون رحمه ) ولا والله إن تقصب قصبة البعير وهذاني حذرتسن وضحى ونوره هزن رؤوسهن .. وهن يتراجفن من جدهن المخيف واللي باين انه مايرحم لو حده تجلاأت فيهن ورفضت وقف السياره ونزل منها بسرعه فتح الباب .. وهو يشوف الكرسي المتحرك اللي جاه يركض .. ركبها فيه ودز الممرضه ودفه بأقصى سرعه وسط نظرات الإستغراب من فارس .. اللي مايشوف لكل هالضجه أي داعي .. نايف يخبي سر ولازم يعرفه .. وركض وراهم وهو كل خطوه وكل سرعه قاعد يركضها يتأكد أكثر وأكثر انه يحبها لا مو حب ,, واضح انه عشق بعد ماشاف من بعيد وهو لاف عليهم غير باب الطوارئ اللي تسكر في وجهه ويختفي اخوه بساره اللي واضح انها مو بسيطه عنده في غرفة الطوارئ صرخ على الممرضه عشان تجيب جهاز قياس الضغط .. قاس الضغط ولقاه مرتفع من قو الضربه .. شالها وهي مو حاسه بأي احد والسسترات حوله .. سدحها على ظهرها .. وأخذ المقص بسرعه قص الجلابيه اللي كانت عليها وكل اللي حوله شهقوا .. اما هو نزلت دمعته بدون مايحس وعيونه متألمه وهو يناظرها |
تشجعت وهي تفتح الباب عليه .. شافته قاعد يلبس والموقف محرج هي دخلت وهي تبتسم .. اما هو انحرج بقوه .. وكأن المواقف تبدلت سكرت الباب وهي تقول – ليش زعلان مني ضاحي لبس فانيلة البجامه وسكر اخر زرارين وهو مقهور من جرأتها اللي ماحبها .. هالإنسانه بتجيب اجله قريب ناظر فيها – انتي هالحين ارتاحي وروحي تروشي انا دقيت على المطعم عربي هنا بنتعشاء منه انبسطت من اهتمامه فيها .. ركضت وجابت شنطتها الصغيره .. وهي تطلع كل اللي فيها ومعبسه .. استغرب تقطيبة الحواجب والزعل بتسأل – وش فيك وهي تناظر الملابس اللي في الشنطه – مالقيت شي اقدر ألبسه عندك وكأنه تلقى صفعه .. هاذي مو صاحيه ابد انفجر فيها – وانتي ماتستحين تبين تلبسين المقطع والمفصخ .. مشى للشنطه بعصبيه ( وطلع قميص ) حذفه عليها وبقهر – ألبسي هذا ولا أشوفه طالع منتس وطلع وصفق الباب وراه .. وهي منفجعه من اللي صار كله سمع المملك موافقتهن من ورى الباب .. وطلع تاركهن ومعه عمهن ابو محمد اللي متألم من اللي يصير .. بس وش بيده وابوه هو اللي يفرض عليه وعليهن اللي قاعد يصير كله دخل المملك والجد متوسط فهيد وسلطان اللي جالس جنب المملك بارك لهم المملك .. ووقعوا الشهود .. وطلع تاركهم تحت كلمة الجد اللي هزتهم واولهم سلطان – اطلعوا وخذوا حريمكم معكم ابو ضاحي بيعترض بس صرخ عليه .. وهو مايعير أي حد أهميه سلطان وقف وهو معصب – بس انتم قلتوا بعد شهر الجد صرخ فيه بعصبيه – وحنا مانبي حرمتك عندنا خذها واذلف حس بهزه قويه .. وجده يجبره ,, موقف قوي وانحط فيه اما فهيد وقف وهو فرحان ومشى لراس جده وحبه – يالله نادوها انا مستعجل ابو فهيد – الله اعلم وش وراك ,, مير ترفق بالبنيه ولاتفضحنا ,, ورحبها عند امك تراها تجهز تبي تسوي هنيا حفله اظاهر ماش حفله والحفله انلغت عقب اللي صار ابو محمد وقف وهو يقول كلمته – وين المهر ,, مايطلعن بناتي من عندي غير بمهورن معهن فهيد ناظر في ابوه وهو متورط ,, اما سلطان ناظرهم بقهر ولقاها فرصه سلطان – انا ماجمعت فلوس توني الجد ناظره بنظره ذات معنى وماحد غيرهم يعرفها .. والمقصود بهالنظره انه يعرف للي يدخل لسلطان وهي مبالغ غير عاديه في الشهر فما بالك بالسنه كلها الجد وهو عارف وش وراه – خذها وعطها مهرها بعدين متى ماتوفر معك سلطان عصب – طيب ابي اعرف ليش هاذا كله الجد ضرب بعصاه الأرض وحمق – ترفع حسك علي ياولــــــد ابو محمد رحم سلطان وهم عارفين انه مايبي الحرمه – خلاص ياولدي انا اللي بعطيك سلطان انقهر وطلع شيكه من مخباه ,, وأخذ وقت وهو يكتب فيه ووقف ومده على عمه ابو محمد ووجهه مجهم واسود وملفوع – هاذا مهرها ياخالي وتراني انتظرها في السياره ( وطلع من عندهم معصب ) قرأ ابو محمد الشيك وانصدم وهو يقرأ المهر ( 150 ألف ) وتوقيعه ابو فهيد طلع دفتر الشيكات وكتب لها ( 90 ألف ) ومدها على أخوه وهو يقول – وهاذا مهر وضحى ابو محمد شق الشيك ,, وسط استغراب الجميع .. ومد شيك سلطان وبعتب – اكتبلها مثل أختها تراها تستاهل لاتكسرها ابو فهيد استحى وكتب لها نفس أختها ووقع عليه .. ومده على أخوه اللي يتوقعون بهالحركه بيرضونهن منيره طلعت مع الجده يمهم .. وهن يسمعن صوت البكأ .. اللي ظاهر من يم ملحق البنات ( وضحى ونوره يغادرونهن بهالسرعه ) وبهالوقت وهند ماسكه فيهن وتبكي .. والكل متأثر منهن .. والجد أشر لسعد يوديه للبيت ,, عقب متأكد انه سوى اللي في باله في الشقه سكر الباب بقوه وهي غمضت عيونها بقهر .. لفها له وعطاها كف دوى صوته في الصاله وبعيون حمر وغضب – لمتى وانتي كاسرتني لمتى وانتي لاوية ذراعي وفاضحتني خلاص شيخه انا زهقت منتس معاد فيني طاقه اتحملتس ضربها الوحم في هاللحظات .. وكأنه يعذبها ويذكرها بدور صقر في حياتها .. ناظرت فيه بنظرات ترجوه يرحمها .. ماتبي غير فانيله تطفي فيها الوحام ,, تصبر نفسها بشم تبي تصبر نفسها بهالفانيله صقر مستحيل يفهمها .. اصلا بيتمنن عليها في نظرها وبيقول حبيتني غصب وماتمنين فرقاي ركضت وهي تبكي للغرفه .. وتبي تقفل عليها الباب وتبكي وتشم الفانيله .. بس هورافض اليوم انه يرحمها .. يدز الباب وهي تدز بأقوى طاقتها .. بس قوته اغلبت قوتها ناظرته بقهر وهو يصارخ ويسب .. ودموعها تنزل من الوحم اللي ضربها هاللي قدامها عاجز يفهمها .. حست بالوحم يزداد ,, نست كل شي كل شي وحذفت نفسها عليه وهي تشمه بأقصى قوتها هو كان يصارخ ويسب ويهاوش .. ويحسها قاعده تستحقره وماتبي تسمع له وهي ضايمته وموته قهر .. انحاشت للغرفه وهو دينه ودين اللي يهرب ويطنشه في عز الموقف لحقها للغرفه ودز الباب ودخل .. شاف دموعها تنزل وهو يكمل سيل الشتائم والإهانات .. فجأه حس بشي قوي لصق في صدره ويدين قويه مسكت في ثوبه ؟؟ حس انه انبلم ومعاد يقدر يقول حرف .. نزل راسه وشاف شي عمره في حياته ماتوقعه ( انتظروني في البارت القادم يوم الاحد بإذنه تعالى..في خبايا مريره ) |
مساء الخير يالغوالي
اسفه على التاخير غصب عني والله وهذا انا نزلت البارت قبل لا اقراه ولي عوده ان شاء الله مع ردودكم الغاليه |
وااااااووووو حمااااس اول شي يسعدني ارد اول وحدة
بنت الملكة حرام عليك وقفتي قلوبنا ههعهعهه قفلة قوية ااااااة وش يخليني حتي ليوم الاحد اللة يعين ثاني شي البارت قصير بس حماااس فية اكتشافات خطيرة اكتشف نايف ووانة يحب سارة شيخة هعهعه وحركتها بتغير مجررى الرواية وبتبدا مساااة نورة وسلطان عااارفة و وضاحي والجاازي وبس فديتك اختك مميزة |
| الساعة الآن 05:41 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية