|
اقتباس:
ياهلاا وغلاا دموعه نورتي الله يسلم لي قلبك من كل شر ومشكوره على مرورك الرائع |
اقتباس:
ياااااااااهلاااااا ومليون غلاا بفوفو نورتي ياعسل فقدتك من غير شر مكانك ماحد يسده والف مبروووك مره ثانيه وعقبال الباقي يسلم لي قلبك من كل شر ومشكوره على مرورك الرائع |
اقتباس:
ولا يهمك ومشكوره على مرورك |
بسم الله الرحمن الرحيم .. السلآم عليكم ورحمة الله وبركاته
ويارب يكون في هاليوم الذنوب مغفوره ,, والدعا مقبول .. ونكون من الشاكرين الحامدين لنعمه التي لاتعد ولا تحصى والله اني كرهت انزل اي بارت في يوم الجمعه لانه فيه ذكر وشكر ويقرى فيها سورة الكهف بس كنت مضطره لان كان امس عندنا زواج وماكنت ابي اعبل على عمري ويكون وقتي ضيق ولا اراجع اللي كتبته .. فاضطريت اني أخره بس إن شاءالله يكون اخر مره انزل في هاليوم .. لان هاليوم يوم ذكر ومن افضل ايام الإسبوع .. بالنسبه للبارت اللي راح سامحوني كنت غلطانه في عدد البارت وهاليوم هو البارت الثاني والثلاثين بالنسبه للإسبوع القاد بنزل البارت يوم الثلاثاء لاني بسافر للنعيريه يم عزبة ابوي عند الإبل وبتضطر الروايه انها تتوقف سامحوني عارفه ان هالخبر حزين بس فرصه اغير جو وتعرفون هالإيام ربيع ومحدثتكم بدويه وماتجوز عن البر والإبل ولذلك بنزل البارت يوم الثلاثاء وراح يكون طويل قبل اسافر .. عارفه والله انكم تستاهلون بارتين قبل الثلاثاء بس اقسم بالله لآبي خربان من ذيك المده واكتب لكم من كمبيوتر اخوي ومدري وش فيه علي ذا الإيام متنحيس بقوه وكل مادخلت عليه الغرفه طردني خخخخخ بس انا عارفه وراه سر وقريب بعرفه مع اطيب الأمنيات بقراءه ممتعه . سهم المملكه . لإله إلا الله ( البــــــارت الثــــــــــــــــــاني والثلاثـــــــــــــــــــ 32 ـــون ) سمع الباب يندق أكثر من مره وهو ماله نفس .. لين طفش من اللي يضرب الباب فتحه وشاف ابوه – هلا يبه ابو محمد دخل وهو يناظر في ولده – تحس اللي تسويه صح ناظر حالتك وناظر نفسك الولد راح ومالنا غير الصبر تبي تسوي سواة امك واخوك اللي هاج مانعرف دربه وامك اللي طايحه في فراشها وماندري هي حيه ولا ميته مانسمع إلا ونين وخالد خالد مسح دموعه بيده السليمه – ياابوي موته كسرني كسرني ابو محمد بحزن لحالة ولده – ماكسرك انت بس كسرنا كلنا ,, بس أمّنا في القدر وصبرنا بس اللي تسوونه جزع وعدم رضا بقضاء الله وقدره جلس في الأرض وسند ظهره للجدار نفس نوعية جلسته قبل يدق ابوه الباب – امهلوني وقت لين اقدر انساه ابو محمد جلس جنبه وحط يدينه على كتفه – ماحد بيقدر ينساه بس لازم نعيش المفروض انكم تنبسطون إن الله خذاه اختاره وهو صغير شفيع لكم وإن شاءالله انه من طيور الجنه ,, وارحم اخته الضعيفه اللي معذبة وضحى معها المفروض انك توقف معها تذكر خلود ووقف مثل المقروص وناظر في ابوه ودموعه تسيل – خلود والله اني نسيت خلود ( وطلع بسرعه ) يدور عليها بين الغرف ومالقاها استغرب وين راحت .. وفجأه عرف وين بيلقاها ركض للباب وبسرعه فتحه وهو يقول – خلــــــود حطت شنطتها وهي تبكي – خلاص يبه انا جهزت عمشاء وهي تناظرها بشفقه وتهمس لأبو فهيد – الله يسامحك كسرتها كيف بتوديها وهي بهالحاله وزوجها ماطلع وقف بو فهيد وبصوت جهوري – المره اللي تعرف السنع تكون في بيتها يوم ربعها وهلها يحتاجون لها ,, هذاك بيتها مثل ماهذه بيتها موضي في نفسها ( والله اظاهر ياابوي بعتني برخيص بكت كثير يوم ابوها يقول تروح لبيت رجلها محمد .. وهي خايفه عايلة عيسى تجي وتأخذ عيالها منها ريم وهي تضم زايد ونواف بقوه وتبكي – الله يسامحك يبه كان خليتها تأخذ عيالها معها ابو فهيد يناظرهم بشفقه وهو مكسور بس مجبور – لين يوصل محمد ويعلمها عن وضعهم هو يبيهم ولا لا موضي وهي تبكي من قرار ابوها التعسفي – بس عيالي يبه ومال احد حق يمنعني عنهم ابو فهيد – لين تروحين هناك وشاوري رجلتس ويالله امشي جدس وجدتس في السياره يحترونا اتجهت لعيالها وضمتهم بقوه .. وهي تأكد عليهم انها بترجع في الليل تأخذهم عقب ماتستأذن محمد اللي تتمنى انه مايرفض ومشت ورى ابوها وهي مسلوبة الروح والإراده .. ومكسورة الجناحين عقب ماطلعت بكى نواف وقال – مايصير امي تروح وخالد يموت خلاص معاد يصير عندي ام وصديق ( وضم ريم بقوه وهو يبكي ) كانت تحاول معها وهي تعطيها وتأكلها وهي تبكي وتسأل عنه .. متعلقه فيه كثير غير عن انه اخوها هو تؤامها هند وهي تدمع لحالتها – يالله حبيتي خلوده كليها عشاني دزت خلود الأكل وهي تصرخ – ماابيه ماابي ابي خالـــــد انفتح الباب وكان فارس وهو يقول – خلــــود خلود اللي ركضت له وهي تضمه وتبكي – عمي فارس انت اللي تقدر خالد انت تحبه وهو يحبك بيسمع كلامك تكفى ابيه هند بكت وهي تشهق وفارس ضمها ومسح دموعه ودموعها بيده السليمه وهو يقول – انتي تحبيني وبتسمعين كلامي صح هزت راسها وعيونها مليانه دموع مسح دمعتها اللي طاحت وابتسم – معاد ابي اشوف الدموع لان خالد راح فوق في السماء تعرفين ليش هزت راسها بلا وهي مشدوده لكلامه – لان ربي يبيه يموت اختار انه يموت نقول لا مايصير لان هاذا ربنا صح هزت راسها بإيه فارس ويمسح على شعرها – خلاص يعني نقتنع إن أي شي يسويه الله صح وزين وفيه خير هزت راسها بإيه فارس ضمها بقوه – خلاص ياحبيبتي ربي سوى الشي الصح والخير وخلى خالد يموت وحنا مانبي نبكي ونعترض لان خالد قولي إن شاءالله نجتمع معاه في الجنه حست بالسعاده وفكت نفسها – يعني بشوف خالد مره ثانيه فارس هز راسه وهو يضحك – قولي إن شاءالله ضحكت وهي تقول - إن شاءالله إن شاءالله اشوفك مره ثانيه ياخالد ونلعب مع بعض ابتسمت هند وهي تشوف الموقف وتغيير نفسية خلود اللي بدت تضحك وعيون فارس تحمل من الحزن الكثير تفأجا إن دموع محمدنزلت .. وهو يحاول يوقف .. بسرعه قرب منه وهو يقول – محمد انت ممنوع تقوم محمد وهو منهار ويرجع نفسه للسرير بشكل مأساوي – صقر يعني انا صرت عقيم ماأقدر اجيب اطفال ابد ؟؟ وخويلدان ماااااااات لا انت تكذب تأسف صقر لحاله وسكت بكى مثل الأطفال وهو يقول – هاذي حوبتي هاذي حوبتي اللي كرهت عيالي من لحمي ودمي هاذي حوبتي ياصقر ولدي مات وماعاملته نفس أي طفل في سنه اضربه واكسر عظامه وارد ويجي يحب راسي ويقول سامحني ,, ( ناظر صقر وعيونه حمر ودموعه تسيل ) يعني كذا ببساطه راح ,, راح وانا ماتعلمت منه انا جاهل معه وجاهل بدونه ياصقر ولدي راح ولدي راح ( وضرب على فخوذه بتحسر وهو يشاهق ) صقر بكى مع محمد وهو يواسيه .. وجلس جنبه ومد يدينه دزه محمد وهو يقول – رح ياصقر رح ربي حافاني هاذي حوبتي ربي عاقبني ولدي مات وانقطع نسلي خلاااااااااااااااااااص وقام يضرب السرير تحته بقوه .. صقر اول مره يشوف محمد بهالإنفعال وطلب الدكتور ,, اللي عطوه إبره تهديه |
عطاهم كل المعلومات اللي يعرفها وهو يمسح اخر دمعه طاحت من عينه
الشرطي شكره وهو يوعده انه بيسوي كل اللي يقدر عليه .. لان صقر موكله في المهمه الشرطي – خلاص يافارس إن شاءالله بندور على الفاعل بس لو حفظت رقم اللوحه هالأمر بيسهل علينا كل شي فارس وهو مقهور – ياعبدالله في ذاك الوقت ماني في حال لوحه ركضت للمرحوم الشرطي عبدالله كتب في المحضر اللي معه كل شي ووقف وهو يقول – اوعدك بسوي كل اللي اقدر عليه بس ياخوفي تكون السياره مستأجره وتصعب المهمه فارس بعصبيه وعرقه ينبض وقف – عبدالله طلعهم لي لو من تحت الارض دخلتك على الله وعلمني عبدالله حط القلم وناظر فيه – فارس وانا اخوك استهدى بالله فارس جلس منهار وهو يمسح وجهه وشعره وبحزن – عبدالله صورته عيت تروح من راسي انا تعبان تعباااااااااااان اكذب لو قلت بانساه انا الوحيد اللي شهدت موتته البشعه عبدالله قدر حزنه وطبطب على كتفه- قل إنا لله وإنا إليه راجعون وربي بيعوضكم خير يارب فارس تسند على المسنده العربيه وحط راسه بتعب – ياااااااااااااارب اليوم الثاني جلست موضي جنب وضحى ونوره وهاذا اخر يوم في العزاء .. ومنيره رافضه تطلع لأي حد بس اللي يبيها ويعزيها يدخل لها .. حست موضي بالخنقه وطلعت من المجلس للصاله يوم دخل عليها نايف وهو يزفر ناظر موضي وابتسم لها – حيالله موضي موضي وقفت له إحترام – هلا نايف اخبارك نايف – بخير طاب حالك ,, من متى هنا ؟؟ موضي – من البارح جايه ,, اقول نايف نايف ناظرها وهو كان بيروح – سمي موضي – محمد ماتدري متى يطلع نايف ناظرها بإستغراب – انتي مازرتيه موضي – لا يمكن في الليل اروح نايف زفر وقال – حالته النفسيه صعبه ومن درى عن الخبر ياموضي وهم يعطونه إبر مهدئه كل ماصحى بكى وانفعل ويبي يكسر كل شي قدامه انا افضل ماتزورينه خليه لين يتقبل الصدمه ويهدئ موضي استغربت ( من متى هالحب لولده ) – خلاص مو مشكله في امريكا لبست فستانها البنفسجي الناعم بالحيل ,, وهي تحس بالسعاده انها بتطلع معه يتمشون شوي وترجع للمستشفى .. يوم عرفوا انهم عروسين جدد اسمحوا لها بالخروج لبعض الوقت دق الباب وهو حاس بملل .. لين هالحين رسمي معها .. والمشكله لو استمرت على اللي تسويه من حركات بتفجر طاقته وهو يتمنى انه مايكون له معها لاحل ولاربط مثل الفراشه طارت للباب وهي تضحك افتحت الباب وناظرته بتعجب وضحكت – حيااااااااااااوي حك ذقنه بإحراج ودخل وراها وهو يقول – خلصتي لبست شنطتها الفوسفوريه ورحت له ركض ببرأه باسته – خلاص حبيبي شوفني حلوه صح رجع خطوتين على ورى وعطاها ظهره وهو يبلع ريقه – ااااا اا انا بنزل بسرعه ألحقيني ضحكت وهي تحسه يستحي فوق المعقول بقوه يستحي .. ركضت وراه ومشت جنبه ومسكت يده .. ناظرها وإبتسمت له .. إبتسم لها بمجامله ومشوا لين السياره .. فتح لها الباب وركبت بسعاده وهي حاسه انها بتطير من الفرحه مازالت تخاف من الناس بس من تكون معه تحس بأمان في الليل سكر جواله وهو معصب من حركات سياف .. وهو يعلمه باللي يبيه يسويه وهو غبي مايفهم .. طلع برى للشارع وشافه نازل من سيارته اتجه سياف له وهو يقول – وراك معصب نايف ووده يعطيه بكس – انا قايلك لاتشرب يشمون فيك الريحه ليه تخالف امري وتشرب سياف يبرر – بس شربت شوي ابي اروق احس راسي معورني نايف تله مع ثوبه وشم ريحته ودزه على الجدار بقهر – اذلف وتش طيب مره ثانيه ترى ابوي يعرف هالروائح خبره فيها يوم كان نقيب قبل يتقاعد راح مره ثانيه للسياره وصب الطيب عليه وسكر سيارته .. ودخل ورى نايف اللي بدأ يعرفهم عليه ويقول انه دكتور ويشتغل معه وجاي يعزيهم وبدأ الترحيب فيه وهو متقن الدور صح عند ساره ضربت راسها بقهر وهي اللي تتحسر مليون مره عقب كلامها معه .. ماتعرف لمن تشكي ولا لمن تروح .. شافت سجادتها مبسوطه وتذكرت الرب اللي إذا ضاق في الإنسان الوسيعه يدرك إن له رب كريم رحيم من ترجاه ودعاه مخاب توضت ولبست شرشف الصلاه وبدت تناجي رب العباد وتبكي وتدعيه يوم فتحت الباب هند اللي كانت بتناديها للعشاء .. وخلتها على راحتها وطلعت مسكره الباب .. ورجعت إدراجها للبيت .. وعند المدخل قابلت فارس اللي كان لابس عمامته بدون عقال ولافها بحركه مبهذله شوي بلعت هند ريقها وهي تشوفه بهالمنظر وهو يتعداها نادته – فارس لف لها وقالت – الحمدالله على السلآمه ,, واحسن الله عزاك فارس قال لها وهو يتعداها – مشكوره حست انه في وضع حزين بالحيل وعذرته ,, ودخلت داخل البيت |
| الساعة الآن 11:25 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية