|
5 ورقات دفعة واحدة ...الف شكر لك خيتو ^^ ..ترجع للاحداث شخصياتهم خاصة ذياب وصخر هي هي و احلى شي انهم نجحوا فدراستهم بس منو منهم اللي بداتي به القصة متشوقة لمعرفة ذلك ..البنت الصغيرة هل سيكون لها دور ..
ننتظرك وتعثرت بفارغ الصبر واصلي وموفقة ان شاء الله |
تسلمين حبيبتي عالبارتات:flowers2:
حلوة النقله اللي نقلتي فيها ابطالنا من حياة الشوارع والشتات لبيت يحسون فيه بالامان وتتحقق فيه احلامهم.. والاحلى انج حليتي سالفة التبني بكل سلاسة سلمى ما تستاهلين اللي يسويه فيج ريلج اشحقه ساكته عنه خليه ايولي شو سالفة البنت اللي حصلوها مربوطة يعني بتكون يتيمة وتخلصوا منها بهالطريقة ولا يمكن حد خاطفنها ويم حس ان مب مستفيد وردها بهالطريقة لا تطولين حبيبتي نترياج:flowers2: |
السلام عليكم ورحمه الله وبركاته
حبيتي وتعثرت خجلا .... أشكرك على الروايه الخفيفه والروعه بس كنتي ماشيه صح تنزليلنا على الموعد وش صار ؟؟؟؟ طولتي كثير أتمنى أن يكون المانع خيير ننتظر جديدك يا قلبي |
اسفة عن التاخير الاضطراري .. بسبب الدراسه .. وبما ان هذي اول سنه لي في الجامعه فلحد الحين ملاقيه صعوبه في التاقلم مع طريقة المناهج .. " ادعوا لي " ورقة الخريف ( 6 ) الرجاء على من يعثر على هذه الطفله تسليمها لاقرب مركز شرطه .. وعدم البحث عن أي اقارب لها .. لانهم غير موجودين .. .. طالعوا بعض بصدمه .. ورجع نظرهم للطفله الممدده على الكنبه وهي تهذي .. والعرق يتصبب من جبينها .. فارس الي كان الاقرب لها مد يده يتحسس جبينها وخدها : تراها مصخنه .. ذياب : خل نوديها المستشفى .. صخر : لا .. فارس : ليش ؟؟ صخر : اذا ودينها اكيد بيطلبون بطاقتها .. واذا عرفوا انها ماتقرب لنا بيوصل الموضوع للشرطه .. ذياب : زين هذا الي احنا نبيه .. مردنا بنوديها للشرطه .. صخر : لا .. ما ادري .. بعدين بنقرر .. فارس : شلي قاعد تخطط له .. صخر : ما اخطط لشي .. وخلوكم في الياهل احسن .. رفعها ذياب واخذها على غرفته .. حطها على السرير ..وغطها باللحاف .. وهو يتأمل ملامحها .. وجهها دائري وخدودها مليانه ومحمره بسبب الحراره .. رموشها طوال وشعرها قصير و اسود سواد اليل .. طالعها بشفقه .. ياترى وش قصتها .. !! دخل فارس وبيده طاسه فيها ماي بارد وقطع ثلج وفوطه صغيره .. و وراه صخر .. ظلوا طول الوقت يتناوبون عليها ويبدلون الفوطه كل ما صخنت بعد ماتمتص الحراره .. والماي اذا برد .. كل ربع ساعه واحد ينام والثاني يقعد .. لحد ما في النهايه خلاص انهكت قواهم وناموا حواليها في السرير الكبير بدون مايحسون .. .. فتحت عينها السود .. بكل برائه .. طالعت حواليها بخوف .. اول ماشافت المكان الغريب الي هي فيه والثلاثه الي نايمين حواليها .. صرخت بخوف .. وهي توقف على السرير وتصيح بكل قوتها .. .. فزوا من نومهم بخرعه من الصوت المزعج الي فوق راسهم .. قام صخر لها وضمها وهو يحاول يهديها ., وهي تحاول تفك نفسها منه وتصرخ بفزع .. ظلت نص ساعه تصيح وتصرخ .. وما هدت الا لما عطوها سله حلاوه سكتتها .. وهم قعدوا بعيده عنها لانهم كل ما قربوا منها صاحت .. فارس وهو يقرب منها بالعدال .. طالعته بخوف وشفايفها ترجف وعينها امتلات بالدموع المنذره بالهطول .. حرك يده وهو يسكتها .. : اش اشش .. " دور شي يغريها فيه شاف كره صغيره حمرا عند السرير رفعها لها " تبينها .. هزت راسها بتردد .. فارس : اول شي قولي لي شسمج ؟؟.. ردت وعينها على الكوره : حووول .,. عقد حواجبه وطالع ذياب وصخر : حووول .. لا بالله عرفنا اسمها .,. صخر بعد تفكير : يمكن حور .. فارس طالعها : حور ؟؟!,, هزت راسها بتأييد .. فارس كل ماله يتقرب لها لحد ماقعد جمبها على السرير .. وهو يحرك الكره بيده ويزيد في اغرائها .. مدت يدها بتخذها بس بعدها عنها : اول قولي شسم البابا .. حركت راسها بلا .. فارس : زين و الماما .. بعد حركت راسها بلا .. فارس : شكله صج ماعندها اهل .. ذياب : زين ماعندها اهل ليش كانت مربوطه في الشارع .. ولو كانت لقيطه جان من ولادتها انقطت في الشارع مو يوم وصلت لهالعمر .. صخر : احس قصتها فيها لغز .. ولغز كبير بعد مو سهل حله .. ذياب : زين مدامها صحت .. خل نوديها مركز الشرطة .. صخر : انت من صجك .. تدري في النهاية الشرطة بيقطونها وين ..؟؟ .. تدري ولا اعلمك .. في النهايه مصيرها في ملجأ الايتام .. وانت أدرا بمصيرها هناك .. ذياب : ويعني شتقنرح حضرتك .. ها !! .. فارس : تراني فاهم عليك وعارف بلي تفكر فيه .. وفي اعتقادك هالشي مو انانيه .. اذا خلينها واهملنا موضوع اهلها .. الي يمكن الحين استجنوا واهم يدورون عليها .. صخر : والرساله الي لقيناها .. فارس : ماتثبت أي شي .. يمكن ذلين ناس خاطفينها من اهلها .. صخر : ويمكن ما عندها اهل .. او اهلها بنفسهم متخلين عنها .. ذياب : لحضه لحضه .. فهموني انا مو فاهم عليكم .. " التفت لصخر " ليكون قاعد تفكر تخليها عندنا .. صخر : أي .. عندك اعتراض .. ذياب : أي عندي .. اول شي فكر بالي قاله فارس ... ان احتمال كبير يكون عندها اهل .. والشيئ الثاني الي ما ادري شلون راح عن بالك انها بنت شلون بتخليها تعيش مع ثلاث شباب .. ولا تقول لي صغيرة لان الصغير يكبر .. وانت جذي ما بتحميها مثل ما انت فاكر لا انت بدمر مستقبلها .. لان اول شي الناس بتقوله .. هذي بنت من .. ومن وين ملاقينها .. وشلون تسمحون لنفسكم تخلونها عنكم بدون أي وجه حق .. وهي ما يربط بينكم بينها أي علاقه .. فارس : بضبط هذا الي ابي اقوله .. والادهى والامر اذا عرفوا الناس ووصل الموضوع للشرطه .. انت تدري ان هالشي يمكن نتحاكم عليه .. بما انا ثلاث شباب .. ومخلين طفله صغيره معنا .. صخر لاتخلي عاطفتك تتغلب عليك .. خل عقلك هو الي يحكم وفكر بطريقة منطقيه .. ذياب : صخر .. مو احنا الي نعلمك الصح من الغلط .. وانت طول عمرك كبيرنا والي توجهنا .. صخر وهو يقوم ويتقرب من الطفله ويمسح على راسها بحذر : صدقوني كل هالي تقولونه فكرت فيه وما راح عن بالي .. بس والله تعلقت فيها.. ومو قادر اتصور مصيرها .. المصير الي احنا هربنا منه .. فشلون تبونا نرميها فيه بملأ أرادتنا ..؟؟ فارس : ليش تفكر بسوداويه .. ببساطه يمكن يلقون اهلها .. صخر : بس بعد ما اقدر اجازف .. و اذا عندها اهل اكيد بيدورون عنها وبيبلغون الشرطه وصورها بتنتشر في كل الجرايد .. صدقوني ما ادري ليش عندي احساس ان الله حطنا في طريقها لسبب .. ولا ليش احنا بذات الي لقينها .. مع ان المسجد كان مليان ناس ... ليش محد انتبه لها الا انت ياذياب ..؟! ذياب : تردون خلوها على الله .. ونشوف بعدين شنقرر .. فارس وهو يتلفت ويحرك خشمه : شباب تشمون الي انا اشمه ... صخر : صح في ريحه .. ذياب وهو يطالع حور : شكله الاخت سوتها على نفسها .. طالعوها بصدمه .. وهي ضحكت ببراءه على شكلهم : يييك .. فارس :يييك ها .. وع عليج يالوصخه .. ترا عليها حفاضه .. ذياب يكلمها وهو ينزل لمستوها : هيي انتي عمرج كم .. و لحد الحين تلبسين حفاضه ؟! .. ضحكت في وجهه وهي مو فاهمه شيقول .. قرصها بخدودها : خاطري اكلها من حلاها .. صخر : الحين شالحل .. شلون بنبدلها .. ولازم نشتري لها هدوم وحفاضات .. فارس : يلا هذي بديتها .. شلون بنهتم فيها في الايام الجايه .. صخر : الله يخلي الخدم الي مصطفين تحت بدون فايده .. على الاقل نخليهم يهتمون فيها ويسون الاشياء الي مانقدر احنا عليها .. ذياب : تدري انت شكلك بتودينا في داهيه .. .. حملها صخر ونزلوا تحت .. سلمها لوحده من الشغالت .. وطلب منها تسبحها وتدبر لها أي شي تلبسه .. وطرش السواق يشتري لها حفاضات .. .. قعدوا حولها على طاوله الطعام يراقبونها وهي تاكل وعافسه المكان .. وكل حين تطير شي .. فارس : هذي حتى شعرها وخشمها ياكلون معها .. صخر : حرام عليك شوف شلون تاكل .. والله جنها من اسبوع ماطب الزاد بطنها .. رفعت عينها من على الصحن وابتسمت ابتسمه عريضة : بحححح .. قام صخر من على الكرسي بيرفعها .. بس الباب الي النفتح فجأة والشخص الي دخل .. خلاه يوقف مكانه .. والبسمه ترتسم على شفايفه .. : السلام علــــ .." قطقت سلامها وهي تنتبه للطفله " .. من فيكم تزوج وجاب بنت بدون مايخبرني .. ضحكوا ثلاثتهم وتقربوا منها وهم يردون السلام .. باحترام .. رفعت النقاب وهي تناظرهم بحب : لالا هالحركات مو علي .. بسرعه اعترفوا .. ضحكوا عليها وهي تطالع الطفله باستـنـكرا .. مستغربه وجودها معاهم .. قعدت على وحد من الكنب وهي مقابلتهم وعينها ما نزلــــــت من على حور الــي قاعده تدور في الصاله بدون هدف وشكلها صاير مضحك بالتيشيرت الابيض الرجالي الواسع والطويل عليها .. وكل حيــن تتــعرقل منه وطيح على الارض .. وترد ترفع نفسها بصعوبه .. .. قالوا لها قـــصــه حور وشلون لــقــوهــا .. وراووها الورقــه الي لقوها بين ثيابها .. طالعتها بشفقة ..: يـــا حرام .. مسكينه .. شفيهم الناس صاروا جذي بدون ضمــيـر ولا احساس .. شقررتون الحين شبسون فيها ..؟؟ قالوا لها بقرار صخر .. ذياب : بس هالشي مستحيل .. مثل ماتعرفين احنا ثلاث شباب وهي مهما كان بنت .. شبنقول للناس .. سلمى بتفكير : اذا انتوا مقررين تخلونها عنكم .. وتكفلونها خلاص لا تفــكرون في أي شي ثاني .. وكل شــي يتدبر .. واذا على اهلها مثل ما قال صخر .. اذا هم موجودين بنعرف عنهم .. طالعوها باستغراب : شلون كل شي يدبر ..؟؟!! ذياب : عمه هالشي مو قانوني ويمكن نتحاكم عليه ..؟؟ سلمى : ماعليكم .. اقدر اغطي الموضوع ببساطه .. فارس : اوك تغطى الموضوع .. بس احنا شلون بنقدر نهتم فيها ونرعاها .. سلمى : ليش انا مو ماليه عينك .. صخر : عمه انتي يومين وراجعه الامارات .. سلمى : من قال .. خلاص من يوم ورايح بقعد على جبدكم ما بتزحزح .. ذياب : عسل على قلبنا صدقيني .. بس اكيد في النهايه بترجعين لريلج .. مع اني ما اتمنى هالشي يصير .. سلمى : خلاص مابيصير .. لاني بكل بساطه طلبت الطلاق .. بس تعبت واهنت كرامتي بما فيه الكفايه .. طالعوها بصدمه .. وبفرحه حاولوا يخفونها .. قامت من على كرسيها وتوجهت لحور رفعتها من على الارض وحطتها على ركبتها وهي تناظرها بحب : شسمج ياحلوه ؟؟.. حور : حـــوووول .. ضمتها لصدرها : فديت الحور ياناس .. :: بعد ايام عرفوا كل الناس وكل جيرانهم ان سلمى رجعت مطلقه .. مع بنتها الصغيره .. !! الي محد استغرب وجودها لانهم ماكنوا يعرفون أي شي عن سلمى وعن حياتها .. طبعا هذا الي خبروا فيه الناس .. عشان يتجنبون أي مشكله .. وبواسطتهم طلعوا لحور اوراق رسميه عشان يضمنون مستقبلها .. واتبعوا طريقة الملاجئ .. باختلاق اسماء وهميه للاطفال .. بس هم سموهاا باسم طليق سلمى مع تغيير اخر اسمين للتمويه .. ومع هذا ضلوا يبحثون عن أي خيط يدليهم على اهلها .. ::::::: " بعد سنه " قعد من النوم على صوت صياح وصراخ .. رفع راسه وهو يحاول يفتح عينه بصعوبه .. تذكر ان اليوم اول يوم لحور في الروضه .. قام بكسل .. وهوي يرفع شعره الطايح على عينه .. طلع من غرفته وتوجه للجناح الثاني ألي توجد فيه غرفه حور وغرفه سلمى .. طل من الباب الي كان مفتوح .. وصراخ حور صم اذنه .. لقلها منسدحه على السرير وتضرب الحاجز برجولها باحتجاج وهي تصرخ : مابلووووووح .. ما ااااااااابلوح اللوده .. " مابروح .. مابروح الروضه " سلمى كانت قاعده على الكرسي الي عند السرير حاطة يدها على خدها وطالعها بقله حيله .. وصخر قاعد عندها على السرير ويحاول يراضيها .. بدون فايده ذياب : اش هالازعاج على هالصبح .. سلمى وهي قايمه بتطلع : تصرفوا معها .. لاني عجزت خلاص .. بنزل تحت بشوف الفطور .. والله محد خلاها تصير جذي الا دلعكم لها .. صخر وهو يرفعها ويحطها في حضنه : حور بابا ..ليش ماتبين تروحين اروضه .. ردت وهي تشاهق وتدفن راسها في حضنه بدلع : لــ ـنــ ـها تحــ ـوف .. ذياب وهو يقعد جبمها من الجهه الثانيه : من قال .. اصلا الروضه حلوه وفيها بنات واولاد مثلج وايــــد .. وفيها العــــاب .. وكل شي تحبينه .. طالعت وهي تسأله ببرائه : سج ؟؟ ,, صخر : والله سج .. .. القــــــــــــــاكــــــــــــم فــــــــــــي ورقـــــــــــة الخــــــــــريـــــــــــف ( 7 ) والردود بحاول التفرغ لها بعدين .. |
اقتباس:
تستاهلون اكثر .. العفوا .. انتظر تعليقج على الجزء الي نزل .. |
| الساعة الآن 01:35 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية