أم عروة

خخخخخ اجل خايفة على سهيل ... باويلك من شيخة و غيرتها

الله يسعدك على هالمرور الحلو



أميرة الندى

أجل عجبك موقف راشد من منى
خخخخ زين انو ما طلقها و هو معصب ... غيور مررررره

مبارك لا يصعب عليكي ولا شي يالغلا ... لو حبها في البداية ما كان صار اللي صار و مهرة و ناصر اجتمعو
بعدين بعد ما طارت الطيور بارزاقها ... جاي الأخ يفكر فيها .. وينه من البداية هااااا :party0033:
ولا الشي ما يحلا للعين الا اذا شافه بيد غيره << تراه فاقعلي مرارتي

يوسف ... خليه يشم شوية هوا .. قبل ما يدخل القفص يا البي
بعدين الصديق وقت الضيق ... خليه يونس صاحبه

حمد ... طولي بالك و بتشوفي اللي يعجبك :rfb04470:



عذبة الروح ..

لا يا معوده ... مادام بتتحلمي بيها .. خلاص توبة معاد اتاخر
كم عذبة رووح عندي ... هي وحدة و ما ابي ازعلها


سلمتم عالمرور جميعا :flowers2:

الجزء 51
 

بسم الله الرحمن الرحيم



الجزء الواحد والخمسون..
----------------------------------
اليوم: الجمعة..
المكان: بيت سلطان..
الوقت: الخامسة مساءا..
----------------------------------
(مهرة)...

كنا يالسين في الصالة مع...الكل... عمي وعمتي...واليدة...ناصر مع يوسف ومحمد... وحرمته ميثا وعياله اللي كانوا يلعبون شوي بعيد..
انا كنت يالسه عدال ام سلطان...واراقب بعيني ناصر اللي يالس مجابل امه وعاطنها ايده عشان تقص له ظفوره..!!!!
ياربي يالدلع... قص ظفور مايروم عليه اروحه..!!!
عمي ومحمد كانوا يتكلمون عن شي يخص الاراضي..والقرارات اليديده وغيره... باختصار شي ما افهم فيه...
اما يوسف فيالس يخبل بيدته اللي يالسه عدالي.. قاعد يوصف لها كيف الناس يتصرفون في اوروبا..
واليده مب مصدقه كيف الناس استوت جيه..
كانت رداة فعلها تظحك...
ناصر: احين انته ليش حاشرنها بهالتفاصيل هيه لا بتسير تشوفهم هناك ولا شي...
يوسف: اثقفها...
ناصر: ههههههههه خس الله عدوك وياها ثقافه مب بحايتها هيه..!!
ام سلطان: هااه يوسف والا تقول لي الرياييل يستوون حريم عندهم...؟!
يوسف: هيه هيه...والعكس بعد...
ام سلطان: لاحول ولا قوه...
ناصر: بتخليها تحلم كوابيس حرام عليك..
التفتت لي اليدة متظايجه شوي..
ام سلطان: شو يقول ريلج هذا؟!
مهرة: ههههههه يدوه ناصر مايبا يوسف يخبرج هالسوالف...
اطالعني ناصر بنظره معصبه لاني واشيت عليه...
ام سلطان: وشحقه؟!
مهرة: مادريبه تخبريه..
ظحك يوسف باعلى صوته يوم شاف يدته مسكت عصاها ونغزت ناصر في خاصرته...
ناصر نقز وخرب على امه قص الظفور...
ناصر: آآي...يدوه حرام عليج فخاصرتي عنبو..!!
بو محمد: شوهالحشره هذي شفيكم..
ناصر: امك فرحانه بعصاها...
طنشهم عمي ورد يسولف مع محمد...
ويدوه قالت لناصر..
ام سلطان: شعندك ماتبا يوسف يخبرني...؟!
ناصر: سوالفهم كلها طفسه يدوه مالج حايه تسمعينها...
ام سلطان: لالا خله يسولف لي..مالك حايه انته...
ناصر: دامني يالس مابخليه يرمس ...(وقال بصوت واطي ماتسمعه يدته) ..غياظا فيج يالعيوز..!
قالها بلهجة مزح وهو يبتسم..
ام سلطان: شو تقول؟!!
ناصر: اقول لا اله الا الله...
ام سلطان: محمد رسول الله..متى بتروح انته؟
يوسف: ههههههههههههههههههههه يدوه تظايقت منك تباك تروح...
ناصر: افا يا يدوه...بخلص قص ظفوري وبسير بفكج من ويهي ..
ام سلطان: روح انته وخل مهرة عندنا..
ظحك ناصر ظحكه صغيره ساخره...تبين استحاله هالموضوع...!!
مهرة: صدقها يدوه...
اطالعني ناصر بنظره...
ناصر: صدق؟
مهرة: صدق...
التفت عني ناصر وهو مبتسم بسخرية...حشى..الموضوع عنده غير قابل للنقاش..!!
التفت انا لليده...
مهرة: تعالي انتي ويانا يدوه..
ام سلطان: حشششششششششى عليه تبوني اسكن فوق شرا الحمام ..لالا ماروم...
ظحكت انا وسكت...
بعد شوية سوالف مع الكل...
ناصر: يالله مهرة...ورانا درب..
ام محمد: صلوا المغرب انزين وطلعوا...
ناصر: في الدرب بنصلي امايه..
ام محمد: على شو مستعيل ياولديه..!!
ناصر: ماداني خط بوظبي في الليل امايه...

وبعد السلامات والتوصيات الكثيره منهم لناصر..عشان يهتم فيني ويحطني بعيونه...
ركبنا السياره وتوكلنا صوب بوظبي..

من ركبنا السياره..وحسيت بثقل التوتر... بسبب السياره الصغيره..وعدم وجود شخص ثاني غيرنا..
رديت اتذكر غصبن عني شعوري يوم كنت فحظن ناصر امس..!!..
ادري..ادري انه في ماضيه كان يشرب خمر...كان ظايع وصايع وكل شي يخطر عالبال..وفوق هذا كله حاول يعتدي علي..
لكن...
بغض النظر... حسيت بالحنان... !
ناصر: فشو تفكرين؟!
فزيت يوم سمعت صوته قريب مني وواضح..
مهرة: شو؟
اطالعني ناصر بفضول...
ناصر: ملامح ويهج تتغير بالتدريج...فشو تفكرين؟!
احترت .. شو اقوله احين..!
مهرة: ماشي..
ناصر: فيج شي بس ماتبغين تقولين...
مهرة: يمكن...!
ناصر: هممم...ماقلتيلي.. شو رايج باهليه؟!
ابتسمت وانا اتذكرهم...
مهرة: وايد حبيتهم...نحن ماكنا جي فبيتنا قبل..نتيمع ونسولف وربشه جي شراتكم..!!
ابتسم ناصر...
شكله استانس اني حبيتهم...اوكي انا حبيتهم هم ماحبيتك انته..!! يالرززه...!
مهرة: بتخبرك ليش معبل على امك تقص لك ظفورك ماتروم تقصهن روحك؟
اطالع ناصر ظفوره وابتسم..
ناصر: بلى..
مهرة: عيل..
ناصر: اتدلع عليها... استانس يوم تهتم بي..عقب فتره بايي دورج انتي..
مهرة: اقص لك ظفورك؟
ناصر: هيه..بتقصين ظفوري... وبتسحيني...وبتاكليني.....حتى السبوح بتسبحيني غصب..
غصبن عني ظحكت..
مهرة: هههههههههههههههههههههه...ياحليلك ..احلم احلم..
ظحك ناصر وسكت...
شكله وايد واثق اني بسوي كل هذا..
تخوفني ثقة هالريال..!

وقفنا في الطريج وصلينا على طرف الطريج..عالرمل. ... خلصت انا صلاتي قبل ناصر...ويلست اتامل المكان..
ويوم خلص ناصر نش على طول بيركب السياره اما انا تميت يالسه مب مستعده اني اروح..
ناصر: شفيج؟يالله نسير..
مهرة: ايه ..يبالنا سيره البر...
ظحك ناصر على لهجتي وفتح باب السياره عشان يركب..
ناصر: بسويلج عزبه...
نشيت انا بعد انفظ عباتي...
مهرة: صدق والله؟!
ركبت السياره وانا اتخيل الفكره وعايبتني..مع اني اعرف اني ماروم اتحمل مسؤولية عزبه..!!!..
ناصر: ههههههه خبله انتي..
اول ماوصلنا الشقه طلع ناصر مشواره المعتاد الغريب...
بعد ثلاث ساعات في الشقة..وبعد ماتعشينا.. خلاني ناصر ويا صحون العشا ونش بيرقد...
ورد مره ثانيه يوصيني...للمره الالف يمكن من وصلنا...
ناصر: وعيني الصبح عندي دوام لا تنسين...تصبحين على خير..
ودخل غرفته ...
عنلاتك زاد..!!!.. قهرني في ذيج اللحظه مادري ليش...
يمكن لانه كان بارد وياي طول اليوم..وانا تعودت على معامله ثانيه مختلفه..!!
------------------------------
اليوم: السبت..
المكان: شقة ناصر..
الوقت: السادسة صباحا...
------------------------------
(ناصر)...

كنت اسمع صوتها وانا فعز رقادي... لكن بعد دقايق... توضح الصوت اكثر... وكان فعلا موجود...
مهرة: ناصر قووووم....
ناصر:همممممممممم...!!!
مهرة: اوففف ماجنك موصني شكثر امس عشان اوعيك... ترا بسير وبخليك برقادك..!!
بطلت عيني بكسل...
وقلت بصوت كسول بعد.. وانا اتمغط...
ناصر: كم الساعه احين؟!.
مهرة: ست...
رديت اعق راسي عالمخده..
ناصر: اففففف مهرة بعده شي وقت...
مهرة: هيه بس انته ماصليت الفير...
شهقت وانا ارد انش من الشبريه....
هيه والله ماصليت الفجر.!!!...
ناصر: ليش ماوعيتيني؟!!!..
مهرة: انا اروحي من شوي ناشه...
ناصر: اففففف...
نشيت وانا افر اللحاف عني بعيد....
ناصر: ممكن تسوين لي شي اكله عشان ما اتاخر..!!
اطالعتني مهرة بعيون مفتوحه وانا ادخل الحمام....
ووصلنتني صرختها في الحمام خلتني اضحك...
مهرة: انا ماعرف اسوي شي...!!!!!
ظحكت ومارديت عليها....
تسبحت وصليت الفجر قضاء...وعقب يلست استعد لدوامي...
اليوم اول يوم اداومه بعد اجازتي اللي قطعتها...واللي اتضح لي انها بدون فايده... احسن لي اداوم عشان اكمل اجازتي بعدين ... محد يدري يمكن نسافر انا ومهرة....
ويمكن ساعتها تصر على انها تشل مايد..!!
ابتسمت...فديته ياربي...
تذكرت كلمه مهرة امس... لاني اول ماوصلت الشقه خليتها وطلعت...سالتني وين رايح؟ قلت لها مشوار سريع... استغربت وقالت لي " شو هالمشوار اللي دوم تروح له المسا ومستعجل لهالدرجه"...
امس تحايلت عليها بالجواب...
لكن ياترا لين متى بتم داس عنها سر هالمشوار اليومي المسائي..!!!!... مهرة صح بريئه لكنها مب غبية..!!!!..
لين متى بتم داس عنها...ليش ماقولها احين وافتك..!!!..
افففف الله كريم...

طلعت من غرفتي وانا اخش بوكي وتيلفوني في مخباي...
دخلت الصاله حصلت مهرة مسويه اللي قدرت عليه في المطبخ وحاطتنه على طاوله الطعام...
عصير+ سندويش جبن وجام+ زيتون..!!!!!!!!!!

ياعيني عالريوق...

مع ذلك استانست... عالاقل افتكرت تسوي شي لي ومارفضت طلبي...
ابتسمت لها وانا اشوفها واقفه جدام الدريشه واطالع صبعها السبابه بتفحص شديد...
ناصر: صباح الخير...
قالت لي مهرة بشرود ومازالت تتفحص الصبع...لامه بوزها الصغير ومعقده حياتها وهي اطالع صبعها...والمصيبه انها محْـوَلّــه من كثر ما الصبع قريب من عيونها... شكلها كان يضحك..!!
مهرة: صباح النور...
عقدت انا حياتي...
ناصر: شفيج؟!
مهرة: شوجه (شوكه) دخلت داخل صبعي من خشب مسكه السجين...ماشوفها صغيره...

عشان جي واقفه عدال الدريشه؟! عشان الشمس تنور عليها...ياحليلج يالعيوز..!!!!..
تقربت منها وسحبت ايدها وانا اقول..
ناصر: هاتي اشوف..
ردت تسحب ايدها بسرعه..واطالعتني بتوتر..
مهرة: لالا برايها انابطلعها...
ناصر: هاتي اقولج...
سحبت ايدها مره ثانيه ويلست اتفحص صبعها .. حصلت الشوجه...مع شويه جهد طلعتها...
كانت صغيره وايد وداخله داخل صبعها كامله...
بعد ماطلعت الشوجه فركت صبعها شوي عشان يخف الألم... لاني كنت اهوس عليه بقو عشان اطلع الشوجه منه..
ناصر: خلاص طلعت...
رفعت نظري لمهرة... انصدمت انها كانت اطالعني انا ..مب صبعها اللي المفروض انه يعورها.. اطالعني بتنرفز وهي حايسه بوزها..
ناصر: شفيج؟!
مهرة:.... خلصت غرشه العطر؟
ناصر: ليش؟
مهرة: متسبحبه انته..!! شو هذا هالكثر..!!!
ابتعدت وان اتراجع لريوقي المتواضع..وضحكت..
ناصر: بتحاسبيني بعد..!! انتن الحريم اللي ممنوع عليكن العطر في الطلعه هب نحن...
ظحكت مهرة بسخرية...
مهرة: هه..! احاسبك.!!.. على شو .!!.. سو اللي تباه..انا قلت اللي قلته لانك....لانك خنقتني...!
ناصر: اهاا احين ريحة عطري هب حلوه.!
مهرة: لا هب حلوه..
زاعجت فويهي بهالكلمه وخازت عن الدريشه سايره صوب باب الصاله ..بتطلع..
ناصر: وين سايره؟ تعالي كلي وياي..!!
مهرة: عندي شغل..
رفعت حواجبي مستغرب وسكت عنها وانا اشوفها تطلع من الصاله...
عندها شغل...شركات على غفله.!!!!..
طنشت ويلست اتريق ريوقي البسيط هذا...ويوم قربت اخلص شفت مهرة تدخل الصاله وشاله في ايدها حوض سمجتها الدايري...
يابته وحطته في المكتبه في مكان معين...
ناصر: هذا شغلج...!
مهرة: عيل اخليه فعلبته الصغيره حليله بيفطس..!!!..
عقدت انا حياتي...
ناصر: ثره ذكر هووووووه..!!!!!!!!!....
مهرة: هيه ماتشوف ذيله كبير.!!!...
تقربت منها اطالع هالسمجه اللي طلعت ذكر...قهرني.... كان مجابل الزجاج..بشكل معين حسيته مجابل مهرة بعمد..!!!.. وهيه بعد مب مقصره ملصقه ويهها بزجاج الحوض الدائري...!!..
عوذ بالله...حتى من السمج قمنا نغار.!!!
ناصر: يوم برد من الدوام بفره في البالوعه..!!..
شهقت مهرة..
مهرة: قسم بالله ياويلك..!!!
بغيت اظحك...حلو والله مهرة تهددني..!!
ناصر: نعم؟
مهرة: ماتمد ايدك عليه هذا هدية وغالي علي...!!!..
ناصر: من عند منوه؟
مهرة: من عند بنت خالووه...
ناصر: همممم..عشان خاطر بنت خالتج بس....
ما واحيت انطق بالجمله كامله الا وبمهرة اطالعني بنظره سممم...!!!..
كانها مستنكره علي كلامي... وقح بزياده يمكن...تغار يمكن...مادري....ياريتها تغار والله..بس مابتفائل لهالدرجه...!!!..
ناصر: محتاجه شي قبل ماروح.!!
مهرة: لا...
قالت هالكلمه والتفتت عني اطالع سمجتها "الذكر"...!!!

ناصر: ديري بالج على نفسج...فمان الله...
ماردت علي مهرة..!!..
طلعت من الشقه وسكرت الباب وراي وانا قلبي منقبض..!!
بفارق مهرة سبع او ثمان ساعات لاول مره..!!!..لاول مره من عرسنا يعني...!!

اول ما وصلت دوامي وجابلت الرياييل كل واحد منهم يعق علي تعليق...
تعليقات غريبه..شي منها لاذع...شي سخيف...مثل راعيه...وشي يظحك....وشي يظرب عالوتر الحساس..!!!
تحملتهن كلهن وردينا لروتين الدوام..!
----------------------------------------

اليوم: السبت...
المكان: في سيارة مبارك..
الوقت: الساعه السابعة والنصف مساءا..
----------------------------------------
(سيف)..

ركبت سياره مبارك وانا مستانس نوعا ما...
التفت لمبارك..
سيف: شو رايك باللي قاله منصور؟
مبارك: شووه؟
سيف: بخصوص الحفله..
صد مبارك الصوب الثاني وشغل السياره وهو يتافف...
سيف: شو شوفيك؟
مبارك: يوز عن هالسوالف...
سيف: أي سوالف.. مافيها شي نحن من زمان ماحضرنا حفلات...ومب انه بنكفر فيها مبارك..
مبارك: بس اهلك مايحبون هالسوالف سواف...ماله داعي تروح.
سيف: لا مافيها شي دام ابويه اروحه مامنعني عن الحفلات ويا ربعي...بس منعني عن اني اخذ هالشي بشكل جدي..وبعدين مبارك نحن بنسافر وهناك مابنشوف هالسوالف..
ظحك مبارك بسخرية..
مبارك: الا هناك صدق بتحصل هالسوالف...الشباب هناك مايقصرون ترا اللي يعرف واللي مايعرف يدق..
سيف: والله؟ بس حتى لو مب مثل اللي هني..
مبارك: يمكن..
سيف: احين شو ؟ بتي وياي والا لا..؟
مبارك: لا انا مافيني.. سير بروحك ويا ربعك...
سيف: بيزعلون عليك..
مبارك: لا مابيزعلون شو يزعلهم..!...
سيف: عالعموم انته وين ساير الحين...
مبارك: انته ماقلت تبا السوق؟
سيف: هيه هيه صح ...بتشرا لبس وكم جوتي..
مبارك: تراك وايد اشتريت...هناك بتحصل بعد اشياء حلوه بتقول ابا...
سيف: لا ماعليه ...ياخي كل ماشوف اللبس احسبه ناقص او شويه...
مبارك: لا يكون الخدامه تسرقهن ههههههههه...
سيف: بروحك ظحكت على عمرك انا ماقلت شي..شو تبابهن البشكاره احين؟!
مبارك: حق ريلها يمكن والا شي...
سيف: والله يا نتف كشتها لو صدق..!
مبارك: المهم انته كثر من لبس الشتا... ترا الشتا عندهم مب مثل هني...
سيف: ماعليه.. لا تحاتي.. المهم ..شو قال خالي عن ابويه ذاك اليوم يوم فحصه؟
مبارك: ليش شو فيه ابوك؟
سيف: يعني خالي ماخبرك شي..؟
مبارك: لا ماقال..
سيف: مادري احس ابويه هب صاحي...
مبارك: وسهيل بعد..
سيف: خل سهيل على صوب... سهيل يعابل بعمره بس انا خايف على ابويه...
مبارك: ماعليه شر ان شاء الله... أي محل تبا...
سيف: بندخل على محل (....) بنشوف شو عنده...

وبعد ماتشريت انا ومبارك من السوق ردني البيت على حوالي الساعه تسع...نزلني وراح..
دخلت البيت وحصلت ابويه مع عمتي امنه وشيخه يالسين...
سيف: السلام عليكم..
ردوا السلام علي ويلست عندهم..
بو حمد: شو عندك اشوفك محمل قراطيس..!
سيف: قمصان وبناطلين حق الشتا..
شيخه: الله انزين فجج خلنا نطالع..
عطيت شيخه الاكياس ...
سيف: ياحبج للمشترى...
يلست شيخه تفجج واطالع القمصان والبناطلين... وانا اراقب ابويه..اللي كان يراقب حركة شيخه ويطالع ثيابي بحزن...
زعلان ابوي اني بسير..!
سيف: شوفيك ابويه؟
اطالعني ابويه بنظره عقب نزل عينه..
بوحمد: ماشي...
آمنه: ابوك هب هاين عليه تروح عنه وتتغرب..
سيف: ادريبه والله.. بس ابويه انا ريال احين مافي داعي تخاف عليه... انا ساير هناك بكون مستقبلي وبرفع راسك ان شاء الله...
بو حمد: ان شاء الله...بس انته مابتسير شهر شهرين..بتسير مدة طويله..
سيف: انزين تراني باييكم في الاجازات ابويه..
بو حمد: الله يوفقك..
سكت وانا كاسر خاطري ابويه...
ماعرفت شو اقوله والا شو اسوي عشان اهوّن عليه الموضوع هذا..!!
لكن سفر لازم اسافر...شو اسوي.!!
---------------------------------------
بعد يومين من الاحداث الماضية..
---------------------------------------
اليوم: الثلاثاء..
المكان: شقة ناصر..
الوقت: الثانية والنصف ظهرا..
---------------------------------------
(مهرة)..

طلعت من غرفتي بعد ماتسبحت وادخنت وانا مبتسمه ومستانسه..
كان شعري مفتوح على ظهري عشان ينشف..
اما سبب فرحتي هو اني ...طبخت اليوم..!!..
وهذي اول طبخه تظبط..بعد ماسويت امس في الليل عالعشا باشاميل مثل ماسويتها ذاك اليوم في البيت.. قلت اجرب حظي واسوي غدا هالمره...
وحشرت شيخه بالاتصالات.. كل شوي اسالها عن الخطوه اليايه ...احين شو احط..احين شو اسوي..!
لين ماظبطت نوعا ما... لكنها (شوي) ناقصة ملح...
والله يستر مايطنز علينا بو الشباب...!!
ان اطنز صدق مابطبخ ثاني مره...
دخلت الصاله وانا امشط شعري بالمشط اللي اسنانه وسيعه..واتذكر كيف تشجعت واتصلت به تيلفون اليوم يوم تاكدت ان الطبخه طلعت زينه...
كان يكلمني بجدية وباختصار كانه حد كان معاه ...
وانا ناسبني هالشي لانه يوم يتصل ويقعد يقول كلام محرج ماعرف ارد عليه ..وكم مره سكرت فويهه بس لاني ماعرفت ارد...وهو يستانس على هالحركه..يستانس يوم يحرجني..
ابتسمت...
بصراحه ماكنت اتوقعه جي....!!..
ماكنت اتوقع انه روحه مرحه...
ماكنت اتوقع انه مهتم جي بالغير...
ماكنت اتوقع انه دقيق وذكي...
والادهى..!
ماكنت اتوقع اني اتقبله بهالسرعه...
اناماقول اني تقبلته كليا كزوج...لكن مؤقتا تقبلته كانسان اعيش معاه في الوقت الحالي..!
طلعت من الصالة وانا اتنهد...
مافي داعي افكر بوضعي معاه...لانه مابيدي شي اسويه غير اني اعيش هالايام واشوف شو يصير بالتدريج...
مالي حيله في مقاومته اكثر من جي...ماقدر... ناصر اقوى مني..شخصيته اقوى..واذكى...واخبث..
انا ماقدر عليه...
مشيت في الممر ودخلت غرفة ناصر اشوفها اذا بحاجه لترتيب او شي...
حست بوزي وانا اشوف بعض الملابس طايحه هني وهني...
اوكي مهرة بلا خقه...انتي يالسه في البيت طول اليوم شو بيظرج لو نظفتي ورتبتي شوي....!!
شليت الملابس بايدي وفتحت الكبت الصغير اللي دايما يتشكى منه ناصر...اشوفه اذا مرتب من داخل..
وشفت كيف كناديره متجسفه من تحت لصغر الكبت...!!
حرام..
سكرت الكبت مال الكنادير وفتحت الكبت اللي عداله ..كان مرتب نوعا ما..فيه ملابسه الباقيه فوانيل ووزره وبناطلين وقمصان وغيره من هالسوالف..
سكرت الكبت..وحطيت الملابس في سلة الغسيل..ورجعت ارتب فراشه الملعوز... بشكل عملي..وبدون ما افكر بالشخص اللي كان راقد على هالفراش...
خلصت ترتيب وطلعت من غرفته ودخلت غرفتي...
وسويت ترتيب سريع في كبتي الكبير ..بحيث فظيت جهه وحده لكنادير ناصر....
ماعليه بتحمل دخلاته لغرفتي...بس المهم اتخلص من لسانه... مب كل شوي يقعد يتشكى من الكبت ويحسسني اني انا المسؤوله عن هالشي...!!..
قضيت عشر دقايق تقريبا بنقل كنادير ناصر من الكبت..لغرفة الغسيل..عشان اكويهن من تحت...وبعدها نقلها من غرفة الغسيل..لكبتي في الغرفه...ويوم خلصت الشغله هذي...سمعت صوت الباب...
ركظت عشان افتح له..
مهرة: منووه...
سؤال غبي مع اني اعرف منو عند الباب بس هو موصني ما افتح الا له واسال قبل...
ناصر: فرعون..
ابتسمت...لكني مسحت الابتسامه عن ويهي بسرعه وفتحت له الباب...
وخليته مفتوح له ودخلت الصاله..
دخل هو وراي وسكر الباب...
توني كنت بلتفت له الا وهو زاخني من شعري....
مره ثانيه..
مهرة: آآي...ناصر .؟!.. مره ثانيه..!!
ناصر: يوم ماتبيني ازخه لا تفجينه...
مهرة: حرام عليك توني متسبحه وفجيته ينشف...واصلا دوم شعري مفتوح ماداني المه...فجني عاااد...
قرب ناصر راسي منه وهو ساحب شعري...ومبتسم بشطانه...
ناصر: خلاص عيل..تحملي..
تقرب اكثر وهو يبتسم..وباسني على يبهتي.. فوق الحاجب الايمن..وبنفس الوقت فج شعري وابتعد عني وطلع من الصاله..
يلست عالكرسي وانا مدوخه... ليش يسوي هالحركات..!!
لو كنت اتوقع حركاته جان احتطت منها.. لكني ما اتوقعها ابدا..كلها تفاجئني...
مديت ايدي وحطيتها على شعري...
بروح المه عن يقعد يزخخ مره ثانيه...
يوم دخلت غرفتي وجابلت المنظره.. تاملت في شعري اللي نشف وصار يلمع وسايح... هو طبيعته جي...طول عمري اشوفه عادي..لكن اليوم شفت اللي يشوفه فيه ناصر...
وابتسمت...وقعدت العب بشعري شوي وانا اظحك....خبله ... هالناصر ماخلا فيني تعقل ورزانه..!!..
مسكت المشبك ولميت به شعري....
فجاه سمعت زعقه ناصر..
ناصر: مـــــــــهــــــــــرة...!!!..
مهرة: هاااااااه..!!
ناصر: وينج؟ في الحجره؟!
مهرة: هيه...شوفيك.؟!
دخل ناصر غرفتي وهو لابس كندوره...(بجامة ) بيج...
ناصر: وين كناديري..!!!...
مهرة: في الكبت..
ناصر: ماشي الكبت فاظي..!!..
مهرة: الكبت هذا...
رفع ناصر حواجبه مستغرب..
ناصر: ليش؟ شو صاير بالدنيا...
مهرة: ههههههه كسرت خاطري..
دخل ناصر الغرفه وفج الكبت يتاكد...
ناصر: فكيتيني من تجسيف الكنادير...
سكر الكبت ويا صوبي... وبحركه سريعه فج المشبك عن راسي ..ونزل شعري بسرعه وطاح على ظهري...
مهرة: مب توك تقول لي لميه..؟!
ناصر: قومي حطيلي غدا...
رفعت انا حواجبي...منقهرة... اسلوبه غريب اليوم شفيه..!!
مهرة: وليش خقاق؟!
ناصر: الله واكبر..حرمتي طابخه غدا ماتبيني اتخقق..!! لازم بتخقق...قومي يالله حطي الغدا ميت يوع..بترياج في الصاله..
طلع ناصر من غرفتي...
اما انا حست بوزي بابتسامه.. ناصر ياهل..!!
ياهل عود..
كنت يالسه بلم شعري مره ثانيه... لكني خليته مفتوح في اخر لحظة...
وسرت احط الغدا اللي مسوتنه وانا اتدعى مايعلق علي ناصر...
ويوم حطيته...
حذرته..
مهرة: تراه شوي ناقص ملح ان علقت مابطبخ مره ثانيه...
ناصر: ناقص ملح عيل روحي هاتي الملاحه...
مهرة: يعني ماتستغني عن الملح..
نشيت انا ورجعت المطبخ اييب الملاحه...

وعقب ماتغدا...وعلى فكره تغدا وايد اليوم ماشاء الله...
ناصر: آآه..تسلم ايدج...كلت وايد...
مهرة: اجاملني..
ناصر: هههههه انا في الاكل ما اجامل حد..صح ناقص شوي ملح لكن عادي هذا ترانا حطينا ملح زياده عليه...بس الباقي حلووو...
مهرة: صدق والله؟
ناصر: كنت بقولج وغلاتج لكن الحلاف بغير الله حرام...والله حلو ماجاملج..
نش ناصر يتغسل...وانا شليت الغدا ورحت به المطبخ وتغسلت هناك...
ويوم يايه بطلع..اداعمت ويا ناصر عند الباب...تراجعت عنه بسرعه بتوتر..
ناصر: آه...وين الشاي؟
مهرة: ماسويت...تبا عصير؟
ناصر: لا عقب هالغدا ابا شاي حمر..
مهرة: ماعرف اسوي...
ناصر: ههههههههه وقفي انا بعلمج كيف تسوينه...
وقعد ناصر يسوي الشاي ويعلمني وانا اظحك على شكله...
وبعد ماخلصنا الشاي اللي هو بسيط جدا..رجعنا الصاله..
مهرة: اقول..
ناصر: قولي..
مهرة: ابا اسير السوق...
ناصر: السوق؟ حق شو؟
مهرة: اولا..نبا مكتب للكمبيوتر ماعندنا مكتب...
ناصر: هممممممممممممم اوكي..وثانيا؟
مهرة: ثانيا ابا اشتري هدية لعمتي..والا ناسي.!! عرسها الخميس..
ناصر: صح والله...ماذكرتيني انتي...شو بتاخذيلها؟
مهرة: فكرت اخذ عطورات وكريمات وبشتريلها طقم فوط..وبعدلهن جي في مندوس وشغلات حلوه...
التفت عني ناصر مب مهتم....
ناصر: شو دراني انا بهالسوالف...
زميت انا بوزي معصبه...!! شحقه يسالني يوم هو هب مهتم..!! بس يبا يفشلني يعني؟!
مهرة: مب منك..من اللي يشاورك..
اطالعني ناصر مستمتع بعصبيتي...
ناصر: هههههههههههههههههههه انا علي ادفع بس...
مهرة: عندك فلوس كفايه؟ بخسرك..
ناصر: لو ماعندي بتسلف عشانج...
مهرة: لا صدق والله...
ناصر: مهرة..لا تحاتين..عندي..
مهرة: انزين..ومتى بنسير؟
ناصر: خليني ارقد احين...والعصر وعيني وبنسير..
مهرة: اوكي..
راقبت ناصر وهو يطلع من الصاله بتثاقل...شكله تعبان صدق اليوم...
اماانا...ربة البيت الفاشله..بدال ماروح اغسل الصحون المتراكمه في المطبخ...شغلت التلفزيون اتابع المسلسل اللي اشوفه كل يوم...

اليوم: الثلاثاء..
المكان: غرفة سهيل وشيخه.
الوقت: الخامسة مساءا..
---------------------------------------
(شيخه)...

يلست عالتواليت مجابل سهيل اللي يالس يتسفر وانا عافسه ويهي وامثل اني شوي وبصيح...
شيخه: دخييييلك..
سهيل: لا شويخ...تسيرين وياها اوكي بس تصبغين شعرج لا...
شيخه: مابصبغه كامل...بس بصبغ خصل وشويه جي من جدام...
سهيل: هيه..!..بتغديلي جنج تيس..!
غصبن عني قعدت اضحك عالتشبيه...
شيخه: هههههههههههههه..سهييييييييييييييل...!
سهيل: لا شويخ..
شيخه: انزين جيه شكله ممل لون واحد... فديتك سهيل فدييييييييييييتك...
سهيل: شعرج ممل؟..يالغبيه البنات يتمننه شعرج هذا...وانتي تبين تخربينه...
شيخه: عشان خاطري انزين..
سهيل: افففف راويني كيف بتصبغينه؟!
على طول انا ما جذبت خبر فجيت شعري اراويه كيف بتكون الخصل..
سهيل: اع..
شيخه: شو اع..والله بيكون لونه خفيف جي مب شاذ يعني..
سهيل: سوي اللي تبينه... بس ان طلع هب حلو باييب المقص وياي وبقص الخصل الملونه مالتج هذي..فهمتي؟
شيخه: ههههههههههههههههه اوكي...
سهيل: منو بيوديكن؟ عموه بتسوق؟
شيخه: هيه..
سهيل: وحرمه حمد مابتسير وياكن؟
شيخه: لا عفرا عند اهلها اليوم ..لانها مابتروم تسير اخر الاسبوع..
سهيل: زين انا بسير..محتايه فلوس؟
شيخه: لا عندي...
سهيل: عن الخفة شويخ.. ماوصيج...
اطالعني سهيل بنظره وانا يالسه اظحك...
شيخه: وين بعد الواحد يخف عقله عند عمتك؟ هههههههه..
ظحك سهيل وطلع من الغرفه...ومن البيت..
اماانا اتصلت تيلفون بآمنه اشوفها اذا جاهزه...
آمنه: هيه انا جاهزه يالله تلبسي ونزلي..
شيخه: يالله يايه احين...
لبست عباتي وشيلتي وفوقهن النقاب.. ونزلت تحت..
شيخه: خالوه..مابيعصب عمي يوم بيشوفنا مخلين البيت خلي؟ محد هني..!
آمنه: لا مايهمج قلت لسيف اييب ربعه الميلس جان يبا بس مايطلع لين مانرد البيت...
شيخه: وطاع؟ غريبه...
آمنه: ههههههه سيف صاير مطيع وطيب لين يسافر...
شيخه: مسكين..حاس انه مابيشوفنا فتره طويله..
آمنه: الله يوفقه... ماقلتيلي شو قال سهيل؟
ركبنا سياره آمنه...وانا اضحك..
شيخه: يووووه سويت له مأساة بس عشان يوافق... وفوق هذا هددني بعد..
شغلت آمنه السياره...
آمنه: شو قال؟
شيخه: اون اذا طلعن الخصل مب حلوات باييب المقص وبقصهن لج...
آمنه: ههههههههه اذا ماعيبنه ياويلج عاد..
شيخه: هههه مايهون عليه شعري يقصه اصلا...ماعليج..
سكتنا في الطريج للصالون...
شيخه: باخر اخر يوم لج بصفتج آنسه...
ابتسمت آمنه..
آمنه: قصدج بصفتي عانس..
شيخه: لاتقولين جي آمنه..
آمنه: انزين هذا الصدق شحقه ما اعترف به...انا عانس...
شيخه: انتي تاخرتي بالزواج هذي هيه كل السالفه...ومادري ليش بصراحه تاخرتي... يعني انتي حلوه وبنت عرب معقوله محد يا يخطبج؟
آمنه: ابويه الله يرحمه ماكان يملى عينه حد...كان يرفض ويرفض... لين وقفوا الخطاطيب... توفى هو واناتميت جي بلا عرس...
شيخه: خالوه غريب يعني ماحيد الاوليين اييبون عيال شويه..محد غيرج انتي وعمي؟
امنه: بلى شي.. كان عندي اخو ثاني اصغر عني اسمه سهيل..خلفان مسمي سهيل ريلج عليه..
استغربت انا وتحمست من هالمعلومات اليديده..
شيخه: وين راح؟
آمنه: مات مجتول... تظارب هو وواحد من عيال خليفه الـ(...) .. وتذابحوا..
شهقت انا مصدومه...
شيخه: شوو فوظى؟
آمنه: ايام اول كانوا جي...مايحسبون حساب للقانون وهالسوالف..
شيخه: وليش عاد تذابحوا؟..
آمنه : مادري بالضبط جان السالفه مظبوطه او لا..بس يقولون هذاك ولد خليفه مد ايده على وحده من بنات عمي...بنات عمي ترا كلهن بنات وابوهن متوفي محد تام غير امهن..وسهيل اخويه الله يرحمه مارضى عليهن بهالشي وسار بيظارب وياه..هذاك ولد خليفه عنده ربعه ..تعاونوا على اخويه وذبحوه حسبي الله عليهم...
هزت آمنه راسها باسف..
وانا بعد حزنت على هالسالفه...صدق ايام اول ماكان عندهم تفاهم...
شيخه: كم كان عمره؟
آمنه : 17 سنه تقريبا..وهو اصغر مني باربع سنوات...
شيخه: حراااام فعز شبابه...
آمنه: عمره... الله يرحمه... وصلنا الصالون..خلينا ننزل..
نزلنا الصالون...
وسويت انا الهبايب اللي بغيت اسويها بشعري.. وسوت عمتي اللي بغت تسويه...بشره وظفور ومادري اشو بعد..
كل مايتقرب موعد العرس تزيد حماستي... مادري كيف بيطلع هالعرس الصغير جدا اللي بنسويه فبيتنا...
بس الله يهنيهم..
-----------------------------------
اليوم: الثلاثاء..
المكان: في اسواق ابوظبي..
الوقت: التاسعه مساءا..
--------------------------------
(ناصر)...

ابتسمت وانا اسمع مهرة تتافف للمره العاشره...
ناصر: مابسالج شفيج..!

لكنها جاوبتني على أي حال..
مهرة: تعبت من الوقفه..شو تسوي هالفلبينية هالكثر؟
التفت اطالع الفلبينيه مالت محل الورود اللي قاعده ترتب لمهرة الصندوق اللي يابته مع الاغراض والعطورات والشغلات الثانيه...
ناصر: شو تسوي بعد تراج مطلبه عليها سوي ولا تسوين...
مهرة: لو انا بخلصه فربع ساعه..
ناصر: هههههه هذاك انتي مهرة بنت خلفان منو يروملج...وحليلها تسوي اللي تقدر عليه..
مهرة: لا تطنز ناصر..
ناصر: طولي بالج باقي المكتب والا نسيتي..؟!
مهرة: خلنا ناجله...!
ناصر: لا ماباجله..اليوم..
مهرة: عيل..خلنا نخلي الصندوق عندها ونستغل الوقت نسير ندور مكتب..ونرد عليها بتكون خلصت...
ناصر: وان سرقت شي؟
مهرة: هههههههههههههههه شو تسرق لعبه هي..يالله رمسها..
ناصر: رمسيها انتي يالجامعية..!!
مهرة: ماخلوني اكمل جامعه بسبتك..
ناصر: اهااا انا السبب بعد؟
مهرة: هيه..
طنشتها وانا ابتسم عليها... تعودت اطنش اتهاماتها في الايام الاخيره..هذي الطريقه الوحيده عشان ماانجرح..اذا قعدت اخذ واعطي معاها بالكلام بتطلع الاولي والتالي..
وبعدين بهالطريقه مهرة بسرعه تسكت وتتادب...
كلمت الفلبينية اللي شكلها ارتاحت انه نحن بنروح بدال مانحن واقفين عراسها جي مب مخلينها تعرف تشتغل..وروحنا ...
اول ماركبنا السياره..
ناصر: ظنج يوسف استقر احين؟
كنت افكر بيوسف من متى...ما اتصل بنا يطمنا اذا وصل بسلامه او لا.. تذكرت اتصاله امس قبل مايسافر... ماقدر يمر علينا هني فبوظبي لانه بيسافر عن طريق مطار دبي...وكان متحمس وايد للسفر..
مهرة: ما اتصل تيلفون؟
ناصر: ما اتصل بي..مادريبه جان اتصل بقوم امايه...بتصل احين بشوفهم..
مسكت تيلفوني واتصلت بابويه.. طلع مايدري عن شي..سكرت واتصلت بامايه...حتى امايه تحاتي يوسف ما اتصلبها تيلفون هيه بعد..
سكرت عن امايه منقهر...
مهرة: شووه؟
ناصر: ما اتصل بحد...مبرده هالانسان ياربي...شو عباله ماعنده اهل يحاتون هذا..!!!
مهرة: ناصر: انته يوم كنت تسافر كنت تتصل بهم بسرعه؟
التفت لمهرة بسرعه..
ناصر: شو دراج اني سافرت؟
مهرة: يوم كنت في البيت عندكم خبرتني منى انك سافرت استراليا وتايلند وسافرت سوريا قريب..!!..
توترت يوم يايت طاري سوريا...
ظروري يعني يخبرونها بتاريخ رحلاتي..!!!... يالله ماعليه.. هذي ظريبه زيارتها لاهلي... الله يستر شو بيقولون الزياره اليايه..!!.
ناصر: عالعموم... انا كنت فعلا اتصل بهم اول ما اوصل واستقر...المفروض يكون وصل واستقر وبات وتغدى بعد الحين..!!..
مهرة: ماعليه اكيد عنده ظرف منعه...ماتقدر تتصلبه انته؟
ناصر: اتصلت كله يعطيني مغلق...اففف...المهم انزلي بنختار مكتب..ولا تختارين عود وايد ترا ماشي مكان الا جان بترتبين المكان اروحج...
مهرة: انزين انزين...
ابتسمت مره ثانيه وانا اشوف مهرة متظايقه مني...تصرفاتها تظحكني هالايام...قمت اتعمد اطفربها واقهرها...
احبها ياناس....ودي اذبحها من غلاها... ودي تتصلح كل الامور بسرعه...بس لازم اطول بالي..
اخترنا المكتب وطلبنا منهم يشلونه فشاحنه ويتريونا عن العنوان اللي عطيناهم اياه..
وردينا للهدية...شليناها..ورجعنا البناية..هناك كانت الشاحنه تتريانا...
دخلوا المكتب وحطوه في الصاله وراحوا...والهدية خليناها في السياره لانه باجر بنروح العين..
وقفنا انا ومهرة نطالع المكتب وكل حد حاط ايده فخواصره..
مهرة: بنحطه عدال الدريشه...
ناصر: وقوم ياناصر ودز وشل ..صح؟
ابتسمت مهرة مستحيه من عمرها..
مهرة: انا بساعدك..
ناصر: بايد كانت مكسوره من فتره؟..لا شكرا..استريحي...
اطالعتني مهرة بنظره ...
كانها ادركت اني فعلا اعرفها من زمان...من اكثر من سنه...وشكلها حست بالغرابه...
مهرة: انزين عيل..عيل باييب الكمبيوتر هني...
ناصر: انتي هاتي الاشياء الصغيره وانا باييب الثقيل..وسويلنا شي ناكله بليز...
مهرة: شو اسوي الحين الوقت متاخر..
ناصر: واطلب من المطعم؟ لا آسف..بتطبخين يعني بتطبخين..
مهرة: شو اسوي انزين ..
ناصر: مادري أي شي..
مهرة: ماعليه انزين...تعرف تركب الكمبيوتر..؟!
ناصر: انا صح ما استخدمه لكن اعرف اركبه لا تحاتين مابدمره لج...
مهرة: مافكرت جي انا...
صدت عني مهرة بتطلع من الصاله..فجاه وقفت..
مهرة: عطيت انا السمجه اكل اليوم؟
حسب علمي انه مهرة تعطي سمجتها اكل كل يوم بعد صلاة المغرب... لكن نحاسه في هالسمجه الذكر...
ناصر: هيه هيه عطيتيها...
التفتت مهرة مستغربه..
مهرة: متى عطيتها؟
ناصر: آآه..بعد الغدا...
مهرة: لا بعد الغدا سوينا جاي...
ناصر: ههههههههههههههه...
اطالعتني مهرة مقهوره وانا اسحب المكتب واحطه عدال الدريشه...
مهرة: يالعوف..تتعيوف بحيوان..!!..
طنشتها..مره ثانيه..ووقفت هيه تعطي سمجتها اكل وعقب راحت...
خلال الساعه اليايه عدلنا المكتب وركبنا الكمبيوتر عليه... ويوم راحت مهرة تسوي العشا..استغليت انا الفرصه وشغلت كمبيوترها وفتشت فيه...
اكثر شي شدني الخواطر...
كلها خواطر حزينه نوعا ما... مافيها شي رومانسي عن الحب والخيانات وهالسوالف ابدا...كانت تتكلم عن مواضيع ثانيه مثل الوحده والضياع وهالامور...
وكلها موقعه باسم " تايهه وسط الظلام"..
فجاه سمعت شهقة مهرة...
التفت بسرعه حصلتها واقفه عند الباب وفي ايدها صينية..
مهرة: ليش تقرا ملفاتي؟!
ناصر: ليش لا..اسرار؟
مهرة: هيه...
ناصر: اوكي..وحده بوحده..انتي فتشتي اغراضي وانا اعتبرها اسرار...وماقلت لج شي...
حاست بوزها متظايقه...
بس من اللي بيسمع كلامج عاد...عنادا فيج كل يوم بفتش...
ابتسمت وانا اسمك تيلفوني واجرب اتصل بيوسف مره ثانيه....مغلق..نفس الشي..بذبحه هذا يوم بيتصل وبيشوف..
مهرة: مايرد؟
ناصر: لا...الله يستر..
يلست مع مهرة وتعشينا عشاها السريع...
وبعدها يلست انا اتابع فلم...اما هيه رقدت عند نص الفلم عالكرسي..ابتسمت وانا اطالعها واتذكر سعاد الله يرحمها...كانت تسوي نفس الشي...
من اتابع معاها فلم ترقد عند النص...واضطر اني اشلها لين الغرفه...اما مهرة ان شليتها بتهد علي العماره بكبرها من الصريخ والمهازب..مافيني على لساانها...
لاحقين عالحركات هذي...
-----------------------------------

اليوم: الاربعاء..
المكان: غرفة كنه..
الوقت: الثامنه صباحا...
----------------------------------
(كنه)...

نزلت من غرفتي وانا البس الشيله البيظا بسرعه..
مب نازله لريوق والا لشي...نازله للتيلفون خصوصا..
اكيد منى واعيه الحين...واكيد ريلها راح شغله...
ياربي بموت من الخوف ابا اطمن عليه....
اكيد وصلهم خبر...اكيد...
تحت حصلت امايه ويدوه يالسات...سلمت عليهن عالسريع..
ام مايد: غريب شو موعنج الصبح...
كنه: آآه..ماشي شبعت رقاد..
ام سلطان: شبعتي رقاد والا مارقدتي؟!
كنه: لالا رقدت... برايكم..
بغيت اشرد متوتره من التحقيق اللي بيفتحنه لي العيايز....
ام مايد: وين سايره يالخبله تعالي تريقي..
كنه: باييكم انزين..
التفتت يدوه لامايه تقول..
ام سلطان: شبلاها بنتج تقولون مظيعه ولدها..!!!!..
ام مايد: ههههههههههههههههههه مادريبها ياعمتيه...

هزيت راسي وانا ابتسم ورحت عنهم للغرفة الصغيره اللي فيها التيلفون...
انا هب مظيعه ولدي...مظيعه الغالي...يوسف...لو بشوري ماخليته يسافر بس السبال ماسوالي شور..!!!
اتصلت على موبايل منى...وبعد فتره ردت علي...
منى: الووو..
كنه: هلا منى...صباح الخير حبيبتي..
منى: هلا كنيينه صباح النور..
كنه: لا تقوليلي كنينه...
منى: انزين كنينه...علومج..
كنه: هههه علومي هب زينه علومج انتي؟
منى: اذا انتي هب زينه انا بعد هب زينه بس خبريني شو السبب عشان اعرف ليش علومي هب زينه مثل ماانتي علومج هب زينه...فهمتي شي؟!
كنه: هههههههههههه لا...
منى: ههههههههههههاي احسن...شفيج..
كنه: والله انج رايقه...
منى: وانتي شو منششنج الصبح...وشبلاج علومج هب زينه؟ شو مستوي ؟
كنه: وصلج خبر؟
منى: عن؟
كنه: عن اختج الصايعه...
منى: هههههههه قصدج اخويه ؟ فديته لا صايع ولا شي...
كنه: يامنى طمنيني حرام عليج...
منى: مادريبه اكيد اتصل بهم في البيت...
كنه: انزين اسالي.. وانا بسير اتريق عن يحتشرن علي العيايز عالصبح وبرد اتصلبج انزين؟
منى: اووكي...وسلمي عليهن..
كنه: ان شاء الله... مشكوره غناتي..
منى: العفو ياليلى زمانج انتي..
كنه: ههههههههه انزين بشريني عن قيس تخبري عنه وين داره...
منى: ههههههههههههههه مالت عليكم...اوكي باي..
كنه: باي..
سكرت عن منى وانا ابتسم...ورجعت عند عيايزي..
ام مايد: منو تكلمين انتي عالصبح ؟
كنه: منى..تسلم عليكم صح...
ام سلطان: الله يسلمها وياج من الشر..لكن شعندج متصله عليها الصبح شي مستوي ماندري عنه؟
اطالعت يدوه بابتسامه...مسكينه كله تتحسب انه تستوي عندنا اشياء ماتعرف هيه عنها شي..دايما تحس انه نحن ندس عنها امورنا....!!
كنه: لا فديتج يدوه هب مستوي شي...لكن انا حالمتنها حلم هب زين عشان جي نشيت اطمن عليها ..بس..

طبعا تاليف في تاليف...بس عشان مايسووون لي تحقيق...
ام سلطان: خير ان شاء الله... فديتكن يا بناتي هاجذه اباكن قلوبكن على بعض..
ابتسمت انا ..
كنه: ان شاء الله يدوه...
يلست اتريق وانا يالله يالله اسرط اللي بحلجي... متوتره حدي...لو بس اسمع عنه أي شي واطمن..صار له يومين من سافر...
خلصت ريوقي ..ورجعت اتصل بمنى ...
كنه: هااه بشري؟
منى: ما اتصل تصدقين..!!..
شهقت انا بخوف..
كنه: لا اطيحين لي قلبي..!!!
منى: طيحي قلبج ترا كلنا قلوبنا طايحه..
كنه: حسبي الله عبليسه ليش ما اتصل..
منى: شو دراني... تراه بارد الحمار مايفتكر احيانا بالنتايج...
كنه: لالا انا موصتنه يتصل....بذبحه ان ياه شي...
منى: فال الله ولا فالج..بعدين كيف بتذبحينه وهو ياينه شي خبله صدق...
سكت شوي...من القهر...
عقب صارخت في في السماعه (بالتالي في اذنها)..باعلى صوت اقدر عليه..
كنه: مـــــــــتـــــــــــفـــــــــيــــــــــــ ـــجـ ــــــــــــة....!!!!...
بعدها سمعت صرخة منى وعقب ظحكه...
وردت تكلمني بعد فتره..
منى: ياحماره...صميتي اذني...
كنه: احسن..يعني انتي تشوفيني في حاله قاعده تفكريلي بمنطقية منو له بارض يفكر بمنطقية احين...
منى: ههههههههه ماعليه لا تخافين ان شاء الله بيتصل قريب...
كنه: طمنيني الله يخليج منى..تعرفين انتي أني ماروم اتخبر عنه عندهم هذيلا بياكلوني حيه..
منى: ماعليه لا تشيلين هم...اول ماسمع خبر بتصلبج على طول...
كنه: اوكي حبيبتي شكرا...
منى: عنبو يا كنه..مابينا نحن...يالله باي باي
كنه: باي غناتي..
سكرت عن منى للمره الثانيه وانا قلبي منقبض...
ليش يوسف ما اتصل ولا طمن اهله ..!!.. ولا طمني...ليش يسوي جي..!!
الله يستر بس..
-------------------------------------------
اليوم: الاربعاء..
المكان: احد فنادق مدريد عاصمة اسبانيا...
الوقت: العاشره بتوقيت اسبانيا..صباحا..
------------------------------------------
(يوسف)...

مسكت تيلفوني اليديد وانا اضحك على سوالف خالد اللي ماتخلص...
الله يغربل تيلفوني الاولي اللي من طلعت من الطياره وتوني بنزل من الدري ..طاح من ايدي لين الارض وتكسر واخترب موليه...
وبسبب هالشي ماقدرت اتصل باهلي اكيد مستهمين علي...
وبدل مانروح نتحوط في المناطق والاماكن السياحية ..ربعنا انا وخالد السوق...ندور موبايل...طبعا الاسبان مايحبون يتكلمون انجليزي..ونحن في الاسباني مانفهم شي...
ولين ماحصلنا الموبايل اللي ابغيه..خذنا يوم كامل في التفتيش..طبعا الملهيات بالنسبه لنا كانت وايد..
مسرعنا ماننسا شو قاعدين ندور ونلتهي باللي حوالينا...
الجو كان رهيب...
وكل شي عيبني...
ماظني اندم اني ييت مع خالد هالسفره...واضح من البدايه انه بنستانس من الخاطر فيها...
يوسف: اسكت بس خلني اكلم الاهل... احين بيلعنون خيري...
خالد: قسم بالله تستاهل..عيل شو عليك ما ادخل تيلفونك فمخباك لين ماتستقر وتنزل..ماسكنه في يديك...تستاهل يوم انكسر...!
اتصلت بامايه اول شي...
ام محمد: الوووه..
يوسف: اووولاااااااا... (مرحبا بالاسباني)...
قلت هالترحيب لامايه وانا اضحك...
ام محمد: ...شووو..!!
يوسف: هههههههههههههههههههههههههههههه مرحبا امايه...فديت هالصوت والله..
ام محمد: هلا والله هلا بغناتي..وينك الغالي انته بخير؟ فيك شي ؟ شي يعورك؟
يوسف: هههه بخير انا مافيني شي شحالج امايه؟
ام محمد: كلنا بخير وسهاله نتخبر عنك ونحاتيك وينك عنبو الغالي شحقه ماتتصل واطمنا؟
يوسف: سمحيلي يامايه تيلفوني انكسر اول ما نزلت من الطياره ولين ماشريت غيره شوي خذت وقت...
ام محمد: هييه والا هذا هو السبب؟ ياحيك ياولديه تحسبنا شي ياك والا شي..شحالك انته وشحال خالد؟
يوسف: كلنا بخير وسهاله والحين في الفندق..واسبانيا حلوه وايد والجو رهيب...
ام محمد: يعلك دوم مستانس فديتك...هالله هالله بالعقل عاد يوسف...
يوسف: هههههههه لا تحاتين امايه تربيتج... برايج بعدني بتصل بناصر...
ام محمد: ناصر بعد يحاتيك اتصل امس يتخبر عنك..
يوسف: ماعليه اسمحولي غصبن عني...واحسن بسكر عنج اباج تسلمين عليهم وعلى ابويه ادريبه بيتشره بيقول اتصلت بامك ولا اتصلت بي..بدقله عقب ان شاء الله ادريبه راقد احين...
ام محمد: هيه عقب الغدا لازم يطيح شوي يرقد...برايك غناتي دير بالك على نفسك..
يوسف: ان شاء الله امايه...تامرين على شي؟
ام محمد: سلامتك...
يوسف: الله يسلمج..فمان الله..
ام محمد: الله يحفظك ياربي..فمان الكريم...

سكرت عن امايه وانا اضحك عليها...
يوسف: حليلج يامايه...
خالد: شو بلاها.؟
يوسف: تحاتي وايد الله يهديها...
خالد: هيه عاد انته ماتغيب عنهم دوم مب متعوده على غيابك...
يوسف: بتصل بناصر..
خالد: انزين لا تبطي لاني يوعان ابا اروح اتريق...
يوسف: انزين سير ترياني تحت..
خالد: لا..بنسير رباعه... يسوووف شفت اللي تشتغل في الاستقبال؟
يوسف: شو بلاها..
خالد: ماتشبه المطربه (......)..!!
يوسف: تطالع مطربات بعد؟ متفيج...ثرك دققت فيها..
خالد: هيه والله حلوه...
يوسف: هههههههه هاه هاااه خالد..توها امايه موصتني...
خالد: ههههههههه ماقلنا شي انزين بس قلت حلوه...
يوسف: هيه لا تروح ابعد من جي...
خالد: وين اروح بعيد وانته وياي...اتصل يالله خلصني...

اتصلت بناصر...
ناصر: الووه...
يوسف: السلام عليييييييك...
ناصر: هلاااااااااااااااااا بالسبال هلا..
يوسف: ههههههه سلمت من امايه مابسلم منك..!!
ناصر: لا مابتسلم...عنلاتك يالحمار ياللي ماتخيّل...شعنه ماتتصل بنا؟ عنبوك ماتقول وراك حد يحاتيك؟!
يوسف:انزين اسمع العذر اول..مب من اولها تستلمني..!!
ناصر: بشوف شو عذرك..قول اشوف..
يوسف: اول شحالك؟
ناصر: قوووول...
يوسف: طاح تيلفوني وانكسر وانا نازل من الطياره...لين ماشريت غيره خذت شويه وقت....
ناصر:....قول قسم..؟
يوسف: ههههههههههههههههههههه قسم بالله...
ناصر: ياخي لو جدامي بجوتك...
يوسف: شو اسوي انزين؟!!..
ناصر: شو تبابه شالنه مارمت تخشه فمخباك...!!
يوسف: ههههههههههههه سبحان الله نفس رمسة خالد...
ناصر: لانه رمسة المنطق....المهم علومك هناك..
يوسف: بخير والله مستانسين...انته وين؟
ناصر: انا شال مهرة وسايرين العين... باجر عرس خالها وعمتها..
يوسف: هيه صدق يابر مسكين بيعرس الخميس...سلم عليه وبارك له بالنيابه عني واستسمح له...
ناصر: يوصل ان شاء الله..
يوسف: برايك ناصر بخليك احينه...بعدني بدق لابويه عقب...
ناصر: اوكي لاتقطعنا ويا راسك..
يوسف: ان شاء الله..تامر على شي..
ناصر: سلامتك وسلم على خالد..
يوسف: ان شاء الله يوصل..فمان الله..
سكرت عن ناصر وانا احس حمل انزاح عن كتوفي...
خالد: خلصت؟
يوسف: هيه..يالله تراني يوعان شراتك..
خالد: الحمد لله والشكر...
نشيت وخذت اغراضي وطلعنا انا وخالد نتريق ..وبعدها نتحوط...

اليوم: الخميس..
المكان: بيت يابر..
الوقت: الثانية ظهرا..
--------------------------------
(مبارك)...

كنت يالس اتغدا ويا ابويه.... وكل واحد منا متوتر لسبب من الاسباب...
ابويه لانه عرسه اليوم...
وانا لانه سفري بعد يومين...!!
اليوم عشان اخلي ابويه ياخذ راحته مع حرمته بروح ابات بيت قوم سيف وبرقد في الميلس لانه بيتهم فيه حريم..مافيني...
مع انه عادي اني ابات في بيتنا لكن مادري احسها هب مناسبه ويمكن اسبب لهم احراج من أي نوع...
فاحسن اني اخليلهم الجو..
مبارك: هاااه ابويه..شو النفسيه...
يابر: عادي..مب اول مره اعرس..
مبارك: اول مره تعرس من مواطنه...
يابر: صح...بس في النهاية حرمه..
مبارك: مازلت اظن انه في فرق.... انا اشوفك متوتر..
يابر: هههههه...اذا عالتوتر كثر منها...الله يكمل على خير ان شاء الله...
مبارك: انتوا بتسافرون بعد رمضان صح؟
يابر: صح... وين نروم بعد نسافر في رمضان...
مبارك: صح... الله يوفقك يابويه... وان شاء الله تستانس معاها..
اطالعني ابويه بابتسامه...
يابر: شو اسمها؟
مبارك: آمنه...
يابر: هههه ماتقدر تسميها امنه احين..
مبارك: ههههههه عيل؟
يابر: لازم تسميها خالتي..
مبارك: انزين خالتي..شو المشكله...
يابر: والا عمتي...
مبارك: عاد لا تسويلي كونفيوز الحين..
يابر: ههههههههههههه... تغدا تغدا...
مبارك: ورانا عرس مانبا نثقل بنبخ عيوش في الليل...
مسكت كوب العصير وشربت..
مبارك: انا ببات اليوم عند قوم سيف...
يابر: ليش؟ لالالا عين خير..
مبارك: ابويه هب زين انتوا معاريس وانا متفيزر بينكم...
يابر: لالا ماعليك عادي...
مبارك: لالا ابويه انا خلاص خبرتهم اني ببات عندهم...
يابر: يارياااااااااال...
مبارك: لا ابويه خلاص ماله داعي نتناقش في السالفه...
يابر: على راحتك...
نشيت عن الغدا..وتغسلت..ورتبت شنطتي الصغيره الرياضية اللي بشلها معاي..وحطيتها في السياره...

العصر رحت اييب كندورتي من الدوبي...
والمغرب رحت بيت عمتي المرحومه....
عشان نحضر عرس ابويه...
------------------------------------
اليوم: الخميس..
المكان: غرفة سهيل..
الوقت: السادسه والنصف مساءا..
------------------------------------
(سهيل)..

راقبت شيخه وهي واقفه تدلع جدامي بوقفتها...وشعرها المفتوح المصبغ...
وابتسمت...وابتسمت انا...
شيخه: شو رايك؟ حلوه؟
سهيل: وين تبين ويا خيوط الزري هذي مالتج؟!
شيخه: شو خيوط زري هذيلا خصل...!!!..
سهيل: ههههههههههههههههه..
شيخه: سهييييييييييييييييل...لا تحبطني عاد عطني ثقة فنفسي..
سهيل: اوكي... الله الله يا شويخ ياشيخه المزاييين انتي شو هالزين هذا كله شو هالحلاة...لا بصراحه...!! انا اخاف عليج لا تطلعين اخاف عليج من العين...
برطمت شيخه اكثر..وظربتني على ايدي..
شيخه: سهييييييييييييييييييل..... لا تطنز...
سهيل: هههههههه شويخ..والله انج حلوه.... وكاشخه... وماشي منج اثنين...بس؟
ابتسمت شويخ بوناسه...
شيخه: صدق؟
سهيل: حلفت بالله... المهم يالله وين دخونج بنزل تحت... دخنيني بسرعه..
راحت شيخه تيب الدخون وحطت فيه عود وردت ادخني...
سهيل: ان حرقتي وزاري بجوتج..
شيخه: هههههههههههههههههه عنبو اول مره ادخنك سهيل..!! وبعدين ان كنت اهون عليك اجوتني صدق بحرق وزارك..
سهيل: هههه لا والله ماتهونين.... المهم علومها عمتيه وشو نفسيتها؟!
شيخه: راعية الصالون عندها الحين...
سهيل: ليش ماطاعت تلبس فستان ابيض؟
شيخه: مادري والله...تقول كبرت عالفستان الابيض..
سهيل: الله يهديها...يالله المهم تستقر امورها وتستانس...
شيخه: ان شاء الله...
خليت شيخه ورحت الميلس..وانا طالع تقابلت مع مهرة توها يايه...
سهيل: هلاااااااااااا بالعروس...
عقت مهرة غشاتها وهي تبتسم.. ووايهتني..
مهرة: هلااا والله سهيل..شو هالكشخه هاي..
سهيل: انا والا انتي؟
مهرة: توني فرش يايه من الصالون...ههههه والا انا مايطلع مني هالتعديل..
سهيل: ياحبكن للصوالين انتن الحريم...سيري شوفي شويخ شو سوت بشعرها...
مهرة: لا تقول لي قصته..!!
سهيل: تخسي الا هيه تقصه...!! صبغته...
مهرة: هههه ماعليه كل الحريم يصبغن شعورهن...
سهيل: مبوني هب طايع بس شفتها شوي وبتصيح...
مهرة: يعني ماعيبك؟
حست انا بوزي..بعدم اقتناع كلي..
سهيل: يعني..!!..
مهرة: انته احين بتسير الميلس؟
سهيل: هيه..ريلج هناك؟
مهرة: هيه... ابا حد يشل وياي هدية عموه ماروم اشلها اروحي...
سهيل: البشكاره لاهية مادريبها وين زقريها...
مهرة: ماعليه.. برايك
خليت مهرة ورحت صوب الميلس...وهناك حصلت الاهل متيمعين...
ياحافظ علي العرس فبيتنا وانا متاخر...
والا هم اللي متحمسين ويايين من وقت؟!
مسكين ياخالي..الله يهنيك
--------------------------------------

نهاية الجزء الواحد والخمسين

الجزء 52
 

بسم الله الرحمن الرحيم


الجزء الثاني والخمسين...
-----------------------------
اليوم: الخميس..
المكان: بيت خلفان..
الوقت: السابعه والنصف مساءا..
-----------------------------
(مهرة)...

ساعدتني الخدامه في شل صندوق الهدية اللي يبته لعمتي...
حطيته في غرفة عمووه عدال الباب وانا اشوف عمتي طايحتبها راعية الصالون تسشور شعرها اللي نادر مانشوفه مفتوح...
اول ماشافتني عمتي ابتسمت...نادر ماتبتسم لي عمتي..
ابتسمت انا بفرح ... حليلها عمتي... تستاهل الاستقرار عقب كل هالصبر..رغم اطباعها العنيفة احيانا..
مهرة: السلام علييكم...
آمنه: وعليج السلام هلا مهرة...
سلمت على عمتي وانا افكر بانه بعض الحريم يستون طيبات زياده عن اللزوم فيوم عرسهن..
عمتي الظاهر من هالنوعية..!!
مهرة: شحالج عموووه..؟
آمنه: بخير مهرة شحالج انتي؟
مهرة: الحمد لله..
آمنه: عبلتي على عمرج مابغيت منج شي...
كانت عمتي تقصد الهدية..
مهرة: افا عليج عموه هذا شي بسيط وانتي تستاهلين اكثر...الف مبرووك..
ابتسمت عمتي بخجل ونزلت عينها بينما راعية الصالون تكمل شغلها...وازعجتنا بصوت السيشوار المرتفع..
آمنه: الله يبارك فيج... متى ييتي؟
صديت انا صوب المراية اعدل فستاني الاخضر الناعم..واعدل بعض الخصر الشارده من شعري هني واهني...
مهرة: يينا من بوظبي امس... لكن وصلت بيتنا من شوي ...
آمنه: حلو ماشاء الله مكياجج مهرة...
ابتسمت انا مستانسه...
مهرة: هيه ضبّـطـَــتني راعية الصالون ...هههههههه...عيبتني حركه الاسلاك الخضر اللي شبكتهن بشعري..بس الله يعين عاد يوم بعقهن... عموه هذا فستانج؟!
اشرت على فستان كان مساند على الكرسي...لونه سماوي مدموج معاه الوان ثانيه مناسبه وطالع شكله حلو وايد..لكن حسيته..مب فستان عرس...!!
يمكن عمتي تشوف فكره الفستان الابيض ماتناسبها لكبر سنها..!!!
آمنه: هيه..شو رايج؟
مهرة: وايد حلووو عمووه... وبيطلع حلو عليج مكياج هالالوان... لانج بيظا ماشاء الله...
آمنه: عيونج الحلوه مهرة...
رفعت نظري لراعية الصالون..حسيتها منزعجه مني...
مهرة: بخليج تكملين تعديل وبمر عليج بعدين..بسير اشوف شويخ..محتاجه شي عمتي؟
آمنه: لا سلامتج...
مبين على عمتي خايفه ومتوتره...
مهرة: الله يسلمج..
خليتها وطلعت وانا اتذكر ليلة عرسي قبل اسبوعين بس...
اسبوعين احس بهم شهرين...
يالله كيف كانت مخاوفي بسيطه في ذاك اليوم..ماكنت اعرف منو ريلي...
كنت جاهله لهويته..
وكيف انصدمت وحسيت بالموت في ذيج الليله بالذات...يوم سمعت صوته..وشفته بعدها..!!
والهستيريا اللي صابتني بالباجر..!!
كله احس به بعيد بعيد بعيد عن ذاكرتي كانه صار من فتره طويله....
المسالة..هيه انك يوم تعيش مع انسان واحد في مكان واحد مجابلنه طول اليوم...تحس باليوم بمثابه اسبوع..!!
لانك تقضي معاه وقت طويل...طول اليوم...
تكلمه اكثر...الفرص بينك وبينه اكثر...
التاقلم يستوي اسرع لكثره تواجدك وتفاعلك مع هالشخص..!!
يعني لو انا كنت شخص ثاني بعيد ..كنت بشوف فتره اسبوعين للاندماج هيه فتره تافهه وبسيطه...
بس انا عشت هالاسبوعين ساعه بساعه لحظه بلحظه مع ناصر..
كلمته وايد...راقبته وايد... وصارت لنا مواقف وايد سواء الكبيره او التافهه منها...
ساعه بساعه لمدة اسبوعين..!!!
واشوفهم وايد وايد طوال..
ياترى ليش انا قاعده ابرر موقفي لنفسي..!!
كل اللي حوالي يباني اندمج واتاقلم مع زوجي اكثر واكثر..الكل يباني سعيده كاي عروس يديده..
الكل حتى ناصر..يبا هالشي...
ماعدا انا اللي تتنازعني الافكار..والرغبات...
ابا انتقم منه عاللي سواه فيني بس كيف؟
ابا اعيش بهدوء وسلام ..بس كيف؟؟
ابا ابعد ناصر عني وعن حياتي...كيف؟
في نفس الوقت... ابا شخص ثاني يداريني بالضبط مثل ناصر وشخصيته وعاطفته واهتمامه وحركاته وتصرفاته وكل شي...لكن مش ناصر..مثله ...لكن مب هو..
ياترا بحصله؟ وهل فيه مجال اصلا اني ادور على هالشخص دام ناصر بحياتي ورافض يتزحزح؟!
وليش ادور شخص ثاني دام عندي ناصر..!!!
المصيبه ان ناصر هذا..له تاريخ تعيس معاي...وانا ماريد هالتاريخ..
لو بس اقدر انسى...او...امحي هالتاريخ من حياتي وحياته...
كنت ساعتها بعيش بسلام وسكون...
لكن للاسف هالشي مستحيل...والتاريخ موجود...وناصر موجود.. وانا موجوده...
وبنتم رباعه...وهذي هيه حياتي ...
ولازم اني اتعايش معاها واحصل طريقه اقدر اوصل فيها لهدنه مع نفسي..ومع ناصر...ومع تاريخنا..!!
ابتسمت وانا اتذكر الاسبوع اللي مر علينا...
كان اسبوع جدا هادي...مافيه ظرايب..صحيح فيه شوي تنغيزات ومغايظ لكن مافيها حرق اعصاب ومشاكل....
كنا متناغمين رباعه... نتعامل مع بعض مثل أي اخوان فبيت واحد ...
المصيبه انه نحن هب خوان..
وانا اعرف انه ناصر مابيترك الوضع "مسالم" مثل ماهو...
اكيد انه بيتحرك خطوه لجدام...
بس متى بياخذ هالخطوه..؟ وهل انا بكون مستعده لها او لا...؟ الله اعلم...!
انتبهت لنفسي اني يالسه بغرفه سيف...!!!
متى دخلت هني ومتى يلست على هالشبريه وحظنت مخدة اخوي؟ مادري..!!
كنت ماخوذه بافكاري..
الظاهر انه شوقي لشوفته هو اللي يابني هني بدون احساس..
انتبهت لشنطه كبيره كانت ملابس سيف تارستنها... وفوق الملابس جواز سيف واوراق خاصه ثانيه..
فجاه حرقتني عيوني...
وقمت من مكاني بسرعه..
مهرة: لا يابو هناد...مابتصيحني احين بشنطتك وبتخرب مكياجي..بعدين بصيح مب وقته احين..!!
طلعت برا غرفته وانا قلبي يحرقني...
باقي يومين على سفر سيف..ومبارك...
الله يعلم متى بشوفه بعدها...بعد شهرين؟ اربعه؟ والا سته؟...الله يعلم يمكن يكمل سنه مانشوفه..!!
بس عشان مستقبله كل شي يهون...
دقيت الباب على شيخه..
شيخه: مفتووووووح...
فتحت الباب وشفت شيخه واقفه عند الكبت وتلبس نعالها...
ابتسمت ابتسامه وسيعه يوم شافتني...وابتسمت انا بعد لها بالمثل..
شيخه: هلاااااااا والله...
مهرة: بالمهلي...هااااه ام احمر... مولعه اشوفج اليوم...
ظحكت شيخه وسلمت عليه..
شيخه: خليني اولع ليش ماولع فديتني انا... من زينج انتي بعد ويا الاخضر؟
مهرة: ههههههههههه شوفيني فديتني انا اخضر ابرد الفوااااااد لون الجنه هذا...
شيخه: هههههههههه عساج من اهلها ياربي ...شحالج مهرووه...
مهرة: يميع ان شاء الله..بخير شحالج انتي...
شيخه: الحمد لله منييح...
مهرة: قال لي سهيل صابغه شعرج..راويني..
شيخه: عاد سهيل مسوي من السالفه ماساة...صبغت خصل كستنائية جي ..شوفي...
وصدت شيخه تراويني شعرها المفتوح..
مهرة: واااااااااايد حلو...
شيخه: عيونج الحلوه... اخوج سماهن خيوط زري قهرني..
مهرة: هههههههه ماعليج منه هذا من رباعة اخوج بداو مايفهمون بهالشغلات...
شيخه: ههههههههه جنج سبيتي اخوي..
مهرة: سبيت اخوج وريلج...
شيخه: يعني من زينه ريلج مول مب بداو...
مهرة: ههههههههه سكتي قال بيسويلي عزبه....
شيخه: هههههههههههههههههاي من صدقج؟
مهرة: يطنز بي...
شيخه: شخباره هوو؟
تهربت من الاجابه..بانه ناصر مستحيل افكاري...
مهرة: بخير...مريت على عموووه...شفتي فستانها؟
شيخه: هيه..ماطاعت تلبس ابيض..
مهرة: هيه دريت ...اتصلت بها تراني امس وخبرتني...
شيخه: الله يهنيها...شو شفتيها انتي؟
مهرة: مستحيه ومتوتره...
شيخه: ماذكرتج بحد؟
عرفت انها تقصدني...قمت سحبتها وطلعنا برا الغرف عشان ننزل تحت...
مهرة: ذكرتني بكل عروس في ليلة عرسها لا تردين علي اوكي..
شيخه: ههههه اوكي...ماشفتي عفرا..
مهرة: قالت الخدامه بعدها ماردت من الصالون...مادريبها عاد... انتي منو عدلج؟
شيخه: اللي يالسه تعدل عمتج عدلتني قبل وعقب سارت لها..
مهرة: بس حلو وايد المكياج..مرتب ونظيف..
شيخه: هيه مدحوني عرب قبلج...
مهرة: هههههههه اشوفج مسخسخه...
يوم نزلنا تحت..حصلنا خالووه وفاطمه بنت خالوه ومنى حرمه راشد وخت ناصر طبعا يالسات هناك...
حسينا انا وشيخه بالفشيله..لانه ماكنا موجودين للاستقبال...
لكن هن قالن انهن من اهل البيت وين من وقت عشان يساعدنا بهالواجب..
شوي شوي بدن الحريم يتوافدن...وحسينا بالربشه ..صح انه العرس اقرب يكون لعزيمه منه لعرس..لكنه في النهاية عرس عمتي من خالي...
وفرحنا فيه...وتحمسنا عشانهم...
وفرحت اكثر يوم شفت يدة ناصر من بين المعازيم...
من كثر ماحبيت هالعيوز صرت اميزها من بين العيايز...
---------------------------------------
اليوم: الخميس..
المكان: بيت خلفان..
الوقت:العاشرة مساءا...
--------------------------------------
(ناصر)..

ناصر: شفيك؟
سالت سهييل بصوت واطي هالسؤال وانا اشوف ويهه معتفس ومهوس على معدته..!!
سهيل: بطني يعورني...
ناصر: من شو؟
سهيل: مادري هالويع يسير ويرد علي...
ناصر:انزين سرت المستشفى؟
سهيل: سرت قالولي مافيني شي...
التفت انا لباقي الرياييل اشوف اذا حد منتبه علينا..كانوا كلهم يتعشون ولاهين بالسوالف فيما بينهم..
وعمي..خلفان..مبين عليه مستانس وايد ..يمكن لانه اطمن على اخته اخيرا..!!
ناصر: اشرب لبن انزين يمكن يخف الويع..
نفذ سهيل كلامي وشرب نص كوب اللبن المحطوط عداله..
ناصر: لازم تروح مستشفى ثاني ..
سهيل: بسير بوظبي بفحص هناك...
ناصر: تسوي زين..وخبرني يوم بتي...
هز سهيل راسه بالموافقه وهو مغمظ عينه كانه الويع زاد عليه..
سهيل: لا ماقدر لازم اروح اكل بنادول... اذا حد سالك قول لهم أي شي..
نش سهيل وطلع من الخيمه...
حسيت بالاسف عليه...مسكين... مشكله يوم يعورك شي وماتعرف شو عوقك عشان تعالجه..!!
الله يشفيه..ياترا مهرة تعرف انه اخوها مريض..!!! مايابت لي سيره..
اول ما يا اسم مهرة على بالي كتمت ابتسامتي..و آهتي..
ياربي محلاها اليوم ... صحيح كل يوم هيه حلوه وتملا عيني بس اليوم شي ثاني بصراحه...
حلوه وناعمه بفستانها الاخضر...
مشكلتها ظعيفه..بعدني بحشرها عشان تمتن شوي..غاديه لي مسمار مافيها الا راس..!!!
تذكرت كيف احمر ويهها يوم مدحتها اول ماشفتها متعدله جي...
انحرجت مهرة ساعتها ونزلت عينها وابتسمت.. سحبت فستانها ودخلت الحمام تلبسه..
ويوم لبسته وطلعت رديت مدحتها ويوم تجرأت شوي بالغزل قالت لي" بس عاد"..
منعتني بعدها من أي تغزل فيها بشتى الاشكال..وانا ماحبيت اكدرها فعرس خالها..
اصلا المفروض اكون مستانس لانه مهرة تغيرت وايد تصرفاتها من بعد الزياره الاولى لاهلي..
الظاهر انها فادت وايد... شكلهم جي توسطوا بيني وبينها من دون مايعرفون..
وخلوها تتقبلني بشكل اسرع...
عالاقل احين..قامت تسولف معاي احيانا...
تاخذ وتعطي بالكلام...
تنفذ اوامري وطلباتي...
ماتخاف كل ماتقربت منها...
تطبخ لي..!!!!
يعني تطور ملحوظ..ماكنت اتوقعه بهالسرعه..
حتى الرقاد قامت ماتناقشني في سالفته ...لكن مازالت لها تحفظاتها بهالموضوع...
كانت ماترقد ولا تقرب صوب الشبريه الا اذا اطمنت وتاكدت اني راقد فعلا...ساعتها ترقد مطمنه...
وتنش قبلي ...
لكن الخبله ماكانت تدري اني انش خلال الليل ثلاث او اربع مرات والسبب "مرافس" مهرة...
هالمفعوصه تعتبر سلاح انساني متحرك يوم ترقد...تكسرني والله وتخرب علي رقادي..
تحب تاخذ مساحه الشبريه كلها لها... وعاد اللي راقد عدالها الله يعينه يتحمل...!
الا مره تمد ايدها وادز ويهي او راسي او حتى جتفي بعيد..!!..ومره تادي ريلها الدور هذا...
المصيبه ليتها ترقد معتدله طول رقادها..لا.. عادي فيوم من الايام انش احصل ريلها عند ويهي ...ووراسها هيه عند ريولي انا...
هذي لو خليتها اروحها في الشبريه بدور فيها دوره كامله... !!
مع تذكري كل هالامور.. نشيت عن العشا وانا احس بالشبع...
يكفي يت مهرة على بالي عشان تشبعني من أي اكل...
رحت اتغسل ورجعت اقعد مكاني وانا اراقب يابر خال مهرة اللي يالس عدال عمي خلفان وابويه والبقية ..يضحك ويسولف.. بعد ماسجلوا عقد الزواج وتم كل شي على خير خاز التوتر عنه وارتاح شوي...
تذكرت يوم تمت ملجتي انا..بدل مايخوز التوتر زاااد اضعاف..
قالت لي مهرة انه عمتها عمرها 42 سنه..ياترى كيف شعور وحده بهالسن تتزوج الحين؟!..
اكيد شعور غريب من الفرحه وعدم الاندماج..!!!..
قعد عدالي شخص ويوم التفت حصلته راشد نسيبي...
راشد: بلاك مويم؟!
ناصر: مويم؟ انا.!!..هههههه لا مافيني شي...
راشد: وين سهيل؟
تذكرت توصية سهيل باني اخترع أي شي..
ناصر: آآآآه...اتصل به حد من اهل البيت وراح بعد شوي بيرجع...
عقد راشد حياته وماعلق عالموضوع...
عقب رد يلتفت لي..
راشد: علومك انته من العرس...
ناصر: ههههه علومي مثل علومك...
راشد: يعني الامور طيبه؟
ناصر: الحمد لله..
قعد معاي راشد يسولف عن اشياء مختلفه وانا كل شي بالي يرجع لكلام امي اليوم الصبح..
ماكان كلام...
كان نزاع...
والسبب هو انها معصبه لاني ماكملت اسبوع من عرست الا ورجعت اداوم..وهالمسكينه حابسنها في البيت وماطلعت معاها احوطها وجي...
احين وين نروم نحوط وهذي حالتنا..!!!
عاد انا وعدتها خير وبهالمناسبه قلت لها انه بنسير المزرعه باجر الصبح.... وبشكل سريع اتفقت هيه مع بيت يدوه انهم يروحون المزرعه كلهم جذي السيره تكون اكثر وناسه بدل ما نروح انا ومهرة رواحنا...!!

يارب بس نوره ماتحضر..يارب..

اليوم: الخميس..
المكان: بيت خلفان..
الوقت: الحادية عشره مساءا..
-------------------------------------
(شيخه)...

شيخه: ليش مابيدخلون خالي؟!..
مهرة: ابويه هب طايع ..نفس الشي يوم ماطاع يدخلون ناصر ...
شيخه: انزين وحليلها امنه اتم جي يالسه اروحها مايدخل ريلها كيف جي؟
مهرة: يعني انا ماكسرت خاطرج عنلاتج زاد...
شيخه: انتي ماكسرتي خاطري لانج انتي ماكنتي تبين...بعدين بصراحه..امنه في كل شي كاسره خاطري..
مهرة: تصدقين حتى انا..احس انه ظالمينها...
سكت عن مهرة وانا اراقب امنه اللي طالعه حلوه فيوم عرسها...
الحلو فيها انها كانت رزين...هادية وايد..وصعب التكهن بتفكيرها..
وقعت امنه على عقد الزواج بكل هدوء وثقة...
وتبتسم للناس وتكلمهم بدون ارتباك..
بس انا احس انها من داخل متشوشه ...
نحن كنا بنات يوم عرسنا ونعرف شو المفروض نسوي...يعني كنا عارفين انه المفروض نستحي ومانضحك وايد وامور بايخه مثل هذي ومتعارف عليها...
لكن وحده بعمر امنه... مايصير تتصرف مثل البنات...ومايصير تتصرف مثل العيايز بعد...
صعب الواحد يعرف شو المفروض يسوي...!!
تقريبا كان العرس على وشك انه يخلص...
كان بسيط وهادي...عزيمه اذا كنا نبا نسميه اسم ثاني..!!
انا ومهرة وعفرا..وامايه وفاطمه ومنى قمنا بالواجب... وماكان شي قصور من أي ناحية...
ونحن ارتحنا من هالشي...
لانه الاعراس اللي تصير في البيوت معروف عنها انها تستوي فيها خربطات وايد...وفوظى..
لكن على قولتهم نحن كنا ماسكين زمام الامور عدل...
تقريبا نص المعازيم انصرفوا..
وبعد نص ساعه ثانيه...اتصل سهيل يقول انهم يتريونا برا عشان نوصل امنه لهم..وهم يوصلونها لسياره خالي..ريلها.. عشان يروحون...
بهالبساطه يخلص عرسهم...
التفت لمهرة..
شيخه: سهيل يقول يالله...
مهرة: واغراض عموه؟
شيخه: حاطين اللي حظرته هيه في سياره خالي من قبل..الباقي قالت بتشله بعدين...
مهرة: اوكي..
رحنا عند امنه وقلنالها انه لازم تلبس عباتها الحين عشان خلاص بيزفونها...
آمنه: الحين؟
بان عليها التوتر اخيرا...ايقنت انها في النهاية حالها حال أي وحده تتزوج...سواء كانت عانس او بنت صغيره...
شيخه: هيه الحين امنه...مهرة روحي هاتي العباة والشيله انا الكعب يعورني شوي..
مهرة: انزين...
راحت مهرة ويابتهم..ساعدنا امنه على لبس العباة والشيله...اماية وعفرا ووحده مانعرفها من بنات عم آمنه الكبار زفوا امنه لين الباب..ونحن وراهم..والزغاريط والاغاني شغاله...
كانوا كلهم يبتسمون فرحانين ... رغم غرابه هالعرس..!!..
انا ومهرة ومنى قعدنا نوايج من الدرايش اللي عدال الباب الرئيسي للبيت..عشان نشوف شو قاعد يصير برا...

حطوا الغشاة على راس امنه وعند الباب استلموها عمي وسهيل وحمد وسيف...ومعاهم مبارك ولد خالي ..والمعرس طبعا خالي يابر...
سلموا عليها .. تاخروا شوي بالكلام معاها خصوصا عمي خلفان خذ الحصة الاكبر من الكلام معاها باعتبار انه ولي امرها ومسؤول عنها...
راحت امنه مع خالي...رجعوا الريايل الخيمه الخارجية اللي مسوينها لهم..ورجعنا نحن للبيت...
اعلنت مهرة..
مهرة: ابا اصييييييييح...
شيخه: لا الله يخليج مافيني عليج..
مهرة: ياحليله خالي وعمتي والله اني فرحانه لهم...ظنج بيتفقون رباعه؟
ابتسمت انا على مهرة وهبالتها..وقربت منها وقلت لها بصوت واطي..
شيخه: دام انتي وناصر اتفقتوا...شقايل عمتج وخالج مابيتفقون..!!!
ابتعدت عني مهرة وهي اطالعني بعصبية...
مهرة: ماشي وجه مقارنه...
شيخه: صدق...انتي معلنه الحرب عالريال قبل ماتاخذينه وتشوفين شكله...المهم نسير عند قوم امايه...
تمينا مع باقي المعازيم...اللي كانوا شوي شوي ينسحبون...وفي النهاية تمينا الاهل بس...
يوم انفردنا انا وسهيل في غرفتنا...
شيخه: شو الويع؟ اهون؟
سهيل: هيه اهون...
تنهدت انا بتعب وحزن على حالة سهيل...
شيخه: مابعيد عليك طلبي سهيل...
تنهد سهيل بعد بظيج..
سهيل: باخذ يوم السبت والا الاحد اجازه وبسير بوظبي وبفحص...لا تخافين..
شيخه: ان شاء الله خير...
جزئيا اطمنت لانه حسب اللي اسمعه انه مستشفيات بوظبي زينه... واكيد بيكون تشخيصهم احسن من تشخيص مستشفياتنا...
وان شاء الله خير...
-------------------------------------
اليوم: الجمعه..
المكان: سيارة ناصر.
الوقت: الواحدة صباحا..(بعد منتصف ليل الخميس)..
------------------------------------
(ناصر)...

كان طريق الرجعه للبيت هادي...
مهرة كانت ساكته وماتتكلم وعلى ملامحها الحزن..!!
راحت العرس متحمسه ورجعت بهالحال..
شغلت لي بالي..ماحب اشوفها جي..!
ناصر: مهروه شفيج؟!
مهرة: همم؟؟؟
كانت سرحانه...اطالع الشارع جدامها كانها ماتشوفه..!!
مديت ايدي وحطيتها على ايدها اللي كانت معقوده في حظنها....
حسيت بارتجافها... بانتباهها للحركه...
لكنها ماعارضت هالشي...
مثل ماخمنت..شي شاغل بالها...
خليت ايدي مثل ماهيه...لكني شديت على ايدها اكثر عشان انبهها لكلامي..
ناصر: شو شاغل بالج؟ حد قالج شي في العرس؟
هزت مهرة راسها بالنفي...
ناصر: شفتي شي ظايقج؟
هزت راسها مره ثانيه بالنفي..
ناصر: انا ماسويت شي اظني مب مني السبب...صح...
تنهدت مهرة.
مهرة: مش انته السبب...
ناصر: يعني فيه شي مظايقنج..خبريني مهرة...
سحبت مهرة ايدها بظيج وعدلت شيلتها... حسيت انها ماتبا تكلمني بالموضوع..
زعلت ... اكيد مهرة ماتحس اني الشخص اللي ممكن تفتح له قلبها..!!..
وتشكيله...وتخبره خصوصياتها وافكارها اللي ادور في راسها..
بعدني ماوصلت لمستوى الثقة هذا..
وهذا شي زعلني...
عشان جي كملت سواقه وانا ساكت...
ماتبا تكلمني اوكي لا تكلمني..
مابجبرها عالثقة فيني ...
وصلنا البيت ..
ناصر: انزلي انتي انا بوصل الشيشه باخذ شي وبرجع...
مهرة: اوكي..
نزلت مهرة وانا رجعت اطلع ورحت الشيشه... مب عشان اخذ شي ...
بس كنت ابا ابتعد شوي عن مزاج مهرة الكئيب...
اعرف نفسي مابتحمل مزاجها وبصر عليها تخبرني...
وهي ماتبا تخبرني...وانا ماريد اصر عليها...
فالحل اني ابتعد عنها...
يمكن يوم ارجع تكون رقدت او تغير مزاجها...!!
بعد حوالي اربعين دقيقه رجعت البيت..
قفلت البيبان وراي وركبت لغرفتنا...
دخلت...
ووقفت مكاني مستغرب من اللي شفته...
مهرة كانت يالسه عالشبرية...ببجامه نوم من بجاماتها المعتاده (بنطلون وقميص) وردية فاتحه... شعرها كان خرسان ومفتوح مبين انها توها طالعه من الحمام متسبحه...
يالسه بياس وحزن...واللي عورلي قلبي اني شفت دموع على خدودها....!!!
ناصر: مهرة..!!
سكرت الباب وراي وقفلته...تقربت منها ويلست عدالها...اطالع ويهها بتفحص...
هيه..ما خدعتني عيوني...هذي دموع على ويهها...
ناصر: غناتي شفيج؟!..
شهقت مهرة بالصياح مره ثانيه ونزلت عيونها اكثر..
ناصر: مهرة دخيل الله خبريني لا تخليني جي بحيرتي...شو مزعلنج ليش تصيحين؟
سحبت مهرة انفاسها سحب عشان تجاوبني..
اما انا العكس..حابس انفاسي اتريا بس الكلمه تطلع من حلجها...
ابا اعرف شوفيها زعلانه جي..!!
مهرة:...اليوم. اليوم شفت...شفت...
ناصر: شو شفتي؟
مهرة: شفت شنطة سيف..
ورديت تصيح مره ثانيه وهي تمسح دموعها بايدها ...
ماعرفت شو المفروض افهم..!!!
ناصر: شو؟!
استويت مثل الاهبل والله...
ناصر: شوفيها شنطه سيف؟!..
مهرة: مافيها شي...
ناصر: هممممم لا حول ولا قوة الا بالله...اهدي مهرة اهدي...شو السالفه خبريني؟
مهرة: سيف..سيف مجهز اغراضه من احين...
ناصر: انزين لازم بيجهز اغراضه السبت بيســـ.....
قطعت كلامي بعد ما ادركت الموضوع اخيرا...
ناصر: اهااااااااااااا..... انتي زعلانه لانه اخوج بيسافر؟!!!
صياح مهرة المستمر اكد لي انه هذا هو السبب...
معقول ياناس...شو اسوي بهالمهرة هذي...
تصيح سفر اخوها...!!
ماعرفت شو المفروض اسوي..
مديت ايدي وفريت سفرتي بعيد.. اطالعت مهرة ..كانت منزله راسها..وحاطتنه بين يديها...
وتصيح...
كانه صايبتنها مصيبه...
غمضتني...
مديت ايدي وحطيتهاعلى كتوفها...وسحبتها لحظني غصب ولويت عليها عشان تفرغ كل الصياح اللي تباه...
وماقاومتني...
قعدت تصيح وتذرف هالدموع...
وانا غصبن عني ابتسمت على طفوله موقفها...
ناصر: مهرة... اخوج ساير يدرس وبيرد مابيهاجر...!!
مهرة: ادري بس..بس..هو ماكد ..سافر... بعيد عنا..!
ناصر: الغاليه سيف ريال لا تخافين عليه وبعدين هو هب روحه وياه مبارك..!!
قالت مهرة بانفعال وهي مازالت مسنده راسها على صدري...وتصيح..
مهرة: شو بنسوي نحن... كيف..يعني...انا ماباه يسافر...ماقدر ماشوف سيف فتره طويله جي..
ناصر: بتتعودين...
صارخت مهرة علي وهي تحاول تبتعد عني..
مهرة: ماريد اتعود..!!
ناصر: انتي علاقتج به قويه لهالدرجه؟
فعلا استغربت من تعلقها باخوها...حسيت بالغيره شوي...
وتذكرت كل مواقف سيف ومهرة... سيف الوحيد اللي حذرني من اني ازعل مهرة في ليلة عرسي...
سيف الوحيد اللي طار من العين لبوظبي بس عشان يطمن على مهرة المريضه..
تذكرت تعلق مهرة بسيف وكيف لوت عليه اول ماشافته..وكيف كانت نظراتها صوبه فخوره ومحبه لابعد حد..!!..
الظاهر انهم فعلا يحبون بعض وايد هالثنينه...!
لكن مشاعرها هيه اللي تهمني..وسواء كانت هالمشاعر موجهه لي او لغيري..ماريد اشوف مهرة زعلانه جي..
مسحت مهرة دموعها وهي تقول بهدوء تقريبا ومازال يمتزج بصوتها الصياح..
مهرة: انا... انا ... من توفت امايه كنا انا وسيف وايد قريبين من بعض... كنت اهتم بكل اموره لاني اكبر عنه... وانا رافضة فكره سفره بس هو مصر عليها...
ناصر: مهرة .. هذا بدال ما تدعين له بالتوفيق.!!..
قالت مهرة بياس..
مهرة: اباه يتوفق بس ماريده يتغرب..!!.
ناصر: مابيدج شي تسوينه مهرة.. ليش اتعبين عمرج وتصيحين على هالشي؟!
ردت مهرة تصيح..ورديت انا اسحبها لحظني...
ناصر: خلوه يسافر وهو باله مرتاح منكم...مب اتمون تضغطون عليه جي ترا حتى مابيعرف يبدا حياته هناك ويدرس عدل..
سكت مهرة وهدت وهي تمسح دموعها...
ناصر: تدرين... باخذ اجازه يوم السبت..عشان باجر بعد مانرجع من المزرعه اخليج تباتين عند اهلج..وتقعدين مع سيف لين مايسافر..
ابتعدت عني مهرة وهي اطالع ويهي بعيون تلمع...
مهرة: صدق والله؟
ابتسمت وانا اشوفها فرحانه...
ناصر: هيه صدق...ويوم بيسافر سيف بنرجع نحن بوظبي...
ابتسمت مهرة ومسحت دموعها...شكلها رضت ..
ردت تسالني مره ثانيه..
مهرة: صدق والله؟
ناصر: ههههههههههه اقص عليج انا؟ هيه صدق..
اطالعتني مهرة بامتنان واضح...
مهرة: شكرا ناصر...انا صدق بحاجه اني اقعد معاه قبل مايروح...
رفعت ايدي ومسحت على شعرها...لاحظت مهرة تنزل عينها وويهها يحمر...
باندفاع..بستها بين عيونها...
ناصر: اهم شي تكونين مرتاحه ومستانسه.... قومي رقدي لانه ورانا سيره مزرعه وبتتعبين هناك...
هزت مهرة راسها بالموافقه..
اول مارفعت عيني..طاحت على علبة سمجة مهرة اللي يابتها معاها عشان ماتموت بروحها هناك في الشقة...
ناصر: ولا تنسين تعطين سمجتج اكل تراج ماعطيتيها اليوم...
مهرة: ههههه انزين..
دخلت الحمام اتسبح..
ويوم طلعت..كانت مهرة نايمه...
او تتظاهر بالنوم...
او يمكن فعلا رقدت..لانها تعبانه...حتى انا تعبان...
سكرت الليت وانسدحت في مكاني...
عطيت مهرة ظهري ورقدت...
لاني لوجابلتها مابروم ارقد....

اليوم: الخميس..
المكان: في الفندق (اسبانيا)...
الوقت: العاشرة مساءا بتوقيت اسبانيا..
-----------------------------------
(يوسف)...

يوسف: اقولك شي ماتضحك علي؟
التفت لي خالد في المصعد...
خالد: شو؟
يوسف: تولهت عليهم..
خالد: ههههههههههههههه..
يوسف: قلت مابتظحك...
خالد: ماقلت مابضحك قلت لك شو؟... وبعدين من صدقك انته؟ ماكملنا اسبوع حتى الا الاثنين واصلين..
يوسف: صح..بس اول مره اغيب عنهم هالفتره الطويله...
خالد: ويوم كنا في الدوره العسكرية؟
يوسف: هههههه...ساعتها اصلا ماكان عندي وقت اتوله على حد من الكراف...
طلعنا من المصعد ودخلنا الغرفه...
خذنا نص ساعه نستذكر اللي مر علينا طول اليوم..
دخلنا المعارض الفنية وتغدينا في مطعم رهيب...وعلى قولة خالد الطفس...شفنا الوجوه الحسنه هناك...
وتعرفنا على مجموعه شباب من الخليج يايين في رحلة...
كملنا معاهم طول العصر... وبعدها انفصلنا ورحنا بعض المناطق السياحية اللي ينصحون بزيارتها في الليل مب في النهار...
بصراحه اهل اسبانيا حيويييين وايد ودايما ربشه... لكن للاسف باجر هو اخر يوم لنا فيها وبعدها بنروح فرنسا (برا) مش جوا...
وعسى نستانس بفرنسا مثل مااستانسنا باسبانيا...
خالد تسبح ورقد...
اما انا ماقدرت...
شوقي لها مانع النوم عن عيوني...
وتذكرت الثلاث ساعات اللي قضيناها رباعه عالنت.. قبل ماسافر..وبعدها بساعتين..تلاقينا فبيتهم بعد بسلام رسمي وسريع تقريبا...
وصتني كنه وايد على نفسي... حذرتني من المطالع قالت انها بتجلع عيوني...
ابتسمت وان منسدح على شبريتي واتذكر كل كلامها..!
ومن زود خبالي ساعتها...خزنت المحادثه وطبعتها على اوراق...عشان اقعد اقراها كل ما اشتقت لها..
ادري ..كنت اقدر اييب اللاب توب..واشبك النت متى ما ابغي..واكلمها...
بس خالد رفض هالفكره وقال انه انا وهو مدمنين كمبيوتر..ووجود اللاب توب اكبر تشويش لنا..وبهالطريقه مابنستمتع بالرحله عدل...
بالتالي تركته هناك... موافق خالد برايه...
صحيح بشتاق لبنت عمي.... بس الشوق يمدحونه بعد...! والا؟
نشيت عن شبريتي.. لبست ثياب معقوله وخفيفه وطلعت من الغرفه شال تيلفوني معاي...
كنت حاس اني مابرقد قريب...
الا قيس احشر خالد بتحركاتي في الغرفه..
انزل اتمشى احسن لي..
وصلت عند استقبال الفندق... كان المكان في هالوقت (شوي) زحمه.. حد يطلع وحد يدخل...
تخطيتهم وطلعت من الفندق..توني بنزل الدري الا واسمع صياح ياهل.. عمره حوالي 4 سنين...واقف عدال الباب من برا عدال نبته كبيره ...وويهه غرقان بالدموع...واللي قهرني ان الناس يمشون من عداله ولا يفتكرون فيه يسالونه وين اهلك والا شوفيه الولد يصيح..!!
ماحد له خص بحد هني...
تقربت من الولد اللي كان يصيح..ابتعد عني بخوف وهو يكمل "معزوفته"... ابتسمت له عشان اطمنه شوي..
يوسف: hallow kid.. where is your mother?
اطالعني الولد شوي عقب رد يصيح ويقول..
الولد: ماماااااااااااه....
عقدت انا حياتي..طريقة لفظة للكلمه حسستني انه "خليجي" بالذات...
يوسف: شو اسمك انته؟
الولد: .....( يشاهق بعبراته)...
يوسف: قول لي شو اسمك عشان اوديك عند ماماه...
جذبت انتباهه بهالكلمه...
الولد: فيصل...
يوسف: فيصل..وين امك فيصل؟..وين خليتها..
الولد: مادري...كانت هنيه...
يوسف: انتوا كنتوا بتطلعون برا؟ والا توكم رادين من برا؟
الولد: كنا بنروح نرقد...
ابتسمت على براءه الولد ونظراته اللي تطلب مني المساعده وتستنجد بي..
يوسف: لا تخاف بنحصل امك الحين..هات ايدك بنروح ندورها..
مسك الولد ايدي ورجعت انا ادخل الفندق..
ماينلام يوم ظيع اهله في هالزحمه..!!
تمينا نمشي بين الناس شوي شوي ..وانا اكلم الولد واقول له يخبرني يوم يشوف امه ويطالع ويوههم عدل..
لدرجه انه سالنا الاستقبال بس الحرمه اللي في الاستقبال كانت توها بايده الشفت مالها ومامر عليها حريم يدورن ولد..!!
يلسنا على كراسي في الجهة المقابله.. وشريت للولد عصير.
وقعدت اسولف وياه...عل وعسى نلفت انتباه اهله وايون ياخذونه والا صدق بنبتلش..
يوسف: انتوا وين ساكنين؟ الامارات؟
هز الولد راسه بالايجاب.. اهلا اهلا..!!..
مواطنين هذيل... لو من اهل الخليج بالنسبه لي الاحراج بيكون اقل...
فظيحه اطلع اعرف اهلهم والا شي في النهاية..!!
يوسف: انته صف كم؟
فيصل: كي جي..
يوسف: ون والا تو؟
فيصل: ون...
يوسف: شاطر والا كسلان..
ابتسم الولد واطالعني..
فيصل: انته منوه؟
ظحكت انا..ماشاء الله عليه الولد فطين..
يوسف: انا اسمي يوسف.. ومن الامارات بعد مثلك..انتوا من زمان هنيه في الفندق؟
فيصل: ..!!!
مافهم علي الولد شكله...
فقدت ادور ي بالي حدث مهم ممكن انه الولد يتذكره....
يوسف: متى نزلتوا من الطياره؟
ابتسم الولد وبطل عيونه بحماس..
فيصل: البارحه .. الطياره عووده...وو..
وقعد يخورط علي فيصل شكل الطياره ومنو فيها وشو كلوا وشو شافوا وكيف ركبوا وكيف نزلوا..وشو قالت امه وشو قال ابوه..وحتى عمته ذكرها في السالفه وانا اتسمع واتلفت كل شوي ادور على حريم او أي شخص يدور ياهل..
فجاه سمعت صوت انثوي..مرعوب..
....: فيصـــــل..!!!...
التفتنا كلنا انا وفيصل انا مستغربه وهو مستانس..نقز من الكرسي ..وركظ صوب امه..
كانت صغيره الام..يعني انا شخصيا ما اعطيها اكثر من 22 سنه...ياترى كم كان عمرها يوم عرست.!!
واكنت متحجبه بشيله لونها مثل لون بلوزتها.. للاسف كانت بلا عباه..لكنها لابسه لبس ساتر مش راص..!!
لوت عالولد بقو وردت بعدته عنها مثل الهستيريا اطالع اذا فيه شي.. ناقص ريل والا ايد..
الام: فيصل....فيصل ياحمار وين كنت دورنا عليك لين هلكنا...جي تسوي فينا.!!!..
فيصل: انتوا روحتوا عني...
الام: حبيبي ماروحنا عنك بس انته فجيت ايدي...!!!
ورفعت الام عينها صوبي ... حسيت اني بواجه تحقيق قريب...
الام: مشكور اخوي.. لانك اعتنيت بولدنا...
يوسف: ماسوينا غير الواجب.. ولدج ماشاء الله عليه فطين..
ابتسمت الام...
الام: ولد اخوي..
بطلت انا عيوني متفشل..
يوسف: هاه؟
البنت: امه هناك...ادور بعدها مسكينه...انا عمته...
يوسف: اهاا.. سمحيلي..
ابتسمت البنت وهي تحظن ايد فيصل بين يديها...
البنت: شكلك من هل الامارات..
يوسف: هيه نعم..
البنت: حتى نحن..يايين امس..
لاحظت بتوتر نظرات البنت المعجبه.....
وبغيت اقطع أي محاولة للتقرب من البدايه...
يوسف: خبرني فيصل... ونحن بنسير باجر..
البنت: اوه..
قالتها البنت بخيبة امل واضحه...لكنها اداركت الموضوع..
البنت: توصلون بالسلامه ان شاء الله..ومشكور لانك يودت فيصل...مع السلامه..
يوسف: العفوو..والله يحفظج...
تراجعت البنت من صوب معاها الولد..وانا انسحبت من صوب ثاني وطلعت برا الفندق..
وكل اللي فكرت فيه...
ردة فعل كنه لو درت بهالسالفه..!!
---------------------------------------

نهاية الجزء الثاني والخمسين

:Thanx:

:liilas::liilas::liilas:


ويه فديت هالطله عيوني
وفديت هالقصه وراعيتها :friends:


ياااااااااااااااااااااناس يلومونا نقر القصه لانك ناقلتها فديتج :lol:ذووووق



وشوفي على الحلووم خلاص ماتنتهي الالما تخلص القصه << لا تحمست خلاااااص أصير على وشك
الانهيار بس ننتظر عشاان خطرك يالغلا :flowers2:


البارت يهبببببببببببببببببل ومهره ياقلبي عليها ان شاء الله تلين

ونصووووري ويه فديته يجنننننننننننننننننننننننننن


لا تطووولين تستناك << مع انك ماتتأخرين ياحبيلك بس احتياط اذا وسوست لك نفسك خخخخخخخ



:flowers2::welcome3:


تشاااااو



دمــــــــــــت بود ـــــــــــــت