|
كل عااااااااااااااااام والجميع بخيررررررررر مشتاقه لكم حيل كما عودتكم انقطع عن الكتابه بالاعياد وباذن الله نكمل البارت الاسبوع الجاي وبيكون باذن الله الاحد / والثلاثاء / والخميس واذا تاخرت يوم اطلب منكم التماس العذر فالروايه منكم لكم اختكم نسايم نجد |
البارت الليله واذا تاخرت بيكون الفجر وبيكون ثلاث ايام بلاسبوع ارضاء للجميع اختكم نسايم نجد |
كما سبق وقلت لكم انتم غير مجبروين بقراية روايتي وبعدها تندمون انكم قريتوها فاجلو قرايتكم لرواية حتى تكتمل ومن عنده راي سلبي ارجوكم الاحتفاظ فيه وعدم طرحه فعتابكم يحز بخاطري لكن رضى الناس غايه لا تدرك وباذن الله بتكون 3 بارتات بالاسبوع باذن الله بتكون الاحد / والثلاثاء / والخميس / وهذي الايام غير مؤكده لكن الاكيد انهم 3 بارتات و بتكون متوسطه الطول الرجاء عدم طمر السطوررررررررررر البارت الثالث والاربعون عند شوق صحاها صوت الصراخ وانصمت وهي تسمع صوت اخوها وقفت وركضت ودخلت عليهم شوق بصراخ / ساااااااااااااالم تساوم امي فينا سالم التفت على اخته وبصدمه / امي فهمت ليش هي هنا انتي وش جابك شوق بعصبيه / انا جيت اخذ حقها من اخوها وافهمه ان ورها عيال ياكلونه لو مس شعره من امهم سالم بعصبيه / مبارك الي ذبحتيه وجثته بالمستشفى تنتظر الي يدفنها شوق بصدمه / مبارك مات مستحييييييييييييل سالم بعصبيه / مو هذا الي كنتي تبينه شوق بضيقه / حرق قلبي وحرقت قلبه بفلوسه لكني ماذبحته سالم بعصبيه / اقولك مات وانتي السبب شوق بعدم تصديق / انت اش قاعد تقول وبعدين من قالك انه مات سالم بعصبيه / بيديني شلته جثه للمستشفى وتهموني بقتله وولد هالشايب طلعني من السجن شوق نزلت دموعها صحيح كانت تبي تذبحه لكن لما مات بسبتها حست بعظم ذنبها نوف لولا حياها من عيالها كان لولشت ورقصت على خبر موت مبارك سعادتها بهالخبر مستحيل تنوصف تحول بكاء شوق لنحيب صحى امها من فرحتها وركضت لبنتها حطت يدها على فم شوق تمنعها من البكي نوف بعصبيه / امسحي دموعك و اياني واياك اسمعك تبكين مبارك امك فرحانه ياشوق لا تخربين فرحتي موته امنية تمنيتها طول عمري وتحققت وبصراخ / مبارك ما ينبكي عليه فاهمه ماينبكي عليه سالم وعيونه على امه و بصدمه / يمه فرحانه بموت اخوك ونوف بحقد / موت مبارك راحه لي سالم بعصبية / يمه اخوك شلون ما تبكينه وتفرحين بموته نوف نزلت دموعها على خدها بحراره / مبارك عمره ما كان اخو حرمني من حريتي وباعني لجلادي وياليت السنين غيرته رجع باعني لشايب ولو خطبني سكير كان باعني له قولي شلون ماتبيني افرح وبموته رجعت نوف سالم بضيقه / يمه مهما كان لازم تترحمين عليه نوف بحقد / الله لا يرحمه ويعذبه اضعاف العذاب الي عشته وبيوم عزاه برقص فرح سالم بعصبيه / مستحيل تكونين امي صرتي قاسيه وينه قلبك الطيب الحنون نوف دمعت عيونها / حرمني كل شي حلو بحياتي حرمني راحة البال عيشني بعذاب مستمر حتى بعد موته سالم بتسال / وش عذابه نوف بوجع وقهر / اااااااااااااااااااااااااه ياليت اقدر اقول لكم يمكن احس براحه لكن ماقدررررر شوق وعيونها على امها الواضح عليها القهر والوجع والحرقه شوق مدت يدها على خد امها تمسح دمعتها بحنان / قولي يمه وش فيك وش الي مضايقك وقاهرك احنا عيالك نوف في نفسها / عذابي انكم منتم بعيالي ياليتكم عيالي كان ماصارت هذي حالتي عند ركان واقف بالممر القريب من غرفة ابوه يسمع الي صار تفاجئ وانصدم من كلام نوف وفرحتها بموت اخوها متاكد ان فيه سبب اعظم من بيعة مبارك لها ركان في نفسه / وش السر الي مخفيته عن عيالك وما تقدرين تقولينه ليش فرحانه هالكثر لموت اخوك قرب اكثر من الغرفة وبصوته الجهور / عظم الله اجرك ام سالم نوف بصوت عالي / لا تعزيني بمبارك بارك لي مبارك شر وراح ركان بعصبيه / الميت مايجوز عليه الا الرحمه نوف بصوت باكي / الله لا يرحمه ركان بعصبيه / خافي ربك مهما صار الي مات اخوك والحين بين ايدين ربه ولا تنسين انك اخته ولازم تحضرين عزاه نوف بقسوه / يحرم علي احضر عزاه ركان برجاء / يابنت الناس احضري عزاه اذا موعلشانه اخوك ارحمي نفسك من كلام الناس نوف بحرقة / مانفعوني الناس يوم كنت بحاجتهم ركان بضيقه / اذا ماهمك كلام الناس فكلامهم يهمني واذا مصره ماتحضرين عزاه سافري مع ولدك وسكني بفلتي بالرياض وكلها يومين وانا عندكم شوق بعصبيه / امي اذا سافرت لرياض بتسكن فلتها مو محتاجتك بشي فز قلبه كان له سنين ماسمع صوتها يتمنى يدخل ويكحل عيونه بشوفتها ركان في نفسه / فديت الصوت الي ماينطق الا سم ركان وببرود / براحتكم لكن اذا وصلت مكانها بيتي شوق بحقد / اضن انك عزيت امي ممكن تفارق وبسخريه / والا وش رايك تدخل وسطناااااااا وطقها سوالف ركان بيقهرها / ترى السجن ينتظرك لا تنسين انك المتهمه بقتل خالك وانا شاهد ولا نسيتي شوق انتفض جسمها رعب ما تتخيل تبقى ثانيه بالسجن ركان بسخريه / ليش انكتمتي ليكون بلعتي لسانك نوف برجاء / دخيلك ركان بنتي ما تنسجن شوق مو قادره تنطق بحرف لانها لو تكلمت بتبان الرجفه والخوف بصوتها مستحيل ترضى لعدوها يكشف خوفها ركان كاتم ضحكته وهذي فرصته يبرد قلبه فيها / بنتك ماينخاف عليها كلها كم سنه وتطلع من السجن وبسخريه / وتصير خريجة سجون شوق من رجفتها ماقدرت توقف جلست على الكنب سالم شاف حالة اخته وبرجوله / مستحيل شوق تدخل السجن واذا فيه جريمه انا المجرم اسجنوني بدالها ركان رحمها متاكد انها بتموت من خوفها وغرورها يمنعها تطلب منه شي ركان بقوة / تطمن اختك باذن الله بطلعها من القضيه وبسخريه / وياليت يبين بعينها شوق حست براحه لكن مستحيل تسكت على اهانة ركان شوق بتسرع / السجن ارحم من معروفك ركان بسخريه / اذا قد كلامك البسي عباتك وقدامي والليلة بتكون اول لياليك بالسجن شوق تجمدت لو اختارت تجلس بيتمنن عليها بمعروفه وهذا شي مستحيل ترضى فيه لكن الصعب انها تطلع معه وتنسجن وتصيرخريجة سجون وتتشوه سمعتها وسمعت اهلها ركان بيرقص من الفرح اخيرا قدر يكسرها ركان بسخريه / ليش ماطلعتي مدام السجن ارحم من معروفي شوق وجها انقلب احمر من القهر والغيض من المدعو ركان انقهرت اكثر انه قدر يمسكها بيدها الي توجعها عيونها على امها تترجاها اطلعها من هالموقف بدون ما تنكسر لركان نوف فهمت نظرات بنتها وتعرف اعتزازها بنفسها ومستحيل تتنازل عن كبريائها مهما كان شلون قدام شخص تكرهه نوف وعيونها على شوق و بتمثيل / مستحيل تطلعين وتسلمين نفسك دخيلك يمه نزلي عباتك شوق تفاجئت من كلام امها وطالعت امها نظرات كلها امتنان ركان بقهر وبعصبيه / بنتك غرورها بيدمرها ويدمر غيرها قولي لها تنثبر عندك سالم انتقلت عيونه بين شوق وامه وانقهر اكثر من ركان شلون يتجرء ويكلم اخته بهالطريقه وكانه مو موجود سالم بعصبيه / ممكن تفهمني وش علاقتك باختي ركان بجديه / اختك خطبتها من امك والبنت وامها موافقين وكلها ايام وبتصير الخطبه رسميه وبخطبها من اعمامك سالم بصدمه / شوق موافقه عليك ركان بجديه / ليكون ماني عاجبك سالم وعيونه على اخته / السالفه مو سالفة عاجبني او مو عاجبني السالفه باختي اشلون موافقه عليك ومن كلامها معك واضح انها تكرهك ركان بضيقه / لو تكرهني ماوافقت علي شوق في نفسها / الا اكرهك واكرهك واكرهك وبعمري ماكرهت كثرك لكن الحاجه لك هي الي رابطتني ركان قطع عليها تفكيرها / سالم تعال معي نرجع لخويك وعشاكم عندي الليلة سالم بجديه / جعلك سالم الليله باذن الله باخذ امي واختي ونرجع لرياض ركان بضيقه / تراهم امانه برقبتك سالم بجديه / مايحتاج توصيني على امي واختي ركان بجديه / على اني كاره انهم يرحون لكن امك الله يهداها اجبرتني سالم بضيقه / خيره ان شاء الله نوف بعصبيه / من قال لك اني بوافقك وبسافر معهم ركان باصرار / بتسافرين ان شاء الله لاني مستحيل ارضى انك تجلسين بدون ماتحضرين عزاء اخوك وماحب اجبرك على شي ماتبينه ركان بجديه / يله سالم لا نتاخر طلع سالم من غرفة امه وطلع مع ركان من البيت عند صقر بعد ماطلع ركان صار يتامل بثامر بشكله الهادئ المحبب لنفس صقر بجديه / تفضل اجلس قرب ثامر وجلس مقابل صقر صقر وعيونه على الشرطي الواقف / اطلب لنا فطور ورجع يناظر ثامر / شكلك ماكلت شي ثامر بجديه / اسمح فطوري مع سالم صقر بجديه / سالم اكيد بيفطرمع ركان ثامر اضطر يسكت طلع الشرطي صقر بجديه / من متى تعرف ولد ناصر ثامر بجديه / تقدر تقول من انولدت وانا اعرفه ومالي صديق غيره وهو ماله صديق غيري صقر بابتسامه / الله لا يفرقكم صداقتكم ذكرتني بصداقتي مع ركان قطع عليهم صوت جوال صقر اخذ جواله شاف رقم بيتهم صقر / الو ام صقر بحب / شلونك يمه صقر بابتسامه / الحمد لله وش هالرضى ام صقر تكلمني اكيد يومي بيتبارك ام صقر بحب / الله يبارك لك بايامك يمه اختك منى بعد ساعه بتوصل جيبها من المطار صقر بحب / من عيوني قبل الساعه وانا بالمطار ام صقر بحب / الله لا يحرمني منك ويخليك لي صقر بحب / ويخليك لنا ام صقر بجديه / مع السلامه صقر بجديه / مع السلامه دخل عليهم الشرطي بالاكل حطه على طاوله جانبيه وقف صقر / يله حياك على فطورنا المتواضع وقف ثامر وجلس مقابل الفطور بدون مايمد يده على انه جوعان لكنه مو مشتهي ياكل بدون سالم صقر وعيونه على ثامر / مد يدك يارجال واكل خل بينا على قولة المصاريه عيش وملح مد ثامر يده واخد قطعه من الخبز وغمسها بالفول واكلها ثامر بجديه / متى بطلع من هنا صقر وهو يمد كاس الحليب لثامر / انتظر ركان يشرف ثامر برجاء / ياليت تتصل عليه مامداه ينهي كلامه الا بالباب ينفتح كان ركان ومعه سالم صقر بابتسامه / الاجودي عند ذكره ركان بابتسامه / اكيد حاش فيني صقر بجديه / اكيد الا وش صار بموضوع مبارك ركان بجديه / سالم بيسافر مع امه واخته وقف صقر / نععععععععععععم تسافر و تطلع منها ماصدقت القى شي يبرد قلبي فيها ركان بابتسامه / يا كثرهم الحاقدين عليها ويبون يبردون قلبهم فيها لكن القلب مايطاوع صقر انتبه لسالم / افطر مع خويك سالم بجديه / الحمد لله شبعان اسمح لي باخذ خويي واتسهل وقف ثامربجديه / لو سمحت جوالي واغراضي الشخصية بالتوقيف قرب ركان من مكتبه واتصل على مدير التوقيف وطلب منهم يجيبون اغراض ثامر دقائق والشرطي داخل بالاغراض استلمها ثامر سالم وعيونه على ركان / مشكور على كل شي سويته ركان بجديه / ماسويت شي وذا وصلت ياليت تتصل فيني اطمني سالم / ابشر مع السلامه طلع ثامر وسالم من مكتب ركان وطلعو برى المركز اتصل ثامر على السواق دقائق وهو واقف قدام الباب ركبو وصار سالم يوصف الطريق لبيت ركان عند صقر اول ما شاف سالم وثامر طالعين وقف من مكان وجلس مقابل صديقه صقر بسخريه / شخبارها جنيتك يوم درت عن خالها ركان بضيقه / اذا اخته فرحانه بموته ورافضه تحضر عزاه تبي بنتها تحزن كان الي ميت لهم عدو مو اخو صقر بجديه / ما تنلام الي سواه فيها مبارك مو سهل ركان بقهر / عند الموت كل شي ينسي صقر بتغير الموضوع / خلنا من زوجة ابوك وخلنا نفكر بمبارك منو بيطلعه ويدفنه ركان بجديه / كلم اخوك يقول لاخو مبارك يجي ويدفنه صقر بجديه / الولد باين انه رقيق ولو درى ان اخوه مات وهو زعلان عليه يمكن ينهار ركان بجديه / اجل نخلي الغريب يدفنه وخوه موجود يحزن شوي وبينسى صقر بجديه / ماقدر اكلم عبدالله الحين لانهم بالمدرسه لطلعو اتصلت عليه وخليته باسلوبه يوصل الخبر لصديقه ركان بضيقة / زوجة ابوي وبنتها بيسافرون مع سالم صقر بسخريه / اخيرا عتقت بنت الناس وبترتاح من السب والشتم ركان بابتسامه / ماقصرت فيني اليوم سمعتني من الكلام الي يغث صقر بجديه / كان بردت قلبك فيها وسجنتها كم يوم وبعدها تصير البطل المغوار وطلعها ركان بضيقه / هذي ماتخاف ولا يبين المعروف بعينها تقول السجن ارحم من معروفك صقر وقف / خلني اروح اجيب ام وليد افضل من السوالف بمجنونك الي تجلط ركان بعشق / فديتها مجنونتي ولله بشتاق لها يامتى ربي يقرب البعيد صقر بجديه / اجل تستاهل ماجاك وبيجيك منها هذي ما تنتعاشر ركان بجديه / روح لاختك ولا تنسى تتصل على اخوك صقر / يصير خير عند سالم وثامر ثامر بجديه / وين رحت مع الضابط سالم بضيقه / رحت لامي ثامر بصدمه / وش يعرفه بامك سالم بقهر / يصير الضابط ولد زوجها ثامر بصدمه / من جدك خالتي متزوجه ابو الضابط سالم بقهر / لا وفوقه شايب مخرف ثامر بستغراب / طيب ليش تزوجته سالم بضيقه / اخوها زوجها له بدون علمها ثامر بجديه / اكيد لما شافتك بتترك الشايب وبترجع معك سالم بقهر/ المشكله فرحانه بزواجها من هالشايب ثامر بجديه / طيب شوق وش دخلها بموتت مبارك سالم بجديه / شوق لما درت ان مبارك زوج امي سافرت للجنوب وحرقت فلوسه قدام عيونه واكيد صابته جلطه ومات ثامر بحقد / كنت متعاطف مع خالك لكن زين سوت فيه شوق سالم بضيقه / مهمها كان الحين ميت مايجوز عليه الا الرحمه ثامر بجديه / ياطيب قلبك ياسالم تترحم عليه بعد سواته سالم بضيقه / يكفي امي تدعي عليه وهو ميت ورافضه تحضر عزاه بعمري ماشفت امي قاسيه هالكثر ثامر بجديه / وهذا السبب لسفرها معنا سالم ببجديه / كانت رافضه تسافر معي وموت مبارك صار خيره وبتسافر معنا ثامر بجديه / اكيد بتطلقها من الشايب سالم بحرقه / امي انحرمت من ابوها وتشوف بزوجها الابو قبل الزواج واخاف ربي اصير سبب تعاستها يكفيني بساعة شيطان طولت لساني عليها بكلام ماينقال ثامر بجديه / خالتي ما تستاهل لازم تعتذر منها وتطلب رضاها خلها تعيش حياتها بكيفها مو بكيف غيرها سالم بجديه / هذا الي بيصيرررررررر وحياتها بيدها ( نسومه تقول منت بقد كلامك ياسالم ) عند نوف بعد ماطلع ركان قربت من ضاحي وباسته على خده شوق وعيونها على امها وبقهر / يمه اتركي عنك الفلم الرومنسي مع الشايب وتعالي نرتب شناطك نوف بضيقه / يوجعني قلبي اسافر واتركه شوق بقهر / لا يوجعك قلبك عليه ولده عنده واجبه يهتم بابوه نوف بضيقه / اخاف يصيبه شي بغيابي وقفت شوق وسحبت امها بيدها تتحاشا النظر لضاحي حطتها قدام الدولاب / طلعي ملابسك وانا بطلع انادي الشغاله تساعدك نوف بجديه / وانتي من بيرتب شناطك شوق بابتسامه / الحمد لله ان ملابسي بشناطي نوف بجديه / اجل تعالي ساعديني شوق بضيقه / يمه غرفتك تخنقني بطلع اجهز نفسي لسفر نوف بضيقه / الله يهداك ويلين هالراس طلعت شوق من غرفة امها نادت الشغاله بعد ربع ساعه دخل عليهم سالم دخل غرفة امه شاف الشناط محطوطه على جنب سالم قرب وباس امه على راسها وبرجاء / يمه سامحيني على الكلام الي قلته نوف بحب / ياروح امك مازعلت عليك علشان اسامحك انت الي سامحني سالم جت عينه على السلسال المزين رقبة امه / للحين العقد برقبتك نوف بحب / على حطتك له قايله مراح اشيله الا اذا انقصت رقبتي سحب يد امه وباسها بحب / الله يخليك لنا نوف بحب / ويخليكم لي يا نظر عيني سالم بابتسامه / الكلام بينسينا نسافر نوف بابتسامه / انا جاهزه شوف اختك سالم بجديه / البسي عباتك نوف بجديه / بالبس حجابي وبطلع سالم بصدمه / تطلعين كذا نوف وعيونها على لبسها الساتر / ليه وش فيه لبسي سالم بهدوء / يمه احنا بالسعوديه ويلزمك تلبسين عبايه ونقاب نوف باصرار / هذا لبسي واذا تبيني البس عباية اجلس احسن لاني مستحيل البسها سالم باستسلام / خلاص مشينا نوف طلعت وراها سالم شايل شناط امه شاف شوق وتركي والمربيه ينتظرونه عند المدخل شاف المربيه بيده طفل قرب منها / اكيد هذي اختنا الجديده نوف بابتسامه / ايه اخذها من المربيه وتاملها وانتبه لعيونها باسها على خدها وبابتسامه / والله وطلع لك ياشوق منافس بالعيون الزرق شوق بابتسامه / شكلي بديت اغار منها نوف بضيقه / امشو تاخرنا طلعو من البيت اول ماشافهم ثامر نزل قربمن نوف وباسها على راسها معتبرها مثل امه نوف بحب / شخبارك ثامر بجديه / الحمدلله بخير بشريني عنك نوف بجديه / الحمد لله شوق بابتسامه / شخبارك ثمور وبعدين يزفت ليش ماتسال عن احوالي ثامر بابتسامه / اووووووووه انتي شوق مانتبهت احسبك وحده ثانيه صراحه خطيره عيون زرقاء ونقاب ما تركب شوق بسخريه / الحين راحت الذرابه ثامر بمزح / ادخلي السياره اخرتينا ركبو السياره نوف وعيالها وراء شوق بطفش / اووووووووووف وش هالضيق صرنا هنود حاجين ثامر بمزح / اذا مو عاجبك انزلي شوق بجديه / وش رايكم نستاجر تكسي يوصلنا مع سيارتك ثامر سالم بجديه / اكيد بنستاجر كلنا في بطون بعض ثامر بجديه / وين نستاجر وحنا ماندل شوق بجديه/ مايبي لها شوف أي تكسي وساله اكيد بيرضون سالم بجديه / شريف انزل اسال نزل شريف وقرب من تكسي السايق سعودي ساله اذا يرضى يوصلهم لرياض وافق طلب سالم من امه تبقى معه بالسيارة خايف عليها من نظرات السايق نزل ثامر مع تركي والمربيه اركبو مع السايق السعودي وشوق وسالم وامه بسيارة ابو ثامر عند صقر وصل للمطار وسال عن الرحله القادمه من الرياض قالو له وصولها بعد نص ساعة جلس بصالة الانتظار بعد نص ساعه اعلنو عن قدوم الطائره وقف وتقدم من صالة القادمون لمح من بعيد وليد وتفاجئ من شكله قرب له شاف اخته مع غلا قرب من وليد وحضنه بحب وقرب من غلا وحضنها وباسها على خدها قرب من اخته وباسها على راسها وبحب / تو مانورت الجنوب منى بحب / منوره باهلها شخبارك صقر بمزح / الحمد لله بخير وش فيك مجوعه وليد صاير هيكل عضمي منى بضيقه / خلها على ربك صقر بخوف / وش فيه الولد نزلت دموعها الي خوفت صقر / وصلت لدموع والبكي وبعدين وينه سلطان ماجابكم منى بضيقه / صقر والي يعافيك اجل اسئلتك لبعدين صقر استجاب لطلبها مد مفتاح سيارته لوليد صقر بجديه / وليد اخذ امك واختك لسياره وانا باخذ الشناط وبجيكم طلع وليد مع امه واخته برى المطار وصقر وصل لمكان الشنط اخذ الشنط وحطهم بعربه ودفها برى المطار وصل لسيارته فتح شنطة السياره حط الشنط ركب سيارته بجنب اخته وساق بهدوء وداخله قهر من سلطان في بيت صقر دخلت نجود عند امها بالصاله باستها على راسها ام صقر بحب / يمه روحي جهزي قهوه وشاهي وفطور نجود بستغراب / بيجي احد ام صقر بجديه / اختك جايه نجود بصدمه / منى جايه ليش ماقالت من بدري ام صقر بجديه / كلمتني بعد ما طلعت بنتها للجامعه ولا كان ماتركتها اداوم وخليتها تجلس تستقبل امها نجود بضيقه / ماضنتي ديما بتجلس وتترك الجامعه علشان امها لو درت عن جيت امها كان راحت متنكده ام صقر بضيقه / الله يهداها هالبنت ويحنن قلبها على امها نجود / امين دخلت نجود المطبخ وام صقر قامت تصلي الضحى عند تركي جالس بمكتبه وتفكيره مشتت بزواجه راح يومين وماقال لهله ولازم بنهاية الاسبوع يرجع عند مساعد ويحدد زواجه تركي بضيقه / وبعدين معك ياتركي والحل مع امي لو فاتحتها بالموضوع ماضمن ردت فعلها مالي الا سالم اكيد بيساعدني طلع من مكتبه لمكتب اخوه عند سالم متمدد على كنبه بالمكتب يريح بعد ماخلص شغله سمع صوت طق على الباب اعتدل بجلسته سالم بجديه / تفضل دخل تركي وتقدم من اخوه وبجديه / سالم ابيك بموضوع ضروري سالم بجديه / انت وش جايبك لشركه جلس تركي وبجديه / وش تبيني اسوي بالبيت سالم بجديه / هات موضوعك تركي بضيقه / بتزوج سالم بفرح / جعله مبارك اخيرا وافقت تتزوج ومنه سعيدة الحظ تركي بارتباك / زواجي سالفته عويصه ابيك تساعدني واقنع امي فيه سالم بجديه / ماضنتي امي بترفض زواجك صحيح تبيك ترجع ام ياسر لكن اكيد تبيك تتزوج احسن من جلستك عزوبي تركي بقهر / واذا زوجتي مجنونه وقف سالم وبصراخ / تتزوج مجنووووووونه وش حادك عليها واكثر ماكثر ربك هالبنات تركي مسك يد اخوه وبضيقه / الله يهداك اجلس لا توترني اكثر سالم بعصبيه / وش حادك على الزواج تركي بجديه / اعتبره عمل انساني وفوقه رد لمعروف ناس لهم فضل علي سالم بعصبيه / وردك لمعرفهم تبلى نفسك وتتزوج مجنونه وتعرض حياتك للخطر تركي بضيقه / سالم اذا انت عارضت اجل وش بنتظر من امي سالم جلس / كلامك قمه الجنون والمجنون الي بيوافقك عليه تركي برجاء / سالم طالبك توقف معي وتروح معي نخطبها رسمي وقبله تقنع امي بالموضوع سالم باصرار / قول قصتك واذا اقتنعت الله يعيني على امك تركي بحرقة / يوم تعبت توقعتك مت وصرت امشي بسيارتي وفجئه لقيت نفسي بالبر وبنزين السياره خلص وماكان معي لا اكل ولا شرب بغيت اصير عشاء لذيابه اغمى علي ماصحيت الا في بيت رجال عايش وحيد هو وزوجته وبنته المجنونه دخلت علي زوجته بغياب زوجها وترجتني اتزوج بنتها الي انجنت بسبت ابوها سالم متابع كلام اخوه وقاطعه / ابوها سبب جنونها تركي بجديه / واحد ولد حرام جاب صور فاضحه له مع البنت الابو صدق وكان بيقتل بنته لكنه تراجع بالاخير وبالنهايه انجنت البنت سالم بتسال / وامها ليش بتزوجها مدامها مجنونه تركي بلع ريقه ونزل عيونه بالارض مستحي من الكلام الي بيقوله لانه مخجل سالم بعصبيه / ليش نزلت راسك حط عينك بعيني وقولي وش مقابل زواجك منها تركي بارتباك / عمانها مصدقين انها سوت الشينه امها حلفت ان بنتها بريئة وجابت ادله من المستشفيات تثبت عذريت البنت لكنهم ماصدقو وقف سالم بصدمه وبعصبيه / وانت الدليل الي بيثبت برائتها تركي نزل عيونه / ايه سالم بصراخ / شلون رضيتها على نفسك تقوم بمهمه قمه بالحقاره وينها رجولتك ياتركي تركي بضيقه / رجولتي اني ماقدرت اكسر قلب امها وهي تترجاني بدموعها قول لو نت بمكاني وناس معروفهم برقبتك وفوقه ام حاطه كل املها فيك انك تثبت برائت بنتها علشان يقدرون يواجهون العالم قولي وش بيكون موقفك بترفض ولا بتوافق سالم بحيره / وامك شلون تبيني اقنعها وباي وجه بتقابلها بعد كلامك تركي بجديه / امي مو لازم تعرف التفاصيل سالم بجديه / مافكرت ان هالمجنونه يبي لها راعية واهتمام وبتكون عاله عليك تركي بضيقه / ربك بيحلها وانت وهيا منتم بمقصرين معي سالم بجديه / ومتى ناوي تسوي زواجك تركي بجديه / بيكون زواجي بفندق وبيكون باقرب فرصه سالم بجديه / وليه الفضائح خل زوجك سكاتي شلون تبيها تقابل الناس تركي بجديه / من قال لك انها بتقابل الناس بتكون بغرفتها بالفندق سالم بسخريه / ما شاء الله عليك كل شي لاقي له حل تركي بضيقه / الا امي مالها حل سالمبجديه / زوجتك وين بتسكنها مدامك ماتبيها تنفضح عند امي تركي بضيقه / مدري لكن بتركها فتره عند اهلها لين القى لي حل سالم بجديه / مدامك تزوجتها خذها معك وفر لها ممرضه وشغاله يهتمون فيها وقف تركي / هذا الي بسويه ان شاء الله سالم بجديه/ وين طالع تركي بجديه / بطلع ارتاح لين نقابل امي ونفاتحها بالموضوع مقابلتها يبي له تركيز سالم بجديه / الله يعينا على عصبيتها لو تاجل موضوعك امك متاثره بسبت عيال اخوك وبتزيد عصبيتها لو فاتحناها اليوم تركي باصرار / ماقدر اخره اكثر ماصرت انام بسبت هالموضوع سالم بجديه / اجل الله يعينك وقف سالم بجديه / بعد موضوعك انسدت نفسي عن الشغل بطلع اريح بالبيت لقائنا باذن الله الثلاثاء اختكم نسايم نجد |
يعطيك الف عافيه ياقلبي علي البارت الروعه
يحلوووو شوق وريكان هم ملح القصه والله يعينك علي الجاي يصقر من جهة اختك ومشاكلها مع زوجها ومرض ولدها ومن جهة بنتها الي مومتقبلها ويالله عاد يانوف الله يعينش علي الجاي ومقابلة النكدين قدامش ام سالم وتركي بانتظار ابداعاتش القادمه وتسلم الايادي |
نسسسسسسسسسسسسسسسسوووووومه واااااااااااااااااااو باااااارت ولا اروووووع يجنننننننننن تمنيت ان نووووف ماتروح للريااض لحد يجي نايف خسسسسساره وشووووق الدوووبه اوووف قاهرتني مع راكان يااااااااااااي احسسسس الحماااس بدا في الرووووايه .. نسوووومه تسسسسلمي ياقلللبي على زيااادة البارتات يعطيك العاااافيه ياقللللبي واحنا مقدرين تأخرك |
| الساعة الآن 01:24 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية