السلام عليكم

وحشيتينا يانسومه اشتقت لمك من الوريد للوريد شخبارك وكل عام وانتي بالف خير

بارت ملئ بالاحداث والتشويق للقادم
للحين موب مصدقه انه شوق بتززوج راكان اختيار موفق صراح واتوقع انه بيذوب من حبها وعشقه مسكين والله اني شفقانه عليه من الحين والعذاب بداء يوضح بعد

صقر

اتوقع يقدر يروض ساره بسهوله رغم انهم راح يعانون من وز شوق لها

ما اتخيلهم يشتغلون بالباحث تحفه صراحه انتظر ها الاحداث بشوق



سميه زواجها قريب بعد من صديق ماجد يانه حياتهم بتكون اكشن رهيب حرب داحس دقايق وودقايق حبايب اتخيل اشكالهم وحياتهم راح تكون رهيب صراحه

متى بسطس زوج مها ودي انها تتزوج ماجد ابوالبنات اتوقع حياتها بتكون ممتازه وراح يرجعلها ثقتها بنفسها وهي راح تعوضه بحنانها وطيبتها

امممممممم احس مخي قفل ن الحماس

بوقف هنا ولي تعليق للبارت الجاي

مشكوره نسومه وننتظرك

اسفه كثير الي خليتكم تنطرون اكثر واسفه اني اجلت البارت لليوم لكن متاكده ان قلوبكم تتحمل اعذاري


بارت اليوم بارت حمااااااااااااااسي وفيه كثير من الاحداث المتوقعه والغير متوقع


مابي اطول عليكم وبندخل بالبارت بدون هذره زايده



الرجاء عدم طمر السطور








البارت التاسع والثلاثون




عند ركان


طلع مع صقر من المسجد دخلو البيت لاحظ صقر كيسه مرميه على زوية المجلس من برى قرب من الكيس صار يشم ريحة عطور انحنى وفتح الكيسه وانصدم وهو يشوف العطور متكسره اعتدل بوقفته والتفت لصديقه
صقر بصدمه / ليش مكسر عطورك الي من يومين شاريهم

تذكر ركان شوق وهي ترمي عطوره بحقد من الشباك
ركان بابتسامه / اترك عنك العطور ودخل داخل
صقر بجديه / مدامك ما تبيهم كان عطيتنيها مو تكسرها والقهر ان بعضها ماستخدمها وش هالتبذير
ركان بمزح / اقول ادخل لكسرك مثل العطور
صقر بمزح / تسويهاااااا
سبق ركان صقر للمجلس ولحقه صقر جلس صقر وجلس ركان

صقر بجديه / وش موضوعك المصيري

ركان بابتسامه / خطبتها ووافقت علي

صقر بستغراب / منهي الي خطبتها ووافقت
ركان بجديه / بنت ناصر
ركان بصدمه / وافقت بسهوله بدون مايصير فيك شي
ركان وعيونه على صديقه / عندها شرط وابيك تنفذه
صقر بستغراب / تشرط عليك وانا الي بنفذ ليكون شرطها اني اذبحك تراني مستعد
ركان بجديه / شارطه انها تشتغل بالمباحث وزوجتك معها

طالع بركان يتاكد اذا كان جاد او يمزح لكن شكل صديقه جاد
صقر بصدمه / انت تتكلم من جدك ولا تمزح
ركان بجديه / ما ناديتك عندي علشان امزح معك والبنت هذا شرطها علشان توافق علي
صقر بجديه / اخوك يا نجود
ركان بجديه / مدامك قلت ياخوك يانجود اكيد رافض الموضوع

صقر بعصبيه / انت خبل اطاوع خبال بنت ناصر هذي من شفتها وانا قايل ان مافيها ذرة مخ
ركان بجديه / خبال بنت ناصر حله عندي
صقر بجديه / انت تعرف خطر وظيفتنا على الرجال شلون على البنات

ركان باصرار / شوف زوجتي بكون مديره ومسئوله مني وانت زوجتك بتكون انت مديرها منها تكون قريبه منك وتعرف شخصيتها
صقر بجديه / مدامها طالبه تشتغل بالمباحث شكلها تشبه جنيتك
ركان برجاء / صدقني لو وافقت مايكمل شهر الا مقدمات استقالتهم ومنحاشات من الوظيفه
صقر بسخريه / ماضنتي الي عندك بيقدر عليها شي وعمتها مثلها لكن بوافق علشان حماسك لهزواج لكن كلن مسئول عن زوجته مو بكره تقول بطلع مداهمه مع زوجتك

ركان وقف وباس صديقه وبفرح / داري منت بكاسر خاطري وزوجتك لك مالي شغل فيها وانت مالك شغل بزوجتي
صقر بمزح / اترك عنك زوجتي وزجتك منت بمقهويني من يد زوجتك المصون
ركان بمزح / لو بطلب منها تسوي لك قهوه اكيد انها بتسبحني فيهااا

صقر بجديه / اجل امش معي للبيت اقهويك
ركان بجديه / عزيمتك مقبوله وتعرف ماقدر ادخل البيت وفيه بنت ناصر

صقر بابتسامه / شكلكم بتكوشون على البنت وامها حظكم يكسر الحصى
ركان بابتسامه / وانت شاركتنا واخذت عمتها
صقر بجديه / متى بتروح تخطب
ركان بجديه / اذا وصلنا الرياض بخطب واتملك على طول علشان اقدر ادخل بيتي براحتي
صقر بجديه / وهي وش يجلسها في بيتك وبيت عمها جنبك
ركان فز كانه مقروص / مستحيل تطلع من بيتي
صقر بجديه / تتوقع عمامها بيرضون
ركان بجديه / خوفي من تركي من كرهه لامها يرفضني
صقر بجديه / هم ما يعرفون شي عن زوجة ابوك ونصيحه لا تقول له ان امها زوجة ابوك الا بعد الملكه ولا ما يقدر يسوي شي
ركان بجديه / هذا الي بسويه اعرف تفكير تركي اقلها لادرى ان زوجة اخوه زوجة ابوي بيساومني بطلاقها من ابوي وهذا مستحيل يصير

صقر / اجل قول لزوجة ابوك تقول لبنتها ماتقول لاهلها عن امها لين يصير الي تبيه

ركان بضيقه / يحلها ربك ان شاء الله

صقر وقف / يله تعال معي لبيتي ومن بيتي للاستراحه نسهر مدام بكره اجازه
ركان وقف وصارو يتكلمون وهم يمشون طلعو برا البيت / اسهر عندك احسن من الاستراحه
صقر بابتسامه / البيت محظور علينا نطبه بالليل عند البنات صديقاتهم
ركان بابتسامه / اجل تعال لبيتي نسهر سوى بدال ماكون مثل الاجرب وحيد بالمجلس على الاقل يكون لي ونيس

صقر بسخريه / يعني انطرت من بيتك
ركان بدفاع / لا تظلمها رفضت اني اطلع لكن ابي بنتها تاخذ راحتها
صقر بسخريه / ماضنتي ان وجودك عائق وبنتها ماخذه راحتها على الاخر
ركان بزعل / احترمها من احترامي تراها بتصير زوجتي
صقر / اقول ادخل وبدخل اجيب القهوة

دخل ركان بالمجلس جلس على الكنب وصقر دخل يجيب القهوه




في شقة عبدالله



دخل عبدالله ومعه اكياس ونايف متمدد على الكنب قدام التلفزيون سمع صوت فتحت الباب
التفت شاف صديقه محمل بالاكياس
نايف بسخريه / اول مره اشوف رجال يحب السوق لو بكيفك خليت شقتك بالسوق
قرب عبدالله وجلس على الكنب والاكياس حوله وبابتسامه / وناسه تسهل علي المشاوير وبعدين ناسي اني معرس
نايف بسخريه / الي اعرفه ان البنات قبل زواجهم بالاسواق مو انت

عبدالله بجديه / لازم اكشخ لها مثل مابيها تكشخ لي شكلك انت حدك سروال وفنيله
نايف بسخرية / ليكون تبيني اشتري بجامه حرير ولا منقشه اجلس بالسروال والفانيلا ابرك منها اوفر واريح
عبد الله بابتسامه / لو بتتزوج الي في بالي والله لتلبسكيها وانت ما تشوف الدرب

نايف بحالميه / اذا الي في بالك صارت زوجتي لو تبيني البس لها مهرج لبست
عبد الله من قلب / جعلها نصيبك وانت نصيبها
نايف من قلب / امييييييييييييييييييين هذي الدعاوي الي تشرح الصدر
عبدالله بحماس / ماتبي تشوف وش شريت وتعطيني رايك
نايف بجديه / تعرفني ذوقي معدوم ولبسي كله على ذوقك واذا بتاخذ ذوقي على قولتك بتنحاش العروس
عبدالله بجديه / مدام فيها نحشه خل ذوقك لعروستك




في شقة سلطان


عند ندى


من طلع سلطان لمنى وهي جالسه على نار حاسه نفسها دخيله مالها مكان عند سلطان مع كل محاولتها لكسبه لكن قلبه عند منى غصب عنها تشتعل من الغيره
ندى بقهر / الله يسامحك يابوي الي رميتني هالرمية على كل الي سويته معه ماقدرت اكسب قلبك ياسلطان وقلبك عند منى ياخوفي اذا صار الي شاكه فيه على اني طول عمري اتمناه يخوفي من ردة فعلك ياسلطان لازم اروح عند امي وطلع معها للمستشفى يمكن لو صار سلطان يتغير معي للاحسن لانه بيكون بينا طفل
يارب انت القادر على قلب سلطان يارب انك تسخره لي




عند سلطان



طلع من عند منى ماله خلق يرجع لبيته قرر يمر اخوه اليوم خميس بيكون في بيته
وصل لبيت اخوه نزل ودق الجرس فتح له فيصل الباب

فيصل سلم على اخوه / حياك الله تفضل حماتك تحبك حاطين غدانا
سلطان دخل مقابلت منى له ساده نفسه عن كل شي دخلو المجلس سلطان دخل وفيصل واقف عند الباب يكلمه
سلطان بضيقه / جايك متغدي روح تغد مع عيالك وبنتظرك بالمجلس
فيصل يتفحص وجه اخوه الي واضح عليه الضيقه / عسى ماشر وش مضايقك
سلطان بضيقه / روح تغد مافيني شي
دخل فيصل وجلس مقابل سلطان / بتعلمني فيك ليكون العروس الجديده منكده عليك

سلطان بضيقه / العروس الجديده ادور رضاي لكن القلب يحب صداده
فيصل بقسوة / القلب اذا بيذلك افعصه برجولك
سلطان بضيقه / تقول هالكلام لانك مرتاح وخالي البال
فيصل بسخريه / الله يعافينا مما ابتلاك فيه
سلطان بضيقه / ادخل تغد وياليت تجيب لي بندول راسي بينفجر
وقف فيصل / بجيب لك غداء متاكد انك ما تغديت والبندول تاكله بعد الغداء

دخل فيصل وسلطان تمدد على الكنبه ومنظر منى وهي تصده ينعاد بخياله



عند تركي



جالس بالمطعم مع مساعد كل واحد منهم يتغصب على الاكل لخاطر الثاني
مساعد / كثر الله خير
تركي بجديه / الله يهداك ماكلت شي وصحنك مثل ماهو
مساعد بجديه / الي يسمعك يقول انت الي اكلت اذا خلصت اخذني لسيارتي مابي اخرك على اشغالك

تركي بتنهيده الم / كاره اروح للبيت
مساعد بجدية / روح لهلك واخوك كان يومه عوض عياله عن ابوهم

تركي بغصه / صرت وحيد بالدنيا بدون عضيد انا وناصر قريبين من بعض انفجعت بموته لكن فجعتي بموت سالم اكبر
سالم كان اطيبنا والي ما يخافون الله استغلو طيبته وكذبو عليه وصدقهم
وبحرقه / مات وانا السبب بموته والي ذابحني انه مات زعلان علي مات ومصدق فيني الشينه ومقهور انه اندفن وما حضرت دفنه
مساعد مد يده وطبط على يد تركي / ادع له بالرحمة

تركي دمعته خانته / ابيه يرجع دقيقه لازم يصدق اني اخوه الي مربيه ماسويت الشينه بالبعيد شلون بالقريب هي السبب هي الي شوهت صورتي عند سالم لكن وين بتروح مني والله لخليها تتمنى الموت كل ساعه وكل وقت ومايحصل لها

مساعد بجديه / مع اني ما دري عن منهو تتكلم لكن تاكد لا انت ولا احد غير يقدمون او ياخرون يوم الواحد من طلع لهالدنيا ويومه مكتوب تعوذ من ابليس وقوم

قاام مساعد و تركي نادى الجرسون دفع الحساب شاف مساعد واقف عند باب المطعم ركبو السيار وصل تركي مساعد لسيارته وتركي كمل طريقه للبيت




عند شوق


فتحت عيونها وهي ماشبعت نوم قومها وجع يدها جلسلت وحطت يدها بحضنها وصارت تضغط عليها يمكن يخف الوجع طالعت بيدها شافتها متغير لونها للازرق
شوق برعب / يمه وش في يدي منقلب لونها
تذكرت مسكت ركان القويه / لايكون منكسره من مسكت المتوحش
وقفت وصارت تمشي بالبيت وصلت غرفة امها ماحبت تدخل / يمه

نوف كانت منسدحه سمعت صوت بنتها / ادخلي شوق
شوق بضيقه / تدرين اني مستحيل ادخل غرفتك تعالي ابيك ضروري
وقفت نوف وطلعت لبنتها الي واضح عليها التعب
نوف بستغراب / ليش قمتي ما يمديك شبعتي نوم
شوق بوجع / يدي توجعني ماخلتني انام
نوف قربت وسحبت يد بنتها وانصدمت من لونها وبصدمه / شكلها منكسره لكن من شنو
شوق بوجع / مو مهم المهم ابي اروح المستشفى
نوف بجديه / بطلع اقول لركان يوصلنا
شوق بحقد / فكينا منه ماني بحاجته بتصرف
نوف / شلون بتتصرفين يالفالحه
شوق بوجع / يمه قومي تركي يدور لنا تكسي يوصلنا
نوف بزعل / الله يهداك ما تتركين عنك العناد
دخلت داخل وقربت من سرير ولدها كسر خاطرها وهي تشوفه متعمق بنومه ماحبت تخرب عليه نومته
طلعت عند شوق / خلي اخوك نايم بروح معك
شوق بوجع / عجلي علي
نوف اطالع بلبس بنتها / لا يكون بتطلعين ببدلة ركان
شوق بوجع / يوه نسيت الغثيث نزل شنطتي
نوف بجديه / ايه وبغرفتي
شوق بوجع / طلعي لي البنطلون الجنز والبلوزه الحمراء
دخلت نوف دقائق طلعت بلبس شوق / تقدرين تلبسين ولا البسك
شوق بوجع / بحاول البس لحالي اذا ماقدرت بناديك
نوف بضيقه / لو بقول لك البسي بغرفتي بتعاندين البسي بالغرفة الي جنب المطبخ
مشت شوق ودخلت الغرفة شافتها مفروشه موكيت بدون شي دخلت وسكرت الباب وصارت تلبس بصعوبه ماقدرت تسكر الازره نادت امها الي جت وساعدتها
شوق بوجع / يمه عباتي ونقابي بشنطتي هاتيهم
نوف بعصبيه / كان قلتي الي تبينه مره وحده
شوق بوجع / اجل هاتي شنطتي هنا واخذ اغراضي بنفسي
طلعت نوف وراها شوق دقائق طلعت نوف لابسه حجابها ومعها عباية بنتها مدت العبايه لشوق
نوف بجديه / البسي عباتك
شوق وعيونها على امها / بتطلعين كذا بدون عبايه او نقاب
نوف بجديه / ايه ولبسي مراح اغيره
شوق بصدمه / يمه اذا طلعتي بهالشكل ماضنتي صاحب التكسي بيودينا للمستشفى اخاف يخطفنا
نوف بسخريه / اذا خايفه اخذي اسلحتك
شوق بجديه / ومن قال اني اطلع بدونها الدنيا ما فيها امان
نوف بجديه / اجل امشي قبل الليل
شوق وهي تلبس عباتها بمساعدت امها / يله مشينا الوجع بيطيرني من مكاني
مسكت نوف بيد بنتها السليمه ومشت معها برا البيت وصلو الشارع العام وقف لهم تاكسي ركبو السياره
نوف بجديه / لو سمحت نبيك توصلنا لاقرب مستشفى






عند ركان



طلع من بيت صقر انصدم وهو يشوف نوف وبنتها راكبات تكسي
رجع عند صقر وبعجله / صقر ابي مفتاح سيارتك
صقربستغراب / خير وش فيه
ركان بجديه / زوجة ابوي وبنتها ركبو تكسي
صقر بسخريه / ليكون انحاشو
ركان بعصبيه / اخلص علي
وقف صقر / يله بخاويك
ركان بعصبيه / اقول انثبر لقيتها حلى كل دقيقه مخاويني
صقر رجع جلس وبسخريه / الله واكبر من متى ينقال هالكلام الظاهر بدت الغيره على المدام ركان بعصبيه / اخلص علي عطني مفاتيحك
صقر ببرود / المفتاح عند جوالي على المكتبه

مشى ركان عند المكتبه اخذ المفتاح وطلع يمشي بسرعه بيلحق عليهم ركب السيارة وساق بسرعه جنونيه وحمد ربه لما شاف السيارة واقفه عند الاشارة
صارت الاشاره خضراء مشى وراء سيارتهم تفاجى وهو يشوف السياره توقف عند المستشفى
ركان في نفسه بخوف / الله يستر وش صاير ليش هم بالمستشفى
وقف سيارته باقرب موقف ونزل



عند شوق


لما وصلت للمستشفى شوق بقلة صبر / يله يمه
نوف فتحت بابها / لا تروح انتظرنا
الهندي / حساب 50
شوق بعصبيه / يالحرامي 100 والبيت مشوار 5 دقائق
نوف بعصبية / انزلي واقصري الشر
شوق فتحت بابها نزلت سبقت امها داخل
ونوف واقفه تقنع الهندي ينتظرهم ما تقدر ترجع مع غيره وهي ما تعرف شي بالديره
دخلت المستشفى شافت بنتها تنتظرها
شوق بوجع / ليش تاخرتي
نوف بجديه / كان دخلتي مانتظرتيني
شوق وعيونها تتفحص المستشفى
شوق بقرف / يمه المستشفى من شكله مايطمن
نوف بجديه / الي فيك شي بسيط ما يحتاج ندور لك احسن مستشفى

مشت شوق عند مكتب الاستعلامات طلبت من الموظفه ادخلها على دكتور خاص بالعظام وطلبت منها الموظفه تفتح ملف بعد ما فتحت الملف تركت الرسبشن وجلست بلانتظار برى العياده



عند ركان


دخل شاف نوف جالسه وجنبها شوق الي متغطيه قرب منهم بهدوء
ركان وعيونه على شوق الي عيونها على يدها / سلامات ليش انتم هنا
شوق سمعت صوت اكره انسان عندها رفعت عيونها وكانها شايفه شيطان وبعصبيه / خيرررررررر ليش لاحقنا
ركان طنشها وطالع نوف / ليش انتم هنا وليش ماقلتو لي اوصلكم بدل حوسة التكاسي
شوق بسخريه / من حضرتك علشان تلحقنا وفوقه تسالنا
ركان قرب منها وهي فزت من قربه
ركان بصوت واطي / لانك زوجتي او نقدر نقول بتصيرين زوجتي ومسئوله مني
شوق بعصبيه بوجع / ياليت ترجع من محل ماجيت
وطالعته باحتقار / مابي يرتفع صوتي لشي مايسوووووى

ركان بصوت ذايب / فيه وحده سنعه تقول هالكلام لزوجها الي خايف عليها ولا تبين يصير فيك شي قبل العرس تراني انتظر زواجنا على نار

ركان كاتم ضحكته من جرائته ما توقع ولا واحد بالميه يطلع منه هالكلام

شوق مرتبكه من قرب ركان وكلامه زاد احراجها حاولت تغطي على ربكتها واحرجها بعصبيتها
شوق بعصبيه / يا ليت تبعد لان وجودك يخنقني واذا صرت زوجتك ذيك الساعه تعال قول هالكلام انت اجنبي ياليت تفارقني لان الي فيني بسبتك

نوف بصراخ / شووووووووق احشمي وجودي
ركان طنش كلام نوف وبستغراب / شلون الي فيك بسبتي
رفعت شوق يدها قدام عيون ركان الي انصدم من لونها / شوف هذا منك ولا نسيت مسكتك لها
ركان حس بتانيب وكلمها بحنان / اسف ما كان قصدي اكسرها لك انتي الله يهداك طلعتيني من طوري
شوق بعصبيه / اسفك مو مقبول ياليت تفارقني
ركان ببرود / بطلع انتظركم بالسياره
طلع ركان والممرضه نادت على شوق دخلت عند الدكتوره
الدكتوره بجديه / تفضلي قولي ايش مشكلتك
شوق رفعت يدها وبوجع / يدي توجعني
الدكتوره وعيونها على يد شوق / احتمال يكون فيها كسر لازم اشعه والاشعه قيمتها 300 قبل لا تسوينها لازم تدفعين لصندوق
ومدت الورقه / وهذي ورقة الاشعه ومعها ورقة الحساب
شوق بخاطرها تقوم تسطر الدكتوره الي همها الفلوس اكثر من المريض
كانت شوق بترد على كلام الدكتوره لكن نوف ضغطت برجلها على رجل بنتها فهمت شوق قصد امها وسكتت
وقفت نوف اخذت الورقه من يد الدكتوره قبل لا تتمشكل بنتها مع الدكتوره تعرف بنتها دمها فاير طالعت في بنتها بنظرات ناريه

لما طلعت شوق ماقدرت تسكت / ليش سكتني هذولا ما يخافون الله صار عندهم الطب فلوس والمريض بحريقه
نوف بهدوء / انتي محتاجتها فلازم تقبلين بلي تبيه واذا مو عاجبك طلعنا لمستشفى ثاني منتي مغصوبه على شي ما تبينه
شوق بستسلام / وش حدك على المر الا الي امر منه يله بنروح ندفع لهم جعلها زقوم ببطونهم
نوف بجديه / شوق ليش صايره عدائه ماكنتي كذا
شوق بوجع / فيه ناس ترفع الضغط تخلي الواحد عدائي غصب عنه
نوف بجديه / تراني مفلسه اذا عندك ادفعي
شوق فتحت شنطتها اخذت البوك فتحته اخذت 500 مدتها على الموظف وبنفس شينه / خذها ورجع الباقي عاد انتم تسرقون الكحل من العين

نوف بعصبيه / وبعدييييييييييين ترى من اليوم متحملتك خلي المشوار يعدي على خير
شوق باستسلام / طيب
رجع الموظف لها الباقي ومشت مع الممرضه الي دلتهم غرفة الاشعه دخلت شوق ونوف جلست برى تنتظرها بعد بعد 5 دقائق طلعت شوق
وقفت نوف تسال الممرضه / متى النتيجه
الممرضه / انتي فيه روح غرفة دكتوره والنتيجه عندها
دخلو على الدكتوره الي تقلب الاشعه
جلست نوف وجلست شوق مقابلها

نوف بجديه / الممرضه قالت ان نتيجة الاشعه عند
الدكتوره وبيدها الاشعه / اختك فيها كسر خفيف ولازم نجبرها وقبل لانجبرها لازم تدفعين لصندوق 400 ثمن الجبيره وبعدها تدخل قسم التجبير

شوق بعصبيه / على قرف مستشفاكم تمصون دم الواحد دخولي عليك 50 والاشعه 300 والجبيره 400
شوفي بتجبرين يدي بلوشي ولا والله الحين طالعه اشكيكم وابليكم بلوى تقفل مستشفاكم وتسفرك لديرتك
الدكتوره بخوف / خلاص ادفعي نص القيمه
شوق باصرار / ولا اريال يكفي الي اخذتوه لا تخليني ارجع الي دفعته واذا فيك خير امنعيني
الدكتوره برجاء / هذي الاسعار من مالك المستشفى وانا عبد مامور
نوف رحمة الدكتوره / خلاص انا الي بدفع
شوق بعصبيه / والله ما تدفعين ريال والحين طالعه لغرفة التجبير اتصلي على الدكتورهناك يجبرني لو نطق بحرف ما تلومون الا نفسكم

طلعت شوق لغرفة التجبير ونوف وراها كارهه تصرف بنتها دخلو الغرفه شافة الدكتور منزل سماعة التلفون ويطالع شوق بحقد

جلست شوق ببرود ونوف واقفه
شوق بعصبيه / اتوقع الدكتوره كلمتك بخصوص تجبير كسري
الدكتور بنفس شينه / تفضلي
جبر الدكتور يد شوق وامنيته لو يحطمها لكن حكم القوي على الضعيف بعد ماخلص طلعت وجنبها امها

كملو كلامهم وهوم يمشون
نوف بستغراب / ليش ماطلبتي مسكن
شوق بسخريه / اخاف يعطوني سم من قهرهم مني ما تشوفين نظراتهم الناريه
نوف بضيقه / وانتي الله يهداك تبن الامور على كيفك والشي ما يجي على الكيف لازم نتغاضى علشان نعيش
شوق بغرور / وش حادني استسلم لهم وانا ادري انهم مستغفلني ومعاش من يستغفل شوق ناصر
نوف بابتسامه / وانا اشهد
شوق بابتسامه / لا تبتسمين تحطمين قلوب الرياجيل

نوف بابتسامه / كل فتاه بامها معجبه

شوق بحديه / تعرفيني ماجامل والي مستغربته محد تحرش فينا من جينا
نوف بابتسامه / وانتي تشوفين فيه احد علشان يتحرش شكل المستشفى مهجور واحنا الوحيدات الي دخلنها

شافت شوق ركان واقف عند باب المستشفى وبقرف / هذا ليش مسنتر عند الباب ليه مانقلع لبيته
نوف طالعت بالجهه الي كان واقف فيها سواق التكسي ما شافت السياره
نوف تسحب بنتها وبعصبي / اركبي وبلاها حركاتك السواق الي جابنا راح مالنا الا ركان
شوق بعصبيه / اكيد هو الي قايل له يروح هذا ما يفهم
ركبت نوف جنب ركان وشوق ركبت وراء وسكرت الباب بقوة



عند ركان


من ركب سيارته وعيونه على باب المستشفى ينتظرهم يطلعون اوجعه قلبه وهو يشوف يده شوق المجبره تمنى ان يده المكسوره ولا يدها صحاه صوت تسكيرت الباب
ركان بسخريه / ترى سيارتي ابيها وياليت تسكرين الباب بشويش ولا تبيني اكسر يدك الثانيه
شوق مالها خلقه / ممكن تسوق وانت ساكت
ركان بسخريه / حاضر عمتي
نوف بجديه / ركان وقف عند الصيدليه بشتري مسكن لشوق
ركان بجديه / تامرين امر
وصل عند الصيدليه / بنزل فيه اسم دواء اشتريه ولا اسئل الصيدلاني
شوق بحقد / ارتاح مكانك علاجي بشتريه بنفسي
فتحت الباب من غير لا تهتم برد ركان
لكنه ماقدر ينتظر بالسياره وهو يشوفها تدخل والصيدليه مزحزمه بالرجال دخل شافها واقفه قرب منها
كلمها وهو راص على اسنانه من العصبيه مايبي صوته يرتفع عليها بالصيديله / انتي ماتستحين داخله محل كله رجال
شوق طالعته بنص عين وبسخريه / انت ليش صاير لزقة واذا هذولاء رجال ليكون انت حرمه

ركان بعصبيه / اسبقيني لسياره ولا والله لعلمك منهو ركان
شوق شافت عيون الناس عليهم بحقد / بطلع مو خوف منك لكن ماحب اكون فرجه للعالم
طلعت وركان دخله نار منها وصل لصيدلاني وقال له عن كسر شوق والصيدلاني وصف له مسكن اخذهم ودفع الحساب وطلع
وصل لسيارته فتح الباب وقبل لا يجلس سمع شوق
شوق بعصبيه / ياليت مره ثانيه ما تتعرضني ومالك شغل فيني وبصراخ / فاااااااااااااااهم
ركان رمى كيس العلاج عليها
ماحب ينزل عقله اكثر لتصرفاتها عرف طبعها لو بيرد على كلامها بطول السالفه يسكت وبتموت بغيضها جلس بالسياره وحرك سيارته

يسمع تمتمتها وصراخها عليه لكن مااهتم وصل البيت فتح الباب ونزل قبلهم شافها تفتح الباب بعصبيه وتنزل وتدخل البيت
ركان في نفسه / هذي وش فيه كبريت محد يقول لها كلمه الا شبت الله يعيني عليها
شاف نوف تفتح بابها وتقرب منه
نوف باحراج / امسحها بوجهي ادري انها تطاولت عليك لكن تحملها علشان تكسبها مدامك مصر على زواجك منها
ركان بابتسامه / ابشري
دخل معها البيت طلع بوكه من جيبه واخذ كل الفلوس الموجوده عنده ومدها على نوف
نوف بستغراب / وش هذا ياركان
ركان جديه/ هذا فلوس
نوف باحراج / عندي ماني محتاجه
ركان بزعل / انتي مسئوله مني واذا ماخذتيها زعلت لا تنسين انك اختي وبتصيرين ام زوجتي
مدت يدها واخذت الفلوس وهي كارهه ماتبيه يزعل عليها
نوف باحراج / الله يعوضك
ركان بابتسامه / ادخلي لبنتك لتشب في بيتي
نوف بابتسامه / الله يهداها
ركان بجديه / انا عند صقراذا بغيتو شي ياليت تطلبونه مني وسالفة التكاسي ياليت ما تنعاد
نوف بجديه / ما قدر اوعدك لانك شايف عناد شوق
ركان بعصبيه / بنتك هذي لو شفتها راكبه تكسي بكسر رجولها
نوف بضيقه / الله يعينك عليها ويعينها عليك اذا دقائق بالسياره مو متحملين بعض شلون لو عشتو مع بعض
ركان بابتسامه / من قالك مو متحملها بتحملها لين تذوب بحبي
نوف بابتسامه / اكيد بعد ماتكرهك عيشتك بنتي واعرفها
ركان بمزح / الي يبي العسل لازم يتحمل قرص النحل
نوف بابتسامه / اشوفك صاير تقول كلام كبير
ركان بمزح / نتعلم نصف كلام حلو يمكن نلقى الرضا
نوف بجديه / ان شاء الله ينفع معها
ركان بجديه / يله رايح لصقر ومثل ماقلت لكم لحتجتي شي اتصلي علي
نوف باحراج / ماعندي رقمك ولا عندي جوال
ركان انصدم / شلون ماعندك جوال وليش ماقلتي لي
نوف باحراج / ماجت فرصه
ركان بجديه / اليوم بطلع لك جوال وشريحه وبسجل رقمي
نوف بجديه / لا ماله داعي تكلف على نفسك انا ناويه اشتري
قطع ركان كلامها بزعل / ليش تحطين حواجز بينا والجوال بشتريه واذا عندك فلوس خشيها ومدامك في بيتي بتصرفين من فلوس ابوي اذا رافضه فلوسي

تنهدت نوف ماتدري كيف بطبق كلام مها مع كرم ركان ورجولته
دخلت البيت وركان كمل طريقه لبيت صديقه




عند شوق



دخلت وهي تغلي من القهر بسبت ركان جلست على الكنب فتحت شنطتها طلعت جوالها شاف اكثر من مية مكالمه من جدتها
شوق بقلق / اللهم اجعله خير خلني اتصل
رفعت جوالها واتصلت على جوال جدتها الي كان بيد ساره
عند ساره
اول ماشافت رقم جوالها رفعته
وبعصبيه / اخير ياهانم عبرتيني
شوق بسخريه / اللهم اسكنهم مساكنهم اظن ان الجوال لجدتي وش له تردين
ساره بعصبيه / لان جوالي مع حضرتك وبعدين على كيفك تاخذينه
شوق ببرود / اقول عطيني جدتي
ساره بعصبيه / تدرين انهم شرشحوني بسبتك وبعدين شلون تسافرين ماتقولين لي يمكن اسافر معك
شوق بسخريه / صدق نشبه انا رايحه لامي انت وش يجيبك معي
ساره بجديه / تعرفيني ميته اشوف امك واتعرف عليها ليش تستنذلين وتروحين بدوني
شوق بسخريه / تبين جدتي تنحرك
ساره بجديه / امي عاقبتني ومسكتني جوالها تقول اتصلي كل دقيقه لين ترد اصبعي تورم بسبتك
شوق بجديه / ابشري بالعوض الي عندي
ساره بلهفة / وش العوض ان شاء الله قد تعبي
شوق بسخريه / الله وهالتعب ابشرك بنشتغل بالمباحث
ساره بصدمه وبصوت عالي / شنووووووووو
شوق بابتسامه / الي سمعتيه كلها كم يوم وتلقينا منورات المباحث
ساره بصدمه / تتكلمين من جدك ولا تمزحين
شوق ببرود / هذا الي صار ليكون غيرتي رايك ما تبين المباحث
ساره بجديه / تعرفين قلبي مو حجر مثل قلبك اذبح واسلخ ببرودة قلب ابي اتوظف بمكتب احقق مع المجرمين واكشف جرايمتهم
شوق بسخريه / اذا بتحققين معهم ابشرك كلهم براءه ومعاد بالسجن احد
ساره بستغراب / الا شلون بنتوظف
شوق بجديه / ياعمتي العزيزه تعرفت على خبل يصير ولد زوج امي طلب يتزوجني وهذا كان مهري والخبل وافق
ساره بعدم استيعاب / انتي وش تخبصين شكلك شايفه فلم وتقولينه لي
شوق بجديه / يا طويلة العمر لما جيت الجنوب وصلت لبيت خالي مسكته وكهربته بعصاتي وبعدها حرقت فلوسه وهو يطالع
ساره بجدية / حرام عليك ليش كل هالاجرام وبعدين حرام تسوين كل هذا لاتنسين انه خالك
شوق بعصبيه / تحرم عليه عيشته باع امي تبيني اتركه يتهنى سلامتك
ساره بحماس / اتركينا من سالفة خالك هاتي الي بعده
شوق بجديه / القدر ساق لنا واحد وصديق وفكو الشايب من ايديني ودخلنا الشرطه وبالصدفه طلع ولد زوج امي
ساره بعدم تصديق / صدق خطبك ولا كذبه
شوقبجديه / تخيلي الغبي ضربني وخطبني ماعنده وقت
ساره بصدمه / ضربك
شوق وعيونها على يدها / حسبي عليه كسر يدي وتورم وجهي بسبته
ساره ماقدرت تمسك نفسها / ههههههههههه تسلم يده الا شلون توافقين عليه وهو ضاربك وامي يوم ضربتك انحشتي لندن
شوق بحقد / والله الحاجه الي مسكتتني وماجله ردي عليه لين اخذ منه الي ابي
ساره بجديه / اجل منتي متزوجته
شوق ببرود / شلون ما اتزوجه ومهري شغلي بالمباحث لكن لتزوجته بيصير مثل الطرطور بالبيت ماله اي وجود وفوقه بجننه واكره بعيشته
ساره بتعاطف مع ركان / حرام
شوق بعصبيه / وجع كل دقيقه حرام يستاهل وش رايك تتزوجين صديقه الكريه
ساره بمزح / اذا مزيون ويطيح الطير من السماء قولي له يخطبني وبدون مهر
شوق بقرف / الزين للبنات والغثيث عليه جمال تقولين بنت لكنه غثيث
ساره بمزح / معلي من خطيبك اسئلك عن الي بيصير خطيبي
شوق وهي تحاول تتذكر ملامح صقر / مادققت فيه لكن مملوح وكريه مثل خويه
ساره بمزح / يويلك اذا تزوجتي قبلي يا اتزوج قبلك او نتزوج سوى مدام لقينا المعاريس
شوق بسخريه / اشوفك كذبتي الكذبه وصدقتيها
ساره بجديه / وش ورانا خليني اكذب واصدق كذبتي الا متى بترجعين
شوق بجديه / ماني براجعه
ساره بعصبيه / وش تقولين ناويه تجلطين امي تعالي وتركي عنك الجنون
شوق بجديه / مستحيل اترك امي بعد مالقيتها
ساره بعصبيه / قولي مستحيل اترك ولد زوجها الا وش اسمه
شوق بقرف / ركان
ساره باعجاب / اله حلوووووووووووو الا وش اسم صديقه
شوق / صقر
ساره بسخريه / لا حول اخر عمري زوجي اسمه صقر هونت مابيه




عند تركي


وصل لبيتهم وداخله حزن يهد جبال رجعت له الذكرى الموجعه طيحت اخوه وموته كل ذره بجسمه تنزف الم وحرقه على فقد سالم اخوه عضيده سنده بهالدنيا كيف بيدخل بيتهم وسالم مو فيه نزلت دموعه بحراره فتح باب سيارته ووجهه غرقان بدموعه مشى بخطوات ثقيله وصل للباب دخل يده بجيبه تذكر انه ناسي كل اغراضه بالبيت رفع يده وبيد ترتعش طق الجرس انفتح الباب وعيونه بالارض مايبي احد يشوف دموعه الي خانته ونزلت
سالم عيونه على اخوه الي منزل راسه الي قدامه مستحيل يكون اخوه الي يهتم بمظهر انصدم من شكله المبهذل بلبس مساعد القصير
سالم بصدمه / تركي وش صاير لك
تركي يتهيئ له انه سمع صوت اخوه رفع راسه شاف اخوه بلحمه واقف قدامه لا ارادي قفل عيونه ورجع فتحهم توقع طيف اخوه بيختفي لكن الطيف مازال واقف قدامه تركي ودموعه تسبق لسانه / انت سالم ولا من حرقتي على فقدتك صرت اشوفك حي قدامي
سالم بتاثر / ايه سالم انت الي وين مختفي
تركي رمى نفسه عند رجول اخوه / دعيت ربي اشوفك دقيقه والله حققها لي
وبصوت باكي / والي رجعك للحياه بعد ما ضنيتك ميت اني بري من التهمه الي قالها خويك والله اني بري ياسالم مثل ماذيب بري من دم يوسف
نزل سالم ورفع اخوه / قوم الله يهداك هذاني حي قدامك
تركي بحرقه / اااااااااااااااه ياخوي طقيت من الديره لانك مو فيها طلعت فيها
سالم بتاثر / الله يهداك ادخل داخل امي تحاتيك وولدك صجنا من كثر مايسالنا عنك
تركي باصرار / والله ما دخل البيت وفي قلبك ذرة شك فيني
سحبه سالم لحضنه / مصدقك
تركي صار يبكي بنحيب بحضن اخوه الي رجع له بعد ماضنه ميت
سالم ودمعه خانته ونزلت / لو ميت ما بكيتني هالكثر
تركي بصت باكي / بكيتك ياخوي لين جفت دموعي جعلني ماذوق حزنك يابو سعود
وسالم بحب / جعلني ماذوق حزنك يابو ياسر

بعد سالم اخوه عن حضنه وشاف وجه اخوه المتورم من كثر البكي

سالم بحنان / ادخل غسل وجهك امي مو ناقصتها دموعك
دخله سالم البيت وصله لمغسلة الرجال وشغل له الماء وتركي يغسل وجهه لين حس براحه
سالم بجديه / مابي امي تشوفك بهالحاله بطلع اجيب لك ثوب من غرفتك وانت ادخل تسبح
دخل سالم داخل وتركي دخل الحمام




عند طلال


رجع البيت وجهه وجسمه متورم من ضرب خاله كانت امه جالسه لما شافت ولدها كانت بتقوم تحضنه وتعالج جروحه لكن قست قلبها وقفت ومشت وستوقفها صوت طلال
طلال بحزن / لهدرجة كارهتني حتى ماسالتني وش صار لي الي فيني من خالي
فز قلب ام طلال / مساعد رجع
طلال بحزن / خالي عبدالعزيز لما اعترفت له ضربني ولو مادخلو الموظفين ومسكوه عني كان الحين تبكيني يام طلال ولا بتفرحين بموتي


خنقت ام طلال عبرتها وقلبها مكوي على حال ولدها لكن تصنعت القسوه / تستاهل الي جاك ولو ذبحك مايلام وكل هذا من فعايلك الشينه ومشت من قدامه وغصب دموعها نزلت مهما كان هي ام وقلب الام ما يقسى على ولدها دخلت غرفتها وقفلت الباب وصارت تبكي بحرقه تبكي اخوها الغايب الي مايندرى حي او ميت وتبكي ولدها الي سبب بدمار خاله زين منها ماصار فيها شي من الحزن والهم




عند مروان


دخل البيت وعلى طول لغرفة اخته طق الباب وبعده فتحه
كانت سلوى منسدحه على فراشها وتهاني جالسه متكيه على الجدار
مروان بعصبيه / سلوى وجع ليش ملبستي
سلوى بصدمه / مروان تو الناس المغرب للحين ماذن وانا موعدتها العشاء اكون عندها
مروان بعصبيه / لك عشر دقائق القاك جاهزه اذا ماجهزتي اخليك تروحين لهم بلبسك الي لابسته
سلوى بخوف / بتجهز من صدقك اروح لهم بخلاقيني هذي
مروان / اجل خلصي
سلوى / منحرجه منهم جايه قبل الموعد
مروان / كلميها وقولي لها مضطره اجي بدري اخوي مشغول بعد العشاء مايقدر يوصلني لكم

سلوى / طيب
تهاني عيونها عليهم تسمع كلامهم بصمت
طلع مروان وسلوى رفعت جوالها واتصلت على ديما



عند ديما


كانت تحوس مع نجود بالمطبخ وكانت بلبس البيت سمعت جوالها طلعته من جيب بجامتها شافت رقم سلوى
ديما بعصبيه / يويلك لو اتصلتي تقولين منتي بجايه
سلوى بجديه / لا اتصلت اقولك بجيك بعد عشر دقائق لان مروان مشغول بعد العشاء
ديما بفرح / حياك الله باي وقت يله بقفل واتجهز لستقبالك
سلوى / مرام بتجي
ديما / لا اعتذرت لانها بتروح لسوق وبترجع متاخر
سلوى بجديه / اجل يله بقفل وبلبس
انهت اتصالها من ديما وطلعت لها لبس تلبسه وصارت تلبس على السريع سمعت صوت مروان
مروان / خلصتي
سلولى / باقي شوي
مروان / انتظرك في السياره 5 دقائق وانتي عندي
سلوى / طيب
بعد 5 دقائق وسلوى راكبه السياره جنب اخوها حرك سيارته بطريقه لبيت صقر



عند ديما


بعد ماقفلت من سلوى التفتت لنجود / نجوده حبيبتي سلوى جايه بطريق بالبس وانتي استقبليها ووصليها لغرفتي
نجود بسخريه / انتي تكشخين وتبيني استقبلها بلبس البيت
ديما بجديه / اجل اتركي الي بيدك والبسي انتي ماشاء الله عليك سريعه مو مثلي
نجود بجيده / اخيرا اعترفتي انك بطيئه وتمرضين
ديما / بطلع اتجهز لا اتاخر




عن ثامر وسالم



وصلو الجنوب على اذان المغرب
ثامر بجديه/ قولي باله شلون بندل بيت خالك
سالم / مدري

ثامر / الحين احنا بالمنطقه الي ساكنها خالك والدنيا فاضيه والعالم تصلي وش رايك ننزل لقرب مسجد نصلي ونسال اي واحد نشوفه يدلنا على بيته
سالم بضيقه / شورك وهداية الله
وصلو للمسجد نزلو والسواق نزل معهم دخلو المسجد صلو بعد الصلاه شافو شايب
قرب منه سالم باحترام / لو سمحت ياعم احنا جاين من الرياض وندور على شخص اسمه مبارك ال....
الشايب / وصلت يولدي بيته يبعد خطوتين من المسجد
سالم وثامر فرحو / طيب ياعم ياليت ادلنا على بيته
وقف الرجال عند باب المسجد واشر بيده على بيت / هذا بيته
سالم بصدمه من شكل البيت / متاكد ياعم انه ساكنه بالخرابه
الشايب / ايه يابوك هذا بيته اسمحولي بتركم عندي شغل
طلع الشايب والتفت ثامر لسالم / شلون خالك ساكن بهالبيت
سالم بضيقه / وش دراني امش خلنا نروح له
ثامر بستغراب / غريبه ليش ماصلى والمسجد قريب من بيته
سالم / علمي علمك يمكنه مريض
وصلو لبيته استغربو الباب مفتوح
سالم بستغراب / ثامر البيت مفتوح
ثامر بخوف / قلبي قارصني خلنا نرجع
سالم باصرار / خلنا ندخل بناخذ منه عنوان بيت امي وبنتركه
دخلو وثامر داخله قلق وخوف اولا من شكل البيت وزاد خوفه لما شاف الباب فاتح
دخلو الحوش انصدمو من الي شافوه
ثامر برعب / قايلك قلبي مو مرتاح خلنا نرجع
سالم بصدمه / سالم لا تنسى انه خالي مستحيل اتركه
قربو اكثر وشافو رجال منكب على وجهه بحفره من شكلها واضح انها مكان نار لانه مابقى منه الا رماد سالم مستغرب الجو حار وش له شاب النار
ثامر بجديه / لا تقرب من ولا تلمسه اخاف مذبوح واذا لمسته تصير بصامتك عليه
سالم مد يده يحاول يرفع وجه مبارك من الحفره انتبه لبرودة مبارك وانه متيبس ماقدر يحركه
سالم بخوف / الرجال مثلج شكله ميت
ثامر بجديه/ واضح من لونه انه ميت وريحته بادية تطلع
سالم يطالع بصديقه / والحل لا تقول اتركه لان هالشي من سابع مستحيلات
ثامر بجديه / لو انه حي قلت نوديه للمستشفى لكن هذا ميت وشبعان موت
سالم بجديه / اجل تبيني اتركه يعفن بمكانه اكرام الميت دفنه
ثامر بخوف / لا تقول انك بتدفنه بمحله
سالم بجديه / اكيد لا بنوديه للمستشفى يسجلون الوفاة ويكلمون اهله يدفنونه
ثامر بعصبيه / انت مجنون بتثبت تهمت القتل علينا لو وديناه للمستشفى فيها سين وجيم
سالم باصرار / والله لو انحبس ماتركته ميت وراي مصير التحاليل تثبت سبب وفاته وبيتاكدون ان مالنا شغل
ثامر بضيقه / الله يعيني عليك وعلى طيبة قلبك الي بتودينا بداهية
سالم بجديه / اطلع ناد السواق يساعدنا بشيله
طلع ثامر لسواق ونداه دخل السواق وخااااف من الجثه الي قدامه توقع ان ثامر وسالم ذابحينه اضطر يسمع كلامهم شالو بصعوبه لين وصلوه لسياره احمدو الله ان مالمكان خالي من الناس وسدحوه بالسياره
وركب ثامر جنب السواق وسالم جنب مبارك الي وجهه منقلب اسود وعيونه جاحظه كان شكله مرعب صد عنه سالم
وصلو للمستشفى نزل ثامر دخل المستشفى وقال لهم ان معه واحد مغمي عليه
دقائق والممرضات يدفون السرير افتحو الباب وانصدمو من شكل مبارك الي واضح للاعمى انه ميت نزلو مبارك وسدحوه على السرير ودفوه داخل الطواري
وقف ثامر وسالم برى الغرفه
ثامر وعيونه على سالم / الحين لو بيحققون معنا اثباتاتك مو معك وهذي اكبر مشكله
سالم بتوتر / ثامر اسكت يكفيني القلق الي فيني لا تكملها علي
واقفين وهم ينتظرون على نار وانصدمو من وجود شرطي بالمكان
ثامر برعب / ليكون الشرطي جاي علشانا
سالم بخوف / الله يستر
عيون سالم تلحق الشرطي الي دخل غرفة الطواري
سالم بجديه / اكيد جاي بيحقق معنا
ثامر برعب / قولي الحين وش الحل

سالم بخوف / مدري اذا خايف اطلع وبتحمل كل شي
ثامر بعصبيه / تدري مستحيل اتركك ولي بيصير عليك بيصير علي
قطع عليهم وقوف الشرطي قدامهم
الشرطي ياليت تمشون معي لمركز الشرطه بدون شوشره

سالم وعيونه على الشرطه / الي داخل يصير خالي ولقيناه ميت وجبناه هنا


ثامر بجديه / اذا بتحقق بموضوع الشايب الي داخل مالنا علاقه فيه لو كنا السبب ما شفتنا واقفين قدامك كان هربنا
الشرطي / فيه تحقيقات واجرائات لازم نسويها معكم
سالم بضيقه / ثامر امش نطلع مع الشرطي وكلم السواق خله يترك المستشفى لو جلس بيفضحنا عند ابوك
ثامر بجديه / من غير لا تقول ما ابيه يخوف ابوي علينا
اتصل ثامر على السواق وقاله يجيب بعض الاغراض من السوبرماركت
انتظرو قليل ومشو مع الشرطي الي ركبهم وراء بسيارة الشرطه وهو جلس قدام مع شرطي ثاني




عند تركي



بعد ماخذ شور حس بانتعاش طلع من الحمام لاف نفسه بالفوطه شاف اخوه واقف بملابسه
اخذ من سالم الملابس ورجع للحمام لبس وطلع

دخل اصاله شاف امه جالسه واضح الحزن على وجها قرب منها باس راسها
ام سالم بعصبيه / اخيرا جيت ماتعرف تكلم واطمنا عليك ولا البيت فندق عندك
تركي باعتذار / حقك علي
ام سالم بعصبيه / اطلع لغرفتك وشوف ولدك واذا بتغيب اخذه معك
تركي مستغرب من عصبية امه حتى ماسالت عن حاله وليش غايب شكلها كانت تنتظره علشان تعصب عليه ماحب يرادد امه مشى طالع لفوق مر غرفة ساره الي كانت جالسه اول ما شافت تركي فزت واقفه وركضت له وباسته على راسه / حرام عليك خوفتنا عليك

تركي بضيقه / زين ان فيه احد يخاف علي ويحاتيني
ساره بجديه / امي كانت قلقانه عليك كل دقيقه داخله غرفتك
تركي بضيقه / ماشفت هالكلام باستقبالها لي
ساره / تعرف امك مستحيل تبين مشاعرها لنا
جلست ساره وجلس تركي جنبها وعيونه ادور على شي / بنت اخوك وينها
ساره بارتباك / هاه
تركي بجديه / اضنك سمعتيني وينها شوق
ساره بخوف /سافرت لامها
وقف تركي وكانه مقروص وبعصبيه / منو سمح لها تروح لامها
ساره بخوف/ هي فاجئتنا سافرت واحنا نايمين
تركي بعصبيه / هذي ماتحسب لاحد حساب ولا امها ربتها على الدشاره اتصلي عليها بكلمها

ساره بخوف / تركي توك جاي هدي وكلمها بكره
تركي مايشوف قدامه من العصبيه / اتصلي عليها
رفعت ساره جوالها واتصلت على شوق سحب منها الجوال



عند شوق



كانت متمدده على الكنبه وامها داخل سمعت جوالها شافت رقم جدتها
شوق بسخريه / توك مقفله ليكون ناسيه شي تقولينه
تركي بعصبيه / باذن من مسافره
اعتدلت شوق بجلستها / عمي تركي
تركي بصراخ / قولي من سمح لك تسافرين لامك
شوق برتباك / انا سمحت لنفسي والي مسافره لها امي وبعدين مو لحالي اخوي تركي معي
تركي بعصبيه / الظاهر امك مربيتك على الهياته والصياعه
شوق بعصبيه / حددددددددددك امي ربتنا احسن تربيه والكل يشهد
تركي بعصبيه / شوق لا تختبرين صبري ومثل ما سافرتي ترجعين
شوق بقوة / رجعه من دون امي ماني براجعه

تركي بعصبيه وصراخ / طيب ياشوق انا جايك وريني شلون ترفضين ترجعين معي راجعه لو محمله تفهميين
شوق بعصبيه / عمي
قبل لا تكمل كلامها قفل تركي الجوال بوجها وشوق تشتعل من العصبيه



عند تركي


بعد مانهى اتصاله رمى الجوال بقسوة على ساره الي انرعبت من حركة تركي
تركي بعصبيه / بنت اخوك هذي بتجلطني لكن شكلي بربيها من جديد
ساره ساكته ماتقدر تناقش اخوها وهي تشوف عصبيته
طلع تركي وسكر الباب بقوته
بعد ماطلع تركي / اوف وش ذنبي هي تسافر وانا يهاوشوني والله ظلم
كل هاعصبيه علشانها سافرت شلون لو درى بسالفة خطبتها والشغل الله يعينك ياشوق من الي بيسويه فيك تركي



عند سلوى


وصلت لبيت صقر طقت الجرس فتحت لها نجود
نجود بابتسامه / اهلين سلوى ديما تنتظرك بغرفتها
طلعت سلوى فوق لغرفة ديما طقت الباب فتحت لها ديما حضنتها بحب / يالخايسه اشتقت لك ليش ماتصلتي اطمنيني عليك
سلوى / وانا مشتاقه لك اكثر
ديما بحب / ادخلي ولا بطولين عند الباب
دخلت سلوى وجلست بالجلسه الجانبيه وديما واقفه

سلوى بخبث / منتي بمضيفتني
ديما بحب / وانا اقدر انتظريني بجيب لنا بارد نشربه
طلعت ديما وسلوى وقفت ادور على جوال ديما واخيرا لقته على التسريحه
اخذته بسرعه وصارت اتقلب بالاستديو واخيرا لقته ارسلت المقاطع لجوالها وبعد ماخلصت مسحت رقمها من جوال ديما ورجعت الجوال مكانه
بعد دقائق دخلت ديما ونجود حمدت ربها انها مانكشفت سمعت نغمة رساله من جوالها
شافت رقم اخوها فتحت الرساله / اذا كل شي تم ارسلي رساله اطمني
ارسلت لاخوها / تم




عند مروان




بعد ما وصل اخته طلع لشقة عامر جلس وارسل رساله لخته
دقائق وجاه ردها الي طيرها من الوناسه
عامر وعيونه على مروان / من وين جايه الرساله الي بسبتها متشقق من الوناسه
مروان بفرح / اخيرا البعيد قرب
عامر بجديه / ليكون قدرت تجيب الي الي مسهرتك الليل
مروان بفرح / بهاليومين بتنام بحضني واطفي نار انتظاري
عامر / اذا خلصت منها خلنا نذوقها
مروان بهيام / هذي ما ينشبع منها هذي خاصه لي وانت دور غيرها
عامر بزعل / وين وعدك لي
مروان بسخريه / ليش ماتدري ان كلام الليل يمحوه النهار وياويلك تقرب منها صارت لي
عامر / اذا بنت شريفه مراح تقدر تبتزها بصورها
مروان باصرار / اذا مانفعت معها الصور بجيبها لعندي وبطريقتي
عامر بسخريه / نشووووف





توقعاتكم





لنا لقاء الاسبوع الجاي مابي احدد يوم وماقدر ادخل فيه






اختكم نسايم نجد