السلام عليكم ورحمة الله وبركاته

صــبــآآآح معطر بذكر الله

لأحلى خلق الله <== ياأني انغثيت من هالرساله بالجوال ^_^


احلى صباح بعد العيد وحوسته

وتقطيع اللحم والدواره على البيوت وتوزيع الأكياس

ناس يد وناس رجل وناس ضلوع

وبالاخير نكتشف انه مابقى لنا شئ ياااهل البيت <== مشكله لامسكو التقسيم لواحد مثل محاكيكم احم احم :)



ومالكم بالطويله هذا القوزء القديد وصل

فرررريش من الوورد على صفحة المنتدى









&&&&&&&&&&&&&&&&&&&&&&&&&&&&&&


الــــــــــجـــــــــزء الـــــثـــــالــثــــ عـــــشـــــر

&&&&&&&&&&&&&&&&&&&&&&&&&&&&&&






(( أيـُـعــقـــلــُ هــذاآآ ....؟!!!! ))








~ | ربي ,,, أغث ][ قلبي ][ برحمة منك ...}




سَبحَانْ الله وبًحمًدهً ~ سًبَحاَن الله العَظًيَم

سَبحَانْ الله وًبحَمدهً عدَد ًخلِقهً ورًضاَ نَفسًه َوزَنةً عَرشًه وَمدًاد كَلماتهً














][ ~ نـْاصَـرَ & شَـَمـْـسِ ~ ][






متقابلين على سفرة الغدى والهدوء يعم المكان ماينسمع الا اصوات ضرب الملاعق على الصحون


ارتفع صوتها يقطع سكون المكان / خلصت

ناظرها بنظرة حقد تمنى انه يقدر يخفيها وتكلم / ايه

شالت السفره من قدامه بهدوء دون أي كلمه وراحت للمطبخ

بدت تزيل بواقي الأكل عن الصحون وتجمعهم حول المغسله بآليه وصمت وهدوء رهيب

انقهر من برودها بهاليومين اللي فاتو ....اول كانت لأدني حركه يسويها يشوف نظرة الألم بعيونها ويحس بشئ من السعاده

اول كانت اذا تكلم عليها تحاول تناقشه.......يحس ان بداخلها كلام ودها تقوله واحياناً يشوف نظرة التصميم بعيونها وكأنها عازمه على شئ

بتقوله

لكن الحين لا.....تغيرت 180 درجه......صارت انسانه غيرررر

مو هي اللي يعرفها

اللي قدامه جسد بدون روح...... بارده برود الثلج ......وكأنها طالعه من مقبرة الأموات

فيه شئ مغيرها .....

تكلم بينه وبين نفسه [كل ذا عشان موت يوسف]




لحقها للمطبخ وشافها وهي متمسكه بحافة الطاوله ودمعه حبيسه بعيونها وتنهدت تنهيده من اعماقها كلها ألم .....تخيل لو كان واقف قدامها كان

حس بحرارتها

كور يده وعض شفته بغضب وراح لغرفته بدل مايفرغ غضبه عليها

7
7
7
7

زفرت الهوى من داخلها وهي للآن ممسكه بحافة الطاوله

كان هو املها.......كان هو اللي بينقذها من هالحياة اللي تعيشها

هو اللي اغتالها وسلبها كل عزيز عليها وهو اللي علقت امالها فيه بأنه ينقذها

كان كلامه واعترافه هو الحلم اللي تمنت اللي يتحقق واللي انتثر بين يوم وليله

كانت عايشه برجواه وانه بيوم بيقول الحقيقه وبتحيا حياة طبيعيه وتتنعم بقرب الزوج والحبيب

كل شئ تبدد وكل شئ ضاع.......وكل آمالها انخذلت

بتعيش معه وتنتظر متى الموت يجيها ويريحها من حياتها

متى يخلصها من عذابها ......

اول كانت عايشه وبصيص من نور الأمل ينور حياتها ويبث فيها شئ من القوه عشان تتحمل كل اللي تمر فيه

لكن الحين لا .....تعيش بالظلام بدون نووور......مسلوبة القوه ....خاليه من المشاعر والأحاسيس مايأثر فيها شئ




عندما تفقد الأمل ......وينقطع ذاك الخيط الرفيع الذي كنت تتشبت به وتعتقد ان سينقذك

عندما يختفي فجأه ماكنت تعيش برجواه ......وكنت تتوقع انه وان طال الزمان سيتحقق

عندها فقد ستعيش متبلد الأحساس........تحيا بلا مشاعر .....وتكون اشد الكلمات ايلاماً لاتأثر بك وكأنها نسمه خفيفه تمر بقربك دون أن تؤذيك

ستكون بارد العواطف......متحجر القلب......فما كان يدل على انسانيتك قد ضاع ........تاهـ طريقه إليك

تتلمس صدرك احياناً فلاتشعر راحة يدك بنبضات قلبك.......تحس انك جسد بلا روح

تعيش لليوم فقط دون ان تفكر بالأمس او الغد



هذه حياة من فقد الأمل واستعمر اليأس قلبه






............................................................ .........................






][ ~ مـَــْزـوَنـَــ ~ ][





منزله عباتها على كتوفها وماسكه طرحتها بيدها وتدور بعيونها على الغرفه بألم

عبره محبوسه داخل صدرها وعيونها غرقانه بالدموع ......بلعت ريقها ماتبي هالدمعه الحقيره تنزل

ايه حقيره......هي احقر من انها تشاركها مصيبتها واحقر من انها تحفف عنها الألم اللي تحس فيه


نزلت عيونها للأرض ودمعتها بدون ارادتها نزلت .....حطت يدها على فمها تكتم شهقتها لاتطلع


هنا لقت اختها طايحه

هنا حضنتها

وهنا فارقت الروح جسمها وتركتها

رمت جسمها على طرف السرير بجزع........انعاد المشهد بخيلاها من جديد

تتذكر يوم دخلت وشافتها طايحه ......تتذكر علب الحبوب اللي صدمتها

تتذكر كلامها لها ورجاويها ويوم تحضنها

تتذكر يوم طلعت تركض لتلفون وتطلب الأسعاف ولا اهتمت بعيون جدتها واستغرابها انها نطقت

تتذكر جية الإسعاف للحاره واجتماع الجيران وسؤالهم وخوفهم والصجه اللي صارت بالحاره

تتذكر دخلة رجال الاسعاف بأدواتهم وسرعتهم اللي ماتخيلت انهم بيدخلون لبيتهم ابد لكنهم دخلو واخذو احب الناس على قلبها

تتذكر الكلمه اللي قالها المسعف لثاني بعد دقايق من الكشف عليها بصوت واطي واللي نزلت عليها مثل الصاعقه وقضت على المتبقي منها /

هذي متوفيه

تتذكر صرختها القويه اللي صمت اذانهم..........تتذكر ركضها وارتمائها بحضن اختها البارد الخالي من الحياة بدون وعي منها ان جسمها

ملاصق لجسم المسعف وفزته بسرعه من جنبها بحيا وتقدير لحالتها

تتذكر نحيبها وصراخها.......تتذكر جية اهل ابوها كلهم يعزونها ويواسونها

تتذكر قرارها اللي اتخذته بمعمعة هالظروف

القرار اللي ماندمت عليه ابد ......واللي مصمه عليه للحين مع مضي مده على وفاة اختها



وصلها صوت طلعها من سرحانها وذكرياتها المؤلمه / يالله مزون متعب ينتظرك عند الباب

ناظرتها وشالت جسمها المتعب من الأحزان والآلآم وشيعت الغرفه بنظره اخيره مودعه وطلعت منها






............................................................ ..............................






][ ~ ضَـــاآارَيـْــ ~ ][






تكلمت وهي تغالب دموعها / مادري وش معجلك على السفر تقل مالك بيت تاوي له........كان تركدت وسوينا لك عرسن زين بدل طيرتك


تكلم وهو يبتسم / الله يهديك يمه وش طيرته..........
بيتي ماخلص يبي له شهور ويخلص ....

ولا لي مكان يصلح داخل البيت....ولا ابي اسكن بفندق كننا بسفر ولا لنا بيت

احسن شئ اللي سويته

تكلمت بنبرة عدم اقتناع / الله يوفقك وين ماكنت ........

وكملت محاولاتها بعدم يأس / بس ماتهنينا فيك ولا بحرمتك ....اجلس كمن يوم اهني عيني بشوفتكم ثم سافرو بحفظ الله

باس راس امه ويدها وتكلم بابتسامه / كلها كمن شهر وتشوفينا قدامك يالغاليه وتملين منا وتقولين اطلع انت وعيالك ملينا من صجتكم

تكلمت بنبرة شوق لطاري عياله وحنين لحفيد جديد من اغلى عيالها / حشى علي ماقلت لكم هالكلام..........الله يطول بعمري واشوف عيالك

- وعيال عيالي وعيالهم لين ماتنقطع ذريتي قولي اميييين


طلعه من لحظات الوداع طبطبه قويه على ظهره / هاه مستعد لسفر والزواج يابطل؟

- كح كح الله يقلعك وش هاليد ....بغيت تطلع روحي جعل يدك للمحش

تكلم اخوه وهو يضحك / وش فيك قمت تدعي كنك عجوز ماكول عشاها ههههههههه

ضربت صدرها بخوف / استغفر ربك وش هالدعاوي ........لاعمرك تدعي على اخوانك

- ماشفتيه يمه بغى يذبحني وانا ماتزوجت ولا تهنيت

- رد له الضربه بس لاتدعي عليه

- تامرين يمه لو ان هالثور مايستاهل

- مالثور الا انت وولدك اللي بيجي

- وش جاكم انتم كبرتو ودبرتو ماتحشمون احد

- السموحه يمه بس ولدك ذا البغل مايحترم اللي اكبر منه

- دامني بغل فانت توأمي وتراك اكبر مني بدقيقه لاتستانس واجد

نقلّت بصرها بينهم بقل حيله / باطلع قبل لاترفعون سكري بس .......وطلعت وتركتهم


- هاه كل شئ جهزته

- الحمدلله كل شئ تمام

- ماتحس ان سفرتك على طول شينه لو تقدم الزواج وتجلس انت وياها بفندق كم يوم احسن لكم

- صعبه ياضاحي ....فكرت فيها لقيت سيئاتها اكثر من حسناتها.........لو اجلس كم يوم بضظر اروح لأهلي واهلها وبنودعهم من جديد وبتطلع

لنا الف شغله يعني ماراح نستفيد من جلستنا وبنحوس اغراضنا ونفتحهم كذا مره هنا وهناك واذا حطينا شناط خاصه للفندق بتكثر علينا

الشناط اللي بنشحنها لاجينا نسافر

سفرتنا على طول اريح لنا

- اهم شئ راحتك وانت ادرى بنفسك

- اهم شئ التوفيق بس

- الله يوفقك






.......................................................







][ ~ المعاريس & اهلهم ~ ][





دخلو من البوابه وسط زحمة وازعاج الناس بالمطار

اشكال واعمار وجنسيات مختلفه ماليه المكان

دار بنظره على الصاله وشاف اللي يمشي بسرعه كبيره ولا يهتم باللي يصدم فيه يبي يلحق على الرحله بأي طريقه

واللي جالس على كراسي الأنتظار بكل ملل وكل شوي يرفع يده ويناظر الساعه بتأفف واللي جالس هو وخويه او عائلته وماخذتهم السواليف

ولا حسو بالوقت

ارتفع صوته وهو يدف العربيه / مادري وش تبي برحله بهالوقت لو انك طايع شوري وماخذ رحلة الفجر ولا اول الصبح كان تلقى المطار

يقرش مهب هالوقت شوي ويطيحونك من العجله والزحمه

- خلووود.......مانت صاحي ؟!!

تبيني اطلع الحرمه من بيت اهلها الفجر ولا الصبح ...........خويتي هي ولا زوجتي ؟!!

اطلعها هالوقت معززه مكرمه من بين اهلها وحبايبها وكلن حاضر فرحتها

- ياكلمة ردي بمكانك ....اكلتنا

اقول امش خلنا نشحن الشناط وخل زوجتك تاخذ راحتها مع اهلها

- يالله امش

7
7
7
7



بعد مده ......!


ضربه بيده ينبهه / شف شف اخوانك يدورون بعيونهم يدورونك

- طيب اشر لهم ولا دق عليهم

- لا لا خلهم شوي .......حلو شكلهم وهو يدورونك تقل بزران مضيعين ابوهم

وانطلقت ضحكه منهم / ههههههههههههههه يقلع يومك اثرك شيطاني

- تربيتك افا عليك


وصلو لهم الأخوان

وارتفع صوت واحد منهم / هاه خلصتو الشحن

- ايه الحمدلله تونا خالصين

- الحمدلله

- بالتوفيق وتوصولون بالسلامه

- الله يسلمك.......كان ماتعبتو انفسكم بالجيه ....كارفين اليوم بالوقفه والاستقبال وكملتوها بالجيه للمطار

حط يده على كتفه / افا عليك حق وواجب .......هو كل ليله يعرس لنا ضاري ويسافر

وعارفين الحوسه اللي بتحتاسها.....معرس جديد وسفر وشحن عفش

جينا نعين ونعاون

- ماقصرتو الله يعطيكم العافيه عقبال مانتعب بزواج عيالكم

- امييييييين

- اول اتعب بعرسي ثم اتعب بعرس عيالي

- تزوج من قاضبك

- هههههههههه شوفو من يتكلم الشايب المراهق اللي توه متزوج

وارتفعت اصواتهم بالضحك

7
7
7

قرب موعد الرحله وبدى كل واحد منهم يسلم على المعاريس ويودعهم ويوصيهم على بعض

الحريم كان وداعهم حااار .....اختلطت دموعهم بدعواتهم ونصايحهم السريعه لها

والرجال تدويعهم كان رسمي كله نصايح واسأله تخص السفر


خلصو من السلام وكان هو اخر واحد اخذ اخوه ضاري بحضنه وودعه

شافها وهي قريبه منهم وسرت قشعريرة بجسمه قرف واحتقار منها

احرقها بنظرة ازدراء واحتقار وتهديد منه ...... يبيها تدري انه عارف لعبتها وان حياتها بيده يقدر ينهيها متى مابغى

او يمكن يبيها ماتلعب بمشاعر اخوه يوم عرف بحبه بها........كم مره حاول يقوله .....ينبهه..يس مايقدر ..........كل مايشوف سعادة اخوه يخاف

يكسر فرحته ويجرح قلبه

عارف انها ماتستاهل اخوه وان اخوه قدره اكبر من هاالحقيره اللي نزلت راسها من نظراته .....لكن وش يسوي القلب ومايهوى ومصيره

بيعرفها على حقيقتها ......لكنه يدعي ربه ان صدمته فيها ماتذبحه

7
7
7
7

قرب لها ضاري ومشو بجنب بعض وكل شوي يلتفتون ويشوفون اهلهم وهم يودعونهم بيدينهم ويبادلونهم الوداع

مسك يدها وانتفضت يدها يوم حست بدفا يده خوف وخجل منه .........قرب راسه منها وتكلم / لاتأشرين لأهلك تودعينهم .......يدك طالعه لين

مرفقك وانتي ماقصرتي بالنقش كلن شافك

سكتت.....ماعجبها كلامه من اولها تحسه بيتحكم فيها ويكبتها وبينها وبين نفسها [ بدينا بحركات الشيّاب ]

حس انها كشت منه وتصرفه ماعجبها.... لكنه مامسك يدها ولا منعها الا من غيرته عليها واي رجال يغار على عرضه بيسوي اللي سواه

رفع يدها لفمه وباس يدها بحركه صدمتها ولونت وجهها بحمرة الخجل

تحس ان خجلها ابطأ حركتها وعيون كل اللي بالمطار عليها واصابعهم تأشر عليها

نزلت راسها بحيا ولصقت فيه .........ودها تدخل بثيابها من نظرات الناس اللي احرقتها

حس فيها وحس بحياها لكنه ماسوى اللي سواه الا عشان يبين لها ان تصرفه مو تحكم ولا تعنت ولا كبت بالعكس.... كان من باب الغيره واي

حرمه بمكانها كانت بتستانس من هالشئ ......لكنه عذرها عروس جديده وصغيره ماتعرف طبعه ......لكن اللي همه انها حست ان حركته

اعتذار منه لها وارضى انوثتها حتى لو كانت بتذوب من الحيا مثل هالحين

ابتسم على حركتها واحتمائها فيه ومع جسمها الصغير وجسمه الكبير وطوله الفارع بانت كأنها بنته ..... فك يدها وحاوط كتفها بذراعه ولمها

له شوي بدون ادنى اهتمام بنظرات الناس الحارقه لهم وبينه وبين نفسه [حلالي كيفي]





............................................................ ............................................





*********************************************
بعد انقضاء اشهر على زواج ضاري وسفره

الجو العام كان هادئ نسبياً الا من ثورة المشاعر داخل الصدور

لكن جميعها ماكان لها أي تأثير بحياة اي واحد فيهم

من كانت ثورة مشاعره سعيده ازداد سعاده

ومن كانت تعيسه زادته تعاسه وشقاء ....~ }

*********************************************






][ ~ ذَيــًآبــَ & مُـَـهـَرهَـْ ~ ][






بغرفه يلفها الهدوء الرومانسي والأحاسيس اللذيذه.......ونور الغرفه الهادي اضفى على المكان جو الحالميه

واصوات تناجي عاشقين تزيد الجو حلاوهـ


جالسه على السرير وهو مريح راسه على رجلينها ويدينها الناعمه تلعب بشعره برقه

تكلم وهو يدقق النظر بعيونها / تصدقين ......عيونك كنها عيون نايف الله يرحمه....نفس الرسمه بس انتي على اكبر

ان شاءالله لو جاني ولد ابيه يطلع مثل خاله

ابتسمت بنعومه وحيا ونزلت راسها وتكلمت بصوت يضعف من نبرته خجلها / ان شاءالله

تكلم باستغراب وهو يبتسم / ليه مستحيه مهب بالعاده

رفعت راسها وحمره الخجل ملونه وجهها / بس كذا

ناظرها بشك وللحين الابتسامه مرسومه على وجهه / مانتي خاليه ......تكلمي

تكلمت وهي تلعب بيدينها / شاكه اني حامل

اعتدل بجلسته بسرعه وناظرها بسعاده / جد والله ؟؟؟!!

- مادري ...... بس شاكه

قام من السرير ووقف وتكلم بسرعه ولهفه / قومي ......يالله بسرعه قبل لايتأخر الوقت

ناظرته بتعجب / وين ؟!!!

شغل اللمبه وتكلم / بنروح للمستشفى ونحلل

تكلمت بصدمه / لا وش مستشفى ....اقولك شاكه ماتأكدت ......جب لي تحليل حمل واشوف بالبيت بس

- لا لا بنحلل بالمستشفى ونتأكد ......يالله بسرعه .........واخذ جلابيه من على المعلاق ورماها على السرير

اخذت الجلابيه بيدها / وش اسوي فيها ؟!!!!

- صوري بجنبها .........وش بتسوين بها بالله ..........إلبسيها بنرووح..........بسرعه الله يرضى عليك

مسكت لبسها وابتسمت بوجهه بخبث وشقاوه / ليه وش فيه لبسي مو حلووو ؟!!

تكلم وهو يلبس ثوبه / جربي اطلعي فيه عشان احش رجولك

برطمت بزعل / اووووف تحش رجولي مره وحده

- اجل تبين تطلعين بهاللبس ......رجلينك ويدينك كلها طالعه

ابتسمت بشقاوه / عادي ابرد لي

ناظرها نظره كلها عصبيه وغيره ولا تكلم

قربت له وصارت تسكر ازارير ثوبه ........تكلمت بنبره ناعمه محبه / تغار علي ؟!!

مسك يدينها وضمهن لصدره وناظرها نظره كلها اصرار وحب ينبض منها / لو مااغار عليك من اجل اللي يستاهل الغيره

ابتسمت رغم العبره اللي سدت حلقها من هالمشاعر الصادقه اللي اجتاحتها وعصفت فيها .......باست خده بقرب فمه وريحت راسها على

صدره



* لغة الأجساد ربما تكون ابلغ واقوى لتوصيل المشاعر من لغة اللسان *







............................................................ ..............







][ ~ بيتــ الـــجـــد ~ ][






اقبل عليهم وهو شايل ابريق شاهي مسود من اثار دخان النار وابتسامه عريضه مزينه وجهه

ووراه بنته شايله بكل يد بيالتين شاهي بكل فخر وكأنها مسويه انجاز وشايله صينيه مليانه بيالات

انطلق صوته بإعجاب / وهذا الشاهي بالحليب على الحطب سبيشل من يدين الدكتور عناد بزات نفسو

تكلم جده بنبرة مداعبه / اقول ياعجيزي الظاهر ولدتس بيسدحنا انا وياتس اليوم بطواري الشميسي هههههههههههه

- افا عليك يبه وش شميسي الا مستشفى الـ............ بيسون لكم خصم عشاني .....لاتشيل هم انسدح براحه ههههههههههه

تكلمت الجده بنبرة خوف / اقول اها بس .....اقطع الحكي اللي مهوب زين لاتفاول علينا

غمز لها / حركاااات يمه تحبين الشايب اجل

- وش جاكم واحد عجيزي وواحد شايب .....كلنا شباب ...الشباب شباب القلب مهوب العمر

وانطلقت ضحكه منه ومن جده على جدته اللي للآن تتنرفز اذا احد قالها عجوز ولا قال لرجلها شايب


- اقول يمه عناد

- سمي يمه

- سم الله عدوك.......تعرف هتون....ماصلحو ويا اللي خاطبها ....وش قولك لو نخطبها لك

تكلم وهو يغالب ضحكته / لا يمه لاتستاثميين ببنات الناس عشاني ....اخاف اخطبها وتتبع مصير طيف ....ههههههههههههه

ضربته على رجله بخفه / استغفر ربك وش هالحكي ....هذا يومها اللي ربي كاتبه لها

- استغفر الله .....بس خلاااص شلت فكرة الزواج من بالي لأجل غير مسمى

ناظرته بقل حيله ونقلت بصرها للجد تبيه يساعدها وانه يقنعه معها

انطلق صوت الجد / لاتباحريني بعيونتس مهب قايل له شئ ......رجال وشوره براسه ....يعرف الاصلح له

ضربت فخذها بقهر / هوّ ....شوفو الرجال .....ابيك عون صرت فرعون......بدال ماتعقله وتشور عليه الشور الزين تعصيه زود

- وش بتس يامره........نفسه لو بغت الزواج تزوج ......هذاه تزوج من قبل دون شورنا يوم بغى الزواج

لاتغصبين عليه ......متى مابغى العرس بيجي لين عندتس ويقولتس دوريلي مره


ميلت فمها بعدم اعجاب ولفت وجهها عنه وانطلقت ضحكه قويه من الجد / ههههههههههه وش بتس تحلطمين يالجازي الثانيه .......

كنها الجازي لاتحلطمت سبحان الله

تكلمت الجده بنبرة حنين وحب / ياحبني لها هالبنت.....انقطعت عنا من اول مابدت تتشرى لعرسها ....الله يوفقها

تكلم الجد موافق لها / ايه والله تنفقد هالبنيه .....اول العمال مايجون للمزرعه الجمعه عشانها ....الحين كل شئ تغير

الـــلــــه ياذيك الايام قلنا كبرو العيال وانشغلو بهالدنيا وجو عيال العيال وذقنا برهم وصارت كل جمعه تمرِح عندنا وكل يومين وهي جايه لنا

تونسنا

والحين كبرو عيال العيال وعسى الله يمدنا بالعمر ونشوف عيالهم ......الله لايقطعنا وصلهم

تكلمت الجده وهي تمسح بشيلتها دمعه حزن تمردت من عينها وسرت على خدها الطاهر / اميييييين .....ولا نذوق حزنهم .......

يكفي ياضاحي عيالي اللي اخذهم الموت

مسح على ظهر جدته رحمه لحالها ومواساة لها........توقع ان هالسنين نستها حزنها على عيالها اللي ماتو ......

توقع ان هالسنين نشّفت دموع الحزن من عينها

لكنه كان غلطان...........عمر قلب الأم ماينسى ظناهـ لو طالت سنين فقدها له

يمكن تسلى وتتناسى لكن من اول مايجي طاريهم يتجدد حزنها وكن جرحها للحين ندي


قرب منها وسرّها باذنها بكلام يبيها تطلع من حزنها / يمه تذكرين محمد اللي قلتلك سالفته ......عزمته على العشاء عندنا

شكله اشتاق لريحتك يالغاليه ههههههههه

دفته عنها بيدينها الضعيفه وتكلمت وعلامات الخجل واضحه على وجهها / اقول استح وابعد عني ياقليل الادب

تكلم الجد بنبرة شك / وش عندكم تساررون من دوني

- ابد يايبه .....فيه خاطب جاي لها واشاورها ..............هاه يمه تبينه ولا نقوله ماعندنا بنات للزواج ؟

مسك الجد البياله ورماها عليه وانتثر الحليب على ثوبه / اقول قم قـــم لا بارك الله فيك من رجال .......اثرك تخرب المره علي

قام من مكانه وهو ماسك ثوبه ولايقدر يتكلم من الضحكه اللي فيه / ههههههههههه الله يخليكم لبعض ولايحرمني منكم ياعصافير الحب قولو

امين ههههههههه



* اذا كان الحب صادق وقوي لاتغيره طول السنين ولا تضعف من قوته ......بالعكس تزيده قوه وتماسك وكل يوم او سنه تمر عليهم تقوي منه

اكثر واكثر وكل حادثه او مصيبه يمرون فيها سوى تقربهم من بعض *





............................................................ .......





][ ~ بيتــ أهـلـ الجاآازيــ ~ ][





مجتمعين بالغرفه واصوات ضحكهم وسوالفهم ماليه المكان ومتعديه الجدران ومزعجه اهل البيت

الشبسات بكل انواعها متوسطه الجلسه وكيسان الببسي والشاهي بقرب كل وحده فيهم

والصحون اللي جايبينها لقشر الحب والمكسرات فاضيه والقشر منتثر حولهم وكنهم اطفال

وحده منسدحه على رجلين الثانيه وتسولف ووحده تجدل شعر الثانيه بعبث طفولي


دخلت عليهم وهي شايله كاميرا الفيديو وتتكلم بصوت عالي عشان تغطي على ازعاجهم ويسمعونها / مدام الجازي ماهو شعورك وانت

متوسطه حفلة توديع العزوبيه المقامه على شرفك

تكلمت وهي ماده يدينها بقرف / والله شعوري شعور اي عروس سعوديه غاصبينها اهلها تتنقش لزواجها وهي تكره الحنا وشخاميطه على

يدينها .................ووووووووع متى ينشف ماصارت لو انه اسمنت كان نشف

- هههههههههههه والله مو عشان اهلك لاتظلمينهم.......عشان ناس وناس يحبون النقش

طاحت على اللي بجنبها بحركه مسرحيه / يااااوووويـــل حالي ......تكفين مهره لاتجيبين طاريه اذوب ترى

وصرخه جماعيه منهم افزعتها / لاااااا .......قومي لاتخربين نقشك

اعتدلت بجلستها وتكلمت بفزع وخوف / بسم الله كل ذا عشان النقش لايخرب .......بغيتو توقفون قلبي



- يالله عميمه وش شعورك وانتي اخر عيال ابو محسن واللي بيسوي لك زواج ماينسونه الناس على قولته

وبدت اصوات البنات تعلى وكلماتهم التشجيعه لها وهبالهم

- يالله الجازي تكلمي

- قولي اي شئ

- الظاهر من الحيا ماتتكلم هههههههه

- عطو الحر فرصه ....خلوها تتذكر شوي

- تحسب نفسها انجلينا جولي بلقاء صحفي .....كلها بنت اخوك هتون الهبله شايله كاميرا جيفسي مصديه من سنة نوح ههههههههه

ناظرتها بحقران مازح / اخت شمس بما انك اكبر مني اتورع عن الرد على امثالك وحركت قصتها بغرور

- ههههههه اخوووووص هتون ياقويه

- لاداعي لاداعي اعرف قدراتي ههههههههه



تنقّل بصرها بينهم بازعاجهم وحركاتهم واستهبالهم وكلماتهم وتصرفاتهم العفويه بدون قيود ولا تكلف وكنهم خوات

كلهم يجمعهم الحب والقرابه ........كلهم مجتمعين اليوم عشانها

كلهم اصرو انهم يكونون معها بليلة زواجها ........ويسون لها حفلة توديع العزوبيه على قولتهم

عارفه بمشاكل هذي وذيك واحزانهم والآمهم اللي ماليه قلوبهم لكنهم مع كل هذا جو لها ووقفو معها بوقت فرحها وقفه طول عمرها ماراح

تنساها لهم


ماتنكر المشاعر اللي اجتاحتها.....مشاعر غريبه اول مره تحس فيها وتتمنى انها ماتحس فيها طول عمرها

تحس بشوووووق غريب لهم وهم قربها .......تحس ان وجييهم بتوحشها وانها بتنسى ملامحهم

يمكن عيبها انها ماتبين مشاعرها ......بس تعرف ان بقلبها ثورة مشاعر غريبه لو تظهرها لهم بتغمرهم حب وشوق غريب

بتفقدهم وبتشتاق لهم ولا راح تنسى هالساعات اللي قضتها معهم اليوم

ارتفع صوتها تطلب هدوئهم / بـــنـــااااااااتــــ ......هدوووووووء بقول كلمتي المنتظره


تكلمت بسرعه /بنات وين الكاميرا بسرعه لاياخذها خجل العرايس وترجع بكلامها .........

اخذت الكاميرا وشغلتها ووجهتها لها / احم احم والآن مع كلمة كوين الجااااااااازي .........هيييييييييييييه .....اسمع احلى صفقه

صوبت نظرها على الكاميرا وبعدت عيونها عن وجه اي وحده فيهم وبدت تتكلم بنبرة غريبه عليهم كلهم

نبره تغالب الصياح......كلهم حسو بالعبره الواقفه بحلقها وكلهم شافو نفضة يدينها / امممم ......مادري وش اقول ولا منين ابدى

لو بتكلم عن شعوري ماظن ان هالفيلم اللي بالكاميرا بيكفيه

شعوري شعور وحده عاشت مع اهلها 25 سنه........عاشت بافراحها واحزانها معهم

وبين يوم وليلة بتطلع من بينهم وتروح لبيت ثاني

يمكن اكون فاشله بصف الكلمات ولا اعرف اعبر عن شعوري بالكلمات المناسبه

ويمكن يكون كلامي مو منسق ولا له دخل ببعض

لكن اللي متأكده منه .....ان كل وحده بهالغرفه وبهالبيت الكبير

لها حب بقلبي مايعلم بقدره الا ربي

كل وحده فيكم لها ذكريات معي ومواقف عمري كله ماراح انساها

كل وحده فيكم كنت معها بوقت فرحها وحزنها ......كلكم كنتم تحسسوني بحبكم لي وحاجتكم لي

لكن ماعمري حسست احد بحبي له وبحاجتي له ....

لكن وربي اني احبكم .....احــبـــكـــم

ومحتاجه لوجودكم قربي لو ماتكلمت وقوتي اللي تشوفون استمدها منكم وماتسوى شئ بدونكم

وكملت وهي تضحك والدموع غصب عنها تنزل على خدها / وفيه شئ غريب .......مشتاقه لكم وانا بينكم واسولف معكم

هالغرفه شاهده على صياحي ....ياما صحت فيها ....

صحت خوف من فقدكم وخوف اني انسى ملامحكم مع اني موقنه ان ملامحكم محفوره بداخل قلبي ولو وش ماكان ماراح انساها ......وكملت

بمزح /الا كان فقدت الذاكر

وبـــسسس هذا شعوري .....اتمنى اني ماكون طولت على الجمهور ومللتهم

تكلمت والدموع على خدها من ورى عدسة الكاميرا / لا عميمه ماملينا


فتحت يدينها لها / تعالي يالصيوحه بس ......تعالي

وراحت وارتمت بحضن عمتها






............................................................ .......








][ ~ بيتــ الـــجـــد ~ ][





اصوات صراخهم مالي المكان يقطعه صوت ارتطام اجسامهم مع موية المسبح القوي

هذا جالس على طرف المسبح ومنزل رجوله بالمويه ويسولف معهم بروقان ...........وهذا يتفنن بالقمزات ويحس بمتعه واثاره


الا هو معتصم بزاويه بعيد عن المسبح ويناظر الثاني بخوف وتهديد وهو يقرب منه / ياويلك خالد لو تقرب مني قسم مهب احسلك

تكلم بصراخ / ذيـــاااب تعال اسحب عزوز معي

رد الثاني / جايك جايك بس لايفلت منك

تكلم بضحكه / هههههههههه لاتخاف مهب فالت ......جايته ام الركب وين ينحاش معه

قربو منه ومسكوه وجروه وهو يرمي جسمه على الارض بكل قوه عشان يصير ثقيل عليهم ولا يقدرون يجرونه

لكنهم يفوقونه جسم وقوه وكل محاولاته مامنعتهم

تكلم وهو يضحك / بالله وين قوتك ........وشلون حاطينك حارس امن ههههههههه

تكلم الثاني وهو يضحك / ههههههههه تشوف انت ؟!!!.......حتى بهالشغلات فيه وسايط الظاهر

وانطلقت من ثلاثتهم ضحكه

رموه واخيراً بالمسبح وهم يضحكون ومستمتعين بشوفته وهو يقاوم المويه بكل قوته

طب له واحد منهم ومسكه وجره لين ماوصل للجزء المخصص للأطفال وتركه وهو يضحك / ههههههههههه حدك انت هنا .....يالله ورنا فنك

يافنان

تكلم وهو يلهث ويمسح وجهه بيدينه بقوه ويكح مويه ويالله يسحب النفس / قسم مانساها لك يالتيس

وانطلقت منه ضحكه ولا اهتم




يناظرهم وهو يضحك على هبالهم وتصرفاتهم ...بغوا يموتون الرجال ويضحكون

حط يده على كتفه / ماعليه لاتواخذهم على هبالهم .....خبرك مراهقين ههههههههههه

- بالعكس الله يحفظهم ماخذين الدنيا بيسر ...الله لايفرقكم

- اميييين .....

بس تشوف اللي غرقوه هذا ياطويل العمر اسمه عبدالعزيز ونطلق عليه عزوز اختصار لأسمه وهم جيران لأهلي من زمان ....تقريباً رابين

سوى عشان كذا تشوفنا عادي مع بعض كننا اخوان

وبإذن الله تكون معنا مثله

وهذي عايلتي المتواضعه قدامك....... بقى ولد عمي للحين ماجا اذا جا عرفتك عليه

- يحصلنا الشرف والله

جا واحد وجلس بجبنه بخفه وتكلم بابتسامه / هاه محمد عجبك الجو ولا هالاجواء ماتعجب الملتزمين ؟؟

رد عليه بابتسامه مشرقه / ليه ماتعجب الملتزمين..؟!!!

مافيه منكر ولا شئ يغضب الله.........اصحاب واحباب من خيرة الناس مجتمعين مع بعض ....ليه ماتعجبني ؟

حك راسه باحراج وابتسم / افحمنا المطوع هههههههه

- ليتك بالع لسانك اجل

- ليتني والله هههههههههههه





انتقلو للمجلس بعد ماقضو وقت لاباس فيه بالمسبح وتحلقو حول الشاهي وصحون المعجنات والمكسرات واقبلو على اكلها بكل جوع ونهم بعد

السباحه اللي جوعتهم وعطشتهم



دخل عليهم وسلم بصوت عالي وكلهم ردو السلام وقامو يسلمون عليه

قرب لمحمد وتكلم بصوت واطي / هذا ولد عمي ناصر اللي اقولك

قام يسلم عليه و هو يناظره بشك ودقق النظر فيه ..........تكلم بينه وبين نفسه [معقوله يكون اخوه او يقرب له .......نفس الشبه ونفس الدم

..........لا لا ماتوقع ]

سلم وجلس ورجعو لسوالفهم وجلستهم مثل ماكانت

وسالفه تجر سالفه لحد ماجو لأسماء العوائل والأصول

تكلم خالد وهو يمزح معه / اقولك لاتغتر علينا مهب عشان مكتوب ببطاقتك الــ........... تشوف نفسك علينا

كلنا جايبتنا بطن وحده

تكلم بغرور مازح / اللي مايطول العنب ياولد عمي .....وحرك يده قدام وجهه كنه يرجع قصته لورى بغرور

- لايطيح نصك بس

- شكلي عشت الدور صح هههههههههه

- ههههههههه توك تدري

سأل عناد واللي كان جنبه بتوجس / الحين ماتقول هذا ولد عمكم وشلون اسمكم غير عنه؟!!

- سالفه طويله ........لكن المهم انهم عيال عم جدي وجدهم مسمي عايلته على اصلهم وحنا غير .....موقفين اسمنا على اسم عايلتنا وحاذفين

اسم اصلنا ..........فهمت؟؟؟

تكلم وآثار الصدمه عليه / ايه فهمت....فهمت

تكلم يطمن نفسه [ان شاءالله مايقرب له بس يكون تشابه اسماء.......بس يشببه بشكل كبير وكنهم اخوان مع انه اجمل منه]

ارتفع صوته يكلم ناصر / ناصر تذكرني بواحد كان معنا ايام الجامعه ....فيك منه كثير ومن نفس عايلتكم

تكلم بتساؤل / وش اسمه يمكن اني اعرفه؟

- اسمه يوسف بقسم ادارة اعمال

نزل راسه بألم ........الحزن على موت اخوه للحين طري / هذا اخوي يوسف......الله يرحمه

ردد وراه الكلمه باستغراب وبلاهه وعدم تصديق / الله يرحمه ؟!!!

- ايه توفى قبل كم شهر.....جاه حادث وجلس كذا شهر بالمستشفى وتوفى ......الله يرحمه

وارتفعت اصوات اللي بالمجلس بالدعاء له بالرحمه والمغفره

عيونه مصوبه على اللي قدامه بصدمه [ مات .....مات

وين كنت عنه......وش سويت له.....صداقتي مانفعته.......كل اللي اعرفه اني انحشت وخليته غارق بضياعه ومعاصيه

نصحته كم مره ومليت من نصحه .........خفت على نفسي وانحشت

لكن ان شاءالله انه تاب .......ان شاءالله يكون صحح غلطته قبل موته

صح ...يمكن ليه لا.........مهما يكون هذي عرضه من لحمه ودمه ......اكيد كبر وعقل وصحح غلطته ]

مايقدر يجلس بينهم اكثر ..........الصدمه للحين ماثره عليه

ويحس بوجود روح يوسف معهم وتأنبه على تهربه منه وتركه غارق بلجة معاصيه

فز من مكانه بسرعه وصوت يوسف المعاتب يخترق اذانه بكل قوه وصورته تتمثل قدام وجهه بتعابيرها الغاضبه والمؤنبه له


له قدره وحد وبعدها تنفذ كل قوته على التحمل

ارتفع صوته مودع / اكرمكم الله ......اسمحولي باستأذن

ارتفعت اصواتهم تثنيه عن عزمه

- وين يارجال تو الناس

- اجلس تعشى معنا

- توني جاي مابعد اخذنا العلوم

-وين تو الناس من العصر وانا هنا .......مره ثانيه ان شاءالله والعشاء علي

تكلم ممازح له / اذا حضرت الشيطاين ذهبت الملائكه ناصر.........صح محمد ؟!

- لا مهب صح ........الا مازانت الجلسه الا يوم جا

- ههههههههه معليه تحمل الفشيله ولقط وجهك


تكلم مقاطع مزح العيال / اجلس بس اجلس تو ماحلوت الجلسه

- والله ودي اجلس .....الجلسه معكم ماتنمل .........بس خبرك امام ووراي اذان وصلاة فجر ولا كان جلست

مخلي المؤذن يأذن ويصلي بدالي اليوم عشان اجيكم

- مدام كذا مره ثانيه اجل

- ان شاءالله...........يالله استودعكم الله جميعاً







............................................................ .







][ ~ بيتــ أهـلـ الجاآازيــ ~ ][






دق الجوال وانخفضت اصواتهم بشكل تلقائي ......ناظرت شاشة جوالها وتلون وجهها بحمرة الخجل بسرعه

ارتفعت اصوات البنات بتعليقات زادت من خجلها يوم عرفوا من المتصل عليها


- مايقدر يصبر على فراقك داق عليك هالوقت.....هاه ؟؟

- بكرى زواجك وش يبي داق ماعنده صبر

- اخوووص اخوووص يالعروس السهره صباحي اليوم انتي وياه

- ياحليلها صارت طماطه مايسوى عليها حيا ........قومي قومي كلميه هناك لاتذوبين علينا


فزت من مكانها وطلعت برى الغرفه وهي يالله تسحب النفس من احراجها وخجلها

ضغطت السماعه الخضرى وردت عليه بصوت يضعف من نبرة الإحراج والحيا / هلا

- هلا ياقلبي ........وكمل بنبرة قلق /وش فيك......صوتك متغير ؟؟

- لا مافيني شئ بس راقيه الدرج

- اهاا .........كل هذا من اللهفه علي يعني ؟

سكتت ماتدري وش تقول .....من قرب زواجهم وهي راجعه مثل اول بخجلها اللي يمنعها تشاركه مشاعره او تعبر عن مشاعرها بحريه

- هههههههه خلاص هونا منتي متلهفه ...........اها واخبار وعلوم وش مسويه اليوم؟

تكلمت بتشويق طفولي / مسويه اشيااااااء اليوم

ابتسم على طريقتها وتكلم / يالله عطينا علومك اجل

- لا مايصلح

- افااا....ليه؟!!

- عشان بعدين اللقى سالفه اسولف معك فيها

تكلم بنبره هاديه ذات مغزى / ماعليك انا بطلع السوالف اللي يــحـــبــهــااا قلبك ...بس انتي تعالي عندي .....قسم لأنسيك اهلك

سكتت ماردت عليه مايسمع الا صوت تنفسها اللي اضطرب

تكلم وهو مبتسم / خلااااص ماعاد متكلم بهالامور......هه سكتنا

للآن ساكته .....عارف ان حياها يمنعها بس هو مشتاق لها ويبي يسمع صوتها / الجازي .......ردي ...ولا بسكر ترى

ردت بسرعه / لااا

تكلم بابتسامه يحاول يخفيها عشان لاتدري انه مبتسم / وشو اللي لا ؟

- لاتسكر

- من اول وانا اترجاك انك تتكلمين وانتي ساكته وش اسوي اتكلم مع نفسي يعني !!!

- لاخلاص بتكلم .....بس لاتتكلم مثل تو

- ليه وش قلت تو

- اللي قلته

- ماقلت شئ شين......سامعتني قايل شئ بطّال لاسمح الله

تكلمت بعصبيه / لاتلمح لشئ يعني

- ههههههههه طيب

اها .....وين وصلنا

- ماوصلنا لشئ

- وش فيك اليوم مانتي طبيعيه ؟؟!!

كنك تبيني اسكر ولا انا غلطان

- لاااا والـــلـــه

بس البنات مجتمعين عندي ومسوين لي حفلة توديع العزوبيه ومنحرجه منهم مووووت

- ههههههههههههه وشو ؟؟؟

حفلة توديع ؟؟ ههههههههههههههههههههه

اول مره اسمعها بالسعوديه ههههههههههههههههه

ضحكه نرفزها وردت بعصبيه وهي حاطه يدها على خصرها وكنها يشوفها / ليه ماحنا قد المقام سيد طلال يتسوى لنا حفلة يعني ؟!!

- هيه لاتفسرين على كيفك الكلام

انا اول مره اسمع ان احد مسوي هالحفله بالسعوديه وبالرياض تحديداً بـــس

- اجل غير معلوماتك المنتهيه صلاحيتها ......كل الناس يسونها الحين

- تطورتو من وراي

- اصلا ماكنت فاضي لنا عيونك مبققه على الحمر والشقر برى وين تدري باخبارنا

- يؤؤ ....اللي يشوفني من بنت لبنت.........كم مره اقولك مالي بهالســـواااااالف ....ماتفهمين؟!!

- الا افهم

سكتت وكملت بعد فتره بنبره هاديه ونادمه ومعاتبه / طيب لاتعصبني ...تخليني اقول كلام مابي اقوله

- تدللي واطلبي كم الجازي عندي انا ..........وكمل كلامه بنبره هاديه لذيذه /وحده والله ينولني قربها .....آآآهـ بـسس

- خــيــررر

- هههههههههه وش فيك ؟؟

- انت عارف

- طيب بنسكت خلااااص

- مو مفروض ماتكلمني اليوم عشان نشتاق لبعض بكرى

- وش حيلة المشتاق لك وهو يسمع صوتك الحين ؟!!

حطت يدها على خدها المحمر من الخجل وتنهدت تنهيده عاشق ذايب بحب معشوقه

والمكالمه اللي كانت بتنهيها بدقايق عشان يشتاقون لبعض بزعمها امتدت لساعات بدون مايحسون بأنفسهم ......

عايشين بجو من الرومانسيه ومتناسين الوقت وكأنهم حبيبين تلاقو بعد طول غيبه





............................................................ .....





وصلتها حرارة الشمس وكدرت نومتها ........ قلبت جسدها المستقر على لحاف مصفط للجهه الثانيه لكن مافيه فايده حرارة الشمس كل مالها

وتزيد

فتحت عيونها ورجعت سكرتهم بسرعه من اشعة الشمس اللي اخترقتها ......رفعت كفها قدام عيونها تحجب اشعتها عنها

اعتدلت بجلستها وتثاوبت ورفعت يدينها وحركتهم يمين ويسار وبين كل حركه والثانيه ينسمع صوت طقطقة عظامها / حشااا تكسر ظهري

من نومة الأرض

عدلت شعرها ورفعت الجوال بتشوف كم الساعه.......صدمها الوقت..... الساعه تسع الصبح !!!!

واللي صدمها اكثر عدد المكالمات والرسايل !!

وهي نايمه بالسطح ولا احد يدري عنها اكيد البيت مقلوب فوق تحت عليها

ماتوقعت انها تنام ......صدق يوم تسكر منه كانت الساعه خمس ......بس ماتوقعت ان النوم يغلبها وتنام بالسطح على هالمفرش اللي كسر

ظهرها ......ضربت خدها بخوف / ياويلك يالجازي وش هببتي ؟؟!!


فزت من مكانها بسرعه ونزلت وهي تركض من الدرج



مامداها تخطي الدرج الأول وتوصل لإستراحةالسطح الأولى

الا ألم يجتاحها ويشل حركتها ........انزلق الجوال من يدها من دون شعور منها وانتثرت قطعه على رخام الدرج


انهارت على الدرج وهي مو حاسه باللي حولها من الألم اللي يقطعها تقطيع


تبي تاخذ نفس ......ماقدرت

تبي تنادي احد يجي يساعدها.......صوتها مارضى يطلع من فمها

تبي تتحرك وتنزل لدرج الدور الثاني لعل احد يشوفها.........لكن الألم اللي حل عليها فجأه سلبها كل قوتها

عيونها مره يظهر سواد بؤبؤتها ومره يختفي ويحل مكانه البياض بشكل مخيف

ووجهها اللي كان مشرق وتعلوه حمرة ونعومة العرايس انقلب للون الأسود من الوجع

حتى ونة الألم ماقدرت تطلعها لإن الألم اللي فيها اكبر من كلمه تخففه عنها


تكلمت رغم الوجع اللي تحس فيه ........برغم الألم اللي كتم نفسها / يـــــآآآربــ

لإنها موقنه انه هو وحده العالم بحالها والقادر على اغاثتها

لإنها تعلم انه رؤوف بعبادة ورحيم بحالهم ولا يوجد احد قريب منها بوقت شدتها سواهـ


معقوله بيكون مصيرها مثل ماتسمع بهالقصص .......معقوله تموت بيوم زواجها

يمكن تأجيل زواجها كم مره كان حكمه من الله لإنه عارف ان يومها قرب

او يمكن مايبيها تلتهي بحياتها الجديده عن طاعته اذا تزوجت وايامها معدوده

يمكن ويمكن ......مليون سبب حطته قدام عيونها


كل اللي متأكده منه أنها ماتقدر تاخذ نفسها.........وتحس كأن شئ انتزع منها بكل قوه




بعدهــآا....~ }



طاح راسها بهدوء على الدرج واظتجع يمينها الدرج بسلاااااام














& تمنايتي لكم بقراءة ممتعه ومشوقه &




& أخوكم / هاجس ليل &






............................................................ ..............

هاااااااجس
ووقفت عند نقطه مرره حساسه


يوووه لايكووون صار بالجازي شئ انا خايفه انها تكوون حامل الله يستر بس


ربي يقومها بالسلامه



اخووي هاجس ليل
عليك اسلوب في السرد مشاااء الله علي




يعطيك الف عاااافيه اخووي
وننتظر البارت الجاي بفارغ الصبر

صبااااااااااح الخير اخوي وكل عاام وانت بخير

انا كنت متابعه من خلف الكواليس للروايه

بس جزء اليوم شدني كثير وقلت لازم نرد ونشكرك

شمس لاتخافي الفرج قريب محمد اكيد ماراح يسكت وراح يعلم نااصر على حقيقه يوسف

مزون ومتعب وما مصيرهم مع بعض


اما الجاازي لايصير فيها شي تعرف حنا البنات نتاثر بالروايه فاياليت مايصير عليها شي او تحمل ويعرفون اهلها وتروح فيها وبعدين نفسيتنا تتاثر ولا نقدر نذاكر زين للاختبارات >> كل هالسالفه الطيله علشان الجازي مايصير لها شي


ومره ثانيه الف شكر لك

وبانتظا الجزء القادم

بسم الله الرحمن الرحيم..
السلام عليكم ورحمة الله وبركاته ..



أنا على قولهم اقرى بصمت يعني من ورى الكيبورد واللحين لا بالله ويش اللي يخليني اصمت ؟!!

بتكلم عن القصه بشكل عام هي تمثل جزء من مجتمعنا ...

الجازي / والله البنت هذي في بدايةالقصه جآزت لي يا حليلها عاجبني خبالها بس في البارت الأخير أنا اقول انها حامل وبيطيح الجنين وفيه توقع ثاني بس بكتفي بهذا ..طلال / انا من البدايه ارتحت له بس اللحين احس اني مانيب مرتاح له احسه لعوب ولا وش حاده يسوي ذالسواه اللي ما تتسمى ..

ضاري & العنود / الله يوفقك ان شاء الله وانا اتوقع ان العنود بتضيع علومهامنك ولاهي قادرة تنتقم وخصوصا انك سويت حركه بالمطار حـلــوه تعجبها ككك ^_*
متعب / يا اخي انت على ايش رافع خشمك ؟؟ ودي اقوم واكفخك على كلامك السخيف مع مزون وحركتك اللي كنها وجهك لا تحسبنها رجوله لا ياشيخ هذه ضفاااعه وكماااخه يا دلخ ...

مزون / الله يعينك ان شاء الله ويصبرك واحمد اللي رجع لك صوتك جعله ما ينقطع ...

ناصر وشمس / الله بيفرجها عليكم ان شاء الله وخصوصا ان المطوع الشيخ / محمد عارف عن سوالف يوسف وان شاء الله يتدخل ويقول شي يـأرب ...
عناد / انا حاس ان اخوي هاجس ليل بيلف ويدور واخرتها بيزوج الجازي ويارب يكون احساسي صح لأنك اذا اخذت الجازي بتطلعون فلللله ...


الجد والجده / الله يحفظكم من كل شر ان شاء الله ومال للبيوت العامره حس اذا خلت منكم جعلكم الخير وطالة العمر ..

............................................................ ..

انا خلصت تعليقي على الشخصيات الهامه بنظري وعند تعليق على كلام قاله عبدالرحمن وهو يكلم عناد عن الشباب لما يقرون قصص وانا بما اني واحد منهم صراحه اقراها بخشاشه على قولتهم والله لو احد يشوفني من الشباب بينقد علي مع انهم اغلبيتهم يقروون وابصم بالفناقر العشره كككك ، ولا واللي زود الطين بله الشيبان جعلهم الزين يقولن ان القصص ماي زينه وهم ما يقولون سالفه وحده الا وفيها مره يحبها رجال ويغدر في مدري من ولا بنظرهم عادي ...



>> تختلف الافعال باختلاف الازمان ، الله يعيننا على ذالزمن " صعب" <<

آآسف على الإطاله بش شسوي برتوي عقب الظما ..
اخوكم // تسآهيل

يعطيك الف عافيه

وقفت عند مقطع قوي او قفله قويه

الجازي بعيد كل البعد اشك انها حامل مرت شهور على طلعتها

مع طلال ولو ماتت القصه احسس موقف قوووي شوي

بس اتوقع تفقد الذاكره وهذا الي راح يصير

ويمكن تتودد لعناد << تخيلات على الطاير

ننتظرك بفارغ الصبر

جـ،ـ,ـودي