السلام عليكم ورحمة الله وبركاته

صباح الخير محمل باطاعات والخيرات

اعذروني على تأخري بس شي مو بيدي ....النت فيه مشاكل عندي ولا صلح الا اليوم الظهر ....عشان كذا تأخرت بتنزيل البارت الجديد

ولا انا كنت كاتبه على اساس انزله الخميس او الجمعه

حتى بتشوفونه قصير مو مثل بارتاتي بالعاده .....بس كتبة ربي





&&&&&&&&&&&&&&&&&&&&&&&&&&&&&&


الــــــــــجـــــــــزء الـــــحـــــادي عـــــشـــــر

&&&&&&&&&&&&&&&&&&&&&&&&&&&&&&






(( نــحــو مــصــيــر مــجــهـوـولـ ))





اذا كَاِنْ الَعمِر َالَجمَيلِ قَدِ رَحلِ ~ فَمِن يَدِريَ رَبمِا ينَتظِركَ عِمرَ اَجمَل ~!!

سَبحَانْ الله وبًحمًدهً ~ سًبَحاَن الله العَظًيَم


سَبحَانْ الله وًبحَمدهً عدَد ًخلِقهً ورًضاَ نَفسًه َوزَنةً عَرشًه وَمدًاد كَلماتهً











نغمة الجوال صدحت بالغرفه بكل ازعاج

اخترقت سكون الليل بكل قوه .......افزعتها وقومتها من نومها

اعتدلت بجلستها على السرير وشافت الجوال فوق الدولاب بأول الغرفه ونوره يسطع بالسقف ....ناظرت المسافه بين السرير والدولاب......مسافه بعيده والنوم سالبها قوتها ومافيها حيل تمشي له وتاخذه

انسدحت واستسلمت لنوم من جديد

رجع الجوال يدق بكل إصرار

مره تنقلب على جنبها الايمن ومره الايسر .......

مفرش السرير احتاس تحتها من كثر حركتها.....

دست راسها تحت المخده ...... تبي ازعاج الجوال يختفي......لكن مافيه فايده الجوال مستمر بإزعاجه

تكلمت بعصبيه / اســـكـــت للحين مافضى شحنك ؟!!

دفت الغطا عنها برجلينها بنفاذ صبر وعصبيه وتأففت بكل غضب / اوووووف مو حاله ذي

قامت من السرير واخذت جوالها وشافت اسمه يضوي بالشاشه

تنهدت بعمق وألم......للآن متألمه منه ومن تصرفه......للآن عاتبه عليه

مجروحه منه ولا تقدر تنسى وتسامح بسرعه......

مر كم يوم على اللي صار ومن ذاك اليوم وهو يدق باليوم اكثر من عشر مرات ويرسل لها عدد مايحصى من الرسايل

ماتبي ترد عليه......او بمعني اصح ماعندها كلام تقوله له يستحق انها ترد عليه.......او تخاف تخونها قوتهاولا تقوله الكلام اللي يشفي آلمها وتضغف قدامه

شافت ان الهروب من مشكلتها ماهو حل ...... لازم تواجهه وتكلمه

ردت على إتصاله وإللتزمت بالسكوت.

وارتفع صوته / آلو الجازي......انتي على الخط........الجازي؟؟!!

ردت بصوت واطي بعد مده / اسمعك

سمعت صوت تنهيدة راحه منه / مابغيتي تردين يابنت الحلال

ماتدري وش تقول وفضلت الإستمرار بصمتها

- مهب حل انك ماتردين على إتصالاتي .........مادري وش قصدك من هالحركه هل هو زعل او عقاب أو خوف؟؟

تكلمت بحيره واضحه بصوتها / مادري ....لاتسألني

تحولت نبرته العاتبه لنبره نادمه محبه/ واللي خلقني يالجازي ان ماكان بنيتي هالشئ ابدااااً ولا خطر ببالي انه بيكون قبل زواجنا

مادري وش جاني ......بلحظه صار اللي صار

آســـف .......وربي آســـف .....لو أن الأسف مايفيد ولا له قيمه بس آسف


ساكته وهو يتكلم......مصغيه لكلامه .........حست بشئ من السعاده وهي تسمع اسفه ونبرة الندم اللي بصوته

يمكن لو كان واحد ثاني كان مااعتذر ولا ندم.....بيقول حقي وانتي حلالي وبيشوف تصرفها وتطنيشها لمكالماته اهانه له وبيشوف انه من حقه بهالموقف انه هو اللي يزعل مو هي

لكنه بالعكس يشوف ان كل اللي سوته له من حقها وردة فعل طبيعيه منها

وصلها صوته وطلعها من سرحانها / كلمت اليوم ابوك ومحسن وطلبت منهم تعجيل الزواج ووعدوني خير.....بيخلونه بعد زواج ذياب بأسبوع .....يناسبك هالموعد ولا لا ؟؟

تكلمت بسرعه وبنبره يغلفها الخوف / قلت لهم ؟؟!!

- لااا ....مهبول انا يوم اقولهم ....مع ان ودي اقول لأحد من اهلك...... الدنيا ماتنضمن

ردت بنبره معاتبه محبه وناعمه / محشوم

ابتسم بمحبه .....صوتها كان ومازال يبعث السعاده بروحه......يذيب قلبه ويخليه أسير لكلماته / تدرين اني اشتقت لك.....لي كم يوم ماسمعت صوتك.....وش تتوقعين حياتي من دون سماع صوتك؟!!

وبلا احساس منها انصبغت خدودها بحمرة الخجل.....وضربات قلبها وضحت بصوت مسموع خافت انها توصل لمسامعه

نزلت راسها بحيا وكأنه حاضر قدامها ويتغزل فيها / حتى انا اشتقت لك



لوقع كلمات الحبيب تأثير خاص على الروح والقلب.....تحس بروح غير روحك وقلب غير قلبك

احاسيس غريبه تعتريك بتلك اللحظه.....ربما لو انفردت بنفسك تستغرب هذه الاحاسيس وتستنكر أي فعل قمت به بتلك اللحظات

لكنك واقع تحت تأثير مخدر الحب......فأي إنفعالات وأي غضب وأي عتاب يذهب ادراج الرياح فور سماعنا لكلمة اعتذار أو كلمه معسوله من شفتي الحبيب


*اتعلمون !!

دوماً ماأتمنى أن لاأقع أسيراً للحب....اريد العيش بحريه وبسلام .....بلا قيود أو عذاب أو حتى لذة وسكر تنسيني نفسي ومعتقداتي بلحظه تحت وطأته *




............................................................ .......................................







ماسك ملف المريض ويقرى مؤشراته الحيويه بكل تركيز

تكلم بإبستامه / ماشاءالله يابو عبدالله قلبك عال العال ....استعاد وضعه مثل يوم انه شباب......بس بنخليك كم يوم عندنا لحد مانتطمن ان الأوضاع تمام ولا فيه مخاطر وبعدها بنرجعك لبيتك وعيالك مثل اول واحسن

ابتسم الشايب بوجهه بشكر وامتنان / مشكوور ماقصرت دكتور مادري لولاك وش كان بيصير

- الشكر والمنه لله وحده.....اعطاني وقادر انه ياخذ

- احمده واشكر فضله علي ن

- سبحانه

وصله صوت من وراه وقطع عليه محادثته مع الشايب / دكتور عناد مكالمه لك يقولون انهم اهلك

تكلم باستغراب / اهلي؟؟!!!

دخل يده بجيب الباطالو وطلع جواله ومالقى مكالمات

اللتفت له / متأكد انهم اهلي مب مراجع عادي

- والله يقولون اهلك ويقولون يبونك ضروري وكم مره تدق علينا

- تدق!!!.......حرمه يعني

جاوبه بالموافقه

ترك ملف المريض واستأذن وطلع برى الغرفه يمشي بسرعه اقرب ماتكون لركض والخوف متملكه

تخيل ان جدته فيها شئ أو بنته او جده ......ابشع الصور لهم ترائت قدام عينه .....استغفر ربه بسره ولسانه مانقطع عن قول / يارب سترك

وصل لمكتبه وهو يلهث والتقطت سماعة التلفون بخوف كبير للخبر اللي بيوصله / آالـ ــو

- عناد

رد بخوف وترقب / ايه

- انا طيف

- أي طيف؟!!!

- طيف اللي خطبتها

اتسعت عيونه على آخرهم ......صوتها الغاضب المستحقر له وجرأتها بأنها تكلمه .....امور كلها اثارت استغرابه

- أمري وش بغيتي ؟

- الخطبه تلغيها

- نـعـم؟؟!!

- اقول الخطبه أللغها.....

- اظن الخطبه للآن مب رسميه كان بلغتي اهلك رفضك بدال ماترجمين وجهك عند الناس وتترجينهم انهم يلغون الخبطه

تكلمت بغضب / انا مارجمت وجهي عند احد ولا ترجيت احد.... اهلي بيغصبوني عليك وانا مابـــيــــك ابي واحد ببالي ...ماتفهم انت ؟

- استغفر الله العظيم ....الكلام اللي عندك بلغيه اهلك.....مابيني وبينك كلام.....استري على نفسك واحفظي كرامة اهلك وسمعتهم وسكري السماعه يابنت الناس.....الله يستر عليك ......مع السلامه........

وسكر السماعه ...........

تنفس بعمق يضبط اعصابه اللي مسكها بكل قوته لاتنفلت ويهدئ غضبه اللي مايدري وشلون كبته ولا انفجر

حاوط راسه بيدينه وهو يستغفر / استغفر الله وش بيكون حال بناتنا بعدين .....يارب احفظ بنات المسلمين واستر عليهم ولا تشمت الأعداء بهم......

ابستم بمحبه......نفس دعوة جدته قالها بدون احساس منه وكأنه تعود على انه يقولها / الله لايحرمني منك
7
7
7
الموقف اللي انحط فيه صعب ......مايدري وش يقولهم .....هل يفك الخطبه او يستمر فيها وكل الطريقين المشي فيهم صعب

غمض عيونه.... يبي يرتب افكاره ويعرف اللي بصالحه واللي ضده وبينه وبين نفسه (المؤمن لايلدغ من جحر مرتين الأولى هبلت فيني وخدعتني مب ناقص حرمه من نفس طينتها .....ابي أم لبنتي وبنت لجدتي وزوجه احط فيها كل ثقتي وءأمنها على نفسي وبنتي وبيتي بتوكل على الله .....واذا دخلت علي بقول مارتحت لها واللي يصير يصير ....اللزم ماعلى الواحد مصلحة نفسه واللي يهمونه )





............................................................ ....................................






جالسه بينهم وماسكه راسها بيدينها ......تحسه بينفجر من ازعاجهم

لهم عشر دقايق وهم مو مستوعبين الخبر اللي قالته واللي اعتبروه قنبله ورمتها عليهم

ارتفع صوتها بعد شهقه منها / يوووووووه ماحجزتي كوافيره

تكلمت الثانيه مقاطعه لها / الـــلـــه ولا حجزتي مصوره

ردت عليها الاولى بصدمه بعد شهقه اقوى وضربت صدرها بيدها / الــــفـــســـتـــان ......ماخيطتي

لفو عليها كلهم / متى يمديك ؟!!!

ياحسرتنا

تكلمت بصرخه افزعتهم ثنتينهم ونفاذ صبر / خـــــــــلآآآآآص ......فجرتو راسي

وفزت من مكانها / زواج ماني حاطه .....بلبس قميصي اللي علي وبحط زواج سكيتي واروح لبيت رجلي بلا كوافيره بلا مصوره بلا فستان بلا هم ......ارتحتو الحين ؟؟؟!!

وراحت وتركتهم مصدومين ومفزوعين من صرختها وتصرفها

لفت الأولى لثانيه / وش فيها عميمه مزاجها مو رايق اليوم

- ياختي عمتك جويزه لها كم يوم متنرفزه لاتشيلين همها

- سلامات وش جويزه الميانه طايحه بينكم ....قولي عمتي الجازي

- مهووي ....عمتي يقولونها البزران مثلك بس انا الشيخه هتون ماأقولها لأحد سامعه

- كانك شيخه على قولتك ومسويه عضلات روحي قوليها بوجهها

- احم ...اقول روحي ذاكري بس

- هههههههههه طيب يالدجاجه





............................................................ ............................





يمشي بالسيب اللي يودي لغرف النوم......عنده من المشاكل اللي يشغل تفكيره ويشتت انتباهه كثيــررر

صوت صراخ ألم واستنجاد قطع عليه تفكيره وشروده ......صار يتلفت بكل جهه بيشوف مكان الصراخ من وين

حدد المكان وراح ركض له وقدام عيونه تتصور أبشع الصور......يمكن حرامي أو يمكن حريق أو يمكن كهرب

كل شئ شين جا بباله وتصور بأبشع صوره ......فتح الباب بقوه وصدمه المنظر اللي شافه

ظل ثواني مصدوم ويده ماسكه بيد الباب بدون حراك......مايدري وش يسوي لإنه بإختصار ماعمره فكر إنه ممكن يكون بالوضع ويقدر يتصرف صح

كانت بين يدين اختها مثل الطفل اللي تهجم عليه انسان بالغ ويضربه ولا له حول ولا قوه

كانت تفوقها جسم وقوه لأجل كذا كانت هي المتحكمه بالمعركه الدايره بينهم واللي مايدري وش سببها ولا كيف بدت ولا من الغلطان فيها

خيل له إنها بتذبحها وإن فيه قوه داخلها تحثها على ذبحها وتمدها بقوه غريبه مايدري منين جابتها

واخيراً صحى من صدمته وتوجه لهم وسحبها من تحت اختها بكل قوته وخلى ظهره حاجز بينهم

هاله منظر وجهها .....كدمات ماليته والدم طالع من خشمها ومن شفايفها .....ماكان يعتقد ان المرأه تمتلك قوه بهالشكل أو غضب يخليها تسوي اللي سوته

انهارت بين يدينه.... القوه اللي كانت متمسكه فيها عشان تدافع عن نفسها تلاشت وعيونها اللي كانت موجهه ليدين اختها عشان تشوف مضربها وين وتتقيه ترمش بثقل وبطريقها لظلمه

سدحها على السرير برفق ...... وصار يضرب وجهها بكفه بخفه / مزون ...مزون .....صاحيه انتي ؟!!

ردت وهي تأن من الألم ....بين الإغماء والصحوه / ايه

تنهد براحه / آآآآهـ الحمدلله

لف لها وغضب العالم متملكه وترجم غضبه بكف قوي طبعه على خدها وتردد صداه بالغرفه

حطت يدها على خدها وناظرته بصدمه وعدم تصديق للي صار / تضربني عشان مزون .....عشان هالواطيه !!!!

وش معطتك وخلتك تفضلها علي ......هاه ...؟؟؟!!

وش ذايق منها ....تكلممممم ؟؟؟؟

كور يدينه يبي يفرغ شوي من غضبه لايصبه عليها ......يتصور لو ضربها الحين وكل هالغضب مشتعل بصدره بينهي حياتها

لأي مدى وصلت بجرأتها ووقاحتها ودناءتها .....أول تتجنب العيون لاتنكشف قدامهم ....لكن الحين تتكلم وبكل جرأه علناً

تكلم وكأنها يغالب شئ بداخله / اطلعي برى ياطيف .....لاأخليك تندمين إنك أنولدتي

- بتضربني ...؟؟!!

حيااااك ....كان هالشئ يخليك مرتاح ومبسوط

بس والله ماراح انسى خيانتك لي مع هالـ...........

أنا تتركني عشانها ....أنـــا؟!!!

راحت تدور لي رجال يتزوجني اياه من اهلها عشان يفضى لها الجو معك ......

بس والله ماخليكم تتهنون .....والــلــه



............................................................ ................









دخان البخور مالي الجو وريحته النفاثه العطره تجتاح الأنوف وتبعث السرور لاإرادياً بالنفس لإن تلك الرائحه غالباً ماتكون بأوقات الفرح والسعاده .......

بمكان اختلطت فيه اصوات سوالف الحريم مع صوت اغاني الطقاقه وآلاتها

هذي تهلي وترحب...... وهذي ترقص.....وهذي توجه الصبابات وتشرف على توزيع الحلى والعصاير

وحده تمشي بخيلاء وتجر ذيل فستناها ووحده جالسه وترفع خصله من شعرها عن وجهها بغنج

العجز يلفهم سواد العبايه والبنات مثل الزهور بحديقه بألوان فساتينهم
7
7
7
7
- وهـ ياربي وش هالدرج .....قطع نفسي وشلون بتنزله مهره ؟!!

- بلاك دبه خففي شوي ولا ينقطع نفسك

تكلمت بتهديد / شـــمــــوووس خلك بحالك ماودي اخربط ملامح وجهك .....خبرك زواجي بعد اسبوع لازم اصير عروس ناعمه.........ورمشت بيعونها بوجه شمس بدلع

- ماأقول الا الله يعين طلال عليك

- لاتجيبنين طاريه قسم تجيني نفاضه من طاريه والعرس

- هههههههههههه الــلـــه صرنا نستحي ونخاف .......الله ياأيام اول يوم انك تناطحين الرجال مثل العنز

- العنز بنتك .......هذاك اول الحين غير..........

كملت كلامها وكانها تذكرت شئ /وش اخبارك مع ناصر؟

ابتسمت بألم / انام وانا مرتاحه

رد يسكر أي طريق للحوار أو السؤال......ويصد أي مجال بتقليب المواجع عليها

هي عايشه وراضيه أو بمعنى اصح ترضي نفسها بالغصب بالعيشه معه لإن ماقدامها أي خيارات يمكن انها تختار واحد منها يكون أخف ألم وعذاب لها
7
7
7
دخلت الغرفه وشالتها بصوتها وتعليقاتها ماسلم أحد من لسانها حتى العروس

صورت مع العروس ومع البنات.....رقصت واستهبلت قدام الكاميرا


يد ضربت كتفها وافزعتها وألمتها ......لفت على ورى وهي ماسكه كتفها / آآآآي يمه ليه تضربيني.....ماشاءالله فيك حيل بعد رقية هالدرج اللي تهد الحيل وتقطع النفس ؟!!

- اذكري ربتس وقصي لسانتس ......نسمع صراختس وهبالتس وحنا بالدرج ياللي ماتستحين

إمن أول البنت ماتحضر عروس وانتي زواجتس بعد كمن يوم بدال ماتتخفرين جايه تتلاسنين وترقصين وتتمشين بين الحريم وضحكتس يسبقتس

ميلت فمها كلام امها ماعجبها / يــمـــه هذاك اول الحين غيرررر .....بعدين هذا زواج ولد اخوي وشلون ماأحضره

- تسان لبستي عبايه وحضرتيه .....الحريم نتفوتس بالحكي ....ياخزياه بس

فتحت عيونها بصدمه / وش عبايته يمه تخيلي شكلي بعبايه وارقص ولا اصور مع المعاريس ؟!!!

وانطلقت ضحكه استهزاء من المتواجدين بالغرفه خلتها تعصب وتنقهر منهم وانطلقت صرخه منهم / انــــطــــمــــووووا

ولفت على امها بعتب / كذا يمه خليتيني مطنزه للي مايسوى واللي مايسوى



............................................................ ......








تناظر الغرفه بقرف ...... الستائر مهرئه والدرايش متآكله بفعل الصدى والسقف يشكو من الإضاءه المفقوده

الكراسي باليه .......والسرير بحد ذاته قصه اخرى .....لأي حركه أو ألتفاته تسويها على السرير يصدر صرير يصم اذانها

مافيه شئ يدل على انه مستوصف غير البياض اللي يلف الغرفه والمغذي المتصل فيها واللي تنتظره يخلص عشان تطلع بأسرع مايمكن من هالخرابه


انفتح الباب ودخل عليها وارتفع صوته بإبتسامه / صحيتي ؟؟

بادلته الإبتسامه / ايه توي صاحيه وتفاجأت بالمستوصف خمس نجوم اللي موديني له

- ههههههههههه وش اسوي لازم اوديك لمستوصف كذا عشان مايسألون ولا ينادون الشرطه لنا

- اهاااااا.............. كم لي الحين ؟

- تقريباً ساعتين

- متى يخلص هالمغذي

- تبينا نشيله شلنها ورحنا للبيت

- ايه خال تكفى خلهم يشيلونه ....اصلاً مارتحت له احسه متجرثم

- ههههههههه لا عاد مب لهدرجه هو صدق المبنى لك عليه شويتين.....بس عنايتهم زينه

- طيب بأصبر الله يعين

- ايه على فكره وحده ارسلت على جوالي اسمها الجازي ..... تقول انها دقت على جوالك ولا رديتي ثم دقت على بيتنا وقالو لها انك بالمستشفى وعطوها رقمي.....تقول عسى ماشر طمنيني عليك ؟؟

- عطني جوالك برسل لها

- طيب كلميها

- لاااا

- ليه ؟!!!!

ناظرته وابتسمت بألم / وش اقول لها السبب اللي خلاني انطق ؟!!

نزل عيونه ونظرة الألم ماليتها ومد لها جواله بصمت

- انتي مواعدتها تزورينها ولا وش ؟.....كاتبه بالرسااله انك تأخرتي عليها

- اليوم زواج ولد اخوها

- اهاا....... على البركه



نزل راسه بتفكير ...ورفعه بعد مده / مزون

- سم خال

- قررت اسافر

- نــعـــم؟؟!!!

- باسافر .......ماقدر اقعد اكثر من كذا.....شفتي وش سوت بك..... كانت بتذبحك بسببي ....بس لو اسافر كل شئ بيتغير

- وانا من تخليني عنده.....لولا لطف الله ثم أنت يوم جيتني وفكيتني منها كان ذبحتني.....هذي مجنونه تسوي اي شئ بدون تفكير

- انتي ارجعي لبيت رجلك....وانا بسافر وهي خليها بالبيت

مسكت يدينه وباستهم برجا / تكفى خال لاتسافر مابي ارجع لمتعب .....تـــكـــفـــى

مسك يدينها وحضنهم بيده / افهميني يامزون ماقدر اقعد .....انتي قلتيها مجنونه.... اتوقع انها تسوي اي شئ بس عشان تنتقم منا

ماشفتيها وهي تتكلم عنك .....فيها حقد وجنون الدنيا....ماراح تتورع عن أي تصرف يضرنا .....بسفري أضمن سلامتي انا وياك

نزلت عيونها بألم وخيبه ...... كل اللي حاولت تنحاش منه لحقها وبتروح للذباحها برجلينها



*هي ارادت وهو أراد واللي فعل ماأراد *




............................................................ .....





واقف بعيد عن سيارة المعاريس ينتظر العروس تركب براحة ثم يركب هو عشان يوديهم للفندق

ارتفعت نغمة جواله وشاف اسم اخته يضوي بالشاشه / آلو هتون ....وش تبين ؟

- بسم الله ضاري اكلتني بقشوري......الحكي اللي بأقوله لك ضاع

- اخلصي علي وش تبين مانيب فاضي لك

- احم ....... اسمع اللي اوله شرط اخره نور........بقولك شئ بس توعدني انك تنفذ شرطي اول

- هتون شايفتني فاضي لهبالك ومصالتك ........مع السلامه بس

تكلمت بسرعه / وقف وقف .......لو سكرت قسم لتندم

مأهتم من كلامها وسكره بوجهها .......

رجعت تدق على جواله كذا مره وكل مره يقطعه بوجهها ........وصلت رساله منها....بعده بثواني اتصل عليه وارتفع صوته بلهفه / وشلون بتخليني اشوف العنود ؟؟؟

- شفت كيف ندمت ........اللي مايسمع كلام اللي اكبر منه يندم

- اقول اخلصي وين بأشوفها

- قلت لك اللي أوله شرط اخره نور......وانت ماسألتني وش شرطي

- اطلبي وتشرطي كم العنود عندي

- قصدك كم هتون بس بأمشيها لك اليوم...........ابي كرسي المساج حقك

- نــعـــم .....اطلبي غيره

- لا مابي الا هو لونه احمر بناتي وش تبي فيه

سكت شوي ثم رد / جاك .......بس وين اشوفها

- شوف بجيبها لغرفة العروس بعد شوي لطلعو المعاريس ......وبطرف الباب واذا دقيت عليك ادخل طيب

- طيب.......يالله مع السلامه

ارتفع صوته باسم اخوه / خــالــد خالد

- هلا وش بغيت

مد له مفاتيح السياره / امسك مفاتيح السياره وود المعاريس للفندق

- وانت؟؟

ابتسم بخبث / عندي شغل لازم اخلصه

ناظره باستغراب ورفع كتوفه بلا مبالاه ومد يده له / هات






............................................................ .............




جالسه على الكراسي بآخر السيب بعيد عن ازعاج المعازيم .........علامات التعب باينه على وجهها

سحبت نفس عميق وبخت ثلاث مرات من الفانتولين

مافيه فايده تنفسها مثل ماهو ماتغير......سحبت نفس ثاني وزفرته بهدوء لعل وعسى أنها ترتاح وينتظم تنفسها

رجعت راسها على ورى واسندته على الجدار وغمضت عيونها تنشد الراحه

مسكت صدرها وضغطت عليه بيدها ........ألم غريب تحس فيه .......لها فتره والألم يتكرر عليها كل ماسوت مجهود زياده

وانطلق صوتها داعي ...راجي / رحمتك يارب .......وش الشر اللي جاني

وصلها صوت افزعها / الجازي ....ردت عليك مزون؟؟

فتحت عيونها / ايه....تقول انها بالمستشفى

ضربت صدرها بيدها / بسم الله عليها وش جاها ؟!!!

- لا مافيها الا العافيه تتدلع بس........فقر دم وطاحت على اهلها وودوها المستشفى بيعطونها مغذي وبترجع للبيت

تنهدت براحه / الحمدلله ......سلامتن دايمه يارب

- امين

انتبهت لعلامات وجهها التعبانه وتكلمت بقلق / وش فيك الجازي .....شكلك تعبانه؟!!

تكلمت بتعب / تعبانه ياشمس.......تجيني ضيقة نفس وتعب بصدري وربي اكره عمري لاجتني

مسكت يد الجازي / بسم الله عليك..... بعدوينك ان شاءالله ......قريتي على نفسك يمكن احد ناظلك

ابتسمت رغم تعبها / على وش ينظلوني ياحظي..؟؟!!

- لاتقولين كذا ....أي احد فاقد ادنى شئ وانتي تملكينه بيحسدك عليه

- ليتني متخفره على قولة امي ......اجل شكلهم نظلوني عشان عرسي بعد اسبوع وانا جايه ماهمني هههههههههههه

- هههههههههههه ........صادقه خالتي والله ........كان على الاقل جلستي بمكانك بدال مانتي شايله الزواج بضحكك ورقصك


اهتز الجوال بشنطتها وقطع عليهم كلامهم ....طلعته وردت....وكان صوته واضح واللي بجنبها يقدر يسمعه / مافيه نوم عند اهلك......احمدي ربك اني جبتك للعرس اليوم

لولا خالتي شحذتني كان خليتك زي الكلبه مرجومه بالبيت ماتطلعين الا منه لقبرك ......فاهمه؟؟

- فاهمه

وسكر السماعه بوجهها

لفت لها وابتسمت بألم / هذي اخباري مع ناصر يالجازي ........قلت له بأنام عند اهلي وهذا انتي سمعتي رده

تكلمت تبي تضيع السالفه .....ماتبي تشوف صديقتها والحزن ماليها بهالشكل / ارسلي رقم جوالك لجوالي عشان اكلمك

هزت الجوال بيدها بسخريه / هذا جوال ناصر عطاني اياه اليوم بس عشان يدق علي ويهزئني مثل تو ههههههههه ...........

آآخ بس .....يارب لطفك





............................................................ ..................





دخل للغرفه بعد ماطلع منها.......يبيها تاخذ راحتها وتفسخ عبايتها وتعدل من شكلها وجلستها بدون مايكون بجنبها ويربكها


طاحت عيونه عليها........على الانسانه اللي ملكت قلبه من اول ماشافها

مافيها جمال يبهره ولا فيها حلاوة لسان تذوبه.........لكن فيها شئ خلاه اسير لها بدون احساس منه مايدري وش هو

تنحنح بقصد منه يبيها تنتبه انه جا.......رفعت عيونها اتجاه الصوت وتلاقت عيونهم لثواني

نزلت عيونها لحضنها بسرعه.......وحضنت يدها اليمين بيدها اليسار وصارت تفركهم بتوتر وخوف وخجل

يمكن اول اذا تلاقت عيونهم تنزلها بخجل لكن خجلها الحين مايسوى شئ قدام خوفها الكبير منه

طبيعة بالمرأه بليلة زواجها يكون الخوف متملكها بشكل كبير واحياناً تتصرف تحت ضغط خوفها تصرفات تستنكرها بعدين وتصير سالفه تندر بينهم

كور يده ثم فردها كذا مره يبي شوي من توتره وخوفه يخف........على قوته وشدته لكن مثله مثل أي رجل يحس بخوف بهالليله

خوف من المستقبل المجهول .......خوف من الأيام اللي بيعيشها معها

خوف من انه يكون ارتكب غلطه بزواجه من هالانسانه

خوف من انه مايسعدها او ماتسعده

خوف من انه مايتوفق معها ويكون الفراق هو الحل لهم

الخوف من اسباب كثيررره تدور بباله

والخوف الاكبر من انه مايقدر يحافظ على اامانة نايف ومايكون قد تحمل مسئوليتها


انطلق صوته يشق سكون المكان / روحي بدلي ملابسك عشان نصلي ركعتين


شافها بمكانها ماتحركت ولاأبدت أي استعداد لإنها تقوم......توقع ان خجلها يمنعها من أنها تقوم قدامه

- انا بطلع بأطلب لنا عشاء على بال ماتغيرين ملابسك

لكنه استوقفه صوتها الناعم وعبره محبوسه واضحه بنبرته / ذياب .....ماجا جدي ؟!

لف لها وشاف الدموع المحبوسه بعيونها.....وحس بعبرتها الواقفه بحلقها وهي تغالبها

قرى بعيونها كـــلاااام ......

عيونها ترتجيه أنه ينطق بالكلمه اللي تتمناها.......ينطق بكلمه تريحها وتخليها حره وتفرح بزواجها مثل اي عروس

للآن عيونها معلقه عليه برجا........للآن عيونها تنتظر الإجابه اللي متاكد أنها دعت ربها بسرها مليون مره عشان ينطق باللي تتمنى

مايدري وش يقول ........هل يقول الصدق ويقضي على فرحتها الناقصه أو يكذب عليها ويخليها تكمل فرحتها

قدامه عروس سُلبت فرحتها بكل قسوه من يد أقرب الناس لها

ومو اي عروس ......هذي زوجته وحبيبته وأخت صديق عمره

ابتسم بوجهها رغم ألمها اللي يحس فيه / الا جا .....ووقف عند الباب يستقبل المعازيم

هلّا ورحب باللي داخل واللي طالع .......حتى على العشاء ماجلس يتعشى معنا من زود فرحته وتحفيه بالناس

ماعلى لسانه الا الدعاوي لك ......هلكني من كثر مايوصيني عليك

بس يوم جا يدخل يسلم عليك قالو انه وقت زفتك وكانو عمانك بيمشون لديره قبل مايتأخر الوقت وراح ولا دخل عليك وحملني السلام الكثير الكثير لك

انرسمت ابتسامه راحه على وجهها بأعرض صورها والدموع اللي كانت حبيسه عيونها نزلت بكل حريه والعبره اللي كانت خانقتها طلعت

دست وجهها بيدينها وانخرطت بصياح موجع يقطعه صوت ضحكاتها

قرب منها وجلس على على الكنب بجنبها وحضنها بصمت من دون أي كلمه.....خلاها تفرغ عن اللي كانت حابسته بصدرها كل هالوقت

استكانت بحضنه وكملت صياحها فيه بهدوء

تكلمت من بين دموعها وضحكاتها / الحمدلله يارب .....الحمد والشكر لك يارب

جا جدي .....توقعته مايجي......توقعته مايفرح لي......توقعته بيكسر فرحتي

بس جا ...جا ......فرحانه ياذياب وربي فرحانه......بطير من الفرحه ....الحمدلله لك يارب

- شكلنا بنقضي ذا الليه وانتي تعبرين عن فرحتك بجية جدك

قامت عن حضنه وحطت عيونها بعيونه لأول مره وناظرته بنظرة عتاب / يعني مانت فرحان لفرحتي ؟

- هذا سؤال تسأله حبيبه لحبيبها ؟!!

ابتسمت بمحبه ونزلت راسها بحيا

وتكلم بنبره افزعتها / لااااا .....شوفي وش سوى مكياجك بثوبي

لفت له وشافت ثوبه وبقع باللون الأحمر والأسود عليه ....عضت شفتها بأسف / أسفه ماكان قصدي

قضت على المتبقي منه بحركتها / اقول قومي غيري ملابسك وخلينا نصلي ركعتين لأخربها هنا .........تحركي










& تمنايتي لكم بقراءة ممتعه ومشوقه &




& أخوكم / هاجس ليل &



............................................................ ..............

ياخي ولله انك ماتومن تدري الى الان احس بتنكبنا في طلال والجازي قمت تحط ذا المكالمات وتقديم الزواج عشان نرقد ونامن على الجاز انها بتزوج ثم تنكبن بموت طلال او فضيحه للجازي بس اسمع الجازي الحين فيها ربو وتبخ فنتولين ومارتاحت هل بتقول فيها ام الخنازير ولله مايندرى عنك وبعدين بيحللونها المستشفى ويلقونها حامل وتفضحه عند اهلها <<<<<<<<<<توقع خطير اخس علي

مزون هي الى الان ماطلقها متعب ا جل ليش جدة عناد تقوله بخطب مزون لك بس حلو لو ياخذها عناد ويتخوبر متعب باللي خذها والموت لو درى متعب ان مزون تكلم ياسعدي اشوف وجهك وشبيصير لك



مالت على ذا الناصر مابرحت على شغلك مع شمس حتى يوم بغيت تذبحها ماعقلت واخوك الخايب العايب وشصار عليه اربك انه بغيبوبه الى الان
جعله مايقوم منها الا يقول الحقيقه الناصر ويموت بس شكل ناصر مهوب عارف الحقيقه الا بعد مايذبح البنت من القهر والغبنه


هي انت ياخل طيف ومزون لا تسافر لين تحط ذا المهبوله في مستشفى الامراض النفسيه ذي مهيب صاحيه وشيسما مرضها جعلها البلا
وزود على وقاحتها وقلت ادبها بغت تذبح اختها


قدع ذياب حلو انك فرحت البنيه حتى لو كذبت عيها لو ماقلت كذا بتنكد بيوم فرحها اللي ماينعاد


ارجع واقول اكفن شرك اخوي هاجس ترى الجازي وحنا مانتحمل الا لازم تخرب عليها يارب عد الاسبوع على خير وعقبها لو بغيت تذبحهم اثنينهم بس مايفضحكم كله ولا الفضيحه
ننتظر الخميس على نار في حفظ الرحمن

صباح الورد اخوي هاجس

بارت رائع

ان الي الآن عندي احساس ان عرس الجازي ماهو بصاير مهما قلت ويا خوفي انها حامل بعد
يعني مالها غير عناد تضف بنته ويضف ولدهاما ادري جا في بالي ان طلال
يجيه مرض القلب ويروح لعناد وقبل يموت يوصيه على الجازي
ويقوله عن الي صار بلحظات الأخيره

كثر الحاح طلال انه يعلم بلي صاؤ ماهو معدي على خير

اهم شئ المعتوهه طيف فك الله عناد منها ومزون من غير شر ترجع لمتعب

يعني لو تطير يا عناد مالك الا الجازي

تصرف خال مزون في محله طيف انسانه مريضه مافيه الا انكم تهجون برقابكم عنها

ناصر الي متى وانت معلن الحرب على شمس الين تطق وتموت من القهر بعدين تحسف يانك عاملها بمعروف والا تسريح بأحسان

اعجبني ذياب بكذبته على مهره يعني وش يفيد لو قلت لها الحقيقه
بس تنكد عليها والأيام دوا للجروح الي مالها دوى

امتعتنا

ننتظر زواج الجازي الي اتمنى انه يتم ما تستاهل الجازي بس عاد غلطة الشاطر بألف

السلام عليكم ورحمة الله وبركاته

اسعدك الله اخوي ولد امنا الروم شوف حتى لو قلت تبريت منكم مهو بشغلنا خلاص انت سندنا وبدون اخو نضيع عاد تحمل تتبرى من وحده من خواتك بنعطيك على راسك بعصات امك الى خاشتها تحت سريرها ...
صحيح هذا اول رد لي هنا معك بس متابعه لك من زمان وانت خليتنا نخرج عن طورنا
اول شي نبهناك اكتب اسم الشخصيه قبل وما كتبتها ياخي ترى معنا الزهايمر ونظرب اسداس بخماس وحنا نخمن ..عاد مهو تسووي شطاره وتقول حلها ثلاثين انتبه ههههههه >>عوذه كفانا الله شر المرض هههههههه

شمس الله يعينها صدق المؤمن مبتلى بس تصدق خلها تستاهل هي الي رضخت ونخرست من البدايه لا تقول تخاف من ربها لو خافت من ربها صدق كان دافعت عن عمرها لو بقتله ما همها اهله واهلها ..بس جد نقطه جدا قيمه تبه الكثير الغافلين خصوصا من الاسر الي مازالت سكنها جماعي حتى وان قلت مازالت موجوده ...
تعرف عندي احساس انه بالبارت الجاي بتخلي الي ما يتسمى اخو ناصر نسيت اسمه قلت لك لو كنت تذكر الاسماء ماكان ضيعناها ...انه بيجيها يهددها ..و يمكن يكتشفه ناصر وتصير مجزره بين الاخوان شرانيه ابيه ينذبح بس ياليته يموت من سطح عماره وهو سكران ولا يروح فيها اخوه بدمه الملوث بالغذاره

مزون انتي وخالك مهو حل هروبكم وبعدكم قطوها بمصح عقلي وارتاحوا منها ...تصدق ودي تزوج مزون لعناد احسهم مناسبين لبعض مع انه من البدايه انت جالس ادور وبترجع عناد للجازي

الجازي مهقيت انك الي فيك حمل يمكن مرض القلب عشان عناد يسويلك عمليه ..بعد موت رجالك ويمكن يكون معترف لعناد عن الي سواه فيك ويستر عليك بزواجك

عناد ياخوفي تشوف الخبله وتعجبك وتعالجها بعد زواجك منها >>هههههههههههه ماقلت لك خرفت زوجته المسكين ثلاثه باقي الرابعه بدور له عليها ايه ليه لا ناصر مهو بيموت اخوه ياخذ شمس بعد خخخخخخخخخخ>>>اقول ضفي قشك واخرجي بلا جالسه تهلوسين علينا بعد سخونتك الي جاتك

اهلين اخوي هاجس
مدري اتوقع تكون الجازي حامل وهذا الي مسبب لها ضيق تنفس
بس الله يستر مايصير شي ومايتم الزواج عندي احساس ان زواجهم ماراح يتم وبترجع تتزوج عناد
عناد المفروض بعد الكلام الي من طيف يتركها لانها ماتستاهل
شمس للحين تعاني من ناصر بعد الي سواه
ويوسف وش صار عليه
نستناك علي خير