احم احم

السلام عليكم ياقرائي

واحلى صباح او احلى مساء لكم

اعتذر عن انقطاعي بس ظروف منعتني حاولت ارجع قبل بس ماقدرت

وان شاءالله ان ربي بيعيني وباكمل معكم اللي بديته

&&&&&&&&&&&&&&&&&&&&&&&&&&&&&&


الـــــــــــــجـــــــــــــــزء الـــــســــــــادســــــــ

&&&&&&&&&&&&&&&&&&&&&&&&&&&&&


(( ســـخـــريــة الــزمـــن ))



(( لا إلـــه إلا الـلـه مالـنـا ربــــٌ ســوـوـواهــ ))


ربنا رب القلوب وهو علام الغيوب
في الشروق وفي الغروب نوره يهدي العصاه

ربنا الهادي الودود فضله ملئ الوجود
عفوه خير وجود فارتجي دوماً رضاه









تحط ملابسها بالشنطه بهدوء وسكينه ....وبحركه بطئيه

الدموع ماخذه مجراها على خدها.... تصيح بصمت ودون ادنى حركه منها

قلبها مطعون وينزف.....روحها مجروحه..... عيونها ماترمش ...مصوبه على اللا شئ

الدنيا ماعادت تسوى بعينها....على اتساعها ضاقت عليها ....

حبت وأنطعنت...

عشقت وأنذلت....

اخلصت وانجرحت....

ماعادت تفرق عندها حياة أو ممات....

بتروح وتخليه ....بتترك البيت له لحاله هو وحرمته

بتخليه ينبسط بفراقها .... بتفارق البيت اللي تربت فيه أغلب سنوات عمرها

البيت اللي لها فيه أجمل الذكريات....

فيه حبت .....وعشقت...فيه تخيلت ....وحلمت....

فيه عاشت بقرب محبوبها .....فيه متعت عينها بشوفه .....ومسامعها بصوته.... ويديها بلمسته

بتترك هذااا كله عشان نفسها ....عشان عزتها وكرامتها اللي انهانت وانداس عليها

بس الحقيقه غيرررر .....الحقيقه أنه لو أهانها وتمادى بإهانتها وجرح كبريائها وكرامتها بتظل عنده

لو يعذبها باليوم ألف مره بتطلب قربه ..... لو يبيعها برخيص بتشرتي قربه بالغالي

بس خلآآآآآص ماعاد فيها تتحمل كل هذا منه ....ماعاد تقدر تتحمل جفاه وصده وتجريحه

ماتقدر تتحمل شوفته بقرب غيرها ....

هي انسانه ولها طاقة تحمل وحد ....بعده بينفذ صبرها وتتحطم قوتها...

بتروح وتتركه .......يمكن تصير ماتشتاق له !!!

يمكن تسلى عنه !!

يمكن حبه ينقص لين يختفي من قلبها!!

أحتمالات حطتها واقنعت نفسها فيها ......وبتعيش برجوى أنها تتحقق...

لو كانت تنطق .....لو كانت الحروف تطلع من فمها....

تبي تقول كلمه وحده بس....كلمه ياما تمنت انها تنطقها ويتردد صدى صوتها بها

كلمه تريحها....وتعينها....وتحسسها أنها مو لوحدها بهالدنيا

كلمه تزيح اللي اثقل قلبها وروحها....

-يآآآآ الـــلــــه


* لا إله إلا الله...لا إله إلا الله مالنا ربٌ سواه *


...........................








تضغط على ازارير الجوال بكل هدوء

مره تعض على شفايفها ومره تحط كفها على خدها

الحمره تعلو خدودها وعلامات الخجل واضحه عليها بشكل كبير

جوالها بحضنها وكفوفها تحاوطه تمنع عين اي احد يسترق النظر

بين كل حرف تكتبه والثاني ترفع نظرها وتدور فيه على اوجه الموجودين تتطمن ان مافيه احد منتبه لها او عارف هي وش تسوي

يهتز الجوال بحضنها ويصدر ازيزه المعتاد اذا تحول لوضعه الصامت

تفتح الرساله بلهفه وشوووق وتقراها كلمه كلمه وحرف حرف وابتسامه خجوله تزين وجهها وتزيده خجل واحمرار

ترفع يدها وتمسد شعرها وكان صاحب الرساله حاضر قدامها ويشوفها

7
7
7
من اول وهو شاك بوضعها .....حركاتها مريبه وتصرفاتها غريبه ....اول مره يشوفها بهالوضع

اول مره يشوفها متمسكه بجوالها ولا تفارقه.... 24 ساعه وهو بيدها ومحول على الصامت

اول مره يشوفها هاديه وساكته وبوجه خجول

معقد حواجبه وعيونه مصوبه عليها ومركز بتصرفاتها وتقلبات الوان وجهها

الوضع مايطمن لازم يتاكد بنفسه

قام من مكانه متجه لها

وكانه صقر بينقض على فريسته

قرب منها وحط يده على كتفها بحركه افزعتها وخلتها تطيح الجوال على الارض من الخوف وتحطت كفوفها على قلبها بفزع / يـــمــه خوفتني

- وش جالسه تسوين من الصبح بهالجوال ؟!!

ناظرته بعيون متسعه خايفه مصدومه ماتوقعت ان احد يكون منتبه لها ماتوقعت ان احد يشك بتصارفاتها

شافت عيونه المتسائله وهي تطلب جواب

ماتدري وش تقوله ولا كيف تبرر موقفها

لو انتظرت لين ماتكون لوحدها وتسوي اللي تبي مو احسن من الموقف اللي انحطت فيها

تصرف غبي وطفولي اللي سوته وبتدفع ثمنه

-ررردي وش تسوين ؟!!

- أ..آ ..انــا ....جالسه ...شسمه

ناظرها بتعجب / شسمه وش يعني؟

- آ...آ...

رفعت عيونها له بفرحه وكأنها لقت مصباح علاء الدين / آيه صح جالسه ارسل لمزون

ناظرها بشك ومد يده لها / هاتي الجوال اشوف

اخذت الجوال من على الارض وحطته ورى ظهرها بحركه خوف طفوليه وهي تناظره بنظرات خوف / مابي ماني معطيتك اياه

- هاتيه بالطيب احسن لك

- لا مافيه جوالي وانا حره فيه

حوطها بذراعه وسحب الجوال منها وسط مقاومتها الانثويه الفاشله

فتح على الرسايل على طول وقرى اول رساله واتسعت عيونه

اللي كان شاك فيه طلع صح !!

نزلت عيونها للأرض باستسلام وخوف وخجل غريبه عليها تنتظر مصيرها !!





.................................



صوت صراخ ....وصور دم على الأرض....توسلات انسان ضعيف وتعبان

صورة جسد يرتعش ألم ....انتقام شيطاني......صوت أنين ....جسد مرمي نازف

صور فلاشيه تطلع وتغيب بدوامه من الظلام....يدينها تطلب النجده وتتخبط بالظلام والوحده
7
7
7
-لآآآآآآآآآآآآآ

قامت مفزوعه .....نفسها مضطرب....صدرها يصعد ويهبط بسرعه

حلقها ناشف من صراخها....قطرات من العرق مستقره على جبينها

جسدها يرتجف خوف وفزع.....صوت اصتكاك اسنانها ببعض من الرجفه

ضغطت على قلبها بيدها تبي تهديه وهي تقرى المعوذات

تعوذت من الشيطان ونفثت عن يسارها ثلاث مرات

مسحت بظهر كفها العرق من على جبينها .....

غمضت عيونها وأخذت نفس عمييييق تبي نفسها ينتظم شوي

جمعت كفوفها ومسحت على وجهها وهي تطلق زفره ارتياح نسبي من صدرها

كابوس مخيف.....أصوات وصور مرعبه.....مرت عليها

نفسها ضاق عليها وماقدرت تاخذ نفس......توقعت انه نهاية حياتها وان هذا هو الموت

توقعت ان الموت هو عقابها على اللي سوته ....

مدت يدينها تطلب النجده تبي احد ينقذها من الموت بس ماكان حولها احد

قامت مفزوعه وصرخة اعتراض انطلقت منها


الصور للحين قدامها....الأصوات للآن بمسامعها

تغمض عينها وتفتحها تبي الصور تختفي من قدامها ....لكن مافيه امل

حطت يدينها على أذانها وهي تحرك راسها يمين ويسار....ماتبي تسمع صوت الأنين صوت العذاب ....بس الصوت مرافقها



-خلآآآآآص يكـــفـــي .....ارحمووووني

حلم ياشمس ....كان حلم

انا ماذبحته ......مآآآآآآذبحته....آآآآآهـ

انسدحت على السرير بجزع واستسلام .....جسدها مرمي بعرض السرير

تكورت على نفسها تنشد الأمان منها لها.....

كفوفها استقرت تحت خدها.....وعيونها غمضتهم بسكينه وسلام....ودمعة ألم وخوف تلامس خدها وتستقر على كفها

-كان حـــلم حــــلم .....يـــــــآآآآآرب رحــــمـــتــــكـــ ....

يآآآالـــلـــه عفوووك ورحمتك.....

وغشاها النوم ....

سبحااانه كم هو رحيم....

نادته بوقت شدتها ....طلبت رحمته وعفوه عند جزعها .....وانزلها عليها

ارسل النوم لها رحمةً منه

ارسل النوم ليريح قلبها المعذب ويطمئن روحها الفزعه


*ربنا الحي الرقيب يقبل العبد المنيب *
*فهو رحمن مجيب لدعاء ومن دعاه*
*ربنا الهادي الودود فضله ملئ الوجود*
*عفوه خير وجود فارتجي دوماً رضاه*



*سبحانك ربي إني كنت من الظالمين*



..................................





الساعه 12 باليل ....الظلام طاغي على المكان بكل قوه واستبداد

اجبر الناس على الهدوء ....واجبر القلوب الخائفه على الفزع والشعور بالوحده

واجبر خيال المعشوقين انها تزور احلام عاشقينها .....

ظلااااام .....هدووووء ....وحده

امواج البحر تضرب بكل قوتها رمال الشاطئ وكانها انسان غاضب يفرغ غضبه بأول شئ يواجهه

صوت ارتطام الامواج قوي وعالي ومخيف ....وكانه نحيب وانين الناس اللي شكت للبحر اللآمها واحزانها

يمشي بهدوء وذهن شارد ....اقدامه الحافيه توطى على حبات الرمل الأبيض المبلول بماء البحر مخلفه وراها اثار اقدامه وتظل علامه تشهد على احزانه

ازارير ثوبه العلويه مفتوحه .... يدينه بجيب ثوبه يحميها من برودة الجو

شكله مبهذل ....وشعره الطويل نسبياً متطاير على غير عادته

رفع عيونه الذبلانه بتثاقل للقمر ....ناظره كيف عالي ويشع قوه ونور ويمد اللي حوله بالقوه والأمل

نظرات متوسله ....تمنى لو انه شخص يقدر يشكي له همه ويخفف عنه وياقف بجنمبه

نظرات متوسله ونظرات حاسده ....يحسده لاعنده هم ولا عنده شئ يثقله

نزل عيونه للبحر وشاف انعكاس صورة القمر على سطحه

صورة متموجه وغير ثابته نفس مشاعره

هبت موجة هوى شتوي قارص ....تداعب خصلات شعره وتلامس اطرافه رقبته بنعومه ....وتحث امواج البحر على الحركه اللي جت تعانق اطراف الشاطئ بكل شوق

نزل راسه لرجلينه ورجع خطوتين لورى بحركه غريزيه من برودة الموج اللي لامسهم

ماهمه برودة الجو ولا ثوبه المبلول ....تمنى لو ان همومه مثل اثآر اقدامه يمحيها الموج دون ألم

تمنى لو ان الهوى البارد اللي يلامس صدره يزيل همه من دون مايحس .....تمنى لو ان هالبحر على اتساعه يشيل بداله همه

لكن ماكل مانتمنى يتحقق !!!

جمع كفوفه البارده ونفخ بوسطهم من انفاسه الحاره ومسح على وجهه يبي يحس شوي بالدفا

حضن نفسه يطلب الدفى .....لكنه بداخله يبي يطمن نفسه ويبي يحس انه مو لوحده وان احد يشاركه بهمه

تنهد بقل حيله وغمض عيونه واستسلم لهمومه وللجو وبرودته .





...................................





هههههههههههههههههههههههههههههههههههههههه

آآآآآخ يابطني ماتحمل خلاآآآآآآآص مافيني حيل اضحك زود

- وجع بلا سخافه هات الجوال

- ياشيخه روحي بس ....انتي ووجهك لاينفجر صاير كنه طماط

يقالك مستحيه الحين وينك ووين الحيا اللي مثلك مايعرف الحيا هههههههههههههههههههه

زاد خجلها ودها تدخل بثيابها ولا تكون بهالموقف الغبي

تكلم وهو يغالب ضحكته / اجل حبيبتي وعمري وحياتي ههههههههههههههههههه

صرتي تسمعين كلام رومانسي والله كبرتي يابنت ههههههههههههههههههههههههههههههههههه

وانتي وش رديتي عليه اشوفك متحمسه وانتي تكتبين لايكون كتبتي انقلع لااشوتك بلا كلام قليل ادب هههههههههههههههههههههههه

امتلى صدرها غضب وقهر من حركته وتجريحه لها قدام الكل

احمر وجهها بحمرة الغضب والخجل بوقت واحد

الصاله مليانه فيها ابوها واخوانها وعيال اخوها

موقف كبير اللي انحطت فيه قدامهم

رفعت راسها له وعيونها غرقانه بدموع رافضه النزول .....وبتعابير وجهها اللي يغالب الصياح

مدت يدها له / خالد هات الجوال

مد لها الجوال بهدوء شكلها صدمه ماتوقع يكون ردة فعلها على اللي سواه كذا

متعود انه يمزح معها بدفاشه وتتقبل مزحه برحابة صدر وسعاده

حرك يده عند راسه بعدم فهم لتصرفها واستغراب وعدم اهتمام لها / وش فيها الجازي انجنت من تملكت

اخذت الجوال منه وتوجهت لدرج براس منزل للأرض وعيون تتابع خطى اقدامها

توطى على العتبات بكل قوتها تبي تفرغ شوي من غضبها فيه

لو كانت العتبات تحس وتشعر كان أنت من الالم

تخيلت ان كل عتبه خالد وتدوس عليه ....جرحها بكلامه ...

كل كلمه طلعت منه جرحتها ....جرحت مشاعر المراهقه اللي تحس فيها

ماهتم لخجلها ولا لمشاعرها

وضحكته الساخره منه طعنتها ....ليه ضحك ليه ؟!!...

استهزأ فيها ؟!!

ماهي انثى ...!!

مالها قلب يحب ويكره ...!!

مالها مشاعر خجوله ...!!

ليه مايفهمها ؟!!

هي ماعاشت مراهقتها كانثى ...عاشت مراهقة الرجال بجسد امرأه

توها تعيش مراهقتها ....توها تحس بانوثتها

تحس ان قلبها قلب مراهقه ....

فيه خوف المراهقه ....وخجل المراهقه

كلمات غزل بسيطه تقلب حالها فوق تحت

ضحكه قصيره منه تخلي العالم وردي قدامها بكل سواده

تحس بخوف المراهقه لادق ولا ارسل لها

تبعد عن العيون وكانها على علاقه محرمه معه ومو زوجته

تحس ان هذي مغامرتها الصغيره السريه وماتبي تشرك احد فيها

حتى صديقاتها كانو برى هالمغامره ....ماعلمتهم ولا قالت لهم شئ

تغار ماتبي تشارك انثى بسوالف عن زوجها ...ماتبي انثى غيرها تتلذ بسماع اي شئ عنه


غيره !!

انا اغار!!!

معقوله احبه ؟؟!!!

لالالا اتوهم شكلي

كملت طريقها لغرفتها وهي تنكر النتيجه اللي توصلت لها

معقوله تحب ...

هو صدق عيشها بجو خيالي فوق ماكانت تتصور بس مايوصل للحب

بيذلني مثل مزون

لانها حبته وعشقت التراب اللي يمشي عليه ذلها وصدها وعذبها

لا مابي احب مابي اتعذب مابي اذوق طعم الذل مابي



........................




-انهبلت انت وش ذا اللي سويته ؟!!

- لا تزيدني مانب ناقصك ترى

تكلم بصوت واطي يحاول يكتم غيظه / استغفر الله العظيم

- وينك فيه الحين ؟

- على البحر بالشرقيه

- بالشرقيه ؟!!!

وش تسوي هناك بدال ماتشوف حل لمشكلتك رايح لشرقيه

- وش اسوي ضاقت علي الوسيعه مالقيت نفسي الا ماسك خط الشرقيه

- متى بترجع ؟

- اليوم ولا بكرى بالكثير ....ماخذت اجازه من شغلي ولا أقدر ءأخر الأمر اكثر من كذا اخرته بما فيه الكفايه

وبكرى هي بتوصل لازم استقبلها هي وجدها بمطار الرياض

تنهد / الله ييسر لك امرك ويعينك مادري وش صابك وخلاك تسوي هالسواه

- المكتوب مالنا مفر منه

- صدقت ....يالله تأخرت على الإجتماع لازم اقفل بينا اتصال....اوك

- اوك مع السلامه اجل

- مع السلامه






..............................




يــوم الـخــمــيــس بيتــ الــجـــد





فتحت عيونها على اخرهم بصدمه / من صدقك انتي ... من قالك ؟؟!!!

- ايه والله ضاري قالي وخوالي قايمين عليه ومجتمعين كلهم اليوم عشانه ...خلاص هو جابها ومسكنها بفندق هي وجدها لين يرضون الشيبان ويجيبها هنا

- عمري ماتوقعت هالحركه من واحد من عيالنا وخصوصاً هو

- ليه هو معصوم مو بشر يعني .... اصلاً انا متوقعه هالحركه منه من زمان اي رجل بمكانه بيسوي اللي سواه

- مادري والله بس قويه حركته

- تدرين على اني اكرهه ولا اوطنه بعيشة الله بس رحمته مايستاهل هالشيشه كلها من خوالي

وش يبونه يسوي رجال بكل قوته وشبابه بالغربه ولحاله وحوله كل هالفتن يبي احد يشاركه حياته ويعفه ويرده عن الحرام

بس لو انه معلم خوالي على الاقل مو يوم تزوج وخلص وجاب عيال جا يرمي هالقنبله بوجيهم خصوصاً وجداني ينتظرون اليوم اللي بيتزوج فيه عناد

- الله يعينه

- الــلــه توني ماستانس خلي جداني يعرفون اللي فضلوه علي تزوج من وراهم وبدون شورهم وياليتها من ديرته بعد من ديرة الكفار

- حرام عليك لاتتشفين فيه لاربي يبلاك

- طيب يصير خير

- انتي متى تعقلين بتتزوجين خلاااص وهو متزوج وعنده عيال متى بتحترمينه

- حريمته لو ينتحر ماطال احترامي بيظل بنظري عنيد البزر

- ههههههههههه استغفر الله العظيم

ورفعت يدينها تدعي / ياااارب عطها عقل بدال هالمهلبيه اللي بمخها

- وجع يادبه ......وطبت عليها تضربها بمزح

مزح محب ....مزح صديق....





..............................





- هاه بشري ردت عليك ؟

- لا مقفله جوالها

- مقفله جوالها!!!

- غريبه والله اول مره مزون تسويها وتقفل جوالها

- دقي على جوال العنود جربي

- طيب

دورت بالاسماء ودقت عليها ثواني ووصلها صوت العنود

- هلا العنود وين مزون ؟؟

- بسم الله شموس سلمي بالأول وش فيك مستعجله

- السلام عليكم وين مزون خلصينا

ماتدري وش تقول ولا وش ترد عليها كلهم انصدمو من اللي صار وخصوصاً بهالوقت كيف بصديقاتها وش بتكون ردة فعلهم

- آ ...آ

تكلمت بخوف / وش فيك ؟!! وش صاير!! مزون فيها شئ

خوفتيني تكلمممممي

- لا مزون بخير...آآ...ان شاءالله انها بخير
7
7
7

جالسه تشوف وجه شمس اللي انرسمت علامات الصدمه عليه ويدها اللي حطتها على فمها بعدم تصديق وذهول

وعيونها اللي امتلت دموع

الخوف تملكها ضربات قلبها زادت سرعتها وشفايفها نشفت وكأن لها ايام ماذاقت المويه

تمشي برجلين ماتقدر تشيلها ...تكلمت بصوت واطي وكان الحروف تطلع من بئر عميق

- وش فيها مزون؟

رفعت راسها لها ودمعه فرت من عينها واستقرت على خدها / طلقها يالجازي طلقها

- نـــــعـــــــم

حطت يدينها على راسها ماهي مصدقه اللي سمعته ماتوقعت انه بيجي يوم وتوصل به النذاله لهدرجه

هي تحبه .... لا ذاك مو حب وبس

ذاك حب بجنون ... عشق بدون تفكير

اخلاص ووفاء دون مقابل



بعد مرور نص ساعه
7
7

تكلمت بسرحان وعيونها مصوبه على اللي قدامها / ليه ماعلمتنا

ردت عليها شمس وللحين هي تحت تأثير الصدمه / مادري لاتسأليني عقلي توقف عن التفكير

- مو حنا صديقاتها ليه ماعلمتنا....ليه تحس بالألم لحالها.... ليه تتعذب لحالها

ماتبي احد يشاركها حزنها ؟!!... ماتبي احد يخفف عنها؟!!

ليه ابعدتنا عن حياتها من اول مشكله صادفتها

- ساعات بوقت الحزن نحتاج اننا نكون لحالنا حنا واحزانا وبس

دون شريك ....دون اي مخلوق يخفف عنا

ماندري ليه نسوي كذا ولا نبي ندري ليه نبي نعيش حزننا لوحدنا وبس

يمكن نبي نحس بقوتنا وان حنا قادرين على تخطي كل هالحزن لوحدنا

او يمكن اننا نبي نعيش الحزن دون مايخف او يتغير عشان نحس بالشفقه على انفسنا وبالظلم واننا نستاهل احسن من هالحياة اللي عايشينها

او يمكن مانبي احد يحس بالشفقه تجاهنا او يتشفى فينا او يلومنا ونحن مو ناقصين

الأنسان بطبعه غريب ماتقدرين تعرفين اسبابه

ناظرت شمس بنظرة اعجاب وفخر الحياة علمت شمس كـــــثــــــيرررر خلتها شابه عمرها 25 بتجارب وعقل شايب مسن خاض الكثير خلال حياته

- شمس

ردت عليها وهي مستنده على الجدار ومدده رجلينها / هممم

- احبك يالدبه

لفت لها وعدلت جلستها وحضنتها بكل حب

نحتاج احياناً لسماع مثل هالكلمات اللي تعبر عن حب الأشخاص لنا وتعبر عن مشاعرهم تجاهنا ....قد يكون أب او اخ او زوج او ام او اخت او زوجه او صديق

قد نكون عارفين بمحبتهم لنا ....وعارفين بمكانتنا بداخل قلوبهم

لكن يوم نسمع هالكلمات تطمن قلوبنا بان حبنا داخل قلوبهم مانقص ....وتنعش اروحنا

ليه نبخل بكلمه صغيره تطمن اللي نحبهم !!

* احبك ياصديقي (م.ف)*

7
7
7

- قومي نروح لها

- يالله

وتكلمت بحيره /بس وش نقول لاهلنا ؟؟

- بنقول لهم ولدكم الثور طلق صديقتنا

- ههههههههههههه لو تسمعك مزون بتذبحك

- هذاك اول ياشمس الحين كل شئ تغير

افقدي الأمل انها ترجع مزون اللي عرفنها لو يمر الوقت وتسلى بس بيظل جرحها ندي






....................................







صراخهم واصل لآخر البيت

لهم نص ساعه واصواتهم ماهدت وكل مالها وتعلى زود

هي مصره على رايها وهم معارضين

ماحد فاهمها ....ماحد مقدر وضعها ....لازم تروح لها ...ماتقدر تخليها لحالها بمحنتها

- انتي ماتفهمين نقولتس خوالها معيين عليها تجينا ولا نجيها ومغيرين جوالها وش تبين تروحين لها

جت وجلست بجنب جدتها / يمه ماقدر اخليها وانا ماحاولت حتى اني اوصل لها

هي محتاجتني الحين وشلون ماكون بجنبها بوقت شدتها افهموني ياناس

- اهلتس مهب مطيعينتس تروحين لها ماهب راضين لتس المذله

- انتي اقنعيهم خليني اروح اشوفها لو مره وحده بس ابي اتطمن عليهم راضيه انا بالمذله

مو بنتك هي مو انتي مربيتها ماودك تشوفينها ولا على الاقل تتطمنين عليها

تكلمت الجده بصوت اتعبه طول السنين وبيدين واهنه ممكسه بطرف شيلتها تمسح الدموع عن وجهها اللي رسم عليه الزمن اجمل التجاعيد / تحسبينها هينه علي اني اشوف بنيتي متطلقه ومرجومه ببيت غريب ماعمرها طبته

دريت عن السالفه قبلكم ولبست عباتي ووقفت عند الباب لين ماودوني لها

بس طردوني ....ماقدروني.... مايشوفوني عجوز والشيب مغطي راسي والعصا بيدي

قلت لهم بشوف بنيتي وباخذها عندي قالو لي ماعندنا بنات لتس هذي بنتنا واللي رابطها فيكم اول طلقها ولا عاد نبي نشوف احد منكم هنا

هذي بنتي ربيتها بين بناتي واخذوها مني وتهدج صوتها وسالت دمعه قهر على خدها الطاهر

يعني كيف ؟!!خلاص ماعاد بشوفها بنحرم من شوفة صديقتي

يعني انسى ان بحياتي صديقه اسمها مزون

عارفه هي ان مزون مو قويه وانها ماتقدر تعارض رغبة خوالها

يعني بالمختصر بتنحرم منها الا كان بتصير معجزه

تملكها غضب شديد وقهر....حقدت على متعب وعلى اهله وعلى خوال مزون

حقدت على الحب اللي عذب مزون طول حياتها

قامت من الصاله وتوجهت لدور الثاني بسرعه وعيونها غرقانه دموع ماتشوف اللي قدامها




...........................





نازل من غرفته بسرعه وعصبيه جده عنيد للآن معند على رايه ومو راضي انه يجيبها للبيت

رجال العائله تدخلو بالموضوع بس جده رافض وزعلان عليه

وجدها اقلقه باتصالاته بيرجع لديرته ولازم يجي ياخذها

نفسيته زفت طول الوقت معصب واعصابه مشدوده ولا يتحمل اي كلمه وعلى طول يثور ماخذ اجازه من شغله

مايبي يفرغ باحد ماله ذنب غضبه ويسوي شئ يندم عليه
7
7
7

- آآآآي

رفعت الجلال وغطت وجهها عنه

ارتفع صوتها غاضب /داخل بيت مليان حريم مو محارمك ماتعرف تتنحنح وليه تدخله من الأساس تتمشى به كنه بيتك

فاتح عيونه باستغراب من تصرفها تتكلم معه بعصبيه وكانه ذابح شخص عزيز عليها

- خير انتي شايف طولة اللسان وقلة الأدب عاجبتك كل يوم والثاني مديتي لسانك تصارخين

- اوووووه ترى مالي خلقك وخر عني بس

- واذا ماوخرت وش بتسوين

- وخر بس بلا حركات بزران شايفني فاضيه لأشكالك

- اشكالي !!

وش فيهم اشكالي

- لا سلامتك مافيهم شئ

بس وطو راس اهاليهم وسودو وجيهم وراحو تزوجو لهم وحده ماهي من ثوبهم ومن ديار الكفار وجابو منها عيال

ولا ندري هم عياله بالحلال ولا عيال غلطه بينه وبينها

اتسعت عيونه بذهول وعصبيه وجه صار احمر وبينفجر من الغضب

عروق رقبته وجبينه برزت بشكل مخيف

ورفع يده

طــــــرآآآآآآخ

وتردد صدى صوت كفه يوم هوت على خدها


ماهمها ألم خدها ولا همها الدم اللي طلع من شفتها ولا همها وجهها اللي انكشف والجلال اللي استقر على كتوفها

الألم اللي تحس فيه داخلي.... ألم نفسي

ماعمر احد رفع يده عليها .....يجي هذا ويضربها

ليته محرم لها وله حق عليها بالنسبه لها غريب مثله مثل اي واحد بالشارع كيف يتجرا ويضربها

حست بذل واهانه كــــبـــيره شعور عمرها ماحست فيه

رفع كفه لوجهه وشاف باطنه احمر من قوه صفعته ....كور يده بندم على تهوره

ماله حق يمد يده عليها ولا له حق يفرغ غضبه عليها

صدق كانت تستاهل على كلامها بس ماله حق باللي سواه

لو يدرون اهلها باللي سويته بيكسروني مب بيعطوني طراق

رفع عيونه لها وبتردد قال / آ...آ نا آسف ماكنت اقصد انتي اللي استفزيتيني وخليتيني أضـ.....

- حقــــيـــررر وواطي طول عمرك حقيرررر....تفووو عليك

ودفته بعصبيه وبقوه ماتدري منين استمدتها وبجسم ضئيل يفوقه هو قوه وحجم عشر مرات





..................................









ازعاج بواري السيارات...... الطريق زحمه ......الأشاره تصير حمرى وخضرى والسير متوقف .....

الأعصاب مشدوده ....والعصبيه باينه على الوجوه

قطرات المطر تنزل على السيارات وتشكل خطوط مايله عشوائيه بشكل حلو وبمنظر محبب لنفس

اللي مشغول وعنده موعد وكل شوي يرفع يده ويطالع الساعه ويتأفف تأخر خمس دقايق يمكن أو عشر عن اللي مواعده


واللي يمسح العرق المتصبب على جبينه .....الجو مكتوم فيه رطوبه بسبة المطر ...

لو كان ماشي بالسياره بيجيه هوى بارد ويخفف من رطوبه الجو بس السياره واقفه والهوى اللي حولها واقف مافيه نسمه هوى تخفف عليه

والأطفال يطلعون يدينهم من الدرايش يتلمسون قطرات المطر بفرحة طفوليه وكأن الموقف وعصبية ماتعنيهم بأي شئ

صار لهم واقفين بالطريق ربع ساعه بسبب الحادث ....وراهم موعد مهم والحادث اخرهم

- الله يستر علينا من هالحوادث حصدت عيالنا والله

- امييييييييييين




اخيراااا انفتح السير وتحركت السيارات



- الحمدلله مابغوا يتحركون

مشى بسيارته وراح للحي اللي يبيه ومن حاره لحاره اردى منها ..... الاناره مو كثيره والحواري مظلمه وموحشه

البيوت اللي فيها قديــمـــــه ....والحاره هاديه هدوء مخيف ...

والهوى شتوي خفيف يحرك الشجر ويصدر صوت مسموع مرعب....


تطالع البيوت والحاره باستغراب ماتوقعت انهم يكونون ساكنين بمثل هالحاره مو ازدراء منها ولا استحقار ....

لا .....هي مستغربه لان حالتهم الماديه ميسوره فليش ساكنين بمثل هالحي وهالبيت

دخلو حاره مافيها نور بتاتاً مظلمه تماماً الا من نور بعض البيوت الخفيف اللي ينور بس الباب اللي هي عنده

بس نور سيارتهم هو اللي ينور الطريق قدامهم

بان لهم من بعيد جسم طويل واقف متشح بالسواد ......

قربو اكثر له ووضح لهم جسم حرمه عليها عبايه وبجمبها شنطتين كبار وكيسه


وقف السياره ونزل منها بسرعه متجه للحرمه وعلامات الصدمه والذهول على وجهه


7
7
7

وبحركه خوف لاأراديه.... رفعت يدينها ومسكت عباتها وضمتها لصدرها .....رجعت بخطوات سريعه متعثره ولصقت بالجدار تحمي نفسها

قرب لها أكثر

وانطلق من بين شفايفها صوت مرتبك خايف ....حروف وكلمات متقطعه وغير متناسقه ....تطلع منها بدون وعي وغير ترتيب

- اللــ ....الله .....الله يخليك لآآآ تـ ..تــتـسوي فيني شئ

وقف بصدمه أكبر لما سمع صوتها المرتبك المذعور وشاف شكلها وهي تحمي نفسها بخوف وبيدين ترتجف

انلجم لسانه بيقول لها من هو بس منظرها وصوتها ربطت لسانه

7
7
7
7

جالسه بالسياره وتشوف الموقف من اول ......وتشوفه وهو واقف ساكت والحرمه لاصقه بالجدار بحركه خوف منها

نزلت من السياره واتجهت للحرمه بسرعه

وهي بطريقها لها تشوف الحرمه تجلس بجزع وخوف على الارض وكانها استسلمت لمصيرها دون ادنى مقاومه منها

وصلت لها وحطت يدها على راسها / مهره ......؟؟!!

أنا الجازي ......

حنا أهل ذياب

رفعت رأسها للجازي بتردد وعدم تصديق ....‏‏وبحركه سريعه حضنتها بجسد مرتجف مبلول باااارد..... ونفس متقطع

- طلعني ....تأخرتوا عليه وطلعني برى البيت .......سافر وخلاني لحاالي

لحاااااااالي بالشارع...... جاني اثنين .....خفتــــ .....ظلاااااام ...... انتظرتكم كثيرررر بس تأخرتو

كلمات يقطعها صوت صياحها.... وصوت مرتجف خايف .....

تبي تضمها..... تبي تهديها .....تبي تمسح على ظهرها وتطمنها

بس ماتقدر .....مهره ماتركت لها مجال مطوقتها بيدينها بقوه ولا تقدر تحرك يدينها
7
7
7

للآن مصدوم ماتوقع أن توصل الدناءه بجدها ويسوي بها هسواه

مايكفي انه طلعها من بيتها وسكنها بهالبيت الشعبي القديم وباع البيت

مايكفي انه عيشها عيشة الذل والمهانه والفقر بعد حياة العز والرخاء

الغضب والقهر متملكينه ......وده يتكلم يهاوش وده يسوي أي شئ عشان يطلع غضبه وقهره

بس هي وش ذنبها يتكلم عندها ويزيد همها هم .......أكيد هي منقهره اكثر منه ....اكيد انها حزينه

أصعب شئ لما تحس ان أهلك عزوتك ....سندك....فخرك....عزك...واللي تتكي عليهم ....وتلجأ لهم لاجار عليك الزمن

مايبونك....مايتمنون لك الخير....مهملينك....بوقت شدتك ماتلقاهم حولك

أجل كيف شعورها هي ؟!!

والشخص الوحيد اللي بقى لها من أهلها واللي مفروض يكون أحن شخص عليها

يعتبرها شئ ثقيل وانحط على عاتقه ويبي يتخلص منه باي طريقه

كيف شعورها وهو راميها لحالها بالشارع !!!

ظلآآآآم.......بررررد..... مطررررر ..... وحـــشـــه ....رجال طامعين فيها ..... خووووف....ذل

ويــــــتــــــــم.....

يتيمه....ومافيه أصعب من كسرة قلب اليتيم






......................







-انت انهبلت تبي تتزوج واخوك طايح بين الحياة والموت بالمستشفى

- اخوي بخير وانا تطمنت عليه من الدكتور وقالي حالته مستقره وماعليه خوف

وانا مسافر مسافر بزواج ولا بدونه الله لايعوقني بشر بس ابي احد معي بغربتي يونسني ويردعني عن الحرام


كلام ولده صح ....الفتن حوله والحرام للمكان اللي بيسافر له ولده حلال

والوحده شينه ....غربة اهل ووطن ....واخوه حالة مستقره مالها داعي جلسته جنمبه

حط يده على كتف ولده وربت عليه / اجل على البركه والله يكتب لك مافيه خير وصالح

باس راس ابوه ويده وارتمى بحضنه ....رفع ابوه ييدينه ولفها عليه وكف يده يربت على ظهره باستغراب من تصرف ولده ولمعة دمعة اب اشتاق لحاجه ولده له

مسند راسه على كتف ابوه ومايدري وش شعوره بهاللحظه هو فرح هو حزن ....هو قهر هو غيظ

ولا يدري ليه هو الحين بحضن ابوه ....يمكن يبي صدر يوسعه هو وهمومه

يمكن يبي الشخص اللي تحمله بصغره واعتنى به يحس بشي من اللي بداخله

يمكن يبي يحس ان احد يشاركه همه ويخففه عنه

مايدري ليه حضن ابوه ....ولا يدري وش شعوره بهاللحظه

افكار متلخبطه وشعور غريب

وحاجه طفل بجسد رجل لحضن الاب اللي اعتقد انه ماعاد يسعه

لكنه كان غلطان

عمر حضن اللوالدين مايضيق

عمر الحضن اللي احتوانا بصغرنا يصد عنا

عمر الحضن اللي كان مفتوح لنا يتسكر بوقت حاجتنا له

حنا اللي نتوهم اننا كبرنا

وحنا اللي نحس ان حضن واللدينا ماعاد يسعنا

لكن لو جيت تبي دفاه

لو جيت تفرغ همك بوسطه

لو جيت محتاج حنانه

لو جيت بعد زمن طويل وانت صاد عنه وملتهي بدنياك

بتلقاه مثل ماخليته بصغرك ماتغير

رحب وواسع ودافي وحنون

بيحتويك بأي وقت






......................









مد يده لها يصافحها وهي ترتعش ....

مو خوف ....ولا حيا....

مايدري ليه يده ترتعش ....

واجه رجال وشخصيات مهمه بس ماعمره صار حاله مثل هاللحظه

بالعكس دايم جرئ دايم متمكن من نفسه ويقدر يسيطر على أنفعالاته

بس معها تغير حاله كثيرررر.... قلبه يدق بسرعه غريبه عليه أول مره تجيه

يده ترتعش..... العرق مبلل منابت شعره وباطن يده.....الكلام واقف بنص حلقه ومو راضي يطلع

- احم حمم ..... هلا والله نورتي البيت

- جاه صوت من وراه أفزعه / الحمدلله مابغيت تتكلم

تكلم من بين سنونه مو ناقص شئ يربكه زود /الجااااازي هوينا

عرفت أنه بيعصب ......كتفت يدينها ومدت بوزها/آآآآسفه أبوك قالي خليه يسلم وخوذي البنت معك لفوق لاتخلينها تجلس معه إلا بعد الـــــعــــرررررس

فتح عيونه على آخرهم/ باللهي !!!

- واللهي

-تراها زوووووجتي كان مادريتو

-والله انا عبد مأمور عندك اعتراض قله لآبوك مالي دخل لاتكلمني انا

تكلم بعناد غريب على الجازي /بجلس معها وبسولف لـــيـــــــن الفجر عندكم مانع طلعوه

يمكن انحرج من تصرف أبوه عند زوجة وبيسوي أنا القوي واني ماني صغير قدامها او يمكن من ارتباكه ماقدر يتصرف صح
ماتدري ليه سوى كذا

ميلت فمها بعدم أهتمام /كيفك انا قلت لك .....لاتلوم الا نفسك لو قالك محسن شئ بعدين

- طيب طيب بس اطلعي

رفعت كتوفها بلا مبالاة وطلعت

ألتفت لها للآن متغطيه مافتشت ....وللآن يدها بيده

- ارفعي الغطاء عن وجهك زوجك انا وانتي حلالي
7
7
7

ماتبي تفتش ....ماتبيه يشوفها لأول مره بهالمنظر المزري

مبلله من المطر .....وجهها عليه بقايا الصياح والدموع

خالي من اي زينه .....علامات الحزن مرسومه عليه

لو كانت بموقف حزن.....بموقف صعب .....لكن تظل انثى

تتوق نفسها للجمال والكمال.....وبالأخص عند زوجها شريكها بالحياة

تكلم بصوت هادي ونبره واطيه / نفسي اشوفك يامهره....منيتي شوفة وجهك



الموقف كبيررر....يومها كان طوووويل وصعب ومتعب

مشاعر هايجه ومتلخبطه داخلها .....لأول مره تشوفه بعد الزواج.....لأول مره يده تلمس يدها

مشاعر خجل وارتباك وخوف مشاعر غريبه مجتمعه وثايره وسط صدرها
7
7
7

-ذيــــــــااااب

ألتفت لمصدر الصوت وقابلته عيون أبوه المعصبه

ماينكر ان شئ من الخوف تملكه ....ترك يدها بسرعه وخوف بحركه أضحكت مهره وأبوه

- ماوصلت لك الجازي كلامي ؟؟

-آ ..آ ...

- لا ماقلت له نسيت يامحسن

ألتفت على الجازي / نسيتي ؟!!

قلت لتس كلام توصلينه ..... ماعندنا بنات يشوفونهم رجالهم قبل العررس

تنهد براحه وشكر الجازي بقلبه لانها أنقذته من الموقف اللي انحط فيه قدام أبوه وزوجته

حطت يدينها على خصرها وميلت وقفتها بحركه قهر طفوليه منها / ياسلآآآآآآم أجل ليه مخليني أقابل طلال واجلس معه ساعتين لحالنا ...؟

على روسنا ريشه يعني وذياب ومهره لا......؟

- نزلي يدينتس وعدلي وقفتس وانتي تكلميني

نزلت يدينها بحيا من اخوها /آآآسفه

- انتي بنت أبوي هو ولي امرتس بعد كلمته مالنا كلام من بعده

وضرب على صدره.....بس مهررره بـــنـــتــــي ....وانا مسؤل عنها ومال أحد كلام عليها قبل العرس غيري .



بنتـــي بنتـــي ....!!

كلمه رنت بأذنها....كلمه لها صدى حلو بمسامعها....كلمه انحرمت من سماعها

كلمه حست بصدقها وهي تطلع منه .....حست بأبوته وحنانه

عيونها تدمع من تحت غطاها ....بس حست بلذة وجود الأب بجانبها وبحياتها

قرب لها وحط يده على رأسها بحنان أبوي ورحمه منه/ مهره يابنتي ..... انتي الحين وحده من بناتي

ماتفرقين عنهم بشي ويمكن انتي ازود منهم بالغلا انتي زوجة الغالي.....اللي يضرتس يضرني واللي يفرحتس يفرحني....قدرتس من قدري

لتس مني وعد وعلي عهد انتس ماتذوقين الضيم والذل وراسي يشم الهواء بإذن الله .....اللي يجيستس بكلمه يتشهد على روحه

كفاتس ماجاتس وانا أبوتس .... توتس شباب انسي كل اللي صار وأبدي حياتس من جديد


طول ماهو يتكلم كانت تصيح .....طول ماكانت تسمعه تنعرض قدامها صور ابوها واخوها

حست فعلاً أنه أبوها...حست بالحنان اللي فقدته بموت اخوها.....

تمنت اب ...تمنت سند....تمنت عضيد....تمنت ظهر تتكي عليه

دعت وأللحت ....وربي استجاب لها دعائها

ولسانها يردد / يآآآآالـلـه ....مأوسع رحمتك وأكثر فضلك.....لك حمدي وشكري

مسكة يده اللي على رأسها ورفعت الغطاء عن وجهها وباستها بأمتنان بنت لأبوها

باستها بلهفة بنت فاقده حنان الأب...

باستها بشوق يتيم لأبوه ....

تكلم والعبره خانقته /خلااص يابنتي اذكري الله .....مامليتي من الصياح....قولي لاإله إلا الله

-خلآآآآآص عاد تراكم صيحتونا

لف لها باستغراب / هههههههههههههههه أجل صيحناتس.....الدموع تغسل العيون احسن لتس


عيونه مسمره عليها كل الجو ماعنى له شئ ......كل الكلام اللي انقال ماكان منتبه له....

كل باله وتركيزه عليها .....على وجهها ....هايم فيه وباشباهه

ومسحة الحزن اللي فيه جذبته زود لها.....

الرجل فينا لما يحس ان المرأه ضعيفه وحزينه وانه هو اللي يحميها وهو اللي يدافع عنها ويشيل عنها حزنها

يحس بجاذبيه لها زود .....طبيعه بالرجل.... لكن مايحب أنها تكون ضعيفه وسلبيه بكل حياتها


ماكانت جميله وماكانت بيضاء....جمال عادي وبياض عادي معتاد

لكنها بعينه مافيه اجمل منها ....وتسوى عنده مليووون وحده

- احم احم يالطيب يالحبيب .....ياهوووه ....نزل عيونك

ابوك بيشوتك بعد شوي والبنت مستحيه دخلت بثايبها شوي وتاكلها بعيونك شوي شوي على روحك

- هآه

-لآآآ الرجال مو معنا كلش.....اقوول الأفضل انك تشتري سلامتك وتنحاش لأن شكل ابوك ناوي لك نيه

شاف ابوه وشاف شكله ....فعلاً شكل ابوه بيسوي له شي/أ..أسـتأذن أنا ......مع السلامه مهره اشوفك على خير

- بعد العرررس بإذن الله

- بعد العرس بعد العرس أمرك يبه

كاتمه ضحكتها من شكل ذياب وخيبة الأمل اللي انرسمت على وجهه بعد كلام أبوه



.................................





...................................



فاتح ازارير ثوبه ....وشايل الشماغ من على راسه

ومنزل مرتبة السياره ومرخي جسمه عليها

حاط اصابعه على راسه ويحركهم بحركه دائريه الصداع فتت راسه يبيه يخف اكل مسكن ومافاد معه

وحرارته مرتفعه .....عيونه مغمضهم من الالم

له حوالي ساعتين وهو يفتر بالسياره من شارع لشارع وباله مشغول بالمصيبه اللي حلت عليه

حط راسه على الدريكسون وزفر بضيق وقل حيله / يارب رحمتك

مايدري وش الحل ولا يدري كيف بيتصرف انحط بين نارين ولا يدري ايهم اخف حراره


ورجع بذاكرته لقبل ساعات من الحين

7
7
7

نازل من سيارته بسرعه اتصاله خوفه وخلاه يجي بسرعه وبدون تفكير دخل للمقهى اللي مواعده فيه ولقاه جالس باخر طاوله

توجه له وقام الثاني من مكانه واستقبله بكل حب وترحيب

للآن على اعصابه مايدري وش يبي فيه ولا يدري ليه طلب يقابله لحالهم وبمكان غير بيتهم

يفرك يدينه ببعض بتوتر ينتظره يتكلم ويقول اللي عنده

ناداه بتردد / عبدالعزيز

- سم

- عدوك يسم ....اكيد مستغرب من اتصالي وليه طلبت اقابلك ....بدخل بالموضوع مابي اقلقك ولا اشغلك

شاف الحيره بعيونه / افا عليك خذ راحتك امرني وش بغيت

- والله محتار ومستحي منك مادري منين ابدا ولا وش اقول

- قل مافي خاطرك اسمعك انا

- مالقيت انسب من هالوقت افاتحك بموضوع دايم ببالي .... امورك الحين استقرت استلمت وظيفه وبتقدر تفتح بيت وتعيل اسره واكيد الزواج طرى على بالك

حط يده فوق يد عبدالعزيز / انت رجال تنشرى ومناسبتك شرف واتمناك دايم نسيب لنا وزوج لوحده من محارمي عمتي تزوجت مابقى غير خواتي

مو قصور باختي ولا ان فيه شئ يعيبها ولا حقران بقدرها لا بالله بس انت رجال قل ماينلقى مثله بهالزمن واقدر أئتمنك على اختي

لاتحسب اني مرخص باختي بالعكس ...كثار طقوا بابنا خطاب لها لكننا نبي الكفو لها واللي يستاهلها وماراح نلقى احسن منك كفو لها

فكر بالموضوع وخذ راحتك ...كانك وافقت بيتنا مفتوح ونرحب بك انت واهلك بأي وقت تعالوا لنا خطاب ولك الحق بشوفتها

وكانك ماتبي علينا وعليك ستر الله واللي بينا لا يمكن يتغير ولا بيشيل خاطري عليك شئ بتظل مثل مانت اخو عزيز وغالي وسواءً كتب الله بينكم نصيب

ولا لا اللي بينا لا يطلع لأحد ولا ابي ابن امه يدري بالكلام اللي قلته لك

انا مقتنع باللي سويته وعارف انه الأحسن لأختي بس هي بتنظر للأمر بنظره غير ....بتحس اني ارخصت بها

ولا ابي ابوي يدري واني سويت شئ يحدد مصير بناته من وراه

ناظر وجه عبدالعزيز وشاف الصدمه باينه عليه وعلامات الرفض مرسومه على ملامحه

حس انه تسرع وندم على انه قاله وتمنى لو ان الوقت يرجع دقايق لورى ولا فاتحه بالموضوع من اساسه

- قلت لك مانت مضطر توافق وبتظل مثل مانت عزيز وغالي

كلامه صدمه ماتوقع انه ينخطب وانه بنظر الناس الرجال النادر وجوده اللي ينشرى نسبه ومن من ....من ناس ماعمره تخيل يناسبهم بالعكس كان نسبهم مثل الحلم بالنسبه له

لكن الحين صار حقيقه ومو هو اللي راح لهم خاطب هم اللي جوه خطاب


7
7
7
كور يده بغيظ وعظ شفته قهر ليته بلع لسانه وماقال شئ ....

وبداخل نفسه يقول [جيته خاطب وشاري وبالاخير يرفض ويشوف نفسه ارخصت باختي بدون فايده ليتني ماتكلمت ليتني مانطقت بحرف ]

صدق انه قاله ان اللي بينهم ماراح يتغير وان انه له الحق بالرفض والقبول

بس برفضه حس باهانه وذل كبيرررر ....حس كأنه اهان اخته ...حس بالذنب تجاهها كأن فيها عيب او ناقصه يوم عرضها عليه

صدق انه مقتنع باللي سواه بس تظل اخته شقيقة عرضه لحمه ودمه ماتهون عليه

انجرح من تصرف عبدالعزيز وحس بجرح اخته كيف بيكون ألمه لو تدري عن اللي سواه

دفع الكرسي بقوه بيفرغ غضبه مايبي يتهور ويسوي شئ يندم عليه مهما يكن له الحق بالرفض والقبول واختيار شريكة حياته

بس حمية الأخ لأخته هي اللي اشعلت الغضب بصدره

- يالله اشوفك على خير

كأن صوته صحاه من غيبوبته والسرحان اللي كان فيه ....قام بسرعه عبدالعزيز من كرسيه ولحقه ومسكه مع مرفقه / وين يارجال وين بتروح

تكلم بغيظ مكبوت / ردك وصل مابي اطول عليك واحرجك

- وش تحرجني ووش خرابيطه ....قل لا إله إلا الله وتعال اجلس بس

سحبه معه ورجلين الثاني تقاوم الرجوع معه وجلسه على الكرسي ورجع جلس بمكانه

- كنت تتوقع سكوتي يعني رفضي صح ؟

- ايه

- لا غلطان ....انا انصدمت من طلبك ماتوقعت انه بيجي يوم واناسبكم

صدمه الخبر بس مب الرفض ....فيه احد يرفض نسبكم انهبلت انت

زفر بارتياح وكأن جبل وانزاح عن صدره ....اختياره كان صحيح فعلاً رجال ينشرى /الله يوفق اختي معه

حرك راسه يمين ويسار وكأنه يمنع نفسه من الصياح / الـــــلــــــــــه ياعزوز بئيت باش مهندس ائد الدونيا وعلى وش قواز واتخطبت ....العيال كبرت ياولاد

انطلقت ضحكه من كل الأثنين واحد يضحك بكل راحه وسعاده ويدعي الله بالتوفيق لهم وواحد يضحك يبي التوتر يخف عنه شوي

- اممممم ممكن اسألك سؤال كان مافيها احراج

- حنا الحين اهل ونسايب اسأل لاتنحرج من شئ

- عشان اخبر الأهل مب لشئ ثاني

حس بتردده / عبدالعزيز اسأل وش فيك منحرج وخايف

- انا عارف انه سؤال غبي بس عشان الأهل ....أي وحده من خواتك بأخطبها؟؟

- هتون

هتون ....هتون ... تردد الأسم بباله ....هذا اللي كان خايف منه ....هذا هو الاسم اللي مايبيه ينطقه

هتون اللي مسكتها مع خويها

هتون اللي كنت بانتقم من خالد عن طريقها

هتون اللي ساعدتها ونحشتها

وشلون باعيش معها ....وشلون بأمنها على بيتي وعيالي

بنت قدرت تخون اهلها وتسوي اللي سوته من وراهم وهي ببيت مليان وش بتسوي ببيتي وهو فاضي

وشلون باتركها لحالها بالبيت وشلون بارتاح....بيصير كل وقتي تفكير وقلق

حياتي بتكون شك وهواش ....اي حياة باقدر عليها

حتى لو انها تابت حتى لو انها ماراح تسوي اللي كانت تسويه وماراح تخوني لكن بتظل بنظري امرأه لعوب خانت اهلها ومااستاهلت الثقه اللي انعطت لها

باي عين بطالع بوجهها :...بعين الشاك ....بعين الجلاد ....بعين الاحتقار

ماقدر اتخيل شكل حياتنا جحيم ×جحيم

بس كيف ارفض ووش اقول

افضح البنت

افضح اهلها

لو اتكلم بادمر عائله باكملها مب بس هي

لو تحس بعذاب وألم تستاهل هذا جزاء عملها بس اهلها وش ذنبهم

لهم خير علي وعلى اهلي وشلون اجازيهم بهالشكل .....لازم ارضى وبسكات اشيل همي لحالي

بس كيف باعيش معها اي حياة بتكون حياتي

يـــــآآآربـــ رحمتك











& تمنايتي لكم بقراءة ممتعه ومشوقه &




& أخوكم / هاجس ليل &






.......................................

اهلين اخذت لفه علي القصه عشان اتذكر بعض المواقف ورجعت
بس بسال عن الخاين يوسف مامات احسن ابيه ينشل ويصير بين
الحياوالموت عقاب له علي الي يسويه بشمس
عناد طلع متزوج تدري فكر انه ياخذ مزون ويعالجها ويحبها مابيه للجازي
ومزون وين راحت
عبدالعزيز مشكلته صعبه لاهو قادر
ياخذها ولا قادر يرد صديقه
اتمني ماتطول الغيبه مره ثانيه

روعــــــــــــــــــــــــــــــــــــــة

مشكور على البارت رغم اني توقعته اطول لانا النا فترة طويلة ننتظر

بس بارت روعة واحداث كثيرة والله خفت انه شمس تقتل يوسف بس الحمد لله اانه حلم

مزون متى طلقها متعب وكيف اخوالها دروا ووكيف راح تتلاقى مع صديقاتها

وان شاء الله ربنا بعوضها وترجع تتكلم والله انها مسكينة

مشكور مرة تانية وانتظر البارت الجديد بفارغ الصبر

تحياتي لك:))))))))))

مراحـب..
اول شي الف الحمد لله عالسلامـه..وان شاء الله تكون اخر الغيبات.. ثانـي شي.. بارت احترت شقول عنـه..يهبـل..ولا يينن..ولا شنوو..مادري..بس صج حيل حيل وحشتنـي القـصه..واحم..تدودهت شوي وما عرفـت من يتكلم.. ياريت لو تحط الاسم قبل :)..واحم الف شكر لك عالبارت..

شمـس
والمعاناة الي تعيشـها..والكوابيـس الي تشوفهـا..بسبب الي سوته بيووسف.. صج انه ولا شي من الي سوااه لهـا..بس انها حاولت تقتلـه شي مو راضي يغيب عن بالهـا..والحمد لله الي مامات..صج ان ودي افتك منه اليوم قبـل باجـر.. وودي لو انا الي حاولت اذبحـه مو شمـس..لكن خل يعتـرف قبـل..ويبين براءتها وان مالهـا ذنـب..

عناد
كلش كلش ما توقعت..انه يكون متزوج..ولا اجنبيـه..وعنده عيال..يعني صج صدمـه..صدمـه كبيـرة..ما ينلامون يوم مو راضيـن ييبهـا البيـت.. بس بعد عيالـه مالهم ذنـب بالي صـار..وما ينلام يوم عطا الجازي طرااق..لان صج كلامهـا كان قوي..معـاه..

الجازي
وان الكل يتطنز عليهـا..مو مصدقين ان هذي الجازي نفسهـا..مسكينه كسـرت خاطـري..طلال لحد الحـين..يهبـل معاها..بس بعدين الله يستـر..

مزون
وطلاق متعـب لها..وان خوالهـا خذوها..وبعدوها عن اهلهـا..وما خلو احد يزوهـا حتى يدتهـا..الي مربيتهـا..طردوهـا..تبي تنساه وتبعد عنه..ما اعتقد بعد كل هالحـب تقدر تنساه..لكن دامـه ما قدرهـا..لازم تبعد عنه..الله يعينهـا..

مهـرة
وظلم يدهـا لهـا..وشلون مخليهـا برا بالشارع..واحساسها بالامن عندهم.. خاصة لما قالها بنتـي..حست انه صادق معاها..وانه بكون سند لهـا..عسى تلقى هني.. الي مالقته عند يدهـا..

بنوووتة