قمر وخالد للكاتبة حمران النواظر

هذي الجزء الثاني اتمنى تعجبكم ماراح اكمل تنزيل الاجزاء الا اذا شفت الردود لووووووووول
تخاف من الطيارات ولانها ماتقدر تقول لخالد تحملت وسكتت قعد خالد عند الدريشه وقمر على الطرف ربطت الحزام اول ما قعدت وكانت خايفه ياربي ساعدني غمضت وصلوا المطار ودعوا بعض وخالد خذه قمر ودخلوا الطياره قمر عيونها وخالد حس ان قمر فيها شي بس ماتكلم وياها اول ماسارت الطياره قمر مسكت ايد خالد اللي تفاجئ من الحركه طالعها كانت مغمضه عيونها حس بالدوران شعور غريب انولد فيه من لمسته حس بدفا ايدها ونعومتها..
اول ما ركدت الطياره شوي وخف توتر قمر وفتحت عيونها تنهدت بالقوه انتبهت لايدها وبسرعه وباحراج سحبتها
قمر وويها احمر:اسفه
خالد:لا عادي بس حاسبي مرة ثانيه
قمر باستغراب وحست بالقهر:انشالله
خالد لام نفسه شوي بس مسرع ماتعدل مزاجه.. سند راسه وغمض عيونه لكن وين يرقد مع انه كان وايد تعبان..قمر كانت هاديه وهدوئها خلاها تنام وخالد انتبه للهدوء اللي يمه كانت قمر نايمه وكأنها ياهل شكلها كان جميل نزلت خصلة شعر من تحت الشيله وخالد يعرف بتمسك قمر دخل الخصله بهدوء تحت الحجاب وحس بالذنب على معاملته لها..وقعد يفكر قمر ياهل توها داشه 18 سنه وتتزوج من شخص اكبر منها بسبع سنين ليش تتخلى عن حياتها عشان الزواج ولا غاصبينها عالزواج نفسي بس ما أقول الا الله يعينا ياقمر..
قمر صحت على صوت خالد واهو يقعدها بابتسامه غريبه عشان الطياره بتنزل ربطت الحزام انزلت الطياره بقوه شهقت قمر وغمضت عيونها
خالد:هدي اعصابج ماصار شي بس انزلت الطياره بقوه
قمر:متى بتوقف الطياره عن الاهتزاز خلهم يوقفونها
خالد:ماعليه يا قمر صبري حالج شوي مابقى شي وراح ننزل
قمر فتحت عيونها والتفتت تطالع عيون خالد ومشاعر غريبه قاعده تتفجر فيها وشوي شوي الطياره خفت حركتها وقل اهتزازها ليما وقفت يوم قام خالد مسك ايد قمر يقومها حس بصغر ايدها بالنسبه لايدها قمر ماتت من الحيا فسحبت ايدها ومشت جدامه خالد كان يطالعها وايد قصيره بس كانت آيه من الجمال نزلت قمر من على سلم الطياره وخالد مسك جنطتها لانها نستها بالطياره يوم دخلوا المطار كان في عرب بس من بلدان مختلفه خالد اشر لقمر على مقاعد الانتظار وراحت واقعدت بروحها كان في اجنبيه قاعده وتحاول تسكت بنتها من البجي اللي عمرها تقريبا سنتين كان فيها النوم بس امها ماتبيها تنام لان وراهم درب قمر اشرت للياهل تسكت وبتعطيها حلاوه الياهل سكتت وقمر التفتت تدور جنطتها بس مالقتها وشافت خالد وكانت عنده الجنطه تفشلت وقعدت تلعب مع الياهل وتضحك معاها الياهل حاولت تسحب شيله قمر بس قمر صارت اسرع منها بس اسحبت طرفها وحطتها على راس الياهل
الياهل:smell good
قمر:thanks
الام:where r u from
قمر:Kuwait
الام:nice country we've been there last year.So what r u doing in Italy
قمر:honey moon
الام:that’s very romantic. Is that your husband? كانت تأشر على خالد
قمر:yes
الام:y r lucky girl but y r more beautiful than him
قمر:thanks my dear
الام:my name is Debby and my husband is peter
قمر:hi my name is gomar and my husband is khalid
الام:sorry yr name is gomar?
قمر:yes it means moon
الام:its beautiful name steffany say hi
ستيفاني الياهل:hi
قمر ظلت تسولف معاهم وتضحك لين يا ريل ديبي عشان يروحون بس الياهل تعلقت يقمر وقمر حبتها ولمتها وبعدين راحوا وكان خالد يطالع قمر يا خالد وعطاها جنطتها ووصلوا قاعه الواصلين يالهم ريال ايطالي ورحب فيهم وخالد يسولف معاه وكان يمدح قمر وخالد ما رد عليه وركبوا المرسيدس وراحوا الشقه كانت شقتهم في ميلان من افخم الشقق فيها 3 غرف وصاله كبيره وحمامين ومطبخ اول ما وصلوا قمر اول شي فكرت فيه دش بارد وتنام ووصلوا للنقطه اللي مابغوها الحين اهما مضطرين يعيشون مع بعض في بيت واحد ولا في غرفه وحده بعد قمر كانت ترتجف داخليا ودخلت الغرفه مع الخدامة وفجت جنطتها شافت ثوب ناعم وردي شفاف اول ما شافته استحت وشافت ورقه مكتوب فيها (الفستان غالي واهو هديه من عندنا كلنا اذا فيج خير لبسيه مريم ومروه) قمر ما عجبها الموقف وخشت النفنوف بالجنطه وطلعت دراعه خفيفه وراحت الحمام خذت شور سريع يوم طلعت من الحمام لقت خالد قاعد بالغرفه وقعدت واهيا مستحيه ونشفت شعرها خالد كان يطالع شعرها ماشالله شعرها وايد طويل كانت تبي تقول حق خالد انه يطلع او اهيا تروح غرفه ثانيه بس يمكن اهوا مايبي كانت شوي وتبجي...

خالد:قمر على ما أظن أنتي صغيره بالعمر بس نفس الوقت أنتي حرمه وتعرفين عن الحياة الزوجية ولو حتى شوي أنا بحاول إني اسعدج قد ما اقدر أنتي بس طلبي اللي تبينه و انا أنفذه
قمر:أي شي؟
خالد:أي شي
قمر:عند كلمتك
خالد:وأكثر بعد
قمر:آنا ما أبي أشاركك بنفس الغرفة على الأقل مو الحين
خالد انصدم اهي بعد تتمنى نفس الشي اللي أتمناه:ليش؟
قمر:بتكل وياك بكل صراحة خالد آنا مو مستعدة حق هذا الزواج آنا للحين صغيره وما كنت أتوقع كل هذا يصير فيني كنت ابني أحلام كبيرة والزواج ما كان منها بس آنا اضطريت أوافق عشان عايلتنا وعشان ابوك اللي اهوا عمي المريض
خالد انزعج من كلام قمر بس حس بالراحه إن مو بس اهوا الضحية حتى قمر الضحية حسها مسكينة كسرت خاطره ما شافت الدنيا تتزوج واهيا صغيره تنحرم من كل شي عشان العايله ومصالحها
قمر واهيا تبجي:آنا ما أقولك ما أبي أتزوج بالعكس الكل يتمنى الزواج بس آنا ما أبي الحين وأنا حاولت اقنع أهلي بس محد سمعني والحين إحنا تزوجنا ما نقدر نمحيه بس ابيك تريحني على ما أتعود عليك وأتعود على حياتنا مع بعض
خالد قام وراح لها وقمر خايفه من رده فعله:كل اللي تامرين فيه راح يصير راحتج أهم من أي شي ثاني وآنا ماقدر اقولج اعتبريني مثل اخوج لأني ما اقدر أتزوج أختي بس اعتبريني رفيجج وأنا بنام بالغرفة الثانية وأنتي هذي غرفتج ليما نرد
قمر:شكرا خالد
خالد:لا تشكريني يلا تصبحين على خير
قمر:وأنت من أهله
طلع خالد وسكر الباب وراه وقمر حست روحها طايره من الفرحة انسدحت على الفراش وبدت تبجي لأنها فكرت إذا ردوا يطلقها بس كان الطلاق عندها عار وخالد كان بالغرفة الثانية وخذا له كويك شور ولبس هدومه وراح في سابع نومه


الجزء الثاني


نامت قمر من أول ما انسدحت وقعدت الساعة 12 الظهر يعني بالكويت الساعة 1 قامت بسرعة تغسل ويهها وتتيدد وتصلي توها مسلمه اسمعت طقت الباب قامت بثوب الصلاة وافتحت الباب
خالد:تقبل الله
قمر:منا ومنك
خالد:الفطور زاهب إذا تبين
قمر:انشالله بس خمس دقايق
راح خالد عنها وقمر سكرت الباب دعت على السريع وبدلت ثيابها لبست جلابية عنابية ورفعت شعرها وطلعت خالد كان قاعد بغرفه الطعام ياكل ويطالع الجريدة وقعدت قمر تاكل
خالد:نمني عدل البارحة؟
قمر:اي والله نمت بسرعة
خالد:قمر ما تبين نطلع اليوم؟
قمر:ما أدري آنا أول مره ايي هني ما عرف أماكن بميلان
خالد:فيها أحسن بيوت الأزياء اللي تقدرين تشترين منهم الملابس اللي تعجبج والمطاعم الحلوة والمنتزهات
قمر:نروح المنتزهات لأني ما أحب اشتري هدوم من بره
خالد:اوكي عيل نروح منتزهات في واحد راح يعجبج
قمر وخالد راحوا الصالة خالد كان يتذكر يوم كان ويا ندى بايطاليا وقمر قعدت شوي وراحت دارها كانت تحس بملل وخالد قعد بالبلكونه يدخن واهو ما كان يحب التدخين بس بآخر الأيام بدا يدخن لأنه ما كان يستحمل الضغط اللي عليه تذكر قبل 3 شهور قاله انه أبوه صارت له سكته قلبية واهو مريض حيل خالد قال لندى عن أبوه ورد الكويت وحالة أهله كانت متدهورة ووقف لهم مثل الجبل مع انه حس بالضعف أمه كانت معتمده عليه وعلى أخوه وأبوه قام من بعد أسبوعين وعرف إن خالد وخليل أكثر اثنين وقفوا مع أهلهم وفكر يزوج خالد ويشوف عياله قبل لا يموت فكلم جاسم وخليل
بوخليل:خليل مدام انك متزوج آنا حبيت أزوج خالد وأخليه يشوف حياته بدال بره الكويت
جاسم:والله يا خوي أنت أدرى بخالد وتدري انه شوي متحرر وما يحب احد يمشيه على كيفه
بوخليل:ادري فيه اهو غير عن الباجي بس اهو لازم يطيع كلام أبوه
خليل:يصير خير انشالله
بوخليل:بس ديروا بالكم خالد يدري بالموضوع قبل لا آنا اكلمه
جاسم:انشالله
بعدها خالد تطمن على أبوه ورد لندن واهو ما يدري عن الموضوع.. قمر بعد ما درت عن عمها زارته ولأول مره من كبرت سلمت على عمها اللي ما كانت تشوفه بسبب ظروف العايله اللي بينهم أول ما شافها عمها وشاف أخلاقها وحلاتها صمم إن محد ياخذها غير خالد سأل مرته عن قمر قالت له إن أخته ونيسه تبيها حق ولدها عبيد بس إبراهيم كلم أخته بالموضوع واهيا ما قدرت ترده بس حز بقلبها إن قمر ما تكون مرت ولدها اللي مستعيل على الزواج منها وبعدها إبراهيم زار بوخليفه وخطب قمر لخالد والفرحة كانت ما تتصور العايله ردت مثل قبل عايله وحده كلهم على قلب واحد وسكتوا عن الموضوع لين تخلص قمر المدرسة..خالد رد من السفر وخلصت دراسته وكان مصمم يقول لأبوه عن ندى وانه يخطبها بس أبوه كان أسرع منه وقاله عن قمر خالد ما تكلم حس ان الدنيا كلها طاحت فوق راسه اهو مفكر يتزوج ندى وأبوه يبي يزوجه بنت عمه الصغيرة شنو هالتخلف حس انه ياهل الناس تقرر عنه
خالد:اسمح لي يابوي آنا مابي أتزوج بنت عمي
بوخليل:يا خالد أنت ما بتلقى أحسن من بنت عمك أصيله ومربينها احسن تربيه واشوفكم لايقين لبعض
خالد:يبا انا قررت وايد اشياء راح اسويها بحياتي بس رغبتك هذي راح تهدم كل اللي بنيته
بوخليل:قصدك اني ما ابي مصلحتك
خالد:لا يبا بس...
بوخليل:بس شنو يا ولد وضحه
خالد انصدم يوم ناداه ابوه باسم امه ابوه ما ينادي احد باسم امه الا لين يفكر ان الشخص تفكيره ضعيف مثل الحريم
يكمل ابوه:انا ماربيتك وكبرتك وخليتك تدرس بره عشان تطلع عن شوري وتاخذ بنت من بره العايله صج انه احنا متحضرين بس هذا اصلنا خلاص انت بتاخذ بنت عمك قمر واللي شوره يطلع عن شوري لاهو مني ولا اعرفه
خالد فكر بمرض ابوه بس اهو يحب ندى شلون يتخلى عنها ويتزوج بنت كل اللي يعرفه عنها انها بنت عمه واسمها قمر وياهل
خالد:يبا انت على عيني وراسي بس قمر ما اتزوجها وان تزوجتها ماراح اسعدها وانت راح تكون السبب في عذابي وعذابها
بوخليل:جب ولا كلمه اطلع بره لا انت ولدي ولا انا ابوك
بوخليل تعب شوي خالد:يبا شفيك؟
بوخليل:لا تناديني يبا انا مو ابوك اطلع
طاح بوخليل عليهم مره ثانيه وخذوه المستشفى
ام خليل:حرام عليك يا وليدي ليش ماتبي قمر قمر ولا بنت بالدنيا تشابهها
خالد:ما احبها يمه انا ما احبها
ام خليل:انت ما تعرفها شلون ترفضها هذي ربيبة سبع
خالد:اووووهووووو يعني خلاص ابوي العود اهو اللي رباها لازم انا اتزوجها
امه تضايقت من كلامه وخالد حس ان الدنيا اتصكت بويهه حتى امه اللي كان معتمد عليها وقفت ويا ابوه عمه جاسم ماله كلمه عاللي اكبر منه ما في احد يوقف معاه كره قمر حسها اهيا السبب في كل شي وما كان يدري انها ما تدري عن هوا داره
بعدها سافر خالد لندن وشكى الحال لحبيبته ندى ختى ندى قالتله يتزوج قمر عشان حالة ابوه خالد ماقدر يرفض طلب ندى تخلى عن حبه العميق لندى واستسلم للزواج من قمر ورد الكويت وخبر أبوه انه موافق وأبوه استانس من ولده...
خالد واهو بالبلكونه يدخن ميلان كانت غير جوها غير عكس السنة اللي طافت لما كان ويا ندى طلع خالد من البلكون وقبل لا يسكر الباب شاف قمر واقفه تطالعه دخل وسكر الباب
خالد من غير نفس:الجو مغيم بره خلي الطلعة يوم ثاني
قمر:البيت خالي ما في شي عشان نطبخ
خالد:آنا أدق على مطعم ويوصل الأكل
قمر:آنا شبعانه ما أبي
خالد من غير نفس:آنا بعد
خالد دخل غرفته وسكر الباب بويهها قمر حست بالاهانة راحت غرفتها وخلت الباب مبطل وبطلت دفتر خواطرها وقعدت تكتب
(على شرفة ميلان)
ظلي ما عاد يرافقني
حزني يكبر شيئا فشيئا
سرابيات حياتي ضاعت
وما عاد الطريق يرسم لي الواحات
ظلمتني يا قدري ولماذا وأنا صاحبتك
أيعض العبد يد السيدة التي تؤكله
ياليت الحلم يتحقق
وتحقق معه السعادة الأبدية

سكرت دفترها وراحت عند جنطتها طلعت هدومها واغراضها منها وحطتهم بالكبتات وبالأدراج طلعت المصحف اللي شراه ابوها لها حبته وخلته على الطاولة راحت تيددت وقعدت تقرا شوي من القرآن امتلى البيت خشوع بتلاوتها خالد كان يحاول النوم ولما سمع الصوت علباله التلفزيون وراح يبي يقعد بالصاله شاف التلفزيون طافي وسمع ان الصوت يطلع من غرفة قمر وقف عند باب غرفتها صوتها كان ملائكي تهتز له الابدان قعد بالارض واهو يسمع دموعه تنزل بغزاره حتى قمر كانت تقرا وتبجي من كلام الله خلصت قمر وقعدت تبجي اكثر وقعدت تشكي لربها حالها خالد قام ومسح دموعه وراح داره ولبس هدومه عشان بيطلع قمر..قمر مسحت دموعها وخالد طق الباب عليها ودخل عليها
خالد:اذا ما زهبتي بخمس دقايق راح تطوفج الطلعه
قمر استانست:دقيقه وانا زاهبه
خالد راح عنها واهو مرتاح القرآن ريحه وايد وريح قمر اكثر.. لبست قمر بنطلون شاموا بني وبوت مخمل ولبست بلوزه بنيه وجاكيت طويل ولفه بنيه وطلعت وخذت معاها دفترها خالد كان ناطرها وطلعوا..

راحوا بارك هادي فيه رسامين قمر كانت تطالع الرسومات باهتمام من كثر حلاتهم وقعدوا ولاحظت قمر عربه تبيع أشياء تذكاريه استأذنت من خالد وراحت وكانت تدعي ربها إن البايع يعرف إنجليزي عجبها بروش فضي على شكل ورده فيها فص بالوسط
قمر:how much is this?
البايع فهم إنها تسأل عن السعر كلمها بالإيطالي وما فهمت كتب لها 50 ليره قمر فهمت وطلعت الفلوس واهيا رداه عند خالد وقفها واحد وكان يكلمها بالإيطالي وقمر خافت وخالد شافها وبسرعة راح لها وكلمه بالإيطالي وقمر لزقت فيه ضحك خالد وقمر شافته ومستغربه
خالد:يبي يرسمج يقول ما يبي يطوف ملامحج
قمر:لا ما أأمن له ينشر صورتي بعدين
خالد بابتسامه:لا تخافين راح تاخذين الصورة معاج
قمر:واهو شنو راح يستفيد؟
خالد:مو كل يوم يلاقون مثل حسنج وجمالج يا قمر
قمر استحت لأول مره تحس إن خالد يحسها جميلة ووافقت وقعد الرسام يرسمها بكل اهتمام وقمر تضحك على حركاته وخالد واقف شوي بعيد يطالعها والرسام جم مره يتوسل فيها إنها ما تضحك ولما خلص الرسام قمر شافت الرسمة كانت دقيقة وحلوة وايد وحاولت ويا الرسام انه ياخذ فلوس بس ما رضا وشكرته وراحت عنه كانت تبي تروح عند خالد بس ما لقته وقفت تتلفت يمين ويسار وخالد مو موجود لفت انتباهها عربه ثانيه شافت إنها مو بعيده وراحت عندها عجبها خاتم كبير فصه عاج ومحفور عليه بنت كأنها عروس كان النقش دقيق لدرجه كبيرة وحمدت ربها إن البياعة تعرف إنجليزي وشرت الخاتم ب 150 ليره ولبسته التفتت شافت خالد واقف وراها
خالد:وين رحتي؟
قمر:ما بعدت ييت هني عجبني...
خالد يقاطعها بعصبية:أخليج بس خمس دقايق وتختفين
قمر:أنت اللي رحت عني وأنا نطرتك
خالد:مره ثانيه توقفين بمكانج جني مالي شغل بس اقعد أدورج لو تعرفين المكان قلت ما عليه أخليج
قمر شافته بنظرات احتقار صج انه مغرور
خالد:نعم..قلت شي غلط عمتي
قمر:ردني البيت الحين وآخر مره اطلع معاك
خالد:يكون أحسن
راحت قمر عند السيارة كانت منقهرة من قلب على الغرور اللي فيه ودموعها تنزل وحده ورى الثانية وصلوا الشقة قمر راحت قبله كان زحمة وايد رياييل والكل كان يطالعها وراحت عند المصعد ونطرت خالد لما وصل خالد كان معصب وايد
خالد:شنو هالحركات البايخه ما تنطريني أشوف لج طريج بين الرياييل ولا إذا زعلانه عادي عندج
قمر ما ردت عليها خلت دموعها ترد بدالها خالد لام نفسه على دموع قمر بس هم اهيا غلطانه شلون تمشي بين الرياييل جذي دخلوا الشقة
قمر:ممكن أروح غرفتي ولا ممنوع؟
خالد:قمر لا تسوين جذي
قمر تبجي:ما أبي أزعلك بعد..عادي ولا لا؟
خالد:ممكن
راحت قمر غرفتها و انسدحت على السرير واهيا تبجي من خاطر من كلام خالد بعد فتره شافت الساعة كانت 4:30 يعني بالكويت 5:30 قامت صلت العصر وبدلت هدومها عشان تنام خالد كان يدخن بالصالة يلوم نفسه على اللي سواه بقمر لف ويهه وشاف قمر واقفة عند الطوفة
خالد بحنيه:قمر فيج شي؟
قمر بحزن:لا
راحت المطبخ خذت عصير وردت:تصبح على خير
خالد:وأنتي من أهله بس ما تبين عشا؟
قمر واهيا تبجي:لا مابي
قمر راحت غرفتها خالد من شاف قمر تبجي زاد ذنبه قمر بالدار تبجي حست بذنب فضيع محد غير مزاج خالد إلا غبائي ما فيني صبر لما يرد خالد فصخت الخاتم ورمته وتلوم نفسها.

الجزء الثالث
مرت عليهم أربع أيام واهم بميلان وقمر وخالد تناسوا الموضوع خالد حاول انه يندمج ويا قمر اهيا بنت حبابه ذكية مثقفة وتحب تتعلم بس عندها عزة نفس ولو أنها ساعات تتصرف مثل اليهال.. قمر كانت تبي تغير فكرتها عن خالد بس ماكو فايده اهو بنظرها مغرور ومتكبر لين يتكلم يتكلم باختصار ولين يفتح موضوع يفتحه بطريقة إن ماكو من بعده نقاش وبهالأيام كانوا قاعدين بالبيت ما طلعوا سوالف ومواضيع يحاولون يذوبون الثلج اللي بينهم وعلى الغدا
خالد: قمر زهبي أغراضج لأنا بنطلع من هني بنروح روما
قمر برعب:شلون بنروح؟
خالد:بالطيارة بعد شلون..قمر أنتي تخافين من الطيارة؟
قمر بإحراج وتوتر:لا بس..أي أخاف
خالد:ماله داعي تنحرجين بالعكس هذا شي طبيعي ويمكن إذا عودتي نفسج على الموضوع راح تتناسين الخوف شوي شوي
قمر:بحاول وكم ساعة بتاخذ الرحلة
خالد:نص ساعة يمكن
قمر:أنزين عيل أروح أزهب أغراضي
خالد:أوكي بس اخذي وياج كل أغراضج لانا ما راح نرد هني
قمر راحت دارها وزهبت أغراضها ويا الخدامة وخالد بعد زهب أغراضه بعد ما خلصت قمر قعدت على فراشها وخذت دفترها تبي تكتب خاطره
(من يحسب نفسه)
بارد كالثلج متقلب زئبقي
تبدو يده كالسوط عندما يغضب ولكن
قل ما اهتم له
صرخة واحدة هشمت طيبتي معه
وتركتها مهشمه أحاول أن أصلحها بالتناسي
مغرور هكذا لما
ماذا به يقصر عن الناس
أ لأنه فارس العرب أو ابن الأصالة
يا روحي وزعي من طيبتك شيئا علها تصل إلى المغرور جاري
وتتلوح النسمات الصافية بحياته العكرة ويخلي سبيلي

سكرت الدفتر وقعدت تفكر من أول ما وصلت ما كلمت أمها إلا مرتين بس ولولوه من بعد ما طلعت من العرس ما ردت ولا سمعت شي عنها قامت تتصل في لولوه
قمر:ألو السلام عليكم لولوه موجوده؟
الطرف الثاني:منو يبيها؟
قمر:آنا قمر
الطرف الثاني كان زايد اخو لولوه وقف قلبه يوم سمع اسمها حبيبته قمر حياته قمر اللي تمناها له بس راحت لغيره
زايد:شخبارج قمر؟
قمر:بخير الحمد لله بس منو معاي؟
زايد بحزن:آنا زايد يا قمر زايد
قمر تجمدت بمكانها هذي أول مره تكلم زايد بالتلفون وأول مره تسمع صوته بحياتها كان صوته قوي
قمر:هلا اخوي زايد شلونك؟
زايد تضايق لما سمعها تقوله اخوي:بخير الله يسلمج لولوه مو هني طالعه مع رفيجاتها
قمر:خلاص إذا يت بس ما عليك أمر قولها إني دقيت عليها وبدق عليها مره ثانيه انشالله
زايد:أنتي تامرين يالغالية ديري بالج على نفسج
قمر استحت:وأنت بعد يلا مع السلامة
زايد:في حفظ الرحمن
قمر سكرت التلفون وراحت غرفتها وقبل لا تدخل خالد كان توه طالع من الحمام ولاف الفوطة على خصره قمر استحت وركضت دارها وخالد واقف بمكانه متيبس من الصدمة قمر اتسندت على الطوفة يا ربي شنو هالفشيلة وضحكت بس لازم أعود نفسي بتكثر هالمواقف على المغرب كل شي جاهز قمر تمت تدور الخاتم اللي حذفته لما تهاوشوا بس ما لقته خلته وراحت.. في السيارة خالد كان ساكت وقمر كانت تكتب بدفترها
(دخان سيجارة)
هل سمعت فرقعه التبن من السيجارة
هل دققت في الدخان الذي يرسم أروع الأشكال قبل أن يختفي
يبني أحلاما سرعان ما تختفي سرعان ما تتحطم
دواعمها التبن وها هي تتركها لتتحول إلى غبار ناعم
يفترقان..يتبخران
هل من المعقول
إن السيجارة تتألم من الفراق
يتألم التبن من فراقه عن الدخان الذي يذهب بعيدا بالأحلام ويهدمها كلها
هل أنا التبن وأنت الدخان
هل سأتألم لفراقك يا دخاني

سكرت الدفتر وخذت نفس عميق شمت عطر خالد مع ريحه الزقاير خالد مزاجه متقلب دخلت الدفتر بالجنطة خالد كان يتأمل الشك اللي بشيلة قمر تطريز على شكل طاووس بالألوان الطبيعية مناسب لقمر المغرورة مثل الطاووس متكبرة وجميلة وخجولة كانت عكس ندى.. ندى كانت اجتماعية وحبابه ولا تحس بالخجل من أقل شي كانت ندى حلوة بس مو نفس قمر ولا كانت بنعومة قمر بس حبها لأنها كانت دايما ضده تناقشه وتنافسه ليما قدرت عليه وعلى حبه حبها وحب تلقائيتها ونضجها الغربي حب لندن لان ندى تربت فيها.. وصلوا المطار وركبوا الطيارة وقمر انتبهت لأيدها هالمرة وقعدت تسولف مع خالد
قمر بارتجاف:تدري إن الشرياص أنثى الشاهين
خالد مستغرب من سؤال قمر:أي أدري
قمر:وتدري إن الزرافة عظامها أقل من عظام العصفور
خالد واهو كاتم الضحكة:لا والله ما دريت
قمر:وتدري إن اينشتاين كان يغازل حبيبته العالمة بالمعادلات التفاعلية
خالد:هذي إشاعة
قمر غمضت عيونها:لا مو إشاعة
خالد بقلبه ليكون الخوف مسيطر عليها ويخليها تتكلم جذي
قمر:وتدري إن النحلة لها أسلوب جذب للنحل الذكر
خالد ما قدر يمسك الضحكة أكثر
قمر شوي وتبجي:خالد لا تضحك علي خلني أتكلم لا أموت من الخوف
خالد:قمر أحنا من زمان استقرينا بالجو وأنتي للحين خايفه
قمر أفتحت عيونها:ممكن أعرف أنت ليش تضحك؟
خالد ميت من الضحك:هههههه ولا شي هههههه
قمر:صج والله يعني تضحك مني والدرب
خالد:إيه تصدقين
قمر:لا والله آنا ادري انك تضحك علي بس أنت تدري إن كل شخص طريقة خوفه غير عن الشخص الثاني
خالد:بس خوفج أنتي نادر من نوعه
قمر:أنزين أنت تخاف من الصراصير؟
خالد مستانس أول مره يستمتع بزواجه:شلون أخاف منهم وأنا عندي مزعه أربيهم فيها
قمر مو مصدقه:في أحد يربي صراصير
خالد:أنا
قمر:وين الصراصير ليكون بروما
خالد:لا روما رطوبة حاطهم بفينيسيا
قمر تتنهد:حمد الله ما بنروح فينيسيا
خالد:أصلا بنقعد أسبوع هني بعدين نروح فينيسيا
قمر:قول والله
خالد:أي والله
قمر:لا يبا مو رايحه مكان الصراصير روح بروحك ردني ديرتي أو ردني ميلان وأنت روح عند صراصيرك
خالد:لا تعالي بعرفج على شرشبيل
قمر:منو شرشبيل؟
خالد:الضب اللي عندي
قمر:وعندك ضب بعد
خالد:أي ليش؟
قمر:صج بدوي ما بروح معاك ولا مكان آنا بظل بروما
خالد:وسبايك لازم تشوفينه
قمر:بعد شنو سبايك دوده
خالد:لا وينه وين الدود هذا ثعباني
قمر حست روحها بترجع:اللهم يا ملهم الناس بالصبر شنو هالريال يربي كل هالأشياء يا ربي بموت ما أقدر آخذ نفس
خالد ميت من الضحك عليها:أنا من الحين أحذرج أي حركه من حركات ميلان مالج إلا الصراصير
قمر:لا لا واللي يسلمك ما بسوي شي تكفى
قمر كانت مصدقه السالفة وخالد يتغشمر معاها لان اهو أصلا ما عنده هالسوالف لا وبعد يخاف منهم حس بالراحة يوم اكتشف الخوف المشترك بينهم ولو انه تافه وبهبوط الطيارة قمر غمضت عيونها وخالد قعد يطالعها يفكر بمدى براءتها وحلاوة روحها وخفه دمها.. نزلوا من الطيارة خالد نزل قبلها ولما نزلت كانت آخر عتبة عالية قمر مسكت أيد خالد ونزلت شوي شوي لما نزلت لزقت بخالد وبسرعة وخرت عنه وغطت ويهها خالد عرف إنها استحت خذوا جناطهم وراحوا عند سيارة خالد الجاغوار اللي كانت بالمواقف وراحوا شقتهم بوسط أحياء روما الغنية كانت الشقة طابقين الطابق الأرضي فيه صالة ومطبخ وحمام ومكان للزراعة كبير وفيه حوض والطابق الثاني فيه ثلاث غرف وجناح فخم وطبعا كان المفروض إنهم ينامون بالجناح بس قمر خذت لها غرفه وخالد غرفه ثانيه قمر استانست إن البيت فيه طباخه عربيه بتاكل أكل عربي بدلت قمر ثيابها ولبست جلابية صفرة فخمه وحلوه هديه من لولوه وخلت شعرها مفلول ولبست الخاتم اللي من أم خالد راحت بطلت البلكون والتفتت كانت تبي تنزل شافت خالد واقف يطالعها ابتسمت له واهو بعد ابتسم لها
خالد:تدري إن اللون الأصفر لون المغرور والكبرياء
قمر:الأصفر لوني المفضل
خالد:حتى آنا يعني..
قمر:قصدك آنا مغرورة
خالد:آنا ما قلت شي
قمر:لا تنسى انه لونك المفضل بعد
خالد:قصدج آنا مغرور
قمر:آنا ما قلت شي
خالد ابتسم ونزل مغرورة متكبرة ما ادري على منو طالعه وقمر بعد ببالها مغرور متكبر على منو طالع جذي ونزلت للطباخة زينا اللبنانية
قمر:يعطيج العافية زينا
زينا:الله يعافيكي مدام بدك شي؟
قمر:والله خاطري بأكل يشبع من وصلت إيطاليا وأنا ما آكل إلا خبز وجبن
زينا:لك يؤبرني الزين اطبخ لك أحلى طبخات لبنان وبتشبعي ساعة ويكون الأكل جاهز
قمر:خذي راحتج
طلعت قمر من المطبخ الساعة 8:45 يعني بالكويت 11:45 قررت تتصل في بيت عمها
أبو خليل:الو
قمر:هلا بأحلى الو بالجهره كلها
أبو خليل:هلا بقمر بن ظاحي هلا والله وينج ما تتصلين ولا تسألين عن عمج
قمر:والله انشغلت بالسفر ونادر ما نحصل الخطوط والله إني ولهت عليكم
أبو خليل:الله يخليج يا بنيتي والله انج أصيله شلونكم وشلون خالد؟
قمر:والله حمد الله بخير كاهو خالد يمي تبي تكلمه؟
أبو خليل:أي والله مشتاق له
قمر:خالد عمي يبي يكلمك
خالد خذ التلفون:الو..هلا يبا..لا يبا بس هههههه من زمان بغيت اتصل بس الخطوط أي شي هني ما توصل..لا تخاف قمر بعيوني انشالله يبا لحظه
قمر:هلا بالغالي
أبو خليل:قمر أي شي يسويه خالد يضايقج قولي لي
قمر:انشالله عمي
أبو خليل:يلا آنا استأذن الحين بروح أنام حطوا بالكم على نفسكم
قمر:انشالله تصبح على خير عمي سلم على الأهل
سكرت قمر الخط وتوها بتروح ناداها خالد
قمر:نعم
خالد:هاتي الطفاية ما أوصل لها..شنو العشا؟
قمر:أكل لبناني
خالد:إذا ما عليج أمر سوي لي عصير برتقال بارد
قمر:انشالله أي أوامر ثانيه؟
خالد:إيه والله ياليت تحطين شي حق سبايك أكيد يوعان
قمر:سبايك هني؟
خالد:عيل وين بخلي
قمر:أنت قلت كلهم بفينيسيا
خالد:لا إلا سبايك غالي علي
قمر:وينه الحين؟
خالد حط أيده وراه جنه يبي يطلع سبايك من وراه قمر صرخت وركضت المطبخ خالد مات من الضحك عليها مسكينة قمر طلت عليه وشافته يضحك عرفت انه مسوي لها مقلب
قمر:مره ثانيه تبي تستخف دمك مو على آنا فاهم
خالد:انشالله عمتي بس لو سمحتي العصير
قمر:ثواني
قمر لتفتت تبي تروح المطبخ شعرها لتف وراها خالد تم يطالعها بحنيه لين دخلت المطبخ بعد نص ساعة العشا كان جاهز ومحطوط عالأرض
خالد:بناكل عالأرض
قمر:وبأيدك بعد
خالد:لا انا ما تعودت اكل بأيدي
قمر:اليوم غير وإذا ما قدرت انا اساعدك
خالد بدلع:الله بتوكليني
قمر:لا بس انا اجهز الخبز وانت اكل
قعدوا ياكلون بشهيه غير عن اكل ميلان اللي يسد النفس لما خلصوا
خالد:يعطيج العافية يا زينا
زينا:الله يعافيك استاز ولو ما عملت شي كلو من الست
خالد:لا والله قمر اللي مسويه كل هذا
زينا:أي استاز ماشالله عليها بتعرف للطبخ الله يهنيك فيها استاز خالد
قمر:مشكورة حبيبتي..الله يهنيك فيني يا خالد
خالد:ويهنيج فيني يا قمر بن ضاحي
قمر راحت غرفتها وخالد قعد يشرب قهوة وكان يفكر ليش قمر تغيرت فجأة وكانها تحاربني تعاملني بغرور وكبرياء هين يا قمر..

قمر خالد

من اجمل القصص الي قريتها في النت مو اجمل اهي كانت بوابتي لقصص النت

القصة روعة ثم روعة تسلمين عبرة مقتولة على هذا الانتقااااااااااااااااااااااء الراااااااائع وفقتي في اختيار القصة لنقل

وماعندي مانع ارجع اتابعها معاج اذا الله ارااد ولاتوقفي تنزيل نبي يكون عندنا في ليلاس روايه مثل قكر خالد


مشكورة مرة ثانيه على النقل


بنت البحرين اينجل

السلام عليكم ورحمة الله وبركاته
مشكوووووووووووووره حبيبتي بنت البحرين محد عبرني غيرج اوكي خلص عشانج انا بنزل باجي القصه حبيبتي انتي وانا ادري انها منتشره وقروها الناس وايد بس كنت اتمنى ان امتع فيها الي ماوصلت لهم للحين

وهذ تكملة القصه اتمنى انها تثير الفضول بانفسكم







(تحديات)
يغيضني بكبريائه
يلبد الليل علي بنظراته الهازئة
يستمتع بتفاعلاتي التي لا اقدر على إخفائها
على عكسه
أحيانا أحس انه لا يحس أبدا
جسدا بلا روح
كم هو صلب
وكم هو صاحب خيلاء قاتل
لا أتمنى لنفسي أن أقع بين يديه
فهو سيهشمني كالوردة
ويدخنني كالسيجارة النحيلة
تحدياته مفعمة بالحيا
تتراقص عروقي كلها عندما يتحداني
ويتحدى غروري وكبريائي
لا يعرف إنني أقوى من الصخر
وأشد باسا من فتي عربي

سكرت قمر دفترها وقامت عشان تطلع صار لها 3 أيام بروما طلعت مرتين مع زينا تشتري اغراض وهدايا للأهل واشترت بوت حق مروه ومنديل حريري وشرت ازرارات ذهبيه عليها رسم اسد حق خالد حسته وايد طايح على خالد ومزاجه بس اهيا شرته بحسن نية دارت بالسوق مع زينا وخالد راح يشوف ربعه كلهم عرب ساكنين بروما والكل بارك له على زواجه وخالد ما شكى لأحد كان ينطر رفيجه سيف
سيف شاب عماني عاش بروما ولندن يتيم ومهاجر الخليج واهو يمتلك قوه ومنطقية بالكلام ويعرف شلون يخلي الواحد يرتاح.. أول ما وصل سيف لم خالد وبارك له على زواجه ندى قلت له عن زواج خالد
خالد:آه يا سيف شقول لك انا خلاص حياتي انتهت قبل لا تبدي ويا ندى تذكر يا سيف انت الوحيد الشاهد على علاقتنا لكن الظروف يا سيف منعتني من تحقيق اقدس احلامي اللي اهيا ندى
سيف:شوف يا خالد انا بكلمك كلام صريح صج انك حبيت ندى بس مو معناته اذا ما انكتب لك تصيب تعيش كل حياتك مع ندى ما تبي تعيش مع غيراها مو حرام عليك ما فكرت في بنت عمك اهيا ضحية يا خالد
خالد:انت ما تعرفها قمر ياهل عمرها 18 سنه بس مخها مكبرها ما استحمل انها تكون زوجتي تقدر تعطيني حل يا سيف
سيف:أي اقدر انسى ندى وادري ان نسيانها صعب بس انت لازم تنساها مثل ما اهيا تنساك
خالد:تنساني شلون تنساني؟
سيف:لا ما كان قصدي اسمح لي انا شوي نفسيتي تعبانه
خالد:خير بو سعيد علامك متضايق
سيف:لا ما عليك بو وليد
خالد رن تلفونه ورد من غير نفس:هلا قمر
قمر:خالد متى بترد البيت؟
خالد:مادري قمر يمكن ما ارد ليش؟
قمر:لا بس لأن واحد من ربعك متصل فيك وعطاني رقمه عشان تدق عليه
خالد:انزين جم الرقم؟
قمر:*******
خالد:خلاص انزين يلا
قمر:مع السلامه
خالد:سيف اذا قمر اضطرت تتزوجني واهيا طلبت مني ان ننام بغرفتين
سيف:سولف لي عنها شكلها لغز

يتبع...

خالد:شقول لك يا سيف قمر بنت ولا كل البنات جميله والله جميله ما شفت مثل جمالها بس وايد مغروره عزيزة نفس ربيبة يدي الله يرحمه وابوي يموت فيها بصراحة قبل كنت اسمع عنها ما كانت تدخل قلبي جسوم يقول لي عن سوالفها بس ما اعطيها أي انتباه احسها وايد متكبره وشايفه نفسها
سيف في باله(الطيور على اشكالها تقع):وانت ما تلاحظ أي قاسم مشترك بينكم؟
خالد:شي واحد بس تخاف من الحشرات والزواحف مثلي غيره ما ادري
سيف:ما تدري؟
خالد:ما ادري عالعموم انا عازمك اليوم عالعشا ما ابي اخليك وارد البيت ولا اخليها بروحها بالبيت تعال تعشى عندنا
سيف:لا يا خالد مابي ازعجها
خالد:لا ما عليك منها تحب شغل الطباخ
سيف:شدراك؟
خالد يبتسم: لان ابوي موصنها علي اهي تنفذ أي شي اقوله لها وانا ابي انزل غرورها... اللي ابيه تطبخه من دون أي كلمه
سيف: ههههههههه صج انك شرير
خالد: هاشرايك بتيي ولا لأ؟
سيف: يلا نروح ومره وحده ناكل اكل غير اكل المطاعم
خالد:يلا عيل
اتصل خالد في قمر
خالد:الو قمر انا بتعشى بالبيت بس ابيج تطبخين لي عشا سنع
قمر اللي على اعصابها من خالد المتقلب واهيا تتكلم بكل برود عشان لايحس:ان شالله
خالد يغمز لسيف: أي مو تفشليني وياي رفيجي سيف... ورينا فنج ياقمر بن ضاحي
قمر منقهره: تامر امر يا استاذ
خالد: أي اخر شي.. حاولي انج تاكلين بالمطبخ اقصد دارج عشان رفيجي ياخذ راحته
قمر تدعي عليه اهوا ورفيجه: انشالله اوامر ثانيه؟
خالد: ولا شي سلامتج
قمر:مع السلامه
خالد:الله يسلمج
سكر خالد الخط واهوا يضحك
سيف: علامك؟
خالد: احسها الحين تغلي من الحمق والله حلاتها واقفه يمي تدري شلون شكلها يصير اعجوبه
سيف:هااااه توك تقول ماتقدر تحس فيها ومادري شنو
خالد:الا هني بالتحدي يالله نتمشى لي بيتنا مو بعيد ولين نوصل هناك راح يكون كل شي زاهب
سيف: يلا قمنا
قاموا خالد وسيف وفجأه كل شي قام يدور بعين خالد لدرجه انه اصطدم بالطاوله اللي جدامه ومن قوة الضربه ألتوت ريل خالد
سيف يحمله: سلامات خالد... عسى ما شر علامك؟
خالد يحاول يبلع ريجه ويحس بدوخه كبيره: لا مافيني شي بس تعبان
سيف: راجعت الطبيب؟
خالد واهوا يمسك الدرابزين: لا تخاف دوره بسيطه ماكنت انام عدل
سيف: متأكد؟
خالد: أي اكيد يلا نروح قبل ماتعصب قمر
سيف يطالعه بقلق: يلا
قمر عطت زينا اجازه اليوم للساعه 8 بعدين ترد عشان تدخل الاكل للضيوف قعدت تتحلطم على خالد وبروده وثقل دمه صج انه يقهر لين اتصل عليه يعصب ولين يتصل علي يتأمر.. .. انا مكلفه فيك ولا في رفيجك والله لو محبتي للطباخ جان ماشفت شي لكن انا الحين الخبله اللي معطيتك ويه والله مو عشانك عشان عمي الغالي مادري الحين ازيد من الفلفل اخليك انت ورفيجك تروحون فيها..قعدت تضحك واهيا تتخيل شكل خالد ورفيجه يتولول من الفلفل طاف الوقت واهيا مشغله المسجله بشريط اغاني منوعات ناعمه مسويته لها اختها مروه حق سيارتها لين تدربت حتى السواقه انحرمت منها بس بتحاول ويا خالد يخليها تسوق بالمستقبل قاعده تسمع اغنية زمان واهيا ما انتبهت بدخلة خالد كانت تغني ويا المسجل بالمطبخ وتهز شوي بالغشمره لان الاغنيه كانت حزينه خالد وقف مكانه يطالعها كانت لابسه برمودا جينز وقميص خفيف قصير ورافعه شعرها واهيا ترقص التفتت واهيا شايله صحن بيدها ومن الصدمه طاح الصحن من ايدها سيف كان توه بيقعد ورد وقف مكانه
قمر كانت واقفه مكانها مثل المجرمه وخالد استغل طفوليتها
خالد واهوا يقصر على صوت المسجل: ممكن اعرف انتي ليش ترقصين؟
قمر بذنب: ماكنت ادري انك بتيي الحين قلت يمكن تتاخر ( كانت مصبغه من الحيا اولا من لبسها وثانيا من الموقف وثالثا لانها انعجبت بشكل خالد كانت لحيته بارزه شوي وعيونه تلمع ويبين جنان بالاسود ملامحه متغيرة 180 درجه.. خالد ضاع بجمال قمر..لاول مره على طبيعتها ونعومتها الأنثوية طاغية عالجو وخدودها من حرارة الفرن محمرة
خالد:شلون بتطلعين جدام سيف وتسلمين عليه وانتي بالملابس هذي و وين زينا؟
قمر بحزن:راحت تشوف اختها توها والده ورفيجك ما له داعي اسلم عليه
خالد:انزين انتي صعدي بدلي الحين ونزلي
قمر والدمعة بعيونها:انزين
خالد:يلا عاد تدرين انتي مو حلوه لين تبجين تلوعين الجبد
قمر انهارت وراحت دارها وخالد يضحك عليها ياهل والله ياهل وراح عند سيف
سيف:عسى ما شر اسمع اصوات تكسر
خالد:لا ما عليك دفعه بلا..حيالله سيف
سيف:الله يحييك
زينا وصلت وراحت المطبخ تشوف الاكل وقمر راحت خذت شور عالسريع وتفكر بخالد ليش يعاملها جذي ساعات حنون وساعات كاره حياته وساعات يحر وما تدري ليش حست خالد مينون.. دق قلبها من الخوف تذكرت خالد ما كان طبيعي لونه اصفر ووايد يدخن وما ياكل عدل حبيب قلبي وايد خايفه عليه من اول ما وصلوا روما واهو متغير حزين وكئيب ولبست ونزلت خالد وسيف كانوا مخلصين عشى مع ان خالد ما جاس الاكل كانوا قاعدين بالصاله وراحت لهم
خالد:هلا والله قمر قربي
سيف:شخبارج اختي الف مبروك
قمر:الله يبارك بحياتك شلونك انشالله بخير؟
سيف ارتبك من جمال قمر:الحمدالله بخير
قمر:زين شفنا احد من اهل الخليج هني صار لنا مده بروما وتونا نشوفك
سيف:والله توني راد من لندن
قمر:زين تشرب شي؟
سيف:مشكوره الله يخليج
قمر:لا صج ما تبي قهوة؟
خالد:لازم تذوق قهوة قمر احلى عنها مافي
سيف:خلاص نجرب ما ورانا شي
قمر:دقايق وتزهب
قمر راحت المطبخ وخالد لحقها:قمر
قمر:خير
خالد:الخير بويهج بس حبيت اقولج ان بنطول بروما شوي من بعدها بروح فينيسيا
قمر:على راحتك روح لرفيجك
خالد:لا تخافين عليه يعرف البيت احسن مني ومنج
قمر تبتسم لخالد وخالد يتنسم عطرها شكثر قمر حلوه شلون انعمى عن جمالها وايد ناعمه وخلابه وقعد يلعب بطرف شالها وقمر تطالعه بنظرات حيره واستغراب
خالد:قمر اشكرج على كل اللي تسوينه واذا ضايقتج بشي سامحيني
قمر زاد خوفها على خالد من كلامه:مسموح يا خالد من دون لا تقول
خالد ابتسم لها وراحوا لسيف..سيف شرب القهوة ومدحها ومدح الطباخ وقعدوا يسولفون عن ايطاليا
قمر:شكلك خبير ايطاليا
خالد:اصلا سيف عايش هني
قمر:وانت من أي دولة؟
سيف:عمان
قمر:تدرس هني
سيف:اعيش هني اكثر من الدراسه
قمر:ليش وديرتك؟
سيف:مالي احد فيها انا يتيم وما عندي اخوان والحين انا هني ادرس واشتغل
قعدوا يسولفون شوي بعدها سيف استأذن
خالد:خلني اوصلك
سيف:لا والله المسافه ما هي بعديه وبمشي شوي بعد هالاكل اللذيذ يعطيج العافيه اختي والله رديتيني لأيام السلطنه
قمر:أي وقت تبي تاكل اكل خليجي انا اسويلك اللي تبيه
سيف:عيل بدخل على طمع عيل من الحين بخاطري برياني ومهلبيه وبخاطري بعد..
خالد:شوي شوي لا يكون مرتي شيف وانا ما ادري خلها تتعب بس عشاني
سيف:الله يهنيك يا بو وليد ويا اختي خلاص يا قمر من اليوم ورايح عندج اخو أي شي تبينه انا موجود
قمر انحرجت:ما تقصر يا اخوي
سيف:يالله برخصتكم
خالد وصل سيف للي الباب وقعدوا يدخنون
سيف:تبي الصراحة
خالد:هاتها
سيف:مع بنت مثل قمر لازم تنسى ندى
خالد:ولا بالأحلام
سيف:فكر يا خالد قمر..
خالد:يصير خير انشالله
سيف:يالله في امان الله
خالد:في حفظ الرحمن
خالد دخل البيت وما لقى احد راح المطبخ قمر كانت تشب فحم عشان تبخر البيت عن ريحه الاكل
خالد:لازم تحسسين الكل ان حياتنا مثاليه
قمر باستغراب:ليش انا شنو قلت؟
خالد:لا تفكرين ان سيف غبي وما يفهم
قمر:يفهم شنو؟
خالد بسخريه:ماتدرين يعني
قمر:انزين ليش ما تقولي شنو
خالد:انتي الفطينة هني ولا انا غلطان
قمر ظلت واقفه مكانها توه يكلمها بهدوء طلع ورد بمزاج ثاني الله يعيني عليه خالد راح قعد بالصالة وقمر تبخر البيت راحت الصالة شافت خالد نايم على الكرسي كان شكله تعبان ومعرق خلته وراحت غرفته بخرتها وبخرت فراشه مع انه ما يستاهل بس هم عاذرته لانه مبين عليه مو طبيعي راحت دارها تدور الدبوس اللي شرته لخالد وخالد توه يبي يدخل داره ونادته
خالد بتعب:هلا
قمر:شريت لك هالدبوس لما رحت السوق
خالد وشافها بسخريه:اسد؟؟ شنو قصدج؟
قمر اسكتت وخالد عصب عليها ومسكها من ايدها:تكلمي يا قمر مليت من سكوتج خليني احس انج معصبه عن هالبرود قمر حرام عليج انا مليت انتي ما مليتي؟
قمر بعذاب وبجي:ما ادري شنو تقصد يا خالد كل اللي سويته اني شريت لك دبوس بطيبه نيه وانت تجازيني بالصراخ انا ما قصدت شي والله ما قصد شي
خالد بعصبيه:بس هذي انتي سلاحج البجي بدال لا تتكلمين
زاد بجي قمر وخوفها:والله مو قصدي شي
خالد رد لعقله انا شسويت منقهر واحط حرتي بهالبنيه اللي ما لها ذنب وخر ايده عنها
خالد:قمر انا..
قمر ما خلته يكمل وراحت دارها واهيا ميته من البجي خالد رمى الدبوس على الطوفه ودخل غرفته وسكر الباب بقوه يحس انه تعبان ما يقدر يستحمل اكثر من الضغوطات اللي عليه يعيش مع بنت بالكاد يحس فيها..حرب اعصاب مع انسانه كل اللي ارتكبته انها وافقت على الزواج منه..لأول مره خالد يبجي بجي مثل الياهل واهو قاعد على الارض يحس بالاختناق كأنه بيموت ما يقدر يتنفس يصرخ من داخله كافي كافي وصل صوته لعند قمر اللي وقفت عند باب غرفته تبي تدخل بس تخاف يصرخ عليها بس لما يمعته يبجي ما قدرت تستحمل اكثر ودخلت كانت الغرفه ظلمه فتحت الابجورة وشافت خالد على الارض راحت عند وقعد
قمر بحزن:خالد علامك؟
خالد ما رد عليها كملت كلامها:خالد انا اسفه لا تبجي دموعك عاليه علي ما اقدر يا ولد عمي اشوفك جذي وانا السبب
بدت قمر تبجي من خاطر وتلوم نفسها عاللي سوته
خالد:قمر انا تعبان وايد تعبان ما اقدر استحمل اكثر ما اقدر
قمر:بسم الله عليك حبيبي ما تشوف شر انشالله فيني ولا فيك قولي اللي بقلبك
خالد لا شعوريا حط راسه على ريول قمر:كافي يا قمر حرام اللي سووه فيج وفيني حرام
قمر خلت خالد مكانه يمكن يرتاح جذي وقعدت تبجي معاه اهيا حست ان تصرفاته غريبه خالد كان تعبان وايد بس محد يدري عنه خالد شوي شوي بدا يهدي لما نام قمر قعدت تمسح على راسه واهي تقرا قرآن اهيا ما هدت وايد صعب عليها تشوف خالد يبجي جذي تعبان ومحد يدري باللي فيه ولا احد مهتم فيه وعدت نفسها انها راح تدوس على رغباتها وتحاول تسعده كثر ما تقدر شعور غريب بدى بقمر دفء وراحه بكل انحاءها ماتدري شنو تسميه تقدرون انتو تسمونه...


شنو راح يصير بين خالد وقمر؟؟؟
راح تعرفون بالجزء الياي