ثـــــــواني وينزل البارت ..


اتمنى يكون عند حسن ظنكم

..::]][[ الحفنه الثانيه عشر ]][[::..

(والله لخليك عقبي تصفق كفوفك .. وأشرّب الي تغطرس كاس غطرسته )
"سلوى "

خايفه .. مرتبكه .. متوترة .. هذا ولا شي .. احس اني بااصيح فهاللحظة .. لا تقولون ليش عادي .. ماقدر احس بخوف .. ياريت احد يفهمني .. ويفهم شعوري .. من ثواني كنت انسه .. والحين انا صرت مدام .. يعني بااختصار تزوجت .. ارتجفت اطرافي .. ياترى اشلون بيكون زواجي .. هل بيكون سعيد ونهايته سعيدة مثل الي اقراه فالقصص .. ولا بيكون تعيس ومحبط مثل الي نجوفه فالمسلسلات .. خاييفه .. اقل شعور احس فيه .. ماادري شنو مصيري .. ولا شنو بيصير لي ..

سمعت العنود تبارك لي .. وصوت سارة وسلطانه .. احس بتعب ودوخة .. قالو لي ان المعرس بيي .. عشان جذي احس بالدوخة .. بليييز لا لا .. انا مااعرفه ..!!

" الشوفه الشرعيه ..الي ماقبل الملجه وبعد الخطبه الرسميه.. عند اغلبيه اهالي قطر قليله .. مب منتشرة بكثرة .. يعني لا العريس يطلب يجوف العروسه ولا العروسه .. وهذا لحد الان ماندري لاحقا شيصير خخخ .. "

ارتجفت وانا اجوفه مقبل يمشي ع الاستيج حتى وصل عندي .. باس راسي وهو يهمس : الف مبروك حبيبتي ..!!!

لحظة لحظة في شي خرط .. "حبيبتي؟؟" من متى المعرفه؟؟ اشلون صرت حبيبتي؟! وانا مااعرفه ولا يعرفني ..
بلعت ريجي ..
جفت الصندوق العود المذهب .. وداخله قطعه حرير تحوط بالقرآن .. ارتاح قلبي يوم جفت القرأن .. كان فيه صندوق ثاني للعطورات وخرابيط الدزة .. واخيرا .. قربوا الشبكة لنا .. وانا قلبي يدق دق .. تحسبت على العنود يوم سمعتها تقول له .. لبسها ..

فيصل بااحراج : العنود ترا مااعرف ..

ضحكت العنود : شنو ماتعرف لبسها اجوف لبسها العقد ..

حسيت بيده على رقبتي مت من الخوف .. والتوتر .. حسيت اني بااصيح .. تيمعت الدموع فعيني .. يالله مو وقته الحين اصيح واخرب كل شي .. جفت امي تطالعني معصبه مني .. ياربي شاسوي.. مب بيدي ؟؟.. والله خفت اني اصيح مب عشان الفشله من الناس .. عشان امي ماتلطني بكف ..

اخيرا .. انجز المهمه .. والعنود كملت وصكرت العقد زين مازين .. قربت منه الشغابات "التراجي" .. اهني سمعته يقول : عنودوه يالغبيه اقولج مااعرف عقد وباليالله .!!

قرب من عندي وبغا يلبسني الشغاب .. لااراديا رجعت خطوتين .. وقرب لبسني الاشغاب مايحتاي اقول لكم انه سوى فااذني حفرياااات من كثر اللخبطه .. الاشغابه الثانيه لبستني اياها العنود وبمساعدة ام فيصل ..

لبسوني الساعه .. واسوارتين الماس باليد الثانيه .. ويوم قعدنا .. لبسني فيصل الخاتم .. مايحتاي اقول لكم اني كنت منحرجه ومتوترة وشوي واصيح ..

ربع ساعه مرت بينا بدون كلام .. استحيت اجوفه .. اما هو .. فاانا ماادري عنه .. بس كل ثانيه تمر وانا احس ويهي يطبخ من الاحراج ..


ثواني .. واعلنو العشاء .. وبعد اعلان العشاء بثواني .. زفونا لصااله متوسطة .. ومجابل الصاله بابين .. واحد غرفه .. جهزوني فيها بالميك اب والشعر وهالخرابيط .. والثانيه كانت حمام ..

سمعته : الف مبروك يا .. سلوى ..!!

همست ..وانا قلبي يدق ويدق ويدق .. حتى شكيت ان معاي مرض القلب من كثر دقات قلبي السريعه : الله يبـ ـ ـارك فـ ـيـ ـك .. !!

سمعته يقول : مرتاحه اهني .. ولا تبينا نروح بيتكم ..!!

رفعت عيوني له .. واستحيت .. نزلتهم على طول .. مااشاءالله عليه .. صحيح ماكان وسيــم لحد الثمااله لكنه جماله ملفت !! .. اصلا انا مايهمني الجمال .. لان مثل ماانتو عارفين الرجال مخاابر مهي منااظر ..

عجبتني طريقته .. اظاهر ان فيصل ريال يعتمد عليه ولا ماكان سألني واهتم بشعوري .. سكت افكر .. ارد ولا لاء ؟؟ .. بس فعلا انا ابغي اروح بيتنا .. : يصير .. نروح بيتنا !

حسيته ابتسم وهو يقول : ياعمري على صوتهم .. يصير ليش مايصير .. بس قرري بيتنا ولا بيت ابوج ؟؟

رفعت عيوني وكأني اسأل شالفرق ؟؟ .. ابتسم فويهي .. بسرعه نزلت ويهي وانا احسه يطبخ من الاحراج .. وصيحتي كاتمتها داخلي .. : بيت ابوي .!

سمعته : حاظريــن ... اتصل على العنود وقالها تبلغ امي .. دقايق ويات امي لي والضجر باين عليها

لبست عبايتي .. ومرني اخوي محمد !! وتوجهنا للبيت .. وفيصل يــه بيتنا بـ سيارته !! ..

صراحة كنت اجوف ماله داعي فيصل ايي .. شيسوي ايي..وبعدين انا استحي .. قررت اروح فوق واطنشه .. بس محمد .. قال لي اروح الميلس واقعد وياه اشوي وهو ثواني ويلحقنا على مايصف !! .. فعلا حسيت بسخافه اشلون اطنشه عيب وفشله .. شبيقول عني؟

دشيت الميلس وانا للحين بعباتي .. فسخت شيلتي ورتبت شعري وجيكت ع شكلي .. ودخلت ..

فتحت ليتات الميلس .. واتصلت للخدامه اتييب عصير ..

سمعت حس حد ع الباب .. ارتجفت .. وبلعت ريجي .. فتحت الباب كان فيصل .. والعنود معاه ..

دخل فيصل وقعد.. وانا رحت بااقعد ..

العنود : هي هي هي سلوي .. فسخي عباتج ترا ريلج عادي يعني

طالعتها بقهر .. هو ماتكلم انتي شلج .. شعليييج .. حسيت اني باصيح .. فصخت عباتي .. ورتبتها عندي ع الكرسي ..

سمعت فيصل يقول : وبعد شخبارج سلوى ؟؟ ..

انحرجت ورديت بخفوت: بخير !

سمعته يقول : ها؟ .. ترا ماسمعت .. يا تين عندي يا اانا ايي عندج !

ويهي مو بس يطبخ الا احترق من الاحراج .. ماتكلمت ولا رديت ولا حتى رفعت عيوني .. له ..

حسيت بخطوات حد قريبه لعندي .. كان فيصل ..

قعد ع الكنبه الي عندي وحمدت الله انه قعد شوي بعيد يعني حس بااحراجي ومايبي يزيدة ..!! .. سألني عن التخصص الي ناويه ادخله .. وهالسوالف .. سوالف عامه بحته !!

تبي الصراحة تراني صـدق حبيتـك
واحترت وشلون أعبرلك عن اشواقي
يابعد هالناس أنا من قلبي أغليتـك
حبك جرى بالعروق وعاش بأعماقي


................

"عذبه"

ااااخ اخ .. تعبت .. هذا واحنا واصلين امس .. اشلون عيل لو واصلين اليوم ..تمددت على السرير تعبانه حتى مالي بارض اغير ملابسي ..ابتسمت يوم تذكرت شكل سلوي يوم دخل فيصل هههههههههه .. ياحليلها سلوى .. هالبنت واااايد واااايد تستحي .. شكلهم حلو .. لايقين على بعض .. مع اني حسيت شكل فيصل واييد اكبر من عمره !! .. صكرت عيوني .. وتذكرت هذاك الشاب الي التقينا فيه فحديقه "زعبيل" يااه .. شكله ريااال صج صج .. حشييم .. وريال .. واخلاق .. يوووه يا عذوب اشدراج انتي .. ماغير موقف واحد وياه ..!!
ايييييييييييه تنهدت .. موقف وللحين محفور بذاكرتي ..!!

تذكرت العرس ..وابتسمت .. يوم تذكرت اني طلبت اغنيه امارتيه وارتبشنا انا وعلايه ونجول .. ويلسنا نرقص .. وعليوه السباله يبست من قلب .. والكثير من البنات ارتبشن وخصوصا ثنتين من ربيعات سلوي .. شكلهن امارتيات خخ

ارفع جبينك فوق يابن الامارات
واتفاخر انك فرد من شعب زايد
ديرتك ديره مالها ند واخوات
وقايدك ماشرواه في الكون قايد

فوووق ..

ديرة خليفه عزنا وعز الذات
ديرة محمد فخر بن عوايد
امجاد زايد الي بكتها الطويلات
وامجاد راشد والشيوخ الفرايد

فوووق ..

بشت المكارم واهلها عطر الوقات
روح الاصاله والاصوله التلايد
تحلم بها النفوس وعقول حليمات
وترقص لها قلوب وتغني لها بدايد

اي والله فووق

امي وابوي وحبها في الحشى بات
سبع تعلت فوق روس النوايد
احني لها راسي وتل المنيات
وانزف لها من دم قلبي قصااايد يالاماراااات

يابس .. يابس ..
ضحكت وانا اتذكر طيحة ع عليوه ع اخر الغنيه .. هههههههه .. والبنات يصلون ويقرون عليها .. اونه .. ضربوها بعين .. ههههه .. تذكرت ان عليوه مافصخت كعبها في الرقص عسب جي اتحنقلت وطاحت هههه .. بس اشوا طيحتها ماكانت قويه ولا كان انفضحنا جداهم .. صكرت عيوني بتعب .. وسمعت عليوه ترمسني .. بس لاني كنت تعبانه فظروف ثواني

وطارت عذبه في الاحلام ..

حسيت بااحد يصحيني من الرقاد .. فتحت عيوني بشويش .. : هممممممممم .. ساروه ابي ارقد اوفف ..

سمعت حسها النشيط : لالا مافي ارقاد .. قومي بنروح البحر ..

همست: انتي وحدة متفرغه ..!!

ردت تحن وتزن فوق راسي .. وفالاخير قمت : ها ست سارة فضحتينا .. اشتبين؟؟

ضحكت : يالله .. ريلي بيودينا يدورنا ..!!

ابتسمت : ساروا انتي مستانسه وياه؟؟

لحظات واختفت ابتسامتها وردت تبتسم : اومال ايه يا وليه؟؟ .. عبالج لو مب مستانسه بتم وياه دقيقه .. شو يا بنتي انسيتي اني سارااا ولا بلااااااااااش

ضحكت عليها : زين زين يالله ياييه .. ببدل وباايكم ... اشرت على عليوه .. اصحيها؟؟

ضحكت ساروه بخبث : افكورس افكورس .. هي دوم نومها جي ثقيل؟؟

طالعت عليوه الي غاطه بسبات عميق ولا حاسه فينا .. : هيييه ..

قالت لي بخبث: امشي نصحيها ..

لمعت عيوني بمكر .: نصحيها بالماي؟؟

ضحكت ساروه : لالاا .. هاي شي قديم ازلي .. امشي نروح المطبخ ..

مشيت بااطلع ويااها .. جان تلتفت علي : انتي يالمفهيه العودة بتطلعين بفستانج !!

اوووووووووووووه انا شلون نسيت .. طالعت ويهي فالمنظرة .. يوووه لا تجوفوني الفضايح كلها اطلعت خخخخ ..

دخلت الحمام .. وغسلت ويهي 600 مرة .. اوففف وباليالله راح المكياج .. حشى موب مكياج اسميت !! .. بدلت ملابسي ولبست عبايتي .. تجحلت .. وطلعت .. دورت على ساروه مالقيتها اتصلت فيها قالت لي انها فالمطبخ .. رحت جفتها ماسكة قالب ثلج واتقولب فيه : هلا صباح الخير

ردت علي باابتسامه: صباح النور .. ها نروح؟؟

طالعتها وقلت: يالله؟؟

قالت لي : امشي نقوم عليوه .. وضحكت بمكر ههههههههههههه

طالعتها وخمنت انها بتقومها بالثلج .. اااااااااااخ .. مايستوي بتتثلج عيلنا عليوه بروحها تتلحف بـ 77 لحاف بس عشان البرد اونها تحب الحر ..

دخلنا بحذر .. وجفناها للحين نايمه مايبين منها الا راسها وشعرها المتناثر .. كانت نايمه بعد مافسخت فستانها ومسحت مكياجها ..هي ماسوت نفسي ,.. تبهدلت لي ماطلع الفستان ... خخخ .. زين انه ماتفزر من نومتي المعفوسه ..

تسللنا بهدوء واصلا حتى لو تسللنا بقوة ماراح تحس .. عليوه نومها ثجيل شرات ساروة .. كل وحدة فينا قعدت بجهة تهز عليه ..

عليوه بغيض : خوزو .. ابا انام .. دخلت ساروه حبتين ثلج تحت رقبتها بشطانه وانا رفعت حبه وحطيتها على ويهها

نقزت عليوه متخرعه : برررررررررد .. شو بسم الله .. بسم الله .. شو صاير ؟؟ مطر مطر ..


فطسنا من الضحك انا وساروه ع شكل عليوه وهي متخرعه..

طالعتنا مب فاهمه من وين البرد .. يوم طالعت قالب الثلج عصبت .. وقامت تركض ورانا .. وقمنا نركض نحن بالغرفه .. ونتفالع بالثلج .. اخر شي ساروه النذله طلعت وخلتني ويا عليوه ..

سمعتها تقول : بتفااااهم ويا ريلي .. لا تأخرونا ولا رحت عنكم


نذله بالقو .. صح؟؟ ..

فلعتني عليوه بقطعه ثلج وصابت راسي : اييييييييييييييي عليوه .. عورتيني ..

قالت عليوه بغيض : تستاهلين عيل ترشوني بالثلج .. مب حرام عليكن .. وايييه .. بغيت اموت


فطست من الضحك : اتموتين حق شو؟؟ كلها حبتين ثلج ..

ركضت ع السرير ووصلتني ودخلت الثلج بقميص تميت اصارخ واضحك والثلج يدلدغ جسمي ..

بعد ربع ساعه .. كنا كلنا البنات بسيارة منصور .. الشيخة سارة متفيزرة يدام .. وتشرح لنا الاماكن .. وملخبطة منصور .. يحليله ولد خالي.. معطيها ويه هالنتفه خخخخخخ .. تقوله يمين يلف وياها يمين .. واخر شي يطلع المكان غلط .. وتقعد تدلينا سلوى .. استغربت تصرف منصور .. معقوله مايدل؟؟ .. خخخخخ .. يحليله مايحب يطلع ويدور هالاماكن .. صدقه .. شو يسوي مب متفرغ وراه شركة .. يقعد يدور؟
هييييييي نحن البنات نحب سوالف الدوارة خخخخ

فرشنا ع الرمل .. ويلسنا .. طلعنا دلال الشاي والقهوه .. والفطور ..

بعد شويه دق عليه منصور "اخويه" يتخبرنا عن مكانا .. وصراحه ماعرفت عطيت منصور .. ومنصور شرح له نحن وين .. ويا وياب معاها ماجد ولد خالي .. وماجد اخو سارة ومرته وولدهم .. وخالتي ام سارة .. حليلها .. وحشتني هالحرمه .. طيبه بشكل لا يطاق .. ورهييبه صراحة ..

يلسنا نسولف وبعدها قمنا نلعب " اونو "

ساروه : جوفي عليوه .. سحبي احسن لج

عليوه بغيض : مابا .. شو كلكن متفقات عليه .. مسحبني الحين 12 مرة .. حرام عليكن ..

ضحكت وقلت : هييييييه شو اتحسبن نحن ضيفات عندكن"اقصد ساروة وسلوى وسلطانه" .. يايات تسحبونا ..يالله ساروه اشوف .. سحبي بدال بنت عمي .. والله .. متفقات علينا

ضحكت ساروه وضربت يد منصور .. اتاريها متفقه وياه

صرخت مقهورة : شوووو منصووور الحرمه شلت عقلك .. ماشي ماشي .. ماتغش

ضحك منصور وهو يغمز لساروه : اوك .. ولا تزعلين اخذي ؟؟ ..

صرخت : لااااااااا شو اسحب 4 .. ماابا .. مابا ..فررت في الي عندي .. وضحكت بخبث .. ههههه ..سلوي دامج للحينه عروسه .. سحبي فديتج ... وقطيت اسحب اربعه

سلوى وهي فاتحه عيونها : الله يخسكم .. 8 .. اخ يالقهر اخر ورقتين وافوز عليكم .. طالعت منصور .. الفزززززززعة اخوي ..

ضحك منصور : لعبي لعبي .. القيم الاول مسحبتني 5 مرات .. وتقولين في اللعب مافي اخوان وخوات .. يالله يالله .. اكليها ..

برطمت سلوي : لا والله ..!!

ضحكنا كلنا عليها .. ماجد .. اخذ ولده الصغير وراح يتمشى ع البحر .. ومنصور اخويه .. راقد .. ام ساررة تشرب شاي وتسولف مع سلطانه ومرام حرمه ماجد

كملنا لعب .. بفوز منصور .. عليوه .. انا .. وبعدنا ساروه .. وبعدها سلوي .. خخخخخخخخخ .. حتى ساروه قلب عليها منصور وقال لها .. مافي اللعب لعب ..

صراحه استانسنا .. كل وحدة مسكت لها عصير .. ورحنا نتمشى ويا بعض .. وقعدنا نسولف ونضحك .. صراحه احلا طلعه ..

بعدها .. ردينا للزوليه ويلسنا نتريق ... ماجد كان طالب فطاير وااايد من مطعم مشهور بقطر .. اما منصور اخويه ومنصور ريل ساره .. فـ راحو وشروا لنا جاي كرك "جاي حليب" ومعاه جباتي هندي "براتا" وسندويجات بيض وبراتا .. صراحة رهيييب ..

بعد ماتريقت وقفت اتمشى بروحي ..

جفت منصور "اخوي" يطالع البحر .. رحت عنده .. ومسكت ايده وشديت عليها : شو .. للحين مانسيتها؟؟

طالعني ببرود : امبلا .. من زمان اصلا .. من يوم انخطبت ..!!

قلت بقهر : هيه واضح ..!!

طالعني بلا مبالاة .. وبعدها تنهد وهو يشوف البحر : كانت طفولتنا وحدة .. من ننزل من الامارات نقضيها وياهم .. نسافر ونروح ونقعد دوم وياهم .. كانت مميزة .. كانت دوم غير عنكم .. مرهفه .. حساسه .. خجوله .. وحلوة .. كل شي فيها كان يشدني .. كل شي .. اتذكر مواقفنا يوم احنا صغار .. تذكرين عذوب؟ .. كنا نلعب عروس ومعرس .. تذكرين؟ .. كنت دوم اختارها زوجتي وانتي وساروة عيالنا ؟؟ .. اخ .. وسالم خذاها مني .. وضيعها !! ... ماحافظ عليها ..!! ..

طالعني وقال بقهر والم : بذمتج كان يستاهلها؟؟ ..

دمعت عيوني : منصور .. البنيه ماتت !!

طالعني باالم : لا تقولين مااتت ..!! ... ذكرياتنا ماماتت للحين .. كمل بضعف .. كل شي اتذكره عنها كل شي .. حطيت امل انها ترفضه .. لكنها شكلها ماكانت منتبهه لي ..!! .. هه .. وشلون تنتبه وانا ماصرحت بهالشي ؟ .. توقعتها تعرف مشاعري .. توقعتها تتذكر لعبنا .. ووعدي لها .. ! .. تذكرين؟ .. سكت شوي .. وظل يتأمل اخر نقطه فالبحر

طالعته بحسرة .. اخ عليك ياخوي اخ .. شنسوي حياة وهي الي اختارت سالم .. اخ ياخوي قلبي متقطع عليك وعلى حالك .. سنين راحت وانت للحين تتذكرها ياخوي ..للحين !!

فترة هدوء قضيناها انا افكر .. وهو يفكر .. ومحد فينا تكلم .. اخر شي قطع علي تفكيري كلامه : كنت من اقول بنسسى .. اجوف شي يذكرني فيها ... صحيح حبي لها الحين مايقارن بحبي لها قبل .. لكن للحين تشغل مشاعر فقلبي ياعذوب للحين ..

طالعته وقلت بهمس :ترحم لها

صكر عيونه وابتسم : الله يرحمها.. طالع السما .. اوووه صافيه السما اليووم

طالعت السما وقلت بمزح : تباها تمطر؟؟

ضحك وهو يقول : فـ عز الحر؟ لا يابوج هذا بيكون عقاب من الله !! ..امشي امشي نروح لهم

ابتسمت له : يالله ..!
قضينا ساعتين زيادة ..الشباب كانو مكيفين يلعبون كرة .. ونحنا نتمشى ونسولف ولا نقعد ناكل ونكسر حب وبعدها ردينا البيت .. امايه كانت راقده لانها تعبت من امس عشان جذي مايت ويانا .. اما ام سلوى فهي ماتحب هالطلعات .. وخالي شراتها مايه .. سالم .. هممم .. الريال ايحيرني واييد ..كنت كارهته بس مادري ليش احسه غااامض ومسكين .. رحلتنا الليله ساعه 12.. وسارروه عصبت .. ليش قعدوا وحاولت فينا بس نحن مارضينا لان قوم عليوه عليهم جامعه للحين ماخلصن .. اما انا .. فكنت بطاليه لا شغل ولا مشغله خخخ .. لاني موقفه سنه .. امااايه مارضت تنام ببيت خالي .. بس فالاخير اقنعها خالي وماردته ..

..............

"سالم"

نزلت تحت مستعيل .. وجفتهم كلهم قاعدين فالصاله .. ماشاءالله .. من متى ماجفت يلسه فبيتنا .. وناس تضحك بفرح من قلبهم ؟؟ ..

لفت نظري سارة قاعده عند امها وحاطة راسها ع جتفها وشكلها بترقد .. اااااااااخ ياربي .. اتينن .. عضيت على شفايفي بقهر ..من نفسي .. تعوذت من الشيطان .. تفكيري صار منحط .. انا ليش صرت جي؟ .. وطالعت جهة البنات .. سلمت عليهم .. لاحظت ان سارة عقدت حياتها مشمئزة .. صديت مقهور وطلعت

رن موبايلي .. كانت " اللولو" .. اوففف .. مالي بارض لها .. هالانسانه متفرغه .. وحدة متزوجه اشلها في الريايل بعد .. صج ان البنات مالهم امان .. تنهدت بقهر .. وانا اتذكر كل البنات الي تعرفت عليهم .. ولا وحدة فيهم صادقه .. كلهم شكلهم يلعبون .. ولا وحدة فيهم ذكرتني بحياة .. كل وحدة تعرفت عليها على امل الاقي حياة فيها .. لكن للاسف .. مافي مثل حياة ..
اصلا شنو يطلع من بنات قبلو على اهلهم وقبايلهم وسمعتهم؟؟ شنو يطلع منهم ؟؟
هه .. ولا شي طبعا ..

رحت للشباب .. كانو قاعدين بالكوفي .. منصور رجع طبيعي من امس .. ياربي .. انا مابغيت اتقرب من سارة .. يقوم يرجع لي هذا طبيعي اوفف .. جفت ولد خالتي فهد ... ياكرهي له .. يسوي نفسه غصب مثقف وانسان مثالي .. ياكرهي لهالانسان .. اوفف ..

فهد .. .: الا شخبارك ..يا سالم ... من زمان عنك؟؟

رديت بخياس نفس : بخير .. موجود !!

رد بهدوء: اها .. دوم ..

قلبت عيوني فالي حوالينا مب متفرغ لهالانسان .. صراحة كريهه .. ويقهر .. ويبط الجبد ..اوففف .. جفت بنت ويها مألوف بالنسبه لي خصوصا انه مر علي قبل كم يوم .. همممم |.. اذن هذي هي البنت الي كانت فالمحل؟؟..حلوة.. بس طبعا مستحيل توصل لحياة .. اخخ يا حياة اخ بس .. وينج عني .. انا ضعت من بعدج اكثر واكثر .. اااخ على ايامج !

سمعته يهمس لي : بس بس .. قطعت البنت .. ارحم عيونك ..

انتبهت من سرحاني .. وطالعته بقهر وحقد ..

طالعني بجديه : سالم .. ليش ماتمرني المكتب ابغيك شوي ؟؟ ..

طالعته بكره : ليش ان شاء الله؟؟

مافهمت نظرته بس الي عرفته انه ودة يعالجني .. ليش انا مريض؟؟ ولا مينون؟؟ لا يكون يعتقدني منصور اصدق باعتقاداته وراح ايي وافضفض عنده .. هه .. اخر همي هو ومنصور فوقه : اقول ياحضرة الدكتور .. لا تصدق نفسك بس ؟؟ .. واذ منصور قبل ايي لعندك ..فهذا من قله عقله .. هه ..


طالعني فهد : مو عيب عليك جي تتكلم عن اخوك؟؟ .. وبعدين منصور .. كاهو تشافى والحمدلله ؟؟ ..

طالعته بسخريه .. ومارديت عليه .. هالانسان مصدق نفسه بزيادة .. هالكريه ..!!


رن موبايلي .. وطالعت " اللولو " .. وبعدين يعني؟؟

رديت بعصبيه : نعم ؟؟؟ ..


صوت ريال : السلام عليكم؟؟ ...

عقدت حياتي .. ورديت طالعت الرقم .. لايكون هذا زوجها .. لا يبه اشعلي انا توهقني ويا ريلها اوففف : وعليكم السلام .. خير؟؟ ...

الطرف الثاني : ابد الخير بوجهك ..بس شفت الرقم متكرر لاكثر من مرة في فاتورتي .. حبيت اسأل ؟؟من صاحب الرقم لا غير .؟؟

عقدت حياتي .. هاللعبه ماتطوفني .. : لا غلطان ..انا تيني ازعاجات كثيرة .. ومااتذكر اذا هذا الرقم كان من ضمن الازعاجات .. عن اذنك ..باااي


صكرت وانا زهقان من هالحياة .. شنو هلحياة الممله السخيفه .. مافيها شي يستاهل .. مافيها شي يونس ..!! .. حتى البنات صرت مااحب اكلمهم .. احس بخنقه .. اصلا بعد حياة قمت التهي فيهم حتى يلهوني عن حياة .. بس بعد سارة .. كرهت البنات .. اخ يا سارة .. اخ بس .. متى تتطلقون وتردين لبيتكم وايي اخطبج متى ...

تذكرت ان منصور ردت له الذاكره ؟.. تنهدت بحزن .. يعني معقوله تكونين لغيري ..لـ اخوي؟؟ .. انا مستعد ادفع الي وراي ودوني بس تكونين لي ؟؟.. وحتى لو صار ولمساج انا راضي .. بس تكونين لي ..توعديني ...؟

؟؟؟


..........

"سارة"

صكرت من منصور وانا مبتسمه .. الحين بيي ياخذنا .. قلت له يودينا حديقه اسباير .. صراحة وااااايد امدحوا لي هالحديقه .. وياريييت اروحها .. كلمته على اساس بندور عذوب وعليوه وخالتي ام منصور .. ونوديهم الحديقه بالمرة انا وسلوي وسلطون وولدها ووعيال محمد ويسوف قلبي بيون وياانا >الجيش الوطني كله خخ
المهم

يعني بس احنا البنات >بنفللها خخخ .. الشباب معزومين ع الكوفي .. ومحد منهم بيي .. اوففف ياوناستي .. ومنصور مب داري عن هوى دارنا .. ياسلام .. اتصدقون متحمسه اروح اجوف الحديقه .. واااي اليوم احلا يوم .. الصبح مصبحين ع البحر وريحته الي تبط الراس .. وبالليل نمسي ع الحدايق .. حلو ياحلو الطلعات بس وه وه وه

نزلت بسرعه وانا اجوف منصور قاعد وهو معصب : ساعه ساعه؟؟

ضحكت بداخلي وطالعت حواليني .. يحليلهم امصدقين ان منصور معصب من صجه .. وانه رد طبيعي .. غمز لي منصور يعني جدامهم .. وانا حاولت اكتم ابتسامتي وقلت بصوت حاولت اخليه مقهور : زيييييييين اوف .. يالله .. نروح.؟؟

طالعني وقال : يالله ..

طلعنا برع ووقفت محتارة .. شنو البس جوتي ..طلعت جوتي وسمعت منصور من وراي يقول : اي اي اي تعالي .. نبنروح الحديقه مب العرس؟ اشفييج لا بسه كعب بتتحنقلين واتطيحين ..

قالها بقمه البراءة .. طالعته بقهر .. اقوله يكلمني شوي بحدة جدامهم حتى يصدقون انه منصور رد طبيعي .. اوفف مايفهم .. لازم يكلمني شوي بكره جدامهم عشان اتعرفون انتو لا انا ادانيه ولا هو .. واذا كلمني ايزي نفس الحين الكل بيشك .. لصقت فيه وانا ارفع نفسي وانزل راسه خشيت شفايفي بااصابعي وساسرته : نووويصر تكلم شوي بعصبيه ..

عقد حياته وهو يقول : بعد اكثر من جذي؟؟

طالعته وافضيحتاااااااه مايعرف يتحجى بصوت واطي .. مسكت شفايفي وانا اقول : اششش .. فضحتنا .. مسك شفايفه ببراءة وهو يقول .. : بييي نسيت !

صكرت عيوني بقهر .. ورديت ساسرته : اي اكثر من جذي فهمت؟؟

همس لي وهو يهز راسه : انزين ليش؟

ياربي شااقول له ذي .. : عشان الريال يصير شخصيه جدام الناس ويكون عصبي شوي على مرته فهمت ؟؟ ,.. عشان تحترمه جدامهم ..

طالعني مفهي .. زفرت وانا اطالع فوق وطارت قدلتي( الي كانت طالعه بدون قصد) من هفتي القويه.. مسك قدلتي ودخلها داخل شيلتي ..
قال لي : عيب البنت اطلع شعرها

توني باارد بهجومي المعتاد الا

سمعنا صوت عذوب وهي تقول : بسكم مغازل .. قلنا معاريس بس عاد مب جدامنا ..

ارتبكت .. وبسرعه تحركت من جدامها وانا اقول لها : جبي عن السخافه ..

رجعت وانا اتذكر اني ماخذت الجوتي .. قررت البس سطاحي"فلات" عشان يريحني بالمشي .. اصلا صدفه طاح الكعب فيدي .. وصارت هالسالفه ..

رجعت لهم السيارة وكان منصور مشغل السيارة .. قررت اقعد ورا منصور عشان ادليه ومايشكون بالسالفه .. بس اول ماوصلت جفت الكل ميت ضحك علي وهم يتهامسون .. ومنصور يبتسم ببراءة .. مايدري شسالفه ..!!

طالعتهم ببراءة : اشصاير ؟؟ اشفيكم تضحكون؟؟

سلطانه : ياعيييييييييييني ع الجو الرومانسي .. صراحة خطييييييير الفلم ولا تامر حسني ومي عز الدين "قصدها فلم عمر وسلمى"

سويت نفسي انزل للفلات مالي اما سلطانه ماتت ضحك وهي تصكر الدريشه .. يت بركب ورا .. بس سمعت سلطانه تقول : هييي اركبي جدام .. عمتي ام سعيد مب يايه .. وعيال محمد بعد مابيون امهم مارضت ... انا وولدي الحبيب ويسوف والمخبل البنات

ضحكت وركبت جدام .. وسمعت البنات يقرصون سلطانه وهي تصارخ وتضحك ...

ربط منصور حزامه .. ونطرته يتحرك .. بس ماتحرك .. طالعته وجفته يطالعني ..

قلت باانحراج لاني حسيت السيد الي ورا يراقبونا تمام تمام : يالله منصور مابتحرك؟؟

طالع جدامه وقال: لاء .. ربطي احزامج اول ... !! عشان مايصير لج شي

صفييييييير حااااد ياني من ورا راسي .. وتصفق .. البنات : عاشو عاشو عاشو .. مانقدر ع الرومانسييييييييييا

ضحكت منحرجة .. وصكرت حزامي .. مديت يدي من خلف الكرسي وقرصت سلطون وهي صرخت .. التفتت لها منصور .. وانا اتحسب عليها

منصور : اشفيج سلطانه؟؟ شي ايعورج؟؟ اوديج المستشفى ..

وامصيبتاه انفصحنا .. انا ادري خطتي بتفشل .. منصور هذا ويا تصرفاته بيينني .. قرصه بسيطه يوديها المستشفى .. اكيد بيشكون بعقله الله ياخذ بليسك يا منصور جانك بتفضحنا ..!!

سلطانه بضحك :: لاالا مايسوى \.. العقربه مرتك فرصتني .. يعلج ياساررروة بـــــ "ولد" يطلع ينونج ..!!

سكت منحرجه ... هذي شتقول ؟؟ .. مارديت عليها .. ثواني ووسمعنا صوت مسج " تنغ تنغ اس ام اس sms"

ضحكنا ع النغمه ويسوف ابتدى يقلد : اث ان اث .. عليوه وعذوب جيكو ع موبايلاتهم لان هذي نغمة مسج تلفونهم

ضحكنا على صوت يسوف .. وضحكت عليوه منحرجة وهي تقول : واااايه علني فداها رويض مانستني ..

قالت لها عذوب : فديت حرمة اخويه .. شو صاير ؟؟ .. خبرينا؟؟

ضحكت عليوه : بكره عيد ميلادي ومطرشتنلي مسج .. حليلها .. مانستني .. ضربت عذوب هب شرات بعض الناس .. 74 ساعه وياهم ونسوني

ضحكت عذوب : اوييييييييه نسسسسسسسيت

غنينا كلنا ويا بعض .. Happy birthday to you ..Happy birthday to you? Happy birthday happy birthday to 3lioooooooh
سنـــــــــــه حلوة ياجميـــــــــل .. تش تش تشا(صفقه خخخ) .. سنــــــه حلوة سنــــــه حلوة .. سنه حلوة يا عليا ..


ضحكت عليا باانحراج .. فديتكم ..

تكلمت سلطون بصوت عالي والصغاريه يقولون وياها مع اللحن: كل عاااااااااااااام وانتي بخييييييييييير .. وعقبااااااااااااااااااال 100 سنه

قالت عليوه وهي اترمش بدلع : بس 100 سنه؟؟؟

ضربتها سلطون : اي بسج .؟. بعد شو ؟ خلي ريلج يتزوج ويفرح من بعدج

ضحكت سلوي وقالت عليوه باانفعال : شووووووووووووو عيوني ؟ يخسي يناظر غيري بطيت عيونه حياتي ..(اما منصور فطير عيونه وهو يهمس : بااال حشا مجرمه ..

وكملت عليوه وهي تتخصر : هاي الي ناقص شو اتحسبيني ارويض بسكت عنه؟ اشرشحه بالمحاكم

ضحكنا على تعليقها وقالت عذوب : شو حبيبتي .. اشوفج مستهينه بحرمه اخوي؟؟

قالت عليوه : لا فديتها لو ماطرشت لي المسج يمكن

ضحكنا كلنا ع كلامها ..

وصلنا فيلاجيو .. ووصلنا الحديقه .. استغربت ان منصور يعرف الحديقه بدون مساعدتي وبدون اي شي .. اول ماوصلنا .. كلمت منصور ع جنب : اشدراك بالطريج منصور؟؟

طالعني وقال ببراءة : انا كل يوم كنت ايي هني اتمرن ويا فهد رفيجي .. انتي ماتعرفينه .. بس لان تزوجت ماييت .. بس اليوم فهد يابني هني .. عاد انا نسيت الطريج وماتذكرت .. بس هو دلني عليه .. ويوم قلتي لي ان نبي انيي .. خلاني فهد اسوق وايي وياه .. ماتدرين سارة بغينا انموت وانسوي حادث ..

طالعته مصدومة .. اشلون يعرف ايسوق؟؟ .. معقوله مانسى هالمهارات .. تذكرت ان بعض الناس الي ترد طفولتهم لهم بهالحالات ماينسون كل شي بس ينسون المشاكل والامور العاطفيه (او الامور الي كانو يهوجسون فيها وااايد).. شهقت من سمعت حادث : شنوووووووووووو حاااااااااااااادث؟؟

صراحة الكلمه الي خلت قلبي يفز من مكانه من الخوف "نموت"... يموت؟؟!

هز راسه ببراءة وكمل : اييي .. عاد انا شجاااع ضربت بريك على طول .. اهني اهني بغينا نسوي حادث ..

اشر لي ع الباركينج .. خفت بس هديت شوي .. تأملته شوي .. معقوله يسوي حادث ويروح عني؟؟ ..لالا .. اوووه شنو يعني وحادث خير يا طير |.. وحتى لو راح يعني وشو نهايه العالم؟؟ .. لا بس حرام امه وابوه واخوانه وسلوي؟؟ .. والبنت الي تحبه اكيد بيتدمرون .. اي صح .. حرام .. اكيد حرام ..

كمل وهو اير يدي ويدخلني السيارة .. جفت البنات تحركوا ويا اليهال يعطونا مساحه خصوصيه اشويه "اونهم عبالهم ان احنا معاريس طبيعين .. ضحكت بسخريه فبالي).. قعدني مكان السايق .. وقعد هو احذاي ع الكرسي الثاني .. فتح الليل الي بيني وبينه .. واشر لي على مكانين واحد للبترول والثاني للبريك ..

جوفي انا ضربت هااااذي .. "اشر لي ع واحد من الدوسات" بس وقفت السيارة بسرعه حتى جوفي .. شل الغترة والعقال ووراني شعره .. سحب يدي وحطاها على شعره وانا اجوفه مثل المفهيه المصدومة .. تحسست المكان .. وكان فعلا فيه انتفاخ .. ضغطت عليه لا اراديا ..

صرخ متألم : اييييييييييييييييييييييييييييييييييييي .. يعور ..!!

شليت يدي بسرعه وانا احس بالذنب .. مسكين .. قلت له بغياض : احسن تستاهل .. اتيي ولا اتيبني احسن احسن

طالعني وشكله يكسر الخاطر : لا مب احسن انا تعورت ..

حكيت يبتهتي مطنشه وجفت البنات وكانو مبتعدين شوي .. اوفف متحرقصه ابي اروح لهم .. وهذا قاعد يسولف .. فتحت عيوني الوسيييييعه وييييييي لا يكون يبني اسولف وياه طول الليل .. لا ياقلبي ابي اروح استانس وياهم ..

حسيته مسك يدي وقال لي : اجوف؟؟

طالعته مب فاهمه : ها؟؟ .. شتجوف؟؟

طالع الشاش الي على يدي : اجوف يدج .. رحتي اليوم المستشفى وغيروا اللصاق مالج؟؟

ضحكت على "اللصاق " :خخخ اسمه شاش(وكملت بالمصري) ياابني ..(رجعت اتحجى عادي) اي رحت .. خلاص باجر اخر يوم واشيله ..

رفع جف يدي وظل يتأمل الشاش .. وكأنه يتأمل الجرح .. ولان الليت الي بيني وبينه لا زال مفتوح فكنت اطالع تعقيدة حواجبه.. بعدين رفعهم لشفايفه وباسهم .. فتحت عيوني على اوسعها ..هذا شيسوي؟؟.. لا هذا ين رسمي .. قال لي بأسف: انا اسف بس والله مب انا الي وصخت والله انا رقدت"رفع عيونه لي وانا اطالعه مصدومة ومنحرجة ومرتبكة ومتلخبطة وكل شي .. ماعرف اشلون اوصف لكم ... كمل " .. اليوم جفنا فالتلفزيون الام تبوس ريل بنتها الي تعورها وتصير احسن ..طالعني و سألني .. يدج احين احسن يوم بستها؟؟

سحبت يدي بقوة وانحرجت .. طلعت من السيارة .. ومشيت بسرعه وانا اروح للبنات .. ارتجفت مع ان الهوا حلو على شويه حرارة ..

سمعته يقول وهو يحاول يسايرني ويمشي وياي : ساااارة صبري .. انزين انا اسف .. وقفي ..


وقفت .. وكنت اتنفس بالقو

قال لي منصور : اسف .. انتي زعلتي .. اسف والله اسف ..