واخيييرا خلصت من الردووود ..
>< خلصتهم بسرعه عشان خاطر كل الي رد .. وقال لي نبي البارت ع طول يوم اليمعه ..
وبكرا الباااارت

انتظروني .. وباانتظركم


دانهـ

صباااح الخير ..

شخباركم ياحلوين

ممم اما ان البارت اكتمل عندي .. حبيت انزله من وهل اليوم ..
فالبارت هالمرة الصبح مب الليل >< لكن مب دايما
واحب انوه على شي ثاني .. تخصصي صعب يالغاليات .. وماعندي يوم واحد بريك .. فـ اشرايكم كل اسبوعين بارت .. واذا كان في مجال انزل البارت قبل الاسبوعين نزلته .. اشـ رايكم؟؟

دانهـ

..::]][[ تابع الحفنه التاسعه]][[::..
"اخبرني من انت؟"

بعد يومين من الاحداث ..

بالتحديد .. يوم ملجة سعيد ..

الساعه "التاسعه والربع صباااحاَ"

يغط فنومة عميييقه .. طبعا .. اليوم بيملج على " شمسه" .. الي حبها من اول نظره .. بنت حبوبة .. والاهم جميـله .. ومثقفه<بنظره ..والاهم والاهم دلوووعه
صحيح ان روضه جميــــــــــــله .. بس ماتهتم بنفسها .. ماتهتم بجمالها مثل شمسه .. ودايما شكلها عادي .. عمرها ماتأنقت بشكل مبالغ فيه .. خاطره بهالشي .. بس كان يستحي يقول لها .. يستحي .. يطيح من عينها؟؟ .. كانت شمسه هي الي فرضت نفسها عليه .. بنت دلوعه جمييله كاااشخة المكيااج مايطيح من ويهها ..


بتخليه يادهينه لا تنكتين .. رن جواله .. صحاه من حلمه الي رسماه ويا شمسه .. فتح عين وحدة بتعب .. وطالع الشاشه .. بعد ماسحب الموبايل من الكوميدينو .. "شمس دنيتي" .. ياحياتي يا شموس .. اكيد انها مشتاقه لي وماقدرت تصبر لين الليل يوم بشوفها .. واخيرا بيكتمل حلمي وياج يا شموس؟ .. اخيرا؟

رديت وانا ابتسم وادفن راسي بالمخدة \\:: صباح الخير.. صباح الحب من قلب عشق روحك وتمناها
عشق همسك عشق خطك ومراسيلك يتحراها

سمع صوتها تقول بتوتر : هلا حياتي؟ .. صباح الجوري ؟ .. مممممممم ...


حسيتها مترددة .. وايد فقلت اشجعها: عمري شفيج؟؟ ..

بدون مقدمات صاحت .. قمت اعتدلت وقعدت واستندت على طرف السرير وانا اقول بحنان : قلبي .. شفيج.. ؟ ليش تصيحين ؟؟ .. حياتي كلميني ؟؟ .. الو ؟؟ ...


ماسمعت الا صوت صياحها .. تحنحنت ..: احم .. شماسي؟ .. شموس حياتي .. الو ؟؟ ..

قالت بتردد : اااانا .. انا ..

قلت احثها تكمل : شو ؟؟ ... انتي شو ...؟؟ .. تحجي لا تخرعيني زياااده ..؟ شصاير .. امج ابوج فيهم شي؟ .. انتي فيج شي شموس؟؟

هدووووووووء ... ماسمعت الا صوت الهدووووووء المزعج ... هدوء مزعج؟؟ تستغربون صح؟؟ .. بس ساعات يوم انك تحب كلام الطرف الثاني .. تلاقيه من يسكت دقايق .. تحس باازعاج من الهدوء .. ياكره هالاحساس .. تذكر هالاحساس من سنين قديمه .. سنين ضبابيه بالنسبه له؟ .. مر بهالموقف من قبل؟ .. بس مايذكر تفاصيله بالضبط .. بينما اكيد الطرف الثاني الي عاش هالموقف اكيد انه مانساه .. ولا انسى ادق التفاصيل .. ولا حتى نسى الوقت الي تكلمو فيه ... اي ياروضه .. مااتذكر .. بس اذكر ان هالموقف حصل لي ولج .. وكنتي مستحيه ؟؟ .. بس ليش وششنهي السالفه مب ذاكر .. سالفه قديمه اشعليكم فيها؟؟ ..

قلت بعد فترة سرحاني الطويله : هديتي؟؟ ..

هالمرة سمعت صوتها الرقيق يقول : سعيــد ...؟

لبيت بكل حب : لبيـــه ؟

سمعت صوتها العذب : انا ... ماابيك ...!!!

فجأة .. حسيت ان صوتها كان شرس ..كان حقيــر .. كان شرس .. كان سكاكين تطعن جوفي .. انا ؟؟ .. هذي شتقول .. ياناس تسمعونها؟؟ .. لحظة لحظة .. انا مب مستوعب .. شقالت هي؟؟ .. صدقوني احس .. مب سامع شي ..

ظلـــيت ساكــــــــــــــــــــت وهــــــــــــــــــادي .. سمعت صوتها المتشكك : الو سعيد معاي؟؟ ..

نطقت بتردد: شموس حياتي شقلتي؟؟ ...

سمعت صوتها الدلوع يقول / سعيـــد ... انا .. موبيك .. قررت .. اني خلاص .. مابيك ؟ ..

قلت بعصبيه : شمسه ؟؟.. انتي صاحيه ولا شاربه شي .. ؟؟

قالت بصوتها الدلوع الغنج : لاء مو شاربه شي ؟؟ .. بس انا فكرت .. انت ماتناسبني !!

صرخت باانفعال : شنـــــــــــــو؟؟؟ "سكت مب مستوعب ورددت بعصبيه" بكل بساطه يايه تقولين الحين انت ماتناسبني؟؟ واليوم؟ الــــــيوم ؟؟ ..

قاطعتني وهي تقول بدلع : اسفه حياتي .. بس .. انا فكرت بحرمتك الاولى .. والي يبيع حرمته وعياله .. ممممم .. بااجر بيبيعني صح؟؟

صرخت باانفعال: شمســـــــــه انـ

قاطعتني هالمرة بااستفزاز : لا تصرخ علي ؟ .. طلع رجولتك على حرمتك مهب علي ؟ .. وانسى رقمي .. واتصل الغي كل شي .. لانك راح تتفشل محد راح يحظر .. وكل رفيجاتي عارفين بالموضوع من امس .. او بالاحرى كل الناس درت من امس .. بس .. مممم "كملت بدلع " انا نسيت اخبرك .. مم كنت مشغوله حياتو .. سوري يعني متاخره حبتين .. بس ينفع ؟.. عشان ماتنحرج جدام هالبشر كلهم بالقاعه وانا ارفضك .. تراني خفت على مشاعرك .. عشان جي .. فكرت بسرعه والحمدلله .. تداركت الوقت .. وممم .. وبس ؟؟ .. قبل لا تنفضح ؟ ..على فكره حبيبي .. انته معزوم الاسبوع الياي فالشاليه .. بمناسبه .. ممم اقول ؟ ولا اخاف اعور قلبك .. صراحة حياتي .. بعد ماتعرفت عليك بسنه تمللت منك وايد اوف .. وممم .. تعرفت على اربعه .. وعلاقتي زادت مع واحد واييد .. وصرنا كلووس .. ممم .. والاسبوع الياي .. بنعلن خطوبتنا .. ممم انت بس كنت خطوه حلوة تحرك حبيبي .. ممم .. يعني حلو .. تسلينا شوي .. كم سنه حلوة مرت علينا حلوة.. بس لاتنسى حياتي الاسبوع الياي اوكي؟ ولا اقول .. الحقنا ماليزيا لان حبيبي ملياردير .. وبنسوي خطوبتنا هناك .. ياااي تتخيل معاي حياتي؟ .. بتزوج فـ ماليزيا .. هممم .. حلو .. بس تعرف مسكينه مرتك؟؟ .. كسرت خاطري ياحرام .. صراحه عورت قلبي .. ريلها يبيعها هي وعيالها بسهوله .. بس هذي هي الحياة؟هههههههههههههه(ضحكت ضحكة مايعه خبيثه كريهه اول مرة احس بكرهها).. اجوفك على خير يا حلو ..

وانقطع الخط ..

صدمه صدمه صدمه .. اعصار ..انا مب مستوعب ؟؟ .. شمسه شتقول؟؟ .. ضحكت بصوت عالي .. ههههههه .. حلوة .. حلوة .. حلوة النكته بس مب علي؟؟ .. ادري انها تستعبط ..
رديت اتصلت لها بدل المرة 75 مرة بالضبط .. وكان كالاتي " ان الهاتف الذي طلبته لا يمكن الاتصال به الان .. حاول مرة اخرى ..the number you are calling now is not available please try later " يعني شنو؟؟ ..
مافهمت يعني شنو؟ يعني شنو؟؟ ..

يعني مغلق؟؟ ..

يعني مصكره جوالها؟؟؟

انزين والي قالته صج ؟؟ .. بس .. انا .. احب شمسه.. وهي تحبني؟؟ .. واليوم ملجتنا؟؟!!
اشلون كلمت غيري؟؟ بدال الواحد اربع؟؟
اشلون وين حبنا؟؟ وين وعدها؟؟ يعني ثلاث سنين؟.؟
انا مب فاهم شنهي السالفه؟؟
شصاير .. ياناس ؟.. انا مصدوم مصدوم ..

ثلاث سنين .. ثلاث سنين انبنت خداااع ؟؟ .. يعني معقوله؟ معقوله حبي لشمسه ؟؟ معقوله كان كذب؟

انا ماشفت نفسي يوم لاني منخلق من طين
ولو اسمي وصل عالي بظل الي عرفتيني

ولكن للاسف هانت ليالينا بغمضة عين
وعلى الفرقا اسبابك نعم انتي جبرتيني

توصيتي بطعناتي وبعد ما تنزف السكين
وقبل لا الفظ انفاسي على نفسي توصيني!!

دخيلك قلبي الوافي لاتخلينه ولا تطرين
وراس الي تحبينه تصدي عن مدى عيني

وصلتي حق نهاياتي وشاللي بس بقا تنهين
على ما اظن ماباقي ولا حاجه تحس فيني

مدام انك تحبيني وبنفس الوقت ماتوفين
ومدام انك وفيتي له وبنفس الوقت خنتيني

وشاللي بس تحسينه اذا انتي كنتي تحسين
تحبيني وتحبينه ..تحبينه وتحبيني

حضنتي قلبي ونمتي وعلى صوتي انا تصحين
وإلا منك تمللتي تحضنينه وتمسيني

محال تصير في الدنيا بشر في داخله قلبين
تبينه بقلب وفي قلبك بعد قلبٍ يناديني

انا مابيك لو انك على الفرقا دهر تبكين
صعب ارضى بنزواتك ولوحتى بغيتيني

ثلاث سنين أو أربـع وكاد انها كثير سنين
بعد هذا العمر كله على ايامي صدمتيني

بعد لاتنطقي بكلمه رجيتك اسكتي تكفين
اخاف انك ان تكلمتي خطأ باسمه تسميني

واذا مره ذكرتيني مع الايام ابتنسين
ويبقى لك مثل ذكرى جميله لا ذكرتيني

كثير الي يتمنونك واكيد انك تبين تلقين
وانسي يوم ما انتي تمنيتي ولقيتيني

انا وش جابني لدربك انا وين وغرامك وين
انا اكبر من عيوبك وعيب انك عرفتييني

وانسى انك ذبحتيني وامانه ادفني السكين
وعلى قبري بدال اسمي ابي كلمة خسرتيني
"الشاعر غير معروف"
يعني .. انا خسرت؟؟ .. يعني انا .. ولاشي ؟؟ لعبه بيد شمسه؟ ليش وانا الي حبيتها ليش ليش؟؟ .. انهرت على السرير .. ريلي مب قادرة تشلني ... يعني شمسه كانت تلعب علي؟؟ ثلاث سنين قضتها لعب .. وانا ؟؟ ومشاعري؟؟ .. وعيالي الي اهملتهم .. وعيالي الي صديتهم وصدمتهم .. واهلي الي كرهوني .. يعني معقوله انا ؟؟ انا يستوي معاي جي .. يعني روضه معقوله صبرت علي؟؟ .. يعني ياروضه ماكان هذا رد لاعتبارج ؟؟ يعني ياروضه معقوله انا بعتج عشان شمسه؟؟ .
غمضت عيوني باالم .. معقوله شمسه بهالدناءه والحقاره .. ليش؟ ليش

يقولون بعدي تدنيتي للوطا و سمعتك فالطين !!
بصراحه ..ضحكت بهالخبر ابد ما صدمتيني
وش تتوقعون من شخص ما يعرف الوفا وين
وش اتوقع منك؟؟ بعد ما انتي خذلتيــــــــــني؟؟
ليت بس بالكلام اللي يقولونه تحسيـــــــــــن
يا ليت بس أخلاقـــــك تتعدى عن مدى عيني
خسارة ما مضى لجلك وش يفيد الندم الحين؟؟
عطيتك أكبر من حجمك من ما عرفتيني
بعت لجلك ناس يسونك بغمضة عين
خطاي اني قدرتك...حسبت انك تحبيني
ادري..كثاراللي يحبونك و عارف بتلقين!!
لاكن نادر وجوده اللي يتميز بنفس تكويني
افترقنا..ادري وجا الوقت اللي فيه تنسين
و وانسي كل شي فهالدنيا يذكرك فيني
ويووم انك من غفلاتك بتصحين
دخيل الله لا تجين وبصوتك تناديني
كرهتك من تفارقنا ولا على البال تطرين
ياشيين ذاك الوقت اللي قلتي فيه تحبيني
شوفي نفسك وين و انا سموي وين!!
احمدي ربك انك في حياتك عرفتيني
وماستغربت انك نزلتي للوطا و سمعتك فالطين..
اصلا كيف الوطا يتدنى للوطا يانظر عيني ؟؟؟؟؟

منقوله <الشاعر والله مااعرفه

حقيــره كلمة قليله عليها .. وانا .. وانا .. مثل الابله الغبي .. صدقتها .. ضيعت ثلاث سنين .. من عمري وعمر زوجتي وعيالي .. اشلون كنت مصدق .. انا اليوم مصدوم ..؟!!!

ركبت سيارتي .. وبدون حاسيه قعدت ادور في شوارع الامارات .. بعدها اتصلت فبيتنا وخبرتهم ان السالفه كلها تفركشت .. وسمعت صوت عذوب المستانسه وتضحك بوناسه .. وصوت امي المحتار .. صكرت وانا.. ابلع غصتي ..

مب قادر استوعب هالصدمه مب قادر .. سمعت صوت دق على الدريشه رفعت راسي من السكان لقيت ريال ملتحي يأشر لي .. طنشته .. ورديت حطيت راسي على السكان"المقود" لكن شكله كان مصر ..عصبت ورفعت راسي وفتحت الدريشه وقلت :ياخــــــــي اشتبـــــي اذيتني .. تعرفنـــــي اعرفك؟؟... لا ,... فاااااااااااارج

طالعني مصدوم .. وصكرت الدريشه بالقو .. زين ماكسرت راسه .. بروحي تعبان مب ناقص محاظرات !!

بدون حاسيه توجهت لبيت ... لبيت .. لاء غلط توقعكم .. لبيت شمسه .. ظليت ادق الجرس علهم يفتحون لي؟؟ .. بس ابد ابد .. ولا كأن في حياه فالبيت ؟؟ .. نسمات الهوى الحاره لفحتني .. صكرت عيني متضايج .. رحت صوب الجيران وانا ناوي على نيه قشرررة .. انفتح لي الباب .. وجفت بنت صغيرونه .. تطل من الباب ببراءة .. قلت بتأفف: وين بابا؟؟..

انزعت يدها من شفايفها العذبه .. وهي تأشر داخل البيت:تاااخل !!! ..

طرت على بالي حمدووه .. وحمداااان .. كنت ناسيهم .. انا لازم ارجعهم .. انا .. انا .. لالا .. مستحيل اخليهم عند روضه .. هم عيالي .. وانا اولى بتربيتهم ..!!!! بس .. انا مااعرف اربيهم؟؟.. لاء لاء اعرف .. وروضه بتيي وياي بعد .. بترد لي .. اي .. بترد .. بقول لها اني تخليت عن شمسه .. بس بكون اخدعها؟؟ ... لاء لاء انت قاعد تعيد ترميم بيتك الي هدمته روضه برحيلها .. ليش راحت ماكان له لزوم .. واذا تزوجت يعني؟؟... ليش تهد البيت .. تنهدت بندم وتعب من هالسنين الي قضيتها على سراااب !

دقايق وطل علي شاااب طووويل .. عريــــض ... ابيــضاني .. شعره الاسود ظاهر من تحت الـكاب الاحمر الي لابســه .. عيووونه متوسطات ورموووشه كثييفه .. وشنبه مخففه .. كان شكله مألوف ..؟؟ .. غمصت عيوني وعقدت حياتي وانا احاول اتذكر هالملامح ؟؟ ... بس ماطولت لان اختل توازني من حظني ..

قال لي وهو حاضنني: سعيييييييييييييد يا ريااااااااااااااال انت ويييييييييييييينك؟؟ ..

صكرت عيوني ابغي اتذكر هالصوت .. والشكل؟ ياربي سامعنه بس وين؟؟ .. مالي بارض افكر .. اصلا وين اقدر افكر وانا فهالمصيبه .. قلت بجفاف : شفيك انت ..؟؟ من انت ؟؟!!

بعدني وهو يضحك : بعدك دفش !! .. انا حميـــــد جي نسيتني ياريال؟؟ ...

عقدت حياتي حميد حميد ؟؟ .. سامع هالاسم .. حميييد .. فتحت عيني وقلت : حمييييييييدو ماغيرك ؟؟! .. متغير لعنت الله على ابليس محلّّو

ضحك حميد وهو يصرخ ع البنت الصغيره /:شمااااااااااااااس دشي داخل يالله ..

صكرت عيوني متألم .. اسمها شمسه؟؟ .. ليش كل شي يذكرني فيها ... ليش .. استوعبت ان حميد يبغي يقهويني .. قلت بسرعه: لاحميد وقت ثاني .. مستعيل انا .. بس ...؟!

طالعني حميد وهو يقول بااستغراب : انته ماعرفتني جي دليت البيت؟؟ ...

بلعت ريجي منحرج .. شاقول .. ياي اكلم خطيبتي الي مااعرف اشسالفتها؟؟ قلت : ماتعرف وين اصحاب هالبيت ؟؟ .. اشرت ع البيت .. وانا ابلع ريجي الناشف .. واطالعه ؟؟ ..

قال لي حميد بااستغراب : زين ادخل تقهوى اشدعوه .. ؟؟

قلت :والله مستعيل مرة ثانيه .. ماقلت لي؟؟ ..

سكت حميد ثانيتين .. وكأنه حس باانحراجي وقال : هييه .. اممم ابو احمد وعياله اليوم سافرو؟..من ساعه تقريبا ... اتوقع لبنان؟؟ والله ماادري ..


هـــــــــــــــــــــا؟؟؟ مســـــــــــــــافريـــــــــــــــــــــــــــــــــــــــ ــــــــــــــن؟؟؟
وشمســــــــــــــــــــــــــــــــــــــــــــــــــــــــ ــــــــــــــــــــــه؟؟
وشمســـــــــــــــــــــــــــــــــــــــــــــــــــــــه
وانـــــــــــــــــــــــــــــــــــــــــــا
وملجتنـــــــــــــا؟؟
مب فاهم انا؟
مب فاهم
!!!!
!!
!

دقني حميد على جتفي وهو يقول بااستغراب : سعيد .. بو عسكور ؟؟ .. بلاااك؟؟

هزيت راسي بنفي وقلت بااسف : مشكور ياحميد .. ماقصرت !! .. يالله فداعه الله ..


مشيت بسرعه لسيارتي "الرنج" وانا اسمعه يناديني .. طنشته .. وسقت وانا مقهور ..
لاعبــتها عــدل يا شمسـه لاعبتهــا عدل ..
بس انا وانتي ... والزمن ...

لفيت على بيت روضه مقهور .. باخذهم الحين وباارجعهم البيت ..

دشيت الميلس .. وسلمت على عمتي .. لاحظت نظراتها العتبانه .. بس انا مهب فاضي الحين .. روحي الي فيني مكفيني .. مب ناقص عتب !! ..

راحت تناديهم .. روضه .. واليهال ...

خمس دقايق

عشر دقايق

ربع ساعه

ثلث ساعه

نص ساعه

وينهم هذول؟؟ ساعه انطرهم وينهم .. عصبت .. ووصلت حدي .. بروحي اليوم معصب واصله لخشمي .. شكلي باكملها الحين بالعصبيه ..

دخلت عمتي وهي تقول بااسف: روضه .. تعبانه .. وماتقدر تطلع من الغرفه .. واليهال طالعين ..ويا خالهم خليفه !!

هذا اشلون ياخذهم ويطلعهم بدون اذني ؟؟؟ عصبت .. والاخت المصونه ليش ماتبي تجابلني ان شاء الله؟؟ ..اسبوع ونص مطنشتني وانا ساكت لها ..

قلت وانا احاول امسك اعصابي: ماعليه ياعمتي .. ماتقدر تيي ... انا اروح لها ..!!!

طالعتني وشكلها معترضه .. بس اشرت راسها باانهزام وهي تأشر لي ع الطريج وهي تمشي يدامي ..

وصلت غرفه روضه .. كانت غرفتها وردييه وجدار واحد مطلي بمعجون فوشي غامج .. لاحظت سريرها الكبير .. ولاحظتها مغموسه فيه ومصكره عيونها .. واول مادخلت فتحتها متفاجأة .. وارمشت بقوة ..

طلعت عمتي .. وبقيت انا وهي .. قامت اعتدلت فيلستها وقالت بعصبيه : اطلع برع ..!!!

جفتها مصدوم .. ياكثر الصدمات الي جفتها اليوم .. تكفين روضه تكفين .. خليني .. خليني اريح راسي فصدرج .. تكفين ضميني .. تكفين انا مصدوم ..!!!

سمعتها تقول بصوتها التعبان: اطلع من غرفتي .. اطلع برع .. اطلع اطلــــــع !! .. ليش ياي ليش؟؟ .. برررررررررع "صرخت"برررررع ..

توجهت لها بتعب .. ومسكت جتوفها بعصبيه .. وسديت شفايفها بيدي امنعها من الصراخ .. قاومتني وضربتني .. ضربات خفيفه من تعبها .. صكرت عيوني .. هي تعبانه وانا تعبان .. ليش مانرتاح ليش؟ .. حطيت راسي على كتوفها وقلت بتعب : روضه "تنهدت بألم".. متى تردين لي؟

وكأن كلمتي كانت الكلمه السحريه لمقاومتها .. هدت ثواني .. وفثواني ثانيه هاجت وهي ترفع راسي عن جتفها .. وغطت ويهها تصيح بقوة .. حضنتها وانا احاول اهديها بس بعدتني بقسوة وهي تصيح بصوت عالي .. ياريتني اقدر اصيح مثلج .. ياريت ..!!

قالت وبحة صوتها تذبحني .. تنحرني .. تدش قلبي وتطعنه ..
كل ما جيت اشتكي منّك شكيت
لا تداريني حبيبي باعتذار
كنت في قلبي ولكنّك سريت
مايفيد العذر طال الانتظار
غرّتك دنياك ليتك ماحكيت
وليتني ماقلت أحبك باختصار
روح في دربك تراني لك نسيت
وانتسيت اني على حبك أغار
بالخيانه ما بديت انت بديت
كنت اناابني وانت حوّلته دمار
رغم حبّي بعتني رحت اشتريت
اشتريت المال واعلنت انتصار
لا تظن انّي إذا رحت انتهيت
لو يطول الليل من عقبه نهار
كنت مغرم بك واحس اني بريت
بعد ماغيّرت دربي والمسار
أحمدالله من غرورك قد شفيت
لي بدلني جنّة من بعد نار
أعترف بانّي أنا توني صحيت
كنت نايم تاري انّي في حصار
روح لا تكذب تقول انّك هويت
الهوى ما يعرفه مثلك صغار
تحسب انّك ماهر ٍ بالحب ريت
المحبّه ما هي بلعبة قمار
راجع الماضي تلاق انك نسيت
الوفا دستور للمسلم شعار


مهند العظامات
انا .. انــــــــــــــــــــا مــــــــــــــــــــــــــــــــاابيــــــــــــــك ياسعيــــــــــد انا مرتاحـــــــــه بدونـــــــــــك .. اطلــــــــــــع من حيــــــــــــــــــــــــاتي
اطلـــــــع


!!
................


"سارة "

قعدت مصدومة فمكاني : ها؟؟ .. اشلون يعني؟؟

قالت لي سلوى بتوتر :: خلاص .. سعيد كنسل السالفه .. سالفه الزواج؟؟.. شكله ..مممم .. قرر يرجع رواض ؟؟

قلت بااستنكار : ليش الزواج لعبه؟؟..مرة يبغي البنيه ومرة لاء .. وتبين الصج احسسسسسن .. انا ابدا ماكنت ابغي اروح عرسه واقهر روضوه ..

هزت راسها سلوي بتفهم وهي تقول : زين مستعدة لباجر ؟؟ ..

قلت بملل : ايي .. اوفف ليش مانتم زيادة سلووي !

سلوى قالت بأسى : اتعرفين خاطري اتم .. بس مايستوي ..!

ضحكت وانا اجوف ملامحها يكسيها حمااار غير طبيعي .. مستحيه .. كانت مستحيه .. انا مااذكر كنت استحي جي ؟؟ .. ولا اذكر يوم يطرون لي السالفه كنت استحي .. كنت اعصب عليهم واخليهم .. واهدد .. وللاسف مافاد تهديدي .. سرحت بطريقه زواجي .. ودفاشه عمي .. حسيته وحش .. وحش على هيئه انسان .. اشلون رضاها لي ؟؟ .. واكيد مايرضاها لبنته .. اكرهك ياعمي اكرهك

حسيت بيد سلوى وهي تقول لي : انا اسفه ..

قلت بشرود : اسفه على ايش؟؟

نزلت سلوى انظارها .. وهي تقول باانحراج : ماادري حسيتج .. مممم .. زعلتي ..!!

قلت وانا انفي : لاء لاء.. بالعكس فرحااانه لج سلووي وااايد ..!!

ابتسمت سلوى بحزن وتنهدت وقالت لي : تدرين ؟؟ ..

طالعتها بسرحان: همممم؟؟؟

قالت لي : محتارة ..!

عقدت حياتي بااهتمام : ها؟؟ .. محتاره ؟؟ فشنو؟؟

طالعتني سلوى .. وقالت : ساروه .. محتاره .. اشلون بعيش حياتي .. وانا متزوجه .. احس .. غير ؟؟

طالعتها وهزيت راسي موافقه : مااعرف .. بس انا ,,, ممم .. تعرفين .. يعني .. لا ني مب متزوجه ولا متزوجة ..!

قالت بأسى: كنت ابغي ندرس ويا بعض ..!! .. ونقعد ويا بعض !! .. بس شكله الله مو كاتب نقعد ويا بعض الحين ..


ولا شكله بعدين !! .. لاني يا سلوي .. اعرف اخوج .. من بيرد لطبيعته .. باطلب الطلاق منه ..!! مع ان صعب اني اعيش .. مطلقه ..!! ..
دايما العيب يتبع البنت دايما ... حتى لو الخطأ من الريال.. دايما البنت تنعاف بعد اول زواج لها ..
اما الشاب .. عادي .. يقدر يعيش حياته .. صحيح .. راح يكون مستثنى ..غير عن العزابيه .. بس يظل ريااال .. غير وضعه عن الحرررمة ........!!

سرحت بعيد بعيد .. لي هناااك .. يوم .. اليوم الي باتطلق فيه من منصور .. ياترى شبيصير .. مب عارفه .. !!! ..

انتبهت من سرحاني على صوت صراخ وانتبهت ان سلوى محد وين راحت!.. ماوعيت الا وانا منسدحه ع السرير غصب عني لانه كان مندفع وانا ماكنت مستعده لـ هجومه .. انسدحت غصب ع السرير .. وثقل جاثم على خصري ..!!

حاولت اقوم وانا اسمع صوت صراخ وضحك ..

وصح .. توقعكم

صح


كان


يوسفوه السبال على بطني .. يناقز ويصارخ ويضحك .. ومعاه ماجد"اخو منصور الصغير" .. الي قعد يدلدغني انا ويسووفي .. واحنا ميتين من الضحك .. محد قادر يتحرك ..

صرخت : ميوووووووووووووود قووووم هههههههههههههههه .. هدنيههههههههههه آآآآآآآآ ههههههه

تباعد ماجد تعبان انقضينا عليه وانا يوسفوه ندلدغه .. وهو ميت من الضحك .. ومرة اير شعري ومرة انا اير اذنه .. لين ماانفتح الباب ..!! واحنا على هالصراع ..

بس بعد ماانفتح .. انا التفت وراي اجوف من ع الباب ؟؟ .. وكان .. منصور .. كنا ثلاثتنا مصدومين وحركتنا تجمدت يوم انفتح الباب وخصوصا انه انفتح بقوه ! طالعت منصور مفهيه؟ ماكنت فاهمه نظراته !!؟ مادري ليش حسيت ويه ينطق بشي .. بس شنو هالشي؟؟ ماادري؟

ماوعيت الا يوسفوه وميود راجعين يدلدغوني .. مت من الضحك وانا احاول ابعدهم وكنت اموت من الضحك يوم يدلدغوني ع خصري ورقبتي ..

دقايق حتى تعبنا ثلاثتنا وانبطحنا ع الفراش .. مولين ظهورنا لمنصور ..

مادريت بردة فعل منصور .. لانه بكل بساطه فتح الباب وطلع يوم انسدحنا ..

رقدت بدون حاسيه وانا حاضنه يوسف




..................


" حمدة "

اليوم هو اول يوم لي فالشغل .. وصراحة متوترة .. متوترة .. وخاايفه .. !! .. قعدت فمكاني وانا اتمنى لو عفاري وياي .. ولا اي احد .. المهم شخص قريب مني .. يكون وياي .. حسيت كأني رديت طفله .. تداوم فالمدرسة .. اول يوم لها .. خايفه ..تتمنى لو امها وياها ..! ..

ابتسمت بتوتر للبنات الي فالقسم .. وحدة منهم كشرت فويهي .. والثانيه .. صدت ع الكمبيوتر تدخل البيانات ..

!!!!!!!!!!!!!!!!!!!!!!!

هاي اولها؟؟ ؟؟؟

انحرجت ... وطالعت الارض .. عدلت كرسيي ..وقعدت عليه .. كتفت يديني جدامي .. وعقدت حياتي .. اطالع الاوراق الي بيدي .. ياناس انا يديده .. مااعرف .. يعني .. ع الاقل عطوني .. ويه ..!! ..

رن التيلفون .. ونقزت .. متخرعه .. الغرفه كانت هدوء .. وصوت التيلفون المزعج .. سحبني من خوفي .. تجرأت ومديت يدي برد ع التيلفون ..

بس شفت "الي كشرت بويهي " تمسك التيلفون الي ع مكتبها وترد : الو .. ياهلا ..

طالعتها مستغربه .. توني ابتسم في وييهها وكشرت فوييهي .. !! شكل الي متصل مهم ولا ماكان تكلمت بهالادب .. والابتسامه شاقه الحلج من اليمين لليسار ..

طنشتها .. وطلعت موبايلي .. من شنطتي بدق ع عفاري .. او .. حميد... اخبرهم متى اخلص ..

مسكت الموبايل ودقيت الارقام .. ماحسيت الا بااعصار يضرب طاولتي بكل قوة : حلو حلو .. اول يوم لج تداومين .. وداقتها سوالف يالحبيبه .. ؟؟ .. ماتعرفين ان القوانين .. هني .. مب مثل قوانين الوزارات والحكومات الثانيه .. وقت العمل ماشي موبايلاات الا وقت البريكااات مفهوووم \؟؟\

طالعتها مب فاهمه .. هي ليش معصبه الحين .. شو خصها؟؟ .. فتحت حلجي بـ ارد .. بس ماشي شغلت الراديو مالها : ولا عشانج يديدة يعني .. على بالج بنتغاضى .. لا اميه لا .. انتي هب فبيتج .. تمشين وتاكلين وتقعدين ع كيف كيفج .. انتي فشركة محترررمة ( وهني ضربت ع الطاوله الي جدامي وانا اخترعت وفتحت عيوني ع كبرها .. كملت مب مهتمه بصدمتي).. ولها سمعتها .. وزباينها .. وهالتصرفات .. مالها داعي ..


والله انتي الي مالج داعي .. الحين شسويت انا؟؟ .. بس كنت باتصل .. بلعت ريجي وقلت بهمس : باتصل فـ اهلي .. عشان ياخذوني..؟؟

طالعتني من فوق لي تحت .. وصدت عني .. ورجعت مكتبها ... ورفعت التيلفون .. الي ماادري متى صكرته ..

طرشت مسج بسرعه لـ عفاري وخبرتها متى اخلص ..

وانا اتمنى الوقت يمر بسرعه ... متى يخلص !!




..............


" سلوى"

دقيت ع باب ساروه : سارررووووة يالله بنتأخر ..؟؟؟

سمعت حسها وهي تقول : زين زين اصكر عباتي ..


نزلت ع الدري مستعيله .. اي نسيت اقول لكم .. امس فالليل رجعنا من الامارات .. بعد مازرنا رووضه \.. ماقلت لكم .. روووضه ضعفااانه وااايد واااايد بالنسبه لاخر مرة جفتها فيها ؟؟ .. ممم . من سنه؟ لالالا من 6 شهور .. .. ممم الخميس هذا .. خطوبتي الرسميه .. وامي قررت تسوي حفله عوودة .. عمتي ام منصور .. قالت لي انها بتحظر الملجة .. بس الخطوبه ماتقدر .. وطبعا انا ماقلت شي .. لان بتكون حفله خطوبه عاديه .. اصلا مب لازم .. بس امي الله يهديها ... اوففف .. مابي اعور راسي ولا راسكم .. ياربي ساروه تأخرت ..

رن جوالي وانا ارد بسرعه : ساروه وويعه .. وينج ساعه انطرج فالسيارة ؟؟ ...

ياني صوت كريهه : .. انا مب سارة ... ولا شكلج نسيتيني؟؟ . . مممم .. ماالومج .. لاني من فتره مااتصلت عليج ..ولا غلطان ؟؟ ..

تفاجأت .. ويدي تجمدت .. ماقدرت اتحرك ... الصوت مألوف والحجي .. هذا .. هذا .. لايكون .. هو نفسه .. الي كان يهددني ع .. المسن ... ومررة اتصل.. وماادري شكان يخربط ...!!! ...

فتحت عيوني بااوسعها ... وبلعت ريجي بصعوبه ..

سمعت صوته يتنفس بعمق : وين رايحة .. من صباح الله ..!؟

شهقت بعنف .. اشدراه .. اني بطلع .. ارتجفت شفايفي بخوف .. وتنفسي اضطرب ... بلعت ريجي 3 مرات .. مسحت على شفايفي وانا خايفه .. صكرت الموبايل .. خايفه .. خايفه .. خايفه .... هذا من ؟؟ .. وليش يلاحقني .. انا شسويت ..؟؟ ...فتحت عيوني باانفجاع .. واذا درى .. واذا درى .. اني .. انخطبت .. اخاف يسوي شي ؟؟.. لالا سلوى .. شبيسوي يعني ؟؟ ... شنو اشبيسوي ,.. ماتذكرين يوم خذى ميرة ومنيرة ...؟؟ .. ياربي .. ياربي .. شسوي ..

فزعت .. ونقزت من الخوف .. يوم انفتح باب السيارة .. كانت عيوني شوي وتطيح من مكانها .. من الخوف .. والصدمة ...

ريحه عطرها انتشر فالسياره طالعتها بسرعه ..كانت ساره ..

قالت لي ساروة متفاجئه : بسم الله اشفيج .. ويهج اصفر ..

كنت اطالعها ومب قادره انطق او حتى ارمش !! ..ردت قالت : هيلووو .. سلووووووي؟؟

حركت يدها جدام ويهي .. وبعدها .. رجعت لمكاني .. ومن طلعنا من البيت تلفتت فالسيارة .. ادور .. من الي يراقبني ؟؟ ..

عقدت حياتي .. وانا اسمع سارة تكلم منصور فالموبايل ..
:
لالالا ... ماادري وين بنروح .. سلوي بنروح وين اللاند؟؟ ..

هزيت راسي بنفي وانا اقول :فيلاجيو .. او الرتز؟؟ ماادري

سمعتها تقول : فيلاجيو مب اللاند ...ها ... والله مادري ... شسم المحل ؟؟ ... ممممم ... اوكي اوكي ... شنو الشريط الي تبيه انت؟؟ .. بال 4 ؟؟ .. صبر باكتبهم .. اخاف انسا اساميهم .. طلعت ورقه وقالت لي .. سلوي عندج قلم؟؟ ... فتحت شنطتي بضيج .. وعطيتها القلم .. وانتبهت اني مصكرة الموبايل .. فتحته .. وياني مسج ..

أكذب على نفسي اذا قلت بنساه
و القلب من طرياه جنت جنونه
والله ما عمري تمنيت فرقاه
والله ما تسوى حياتي بدونه
تكفون خلوني أبا أعيش وياه
أبا أخذه و أنتم خذوا اللي تبونه..

ومن نفس الرقم ..
ثانيه ورنة مسج ..
ياصاحبي جعل ربي يخليك
ارفق بقلبي وارحمه ياحياتي
ارحم غريق في غرامك يراعيك
بعدك عذاب وشوف زولك غناتي
بين العرب هواجس القلب تطريك
وماظن ينسى من يسوي سواتي
متعلق قلبي بحبك ويغليك
وعسى غلاكم مايسبب وفاته

صكرت المسج .. وياني مسج يديد ..





تعرف
وش
العذاب
على
أصوله!

العذاب
انك تحب
انسان
ما يعرف
غلاتك؟

العذاب
انك تحب
انسان
يتجاهل
حدودك!

العذاب
انك تعذب
كل قلب
بشوف
قلبك!

العذاب
تعيش
بعالمك
من دون
حب!

العذاب
يموت
قلبك
ولا أحد
يعرف بموته!!!

حطيت الموبايل سايلنت لاني حسيت انه وراي طوفان من المسجات .. التفت .. يمين .. يسار .. يمكن المح الي يطرش لي؟؟ .. بس للاسف هاليوم بالذات .. كان الشارع هدووء .. سمعت حس سارة وهي تقول : سوسو؟ ..

طالعتها بهم : ها؟

ضحكت ساروه وهي تضرب راسي : استحي شنو ها؟ .. باجر بتتزوجين بتقولين لريلج ها؟

استحيت ودقيتها : شنو ريلج ؟ .. للحين ماصار .. سارووووة ياحبج للاحراجات ..

ضحكت ساروه وهي تقول : طاعو ويهها اشلون قلب احمر ..

صديت عنها .. مب فاضيه لغشمرة سروي .. انا فهالمصيبه .. وساروة تضحك وتتغشمر .. شاسوي ؟؟ .. اقول لـ من عن الريال الي يتصل؟؟ .. محمد اخوي .. اكيد ساهي ويا عياله ومرته الشريه .. سالم .. اخاف منه .. اخاف اقول له .. منصور ؟ .. منصور بروحه مايعرف شي عن الدنيا .. ابوي؟.. لأ اخاف .. مااظمن هالمينون الي يتصل مايقول شي عني ..وخصوصا انه يعرف كل شي ... حسيت اني ضايعه وحايره وخايفه فنفس الوقت .. اقول لساره؟؟ .. لأ شبتسوي يعني ؟؟ .. هي نفسي بنت .. والبنت مابتقدر ترد ريال عن بنت ثانيه؟ .. اوففففف ..

سمعت صوت ساروه تقول : هيييي سلووووووي وصلنا ..

طالعتها .. وهزيت راسي بـ يالله ..

.............


"امل"

كنت قاعدة اشوف تيلفزيون.. ولان اليوم اليمعه .. فـ نادر مايحطون مسلسلات اليوم .. كله افلام .. واغاني .. وانا مابي اشوف هالاشيا .. تمللت .. استقريت على mbc لاني شفتهم يعرضون مسلسل .. عقدت حياتي .. توها بدايه الحلقه واسمها .. عقــاب ؟؟؟ ..

ارتجفت .. يوم سمعت كلمه "شات" قررت افر المسلسل مابي اشوف شي عن هالعالم .. غيرت القناه .. بس فضولي منعني .. ورديت حطيت المسلسل ..

تابعت الحلقه وكل ساعه افتح عيوني بقوة من جراءة الحلقه ..والي يعرض .. فيها .. و .. و .. وجرائتي .. انصدمت فنفسي وايييييد .. معقوله انا جذي ..

معقوله كل حد كان يجوف نك نيمي في الجات كان يظن اني .. وسخه ...؟؟!! .. انا .. اشلون رضيتها على نفسي شلون ؟؟ ..

رن موبايلي .. وافزعني .. كان .. كان هو .. نفسه ... برق قطر .. !! ..

متأكدة انا .. متأكدة .. دمعت عيوني مع لقطات المسلسل .. معقوله مصيري كان بيكون مثل مصيرهم .. صحت بمرارة .. ياريت ماسمعت كلامج يالولوة .. يارييييت ..!!!


..............