وقفت على سكه القطار انتظر الصفارة .. لتحكم بيني وبينكم .. رحلت الى محطات بعيدة .. الا انني .. ورغم الاعصار .. رجعت الى محطتي السابقه .. فيا لها من محطة جميله .. وشفافه .. قلوبكم هي المحطة .. وروايتي هي الارواق .. اوراق الخريف المتناثرة .. قد جمعتها مجددا .. وحفظتها في حقيبه الرحيل .. وعندما اقتحمت تلك الحقيبه .. رأيت انها في انفجار .. فحكت شوقي لكم .. وخطت اساور الحب .. ورسمت صفاء القلوب ..


ها هنا نبــــــــدأ


مشتاق لك ما تدري شكثر مشتاق
مشتاق لك أكثر من الشوق فيني
كثر المحبه والغلا كثر الأشواق
كثر الغرام اللي فضحني بعيني
أدري مقدّر أننا نصير عشّاق
وأدري كثر ما أبيك قلبك يبيني
مثل الحبر ما هو مقدّر للأوراق
ما تشوفني سلمت كل سنيني
وأدري عيونك تنتظر لحظة عناق
مع عيوني بالوصل لو تجيني
يا رب لا تكتب على عاشق فراق
يا رب وأنت اللي تحس بحنيني

****

إشتقت لك شوق فاق الشوق يا شوقــــي
شوقٍ شقا روح ( زود الشوق ) مشقيهـــا

شوقٍ دمى له دمي ذا دام بعروقــــــــــي
وأدمى جروحاً قــدام الغدر مدميهـــــــــا

ذقت الهوى ذوق متذوق على ذوقــــــــي
واليوم عيـني عنــا بعدك معنيهــــــــــــا

هو قلبي إنساق وإلا ساقه السوقــي ؟؟
وإلا الكبد ما سقاها سـقي مسقيـــــها؟؟

لي عشق عاشق (وشاقّ الوصل) معشوقي
ولي أنف نائف على النوفـا ومن فيهـــــا

نصفين أنا(نصف صاف)و(نصف مسروقــي)
وبقـي لي أنفاس مدري ويش مبقيهــــــــا

آسـابق الوقـت ســبّاقٍ ومسـبوقــــــــــي
وأرجي غلا من غلاها (عـزّ مغليهــــــــــا)

شفق شـفا شوفهـا شفّـاي لشفوقـــــــي
والعين شفقـا تشوّف شوف مشفيهــــــــا

يوم أشرقت كان شـرقي فاقد شروقــي
فأشرق بظلما غروبي شرق مشعيهـــــا

فإن كان ما ريقها ريّق مع ريوقـــــــي
فـلا المراقـي تروق برقي مرقيهـــــــــــا


(اهدي هذه الكلمات الرقيقه .. الى قلوبكم الصافيه )

..::]][[ الحفنه السادسه ]][[::..
" انا اغرق .. هل من منقذ؟ "
"لولوة"


كانت امل قاعدة وتهز ريلها متوترة .. قلت لها .. : امول حياتي شفيج قلقتيني !!

طالعتني بتوتر .. وقالت : لولوة .. انا بدش بالموضوع .. لاني .. مااعرف اقول مقدمات .. بس تأكدي .. (نزلت راسها) اني مااخترتج .. الا لاني اثق برايج .. واحب مشورتج .. (شقيييييت الحلج .. اول مرة ادري ان امول هالكثر تعزني ياقلبي عليها) انا ..

قلت اشجعها بعد مامسكت يدها.. : ايه حبيبتي شفيج؟؟ ..

طالعتني للحظة ورجعت نزلت عيونها .. تخرعت: اشصاير؟؟؟


رفعت عينها المليانه دموع .. :لولو اوعديني اول انج ماتقولين لااحد

قلت بصدق: وعد مب قايله لحد عن الشي تبينه .. شنو خرعتيني امول

امل غطت ويها وصاحت


تخرعــــــت مهما يكون هذي امول الوحيدة الي احبها من خوات علي .. شفيها اتصيح.. قمت من كرسيي وقعدت على نفس كرسيها وضميت جتفها بخفه : شفيج امول شصاير؟؟؟

طالعتني وهي ميتة من الصياح : انا ... انـــا


مامداها تقول الي تبيه الا ويرن جوالي .. قلت لها :لحظة علي يتصل

اتعلقت فيني وقالت لي: بليييز لايرجع ... ابغي افضفض لج .. وابي مشورتج

صياحها القوي ماطمني .. بس قلت : اوكي .. اوكي ..

طلعت اكلم علي وانا احاتي .. شفيها امول .. ليش جي تصيح بهالقوه ..

اكيد فيها شي .. وشي جااايد بعد .. لازززم اعررررف

ماانتبهت للي اقوله ..: ها؟؟ ..

علي بهدوء:حياتي شفيج ؟؟

ابتسمت بااحراج: عمري امل هني الحين اكلمك بعدين اوكي؟ ..سمعت صوت انفاسه وظل ساكت..فـ سألت بقلق : بتتأخر اليوم ..

حسيته يحك يبهته وهو يتثاوب ويقول : خاطري ارجع الحين بس للحين ماخلصت اشغالي غير هاي بحظر عرس واحد من الربع .. تثاوب بتعب .. خاطري اطنش كل شي وارد ارقد بس ماينفع

قلت : يعطيك العافيه .. حبيبي تأخرت على امل

علي: خلاص حبيبي روحي لها .. مع اني ودي اسولف وياج .. اشتقت ..

ابتسمت بحلاوة .. كلماته حسستني بااهميتي عنده .. :اوكي باي

صكرت من عنده .. وانا اطالع الموبايل بسرحان .. يالله مو وقتي .. حطيت يدي على رقبتي وانا ارجع لامل الي القلق انرسم فملامحها : ها راجع؟؟

ابتسمت: لا بيتأخر .. شتشربين ..

سكتت بحيرة .. وقالت / اي شي بارد ..

طالعتها وانا حاسه انها يايه بموضوع كبير .. بتوهقني وياها ,, : تحجى امل .. اتصلت للخدامه وقلت لها تيب 2 عصير مانجا

قالت امل : .. بس مااطيح من عينج؟؟ ..

رفعت حاجب .. فيها طيحة من العين ؟؟!! .. : لا تكلمي ..

قالت بهدوء مخيف : عندي رفيجه .. وياي بالكلاس .. اسمها نجلا .. مرة كنت اكلمها ع المسن ..

رفعت حواجبي .. شهالمقدمات ؟؟ ...طريقه كلامها عن رفيجتها ذكرتني "مشاعل" هي الي دلتني ع الطريج الشين .. ياااه .. كملت امل وهي تنزل راسها : عطتني موقع .. وقالت لي ادخل .. كنت مترددة .. خايفه ..
دشيت (رفعت راسها وطالعتني .. وانطقت بكلمة خلتني برهه افكر ) الجات .. نزلت راسها .. وكملت .. دشيت .. اول ثلاث ايام .. كنت ادخل بس مااتكلم .. بس اقرا الكلام .. مرة ياتني رساله خاصه .. كانت من واحد .. اسمه " بــرق قطـر " >>هذا مجرد اسم من خيالي لا له صله من الواقع .. واذا صادف وجود هالاسم فـ انا اعتذر من صاحب النك لاني استخدمته وهالشخص مب مقصود وحتى اسم امل !!

^^^^^^^^^^

"امل "

كنت اتذكر ادق التفاصيل .. وكنها صايرة قبل دقيقه .. صكرت عيني وانا استعيد الي صار بيني وبينه ..

برق قطر :
السلام عليكم ..

Without name
وعليكم السلام؟

برق قطر
شخبارج؟؟

Without name
بخير؟؟

برق قطر
انا بخير تسلمين على السؤال

فترة صمت ..

برق قطر
ممكن دقايق من وقتج شوي؟

Without name
تفضل/تفضلي؟

برق قطر
تفضل .. من فترة اجوفج تدشين بس ماتتكلمين ..

Without name
صح .. بس ادش اقرا الكلام .. تقضيه وقت !!

برق قطر
اها .. اوكي ممكن طلب؟؟

Without name
تفضل؟

برق قطر
انتي ليش جذي تتحجين من طرف خشمج اطر من عندج انا؟

Without name
اتكلمني؟

برق قطر
لا اكلم الي وراج .. من غيرج الي اكلمه؟

Without name
انا ماكلمت حد بدون نفس؟؟

برق قطر
انتي يديدة هني صح؟

Without name
ايه

برق قطر
اها ..

Without name
اوكي انا بطلع ..

برق قطر
اجوفج باجر؟؟

Without name
مااعرف .. يمكن ..

برق قطر
اوكي لاني ابي اقولج شي مهم ..

Without name
شنو؟

برق قطر
بقولج باجر ..

Without name
اوكي .. باي

برق قطر
الله يحفظج يالغاليه .. لاتطولين الغيبه

صكرت من عنده .. وقلبي يدق بالقوة .. اشلون انا كلمت واحد .. اشلون ..اليوم الثاني جفت نفسي منجبره ادش ليش مااعرف .. وبكل ينون .. كنت ادور نك نيمه .. بس ماكان اون لاين ..تميت اقزر وقتي .. اقرا السوالف .. مااقص عليج .. ماكان يشدني الحجي وايد .. لان اتصير هوشات ..وايد .. شوي .. ويدخل .. برق قطر .. حسيت اني ابي اكلمه .. بس تميت ساكته .. طرش لي رساله يسألني عن اخباري .. وفنفس الوقت ياتني رساله من شخص ثاني .. بس مارديت ع الشخص الثاني .. بعدها قالي برق قطر : انتي من قطر صح؟؟

قلت له : ايه

برق قطر
ايه اجوفج فالقسم الخاص بقطر .. اليوم محد فالقسم ..

ماكنت اعرف شـ ارد بس قلت اختصر : ايه ..
مر الوقت بسوالف عاديه بسيطة مؤدبه .. مرت ايام .. وانا كل يوم ادخل اكلمه .. تعلقت فيه .. كان يقهرني شي فيه .. كنت يوم اكلم حد موجود بالقسم يتضايق ويقعد يهاوشني بالرسايل الخاصه .. اول الايام كنت احس ان هالشي تدخل شخصي فيني .. بس بعدها حبيت هالطبع فيه .. كان يعصب يعصب اذا شافني كلمت حد حتى لو كانت بنت ... حسيته يحبني .. ويغار علي .. زاد تعلقي فييه واايد .. طلب مني مرتين الايميل ..بس كنت اردة فكل مرة .. كان يعصب علي واحسه بيقلب الجات فوق راسي .. بس يهدا .. كنت من اتأخر ثانيه بالرد عليه يشك فيني .. انتي من تكلمين ؟؟ .. اتعبني اسلوبه .. كان يحسسني اني وحدة رخيصه ممكن تكلم اي احد .. كرهته .. يومين مادخلت بسبه اسلوبه وشكه فيني .. بس يوم دخلت اليوم الثالث انهل علي بالاسئله وكنه خايف علي .. فرحت اشكثر .. قال لي انه مايبي يجوفني فالجات مرة ثانيه .. انصدمت .. كانت صدمتي كبيرة .. لكنه عطاني ايميله .. وبدون شعور مني ضفته عندي ع المسن .. عاتبني وحلفني ماادخل الجات مرة ثانيه .. وانا بكل طاعه طاوعته ... رفعت عيني للولوة وانا امسح دموعي الي كانت انهار تروي خدي : احبه يالولوة احبه .. شسوي .. احبه .. يبغي رقمي بس مب قادره اعطيه .. انصحيني يالولوة .. انصحيني .. احبه احبه احبه .. مب قادرة اتخلى عنه .. حاولت .. حاولت وااايد .. قطعت النت اسابيع كثيييرة بس كنت ارد واضعف وافتح ايميلي الي سويته بس عشان اكلمه .. ايميل محد يعرفه الا هو .. شسوي يالولوة .. محتارة انا .. محتارة ...رديت اغطي ويهي واصيح بضعف

^^^^^^^^^^^^^^

"سلوى "


قاعدة فالمكتبه انتظر ابوي الي راح يجوفني وهو مطول ويمعن النظر .. توترت .. شسالفه .. ليش جذي يجوفني .. خرعني .. اكيد الموضوع خطيير .. رفعت راسي وقلت لابوي بطيبه: هلا يبه امرني؟؟

ابتسم ابوي ابتسامه صادقه .. حنونة .. نادراً ,. مااجوفها .. ماادري ليش خفت .. مب من عادة ابوي يبتسم جذي .. قمت العب بطرف قميصي .. وانا خايفه .. والف فكرة وفكرة فبالي .. لين ماتكلم وهو يسند ظهره على الكرسي الجلد الضخم الفاخر ..: سلوى ..انا ببتدي بالموضوع بدون مقدمات .. انتي ياما كنت تحلمين تدرسين برع ... صح ..!!


لمعت عيني بفرحه .. يعني ابوي اخيرا اقتنع .. بيسفرني .. قلت بفرحه فاضحه: بتخليني اكمل دراستي فكندا صح .. صح ..

نقزت من مكاني مستانسه وضميته بقوه وبسته على راسه .. : مشكوووووووووووور ياحبيبي ياابوي .. ركضت طايرة بروح غرفتي بس ناداني .. التفت له وانا ميتة فرح : لبيـــــه

ابتسم ابوي: سلوى يبه الي اعرفه انج عاقله اشفيج جذي؟؟ حتى ماخليتيني اكمل كلامي ..

ابتسمت بفرح : ليش يبا في مفاجأة اكثر من هالمفاجأة .. وابتسمت بصدق

ابتسم ابوي وهو يومأ براسه : ايه يبه .. تعالي تعالي قعدي ..

مشيت وانا احس اني اطير وقعدت مرة ثانيه .. وانا افكر بالمفاجأة الثانيه .. اكيد انه بيخلي سروي تروح تدرس وياي .. ندرس ويا بعض .. الله حلم .. ولا احلى .. لا مب حلم حقيقه واقعيه .. ابتسمت بكل حماس : وهذاني قعدت


نزل ابوي انظارة وهو يقول ,,: ماخليتني اكمل .. انا بخليج تسافرين تدرسين برع بس على شرط ...!!

عقدت حواجبي .. وانا اقول بحيرة :موافقه ... (يوم طالعني ابوي .. سكت افكر ) شرط؟؟ .. شرط شنو !!

ابتسم ابوي .. : في واحد متقدم لج .. هو رايح يكمل الماجستير .. ويبغيج حليله ؟؟ وبجذي .. تتزوجينه .. وتكملين دراستج برع ...

طالعته مب فاهمه ...رددت وراه مثل البغبغاء : اتزوجه؟ ...

طالعني بشكل جاد : ايه تتزوجينه .. انا موافق عليه .. هو خطباج من اسبوع .. بس انا اسبوعي كان مزدحم .. ونسيت الموضوع .. اليوم تذكرته .. ها يا سلوى .. تبغين فيصل ولا لاء ؟؟؟ ..

دق قلبي بسرعه كبيرة .. وحسيت بدمي كله يتيمع بويهي .. اتزوج ؟ .. بس انا صغيرة .. ومب مستعده مسؤليه زواج وعفسه !! : يبه انا صغيرة !!

طالعني ابوي بعصبيه ساكنه : سلووووى ... انا مابي اغصبج .. لكن انج تقولين صغيره ولا كبيرة .. هالكلام مايمشي عندي .. واذا تبين دراسه فالخارج .. عطيتج انا الحل .. اما اطرشج تدرسين بروحج .. فــ لا ... لا .. لا ... ولا تفكرين اني راح اسمح بهالشي ؟؟. بنتي تسافر بروحها عشان تدرس .. خوش خوش ..

سكت شوي .. وانا منصدمه .. وكمل بعدها بلين اول مرة احس فيه: يايبه .,, فكري زين .. حبيبتي .. انتي الحين مب صغيره ماشاءالله بتدشين العشرين بعد سنه ولا سنتين .. شالفرق اذا تزوجتي الحين ولا بعد سنتين .. ؟ وبعدين هذي فرصه وياتج من السما .. اذا تبين تكملين دراستج بالخارج .. ها يبه .. شقلتي ..؟؟ ...

سكت .. محتارة .. ومنصدمة .. ابوي شكله طابخ الطبخه وناجبها .. ماينتظر رايي .. شكله مصر على هالزواج ..!! .. يبيلي افكر .. مب عارفه شسوي؟؟ .. شـ اختار ؟؟ ...

ظليت ساكته صامته الافكار توديني يمين ويسار .. مب عارفه .. شنو الي اقرره .. ابوي سكت شوي وقال : فيصل رفيج اخوج .. ريال والنعم فيه ؟.. دارس فـ لندن .. ورايح يكمل دراسته .. هو بن الـ ؛؛؛؛؛؛؛ .. ولد وزير ..(من سمعت انه ولد وزير ين ينوني .. والعفاريت الي فالدنيا كلها قامت تتناقز جدامي بعد؟ بعد اتزوج واحد له خص بالمراكز بعد؟ راح اعيش حياة خاليه من المشاعر خاليه من كل شي لا حرام حرام .. مابي مابي .. كنت اترجى ابوي بعيني عشان يرفض لكنه كمل ) وراهي .. بيعيشج احسن عيشه .. نفس عيشتج فبيت ابوج .. واحسن .. ماراح يقصر عليج بشي .. وغير هاي هو رفيج اخوج .. واحنا عارفينه عدل .. كان ايجي بيتنا قبل اذا تذكرينه ...!!

عصرت ذاكرتي الصغيره .. اتذكر شكله ولا لمحه منه .. كان طيب ولا لا؟؟ ... بس ذاكرتي كأنها عجزت عن ذكر شخص بهالاسم .. آها ولد وزير عشان جذي رضى فيه ؟؟!

هزيت راسي بيأس : مااتذكره ..

قال ابوي وهو يقوم من على كرسيه متوجه للباب : فكري عدل

طلع وخلاني حايرة .. في دوامه التفكير .. مب عارفه افرح؟ احزن؟ استانس؟؟ اكتئب؟؟ اشلون جافني؟؟ خطبني خطوبه تقليديه؟؟ ولا ؟؟ .. يعرف شكلي ولا ؟؟؟ .. مااتذكر حد بااسم فيصل مااذكر؟!!



^^^^^^^^^^^^^^^
"علي"

كنت ويا لولوة فالمطعم .. خلصنا العشا .. وراحت هي الحمام .. طلبت ايسكريم لنا .. يعني نحلي .. جفتها طلعت من الحمام وهي تبتسم وتعدل شنطتها بس تضايقت واااايد واااااايد يوم جفتها رادة وحاطه الروج .. كم مرة قلت لها ..ماتسمع الحجي .. تقول كل الناس جذي تسوي .. كم مرة اقنعها .. انا مابي اجبرها انا ابيها تسوي جي من نفسها حتى تهده بااقتناع ..

قعدت وهي تحط الشنطة بدلع ع الطاوله .. ابتسمت لها بضيج ..

وهي ابتسمت : حياتي .. بنمشي؟؟

قلت بضيج: لا .. بس ابتسمت حتى مااضيج خلقها

قلت وانا اطالعها تطالع المنظرة الصغيرة .. وتردها بالشنطة .. تضايقت من حركتها : لولوة انا مب قلت لج لا تحطين روج يوم تطلعين وياي وبدوني؟

تأففت وبرطمت وهي تقول بدلع : حبيبي .. خلاص خلاص .. اخر مرة .. وابتسمت بدلع .. بس لاتزعل ..

قلت : كل مرة تقولين نفس الحجي .. تنهدت بقهر ..

قالت بدلع: نو نو هالمله اخل مله (هالمرة اخر مرة ) واشرت لي بااصبعها مثل اليهال

ابتسمت بحنان .. مسكت يدها .. ونسيت ان احنا بمطعم .. : مشتاق اجوف ولدنا او بنتنا .. اشرايج نسافر الخارج .. ن ت ع ا ل ج >كنت مركز في ويهها وانا انطق اخر كلمه؟