أبحث عن ارادتي للكاتبة: bintaboha

08-05-08, 04:00 PM

المشاركة رقم: 1

المعلومات
الكاتب:	ارادة الحياة
اللقب:	عضو ماسي

البيانات
التسجيل:	Oct 2007
العضوية:	53753
المشاركات:	10,517
الجنس	أنثى
معدل التقييم:
نقاط التقييم:	740

االدولة

مدونتي

الإتصالات
الحالة:
وسائل الإتصال:

المنتدى : القصص المكتمله

أبحث عن ارادتي للكاتبة: bintaboha

أبحث عن ارادتي للكاتبة: bintaboha

السلام عليكم
قصة شدتني كثيرا ولمست معاناة في داخلي اضعها بين يديكم لعلها تكون امل للكثير منكم
مع خالص حبي وتقديري لكل من يفتح هذه الصفحة

أبحث عن ارادتي
للكاتبة: bintaboha

مسكت مرايا دائريه صغيره واطالعت ويهي ابتسمت ابتسامه ولا أروع الحق اني ما شاء الله عني جميله بدون شي لو حطيت مكياج اطلع اخبل والكل يقول عني هالشي ولا بنت في العايله توصل جمالي او تنافسني فيه تجهزت ما باقي الا ادور حد يوديني الخيمه رحت صووب موبايلي وبدلعي الدايم يوم ارمس ابووويه
اليازيه :هلا ابويه وينك ابى اسير الخيمه بعيده ما اقدر امشي تعرف زحمة ريال
ابو اليازيه :خل عنج زحمة ريال وين خيمة الحريم عن الريال يلا امشي لحد هناك
اليازيه وشووي بتصيح:بيسيح مكياجي لين ما اوصلها
ابو اليازيه :وانا عند الريال ما اقدر اظهر عن عمج يزوي ودري الدلع والعيازه
وانقطع الخط
اطالع تيلفونها شووويه وبتموت من الصياح استحاله تمشي بيضيع كل اللي سوووته وردت ادق تيلفون محد غيره منقذي الحبيب
اليازيه بدلع :هلا شاهوني هلا بشيخ العرب
شاهين يعرف بنت عمه زين :يزوي مب متفيج لج شووو تبين
اليازيه :شهون حبيبي ابوويه مشغول محد بيوديني خيمة الحريم تعال خذني
شاهين :منو بيعطيني سيارته
اليازيه :قول حق واحد من اخوانك سير حق سلطون بيطيع
شاهين :ما بيرضى وانا متأكد من هالشي وخاصه الحين الدنيا زحمه عند بيوتنا
اليازيه بأسى :عاد انا اهوون عليك.....وبحيله: هيه انا مب ختك لو شموه والا مدوي بطيع خلاص اوكييه برايك
شاهين ما يحب يزعل بنت عمه :خلاص الحين بشوف سلطون اتزهبي
اليازيه تبتسم بانتصار نجحت خطتها:فديت انا شاهوووني
شاهين :يلا برايج ......وبند عنها
راحت صووب عباتها ولبستها ولبست الشيله ورشت العطر وطلعت من حيرتها البيت فاضي كلهم في العرس لبست جوتيها وطلعت صووب الحووش تتريا ولد عمها
مرن دقايق قليله ووصل سارت صووبه وركبت جداااااام
شاهين يبتسم:شو هالحلاه يزوي مسكته بتغطي على الكل اليووووم
اليازيه تعرف عمرها حلوه بس شي ينقصها يخلي الكل ما يلتفت لهالجمال :ادري
دقيقه وصلوا جدام الخيمه
شاهين :الحين من بعدها الخيمه ليش ما تمشين دبووه
اليازيه اطالع ولد عمها باستنكار :لو مب انته قايلنها كنت زعلت عليك
شاهين :ههههههه ادري
اليازيه تنزل من السياره عقب ما تغشت :الاعتراف بالحق فضيله بس صح أنا دبدوبه بس حلوه
شاهين يضحك عليها
مشت عنه ودخلت باب الخيمه وخازت الغشى عن ويها يلست تلتفت ادور حد تعرفه عقب سارت صوووب طاوله بعد ما شافت بنت عمها رافعه ايدها تأشر لها
اول ما وصلت عندهن عقب ما سلمت
مديه:يالله يزوي شو هالحلاه
اليازيه بابتسامه تحب حد يمدحها :عيونج الحلوه
يلست اليازيه تفسخ عباتها كانت لابسه فستان أسود هاللون اللي تحب تلبسه في كل عرس
روضه ربيعتهن:دومج يزوي أسود عنبو غيري عاااد
اليازيه انقهرت شودخلها هالرزه تراج دومج رازه ويهج في عروساتنا الله ينطبج يا شموه شو تبين تعزمينها وبدلع:أحبه أخو مرائي شي
وشووويه ويوصلن خوات اليازيه بالأبو هند ومنار
هند ومنار متكشخات وطالعت شي :السلام عليكم صبايا
الكل يقوم يسلم عليهن
شما:هلا والله شو هالكشخه والحلاه
منار:ويه فديتج عيونج الحلوه .......وتصد على ختها :اشحالج يزوي
اليازيه اطالعهن بغيره عقب ما فسخن عبيهن :تمام اشحالكن انتن
هند اطالع ختها :شووو يزوي متنتي ما عرفتج صدق صايره بوتمبه من الخاطر
اليازيه اطالعها اجتلها والله انه حلال افك البشريه من هالحثاله
مديه عرفت بنت عمها معصبه :بس لاتنكرون انها مغطيه وطالعه توب
هند :صح لو ما جسمهااا كانت بتطلع احلى بس اتخبرج ليش ما تسوين رجيم بعدين بطيحين في جبد ابوووي محد بيرضى ياخذج
مديه عرفت انها بتقوم الحرب الاهليه واليازيه ما بتسكت عن حقها:يلا بنات نشووف المعازيم كل وحده تشل شي البخور وسلل العطر والشوكلاته يلا انتشروا
وسوون البنات هالشي والفرقه ادق وهن مبسوطات ونفس شي المعازيم والحريم مشتغلات يطالعن البنات اللي تنقي حق أخوها واللي تختار لولدها
اليازيه شاله سلة العطر وتمشي بين الطاولات وهيه مستانسه عقب ما لبست رمست ختها السخيفه
اليازيه ترمس الياهل علشان تخطف تسير الطاوله الثانيه:حبيبي وخري كرسيج شووي بمر
تلف الياهل صوبها :اكووووو درب خطفي ما يسدج
اليازيه اكره ما عندي ياهل جليل ادب تصدقون شو اسويبها هالمفعوصه وابتسمت بتصنع امها عدالها :لا حبيبتي ما يكفيني قومي شووي علشان امر
الياهل تتحرطم وتنش بتعايز:تراج دبه عنبو كل هذا ما يسدج
اليازيه تفج عينها ياهل عنبو ما اظني وصلت الخمس سنوات اتهيني
أم الياهل :عيب يا بنت
اليازيه مالت عليها كلفت على عمرها اونه عيب يا بنت وانا اقوول ليش لسانها طويل وتصد عليها حتى لو ياهل لازم ترد عليها وما بتستحي من أم الياهل البارده في نظر اليازيه:عيل خلي ابوج يقطع الاكل عني
ومشت عنها عنبو دارهم اشفيهن الدبات يعني الله خلقنا جذيه نجتل اعمارنا نمنع عمرنا عن العيشه شلي معور راسهم جني على حسابهم اكل الله ينطبها من حاله
في طاوله ثانيه
اطالع امها وتتمصخر :شوفي امايه هالبنت حلاتها والله انها تينن عاده مب جسم عليها
امها تصد للمكان اللي تأشر عليه بنتها :أي وحده تعنين اللي لابسه أحمر
البنت تضحك هههه:لا اللي عدالها لابسه أسود
أمها :وهبي شو ابابها هذي أنا بتاكل الاخضر واليابس عدنا
البنت :هههه عاد تصوري أخويه فديته هب ضعف وهيه يايه عكسه امره
واقفات هيه وبنت عمها عدال الكوشه
مديه:اشفيج يزوي مبوزه لا تاخذين على رمسة هندوه
اليازيه :لا مب زعلانه وانا لابسه رمستها ولا مستهمه فيها الا اتخبرج متى بتدخل حرمة أخوووج
مديه :ما اعرفها

اليازيه :تراني يوعانه خلنا نيلس ناكل شووويه على هالطاوله
مديه :لا نحن خوات المعرس جيه نيلس لا ما يصير يوم انرد البيت بنتعشى
اليازيه تروح صووب الطاوله :انتي اخته والا أنا لا
ويلست وبدت تاكل من المقبلات الموجوده
مديه تتجرب صوبها وتقول في خاطرها بنت عمها تموت شي اسمه اكل
اليازيه :اشوفج يتي شو تبين
مديه :بيلس عندج مابخليج اروحج
وبدوا يوزعون العشاء والهريس والمشاوي
ومن خاطر استانست اليازيه لانها اليوم ماتغدت كانت راقده يوم نشت خذت لها كروسون وكوب عصير وبدت تتعدل للعرس وباختصار ما واحت تاكل
اليازيه وهيه تاكل تصد على بنت عمها :اتخبرج هذيلا خوات اخووج فارس
مديه :هيه هن
اليازيه :ماشاء الله عليهن هبات ريح يتحركن والابتسامه ما تفارق ويوهن مب انتن اللي ولا جنه أخووكن
مديه: شو تبينا نسوي يعني
اليازيه :الا وينها أمه
مديه ادور من بين المعازيم وصدت عند باب الخيمه وحصلتها واقفه هناك:هذيك اللي لابسه الثوب الأبيض
اليازيه:عاده مب حلاه عليها صدق انها باكستانيه والبنت اللي لابسه ذهبي تشبها
مديه :هيه كلهن يشبهنها عدا فروس طالع اسمراني على ابوووي
اليازيه :عاد اتصوري ولد بياضه ناقع صدق مب حلوووو
على الساعه 11 دخلت العروس وكان جمالها عادي بس عيبها كانت تمشي بسرعه جنه حد يالس يركض وراها
اليازيه :اشفيها مستعيله
مديه:حرااام عليج اكيد مرتبكه
شما :بسير اتقرب منها اقولها ترد تستعرض عنبو الأوادم ماشافوها
اليازيه تساسر مديه بنت عمها :تصدقين مدوي شيخوووه ما تغير فيها شي الا كشتها اللي تعدلت بالاستشوار طبعا
مديه :ههههه يا الخايسه لو يسمعج فارس الحين بيذبحج يالسه تغايضين حرمته
اليازيه ردت اطالع العروس اللي هيه بنت ييرانهم أكبر عنها في حدود ثلاث سنوات ...وتركز فيها عاد مب جسم عليها رهيب الله ينطبها والا أنا أحلى عنها بواااااايد
مديه :حووووووووو اشفيج سرحانه
اليازيه :ماشي
مرت فتره بسيطه ودخل المعرس وعنده ابوها على ما اعتقد لانه شيبه واثنينه اخوانها على ما اظن
اليازيه اطالع ولد عمها ماشاء الله هيبه وطالع شيخ جدام حرمته على العموم الله يوفقهم
الساعه 12 وشي رادات البيت مشي هيه وبنات عمها
شما :وين بتروحين يزوي تعالي تعشي ويانا
مديه :وين خبرج عتيج يزوي تعشت في العرس
اليازيه :انتي ما تبيني أي بيتكم بس مب بكيفج يلا شمووووه انروح اكييد ابى اتعشى
مديه : يزوي مب زين العيش وايد في الليل
اليازيه :اتخبرج انتي بطنج والا بطني مب كيفي
شما اطالع ختها :اشفيج مدوي خليها على راحتها
مديه :كيفهاااااااااا
يالسات في المطبخ يحطن لهن عشا
اليازيه :وين بيروحون الليله المعاريس
شما تقص خيار وطماط :سلطان حايز لهم جناح في روتانا وباجر بيسافرون صوب ماليزيا وجزر المالديف وما ادري وين بعد
اليازيه:كشخه يا حظهم في خاطري مره اسافر
مديه اطلع عصير من الثلاجه :انتي ما رحتي السعوديه وعمان يكفيج مب نحن ولا طبينا مكان
شما خلصت :ها وين بنتعشى
مديه :نروح الصاله نبى نتطالع التلفزيون
وشلن أكلهن وسارن صوووب الصاله ويلسن يتعشن ويطالعن فيلم هندي في قناة الامارات
وشوووي ويدخلون سلطان وعلي وأحمد وخالد وشاهين
:السلام عليكم
البنات:وعليكم السلام والرحمة
أحمد:يالسات ياكلن شو ما تعشيتن في العرس
شما :وين نتعشى ونحن خوات المعرس يالسين نتمشى في الخيمه ونتطمن انه الكل تعشى ونسولف ويا ربعاتنا
اليازيه : شو عرس الريال كشخه
خالد:انتي اول شي رحمي عمرج بسج من هالأكل
وشاف نظره من أخوه سلطان معناها اسكت عيب
اليازيه تنغزه بالرمسه :خلوود انطم ابرك لك لا اخبر اوكييييه
خالد ابتسم بعد ما احمر ويه يزوي لعينه اعرفها عدل اكيد بتخبر : افااااا يزوي توبه والسموحه
اليازيه مبتسمه :ادب
ويلسوا يسولفون شوووي عقب وصل شاهين بنت عمه صوووب بيتهم اللي حذال بيت عمها بالمره
صارت الساعه ثنتين ولا ياها رقاد بطنها متروس مب قادره حتى تتنفس نشت من الشبريه ووقفت جدام مرايا الكبت لابسه بيجامه زرقاء عباره عن بنطلون وفانيله اطالع عمرها بحسره صدق دبه ومن الخاطر بعد كرش وزائد في الخصر وفي الفخذ استاءت دومها حالتها جذيه يوم تشوووف عمرها بدت تلعب تمارين خفيفه علشان تقدر ترقد
دامني يالسه العب تمارين بقولكم بالمختصر عن عايلتنا بالأحرى بيتنا وبيت عمي أول شي أنا واعوذ بالله من كلمه أنا برمسكم عني اليازيه اسمي هالشي عرفتوه عمري 21 سنه متخرجه من سنتين من الثانويه يبت نسبه في الستين لاني مب شاطره ماحبيت ادش كلية التقنيا قاعده في البيت لانه في العايله ماشي شغل الا معلمه امممم امضي وقتي نوم واشووف التلفزيون

وأكل طبعا هيه أنا دبدوبه من الخاطر تبون تعرفون وزني بخبركم بس دخيلكم لا اطالعوني بنظره ما احبها تراني ذكيه افهمها على الطاير وزني 123 كيلوجرام ادري وايد وفي ذمت هلي ادري بس شووو اسووي جسمي قابل للسمنه وطولي 160 سم هذا خبرتكم عني
وحيدة امايه وابوووويه بس ابويه كان متزوج حرمه ثانيه بس طلقها عنده منار على ما اظن 24 سنه وهند السخيفه 19 سنه وثنتيناهن في الجامعه وعندي أخو اسمه سهيل هذا يدرس برا في استراليا من ثلاث سنين
وبالنسبه لبيت عمي تقريبا عرفتوهم بس ابى اول شي اخبركم الميزه في ابووي وعمي انه كل واحد ماخذ له حرمتين يعني مدبل وتبون الصدق اغلب ريال عايلتنا الا الريل اللي بياخذني حامض على بوزه اخليه ياخذ علي
على العموم فارس أكبر واحد من حرمة عمي البكستانيه هذا الوحيد اللي اعرفه لاني وايد اشوفه والباقين من الحرمه الثانيه حتى ما اعرفهم يمكن لانهم يسكنون بعيد عنا وما نتختلط فيهم وايد أما خالتي ام سلطان عندها سلطان عمره على ما اظن 30 سنه وعقبه علي الرجل الصامت اسميه جذيه لانه هادي وايد عمره تقريبا 26 وعقبهم احمد عمره تقريبا 24 سنه هذا لا صامت ولاشي عكس أخووه وبعدين الله يسلم غاليكم خالد هذا ثانويه عامه 18 سنه تبون تعرفون اذله على شووو بخبركم بس لا تخبرون حد شفته في السكه يدخن سيجاره ولو دروا اخوانه والا ابوووه يا سواد ليله والله نصحته بس ما منه فايده اعرفه زين خلونا منه اخر العنقود شاهين فديته 14 سنه احبه وايد خدوم ماشاء الله عليه رمستكم عن الولاد والبنات تعرفونهن شما اللي متخرجه من الجامعه عمرها 25 سنه معلمة رياض أطفال ما عندها مونه ما ادري كيف مستحملتنهم افففففففف اتذكرت الياهل اللي في العرس صدق تنكدت مب لسان عليها اوكيه الحين بكمل لكم مديه فديتها كبري 21 سنه بس انا اكبر عنها بشهرين على العموم هيه في الجامعه كليةعلوم انسانيه اممممم هيه صح محد فيهم معرس اونه بعدهم وحليلها خالتي تباهم يعرسون علشان تفرح ابهم بس هم لاحياة لمن تنادي ان شاء الله ما ثقلت عليكم بس الحين بضبط الساعه على ست علشان اقوم اصلي الفير تصبحون على خير احس الحين اقدر ارقد
يالسه اتغدى ويا امايه وابووويه ومن صلاة الفير وانا ادرس فكره في خاطري اسويها اللي هيه اني اروح مستشفى الجيمي اسوووي رجيم ويا دكتوره فكرت فيها عدل صح حكومي وعاد المستشفيات الحكوميه عندنا مب ذاك الزود بس اذكر شفت صور ربيعتي صالحه يوم عرسها كانت في قمة الرشاقه وهيه كانت دبه ايام المدرسه ويوم سألت شو سوت قالوا لي عالجت في الجيمي بجرب شو الخسرانه
اليازيه :امايه
ام اليازيه ترفع راسها :ها امايه شو تبين
اليازيه :ابى اسوي لي موعد في مستشفى الجيمي علشان اسووي رجيم عندهم
ابواليازيه :ابويه انتي ما عندج اراده ما تقدرين
اليازيه باحباط:ابويه دخيلك متحمسه للسالفه لا تحبطني
ابواليازيه :لا ما احبطج وانا اباج تصيرين غرشوب
ام اليازيه :معليه بنسير انا وياج وبنسجل موعد بس عاده تعرفين مواعيدهم تموتين لين ما ايج يوم الموعد
اليازيه :خلاص عيل بسير انا وياج واسجل موعد ان شاء الله يكون جريب بنحاول فيهم
في التيلفون بالباجر الساعه تسع الصبح
مديه مبتسمه:انتي تسوين رجيم ما اصدق
اليازيه:حرام عليج مدوي شجعيني ليش هالاحباط والله انج مب ربيعة خير انتي
مديه :ههههههههههه
اليازيه:اونه تضحك شو يضحكج الحين
مديه :أحمد موديني الجامعه ويقول بيقطع ايده من العقر لو سويتي رجيم
اليازيه عصبت:يعلها القص ايدينه اقول شي جلبي ويهج انتي واحمدوه الزفت
وبندت التيلفون في ويهااااااااا
الساعه 1ونص الظهر رادات من مستشفى الجيمي
اليازيه :فديت حظي شفتي الموعد عقب ثلاثة أيام
ام اليازيه : هيه والله
اليازيه تلف على امها اللي تسوق:امايه خطفي السويداء الحين بنمر من حذاله يوعانه اليوم ما كلت شي
ام اليازيه :وهذي اللي بتسوي الرجيم
اليازيه :الرجيم مب اليوووم عقب الموعد يعني ثلاثة ايام هالايام ما بحرم عمري
ام اليازيه:باختصار يعني تبين تخزنين
اليازيه :بالزبط كده يا ماما
ام اليازيه تضحك على بنتها وخطفن السويداء وطلبن سندويجات وراحن صووب البيت
بعد ثلاثة ايام في غرفة الانتظار في مستشفى الجيمي
اليازيه تتافف صدق مملات هالمستشفيات على راحتهم ونحن ملطوعين من الصبح واكره بصراحه المستشفيات متعقده منهن بس للظروف احكام تبون تعرفون ليش الله يسلمكم يقهروني يوم ازجم والا أي شي اروح اتعالج عنه يقولون سببه الوزن الزايد عنبو داركم الوزن الزايد اشدخله بالحمى والا عوار الراس يعني الضعاف ما يزجمون
ام اليازيه تهز بنتها: قومي يزي ينادون اسمج
اليازيه :ها
ام اليازيه واقفه :خطفي ينادونج
اليازيه :يلااااا
مشينا انا وامايه والسستر تمشي جدامنا لحد ما وصلنا غرفه ودخلنا اول شي قلناه
:السلام عليكم
الدكتوره :وعليكم السلام تفضلوا
اليازيه تيلس على الكرسي اللي عند المكتب والكرسي البعيد يلست فيه امها
الدكتورة:خير ان شاء الله فيكي ايه
اليازيه اطالعها اونه تسالني فيني ايه وهيه اخصائية تغذيه شو يعني فيني الضغط ما تشوفين بعيونج عميا :بصراحه المكتوب واضح من عنوانه
الدكتوره:هههههه ليه انتي عصبيه كده ما علينا اومي على الميزان اشوف وزنك
نفذت اليازيه هالشي وسارت وركبت الميزان والدكتوره واقفه على راسها اطالع
الدكتورة:ماشاء الله 123 ونص وطولك 160
اليازيه في خاطرها فبل يومين وازنه : زدت نص والخيبه
الدكتورة ترجع على مكتبهاوتمسك ورقه وقلم ....وترد اليازيه تيلس على كرسيها عقب ما لبست جوتيها
الدكتورة تكتب:ما تاكليج الرز ولا الخبز والكولاااا ومشتقاته ولا الشوكليت اعتمدي على الخضار والفواكه حاضر
اليازيه اطالعها في خاطرها اعرف انه كل هذا يمتن انا يايه ابى نظام اسبوعي التزم عليه
الدكتورة :اتفقنا خلاص موعدك بعد شهر تفضلي الورقه وسجلي الموعد عند الرسبشن
اليازيه قايمه متغيضه اخر شي تتوقعه يكون رجيهم جذيه الله ياخذني يوم فكرت ايي حق هذيلااااا
ام اليازيه : يزي ليش تمشين بسرعه تهيديلي
اليازيه تمشي وهيه بركان ثاير
ام اليازيه : يزوي اشفيج معصبه
اليازيه :ما تسمعين هالغبيه شو قالت تحلف بس
ام اليازيه تهز راسها ومشن طالعات من المستشفى من دون ما يسجلن موعد لانه اليازيه ما رضت
في الليل في بيت ابو فارس
ابوفارس :يبونهن ثنتيناهن
ام سلطان :هيه تبى شمه حق ولدها الكبير ومديه اونه حق ولد عمه
سلطان :مب من مواخذينا امايه مالها حريم من عندنا
ام فارس:وانته شو تقول يا ابوسلطان .....ما تحب تزقره ابوفارس تعرفون غيرة حريم وولدها الكبير سلطان
ابوفارس: رمست سلطان ما عقبها رمسه صدقه مب من مواخذينا
ام فارس:خلاص برد عليها .......وتصد عليه :يا ابووي متى بتريحوني ولا واحد منكم راضي يعرس
سلطان ردت امه للموال ويشوف اخووه داخل الصاله :هذا علي وصل رمسيه امايه ....ويوقف:بروح عند ربيعي من رخصتكم
عند الباب
علي يطالع اخوووه :شو السالفه
سلطان بصوت واطي:استلم امك ركبها مره ثانيه شيطان العرس
علي بهدوءه الدايم ما فيه على حشرة امه ويدق راسه بايده اونه ناسي شي :اووه نسيت سيدي البرامج في السياره بروح ايبه
وطلعوا باثنينتهم
ام سلطان تصد على ريلها متغيضه :اتشوف عيالك تشووف سواياهم
ابوسلطان:خليهم على راحتهم يا حرمه
ام سلطان نشت عنه :برايهم انزين يعلهم ما يعرسون بدت حياتهم
ابوسلطان يهز راسه :لا تدعين مب زين دعاء الأم مستجاب
ام سلطان مشت عنه وهو بعد راح يتوضأ بيروح يصلي العشى
اطالع كبتها ممزور ثياب وفساتين بس خلي من التنانير والقمصان طبعا ما تحصل شي على مقاسها في السوق وما تبى تخيط لانها على قناعه تخيطهن مب نفس شرايتهن ردت تيلس على الشبريه درت انه بنات عمها انخطبن من حرمة شافتهن في العرس ابتسمت محد بيفكر فيها وهيه وزنها جذيه من الحريم علشان يخطبها بزوالهن هن الخسرانات ضحكت على رمستها الغبيه وانسدحت ما خذت وقت الا ورقدت
بعد اسبوع في المزرعه يوم الخميس
خالد وأحمد ماسكين بطنهم من الضحك
هيه صدق تعبت من الخاطر وما تقدر تتحرك خطوه زياده لا صوب جدام وردت تصد ورى ولا ورى لانه المزرعه بعيده وهم فوق العراقيب
مديه مبتسمه:يلا يزوي اشفيج
اليازيه يالسه فوق العرقوب:هلكت ما اقدر اتحرك هالعراقيب كبار وهدن حيلي ما اروم امشي يبوا لي ماي
شاهين :انزين نشي بمسكج وبنرد صوب المزرعه
اليازيه والتعب واضح :والله ما اقدر تعبت ما فيني شده
خالد:ههههههه المصيبه محد يقدر يشلج بتكسرين عموده الفقري
اليازيه بغضب:وهو حد طلب منك استاذ خالد هالشي اصلا تخسي تلمسني تفهم
مديه:حرام عليك حمود وخلود ودروها
أحمد:هههههههه خلاص بروح ايب لج ماي من المزرعه
اليازيه متغيضه منه:اقعد ما ابى عقب ما شبعت ضحك
أحمد:شو نسوي لج يوم انتي مستويه بوتمبه ولا تقدرين تتحركين شوفي الرشاقه بتحصلينها عند مدوي ولا جنها ماشيه
مديه :وهبي لا تحسدني
اليازيه وطت راسها تصيح استغربوا كلهم
شاهين عصب:حرام عليكم ...وينزل يلس عدالها :خلاص يزي لا تصيحين بروح ايب ماي وبرد لج
وركض عنهم
أحمد:افا يزوي دومنا نسولف اشفيج زعلتي
اليازيه ما ردت عليه وكلهم يلسوا يتريوا شاهين وهيه ساكته ومنزله راسها ما رمست ولا كلمه عقب يى وعطاها ماي وبعد ما ارتاحت رجعوا صوب المزرعه وهيه تمت زعلانه ما ترمسهم لحد ما ردوا صوب بيوتهم
عقب مشوار المزرعه بيوم قررت تسوووي رجيم ما تريقت وما كلت على الغدا غير خضره هيه يوعانه بس تحاول تصبر عمرها علشان تضعف وتسد حلوج الحثاله ولاد عمها
وعلى الساعه 10 في الليل وصل ابوها وفي ايده كيسة الفوار
ابو اليازيه:لا تقولون تعشيتوا عني
اليازيه اللي صدت عن التلفزيون صوبه :لا
ابو اليازيه يلس عدالها:عيل انا يايب لكم عشى سندويجات
اليازيه بفضول:سندويجات شووو
ابو اليازيه :شيش طااووو وهمبرغر دياي وتكه يلا روحي نادي امج
خلاص اليازيه استسلمت ما تقدر تكمل رجيمها صدق يوعانه وجدام هالسندويجات ما تروم بصراحه راحت تنادي امها وتعشوا وعرفت صدق انه الاراده عندها معدومه
مرن اسبوعين ما راحت بيت عمها اونها زعلانه بس اشتاقت لهم وهيه ملانه لبست شيلتها وطالعه سايره صوبهم ودشت بيتهم قبل ما ادش الصاله
سمعت صراخ :شو شو اليازيه لا حشى ما اباها
وقفت مكانها منو اليازيه انا والا وحده ثانيه وعرفت صوته هذا أحمد ولد عمها
ام سلطان :اشفيها مزيونه واخلاقها ماشاء الله عليهن والكل يتمناها وهيه بنت عمك
أحمد :امايه قلت لج بعرس بس ابى وحده مزيونه كلها عاد اليازيه بصراحه دبه وايد لو طاحت فوووق حد بتفعصه
حست بطعنه بصدرها انجرحت من الخاطر خيبه ليش هالناس ما ترحم مكانها خطأ يمكن حد يطلع ردت صوووب الباب الرئيسي بس شافت سيارة سلطان ما تقدر تطلع خذت نفس ودقت الباب بخفه وهيه تمشي في الحوش
اليازيه رغم حزنها تحاول تخفي:اليازيه وصلت
ودخلت الصاله وحصلت ام سلطان ومديه وشمه وخالد وعلي واحمد ماتت انجرحت كلهم يالسين :السلام عليكم
الكل:وعليكم السلام
مديه:مرحبا بالقاطعه زين اتكرمتي وزرتيناااااا
وسلمت عليهم وحاولت ما اطالع أحمد
أحمد:اشحالج يزي
اليازيه اطالع مديه وراحت تيلس وتحاول تكون قويه :تمام ما نشكي باس علومكم انتوا
الكل: تمااااام
شوووي ودخل سلطان ويلسوا شوووي يسولفون واليازيه خلاص ما تستحمل لازم تروح حيرتها في خاطرها تنفجر من الصياح
ام سلطان:على وين ما تروحين تعشي عندنا عنبو
اليازيه:لا خالو فديتج بروح اكيد امايه تترياني
أحمد:يمكن هناك محيده لها عشى زين عزمينا
اليازيه صدت صووبه مع انه طول اليلسه مب قادره اطالع ويه :لا اخاف ايلس وأكل حصتك يا ولد عمي
احمد:جان جذيه اعرفج تسوينها برايج فارجي
وترخصت عنهم وطلعت ركض صوووب حيرتها خلاص وصلت حدها دموعها بينزلن وعقت عمرها على الشبريه وهيه ميته صياح
عقب ثلاثة ايام وهيه احوالها متغيره شووووي امها ادق باب حيرتها وتدخل
ام اليازيه :اشفيج يا بنتي اشووف هالأيام مب عايبتني
اليازيه تعدل يلستها:ما فيني شي امايه
ام اليازيه :اليوم ياتني حرمة تبى تخطبج حق ولدهااااا
اليازيه اطالع امها :شوووو
ام اليازيه :وهم بصراحه من عرب و اصل وفصل وحشام ......
واليازيه سرحانه ما تسمع من رمست امها شي يالسه تفكر بأحمد ولد عمها السخيف غيرك آلاف مب من زينك انته علشان اريدك اصلاااا انا لو خطتبتني ما اريدك
ام اليازيه :ها يا بنتي شو قلتي وهم يبون يشوفونج باجر في الليل بيون
اليازيه واحمرار في خدودها :منو هم
ام اليازيه :امه وهو المعرس
اليازيه فاجه عينها :وابويه وافق
ام اليازيه:هيه وافق انتي بتكونين لابسه عباتج وشيلتج ادخلين يشوفج وتطلعين ما بتبرزين وياهم
اليازيه اطالع امها :وانتي شو تقولين امايه
ام اليازيه :هم ناس زينين والكل يمدح فيهم بس ..
اليازيه اطالعها:بس شوو
ام اليازيه :هو من سنتين مسووي حادث ويد وحده منقطعه انا قلت لابوج بس هو قال انه ريال والنعم
اليازيه ساكته لحظه يد وحده منقطعه بس اشفيها عااادي يمكن يكوون ريال طيب وهاللحظه اللي انتقم منها من أحمد:عادي امايه باجر ان شاء الله بكون جاهزه
بالباجر بنات عمها عندها اللي انقطعت عنهن من ثلاثة ايام من بعد ما سمعت رمست اخوهن اللي تسد البدن ومستانسات لها من الخاطر وعلى الليل وصلوا الضيوف واستقبلوهم ابوها وعمها وولاده
نزلت هيه بعد ماقالت لها امها علشان يشوفنها امه وأخته
ويلست شووي وياهن وطلعت وأمها نفس الشي عقب ما سمعت ريلها يزقرها
في ميلس الحريم
البنت تصد على امها بصووت واطي :امايه متينه البنيه
الأم :بس مزيونه وويها اشرح
البنت مب راضيه :لا امايه متينه وايد اشوفها ما تناسب جاسم

الأم :الله يجدم اللي فيه الخير
واقفه عدال ابوها لابسه عباتها وشيلتها ودخلت الميلس اللي دخل ابوها المعرس فيه
اليازيه بخجل:السلام عليكم
جاسم رفع راسه :وعليكم السلام
ابو اليازيه :يا ولدي هذي اليازيه
جاسم يطالعهاااا
اليازيه خلاص بتموت من المستحى صح هيه مارفعت راسها بس خلاص تحس عمرها ما تقدر تقعد اكثر:عن اذنكم ...........وطلعت
بعد ما ترخصوا الضيوف يالسين هم وقوم عمها في الصاله يسولفون عن ضيوفهم
شما:ويزي بتعرس انزين صبري اعرس انا اكبر عنج بعدين عرسي
اليازيه ابتسمت :ما عندي مانع
شما:بتعنسين عيل
ام اليازيه:بسم الله عليكن من العنوسه خل عنكن ودرن هالرمسه
يلا قوموا بنتعشى
نشن البنات يساعدن في تجهيز السفره واليازيه مبتسمه وفرحانه من الخاطر
شاهين:مبروك العروس
اليازيه:بدري عليها هالكلمه
أحمد:افا شو بدري عليها خلاص انخطبتي
اليازيه ما ردت عليه وراحوا يتعشوا عقب كل واحد سار صوب بيته
بالباجر العصر
يالسه في الصاله اطالع التلفزيون ومصممه انها خلاص اتخف علشان تطلع شي في الملجه والعرس تدخل عليها امها
ام اليازيه :السلام عليكم
اليازيه :وعليكم السلام
ام اليازيه تيلس وشكلها مب مرتاح
اليازيه :اشفيج امايه
ام اليازيه مب عارفه شو تقول لبنتها :اليازيه ردوا علي اليوم اللي ياين يخطبونج
انتفض قلب اليازيه ما تبى الملجه قريب ليكون يبونها الاسبوع الياي :شو قالوا لج
ام اليازيه :اونه يستسمحون ابوه لزم عليه ياخذ بنت عمه
اليازيه انصدمت اخر شي توقعته هالرد بس ردت لطبيعتها على السريع وابتسمت بسخريه :لا مب هالسبب ما يدخل العقل انا اخبرج ليش؟ هم يوم شافوني ما عيبتهم والا بنت عمه هذي مب صدق يجذبون
ام اليازيه بعصبيه :رضينا بالهم والهم ما رضابنا يخسون الا هم ودهم ظفر من ريولج
اليازيه تنزل دموعها شي أكبر من هذي اهانه :امـــــــــايه ......وتمت تصيح
ام اليازيه تلوي عليها : يزوي فديت قلب امج ماتصيحين ناس ما يستاهلون دمعه من دموعج اطيح علشانهم
وبسرعه انتشر الخبر والكل درى بهالشي وين بنات عمها يواسنها بس هيه رفضت تقابل حد
في صالة بيت ابو فارس
ام سلطان :والله فوادي يتقطع عليها صدق ما تستاهل
سلطان بغضب:كله من عمي والا ما بيوافق تطلع جدام الولد جان يبونها امه واخته يشوفونها هو اللي فضح عمره لو اهل الولد شافوها بس ما بتكبر السالفه وياخذونها بهالحساسيه الزايده
علي:صدقه سلطان عمي غلطان
مديه :وهيه الحين مب راضيه ترمس حد
شاهين:يعله النفاد هو وده وحده شراتها
أحمد:هههه اشتغل المحامي الاول عنهاااااا
خالد:عاد أحمد مب وقته والله انها تنرحم واليازيه الكل يتمناها
شما:الله يعينها ان شاء الله......... بس اليازيه قويه ازمه وبتمر
في بيت ابواليازيه يالسين هو وحرمته في الحيره
ابو اليازيه:احس انه كله مني انا اللي عرضت بنتي لهالشي بس قلت دامها متستره وهم طالبين هالشي عادي يشوفها
ام اليازيه :هيه من درت حابسه عمرها ومب راضيه تاكل شي او ترمس حد
ابو اليازيه يهز راسها :خليها لحد ما تهدئ اليازيه قويه ومايهزها ما تزعل على حد ما يستاهل
ام اليازيه :بقوم اروح اشوفها اطمن عليها
وطلعت عنه
مرن ثلاثة أيام تحسنت حالتها شوووي بس ما طلعت لحد وما حبت تشوف بنات عمها
اليازيه: ابويه ادخيلك هناك برتاح أكثر
أبو اليازيه يتنهد :خلاص أبويه ان شاء الله نحن نبى راحتج
اليازيه تبتسم بهدوء:تسلم أبووويه متى بنروح
أبو اليازيه :يلا جان تبين الحين بس كم يوم تبين تقعدين هناك
اليازيه:بشوف ابويه لين ارتاح شوويه ترى ما ورايه لا جامعه ولا شي
ابو اليازيه:بس لا تنسين يوم ايي ولد خالج ترجعين تفهمين ما يحتاي اخبرج
اليازيه:ان شاء الله ابووويه
الساعه سبع المغرب يالسه تركب سيارة أبوها
ام اليازيه:تحملي على عمرج حبيبتي وسلمي على يدج ويدتج
اليازيه:ان شاء الله أمايه
ام اليازيه : عاد لا تطولين عليه تعرفين ما اروم استغنى عنج
اليازيه ابتسمت :ان شاء الله الغاليه فمان الله دخلي عن البرد
أم اليازيه:ما عليج منيه يلا برايكم ربي يحفظكم
ومشت سيارتهم وتوها أم اليازيه تبى تدخل
أحمد :هلا خالتي اشعندج واقفه هنيه
ام اليازيه :لا ما شي فديتك توهم عمك و اليازيه سايرين صوب يدودها
أحمد :هيه شي طيب الا لو طلعوا من العصر بيردون ليل
ام اليازيه:باجر عمك بيي وهيه بتيلس هناك عند يدودها
اليازيه يطالعها وعاقد حياته :شو تسوي هناك
أم اليازيه :تبى تيلس عندهم اونه تريح شووي وينها أمك داخل
أحمد:هيه يالسه هيه وشيبتها في الصاله برايج انا مروح عند الربع
يالسه اتمشى في بيت يدي من زمان ما ييت ايلس وياهم والسبه وجود ولد خالي فلاح هم اللي ربوه لانه خالي ومرته ماتوا في حادث سياره يوم هو صغير الله يرحمهم يا رب
اليده :يزي
اليازيه تصد على يدتها :نعم الغاليه
اليده : بتروحين ويايه صوب العزبه
اليازيه استانست :هيه منو بيودينا
اليده :شو منو بيودينا بعد بنروح نمشي انا وياج ويدج والبشكار
اليازيه بملامح حزينه:شو غيرتوا مكانها
اليده :لا مكانها ما تغير يلا اتزهبي
اليازيه :انزينه وينه عيل ابويه لو يودينا هو زين يدي ما فيه شده
اليده :لالا ما نبى سيارات وبعدين ابوج رايح صووب ولد عمه يشووفه وبيتعشى عندهم جنه المشي مب يايز لج
اليازيه :لا عادي يدوه بروح البس شيلتيه ويايه
تزهبنا وبدينا نمشي الجو فنان اطالع يدوه ماشاء الله عليها متجدمتنا ولا جنه وياها عاطتنا بولباس الله يعطيها الصحه يا ربي سمعت كحه صديت على يدي
اليازيه توقف:اشفيك يدي
اليد:تعبت ما اقدر امشي زود
اليازيه تصد على يدتها:يدوه
اليده تصد عليها:شو تبين
اليازيه :يدي تعب من المشي
اليده تيي صوبهم:يا الهشويبه مب من شي من المدواخ اللي يدوخه رد انزين نحن بنكمل الدرب
اليازيه اطالع يدها ما فيه شده يرد حرام عليها
اليده ترمس الهندي:حمود ييب جيس معشى الهوش وانته شل بابا البيت وتعال بعدين عزبه
اليازيه بانت ملامح الخوف:بنروح اروحنا
اليده:انا بنتك ابويه انزين لو رحنا اروحنا شو بيستويبنا ثره يلا تجدمي
وانته شله على ظهرك واسرح صوب البيت ولا تتأخر ظنتي يزي مب منها فايده وانا ما اقدر احط أكل للهوش اروحي
ومشت واليازيه اطالع يدتها ولا حتى كلفت عمرها تسأل عن هالشويبه المسجين قويه هالعيوز الله يعيني لو تدري اني أخاف الهوش شو بتسويبي
بالباجرالساعه ثلاث ونص العصر متسدحه على الشبريه احسني متكسره الله يرحمني من هاليده ابوي اليوم الصبح راح صوب ديارنا بغيت اروح وياه بس استحيت انا قايله لهم من امس اني يايه ايلس عندهم كم يوم ثرني ما بستحمل القعده هنا بس الشي الوحيد اللي مريحني من امس لحد اليوم ما تذكرت سالفة الخطبه المشؤمه اللوم كله على الحقير احمد الله ياخذه لو ما سمعت رمسته الوصخه كنت انا بخير
انفتح باب الحيره
اليده:شو يزي راقده
اليازيه تغمض عينها
اليده سكرت الباب وطلعت
اليازيه فجت عينها شو تبى هذي بعد امس رقدت من الساعه ثمان من هلاك المشي صوب عزبتها ويوم ردينا قالت لي اسوي العشى وياها واليوم الفير مقعدتني ودخلت اسوي الريوق وعلى الساعه تسع ونص دخلتني المطبخ للغدا هلكت والغم الأكثر انه ما شي تيلفزيون ابى ارقد ارتااااااااح ما فيني اسير العزبه اعرف موعدها القايله وين تبى تروح ؟؟
الساعه خمس ونص العصر نشيت بس ما حصلت حد في البيت اكيد في العزبه بعدهم والشويبه ساحبتنه وياها العيوز الله يهديها بس
...........:يديده انا ييت حبيبج وصل
اختضيت من الخوف منوووو صديت على الباب تفاجأت يوم شفته:فلاح
فلاح يطالعها:اليازيه انتي هنيه
اليازيه حطت ايدها على راسها الشيله ما شي راحت ركض صوب الحيره بعد شوووو لبست شيلتها فشله لوما طلعت وردت الصاله :الحمدالله على السلامه
فلاح:الله يسلم غاليج اشحالج ما شاء الله هنيه
اليازيه :هيه والله من أمس
فلاح:عيل وينها عمتيه
اليازيه :مب هنيه في العين بس أنا الموجوده
شوووي تدخل اليده وعقبها دخل اليده وسلموا على فلاح اللي اتفاجؤ انه رد بس هو حصل اجازه شهر ويى واستانسوا وراحت اليازيه ويدتها تسوي العشى
الساعه ثمان ونص الصاله فضت ما بقى الا اليازيه وفلاح وهيه منحرجه لازم ترد العين دامه فلاح وصل ابوها لو درى بيزعل عليها قطع الصمت
فلاح بابتسامه :من زمان اليازيه ما شفناج تغيرتي وايد
اليازيه في خاطرها عوذ بالله بيبدى يغايضني اني دبه فلاحووو اعرفه :حتى انته تغيرت
فلاح :ما بغيتي اتكملين دراستج
اليازيه بوزت:لا يالسه بطاليه اكل وارقد
فلاح ابتسم :ليش ما اشتغلتي انزين
اليازيه:لا والله وانته ادرى بابويه وولاد عمي
فلاح :صح شخبار عيال عمج محد عرس فيهم
اليازيه :فارس بس
فلاح :اها
اليازيه:شخبار شغلك
فلاح :تمام اتخبرج ما شفتج تتعشين تسوين رجيم
اليازيه ضربها على الوتر الحساس :لا ما عندي اراده والا في خاطري اسوي رجيم
فلاح :ممكن اسألج سؤال
اليازيه حست من نبرته سؤال مب هين:تفضل
فلاح:ليش انتي قاعده هنيه وشو تقصد يدوه برمستها على العشا يوم تقول ما عنده مونه منووو هذا
اليازيه وطت راسها وعضت على شفايفها
فلاح :عادي جان ما تبين تجاوبين
اليازيه رفعت راسها وفي عيونها الدموع وخبرته عن سالفة الريال اللي تجدم لها
فلاح بعصبيه :هو وده التراب اللي توطي انتي عليه يعله النفاد ليش تصيحينه
اليازيه اشفيه يصارخ عليه هذا تخبل
فلاح بصوت اهدئ:منو ما يتمنااااج انتي يزوي يسد روحج الحلووه
اليازيه استحت من رمسته ومسحت دموعها بهدوء ونشت واقفه :تصبح على خير
فلاح وطى راسه :وانتي من أهل الخير
شاهين :راحت بيت يدها
مديه يالسه على الكومبيوتر :هيه
شاهين :متى بترد
مديه:ما اعرف بتم هناك مده ما اعرفها
شما تسحي شعرها :جيه ما جنه فلاح هناك كيف عمي رضى
مديه :ما ادري اتقول امها انه فلاح مسافر مب موجود في البلاد
أحمد يدخل الحيره :انزين عاد هناك النفسيه بترتاح يعني
شما :صح منو امايه اللي اختارتها لك
أحمد:موزه بنت اليييران
مديه :لو بتاخذ اليازيه مب ابرك لك
أحمد :ما اباها على كيفي مب حرمتي بتكون من غير انها دبه لسانها طويل
شما:بس في الزين والجمال ما عندها منافس
احمد:اول مره اشوف بنيه تتنازل عن حقها في الجمال غريبه شمووه انتي
شاهين يطالع اخووه :تنكر هالشي
أحمد يطالعه:لا بصراحه
شاهين:هيه اصلاااا ما تباك اعرفها زين
أحمد عصب :هيه ودها اني اخذها
مديه:راسي يعورني ما فيني على حشرتكم يلا برا
بالباجر العصر
فلاح :انزين ما لازم تخبرينهم اني موجود
اليازيه :احلف بس انا شو يقعدني هنيه
فلاح :يزوي انزين بخبرج بشي حلو بس توعديني انج اتمين ويانا ترا يدي ويدوه هنيه شو بكلج انا
اليازيه :شو عندك

فلاح :بوديج مركز تسوين رجيم عنده ويعطيج حبوب ويسوي لج تمارين وشهرين وتوصلين للي تبينه
اليازيه:احلف
فلاح:والله اشرايج ها بتروحين
اليازيه :بعيد هو المركز
فلاح:لا ربع ساعه عن هنيه مب بعيده بتروحين الحين
اليازيه:هيه بروح اشوف يدتيه
فلاح:اوكيييه انا اترياكن
وراحوا وسوووت فحوصاااات ورمست ويا الدكتور وعطاها الرجيم وحدد لها تمارين رياضيه اربع ايام في الاسبوع وهيه استانست وايد وقال لها خلال الشهرين لو التزمت بتوصل لجسم حلوووو
اليده:عاااد هذا عايبنج
اليازيه:هيه يدوه وينه فلاح
اليده:راح يزهب جنطته بيسافر
اليازيه باستغراب :وين بيروح مب عنده اجازه شهر
اليده:هيه بس اوين دقوا له يرد
اليازيه تنش :هيه برايج يدوه بروح حيرتيه
راحت بس قبل ما تدخل حيرتها راحت صوووب حيرة فلاح ودقت الباب
فلاح مستغرب منو بيدق الباب يى وفجه:اليازيه
اليازيه :بتروح
فلاح ابتسم:حكم القوي شو نسووووي المهم ارتحتي الحين لازم تلتزمين بالرجيم
اليازيه بامتنان:مشكور فلاح
فلاح:ولو على فكره علشان خاطرج سويت هالشي لانه بنظري الانسان مب بشكله مع انه شكلج طبعا ما عليه رمسه
شلت ايدها تبى تضربه وابتعد عنها :هههههههه الانسان بشخصيته وانتي......
اليازيه هذا بدا يخورها :روح كمل جنطتك تروح وترد بالسلامه
فلاح:هههههههههه سويتيها الشرده هاا
اليازيه مشت عنه بسرعه صوووب حيرتها
مرن شهرين وانا في صراع فضيع ويا الأطعمه بس الفرحه ما تفارقني كل ما اشوف عمري في المرايا استانس من قلب انا عند يدي ما رحت العين امايه وابووي زعلانين بس دامني مستانسه والبوس يدتي ويايه محد يروم يرمس ويقول شي خاصه انه فلاح محد في البيت هالشخص من خاطري ابى اشكره كلماتي تعجز عن شكره وصل وزني 85 صح بعده بس جسمي صاير حلووووووو بوايد عن قبل وشريت كذا بدله تنوره وقميص وطلعن ترتوب هيه قوم عمي ما شفتهم مع انه دومهن يدق لي عتبانات بس ما ابى ارد هناك علشان ما اشوووف أحمدوووه مع انه خطب موزه بنت ييرانهم وباجر ملجته ولازم احضر والا الكل بيزعل علي
بالباجر الساعه ثمان ونص
هندوه البقره اول ما شافتني حطت ايدها على ثمها من الصدمه محد يدري اني سويت رجيم والكل انبهر يووم شافني مب مصدقين حتى امايه رغم انها شافتني كذا مره خلال الشهرين الا انها شاقه الحلج طالعه مسكته جسم وشكل
صديت على العروس اطالعها واضح عليها امزر عني لانها قصيره تشمت على احمد بس استغفرت ربي وقلت برايه شو اباه
على الساعه عشر دخل يلبسها الشبكه وهو مستانس وشاق الحلج
رحت صوبهم بهدوء علشان اسلم طبعا لابسه عباتي وشيلتي
اليازيه بابتسامه:مبروك ولد عمي
أحمد يرفع راسه:يزوي
اليازيه تصد على موزه وباستها :مبروك حبيبتي
موزه بابتسامه هاديه:الله يبارك فيج وعقبالج
ابتسمت اليازيه بهدوء وابتعدت وهو منصدم من زمان ما شافها اشياها ضعفت جذيه طالعه تخبل
موزه:بتاكلها بعيونك
أحمد:.........
موزه بعصبيه:أحمد
أحمد:ها
موزه :لو خذته عيل دامك جذيه اتخبلت يوم شفتها
أحمد بعصبيه نش من مكانه وطلع من الصاله
بعد مرور يومين من الملجه
اليازيه تمت في العين ما ردت عند يدتها دق الجرس لبست شيلتها تشوووف من ياي استغربت يوم شافته واستانست من الخاطر
فلاح بابتسامه:مــــــــــا اصدق
اليازيه:ههههههه التزمنا وكله بفضلك فلاح
فلاح :شخبارج
اليازيه :تمام متى وصلت
فلاح : البارحه الساعه ثلاث الفير وعاد ما قدرت ما ايي اشوفج
اليازيه احمر ويها :تفضل
فلاح :اليازيه انا من زمان مفكر اخذج لو خطبتج بتوافقين علي
اليازيه فاجه عينها فاجاها برمسته ابتسمت عقب دخلت عنه
فلاح خطب اليازيه من ابوها وانتشر خبر الخطبه والكل استانس واقف جدام باب الصاله
أحمد:اليازيه بطلق موزه علشانج
اليازيه بعصبيه:انته ما تخاف ربك بعدين ليش ما حليت في عينك الا الحين
أحمد:اليازيه حرااام عليج احبج صدقيني
اليازيه تبى تبرد النار اللي بقلبها:بس انا أحب فلاح
أحمد بعصبيه :أنا ولد عمج وأحق
اليازيه:هههه تضحكني بصراحه مب انته قايل هذي لو طاحت فوق حد بتفعصه ودومك تطنز علي تتحراني ما سمعت انته جرحتني بكل كلمه انته خليتني اوافق على جاسم انته اللي خلتني امر بمرحله صعبه بحياتي عقب ما رفضني انته سبب التعاسه اللي عشتها الشهور الماضيه الحين ياي تقول تباني روح الله ييسر عليك
وبعدين فلااااح بغى روح اليازيه شخصيتها مب شكلها عن اذنك
أحمد دق ايده على الباب بعصبيه خسرها بغباءه هو كان يحب شخصيتها بس بتفاهته واهتمامه بالمظاهر اكثر من الداخل خسرهاااا للابد
بعد ثلاث شهور
واقفه بكل شموخ على الاستيج وتستعرض بكل شموخ والكل يمدح فيها والبنات يحسدنها على هالطله اللي طلعت عليها مشت بهدوء وهيه مستانسه من الآخر انه الله رزقها بريال مثل فلاح طلع يحب التراب اللي تمشي عليه من زمان من يوم كانوا صغار ومحتفظ بصورها وأشياء وايد خاصه بها يوم كانت صغيره من غير هو اللي ساعده توصل لحد هنيه
ابتسمت وبصوت واطي ونبره موسيقيه:وجدت ارادتي أخيرا

النهايه

11-05-08, 07:56 PM

المشاركة رقم: 2

المعلومات
الكاتب:	اقدار
اللقب:	أميرة الرومنسية

البيانات
التسجيل:	May 2007
العضوية:	29213
المشاركات:	2,295
الجنس	أنثى
معدل التقييم:
نقاط التقييم:	250

االدولة

مدونتي

الإتصالات
الحالة:
وسائل الإتصال:

كاتب الموضوع : ارادة الحياة المنتدى : القصص المكتمله

ام احمد الله يعافيك على الجهود اللي تبذلينها

انا واثقة من ذوقك

احس القصص اللي تحبينها تسيطر فيها الأحاسيس ووصف الذات الانسانية

ان شاء الله وقتي يساعدني واقرأها واعلق عليها ..

حبيت بس اشكرك على جهدك المكثف وحرصك على رقي القسم ..

الله يخليك لكل من يغليك ..

ودي وخالص الامنيات لكِ بالتوفيق

السلام عليكم اقدار
نورتي والله

مشكورة على هذه الكلمات الرائعة

بصراحة انا أرى اصعب صراع ممكت يخوضه الانسان هو صراعة مع ذاته لذلك تجدين دائما ابحث عن هيك مواضيع حتى افيد واستفيد

اسعدني مرورك وان شاء الله يتوفرلك الوقت لتقرئي وتعطينا رئيك

تمنياتي لك بالتوفيق

التعديل الأخير تم بواسطة ارادة الحياة ; 13-05-08 الساعة 02:17 PM

11-05-08, 11:05 PM

المشاركة رقم: 3

المعلومات
الكاتب:	ميثان
اللقب:	ليلاس متألق

البيانات
التسجيل:	Feb 2008
العضوية:	63902
المشاركات:	1,376
الجنس	أنثى
معدل التقييم:
نقاط التقييم:	19

االدولة

مدونتي

الإتصالات
الحالة:
وسائل الإتصال:

كاتب الموضوع : ارادة الحياة المنتدى : القصص المكتمله

السلام عليكم اراده

قصه جدا رائعه تتحدث عن صراع الازلي للفتيات مع السمنه المفرطه .

في البدايه اراده اعتقدت ان اليازيه ريانه شوي ولكن تفاجات انه طولها 160 ووزنها 123 كيلو

وااااااااااااااو بلمررررررررره كثير ما الومها يوم انها ماقدرت تواصل مشي في المزرعه عن جد لام الله من لامها

حششششششى ايش تاكل --^--

يعني ممكن يصير منها اثنين في الوزن الطبيعي (خخخخخخخخ ...............

عموماً شبابنا هذه الايام مقومات الزوجه الصالحه كالاتي :

1- الجمممممممممااااااال

2- الرششششششششااااااااااقه

والا فلالالالالالا .........

يعني الدوووووووبه تروح في الرجليييييييين والله يرحمها ........

لكن الجسم والجمال مو كل شئ ...........( بس مين يسسسسمع )

الجمااااااال حتى يكتمل لابد من الرووووح والنفس الطيبه

والروح الحلوه لابأس ان دعمناها ولو بقليل من الجمال

اليازيه لم تكن لديها الاراده القويه وذلك بسبب عدم وجود الحافز والدافع القوي

ولكن للحظه اجتمعت عليها الضغوط

1- رفض احمد الاقتران بها والسبب السسسسسمننننننه

2- تراجع العريس المعاق والسبب السسسسمننننننننه

فولد الحافز مكتملاً ومن ثم اتت الاراده القويه لاثبات الذات

مشكوووره اراده على القصه المبهجه وجعل الله السمنه من طريق ونحن من طريق اخر

13-05-08, 02:49 PM

المشاركة رقم: 4

المعلومات
الكاتب:	ارادة الحياة
اللقب:	عضو ماسي

البيانات
التسجيل:	Oct 2007
العضوية:	53753
المشاركات:	10,517
الجنس	أنثى
معدل التقييم:
نقاط التقييم:	740

االدولة

مدونتي

الإتصالات
الحالة:
وسائل الإتصال:

كاتب الموضوع : ارادة الحياة المنتدى : القصص المكتمله

اقتباس :- المشاركة الأصلية كتبت بواسطة ميثان
السلام عليكم اراده قصه جدا رائعه تتحدث عن صراع الازلي للفتيات مع السمنه المفرطه . في البدايه اراده اعتقدت ان اليازيه ريانه شوي ولكن تفاجات انه طولها 160 ووزنها 123 كيلو وااااااااااااااو بلمررررررررره كثير ما الومها يوم انها ماقدرت تواصل مشي في المزرعه عن جد لام الله من لامها حششششششى ايش تاكل --^-- يعني ممكن يصير منها اثنين في الوزن الطبيعي (خخخخخخخخ ............... عموماً شبابنا هذه الايام مقومات الزوجه الصالحه كالاتي : 1- الجمممممممممااااااال 2- الرششششششششااااااااااقه والا فلالالالالالا ......... يعني الدوووووووبه تروح في الرجليييييييين والله يرحمها ........ لكن الجسم والجمال مو كل شئ ...........( بس مين يسسسسمع ) الجمااااااال حتى يكتمل لابد من الرووووح والنفس الطيبه والروح الحلوه لابأس ان دعمناها ولو بقليل من الجمال اليازيه لم تكن لديها الاراده القويه وذلك بسبب عدم وجود الحافز والدافع القوي ولكن للحظه اجتمعت عليها الضغوط 1- رفض احمد الاقتران بها والسبب السسسسسمننننننه 2- تراجع العريس المعاق والسبب السسسسمننننننننه فولد الحافز مكتملاً ومن ثم اتت الاراده القويه لاثبات الذات مشكوووره اراده على القصه المبهجه وجعل الله السمنه من طريق ونحن من طريق اخر

السلام عليكم ميثان

مشكورة على هذا المرور الرائع
فعلا اصبح المضهر الخارجي مهم في هذا الوقت واصبحت الرشاقة هاجس كل النساء بمختلف الاعمار
والشخص البدين في هذا الوقت كارثة الله يعينهم ويقوي ارادتهم حتى يتخلصو من هذا المرض
ابعدنا الله عن السمنة وقوى ارادتنا لمكافحتها

تحياتي القلبية لك
وشكرا على هذا التواجد الرائع

11-06-08, 07:54 AM

المشاركة رقم: 5

المعلومات
الكاتب:	لقافتي سر ثقافتي
اللقب:	ليلاس متالق

البيانات
التسجيل:	Jun 2008
العضوية:	78291
المشاركات:	1,164
الجنس	أنثى
معدل التقييم:
نقاط التقييم:	20